Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104767
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-५ शेलक

 Translated Chapter :

શ્રુતસ્કંધ-૧

અધ્યયન-૫ શેલક
Section : Translated Section :
Sutra Number : 67 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तेणं कालेणं तेणं समएणं सोगंधिया नामं नयरी होत्था–वण्णओ। नीलासोए उज्जाणे–वण्णओ। तत्थ णं सोगंधियाए नयरीए सुदंसणे नामं नयरसेट्ठी परिवसइ, अड्ढे जाव अपरिभूए। तेणं कालेणं तेणं समएणं सुए नामं परिव्वायए होत्था–रिउव्वेय-जजुव्वेय-सामवेय-अथव्वणवेय-सट्ठितंतकुसले संखसमए लद्धट्ठे पंचजम-पंचनियमजुत्तं सोयमूलयं दसप्पयारं परिव्वायगधम्मं दाणधम्मं च सोयधम्मं च तित्थाभिसेयं च आघवे-माणे पण्णवेमाणे धाउरत्त-वत्थ-पवर-परिहिए तिदंड-कुंडिय-छत्त-छन्नालय-अंकुस-पवित्तय-केसरि-हत्थगए परिव्वायगसहस्सेणं सद्धिं संपरिवुडे जेणेव सोगंधिया नयरी जेणेव परिव्वायगावसहे तेणेव उवागच्छइ, उवागच्छित्ता परिव्वायगावसहंसि भंडगनिक्खेवं करेइ, करेत्ता संखसमएणं अप्पाणं भावेमाणे विहरइ। तए णं सोगंधियाए नगरीए सिंघाडग-तिग-चउक्क-चच्चर-चउम्मुह-महापह-पहेसु बहुजनो अन्नमन्नस्स एवमाइक्खइ–एवं खलु सुए परिव्वायए इहमागए इह संपत्ते इह समोसढे इह चेव सोगंधियाए नयरीए परिव्वायगावसहंसि संखसमएणं अप्पाणं भावेमाणे विहरइ। परिसा निग्गया! सुदंसणो वि णीति। तए णं से सुए परिव्वायए तीसे परिसाए सुदंसणस्स य अन्नेसि च बहूणं संखाणं परिकहेइ–एवं खलु सुदंसणा! अम्हं सोयमूलए धम्मे पन्नत्ते। से वि य सोए दुविहे पन्नत्ते, तं जहा–दव्वसोए य भावसोए य। दव्वसोए उदएणं मट्टियाए य । भावसोए दब्भेहि य मंतेहि य। जं णं अम्हं देवानुप्पिया! किंचि असुई भवइ तं सव्वं सज्जपुढवीए आलिप्पइ, तओ पच्छा सुद्धेण वारिणा पक्खालिज्जइ, तओ तं असुई सुई भवइ। एवं खलु जीवा जलाभिसेय-पूयप्पाणो अविग्घेणं सग्गं गच्छंति। तए णं से सुदंसणे सुयस्स अंतिए धम्मं सोच्चा हट्ठतुट्ठे सुयस्स अंतियं सोयमूलयं धम्मं गेण्हइ, गेण्हित्ता परिव्वायए विउलेणं असन-पान-खाइम-साइमेणं पडिलाभेमाणे संखसमएणं अप्पाणं भावेमाणे विहरइ। तए णं से सुए परिव्वायए सोगंधियाओ नयरीओ निग्गच्छइ, निग्गच्छित्ता बहिया जनवयविहारं विहरइ। तेणं कालेणं तेणं समएणं थावच्चापुत्तस्स समोसरणं। परिसा निग्गया। सुदंसणो वि नीइ। थावच्चापुत्तं वंदइ नमंसइ, वंदित्ता-नमंसित्ता एवं वयासी–तुम्हाणं किंमूलए धम्मे पन्नत्ते? तए णं थावच्चापुत्ते सुदंसणेणं एवं वुत्ते समाणे सुदंसणं एवं वयासी–सुदंसणा! विनयमूलए धम्मे पन्नत्ते। से वि य विनए दुविहे पन्नत्ते, तं जहा–अगारविनए अनगारविनए य। तत्थ णं जे से अगारविनए, से णं चाउज्जामिए गिहिधम्मे। तत्थ णं जे से अनगारविनए, से णं चाउज्जामा, तं जहा-सव्वाओ पाणाइवायाओ वेरमणं, सव्वाओ मुसावायाओ वेरमणं सव्वाओ अदिन्नादाणाओ वेरमणं, सव्वाओ बहिद्धादाणाओ वेरमणं। इच्चेएणं दुविहेणं विनयमूलएणं धम्मेणं आणुपुव्वेणं अट्ठकम्मपगडीओ खवेत्ता लोयग्गपइट्ठाणा भवंति। तए णं थावच्चापुत्ते सुदंसणं एवं वयासी–तुब्भण्णं सुदंसणा! किंमूलए धम्मे पन्नत्ते? अम्हाणं देवानुप्पिया! सोयमूलए धम्मे पन्नत्ते। से वि य सोए दुविहे पन्नत्ते, तं जहा–दव्वसोए य भावसोए य। दव्वसोए उदएणं मट्टियाए य। भावसोए दब्भेहि य मंतेहि य। जं णं अम्हं देवानुप्पिया! किंचि असुई भवइ तं सव्वं सज्जपुढवीए आलिप्पइ, तओ पच्छा सुद्धेण वारिणा पक्खालिज्जइ, तओ णं असुई सुई भवइ। एवं खलु जीवा जलाभिसेय-पूयप्पाणो अविग्घेणं सग्गं गच्छंति। तए णं थावच्चापुत्ते सुदंसणं एवं वयासी–सुदंसणा! से जहानामए केइ पुरिसे एगं महं रुहिरकयं वत्थं रुहिरेण चेव धोवेज्जा, तए णं सुदंसणा! तस्स रुहिरकयस्स वत्थस्स रुहिरेण चेव पक्खालिज्जमाणस्स अत्थि काइ सोही? नो इणट्ठे समट्ठे। एवामेव सुदंसणा! तुब्भं पि पाणाइवाएणं जाव बहिद्धादाणेणं नत्थि सोही, जहा तस्स रुहिरकयस्स वत्थस्स रुहिरेणं चेव पक्खालिज्जमाणस्स नत्थि सोही। सुदंसणा! से जहानामए केइ पुरिसे एगं महं रुहिरकयं वत्थं सज्जिय-खारेणं आलिंपइ, आलिंपित्ता पयणं आरुहेइ, आरुहेत्ता उण्हं गाहेइ, तओ पच्छा सुद्धेणं वारिणा धोवेज्जा। से नूनं सुदंसणा! तस्स रुहिरकयस्स वत्थस्स सज्जिय-खारेणं अनुलित्तस्स पयणं आरुहियस्स उण्हं गाहियस्स सुद्धेणं वारिणा पक्खालिज्जमाणस्स सोही भवइ? हंता भवइ। एवामेव सुदंसणा! अम्हं पि पाणाइवायवेरमणेणं जाव बहिद्धादाणवेरमणेणं अत्थि सोही, जहा वा तस्स रुहिरकयस्स वत्थस्स सज्जिय-खारेणं स्स पयणं आरुहियस्स उण्हं गाहियस्स सुद्धेणं वारिणा पक्खालिज्जमाणस्स अत्थि सोही। तत्थ णं सुदंसणे संबुद्धे थावच्चापुत्तं वंदइ नमंसइ, वंदित्ता नमंसित्ता एवं वयासी–इच्छामि णं भंते! तुब्भं अंतिए धम्मं सोच्चा जाणित्तए। तए णं थावच्चापुत्ते अनगारे सुदंसणस्स तीसे य महइमहालियाए महच्चपरिसाए चाउज्जामं धम्मं कहेइ, तं जहा–सव्वाओ पाणाइवायाओ वेरमणं, सव्वाओ मुसावायाओ वेरमणं, सव्वाओ अदिन्नादाणाओ वेरमणं, सव्वाओ बहिद्धादाणाओ वेरमणं जाव। तए णं से सुदंसणे समणोवासए जाव–अभिगयजीवाजीवे जाव समणे निग्गंथे फासु-एसणिज्जेणं असन-पान-खाइम-साइमेणं वत्थ-पडिग्गह-कंबल-पायपुंछणेणं ओसह-भेसज्जेणं पाडिहारिएण य पीढ-फलग-सेज्जा-संथारएणं पडिलाभेमाणे विहरइ। तए णं तस्स सुयस्स परिव्वायगस्स इमीसे कहाए लद्धट्ठस्स समाणस्स अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था–एवं खलु सुदंसणेणं सोयधम्मं विप्पजहाय विनयमूले धम्मे पडिवण्णे, तं सेयं खलु मम सुदंसण-स्स दिट्ठिं वामेत्तए पुणरवि सोयमूलए धम्मे आघवित्तए त्ति कट्टु एवं संपेहेइ, संपेहेत्ता परिव्वायगसहस्सेणं सद्धिं जेणेव सोगंधिया नगरी जेणेव परिव्वायगावसहे तेणेव उवागच्छइ, उवागच्छित्ता परिव्वायगावसहंसि भंडगनिक्खेवं करेइ, करेत्ता धाउरत्त-वत्थ-पवर-परिहिए पविरल-परिव्वायगेणं सद्धिं संपरिवुडे परिव्वायगावसहाओ पडिनिक्खमइ, पडिनिक्खमित्ता सोगंधियाए नयरीए मज्झंमज्झेणं जेणेव सुदंसणस्स गिहे जेणेव सुदंसणे तेणेव उवागच्छइ। तए णं से सुदंसणे तं सुयं एज्जमाणं पासइ, पासित्ता नो अब्भुट्ठेइ न पच्चोचुग्गच्छइ नो आढाइ नो वंदइ तुसिणीए संचिट्ठइ। तए णं से सुए परिव्वायए सुदंसणं अणब्भुट्ठियं पासित्ता एवं वयासी– तुमं णं सुदंसणा! अन्नया ममं एज्जमाणं पासित्ता अब्भुट्ठेसि पच्चुग्गच्छसि आढासि० वंदसि, इयाणिं सुदंसणा! तुमं ममं एज्जमाणं पासित्ता नो अब्भुट्ठेसि नो पच्चुग्गच्छसि नो आढासि नो वंदसि। तं कस्स णं तुमे सुदंसणा! इमेयारूवे विनयमूले धम्मे पडिवण्णे? तए णं से सुदंसणे सुएणं परिव्वायगेणं एवं वुत्ते समाणे आसणाओ अब्भुट्ठेइ, अब्भुट्ठेत्ता करयलं परिग्गहियं सिरसावत्तं मत्थए अंजलिं कट्टु सुयं परिव्वायगं एवं वयासी– एवं खलु देवानुप्पिया! अरहओ अरिट्ठनेमिस्स अंतेवासी थावच्चापुत्ते नामं अनगारे पुव्वाणुपुव्विं चरमाणे गामाणुगामं दूइज्जमाणे इहमागए इह चेव नीलासोए उज्जाणे विहरइ। तस्स णं अंतिए विनयमूले धम्मे पडिवण्णे। तए णं से सुए परिव्वायए सुदंसणं एवं वयासी–तं गच्छामो णं सुदंसणा! तव धम्मायरियस्स थावच्चापुत्तस्स अंतियं पाउब्भवामो, इमाइं च णं एयारूवाइं अट्ठाइं हेऊइं पसिणाइं कारणाइं वागरणाइं पुच्छामो। तं जइ मे से इमाइं अट्ठाइं हेऊइं पसिणाइं कारणाइं वागरणाइं वागरेइ, तओ णं वंदामि नमंसामि। अह मे से इमाइं अट्ठाइं हेऊइं पसिणाइं कारणाइं वागरणाइं नो वागरेइ, तओ णं अहं एएहिं चेव अट्ठेहिं हेऊहिं निप्पट्ठ-पसिणवागरणं करिस्सामि। तए णं से सुए परिव्वायगसहस्सेणं सुदंसणेण य सेट्ठिणा सद्धिं जेणेव नीलासोए उज्जाणे जेणेव थावच्चापुत्ते अनगारे तेणेव उवागच्छइ, उवागच्छित्ता थावच्चापुत्तं एवं वयासी–जत्ता ते भंते? जवण्णिज्जं ते भंते? अव्वाबाहं ते भंते? फासुयं विहारं ते भंते? तए णं से थावच्चापुत्ते अनगारे सुएणं परिव्वायगेणं एवं वुत्ते समाणे सुयं परिव्वायगं एवं वयासी–सुया! जत्तावि मे जवणिज्जं पि मे अव्वाबाहं पि मे फासुयं विहारं पि मे। तए णं से सुए थावच्चापुत्तं एवं वयासी–किं ते भंते! जत्ता? सुया! जण्णं मम नाण-दंसण-चरित्त-तव-संजममाइएहिं जोएहिं जयणा, से तं जत्ता। से किं ते भंते! जवणिज्जं? सुया! जवणिज्जे दुविहे पन्नत्ते, तं जहा–इंदियजवणिज्जे य नोइंदियजवणिज्जे य। से किं तं इंदियजवणिज्जे? सुया! जण्णं ममं