Sutra Navigation: Jambudwippragnapati ( જંબુદ્વીપ પ્રજ્ઞપ્તિ સૂત્ર )

Search Details

Mool File Details

Anuvad File Details

Sr No : 1107814
Scripture Name( English ): Jambudwippragnapati Translated Scripture Name : જંબુદ્વીપ પ્રજ્ઞપ્તિ સૂત્ર
Mool Language : Ardha-Magadhi Translated Language : Gujarati
Chapter :

वक्षस्कार ५ जिन जन्माभिषेक

 Translated Chapter :

વક્ષસ્કાર ૫ જિન જન્માભિષેક
Section : Translated Section :
Sutra Number : 214 Category : Upang-07
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं तासिं अहेलोगवत्थव्वाणं अट्ठण्हं दिसाकुमारीमहत्तरियाणं पत्तेयं-पत्तेयं आसनाइं चलंति। तए णं ताओ अहेलोगवत्थव्वाओ अट्ठ दिसाकुमारीओ महत्तरियाओ पत्तेयं-पत्तेयं आसनाइं चलियाइं पासंति, पासित्ता ओहिं पउंजंति, पउंजित्ता भगवं तित्थयरं ओहिणा आभोएंति, आभोएत्ता अन्नमन्नं सद्दावेंति, सद्दावेत्ता एवं वयासी– उप्पन्ने खलु भो! जंबुद्दीवे दीवे भयवं तित्थयरे, तं जीयमेयं तीयपच्चुप्पन्नमनागयाणं अहेलोगवत्थव्वाणं अट्ठण्हं दिसाकुमारीमहत्तरियाणं जम्मनमहिमं करेत्तए, तं गच्छामो णं अम्हेवि भगवओ जम्मनमहिमं करेमो त्तिकट्टु एवं वयंति, वइत्ता पत्तेयं-पत्तेयं आभिओगिए देवे सद्दावेंति, सद्दावेत्ता एवं वयासी–खिप्पामेव भो देवानुप्पिया! अनेगखंभसय-सन्निविट्ठे लीलट्ठियसालभंजियागे, एवं विमानवण्णओ भाणियव्वो जाव जोयणविच्छिन्नेदिव्वे जानविमाने विउव्वह, विउव्वित्ता एयमाणत्तियं पच्चप्पिणह। तए णं ते आभिओगिया देवा अनेगखंभसयसन्निविट्ठे जाव पच्चप्पिणंति। तए णं ताओ अहेलोगवत्थव्वाओ अट्ठदिसाकुमारीमहत्तरियाओ हट्ठतुट्ठचित्तमानंदियाओ पत्तेयं-पत्तेयं चउहिं सामाणिणयसाहस्सीहिं चउहिं महत्तरियाहिं जाव अन्नेहि य बहूहिं देवेहिं देवीहि य सद्धिं संपरिवुडाओ ते दिव्वे जानविमाने दुरुहंति, दुरुहित्ता सव्विड्ढीए सव्वजुईए घनमुइंग-पणवपवाइयरवेणं ताए उक्किट्ठाए तुरियाए चवलाए जइणाए सीहाए सिग्घाए उद्धुयाए दिव्वाए देवगईए जेणेव भगवओ तित्थगरस्स जम्मननगरे जेणेव भगवओ तित्थयरस्स जम्मनभवने तेणेव उवागच्छंति, उवागच्छित्ता भगवओ तित्थयरस्स जम्मनभवनं तेहिं दिव्वेहिं जानविमानेहिं तिक्खुत्तो आयाहिण-पयाहिणं करेंति, करेत्ता उत्तरपुरत्थिमे दिसीभाए ईसिं चउरंगुलमसंपत्ते धरणियले ते दिव्वे जानविमाने ठवेंति, ठवेत्ता पत्तेयं-पत्तेयं चउहिं सामानियसाहस्सीहिं जाव सद्धिं संपरिवुडाओ दिव्वेहिंतो जानविमानेहिंतो पच्चोरुहंति, पच्चोरुहित्ता सव्विड्ढीए जाव दुंदुहिनिग्घोसनाइएणं जेणेव भगवं तित्थयरे तित्थयरमाया य तेणेव उवागच्छंति, उवागच्छित्ता भगवं तित्थयरं तित्थयरमायरं च तिक्खुत्तो आयाहिण-पयाहिणं करेंति, करेत्ता पत्तेयं-पत्तेयं करयलपरिग्गहियं सिरसावत्तं मत्थए अंजलिं कट्टु एवं वयासी– नमोत्थु ते रयणकुच्छिधारिए जगप्पईवदाईए सव्वजगमंगलस्स चक्खुणो य मुत्तस्स सव्व-जगजीववच्छलस्स हियकारग मग्गदेसिय पागड्ढि विभुपभुस्स जिनस्स नाणिस्स नायगस्स बुद्धस्स बोहगस्स सव्वलोगनाहस्स निम्ममस्स पवरकुलसमुब्भवस्स जाईए खत्तियस्स जंसि लोगुत्तमस्स जननी धन्नासि पुण्णासि तं कयत्थासि, अम्हे णं देवानुप्पिए! अहेलोगवत्थव्वाओ अट्ठ दिसाकुमारी-महत्तरियाओ भगवओ तित्थगरस्स जम्मनमहिमं करिस्सामो, तण्णं तुब्भाहिं ण भाइयव्वंतिकट्टु उत्तरपुरत्थिमं दिसीभागं अवक्कमंति, अवक्कमित्ता वेउव्वियसमुग्घाएणं समोहण्णंति, समोहणित्ता