Sutra Navigation: Prashnavyakaran ( પ્રશ્નવ્યાપકરણાંગ સૂત્ર )

Search Details

Mool File Details

Anuvad File Details

Sr No : 1105435
Scripture Name( English ): Prashnavyakaran Translated Scripture Name : પ્રશ્નવ્યાપકરણાંગ સૂત્ર
Mool Language : Ardha-Magadhi Translated Language : Gujarati
Chapter :

संवर द्वार श्रुतस्कंध-२

अध्ययन-१ अहिंसा

 Translated Chapter :

સંવર દ્વાર શ્રુતસ્કંધ-૨

અધ્યયન-૧ અહિંસા
Section : Translated Section :
Sutra Number : 35 Category : Ang-10
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तस्स इमा पंच भावनाओ पढमस्स वयस्स होंति पाणातिवायवेरमणपरिरक्खणट्ठयाए। पढमं–ठाणगमणगुणजोगजुंजण जुगंतरनिवातियाए दिट्ठीए इरियव्वं कीड पयंग तस थावर दयावरेण, निच्चं पुप्फ फल तय पवाल कंद मूल दगमट्टिय बीज हरिय परिवज्जएण सम्मं। एवं खु सव्वपाणा न हीलियव्वा न निंदियव्वा, न गरहियव्वा, न हिंसियव्वा, न छिंदियव्वा, न भिंदियव्वा, न वहेयव्वा, न भयं दुक्खं च किंचि लब्भा पावेउं जे। एवं इरियासमितिजोगेण भावित्तो भवति अंतरप्पा, असबलमसंकिलिट्ठ निव्वणचरित्त-भावणाए अहिंसए संजए सुसाहू। बितियं च–मणेण पावएणं पावगं अहम्मियं दारुणं निस्संसं वह बंध परिकिलेसबहुलं भय मरण परिकिलेससंकि-लिट्ठं न कयावि मणेण पावएणं पावगं किंचि वि ज्झायव्वं। एवं मनसमितिजोगेण भावितो भवति अंतरप्पा, असबलमसंकिलिट्ठ निव्वण चरित्तभावणाए अहिंसए संजए सुसाहू। ततियं च–वतीते पावियाले पावगं न किंचि वि भासियव्वं। एवं वतिसमितिजोगेण भावितो भवति अंतरप्पा, असबलमसंकिलिट्ठ निव्वण चरित्तभावणाए अहिंसओ संजओ सुसाहू। चउत्थं–आहारएसणाए सुद्धं उंछं गवेसियव्वं अण्णाए अगढिए अदुट्ठे अदीने अविमने अकलुणे अविसादी, अपरितंतजोगी जयण घडण करण चरिय विणय गुण जोगसंपउत्ते भिक्खू भिक्खेसणाए जुत्ते समुदाणेऊण भिक्खचरियं उंछं धेत्तूण आगते गुरुजणस्स पासं, गमणागमणातिचार-पडिक्कमण-पडिक्कंते, आलोयण-दायणं च दाऊण गुरुजणस्स जहोवएसं निरइयारं च अप्पमत्तो पुणरवि अणेसणाए पयतो पडिक्कमित्ता पसंतआसीण-सुहनिसण्णे, मुहुत्तमेत्तं च ज्झाण-सुहजोग-नाण-सज्झाय-गोवियमणे धम्ममणे अविमणे सुहमणे अविग्गहमणे समाहिमणे सद्धासंवेगनिज्जरमणे पवयणवच्छल्लभावियमणे उट्ठेऊण य पहट्ठतुट्ठे जहराइणियं निमंतइत्ता य साहवे भावओ य, विइण्णे य गुरुजणेणं, उपविट्ठे संपमज्जिऊण ससीसं कायं तहा करतलं, अमुच्छिए अगिद्धे अगढिए अगरहिए अणज्झोववण्णे अणाइले अलुद्धे अणत्तट्ठिते असुरसुरं अचवचवं अद्दुयमविलंबियं अपरिसाडिं आलोयभा-यणे जयं पयत्तेणं ववगयसंजोगमणिंगालं च विगयधूमं अक्खोवंजण वणाणुलेवणभूयं संजमजायामायानिमित्तं संजयभारवहणट्ठयाए भुंजेज्जा पाणधारणट्ठयाए संजए णं समियं। एवं आहारसमितिजोगेणं भाविओ भवति अंतरप्पा, असबलमसंकिलिट्ठ निव्वण चरित्तभावणाए अहिंसए संजए सुसाहू। पंचमगं–पीढ फलग सिज्जा संथारग वत्थ पत्त कंबल दंडग रयहरण चोलपट्टग मुहपोत्तिग पायपुंछणादी। एयंपि संजमस्स उवबूहणट्ठयाए वातातव दंसमसग सीय परिरक्खणट्ठयाए उवगरणं रागदोसरहियं परिहरितव्वं संजतेणं णिच्चं पडिलेहणपप्फोडण पमज्जणाए अहो य राओ य अप्पमत्तेणं होइ समयं निक्खिवियव्वं च गिण्हिवियव्वं च भायणं भंडोवहि उवगरणं। एवं आयाणभंडनिक्खेवणासमितिजोगेण भाविओ भवति अंतरप्पा, असबलमसंकिलिट्ठ निव्वण चरित्तभावणाए अहिंसए संजंते सुसाहू। एवमिणं संवरस्स दारं सम्मं संवरियं होति सुप्पणिहियं इमेहिं पंचहि वि कारणेहिं मण वयण काय परिरक्खएहिं। निच्चं आमरणंतं च एस जोगो णेयव्वो धितिमया मतिमया अणासवो अकलुसो अच्छिद्दो अपरिसावी असंकिलिट्ठो सुद्धो सव्वजिणमणुन्नातो। एवं पढमं संवरदारं फासियं पालियं सोहियं तीरियं किट्टियं आराहियं आणाते अणुपालियं भवति। एवं नायमुणिणा भगवया पण्णवियं परूवियं पसिद्धं सिद्धं सिद्धवरसासणमिणं आघवितं सुदेसितं पसत्थं। पढमं संवरदारं समत्तं।
Sutra Meaning : જુઓ સૂત્ર ૩૨