सोतिंदिय-चक्खिंदिय-घाणिंदिय-जिब्भिंदिय-फासिंदियाइं निरुवहयाइं वसे वट्टंति, से तं इंदियजवणिज्जे। से किं तं नोइंदियजवणिज्जे? सुया! जण्णं मम कोह-माण-माया-लोभा खीणा उवसंता नो उदयंति, से तं नोइंदियजवणिज्जे। से किं तं भंते! अव्वाबाहं? सुया! जण्णं मम वाइय-पित्तिय-सिंभिय-सन्निवाइया विविहा रोगायंका नो उदीरेंति, से तं अव्वाबाहं। से किं ते भंते! फासुयं विहारं? सुया! जण्णं आरामेसु उज्जानेसु देउलेसु सभासु पवासु इत्थी-पसु-पंडग-विवज्जियासु वसहीसु पाडिहारियं पीढ-फलग-सेज्जा -संथारयं ओगिण्हित्ता णं विहरामि, से तं फासुयं विहारं। सरिसवया ते भंते! किं भक्खेया? अभक्खेया? सुया! सरिसवया भक्खेया वि अभक्खेया वि। से केणट्ठेणं भंते! एवं वुच्चइ–सरिसवया भक्खेया वि अभक्खेया वि? सुया! सरिसवया दुविहा पन्नत्ता, तं जहा–मित्तसरिसवया य धण्णसरिसवया य। तत्थ णं जे ते मित्तसरिसवया ते तिविहा पन्नत्ता, तं जहा–सहजायया सहवड्ढियया सहपंसुकीलियया, ते णं समणाणं निग्गंथाणं अभक्खेया। तत्थ णं जे ते धण्णसरिसवया ते दुविहा पन्नत्ता, तं जहा–सत्थपरिणया य असत्थपरिणया य। तत्थ णं जे ते असत्थपरिणया ते णं समणाणं निग्गंथाणं अभक्खेया। तत्थ णं जे ते सत्थपरिणया ते दुविहा पन्नत्ता, तं जहा–फासुया य अफासुया य। अफासुया णं सुया! समणाणं निग्गंथाणं नो भक्खेया। तत्थ णं जे ते फासुया ते दुविहा पन्नत्ता, तं जहा–एसणिज्जा य अनेसणि-ज्जा य। तत्थ णं जे ते अनेसणिज्जा ते णं समणाणं निग्गंथाणं? अभक्खेया। तत्थ णं जे ते एसणिज्जा ते दुविहा पन्नत्ता, तं जहा–जाइया य अजाइया य। तत्थ णं जे ते अजाइया ते णं समणाणं निग्गंथाणं अभक्खेया। तत्थ णं जे ते जाइया ते दुविहा पन्नत्ता, तं जहा–लद्धा य अलद्धा य। तत्थ णं जे ते अलद्धा ते णं समणाणं निग्गंथाणं अभक्खेया। तत्थ णं जे ते लद्धा ते णं समणाणं निग्गंथाणं भक्खेया। एएणं अट्ठेणं सुया! एवं वुच्चइ–सरिसवया भक्खेया वि अभक्खेया वि। कुलत्था ते भंते! किं भक्खेया? अभक्खेया? सुया! कुलत्था भक्खेया वि अभक्खेया वि। से केणट्ठेणं भंते! एवं वुच्चइ–कुलत्था भक्खेया वि अभक्खेया वि? सुया! कुलत्था दुविहा पन्नत्ता, तं जहा–इत्थिकुलत्था य धण्णकुलत्था य। तत्थ णं जे ते इत्थिकुलत्था ते तिविहा पन्नत्ता, तं जहा–कुलवहुया इ य कुलमाउया इ य कुलधूया इ य। ते णं समणाणं निग्गंथाणं अभक्खेया। तत्थ णं जे ते धण्णकुलत्था ते दुविहा पन्नत्ता, तं जहा–सत्थपरिणया य असत्थपरिणया य। तत्थ णं जे ते असत्थपरिणया ते समणाणं निग्गंथाणं अभक्खेया। तत्थ णं जे ते सत्थपरिणया ते दुविहा पन्नत्ता, तं जहा–फासुया य अफासुया य। अफासुया णं सुया! समणाणं निग्गंथाणं नो भक्खेया। तत्थ णं जे ते फासुया ते दुविहा पन्नत्ता, तं जहा–एसणिज्जा य अणेसणिज्जा य। तत्थ णं जे ते अनेसणिज्जा ते णं समणाणं निग्गंथाणं अभक्खेया। तत्थ णं जे ते एसणिज्जा ते दुविहा पन्नत्ता, तं जहा–जाइया य अजाइया य तत्थ णं जे ते अजाइया ते णं समणाणं निग्गंथाणं अभक्खेया। तत्थ णं जे ते जाइया ते दुविहा पन्नत्ता, तं जहा–लद्धा य अलद्धा य। तत्थ णं जे ते अलद्धा ते अभक्खेया। तत्थ णं जे ते लद्धा ते णं समणाणं निग्गंथाणं भक्खेया। एएणं अट्ठेणं सुया! एवं वुच्चइ–कुलत्था भक्खेया वि अभक्खेया वि। मासा ते भंते! किं भक्खेया? अभक्खेया? सुया! मासा भक्खेया वि अभक्खेया वि। से केणट्ठेणं भंते! एवं वुच्चइ–मासा भक्खेया वि अभक्खेया वि? सुया! मासा तिविहा पन्नत्ता, तं जहा–कालमासा य अत्थमासा य धन्नमासा य। तत्थ णं जे ते कालमासा ते दुवालसविहा पन्नत्ता, तं जहा–सावणे भद्दवए आसोए कत्तिए मग्गसिरे पोसे माहे फग्गुणे चेत्ते वइसाहे जेट्ठामूले आसाढे। ते णं समणाणं निग्गंथाणं अभक्खेया। तत्थ णं जे ते अत्थमासा ते दुविहा पन्नत्ता, तं जहा–हिरण्णमासा य सुवण्णमासा य। ते णं समणाणं निग्गंथाणं अभक्खेया तत्थ णं जे ते धण्णमासा ते दुविहा पन्नत्ता, तं जहा–सत्थपरिणया य असत्थपरिणया य। तत्थ णं जे ते असत्थपरिणया ते समणाणं निग्गंथाणं अभक्खेया। तत्थ णं जे ते सत्थपरिणया ते दुविहा पन्नत्ता, तं जहा–फासुया य अफासुया य। अफासुया णं सुया! समणाणं निग्गंथाणं नो