संखिज्जाइं जोयणाइं दंडं निसिरंति, तं जहा–रयणाणं वइराणं वेरुलियाणं लोहियक्खाणं मसार-गल्लाणं हंसगब्भाणं पुलगाणं सोगंधियाणं जोईसरयाणं अंजणाणं अंजनपुलगाणं रययाणं जाय-रूवाणं अंकाणं फलिहाणं रिट्ठाणं अहाबायरे पोग्गले परिसाडेंति, परिसाडेत्ता दोच्चंपि वेउव्विय-समुग्घाएणं समोहण्णंति, समोहणित्ता संवट्टगवाए विउव्वंति, ... ... विउव्वित्ता तेणं सिवेणं मउएणं मारुएणं अणुद्धुएणं भूमितलविमलकरणेणं मनहरेणं सव्वोउयसुरभिकुसुमगंधाणुवासिएणं पिंडिमणीहारिमेणं गंधद्धुरेणं तिरियं पवाइएणं भगवओ तित्थयरस्स जम्मनभवनस्स सव्वओ समंता जोयणपरिमंडलं, से जहानामए– कम्मगरदारए सिया तरुणे बलवं जुगवं जुवाणे अप्पायंके थिरग्गहत्थे दढपाणि पाय पिट्ठंतरोरु परिणए घण निचिय वट्ट वलियखंधे चम्मेट्ठग दुघण मुट्ठिय समाहय निचियगत्ते उरस्सबलसमन्नागए तलजमल जुयलबाहु लंघण पवण जइण पमद्दणसमत्थे छेए दक्खे पत्तट्ठे कुसले मेधावी निउणसिप्पोवगए एगं महं दंडसंपुच्छणिं वा सलागाहत्थगं वा वेणुसलाइयं वा गहाय रायंगणं वा रायंतेउरं वा आरामं वा उज्जाणं वा देवउलं वा सभं वा पयं वा अतुरियमचवलमसंभंतं निरंतरं सुनिउणं सव्वतो समंता संपमज्जेज्जा। एवामेव ताओ दिसाकुमारीमहत्तरियाओ जं तत्थ तणं वा पत्तं वा कट्ठं वा कयवरं वा असुइमचोक्खं पूइयं दुब्भिगंधं तं सव्वं आहुणिय-आहुणिय एगंते एडेंति, एडेत्ता जेणेव भगवं तित्थयरे तित्थयरमाया य तेणेव उवागच्छंति, उवागच्छित्ता भगवओ तित्थयरस्स तित्थयरमायाए य अदूरसामंते आगायमाणीओ परिगायमाणीओ चिट्ठंति।
Sutra Meaning : જુઓ સૂત્ર ૨૧૨
Mool Sutra Transliteration : [sutra] tae nam tasim ahelogavatthavvanam atthanham disakumarimahattariyanam patteyam-patteyam asanaim chalamti. Tae nam tao ahelogavatthavvao attha disakumario mahattariyao patteyam-patteyam asanaim chaliyaim pasamti, pasitta ohim paumjamti, paumjitta bhagavam titthayaram ohina abhoemti, abhoetta annamannam saddavemti, saddavetta evam vayasi– uppanne khalu bho! Jambuddive dive bhayavam titthayare, tam jiyameyam tiyapachchuppannamanagayanam ahelogavatthavvanam atthanham disakumarimahattariyanam jammanamahimam karettae, tam gachchhamo nam amhevi bhagavao jammanamahimam karemo ttikattu evam vayamti, vaitta patteyam-patteyam abhiogie deve saddavemti, saddavetta evam vayasi–khippameva bho devanuppiya! Anegakhambhasaya-sannivitthe lilatthiyasalabhamjiyage, evam vimanavannao bhaniyavvo java joyanavichchhinnedivve janavimane viuvvaha, viuvvitta eyamanattiyam pachchappinaha. Tae nam te abhiogiya deva anegakhambhasayasannivitthe java pachchappinamti. Tae nam tao ahelogavatthavvao atthadisakumarimahattariyao hatthatutthachittamanamdiyao patteyam-patteyam chauhim samaninayasahassihim chauhim mahattariyahim java annehi ya bahuhim devehim devihi ya saddhim samparivudao te divve janavimane duruhamti, duruhitta savviddhie savvajuie ghanamuimga-panavapavaiyaravenam tae ukkitthae turiyae chavalae jainae sihae sigghae uddhuyae divvae devagaie jeneva bhagavao titthagarassa jammananagare jeneva bhagavao titthayarassa jammanabhavane teneva uvagachchhamti, uvagachchhitta bhagavao titthayarassa