Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104876
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-१६ अवरकंका

 Translated Chapter :

શ્રુતસ્કંધ-૧

અધ્યયન-૧૬ અવરકંકા
Section : Translated Section :
Sutra Number : 176 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से जुहिट्ठिल्ले राया तओ मुहुत्तंतरस्स पडिबुद्धे समाणे दोवइं देविं पासे अपासमाणे सयणिज्जाओ उट्ठेइ, उट्ठेत्ता दोवईए देवीए सव्वओ समंता मग्गणगवेसणं करेइ, करेत्ता दोवईए देवीए कत्थइ सुइं वा खुइं वा पवत्तिं वा अलभमाणे जेणेव पंडू राया तेणेव उवागच्छइ, उवागच्छित्ता पंडुं रायं एवं वयासी–एवं खलु ताओ! ममं आगासतलगंसि सुहपसुत्तस्स पासाओ दोवई देवी न नज्जइ केणइ देवेन वा दानवेन वा किण्णरेण वा किंपुरिसेण वा महोरगेण वा गंधव्वेण वा हिया वा निया वा अवक्खित्ता वा। तं इच्छामि णं ताओ! दोवईए देवीए सव्वओ समंता मग्गणगवेसणं करित्तए। तए णं से पंडू राया कोडुंबियपुरिसे सद्दावेइ, सद्दावेत्ता एवं वयासी–गच्छह णं तुब्भे देवानुप्पिया! हत्थिणाउरे नयरे सिंघाडग-तिग-चउक्क-चच्चर-चउम्मुह-महापहपहेसु महया-महया सद्देणं उग्घोसेमाणा-उग्घोसेमाणा एवं वयह–एवं खलु देवानुप्पिया! जुहिट्ठिलस्स रन्नो आगासतलगंसि सुहपसुत्तस्स पासाओ दोवई देवी न नज्जइ केणइ देवेन वा दानवेन वा किण्ण-रेण वा किंपुरिसेण वा महोरगेण वा गंधव्वेण वा हिया वा निया वा अवक्खित्ता वा। तं जो णं देवानुप्पिया! दोवईए देवीए सुइं वा खुइं वा पवत्तिं वा परिकहेइ, तस्स णं पंडू राया विउलं अत्थसंपयाणं दलयइ त्ति कट्टु घोसणं घोसावेह, घोसावेत्ता एयमाणत्तियं पच्चप्पिणह। तए णं ते कोडुंबियपुरिसा जाव पच्चप्पिणंति। तए णं से पंडू राया दोवईए देवीए कत्थइ सुइं वा खुइं वा पवत्तिं वा अलभमाणे कोंतिं देविं सद्दावेइ, सद्दावेत्ता एवं वयासी–गच्छह णं तुमं देवानुप्पिए! बारवइं नयरिं कण्हस्स वासुदेवस्स एयमट्ठं निवेदेहि–कण्हे णं वासुदेवे दोवईए मग्गण-गवेसणं करेज्जा, अन्नहा न नज्जइ दोवईए देवीए सुई वा खुई वा पवत्ती वा। तए णं सा कोंती देवी पंडुणा एवं वुत्ता समाणी जाव पडिसुणेइ, पडिसुणेत्ता ण्हाया कयबलिकम्मा हत्थिखंधवरगया हत्थिणाउरं नयरं मज्झंमज्झेणं निगच्छइ, निगच्छित्ता कुरुजन-वयस्स मज्झंमज्झेणं जेणेव सुरट्ठाजनवए जेणेव बारवई नयरी जेणेव अग्गुज्जाणे तेणेव उवागच्छइ, उवागच्छित्ता हत्थिखंधाओ पच्चोरुहइ, पच्चोरुहित्ता कोडुंबियपुरिसे सद्दावेइ, सद्दावेत्ता एवं वयासी–गच्छह णं तुब्भे देवानुप्पिया! बारवइं नयरिं, जेणेव कण्हस्स वासुदेवस्स गिहे तेणेव अनुपविसह, अनुपविसित्ता कण्हं वासुदेवं करयल परिग्गहियं दसणहं सिरसावत्तं मत्थए अंजलिं कट्टु एवं वयह–एवं खलु सामी! तुब्भं पिउच्छा कोंती देवी हत्थि-णाउराओ नयराओ इहं हव्वमागया तुब्भं दंसणं कंखइ। तए णं ते कोडुंबियपुरिसा जाव कहेंति। तए णं कण्हे वासुदेवे कोडुंबियपुरिसाणं अंतिए एयमट्ठं सोच्चा निसम्म हट्ठतुट्ठे हत्थिखंधवरगए बारवईए नयरीए मज्झंमज्झेणं जेणेव कोंती देवी तेणेव उवागच्छइ, उवागच्छित्ता हत्थिखंधाओ पच्चोरुहइ, पच्चोरुहित्ता कोंतीए देवीए पायग्गहणं करेइ, करेत्ता कोंतीए देवीए सद्धिं हत्थिखंधं दुरुहइ, दुरुहित्ता बारवईए नयरीए मज्झंमज्झेणं जेणेव सए गिहे तेणेव उवागच्छइ, उवागच्छित्ता सयं गिहं अनुप्पविसइ। तए णं से कण्हे वासुदेवे कोंतिं देविं ण्हायं कयबलिकम्मं जिमियभुत्तुत्तरागयं वि य णं समाणिं आयंतं चोक्खं परमसुइभूयं सुहासणवरगयं एवं वयासी–संदिसउ णं पिउच्छा! किमागमणपओयणं? तए णं सा कोंती देवी कण्हं वासुदेवं एवं वयासी–एवं खलु पुत्ता! हत्थिणाउरे नयरे जुहिट्ठिलस्स रन्नो आगास-तलए सुहप्पसुत्तस्स पासाओ दोवई देवी न नज्जइ केणइ अवहिया निया अवक्खित्ता वा। तं इच्छामि णं पुत्ता! दोवईए देवीए सव्वओ समंता मग्गण-गवेसणं कयं। तए णं से कण्हे वासुदेवे कोंतिं पिउच्छं एवं वयासी–जं नवरं–पिउच्छा! दोवईए देवीए कत्थइ सुइं वा खुइं वा पवत्तिं वा लभामि, तो णं अहं पायालाओ वा भवणाओ वा अद्धभरहाओ वा समंतओ दोवइं देविं साहत्थिं उवणेमि त्ति कट्टु कोंतिं पिउच्छं सक्कारेइ सम्मानेइ, सक्कारेत्ता सम्मानेत्ता पडिविसज्जेइ। तए णं सा कोंती देवी कण्हेणं वासुदेवेणं पडिविसज्जिया समाणी जामेव दिसिं पाउब्भूया तामेव दिसिं पडिगया। तए णं से कण्हे वासुदेवे कोडुंबियपुरिसे सद्दावेइ, सद्दावेत्ता एवं वयासी–गच्छह णं तुब्भे देवानुप्पिया! बारवईए नयरीए सिंघाडग-तिग-चउक्क-चच्चर-चउम्मुह-महापहपहेसु महया-महया सद्देणं उग्घोसेमाणा-उग्घोसेमाणा एवं वयह– एवं खलु देवानुप्पिया! जुहिट्ठिलस्स रन्नो आगास-तलगंसि सुहपसुत्तस्स पासाओ दोवई देवी न नज्जइ केणइ देवेन वा दानवेन वा किन्नरेण वा किंपुरिसेण वा महोरगेण वा गंधव्वेण वा हिया वा निया वा अवक्खित्ता वा। तं जो णं देवानुप्पिया! दोवईए देवीए सुइं वा खुइं वा पवत्तिं वा परिकहेइ, तस्स णं कण्हे वासुदेवे विउलं अत्थसंपयाणं दलयइ त्ति कट्टु घोसणं घोसावेह, घोसावेत्ता एयमाणत्तियं पच्चप्पिणह। तए णं ते कोडुंबियपुरिसा जाव पच्चप्पिणंति। तए णं से कण्हे वासुदेवे अन्नया अंतोअंतेउरगए ओरोह-संपरिवुडे सीहासनवरगए विहरइ। इमं च णं कच्छुल्लनारए जाव ज्झत्तिवेगेण समोवइए। तए णं से कण्हे वासुदेवे कच्छुल्लनारयं एज्जमाणं