भक्खेया। तत्थ णं जे ते फासुया ते दुविहा पन्नत्ता, तं जहा–एसणिज्जा य अणेसणिज्जा य। तत्थ णं जे ते अणेसणिज्जा ते णं समणाणं निग्गंथाणं अभक्खेया। तत्थ णं जे ते एसणिज्जा ते दुविहा पन्नत्ता, तं जहा–जाइया य अजाइया य। तत्थ णं जे ते अजाइया ते णं समणाणं निग्गंथाणं अभक्खेया। तत्थ णं जे ते जाइया ते दुविहा पन्नत्ता, तं जहा–लद्धा य अलद्धा य। तत्थ णं जे ते अलद्धा ते णं समणाणं निग्गंथाणं अभक्खेया। तत्थ णं जे ते लद्धा ते णं समणाणं निग्गंथाणं भक्खेया। एएणं अट्ठेणं सुया! एवं वुच्चइ–मासा भक्खेया वि अभक्खेया वि०। एगे भवं? दुवे भवं? अक्खए भवं? अव्वए भवं? अवट्ठिए भवं? अनेगभूय-भाव-भविए भवं? सुया! एगे वि अहं, दुवेवि अहं, अक्खए वि अहं, अव्वए वि अहं, अवट्ठिए वि अहं, अनेगभूय-भाव-भविए वि अहं। से केणट्ठेणं भंते! एगे वि अहं? दुवेवि अहं? अक्खए वि अहं? अव्वए वि अहं? अवट्ठिए वि अहं? अनेगभूय-भाव-भविए वि अहं? सुया! दव्वट्ठयाए एगे वि अहं, नाणदंसणट्ठयाए दुवे वि अहं, पएसट्ठयाए अक्खए वि अहं, अव्वए वि अहं, अवट्ठिए वि अहं उवओगट्ठयाए अनेगभूय-भावभविए वि अहं। एत्थ णं से सुए संबुद्धे थावच्चापुत्तं वंदइ नमंसइ, वंदित्ता नमंसित्ता एवं वयासी–इच्छामि णं भंते! तुब्भं अंतिए केवलिपन्नत्तं धम्मं निसामित्तए। तए णं थावच्चापुत्ते अनगारे सुयस्स चाउज्जामं धम्मं कहेइ। तए णं से सुए परिव्वायए थावच्चापुत्तस्स अंतिए धम्मं सोच्चा निसम्म एवं वयासी–इच्छामि णं भंते! परिव्वायग-सहस्सेणं सद्धिं संपरिवुडे देवानुप्पियाणं अंतिए मुंडे भवित्ता पव्वइत्तए। अहासुहं देवानुप्पिया। तए णं से सुए परिव्वायए उत्तरपुरत्थिमे दिसीभाए अवक्कमइ, अवक्कमित्ता तिदंडयं य कुंडियाओ य छत्तए य छन्नालए य अंकुसए य पवित्तए य केसरियाओ य धाउरत्ताओ य एगंते एडेइ, सयमेव सिहं उप्पाडेइ, उप्पाडेत्ता जेणेव थावच्चापुत्ते अनगारे तेणेव उवागच्छइ, उवागच्छित्ता थावच्चापुत्तं अनगारं वंदइ नमंसइ, वंदित्ता नमंसित्ता थावच्चापुत्तस्स अनगारस्स अंतिए मुंडे भवित्ता पव्वइए। सामाइयमाइयाइं चोद्दसपुव्वाइं अहिज्जइ। तए णं थावच्चापुत्ते सुयस्स अनगारसहस्सं सीसत्ताए वियरइ। तए णं थावच्चापुत्ते सोगंधियाओ नयरीओ नीलासोयाओ उज्जाणाओ पडिनिक्खमइ, पडिनिक्खमित्ता बहिया जनवयविहारं विहरइ। तए णं से थावच्चापुत्ते अनगारसहस्सेणं संपरिवुडे जेणेव पुंडरीए पव्वए तेणेव उवागच्छइ, उवागच्छित्ता पुंडरीयं पव्वयं सणियं-सणियं दुरुहइ, दुरुहित्ता मेघघणसन्निगासं देवसन्निवायं पुढविं सिलापट्टयं पडिलेहेइ, पडिलेहेत्ता जाव संलेहणा-ज्झूसणा-ज्झूसिए भत्तपाण-पडियाइक्खिए० पाओवगमणणुवन्ने। तए णं से थावच्चापुत्ते बहूणि वासाणि सामण्णपरियागं पाउणित्ता, मासियाए संलेहणाए अत्ताणं ज्झूसित्ता, सट्ठिं भत्ताइं अनसणाए छेदित्ता जाव केवलवरनाणदंसणं समुप्पाडेत्ता तओ पच्छा सिद्धे बुद्धे मुत्ते अंतगडे परिनिव्वुडे सव्वदुक्खप्पहीणे।
Sutra Meaning : જુઓ સૂત્ર ૬૬
Mool Sutra Transliteration : [sutra] tenam kalenam tenam samaenam sogamdhiya namam nayari hottha–vannao. Nilasoe ujjane–vannao. Tattha nam sogamdhiyae nayarie sudamsane namam nayarasetthi parivasai, addhe java aparibhue. Tenam kalenam tenam samaenam sue namam parivvayae hottha–riuvveya-jajuvveya-samaveya-athavvanaveya-satthitamtakusale samkhasamae laddhatthe pamchajama-pamchaniyamajuttam soyamulayam dasappayaram parivvayagadhammam danadhammam cha soyadhammam cha titthabhiseyam cha aghave-mane pannavemane dhauratta-vattha-pavara-parihie tidamda-kumdiya-chhatta-chhannalaya-amkusa-pavittaya-kesari-hatthagae parivvayagasahassenam saddhim samparivude jeneva sogamdhiya nayari jeneva parivvayagavasahe teneva uvagachchhai, uvagachchhitta parivvayagavasahamsi bhamdaganikkhevam karei, karetta samkhasamaenam appanam bhavemane viharai. Tae nam sogamdhiyae nagarie simghadaga-tiga-chaukka-chachchara-chaummuha-mahapaha-pahesu bahujano annamannassa evamaikkhai–evam khalu sue parivvayae