Sutra Navigation: Pragnapana ( પ્રજ્ઞાપના ઉપાંગ સૂત્ર )

Search Details

Mool File Details

Anuvad File Details

Sr No : 1106505
Scripture Name( English ): Pragnapana Translated Scripture Name : પ્રજ્ઞાપના ઉપાંગ સૂત્ર
Mool Language : Ardha-Magadhi Translated Language : Gujarati
Chapter :

पद-२ स्थान

 Translated Chapter :

પદ-૨ સ્થાન
Section : Translated Section :
Sutra Number : 205 Category : Upang-04
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] चूडामणिमउडरयण-भूसणणागफडगरुलवइरं-पुण्णकलसंकिउप्फेस सीह-हयवर-गयअंक-मगर-वद्धमाण निज्जुत्तचित्तचिंधगता सुरूवा महिड्ढीया महज्जुतीया महायसा महब्बला महानुभागा महासोक्खा हारविराइयवच्छा कडयतुडियथंभियभुया अंगद-कुंडल-मट्ठगंड तलकण्णपीडधारी विचित्तहत्थाभरणा विचित्तमालामउलिमउडा कल्लाणगपवरवत्थपरिहिया कल्लाणगपवरमल्ला-णुलेवणधरा भासुरबोंदी पलंबवणमालधरा दिव्वेणं वण्णेणं दिव्वेणं गंधेणं दिव्वेणं फासेणं दिव्वेणं संघयणेणं दिव्वेणं संठाणेणं दिव्वाए इड्ढीए दिव्वाए जुत्तीए दिव्वाए पभाए दिव्वाए छायाए दिव्वाए अच्चीए दिव्वेणं तेएणं दिव्वाए लेसाए दस दिसाओ उज्जोवेमाणा पभासेमाणा। ते णं तत्थ साणं-साणं भवनावाससयसहस्साणं साणं-साणं सामानियसाहस्सीणं साणं-साणं तावत्तीसाणं साणं-साणं लोगपालाणं साणं-साणं अग्गमहिसीणं साणं-साणं परिसाणं साणं-साणं अनियाणं साणं-साणं अणियाहिवतीणं साणं-साणं आयरक्खदेवसाहस्सीणं अन्नेसिं च बहूणं भवन-वासीणं देवाण य देवीण य आहेवच्चं पोरेवच्चं सामित्तं भट्टित्तं महत्तरगत्तं आणाईसरसेनावच्चं कारेमाणा पालेमाणा महताहतनट्ट-गीत-वाइत-तंती-तल-ताल-तुडिय-घण-मुइंगपडुप्पवाइयरवेणं दिव्वाइं भोगभोगाइं भुंजमाणा विहरंति। कहि णं भंते! असुरकुमाराणं देवाणं पज्जत्तापज्जत्ताणं ठाणा पन्नत्ता? कहि णं भंते! असुरकुमारा देवा परिवसंति? गोयमा! इमीसे रयणप्पभाए पुढवीए असीउत्तरजोयणसतसहस्स-बाहल्लाए उवरिं एगं जोयणसहस्सं ओगाहित्ता हेट्ठा वेयं जोयणसहस्सं वज्जेत्ता मज्झे अट्ठहत्तरे जोयणसतसहस्से, एत्थ णं असुरकुमाराणं देवाणं चोवट्ठिं भवनावाससतसहस्सा हवंतीति मक्खायं। ते णं भवना बाहिं वट्टा अंतो चउरंसा अहे पुक्खरकण्णियासंठाणसंठिता उक्किन्नंतर-विउलगंभीरखायपरिहा पायारट्टा-लय-कबाड-तोरण-पडिदुवारदेसभागा जंतसयग्धि-मुसल-मुसुंढि परिवारिया अओज्झा सदाजया सदायुत्ता अडयालकोट्ठगरइया अडयालकयवणमाला खेमा सिवा किंकरामरदंडोवरक्खिया लाउल्लोइयमहिया गोसीस-सरसरत्तचंदनदद्दरदिन्नपंचंगुलितला उवचित-वंदमकलसा वंदनघडसुकय तोरणपडिदुवारदेसभागा आसत्तोसत्तविउलवट्टवग्घारियमल्लदाम-कलावा पंचवण्णसरससुरभिमुक्कपुप्फ-पुंजोवयारकलिया कालागरुपवरकुंदुरुक्क-तुरुक्कधूव-मघमघेंतगंधुद्धुयाभिरामा सुगंधवरगंधिगंधिया गंधवट्टिभूता अच्छरगणसंघसंविगिण्णा दिव्वतुडित-सद्दसंपणदिया सव्वरयणामया अच्छा सण्हा लण्हा घट्ठा मट्ठा