पासइ, पासित्ता आसणाओ अब्भुट्ठेइ, अब्भुट्ठेत्ता अग्घेणं पज्जेणं आसणेणं उवनिमंतेइ। तए णं कच्छुल्लनारए उदगपरिफोसियाए दब्भोवरिपच्चत्थुयाए भिसियाए निसीयइ, निसीइत्ता कण्हं वासुदेवं कुसलोदंतं पुच्छइ। तए णं से कण्हे वासुदेवे कच्छुल्लनारयं एवं वयासी–तुमं णं देवानुप्पिया! बहूणि गामागर-नगर-खेड-कब्बड-दोणमुह-मडंब-पट्टण-आसम-निगम-संबाह-सण्णिवेसाइं आहिंडसि, बहूण य राईसर-तलवर-माडंबिय-कोडुंबिय-इब्भ-सेट्ठि-सेनावइ-सत्थवाहपभिईणं गिहाइं अनुपविससि, तं अत्थियाइं ते कहिंचि दोवईए देवीए सुई वा खुई वा पवित्ती वा० उवलद्धा? तए णं से कच्छुल्लनारए कण्हं वासुदेवं एवं वयासी–एवं खलु देवानुप्पिया! अन्नया धायइसंडदीवे पुरत्थिमद्धं दाहिणड्ढ-भरहवासं अवरकंका रायहाणिं गए। तत्थ णं मए पउमनाभस्स रन्नो भवणंसि दोवई-देवी-जारिसिया दिट्ठपुव्वा यावि होत्था। तए णं कण्हे वासुदेवे कच्छुल्लनारयं एवं वयासी–तुब्भं चेव णं देवानुप्पिया! एयं पुव्वकम्मं। तए णं से कच्छुल्लनारए कण्हेणं वासुदेवेणं एवं वुत्ते समाणे उप्पयणिं विज्जं आवाहेइ, आवाहेत्ता जामेव दिसिं पाउब्भूए तामेव दिसिं पडिगए। तए णं से कण्हे वासुदेवे दूयं सद्दावेइ, सद्दावेत्ता एवं वयासी–गच्छह णं तुमं देवानुप्पिया! हत्थिणाउरं नयरं पडुस्स रन्नो एयमट्ठं निवेएहि–एवं खलु देवानुप्पिया! धायइसंडदीवे पुरत्थिमद्धे दाहिणड्ढ-भरहवासे अवरकंकाए रायहाणीए पउमनाभभवणंसि दोवईए देवीए पउत्ती उवलद्धा, तं गच्छंतु पंच पंडवा चाउरंगिणीए सेनाए सद्धिं संपरिवुडा पुरत्थिम-वेयालीए ममं पडिवालेमाणा चिट्ठंतु। तए णं से दूए भणइ जाव पडिवालेमाणा चिट्ठह। तेवि जाव चिट्ठंति। तए णं से कण्हे वासुदेवे कोडुंबियपुरिसे सद्दावेइ, सद्दावेत्ता एवं वयासी–गच्छह णं तुब्भे देवानुप्पिया! सन्नाहियं भेरिं तालेह। तेवि तालेंति। तए णं तीए सन्नाहियाए भेरीए सद्दं सोच्चा समुद्दविजयपामोक्खा इमे दस दसारा जाव छप्पन्नं बलवगसाहस्सीओ सन्नद्ध-बद्ध-वम्मिय-कवया उप्पीलिय-सरासण-पट्टिया पिणद्ध-गेविज्जा आविद्ध-विमल-वरचिंध-पट्टा गहियाउह-पहरणा अप्पेग-इया हयगया अप्पेगइया गयगया जाव पुरिसवग्गुरापरिक्खित्ता जेणेव सभा सुहम्मा जेणेव कण्हे वासुदेवे तेणेव उवागच्छंति, उवागच्छित्ता करयल परिग्गहियं सिरसावत्तं मत्थए अंजलिं कट्टु जएणं विजएणं बद्धावेंति। तए णं से कण्हे वासुदेवे हत्थिखंधवरगए सकोरेंटमल्लदामेणं छत्तेणं धरिज्जमाणेणं सेयवर चामराहिं वीइज्जमाणे हय-गय-रह-पवरजोहकलियाए चाउरंगिणीए सेनाए सद्धिं संपरिवुडे महयाभड-चडगर-रह-पहकर-विंदपरिक्खित्ते बारवईए नयरीए मज्झंमज्झेणं निगच्छइ, निगच्छित्ता जेणेव पुरत्थिमवेयाली तेणेव उवागच्छइ, उवागच्छित्ता पंचहिं पंडवेहिं सद्धिं एगयओ मिलइ, मिलित्ता खंधावारनिवेसं करेइ, करेत्ता पोसहसालं अनुप्पविसइ, अनुप्पविसित्ता सुट्ठियं देवं मनसीकरेमाणे-मनसीकरेमाणे चिट्ठइ। तए णं कण्हस्स वासुदेवस्स अट्ठमभत्तंसि परिणममाणंसि सुट्ठिओ जाव आगओ। भणंतु णं देवानुप्पिया! जं मए कायव्वं। तए णं से कण्हे वासुदेवे सुट्ठियं देवं एवं वयासी–एवं खलु देवानुप्पिया! दोवई देवी धायईसंडदीवे पुरत्थिमद्धे दाहिणड्ढ-भरहवासे अवरकंकाए रायहाणीए, पउमनाभभवणंसि साहिया तण्णं तुमं देवानुप्पिया! मम पंचहिं पंडवेहिं सद्धिं अप्प छट्ठस्स छण्हं रहाणं लवणसमुद्दे मग्गं वियराहि, जेणाहं अवरकंकं रायहाणिं दोवईए कूवं गच्छामि। तए णं से सुट्ठिए देवे कण्हं वासुदेवं एवं वयासी–किण्णं देवानुप्पिया! जहा चेव पउमनाभस्स रन्नो पुव्वसंगइएणं देवेणं दोवई देवी जंबुद्दीवाओ दीवाओ भारहाओ वासाओ हत्थिणाउराओ नयराओ जुहिट्ठिलस्स रन्नो भवणाओ० साहिया, तहा चेव दोवइं देविं धायईसंडाओ दीवाओ भारहाओ वासाओ अवरकंकाओ रायहाणीओ पउमनाभस्स रन्नो भवणाओ हत्थिणाउरं साहरामि? उदाहु–पउमनाभं रायं सपुरबलवाहणं लवणसमुद्दे पक्खिवामि? तए णं से कण्हे वासुदेवे सुट्ठियं देवं एवं वयासी–मा णं तुमं देवानुप्पिया! जहा चेव पउमनाभस्स रन्नो पुव्वसंगइएणं देवेणं दोवई देवी जंबुद्दीवाओ दीवाओ भारहाओ वासाओ हत्थिणाउराओ नयराओ जुहिट्ठिलस्स रन्नो भवणाओ सहिया, तहा चेव दोवइं देविं धायईसंडाओ दीवाओ भारहाओ वासाओ अवरकंकाओ रायहाणीओ पउमनाभस्स रन्नो भवणाओ हत्थिणाउरं साहराहि। तुमं णं देवानुप्पिया! मम लवणसमुद्दे पंचहिं पंडवेहिं सद्धिं अप्पछट्ठस्स छण्हं रहाणं मग्गं वियराहि। सयमेव णं अहं दोवईए कूवं गच्छामि। तए णं से सुट्ठिए देवे कण्हं वासुदेवं एवं वयासी–एवं होउ। पंचहिं पंडवेहिं सद्धिं अप्पछट्ठस्स छण्हं रहाणं लवणसमुद्दे मग्गं वियरइ। तए णं से कण्हे वासुदेवे चाउरंगिणिं सेणं पडिविसज्जेइ, पडिविसज्जेत्ता पंचहिं पंडवेहिं सद्धिं अप्पछट्ठे छहिं रहेहिं लवणसमुद्दं मज्झंमज्झेणं वीईवयइ, वीईवइत्ता जेणेव अवरकंका रायहाणी तेणेव अवरकंकाए रायहाणीए अग्गुज्जाणे तेणेव उवागच्छइ, उवागच्छित्ता रहं ठवेइ, ठवेत्ता दारुयं सारहिं सद्दावेइ, सद्दावेत्ता एवं वयासी– गच्छह णं तुमं देवानुप्पिया! अवरकंकं रायहाणिं अनुप्पविसाहि, अनुप्पविसित्ता पउमनाभस्स रन्नो वामेणं पाएणं पायपीढं अवक्कमित्ता कुंतग्गेणं लेहं पणामेहि, पणामेत्ता तिवलियं भिउडिं निडाले साहट्टु आसुरुत्ते रुट्ठे कुविए चंडिक्किए मिसिमिसेमाणे एवं वयाहि–हंभो पउमनाभा! अपत्थियपत्थिया! दुरंतपंतलक्खणा! हीणपुण्णचाउद्दसा! सिरि-हिरि-धिइ-कित्ति-परिवज्जिया! अज्ज