ihamagae iha sampatte iha samosadhe iha cheva sogamdhiyae nayarie parivvayagavasahamsi samkhasamaenam appanam bhavemane viharai. Parisa niggaya! Sudamsano vi niti. Tae nam se sue parivvayae tise parisae sudamsanassa ya annesi cha bahunam samkhanam parikahei–evam khalu sudamsana! Amham soyamulae dhamme pannatte. Se vi ya soe duvihe pannatte, tam jaha–davvasoe ya bhavasoe ya. Davvasoe udaenam mattiyae ya. Bhavasoe dabbhehi ya mamtehi ya. Jam nam amham devanuppiya! Kimchi asui bhavai tam savvam sajjapudhavie alippai, tao pachchha suddhena varina pakkhalijjai, tao tam asui sui bhavai. Evam khalu jiva jalabhiseya-puyappano avigghenam saggam gachchhamti. Tae nam se sudamsane suyassa amtie dhammam sochcha hatthatutthe suyassa amtiyam soyamulayam dhammam genhai, genhitta parivvayae viulenam asana-pana-khaima-saimenam padilabhemane samkhasamaenam appanam bhavemane viharai. Tae nam se sue parivvayae sogamdhiyao nayario niggachchhai, niggachchhitta bahiya janavayaviharam viharai. Tenam kalenam tenam samaenam thavachchaputtassa samosaranam. Parisa niggaya. Sudamsano vi nii. Thavachchaputtam vamdai namamsai, vamditta-namamsitta evam vayasi–tumhanam kimmulae dhamme pannatte? Tae nam thavachchaputte sudamsanenam evam vutte samane sudamsanam evam vayasi–sudamsana! Vinayamulae dhamme pannatte. Se vi ya vinae duvihe pannatte, tam jaha–agaravinae anagaravinae ya. Tattha nam je se agaravinae, se nam chaujjamie gihidhamme. Tattha nam je se anagaravinae, se nam chaujjama, tam jaha-savvao panaivayao veramanam, savvao musavayao veramanam savvao adinnadanao veramanam, savvao bahiddhadanao veramanam. Ichcheenam duvihenam vinayamulaenam dhammenam anupuvvenam atthakammapagadio khavetta loyaggapaitthana bhavamti. Tae nam thavachchaputte sudamsanam evam vayasi–tubbhannam sudamsana! Kimmulae dhamme pannatte? Amhanam devanuppiya! Soyamulae dhamme pannatte. Se vi ya soe duvihe pannatte, tam jaha–davvasoe ya bhavasoe ya. Davvasoe udaenam mattiyae ya. Bhavasoe dabbhehi ya mamtehi ya. Jam nam amham devanuppiya! Kimchi asui bhavai tam savvam sajjapudhavie alippai, tao pachchha suddhena varina pakkhalijjai, tao nam asui sui bhavai. Evam khalu jiva jalabhiseya-puyappano avigghenam saggam gachchhamti. Tae nam thavachchaputte sudamsanam evam vayasi–sudamsana! Se jahanamae kei purise egam maham ruhirakayam vattham ruhirena cheva dhovejja, tae nam sudamsana! Tassa ruhirakayassa vatthassa ruhirena cheva pakkhalijjamanassa atthi kai sohi? No inatthe samatthe. Evameva sudamsana! Tubbham pi panaivaenam java bahiddhadanenam natthi sohi, jaha tassa ruhirakayassa vatthassa ruhirenam cheva pakkhalijjamanassa natthi sohi. Sudamsana! Se jahanamae kei purise egam maham ruhirakayam vattham sajjiya-kharenam alimpai, alimpitta payanam aruhei, aruhetta unham gahei, tao pachchha suddhenam varina dhovejja. Se nunam sudamsana! Tassa ruhirakayassa vatthassa sajjiya-kharenam anulittassa payanam aruhiyassa unham gahiyassa suddhenam varina pakkhalijjamanassa sohi bhavai? Hamta bhavai. Evameva sudamsana! Amham pi panaivayaveramanenam java bahiddhadanaveramanenam atthi sohi, jaha va tassa ruhirakayassa vatthassa sajjiya-kharenam ssa payanam aruhiyassa unham gahiyassa suddhenam varina pakkhalijjamanassa atthi sohi. Tattha nam sudamsane sambuddhe thavachchaputtam vamdai namamsai, vamditta namamsitta evam vayasi–ichchhami nam bhamte! Tubbham amtie dhammam sochcha janittae. Tae nam