Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104768
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-५ शेलक

 Translated Chapter :

શ્રુતસ્કંધ-૧

અધ્યયન-૫ શેલક
Section : Translated Section :
Sutra Number : 68 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से सुए अन्नया कयाइ जेणेव सेलगपुरे नगरे जेणेव सुभूमिभागे उज्जाणे तेणेव उवागच्छइ, उवागच्छित्ता अहापडिरूवं ओग्गहं ओगिण्हित्ता संजमेणं तवसा अप्पाणं भावेमाणे विहरइ। परिसा निग्गया। सेलओ निग्गच्छइ। तए णं से सेलए सुयस्स अंतिए धम्मं सोच्चा निसम्म हट्ठतुट्ठे सुयं तिक्खुत्तो आयाहिण-पयाहिणं करेइ, करेत्ता वंदइ नमंसइ, वंदित्ता नमंसित्ता एवं वयासी–सद्दहामि णं भंते! निग्गंथं पावयणं जाव नवरं देवानुप्पिया! पंथगपामोक्खाइं पंच मंतिसयाइं आपुच्छामि, मंडुयं च कुमारं रज्जे ठावेमि। तओ पच्छा देवानुप्पियाणं अंतिए मुंडे भवित्ता अगाराओ अनगारियं पव्वयामि। अहासुहं देवानुप्पिया। तए णं से सेलए राया सेलगपुरं नगरं अनुप्पविसइ, अनुप्पविसित्ता जेणेव सए गिहे जेणेव बाहिरिया उवट्ठाण-साला तेणेव उवागच्छइ, उवागच्छित्ता सीहासने सण्णिसण्णे। तए णं से सेलए राया पंथगपामोक्खे पंच मंतिसए सद्दावेइ, सद्दावेत्ता एवं वयासी–एवं खलु देवानुप्पिया! मए सुयस्स अंतिए धम्मे निसंते, से वि य मे धम्मे इच्छिए पडिच्छिए अभिरुइए। तए णं अहं देवानुप्पिया! संसारभउव्विग्गे भीए जम्मण-जर-मरणाणं सुयस्स अनगारस्स अंतिए मुंडे भवित्ता अगाराओ अनगारियं पव्वयामि। तुब्भे णं देवानुप्पिया! किं करेह? किं ववसह? किं वा भे हियइच्छिए सामत्थे? तए णं ते पंथगपामोक्खा पंच मंतिसया सेलगं रायं एवं वयासी–जइ णं तुब्भे देवानुप्पिया! संसारभउव्विग्गा जाव पव्वयह, अम्हं णं देवानुप्पिया! के अन्ने आहारे वा आलंबे वा? अम्हे वि य णं देवानुप्पिया! संसारभउव्विग्गा जाव पव्वयामो। जहा णं देवानुप्पिया! अम्हं बहूसु कज्जेसु य कारणेसु य कुडुंबेसु य मंतेसु य गुज्झेसु य रहस्सेसु य निच्छएसु य आपुच्छणि-ज्जे पडिपुच्छणिज्जे, मेढी पमाणं आहारे आलंबणं चक्खू, मेढीभूए पमाणभूए आहारभूए आलंबणभूए चक्खुभूए०, तहा णं पव्व-इयाण वि समाणाणं बहूसु कज्जेसु य जाव चक्खुभूए। तए णं से सेलगे पंथगपामोक्खे पंच मंतिसए एवं वयासी–जइ णं देवानुप्पिया! तुब्भे संसारभउव्विग्गा जाव पव्वयह, तं गच्छह णं देवानुप्पिया! सएसु-सएसु कुटुंबेसु जेट्ठपुत्ते कुटुंबमज्झे ठावेत्ता पुरिससहस्सवाहिणीओ सीयाओ दुरूढा समाणा मम अंतियं पाउब्भवह। ते वि तहेव पाउब्भवंति। तए णं से सेलए राया पंच मंतिसयाइं पाउब्भवमाणाइं पासइ, पासित्ता हट्ठतुट्ठे कोडुंबियपुरिसे सद्दावेइ, सद्दावेत्ता एवं वयासी–खिप्पामेव भो देवानुप्पिया! मंडुयस्स कुमारस्स महत्थं महग्घं महरिहं विउलं रायाभिसेयं उवट्ठवेह। तए णं ते कोडुंबियपुरिसा मंडुयस्स कुमारस्स महत्थं महग्घं महरिहं विउलं रायाभिसेयं उवट्ठवेंति। तए णं से सेलए राया बहूहिं गणनायगेहिं य जाव संधिवालेहि य सद्धिं संपरिवुडे मंडुयं कुमारं जाव रायाभिसेएणं अभिसिंचइ। तए णं से मंडुए राया जाए–महयाहिमवंत-महंत-मलय-मंदर-महिंदसारे जाव रज्जं पसासेमाणे विहरइ। तए णं से सेलए मंडुयं रायं आपुच्छइ। तए णं मंडुए राया कोडुंबियपुरिसे सद्दावेइ, सद्दावेत्ता एवं वयासी–खिप्पामेव भो देवानुप्पिया! सेलगपुरं नयरं आसिय-सित्त-सुइय-सम्मज्जिओवलित्तं जाव सुगंधवरगंधियं० गंधवट्टिभूयं करेह य कारवेह य, एयमाणत्तियं पच्चप्पिणह। तए णं से मंडुए दोच्चं पि कोडुंबियपुरिसे एवं वयासी–खिप्पामेव भो देवानुप्पिया! सेलगस्स रन्नो महत्थं महग्घं महरिहं विउलं निक्खमणाभिसेयं [करेह?] जहेव मेहस्स तहेव नवरं–पउमावती देवी अग्गकेसे