न भवसि। किण्णं तुमं न याणसि कण्हस्स वासुदेवस्स भगिनिं दोवइं देविं इहं हव्वमाणेमाणे? तं एवमवि गए पच्चप्पिणाहि णं तुमं दोवइं देविं कण्हस्स वासुदेवस्स अहव णं जुद्धसज्जे निग्गच्छाहि। एस णं कण्हे वासुदेवे पंचहिं पंडवेहिं सद्धिं अप्पछट्ठे दोवईए देवीए कूवं हव्वमागए। तए णं से दारुए सारही कण्हेणं वासुदेवेणं एवं वुत्ते समाणे हट्ठतुट्ठे पडिसुणेइ, पडिसुणेत्ता अवरकंकं रायहाणिं अनुपविसइ, अनुपविसित्ता जेणेव पउमनाभे तेणेव उवागच्छइ, उवागच्छित्ता करयल परिग्गहियं सिरसावत्तं मत्थए अंजलिं कट्टु जएणं विजएणं वद्धावेइ, वद्धावेत्ता एवं वयासी–एस णं सामी! मम विनयपडिवत्ती, इमा अण्णा मम सामिस्स समुहाणत्ति त्ति कट्टु आसुरुत्ते वामपाएणं पायपीढं अक्कमइ, अक्कमित्ता कुंतग्गेणं लेहं पणामेइ, पणामेत्ता तिवलियं भिउडिं निडाले साहट्टु आसुरुत्ते रुट्ठे कुविए चंडिक्किए मिसिमिसेमाणे एवं वयासी– हंभो पउमनाभा! अपत्थियपत्थिया! दुरंतपंतलक्खणा! हीणपुण्णचाउद्दसा! सिरि-हिरि-धिइ-कित्ति-परिवज्जिया! अज्ज न भवसि। किण्णं तुमं न याणासि कण्हस्स वासुदेवस्स भगिनिं दोवइं देविं इह हव्व-माणमाणे? तं एवमवि गए पच्चप्पिणाहि णं तुमं दोवइं देविं कण्हस्स वासुदेवस्स अहव णं जुद्धसज्जे निग्गच्छाहि। एस णं कण्हे वासुदेवे पंचहिं पंडवेहिं सद्धिं अप्पछट्ठे दोवईए देवीए कूवं हव्वमागए। तए णं से पउमनाभे दारुएणं सारहिणा एवं वुत्ते समाणे आसुरुत्ते रुट्ठे कुविए चंडिक्किए मिसिमिसेमाणे तिवलिं भिउडिं निडाले साहट्टु एवं वयासी–णप्पिणामि णं अहं देवानुप्पिया! कण्हस्स वासुदेवस्स दोवइं। एस णं अहं सयमेव जुज्झसज्जे निग्गच्छामि त्ति कट्टु दारुयं सारहिं एवं वयासी–केवलं भो! रायसत्थेसु दूए अवज्झे त्ति कट्टु असक्कारिय असम्मानिय अवदारेणं निच्छुभावेइ। तए णं से दारुए सारही पउमनाभेणं रन्ना असक्कारिय असम्मानिय अवदारेणं निच्छूढे समाणे जेणेव कण्हे वासुदेवे तेणेव उवागच्छइ, उवागच्छित्ता करयल परिग्गहियं दसणहं सिरसावत्तं मत्थए अंजलिं कट्टु जएणं विजएणं वद्धावेइ, वद्धावेत्ता कण्हं वासुदेवं एवं वयासी–एवं खलु अहं सामी! तुब्भं वयणेणं अवरकंकं रायहाणिं गए जावं अवदारेणं निच्छुभावेइ। तए णं से पउमनाभे बलवाउयं सद्दावेइ, सद्दावेत्ता एवं वयासी–खिप्पामेव भो देवानुप्पिया! आभिसेक्कं हत्थिरयणं पडिकप्पेह। तयानंतरं च णं छेयायरिय-उवदेस-मइ-कप्पणा-विकप्पेहिं सुणिउणेहिं उज्जल-नेवत्थि-हत्थ-परिवत्थियं सुसज्जं जाव आभिसेक्कं हत्थिरयणं पडिकप्पेइ, पडिकप्पेत्ता उवणेति। तए णं से पउमनाहे सन्नद्ध-बद्ध-वम्मिय-कवए उप्पीलिय-सरासण-पट्टिए पिणद्ध-गेविज्जे आविद्ध-विमल-वर-चिंध-पट्टे गहियाउह-पहरणे० आभिसेक्कं हत्थिरयणं, दुरुहइ, दुरुहित्ता हय-गय-रह-पवरजोहकलियाए चाउरंगिणीए सेनाए सद्धिं संपरिवुडे महयाभड-चडगर-रह-पहकर-विंदपरिक्खित्ते जेणेव कण्हे वासुदेवे तेणेव पहारेत्थ गमणाए। तए णं से कण्हे वासुदेवे पउमनाभं रायं एज्जमाणं पासइ, पासित्ता ते पंच पंडवे एवं वयासी–हंभो दारगा! किण्णं तुब्भे पउमनाभेणं सद्धिं जुज्झिहिह उदाहु पेच्छिहिह? तए णं ते पंच पंडवा कण्हं वासुदेवं एवं वयासी–अम्हे णं सामी! जुज्झामो, तुब्भे पेच्छह। तए णं ते पंच पंडवा सन्नद्ध-बद्ध-वम्मिय-कवया उप्पीलिय-सरासण-पट्टिया पिणद्ध-गेविज्जा आविद्ध-विमल-वरचिंधपट्टा गहियाउह-पहरणा रहे दुरुहंति, दुरुहित्ता जेणेव पउमनाभे राया तेणेव उवागच्छंति, उवागच्छित्ता एवं वयासी–अम्हे वा पउमनाभे वा राय त्ति कट्टु पउमनाभेणं सद्धिं संपलग्गा यावि होत्था। तए णं से पउमनाभे राया ते पंच पंडवे खिप्पामेव हय-महिय-पवरवीर-घाइय-विवडियचिंध-धय-पडागे किच्छोवगयपाणे दिसोदिसिं पडिसेहेइ। तए णं ते पंच पउमनाभेणं रन्ना हय-महिय-पवर-वीर-धाइय-विवडियचिंध-धय-पडागा किच्छोवगयपाणा दिसो दिसिं पडिसेहिया समाणा अत्थामा अबला अवीरिया अपुरिसक्कार-परक्कमा अधारणिज्जमित्ति कट्टु जेणेव कण्हे वासुदेवे तेणेव उवागच्छंति। तए णं से कण्हे वासुदेवे ते पंच-पंडवे एवं वयासी–कहण्णं तुब्भे देवानुप्पिया! पउमनाभेणं रन्ना सद्धिं संपलग्गा? तए णं ते पंच पंडवा कण्हं वासुदेवं एवं वयासी–एवं खलु देवानुप्पिया! अम्हे तुब्भेहिं अब्भणुण्णाया समाणा सन्नद्ध-बद्ध-वम्मिय-कवया रहे दुरुहामो, दुरुहेत्ता जेणेव पउमनाभे तेणेव उवागच्छामो, उवागच्छित्ता एवं वयासी–अम्हे वा पउ-मनाभे वा रायत्ति कट्टु पउमनाभेणं सद्धिं संपलग्गा। तए णं से पउमनाभे राया अम्हं खिप्पामेव हय-महिय-पवरवीर-धाइय-विव-डियचिंध-धय-पडागे किच्छोवगयपाणे दिसोदिसिं पडिसेहेइ। तए णं से कण्हे वासुदेवे ते पंच पंडवे एवं वयासी–जइ णं तुब्भे देवानुप्पिया! एवं वयंता–अम्हे णो पउमनाभे रायत्ति कट्टु पउमनाभेणं सद्धिं संपलग्गंता तो णं तुब्भे नो पउमनाभे हय-महिय-पवर-वीर-धाइय-विवडियचिंध-धय-पडागे किच्छो-वगयपाणे दिसोदिसिं पडिसेहित्था। तं पेच्छह णं तुब्भे देवानुप्पिया! अहं णो पउमनाभे रायत्ति कट्टु पउमनाभेणं रन्ना सद्धिं जुज्झामि रहं दुरुहइ, दुरुहित्ता जेणेव पउमनाभे राया तेणेव उवागच्छइ, उवागच्छित्ता सेयं गोखीरहार-धवलं तणसोल्लिय-सिंदुवार-कुंदेंदु-सण्णिगासं निययस्स बलस्स हरिस-जणणं रिउसेण्ण-विनासनकरं पंचजण्णं संखं परामुसइ, परामुसित्ता मुहवायपुरियं करेइ। तए णं तस्स