thavachchaputte anagare sudamsanassa tise ya mahaimahaliyae mahachchaparisae chaujjamam dhammam kahei, tam jaha–savvao panaivayao veramanam, savvao musavayao veramanam, savvao adinnadanao veramanam, savvao bahiddhadanao veramanam java. Tae nam se sudamsane samanovasae java–abhigayajivajive java samane niggamthe phasu-esanijjenam asana-pana-khaima-saimenam vattha-padiggaha-kambala-payapumchhanenam osaha-bhesajjenam padihariena ya pidha-phalaga-sejja-samtharaenam padilabhemane viharai. Tae nam tassa suyassa parivvayagassa imise kahae laddhatthassa samanassa ayameyaruve ajjhatthie chimtie patthie manogae samkappe samuppajjittha–evam khalu sudamsanenam soyadhammam vippajahaya vinayamule dhamme padivanne, tam seyam khalu mama sudamsana-ssa ditthim vamettae punaravi soyamulae dhamme aghavittae tti kattu evam sampehei, sampehetta parivvayagasahassenam saddhim jeneva sogamdhiya nagari jeneva parivvayagavasahe teneva uvagachchhai, uvagachchhitta parivvayagavasahamsi bhamdaganikkhevam karei, karetta dhauratta-vattha-pavara-parihie pavirala-parivvayagenam saddhim samparivude parivvayagavasahao padinikkhamai, padinikkhamitta sogamdhiyae nayarie majjhammajjhenam jeneva sudamsanassa gihe jeneva sudamsane teneva uvagachchhai. Tae nam se sudamsane tam suyam ejjamanam pasai, pasitta no abbhutthei na pachchochuggachchhai no adhai no vamdai tusinie samchitthai. Tae nam se sue parivvayae sudamsanam anabbhutthiyam pasitta evam vayasi– tumam nam sudamsana! Annaya mamam ejjamanam pasitta abbhutthesi pachchuggachchhasi adhasi0 vamdasi, iyanim sudamsana! Tumam mamam ejjamanam pasitta no abbhutthesi no pachchuggachchhasi no adhasi no vamdasi. Tam kassa nam tume sudamsana! Imeyaruve vinayamule dhamme padivanne? Tae nam se sudamsane suenam parivvayagenam evam vutte samane asanao abbhutthei, abbhutthetta karayalam pariggahiyam sirasavattam matthae amjalim kattu suyam parivvayagam evam vayasi– evam khalu devanuppiya! Arahao aritthanemissa amtevasi thavachchaputte namam anagare puvvanupuvvim charamane gamanugamam duijjamane ihamagae iha cheva nilasoe ujjane viharai. Tassa nam amtie vinayamule dhamme padivanne. Tae nam se sue parivvayae sudamsanam evam vayasi–tam gachchhamo nam sudamsana! Tava dhammayariyassa thavachchaputtassa amtiyam paubbhavamo, imaim cha nam eyaruvaim atthaim heuim pasinaim karanaim vagaranaim puchchhamo. Tam jai me se imaim atthaim heuim pasinaim karanaim vagaranaim vagarei, tao nam vamdami namamsami. Aha me se imaim atthaim heuim pasinaim karanaim vagaranaim no vagarei, tao nam aham eehim cheva atthehim heuhim nippattha-pasinavagaranam karissami. Tae nam se sue parivvayagasahassenam sudamsanena ya setthina saddhim jeneva nilasoe ujjane jeneva thavachchaputte anagare teneva uvagachchhai, uvagachchhitta thavachchaputtam evam vayasi–jatta te bhamte? Javannijjam te bhamte? Avvabaham te bhamte? Phasuyam viharam te bhamte? Tae nam se thavachchaputte anagare suenam parivvayagenam evam vutte samane suyam parivvayagam evam vayasi–suya! Jattavi me javanijjam pi me avvabaham pi me phasuyam viharam pi me. Tae nam se sue thavachchaputtam evam vayasi–kim te bhamte! Jatta? Suya! Jannam mama nana-damsana-charitta-tava-samjamamaiehim joehim jayana, se tam jatta. Se kim te bhamte! Javanijjam? Suya! Javanijje duvihe pannatte, tam jaha–imdiyajavanijje ya noimdiyajavanijje ya. Se kim tam imdiyajavanijje? Suya! Jannam mamam sotimdiya-chakkhimdiya-ghanimdiya-jibbhimdiya-phasimdiyaim