पडिच्छइ, सच्चेव पडिग्गहं गहाय सीयं दुरुहइ। अवसेसं तहेव जाव। तए णं से सेलगे सयमेव पंचमुट्ठियं लोयं करेइ, करेत्ता जेणामेव सुए तेणामेव उवा-गच्छइ, उवागच्छित्ता सुयं अनगारं तिक्खुत्तो आयाहिण-पयाहिणं करेइ, करेत्ता वंदइ नमंसइ जाव पव्वइए। तए णं से सेलए अनगारे जाए जाव कम्मनिग्घायणट्ठाए एवं च णं विहरइ। तए णं से सेलए सुयस्स तहारूवाणं थेराणं अंतिए सामाइयमाइयाइं एक्कारस अंगाइं अहिज्जइ, अहिज्जित्ता बहूहिं चउत्थ-छट्ठट्ठम-दसम-दुवालसेहिं मासद्धमासखमणेहिं अप्पाणं भावेमाणे विहरइ। तए णं से सुए सेलगस्स अनगारस्स ताइं पंथगपामोक्खाइं पंच अनगारसयाइं सीसत्ताए वियरइ। तए णं से सुए अन्नया कयाइ सेलगपुराओ नगराओ सुभूमिभागाओ उज्जाणाओ पडिनिक्खमइ, पडिनिक्खमित्ता बहिया जनवयविहारं विहरइ। तए णं से सुए अनगारे अन्नया कयाइ तेणं अनगारसहस्सेणं सद्धिं संपरिवुडे पुव्वाणुपुव्विं चरमाणे गामाणुगामं दूइज्जमाणे सुहंसुहेणं विहरमाणे जेणेव पुंडरीयपव्वए तेणेव उवागच्छइ, उवागच्छित्ता पुंडरीयं पव्वयं सणियं-सणियं दुरुहइ, दुरुहित्ता मेघघणसन्निगासं देवसन्निवायं पुढविसिलापट्टयं पडिलेहेइ, पडिलेहेत्ता जाव संलेहणा-ज्झूसणा-ज्झूसिए भत्तपाण-पडियाइक्खिए पाओवगमणंणुवन्ने। तए णं से सुए बहूणि वासाणि सामण्णपरियागं पाउणित्ता, मासियाए संलेहणाए अत्ताणं ज्झूसित्ता, सट्ठिं भत्ताइं अनसणाए छेदित्ता जाव केवलवरनाणदंसणं समुप्पाडेत्ता तओ पच्छा सिद्धे बुद्धे मुत्ते अंतगडे परिनिव्वुडे सव्वदुक्खप्पहीणे०।
Sutra Meaning : જુઓ સૂત્ર ૬૬
Mool Sutra Transliteration : [sutra] tae nam se sue annaya kayai jeneva selagapure nagare jeneva subhumibhage ujjane teneva uvagachchhai, uvagachchhitta ahapadiruvam oggaham oginhitta samjamenam tavasa appanam bhavemane viharai. Parisa niggaya. Selao niggachchhai. Tae nam se selae suyassa amtie dhammam sochcha nisamma hatthatutthe suyam tikkhutto ayahina-payahinam karei, karetta vamdai namamsai, vamditta namamsitta evam vayasi–saddahami nam bhamte! Niggamtham pavayanam java navaram devanuppiya! Pamthagapamokkhaim pamcha mamtisayaim apuchchhami, mamduyam cha kumaram rajje thavemi. Tao pachchha devanuppiyanam amtie mumde bhavitta agarao anagariyam pavvayami. Ahasuham devanuppiya. Tae nam se selae raya selagapuram nagaram anuppavisai, anuppavisitta jeneva sae gihe jeneva bahiriya uvatthana-sala teneva uvagachchhai, uvagachchhitta sihasane sannisanne. Tae nam se selae raya pamthagapamokkhe pamcha mamtisae saddavei, saddavetta evam vayasi–evam khalu devanuppiya! Mae suyassa amtie dhamme nisamte, se vi ya me dhamme ichchhie padichchhie abhiruie. Tae nam aham devanuppiya! Samsarabhauvvigge bhie jammana-jara-marananam suyassa anagarassa amtie mumde bhavitta agarao anagariyam pavvayami. Tubbhe nam devanuppiya! Kim kareha? Kim vavasaha? Kim va bhe hiyaichchhie samatthe? Tae nam te pamthagapamokkha pamcha mamtisaya selagam rayam evam vayasi–jai nam tubbhe devanuppiya! Samsarabhauvvigga java pavvayaha, amham nam devanuppiya! Ke anne ahare va alambe va? Amhe vi ya nam devanuppiya! Samsarabhauvvigga java pavvayamo. Jaha nam devanuppiya! Amham bahusu kajjesu ya karanesu ya kudumbesu ya mamtesu ya gujjhesu ya rahassesu ya nichchhaesu ya apuchchhani-jje padipuchchhanijje, medhi pamanam ahare alambanam chakkhu, medhibhue pamanabhue aharabhue