पउमनाभस्स तेणं संखसद्देणं बल-तिभाए हय-महिय-पवरवीर-धाइय-विवडियचिंध-धय-पडागे किच्छोवगयपाणे दिसोदिसिं पडिसेहिए। तए णं से कण्हे वासुदेवे अइरुग्गयबालचंद-इंदधणु-सण्णिगासं, वरमहिस-दरिय-दप्पिय-दढधणसिंगग्गरइयसारं, उरगवर- पवरगवल- पवरपरहुय-भमरकुल- नीलि- निद्ध- घंत- घोय- पट्टं, निउणोविय-मिसिमिसिंत-मणिरयण-घंटियाजालपरिक्खित्तं, तडितरुणकिरण- तवणिज्जबद्धचिंधं दद्दरमलयगिरिसिहर-केसरचामरवाल-अद्धचंदचिंधं, काल-हरिय- रत्त-पीय- सुक्किल- बहुण्हारुणि-संपिण्णद्धजीवं, जीवियंतकरं धणुं परामुसइ, परामुसित्ता धणुं पूरेइ, पूरेत्ता धणुसद्दं करेइ। तए णं तस्स पउमनाभस्स दोच्चे बल-तिभाए तेणं धणुसद्देणं हय-महिय-पवरवीर-घाइय-विवडियचिंध-धय-पडागे किच्छोवगयपाणे दिसोदिसिं पडिसेहिए। तए णं से पउमनाभे राया तिभागबलावसेसे अत्थामे अबले अवीरिए अपुरिसक्कारपरक्कमे अधारणिज्जमिति कट्टु सिग्घं तुरियं चवलं चंडं जइण वेइयं जेणेव अवरकंका तेणेव उवागच्छइ, उवागच्छित्ता अवरकंकं रायहाणिं अनुपविसइ, अनुपवि-सित्ता बाराइं पिहेइ, पिहेत्ता रोहासज्जे चिट्ठइ। तए णं से कण्हे वासुदेवे जेणेव अवरकंका तेणेव उवागच्छइ, उवागच्छित्ता रहं ठवेइ, ठवेत्ता रहाओ पच्चोरुहइ, पच्चोरुहित्ता वेउव्वियसमुग्घाएणं समोहण्णइ एगं महं नरसीह रूवं विउव्वइ, विउव्वित्ता महया-महया सद्देणं पायदद्दरियं करेइ। तए णं कण्हेणं वासुदेवेणं महया-महया सद्देणं पायदद्दरएणं कएणं समाणेणं अवरकंका रायहाणी संभग्ग-पागार-गोउराट्टालय-चरिय-तोरण-पल्हत्थिय-पवरभवन-सिरिधरा सरसरस्स धरणियले सण्णिवइया। तए णं से पउमनाभे राया अवरकंकं रायहाणिं संभग्ग-पागार-गोउराट्टालय-चरिय-तोरण-पल्हत्थियपवरभवन-सिरिधरं सरसरस्स धरणियले सण्णिवइयं० पासित्ता भीए दोवइं देविं सरणं उवेइ। तए णं सा दोवई देवी पउमनाभं रायं एवं वयासी–किण्णं तुमं देवानुप्पिया! न जाणसि कण्हस्स वासुदेवस्स उत्तमपुरिसस्स विप्पियं करेमाणे? मम इहं हव्वमाणेमाणे तं एवमवि गए गच्छ णं तुमं देवानुप्पिया! ण्हाए उल्लपडसाडए ओचूलगवत्थनियत्थे अंतेउर-परियालसंपरिवुडे अग्गाइं वराइं रयणाइं गहाय ममं पुरओकाउं कण्हं वासुदेवं करयल परिग्गहियं दसनहं सिरसावत्तं मत्थए अंजलिं कट्टु पायवडिए सरणं उवेहि। पणिवइय-वच्छला णं देवानुप्पिया! उत्तमपुरिसा। तए णं से पउमनाभे दोवईए देवीए एवं वुत्ते समाणे ण्हाए उल्लपडसाडए ओचूलग-वत्थनियत्थे अंतेउर-परिया-लसंपरिवुडे अग्गाइं वराइं रयणाइं गहाय दोवइं देविं पुरओकाउं कण्हं वासुदेवं करयलपरिग्गहियं दसणहं सिरसावत्तं मत्थए अंजलिं कट्टु पायवडिए सरणं उवेइ, उवेत्ता एवं वयासी– दिट्ठा णं देवानुप्पियाणं इड्ढी जुई जसो बलं वीरियं पुरिसक्कार-परक्कमे। तं खामेमि णं देवानुप्पिया! खमंतु णं देवानुप्पिया! खंतुमरहंति णं देवानुप्पिया! नाइ भुज्जो एवंकरणयाए त्ति कट्टु पंजलिउडे पायवडिए कण्हस्स वासुदेवस्स दोवइं देविं साहत्थिं उवनेइ। तए णं से कण्हे वासुदेवे पउमनाभं एवं वयासी– हंभो पउमनाभा! अपत्थियपत्थिया! दुरंतपंतलक्खणा! हीन-पुण्णचाउद्दसा! सिरि-हिरि-धिइ-कित्ति-परिवज्जिया! किण्णं तुमं न जाणसि मम भगिनिं दोवइं देविं इहं हव्वमाणेमाणे? तं एव-मवि गए नत्थि? ते ममाहिंतो इयाणिं भयमत्थि? त्ति कट्टु पउमनाभं पडिविसज्जेइ, दोवइं देविं गेण्हइ, गेण्हित्ता रहं दुरुहेइ, दुरुहित्ता जेणेव पंच पंडवा तेणेव उवागच्छइ, उवागच्छित्ता पंचण्हं पंडवाणं दोवइं देविं साहत्थि उवनेइ। तए णं से कण्हे वासुदेवे पंचहिं पंडवेहिं सद्धिं अप्पछट्ठे छहिं रहेहिं लवणसमुद्दं मज्झंमज्झेणं जेणेव जंबुद्दीवे दीवे जेणेव भारहे वासे तेणेव पहारेत्थ गमणाए।
Sutra Meaning : જુઓ સૂત્ર ૧૭૨
Mool Sutra Transliteration : [sutra] tae nam se juhitthille raya tao muhuttamtarassa padibuddhe samane dovaim devim pase apasamane sayanijjao utthei, utthetta dovaie devie savvao samamta magganagavesanam karei, karetta dovaie devie katthai suim va khuim va pavattim va alabhamane jeneva pamdu raya teneva uvagachchhai, uvagachchhitta pamdum rayam evam vayasi–evam khalu tao! Mamam agasatalagamsi suhapasuttassa pasao dovai devi na najjai kenai devena va danavena va kinnarena va kimpurisena va mahoragena va gamdhavvena va hiya va niya va avakkhitta va. Tam ichchhami nam tao! Dovaie devie savvao samamta magganagavesanam karittae. Tae nam se pamdu raya kodumbiyapurise saddavei, saddavetta evam vayasi–gachchhaha nam tubbhe devanuppiya! Hatthinaure nayare simghadaga-tiga-chaukka-chachchara-chaummuha-mahapahapahesu mahaya-mahaya saddenam ugghosemana-ugghosemana evam vayaha–evam khalu devanuppiya! Juhitthilassa ranno agasatalagamsi suhapasuttassa pasao dovai devi na najjai kenai devena va danavena va kinna-rena va kimpurisena va mahoragena va gamdhavvena va hiya va niya va avakkhitta va. Tam jo nam devanuppiya! Dovaie devie suim va khuim va pavattim va parikahei, tassa nam pamdu raya viulam atthasampayanam dalayai tti kattu ghosanam ghosaveha, ghosavetta eyamanattiyam pachchappinaha. Tae nam te kodumbiyapurisa java pachchappinamti. Tae