niruvahayaim vase vattamti, se tam imdiyajavanijje. Se kim tam noimdiyajavanijje? Suya! Jannam mama koha-mana-maya-lobha khina uvasamta no udayamti, se tam noimdiyajavanijje. Se kim tam bhamte! Avvabaham? Suya! Jannam mama vaiya-pittiya-simbhiya-sannivaiya viviha rogayamka no udiremti, se tam avvabaham. Se kim te bhamte! Phasuyam viharam? Suya! Jannam aramesu ujjanesu deulesu sabhasu pavasu itthi-pasu-pamdaga-vivajjiyasu vasahisu padihariyam pidha-phalaga-sejja -samtharayam oginhitta nam viharami, se tam phasuyam viharam. Sarisavaya te bhamte! Kim bhakkheya? Abhakkheya? Suya! Sarisavaya bhakkheya vi abhakkheya vi. Se kenatthenam bhamte! Evam vuchchai–sarisavaya bhakkheya vi abhakkheya vi? Suya! Sarisavaya duviha pannatta, tam jaha–mittasarisavaya ya dhannasarisavaya ya. Tattha nam je te mittasarisavaya te tiviha pannatta, tam jaha–sahajayaya sahavaddhiyaya sahapamsukiliyaya, te nam samananam niggamthanam abhakkheya. Tattha nam je te dhannasarisavaya te duviha pannatta, tam jaha–satthaparinaya ya asatthaparinaya ya. Tattha nam je te asatthaparinaya te nam samananam niggamthanam abhakkheya. Tattha nam je te satthaparinaya te duviha pannatta, tam jaha–phasuya ya aphasuya ya. Aphasuya nam suya! Samananam niggamthanam no bhakkheya. Tattha nam je te phasuya te duviha pannatta, tam jaha–esanijja ya anesani-jja ya. Tattha nam je te anesanijja te nam samananam niggamthanam? Abhakkheya. Tattha nam je te esanijja te duviha pannatta, tam jaha–jaiya ya ajaiya ya. Tattha nam je te ajaiya te nam samananam niggamthanam abhakkheya. Tattha nam je te jaiya te duviha pannatta, tam jaha–laddha ya aladdha ya. Tattha nam je te aladdha te nam samananam niggamthanam abhakkheya. Tattha nam je te laddha te nam samananam niggamthanam bhakkheya. Eenam atthenam suya! Evam vuchchai–sarisavaya bhakkheya vi abhakkheya vi. Kulattha te bhamte! Kim bhakkheya? Abhakkheya? Suya! Kulattha bhakkheya vi abhakkheya vi. Se kenatthenam bhamte! Evam vuchchai–kulattha bhakkheya vi abhakkheya vi? Suya! Kulattha duviha pannatta, tam jaha–itthikulattha ya dhannakulattha ya. Tattha nam je te itthikulattha te tiviha pannatta, tam jaha–kulavahuya i ya kulamauya i ya kuladhuya i ya. Te nam samananam niggamthanam abhakkheya. Tattha nam je te dhannakulattha te duviha pannatta, tam jaha–satthaparinaya ya asatthaparinaya ya. Tattha nam je te asatthaparinaya te samananam niggamthanam abhakkheya. Tattha nam je te satthaparinaya te duviha pannatta, tam jaha–phasuya ya aphasuya ya. Aphasuya nam suya! Samananam niggamthanam no bhakkheya. Tattha nam je te phasuya te duviha pannatta, tam jaha–esanijja ya anesanijja ya. Tattha nam je te anesanijja te nam samananam niggamthanam abhakkheya. Tattha nam je te esanijja te duviha pannatta, tam jaha–jaiya ya ajaiya ya tattha nam je te ajaiya te nam samananam niggamthanam abhakkheya. Tattha nam je te jaiya te duviha pannatta, tam jaha–laddha ya aladdha ya. Tattha nam je te aladdha te abhakkheya. Tattha nam je te laddha te nam samananam niggamthanam bhakkheya. Eenam atthenam suya! Evam vuchchai–kulattha bhakkheya vi abhakkheya vi. Masa te bhamte! Kim bhakkheya? Abhakkheya? Suya! Masa bhakkheya vi abhakkheya vi. Se kenatthenam bhamte! Evam vuchchai–masa bhakkheya vi abhakkheya vi? Suya! Masa tiviha pannatta, tam jaha–kalamasa ya atthamasa ya dhannamasa ya. Tattha nam je te kalamasa te duvalasaviha pannatta, tam jaha–savane