Mool Sutra Transliteration : [sutra] tassa ima pamcha bhavanao padhamassa vayassa homti panativayaveramanaparirakkhanatthayae. Padhamam–thanagamanagunajogajumjana jugamtaranivatiyae ditthie iriyavvam kida payamga tasa thavara dayavarena, nichcham puppha phala taya pavala kamda mula dagamattiya bija hariya parivajjaena sammam. Evam khu savvapana na hiliyavva na nimdiyavva, na garahiyavva, na himsiyavva, na chhimdiyavva, na bhimdiyavva, na vaheyavva, na bhayam dukkham cha kimchi labbha paveum je. Evam iriyasamitijogena bhavitto bhavati amtarappa, asabalamasamkilittha nivvanacharitta-bhavanae ahimsae samjae susahu. Bitiyam cha–manena pavaenam pavagam ahammiyam darunam nissamsam vaha bamdha parikilesabahulam bhaya marana parikilesasamki-littham na kayavi manena pavaenam pavagam kimchi vi jjhayavvam. Evam manasamitijogena bhavito bhavati amtarappa, asabalamasamkilittha nivvana charittabhavanae ahimsae samjae susahu. Tatiyam cha–vatite paviyale pavagam na kimchi vi bhasiyavvam. Evam vatisamitijogena bhavito bhavati amtarappa, asabalamasamkilittha nivvana charittabhavanae ahimsao samjao susahu. Chauttham–aharaesanae suddham umchham gavesiyavvam annae agadhie adutthe adine avimane akalune avisadi, aparitamtajogi jayana ghadana karana chariya vinaya guna jogasampautte bhikkhu bhikkhesanae jutte samudaneuna bhikkhachariyam umchham dhettuna agate gurujanassa pasam, gamanagamanatichara-padikkamana-padikkamte, aloyana-dayanam cha dauna gurujanassa jahovaesam niraiyaram cha appamatto punaravi anesanae payato padikkamitta pasamtaasina-suhanisanne, muhuttamettam cha jjhana-suhajoga-nana-sajjhaya-goviyamane dhammamane avimane suhamane aviggahamane samahimane saddhasamveganijjaramane pavayanavachchhallabhaviyamane uttheuna ya pahatthatutthe jaharainiyam nimamtaitta ya sahave bhavao ya, viinne ya gurujanenam, upavitthe sampamajjiuna sasisam kayam taha karatalam, amuchchhie agiddhe agadhie agarahie anajjhovavanne anaile aluddhe anattatthite asurasuram achavachavam adduyamavilambiyam aparisadim aloyabha-yane jayam payattenam vavagayasamjogamanimgalam cha vigayadhumam akkhovamjana vananulevanabhuyam samjamajayamayanimittam samjayabharavahanatthayae bhumjejja panadharanatthayae samjae nam samiyam. Evam aharasamitijogenam bhavio bhavati amtarappa, asabalamasamkilittha nivvana charittabhavanae ahimsae samjae susahu. Pamchamagam–pidha phalaga sijja samtharaga vattha patta kambala damdaga rayaharana cholapattaga muhapottiga payapumchhanadi. Eyampi samjamassa uvabuhanatthayae vatatava damsamasaga siya parirakkhanatthayae uvagaranam ragadosarahiyam pariharitavvam samjatenam nichcham padilehanapapphodana pamajjanae aho ya rao ya appamattenam hoi samayam nikkhiviyavvam cha ginhiviyavvam cha bhayanam bhamdovahi uvagaranam. Evam ayanabhamdanikkhevanasamitijogena bhavio bhavati amtarappa, asabalamasamkilittha nivvana charittabhavanae ahimsae samjamte susahu. Evaminam samvarassa daram sammam samvariyam hoti suppanihiyam imehim pamchahi vi karanehim mana vayana kaya parirakkhaehim. Nichcham amaranamtam cha esa jogo neyavvo dhitimaya matimaya anasavo akaluso achchhiddo aparisavi asamkilittho suddho savvajinamanunnato. Evam padhamam samvaradaram phasiyam paliyam sohiyam tiriyam kittiyam arahiyam anate anupaliyam bhavati. Evam nayamunina bhagavaya pannaviyam paruviyam pasiddham siddham siddhavarasasanaminam aghavitam sudesitam pasattham. Padhamam samvaradaram samattam.
Sutra Meaning Transliteration : Juo sutra 32