nam se pamdu raya dovaie devie katthai suim va khuim va pavattim va alabhamane komtim devim saddavei, saddavetta evam vayasi–gachchhaha nam tumam devanuppie! Baravaim nayarim kanhassa vasudevassa eyamattham nivedehi–kanhe nam vasudeve dovaie maggana-gavesanam karejja, annaha na najjai dovaie devie sui va khui va pavatti va. Tae nam sa komti devi pamduna evam vutta samani java padisunei, padisunetta nhaya kayabalikamma hatthikhamdhavaragaya hatthinauram nayaram majjhammajjhenam nigachchhai, nigachchhitta kurujana-vayassa majjhammajjhenam jeneva suratthajanavae jeneva baravai nayari jeneva aggujjane teneva uvagachchhai, uvagachchhitta hatthikhamdhao pachchoruhai, pachchoruhitta kodumbiyapurise saddavei, saddavetta evam vayasi–gachchhaha nam tubbhe devanuppiya! Baravaim nayarim, jeneva kanhassa vasudevassa gihe teneva anupavisaha, anupavisitta kanham vasudevam karayala pariggahiyam dasanaham sirasavattam matthae amjalim kattu evam vayaha–evam khalu sami! Tubbham piuchchha komti devi hatthi-naurao nayarao iham havvamagaya tubbham damsanam kamkhai. Tae nam te kodumbiyapurisa java kahemti. Tae nam kanhe vasudeve kodumbiyapurisanam amtie eyamattham sochcha nisamma hatthatutthe hatthikhamdhavaragae baravaie nayarie majjhammajjhenam jeneva komti devi teneva uvagachchhai, uvagachchhitta hatthikhamdhao pachchoruhai, pachchoruhitta komtie devie payaggahanam karei, karetta komtie devie saddhim hatthikhamdham duruhai, duruhitta baravaie nayarie majjhammajjhenam jeneva sae gihe teneva uvagachchhai, uvagachchhitta sayam giham anuppavisai. Tae nam se kanhe vasudeve komtim devim nhayam kayabalikammam jimiyabhuttuttaragayam vi ya nam samanim ayamtam chokkham paramasuibhuyam suhasanavaragayam evam vayasi–samdisau nam piuchchha! Kimagamanapaoyanam? Tae nam sa komti devi kanham vasudevam evam vayasi–evam khalu putta! Hatthinaure nayare juhitthilassa ranno agasa-talae suhappasuttassa pasao dovai devi na najjai kenai avahiya niya avakkhitta va. Tam ichchhami nam putta! Dovaie devie savvao samamta maggana-gavesanam kayam. Tae nam se kanhe vasudeve komtim piuchchham evam vayasi–jam navaram–piuchchha! Dovaie devie katthai suim va khuim va pavattim va labhami, to nam aham payalao va bhavanao va addhabharahao va samamtao dovaim devim sahatthim uvanemi tti kattu komtim piuchchham sakkarei sammanei, sakkaretta sammanetta padivisajjei. Tae nam sa komti devi kanhenam vasudevenam padivisajjiya samani jameva disim paubbhuya tameva disim padigaya. Tae nam se kanhe vasudeve kodumbiyapurise saddavei, saddavetta evam vayasi–gachchhaha nam tubbhe devanuppiya! Baravaie nayarie simghadaga-tiga-chaukka-chachchara-chaummuha-mahapahapahesu mahaya-mahaya saddenam ugghosemana-ugghosemana evam vayaha– evam khalu devanuppiya! Juhitthilassa ranno agasa-talagamsi suhapasuttassa pasao dovai devi na najjai kenai devena va danavena va kinnarena va kimpurisena va mahoragena va gamdhavvena va hiya va niya va avakkhitta va. Tam jo nam devanuppiya! Dovaie devie suim va khuim va pavattim va parikahei, tassa nam kanhe vasudeve viulam atthasampayanam dalayai tti kattu ghosanam ghosaveha, ghosavetta eyamanattiyam pachchappinaha. Tae nam te kodumbiyapurisa java pachchappinamti. Tae nam se kanhe vasudeve annaya amtoamteuragae oroha-samparivude sihasanavaragae viharai. Imam cha nam kachchhullanarae java jjhattivegena samovaie. Tae nam se kanhe vasudeve kachchhullanarayam ejjamanam pasai, pasitta asanao abbhutthei, abbhutthetta agghenam pajjenam asanenam uvanimamtei. Tae nam kachchhullanarae udagapariphosiyae dabbhovaripachchatthuyae bhisiyae nisiyai, nisiitta kanham vasudevam kusalodamtam puchchhai. Tae nam se kanhe vasudeve kachchhullanarayam evam vayasi–tumam nam devanuppiya! Bahuni gamagara-nagara-kheda-kabbada-donamuha-madamba-pattana-asama-nigama-sambaha-sannivesaim ahimdasi, bahuna ya raisara-talavara-madambiya-kodumbiya-ibbha-setthi-senavai-satthavahapabhiinam gihaim anupavisasi, tam atthiyaim te kahimchi dovaie devie sui va khui va pavitti va0 uvaladdha? Tae nam se kachchhullanarae kanham vasudevam evam vayasi–evam khalu devanuppiya! Annaya dhayaisamdadive puratthimaddham dahinaddha-bharahavasam avarakamka rayahanim gae. Tattha nam mae paumanabhassa ranno bhavanamsi dovai-devi-jarisiya ditthapuvva yavi hottha. Tae nam kanhe vasudeve kachchhullanarayam evam vayasi–tubbham cheva