alambanabhue chakkhubhue0, taha nam pavva-iyana vi samananam bahusu kajjesu ya java chakkhubhue. Tae nam se selage pamthagapamokkhe pamcha mamtisae evam vayasi–jai nam devanuppiya! Tubbhe samsarabhauvvigga java pavvayaha, tam gachchhaha nam devanuppiya! Saesu-saesu kutumbesu jetthaputte kutumbamajjhe thavetta purisasahassavahinio siyao durudha samana mama amtiyam paubbhavaha. Te vi taheva paubbhavamti. Tae nam se selae raya pamcha mamtisayaim paubbhavamanaim pasai, pasitta hatthatutthe kodumbiyapurise saddavei, saddavetta evam vayasi–khippameva bho devanuppiya! Mamduyassa kumarassa mahattham mahaggham mahariham viulam rayabhiseyam uvatthaveha. Tae nam te kodumbiyapurisa mamduyassa kumarassa mahattham mahaggham mahariham viulam rayabhiseyam uvatthavemti. Tae nam se selae raya bahuhim gananayagehim ya java samdhivalehi ya saddhim samparivude mamduyam kumaram java rayabhiseenam abhisimchai. Tae nam se mamdue raya jae–mahayahimavamta-mahamta-malaya-mamdara-mahimdasare java rajjam pasasemane viharai. Tae nam se selae mamduyam rayam apuchchhai. Tae nam mamdue raya kodumbiyapurise saddavei, saddavetta evam vayasi–khippameva bho devanuppiya! Selagapuram nayaram asiya-sitta-suiya-sammajjiovalittam java sugamdhavaragamdhiyam0 gamdhavattibhuyam kareha ya karaveha ya, eyamanattiyam pachchappinaha. Tae nam se mamdue dochcham pi kodumbiyapurise evam vayasi–khippameva bho devanuppiya! Selagassa ranno mahattham mahaggham mahariham viulam nikkhamanabhiseyam [kareha?] jaheva mehassa taheva navaram–paumavati devi aggakese padichchhai, sachcheva padiggaham gahaya siyam duruhai. Avasesam taheva java. Tae nam se selage sayameva pamchamutthiyam loyam karei, karetta jenameva sue tenameva uva-gachchhai, uvagachchhitta suyam anagaram tikkhutto ayahina-payahinam karei, karetta vamdai namamsai java pavvaie. Tae nam se selae anagare jae java kammanigghayanatthae evam cha nam viharai. Tae nam se selae suyassa taharuvanam theranam amtie samaiyamaiyaim ekkarasa amgaim ahijjai, ahijjitta bahuhim chauttha-chhatthatthama-dasama-duvalasehim masaddhamasakhamanehim appanam bhavemane viharai. Tae nam se sue selagassa anagarassa taim pamthagapamokkhaim pamcha anagarasayaim sisattae viyarai. Tae nam se sue annaya kayai selagapurao nagarao subhumibhagao ujjanao padinikkhamai, padinikkhamitta bahiya janavayaviharam viharai. Tae nam se sue anagare annaya kayai tenam anagarasahassenam saddhim samparivude puvvanupuvvim charamane gamanugamam duijjamane suhamsuhenam viharamane jeneva pumdariyapavvae teneva uvagachchhai, uvagachchhitta pumdariyam pavvayam saniyam-saniyam duruhai, duruhitta meghaghanasannigasam devasannivayam pudhavisilapattayam padilehei, padilehetta java samlehana-jjhusana-jjhusie bhattapana-padiyaikkhie paovagamanamnuvanne. Tae nam se sue bahuni vasani samannapariyagam paunitta, masiyae samlehanae attanam jjhusitta, satthim bhattaim anasanae chheditta java kevalavarananadamsanam samuppadetta tao pachchha siddhe buddhe mutte amtagade parinivvude savvadukkhappahine0.
Sutra Meaning Transliteration : Juo sutra 66