नीरया निम्मला निप्पंका निक्कंकड-च्छाया सप्पभा सस्सिरीया समिरीया सउज्जोया पासाईया दरिसणिज्जा अभिरूवा पडिरूवा, एत्थ णं असुरकुमाराणं देवाणं पज्जत्तापज्जत्ताणं ठाणा पन्नत्ता। उववाएणं लोयस्स असंखेज्जइभागे, समुग्घाएणं लोयस्स असंखेज्जइभागे, सट्ठाणेणं लोयस्स असंखेज्जइभागे। तत्थ णं बहवे असुरकुमारा देवा परिवसंति– काला लोहियक्खबिबोट्ठा धवलपुप्फदंता असियकेसा वामेयकुंडलधरा अद्दचंदनानुलित्तगता, ईसोसिलिधपुप्फपगासाइं असंकिलिट्ठाइं सुहुमाइं वत्थाइं पवर परिहिया, वयं च पढमं समइक्कंता, बिइयं च असंपत्ता, भद्दे जोवण्णे वट्टमाणा, तलभंगय-तुडित-पवरभूसण-निम्मलमणि-रयणमंडितभूया दसमुद्दामंडियग्गहत्था चूडामणिचित्त-चिंधगता सुरूवा महिड्ढिया महज्जुइया महायसा महब्बला महानुभागा महासोक्खा हारविराइयवच्छा कडय-तुडियथंभियभुया अंगय-कुंडल-मट्ठगंड-यलकण्णपीढधारी विचित्तहत्थाभरणा विचित्त-माला-मउली कल्लाणगपवरवत्थपरिहिया कल्लाणगपवरमल्लानुलेवणधरा भासुरबोंदी पलंबवन-मासधरा दिव्वेणं वण्णेणं दिव्वेणं गंधेणं दिव्वेणं फासेणं दिव्वेणं संघयणेणं दिव्वेणं संठाणेणं दिव्वाए इड्ढीए दिव्वाए जुईए दिव्वाए पभाए दिव्वाए छायाए दिव्वाए अच्चीए दिव्वेणं तेएणं दिव्वाए लेसाए दस दिसाओ उज्जोवेमाणा पभासेमाणा। ते णं तत्थ साणं-साणं भवनावाससतसहस्साणं साणं-साणं सामानियसाहस्सीणं साणं-साणं तावत्तीसाणं साणं-साणं लोगपालाणं साणं-साणं अग्गमहिसीणं साणं-साणं परिसाणं साणं-साणं अनियाणं साणं-साणं अनियाधिवत्तीणं साणं-साणं आयरक्खदेवसाह-स्सीणं अन्नेसिं च बहूणं भवनवासीणं देवाण य देवीण य आहेवच्चं पोरेवच्चं सामित्तं भट्टित्तं महत्तरगत्तं आणाईयरसेनावच्चं कारेमाणा पालेमाणा महताहतणट्ट-गीत-वाइय-तंती-ताल-तुडिय-धण-मुइंग-पडुप्पवाइयरवेणं दिव्वाणं भोगभोगाइं भुंजमाणा विहरंति। चमरबलिणो इत्थ दूवे असुरकुमारिंदा असुरकुमाररायाणो परिवसंति–काला महानीलसरिसा नीलगुलिय-गवल-अयसिकुसुमप्पगासा वियसियसयवत्तणिम्मर्इसीसित रत्त तंबणयणा गरुलायय-उज्जुत्तुगनासा ओयवियसिलप्पवाल बिंबफलसन्निभाहरोट्ठा पंडर-ससिसगलविमल निम्मलदहिधण संख गोखीर कुंद दगरय मुणालियाधवलदंतसेढी हुयवहनिद्धंतधोयतत्तवणिज्जरत्ततल तालु जीहा अंजन धनकसिणरुयगरमणिज्जनिद्धकेसा वामेयकुंडलधरा अद्दचंदनानुलित्तगता, ईसीसिलिंध-पुप्फपगासाइं असंकिलिट्ठाइं सुहुमाइं वत्थाइं पवर परिहिया, वयं च पढमं समइक्कंता, बिइयं तु असंपत्ता, भद्दे जोव्वणे वट्टमाणा, तलभंगय तुडित पवरभूसण निम्मल-मणि रयणमंडितभुया दसमुद्दामंडितग्गहत्था चूडामणिचित्तचिंधगता सुरूवा महिड्ढिया महज्जुइया महायसा महाबला महानुभाया महासोक्खा हारविराइयवच्छा कडय तुडितथंभियभुया अंगद कुंडल मट्ठगंडतलकण्णपीडधारी विचित्तहत्थाभरणा विचित्तमाला मउली कल्लाणगपवरवत्थपरिहिया कल्लाणगपवरमल्लाणुलेवणा भासुरबोंदी पलंबवनमालधरा दिव्वेणं वण्णेणं दिव्वेणं गंधेणं दिव्वेणं फासेणं दिव्वेणं संघयणेण