nam devanuppiya! Eyam puvvakammam. Tae nam se kachchhullanarae kanhenam vasudevenam evam vutte samane uppayanim vijjam avahei, avahetta jameva disim paubbhue tameva disim padigae. Tae nam se kanhe vasudeve duyam saddavei, saddavetta evam vayasi–gachchhaha nam tumam devanuppiya! Hatthinauram nayaram padussa ranno eyamattham niveehi–evam khalu devanuppiya! Dhayaisamdadive puratthimaddhe dahinaddha-bharahavase avarakamkae rayahanie paumanabhabhavanamsi dovaie devie pautti uvaladdha, tam gachchhamtu pamcha pamdava chauramginie senae saddhim samparivuda puratthima-veyalie mamam padivalemana chitthamtu. Tae nam se due bhanai java padivalemana chitthaha. Tevi java chitthamti. Tae nam se kanhe vasudeve kodumbiyapurise saddavei, saddavetta evam vayasi–gachchhaha nam tubbhe devanuppiya! Sannahiyam bherim taleha. Tevi talemti. Tae nam tie sannahiyae bherie saddam sochcha samuddavijayapamokkha ime dasa dasara java chhappannam balavagasahassio sannaddha-baddha-vammiya-kavaya uppiliya-sarasana-pattiya pinaddha-gevijja aviddha-vimala-varachimdha-patta gahiyauha-paharana appega-iya hayagaya appegaiya gayagaya java purisavagguraparikkhitta jeneva sabha suhamma jeneva kanhe vasudeve teneva uvagachchhamti, uvagachchhitta karayala pariggahiyam sirasavattam matthae amjalim kattu jaenam vijaenam baddhavemti. Tae nam se kanhe vasudeve hatthikhamdhavaragae sakoremtamalladamenam chhattenam dharijjamanenam seyavara chamarahim viijjamane haya-gaya-raha-pavarajohakaliyae chauramginie senae saddhim samparivude mahayabhada-chadagara-raha-pahakara-vimdaparikkhitte baravaie nayarie majjhammajjhenam nigachchhai, nigachchhitta jeneva puratthimaveyali teneva uvagachchhai, uvagachchhitta pamchahim pamdavehim saddhim egayao milai, militta khamdhavaranivesam karei, karetta posahasalam anuppavisai, anuppavisitta sutthiyam devam manasikaremane-manasikaremane chitthai. Tae nam kanhassa vasudevassa atthamabhattamsi parinamamanamsi sutthio java agao. Bhanamtu nam devanuppiya! Jam mae kayavvam. Tae nam se kanhe vasudeve sutthiyam devam evam vayasi–evam khalu devanuppiya! Dovai devi dhayaisamdadive puratthimaddhe dahinaddha-bharahavase avarakamkae rayahanie, paumanabhabhavanamsi sahiya tannam tumam devanuppiya! Mama pamchahim pamdavehim saddhim appa chhatthassa chhanham rahanam lavanasamudde maggam viyarahi, jenaham avarakamkam rayahanim dovaie kuvam gachchhami. Tae nam se sutthie deve kanham vasudevam evam vayasi–kinnam devanuppiya! Jaha cheva paumanabhassa ranno puvvasamgaienam devenam dovai devi jambuddivao divao bharahao vasao hatthinaurao nayarao juhitthilassa ranno bhavanao0 sahiya, taha cheva dovaim devim dhayaisamdao divao bharahao vasao avarakamkao rayahanio paumanabhassa ranno bhavanao hatthinauram saharami? Udahu–paumanabham rayam sapurabalavahanam lavanasamudde pakkhivami? Tae nam se kanhe vasudeve sutthiyam devam evam vayasi–ma nam tumam devanuppiya! Jaha cheva paumanabhassa ranno puvvasamgaienam devenam dovai devi jambuddivao divao bharahao vasao hatthinaurao nayarao juhitthilassa ranno bhavanao sahiya, taha cheva dovaim devim dhayaisamdao divao bharahao vasao avarakamkao rayahanio paumanabhassa ranno bhavanao hatthinauram saharahi. Tumam nam devanuppiya! Mama lavanasamudde pamchahim pamdavehim saddhim appachhatthassa chhanham rahanam maggam viyarahi. Sayameva nam aham dovaie kuvam gachchhami. Tae nam se sutthie deve kanham vasudevam evam vayasi–evam hou. Pamchahim pamdavehim saddhim appachhatthassa chhanham rahanam lavanasamudde maggam viyarai. Tae nam se kanhe vasudeve chauramginim senam padivisajjei, padivisajjetta pamchahim pamdavehim saddhim appachhatthe chhahim rahehim lavanasamuddam majjhammajjhenam viivayai, viivaitta jeneva avarakamka rayahani teneva avarakamkae rayahanie aggujjane teneva uvagachchhai, uvagachchhitta raham thavei, thavetta daruyam sarahim saddavei, saddavetta evam vayasi– Gachchhaha nam tumam devanuppiya! Avarakamkam rayahanim anuppavisahi, anuppavisitta paumanabhassa ranno vamenam paenam payapidham avakkamitta kumtaggenam leham panamehi, panametta tivaliyam bhiudim nidale sahattu asurutte rutthe kuvie chamdikkie misimisemane evam vayahi–hambho paumanabha! Apatthiyapatthiya! Duramtapamtalakkhana! Hinapunnachauddasa! Siri-hiri-dhii-kitti-parivajjiya! Ajja na bhavasi. Kinnam tumam na yanasi kanhassa vasudevassa bhaginim dovaim devim