bhaddavae asoe kattie maggasire pose mahe phaggune chette vaisahe jetthamule asadhe. Te nam samananam niggamthanam abhakkheya. Tattha nam je te atthamasa te duviha pannatta, tam jaha–hirannamasa ya suvannamasa ya. Te nam samananam niggamthanam abhakkheya Tattha nam je te dhannamasa te duviha pannatta, tam jaha–satthaparinaya ya asatthaparinaya ya. Tattha nam je te asatthaparinaya te samananam niggamthanam abhakkheya. Tattha nam je te satthaparinaya te duviha pannatta, tam jaha–phasuya ya aphasuya ya. Aphasuya nam suya! Samananam niggamthanam no bhakkheya. Tattha nam je te phasuya te duviha pannatta, tam jaha–esanijja ya anesanijja ya. Tattha nam je te anesanijja te nam samananam niggamthanam abhakkheya. Tattha nam je te esanijja te duviha pannatta, tam jaha–jaiya ya ajaiya ya. Tattha nam je te ajaiya te nam samananam niggamthanam abhakkheya. Tattha nam je te jaiya te duviha pannatta, tam jaha–laddha ya aladdha ya. Tattha nam je te aladdha te nam samananam niggamthanam abhakkheya. Tattha nam je te laddha te nam samananam niggamthanam bhakkheya. Eenam atthenam suya! Evam vuchchai–masa bhakkheya vi abhakkheya vi0. Ege bhavam? Duve bhavam? Akkhae bhavam? Avvae bhavam? Avatthie bhavam? Anegabhuya-bhava-bhavie bhavam? Suya! Ege vi aham, duvevi aham, akkhae vi aham, avvae vi aham, avatthie vi aham, anegabhuya-bhava-bhavie vi aham. Se kenatthenam bhamte! Ege vi aham? Duvevi aham? Akkhae vi aham? Avvae vi aham? Avatthie vi aham? Anegabhuya-bhava-bhavie vi aham? Suya! Davvatthayae ege vi aham, nanadamsanatthayae duve vi aham, paesatthayae akkhae vi aham, avvae vi aham, avatthie vi aham uvaogatthayae anegabhuya-bhavabhavie vi aham. Ettha nam se sue sambuddhe thavachchaputtam vamdai namamsai, vamditta namamsitta evam vayasi–ichchhami nam bhamte! Tubbham amtie kevalipannattam dhammam nisamittae. Tae nam thavachchaputte anagare suyassa chaujjamam dhammam kahei. Tae nam se sue parivvayae thavachchaputtassa amtie dhammam sochcha nisamma evam vayasi–ichchhami nam bhamte! Parivvayaga-sahassenam saddhim samparivude devanuppiyanam amtie mumde bhavitta pavvaittae. Ahasuham devanuppiya. Tae nam se sue parivvayae uttarapuratthime disibhae avakkamai, avakkamitta tidamdayam ya kumdiyao ya chhattae ya chhannalae ya amkusae ya pavittae ya kesariyao ya dhaurattao ya egamte edei, sayameva siham uppadei, uppadetta jeneva thavachchaputte anagare teneva uvagachchhai, uvagachchhitta thavachchaputtam anagaram vamdai namamsai, vamditta namamsitta thavachchaputtassa anagarassa amtie mumde bhavitta pavvaie. Samaiyamaiyaim choddasapuvvaim ahijjai. Tae nam thavachchaputte suyassa anagarasahassam sisattae viyarai. Tae nam thavachchaputte sogamdhiyao nayario nilasoyao ujjanao padinikkhamai, padinikkhamitta bahiya janavayaviharam viharai. Tae nam se thavachchaputte anagarasahassenam samparivude jeneva pumdarie pavvae teneva uvagachchhai, uvagachchhitta pumdariyam pavvayam saniyam-saniyam duruhai, duruhitta meghaghanasannigasam devasannivayam pudhavim silapattayam padilehei, padilehetta java samlehana-jjhusana-jjhusie bhattapana-padiyaikkhie0 paovagamananuvanne. Tae nam se thavachchaputte bahuni vasani samannapariyagam paunitta, masiyae samlehanae attanam jjhusitta, satthim bhattaim anasanae chheditta java kevalavarananadamsanam samuppadetta tao pachchha siddhe buddhe mutte amtagade parinivvude savvadukkhappahine.
Sutra Meaning Transliteration : Juo sutra 66