jammanabhavanam tehim divvehim janavimanehim tikkhutto ayahina-payahinam karemti, karetta uttarapuratthime disibhae isim chauramgulamasampatte dharaniyale te divve janavimane thavemti, thavetta patteyam-patteyam chauhim samaniyasahassihim java saddhim samparivudao divvehimto janavimanehimto pachchoruhamti, pachchoruhitta savviddhie java dumduhinigghosanaienam jeneva bhagavam titthayare titthayaramaya ya teneva uvagachchhamti, uvagachchhitta bhagavam titthayaram titthayaramayaram cha tikkhutto ayahina-payahinam karemti, karetta patteyam-patteyam karayalapariggahiyam sirasavattam matthae amjalim kattu evam vayasi– Namotthu te rayanakuchchhidharie jagappaivadaie savvajagamamgalassa chakkhuno ya muttassa savva-jagajivavachchhalassa hiyakaraga maggadesiya pagaddhi vibhupabhussa jinassa nanissa nayagassa buddhassa bohagassa savvaloganahassa nimmamassa pavarakulasamubbhavassa jaie khattiyassa jamsi loguttamassa janani dhannasi punnasi tam kayatthasi, amhe nam devanuppie! Ahelogavatthavvao attha disakumari-mahattariyao bhagavao titthagarassa jammanamahimam karissamo, tannam tubbhahim na bhaiyavvamtikattu uttarapuratthimam disibhagam avakkamamti, avakkamitta veuvviyasamugghaenam samohannamti, samohanitta samkhijjaim joyanaim damdam nisiramti, tam jaha–rayananam vairanam veruliyanam lohiyakkhanam masara-gallanam hamsagabbhanam pulaganam sogamdhiyanam joisarayanam amjananam amjanapulaganam rayayanam jaya-ruvanam amkanam phalihanam ritthanam ahabayare poggale parisademti, parisadetta dochchampi veuvviya-samugghaenam samohannamti, samohanitta samvattagavae viuvvamti,.. .. Viuvvitta tenam sivenam mauenam maruenam anuddhuenam bhumitalavimalakaranenam manaharenam savvouyasurabhikusumagamdhanuvasienam pimdimaniharimenam gamdhaddhurenam tiriyam pavaienam bhagavao titthayarassa jammanabhavanassa savvao samamta joyanaparimamdalam, se jahanamae– kammagaradarae siya tarune balavam jugavam juvane appayamke thiraggahatthe dadhapani paya pitthamtaroru parinae ghana nichiya vatta valiyakhamdhe chammetthaga dughana mutthiya samahaya nichiyagatte urassabalasamannagae talajamala juyalabahu lamghana pavana jaina pamaddanasamatthe chhee dakkhe pattatthe kusale medhavi niunasippovagae egam maham damdasampuchchhanim va salagahatthagam va venusalaiyam va gahaya rayamganam va rayamteuram va aramam va ujjanam va devaulam va sabham va payam va aturiyamachavalamasambhamtam niramtaram suniunam savvato samamta sampamajjejja. Evameva tao disakumarimahattariyao jam tattha tanam va pattam va kattham va kayavaram va asuimachokkham puiyam dubbhigamdham tam savvam ahuniya-ahuniya egamte edemti, edetta jeneva bhagavam titthayare titthayaramaya ya teneva uvagachchhamti, uvagachchhitta bhagavao titthayarassa titthayaramayae ya adurasamamte agayamanio parigayamanio chitthamti.
Sutra Meaning Transliteration : Juo sutra 212