iham havvamanemane? Tam evamavi gae pachchappinahi nam tumam dovaim devim kanhassa vasudevassa ahava nam juddhasajje niggachchhahi. Esa nam kanhe vasudeve pamchahim pamdavehim saddhim appachhatthe dovaie devie kuvam havvamagae. Tae nam se darue sarahi kanhenam vasudevenam evam vutte samane hatthatutthe padisunei, padisunetta avarakamkam rayahanim anupavisai, anupavisitta jeneva paumanabhe teneva uvagachchhai, uvagachchhitta karayala pariggahiyam sirasavattam matthae amjalim kattu jaenam vijaenam vaddhavei, vaddhavetta evam vayasi–esa nam sami! Mama vinayapadivatti, ima anna mama samissa samuhanatti tti kattu asurutte vamapaenam payapidham akkamai, akkamitta kumtaggenam leham panamei, panametta tivaliyam bhiudim nidale sahattu asurutte rutthe kuvie chamdikkie misimisemane evam vayasi– Hambho paumanabha! Apatthiyapatthiya! Duramtapamtalakkhana! Hinapunnachauddasa! Siri-hiri-dhii-kitti-parivajjiya! Ajja na bhavasi. Kinnam tumam na yanasi kanhassa vasudevassa bhaginim dovaim devim iha havva-manamane? Tam evamavi gae pachchappinahi nam tumam dovaim devim kanhassa vasudevassa ahava nam juddhasajje niggachchhahi. Esa nam kanhe vasudeve pamchahim pamdavehim saddhim appachhatthe dovaie devie kuvam havvamagae. Tae nam se paumanabhe daruenam sarahina evam vutte samane asurutte rutthe kuvie chamdikkie misimisemane tivalim bhiudim nidale sahattu evam vayasi–nappinami nam aham devanuppiya! Kanhassa vasudevassa dovaim. Esa nam aham sayameva jujjhasajje niggachchhami tti kattu daruyam sarahim evam vayasi–kevalam bho! Rayasatthesu due avajjhe tti kattu asakkariya asammaniya avadarenam nichchhubhavei. Tae nam se darue sarahi paumanabhenam ranna asakkariya asammaniya avadarenam nichchhudhe samane jeneva kanhe vasudeve teneva uvagachchhai, uvagachchhitta karayala pariggahiyam dasanaham sirasavattam matthae amjalim kattu jaenam vijaenam vaddhavei, vaddhavetta kanham vasudevam evam vayasi–evam khalu aham sami! Tubbham vayanenam avarakamkam rayahanim gae javam avadarenam nichchhubhavei. Tae nam se paumanabhe balavauyam saddavei, saddavetta evam vayasi–khippameva bho devanuppiya! Abhisekkam hatthirayanam padikappeha. Tayanamtaram cha nam chheyayariya-uvadesa-mai-kappana-vikappehim suniunehim ujjala-nevatthi-hattha-parivatthiyam susajjam java abhisekkam hatthirayanam padikappei, padikappetta uvaneti. Tae nam se paumanahe sannaddha-baddha-vammiya-kavae uppiliya-sarasana-pattie pinaddha-gevijje aviddha-vimala-vara-chimdha-patte gahiyauha-paharane0 abhisekkam hatthirayanam, duruhai, duruhitta haya-gaya-raha-pavarajohakaliyae chauramginie senae saddhim samparivude mahayabhada-chadagara-raha-pahakara-vimdaparikkhitte jeneva kanhe vasudeve teneva paharettha gamanae. Tae nam se kanhe vasudeve paumanabham rayam ejjamanam pasai, pasitta te pamcha pamdave evam vayasi–hambho daraga! Kinnam tubbhe paumanabhenam saddhim jujjhihiha udahu pechchhihiha? Tae nam te pamcha pamdava kanham vasudevam evam vayasi–amhe nam sami! Jujjhamo, tubbhe pechchhaha. Tae nam te pamcha pamdava sannaddha-baddha-vammiya-kavaya uppiliya-sarasana-pattiya pinaddha-gevijja aviddha-vimala-varachimdhapatta gahiyauha-paharana rahe duruhamti, duruhitta jeneva paumanabhe raya teneva uvagachchhamti, uvagachchhitta evam vayasi–amhe va paumanabhe va raya tti kattu paumanabhenam saddhim sampalagga yavi hottha. Tae nam se paumanabhe raya te pamcha pamdave khippameva haya-mahiya-pavaravira-ghaiya-vivadiyachimdha-dhaya-padage kichchhovagayapane disodisim padisehei. Tae nam te pamcha paumanabhenam ranna haya-mahiya-pavara-vira-dhaiya-vivadiyachimdha-dhaya-padaga kichchhovagayapana diso disim padisehiya samana atthama abala aviriya apurisakkara-parakkama adharanijjamitti kattu jeneva kanhe vasudeve teneva uvagachchhamti. Tae nam se kanhe vasudeve te pamcha-pamdave evam vayasi–kahannam tubbhe devanuppiya! Paumanabhenam ranna saddhim sampalagga? Tae nam te pamcha pamdava kanham vasudevam evam vayasi–evam khalu devanuppiya! Amhe tubbhehim abbhanunnaya samana sannaddha-baddha-vammiya-kavaya rahe duruhamo, duruhetta jeneva paumanabhe teneva uvagachchhamo, uvagachchhitta evam vayasi–amhe va pau-manabhe va rayatti kattu paumanabhenam saddhim sampalagga. Tae nam se paumanabhe raya amham khippameva haya-mahiya-pavaravira-dhaiya-viva-diyachimdha-dhaya-padage kichchhovagayapane disodisim padisehei. Tae nam se kanhe vasudeve te pamcha pamdave evam vayasi–jai nam tubbhe devanuppiya! Evam vayamta–amhe no paumanabhe rayatti kattu paumanabhenam saddhim sampalaggamta to nam tubbhe no paumanabhe haya-mahiya-pavara-vira-dhaiya-vivadiyachimdha-dhaya-padage kichchho-vagayapane disodisim padisehittha. Tam pechchhaha nam tubbhe devanuppiya! Aham no paumanabhe rayatti kattu paumanabhenam ranna saddhim jujjhami raham duruhai, duruhitta jeneva paumanabhe raya teneva uvagachchhai, uvagachchhitta seyam gokhirahara-dhavalam tanasolliya-simduvara-kumdemdu-sannigasam niyayassa balassa harisa-jananam riusenna-vinasanakaram pamchajannam samkham paramusai, paramusitta muhavayapuriyam karei. Tae nam tassa paumanabhassa tenam samkhasaddenam bala-tibhae haya-mahiya-pavaravira-dhaiya-vivadiyachimdha-dhaya-padage kichchhovagayapane disodisim padisehie. Tae nam se kanhe vasudeve airuggayabalachamda-imdadhanu-sannigasam, varamahisa-dariya-dappiya-dadhadhanasimgaggaraiyasaram, uragavara- pavaragavala- pavaraparahuya-bhamarakula- nili- niddha- ghamta- ghoya- pattam, Niunoviya-misimisimta-manirayana-ghamtiyajalaparikkhittam, taditarunakirana- tavanijjabaddhachimdham Daddaramalayagirisihara-kesarachamaravala-addhachamdachimdham, kala-hariya- ratta-piya- sukkila- bahunharuni-sampinnaddhajivam, jiviyamtakaram dhanum paramusai, paramusitta dhanum purei, puretta dhanusaddam karei. Tae nam tassa paumanabhassa dochche bala-tibhae tenam dhanusaddenam haya-mahiya-pavaravira-ghaiya-vivadiyachimdha-dhaya-padage kichchhovagayapane disodisim padisehie. Tae nam se paumanabhe raya tibhagabalavasese atthame abale avirie apurisakkaraparakkame adharanijjamiti kattu siggham turiyam chavalam chamdam jaina veiyam jeneva avarakamka teneva uvagachchhai, uvagachchhitta avarakamkam rayahanim anupavisai, anupavi-sitta baraim pihei, pihetta rohasajje chitthai. Tae nam se kanhe vasudeve jeneva avarakamka teneva uvagachchhai, uvagachchhitta raham thavei, thavetta rahao pachchoruhai, pachchoruhitta veuvviyasamugghaenam samohannai egam maham narasiha ruvam viuvvai, viuvvitta mahaya-mahaya saddenam payadaddariyam karei. Tae nam kanhenam vasudevenam mahaya-mahaya saddenam payadaddaraenam kaenam samanenam avarakamka rayahani sambhagga-pagara-gourattalaya-chariya-torana-palhatthiya-pavarabhavana-siridhara sarasarassa dharaniyale sannivaiya. Tae nam se paumanabhe raya avarakamkam rayahanim sambhagga-pagara-gourattalaya-chariya-torana-palhatthiyapavarabhavana-siridharam sarasarassa dharaniyale sannivaiyam0 pasitta bhie dovaim devim saranam uvei. Tae nam sa dovai devi paumanabham rayam evam vayasi–kinnam tumam devanuppiya! Na janasi kanhassa vasudevassa uttamapurisassa vippiyam karemane? Mama iham havvamanemane tam evamavi gae gachchha nam tumam devanuppiya! Nhae ullapadasadae ochulagavatthaniyatthe amteura-pariyalasamparivude aggaim varaim rayanaim gahaya mamam puraokaum kanham vasudevam karayala pariggahiyam dasanaham sirasavattam matthae amjalim kattu payavadie saranam uvehi. Panivaiya-vachchhala nam devanuppiya! Uttamapurisa. Tae nam se paumanabhe dovaie devie evam vutte samane nhae ullapadasadae ochulaga-vatthaniyatthe amteura-pariya-lasamparivude aggaim varaim rayanaim gahaya dovaim devim puraokaum kanham vasudevam karayalapariggahiyam dasanaham sirasavattam matthae amjalim kattu payavadie saranam uvei, uvetta evam vayasi– dittha nam devanuppiyanam iddhi jui jaso balam viriyam purisakkara-parakkame. Tam khamemi nam devanuppiya! Khamamtu nam devanuppiya! Khamtumarahamti nam devanuppiya! Nai bhujjo evamkaranayae tti kattu pamjaliude payavadie kanhassa vasudevassa dovaim devim sahatthim uvanei. Tae nam se kanhe vasudeve paumanabham evam vayasi– hambho paumanabha! Apatthiyapatthiya! Duramtapamtalakkhana! Hina-punnachauddasa! Siri-hiri-dhii-kitti-parivajjiya! Kinnam tumam na janasi mama bhaginim dovaim devim iham havvamanemane? Tam eva-mavi gae natthi? Te mamahimto iyanim bhayamatthi? Tti kattu paumanabham padivisajjei, dovaim devim genhai, genhitta raham duruhei, duruhitta jeneva pamcha pamdava teneva uvagachchhai, uvagachchhitta pamchanham pamdavanam dovaim devim sahatthi uvanei. Tae nam se kanhe vasudeve pamchahim pamdavehim saddhim appachhatthe chhahim rahehim lavanasamuddam majjhammajjhenam jeneva jambuddive dive jeneva bharahe vase teneva paharettha gamanae.
Sutra Meaning Transliteration : Juo sutra 172