दिव्वेणं संठाणेणं दिव्वाए इड्ढीए दिव्वाए जुतीए दिव्वाए भासाए दिव्वाए छायाए दिव्वाए पहाए दिव्वाए अच्चीए दिव्वेणं तेएणं दिव्वाए लेसाए दस दिसाओ उज्जोवेमाणा पभासेमाणा। ते णं तत्थ साणं-साणं भवनावास-सतसहस्साणं साणं-साणं सामानियसाहस्सीणं साणं-साणं तावत्तीसाणं साणं-साणं लोगपालाणं साणं-साणं अग्गमहिसीणं साणं-साणं परिसाणं साणं-साणं अनियाणं साणं-साणं अनियाधिवतीणं साणं-साणं आतरक्खदेवसाहस्सीणं अन्नेसिं च बहूणं भवनवासीणं देवाण य देवीण य आहेवच्चं पोरेवच्चं सामित्तं भट्टित्तं महत्तरगत्तं आणाईसरसेनावच्चं कारेमाणा पालेमाणा महताहत-नट्ट-गीत-वाइत-तंती-तल-ताल-तुडित-धन-मुइंगपडुप्पवाइतरवेणं दिव्वाइं भोगभोगाइं भुंजमाणा विहरंति। कहि णं भंते! दाहिणिल्लाणं असुरकुमाराणं देवाणं पज्जत्तापज्जत्ताणं ठाणा पन्नत्ता? कहि णं भंते! दाहिणिल्ला असुरकुमारा देवा परिवसंति? गोयमा! जंबुद्दीवे दीवे मंदरस्स पव्वतस्स दाहिणेणं इमीसे रयणप्पभाए पुढवीए असीउत्तरजोयणसतसहस्सबाहल्लाए उवरिं एगं जोयणसहस्सं ओगाहित्ता हेट्ठा वेगं जोयणसहस्सं वज्जित्ता मज्झे अट्ठहत्तरे जोयणसतसहस्से, एत्थ णं दाहिणिल्लाणं असुरकुमाराणं देवाणं चोत्तीसं भवनावाससतसहस्सा भवंतीति मक्खातं।ते णं भवना बाहिं वट्टा अंतो चउरंसा, सो च्चेव वण्णओ जाव पडिरूवा। एत्थ णं दाहिणिल्लाणं असुरकुमाराणं देवाणं पज्जत्तापज्जत्ताणं ठाणा पन्नत्ता। तिसु वि लोयस्स असंखेज्जइभागे। तत्थ णं बहवे दाहिणिल्ला असुरकुमारा देवा य देवीओ य परिवसंति–काला लोहियक्खबिंबोट्ठा तहेव जाव भुंजमाणा विहरंति। एतेसि णं तहेव तावत्तीसगलोगपाला भवंति। एवं सव्वत्थ भाणितव्वं भवनवासीणं। चमरे अत्थ असुरकुमारिंदे असुरकुमारराया परिवसति–काले महानीलसरिसे जाव पभासेमाणे। से णं तत्थ चोत्तीसाए भवनावाससतसहस्साणं चउसट्ठीए सामानियसाहस्सीणं तावत्तीसाए तावत्तीसाणं चउण्हं लोगपालाणं पंचण्हं अग्गमहिसीणं सपरिवाराणं तिण्हं परिसाणं सत्तण्हं अनियाणं सत्तण्हं अनियाधिवतीणं चउण्ह य चउसट्ठीणं आयरक्खदेवसाहस्सीणं अन्नेसिं च बहूणं दाहिणिल्लाणं देवाणं देवीण य आहेवच्चं पोरेवच्चं जाव विहरति। कहि णं भंते! उत्तरिल्लाणं असुरकुमाराणं देवाणं पज्जत्तापज्जत्ताणं ठाणा पन्नत्ता? कहि णं भंते! उत्तरिल्ला असुरकुमारा देवा परिवसंति? गोयमा! जंबुद्दीवे दीवे मंदरस्स पव्वयस्स उत्तरेणं इमीसे रयणप्पभाए पुढवीए असीउत्तरजोयणसयसहस्सबाहल्लाए उवरिं एगं जोयणसहस्सं ओगाहेत्ता हेट्ठा वेगं जोयणसहस्सं वज्जेत्ता मज्झे अठहत्तरे जोयण-सतसहस्से, एत्थ णं उत्तरिल्लाणं असुरकुमाराणं देवाणं तीसं भवनावाससतसहस्सा भवंतीति मक्खातं। ते णं भवना बाहि वट्टा अंतो चउरंसा, सेसं जहा दाहिणिल्लाणं जाव विहरंति। बलि यत्थ वइरोयणिंदे वइरोयणराया परिवसति–काले महानीलसरिसे जाव पभासेमाणे। से णं तत्थ तीसाए भवनावाससयसहस्साणं सट्ठीए सामानियसाहस्सीणं तावत्तीसाए तावत्तीसगाणं चउण्हं लोगपालाणं पंचण्हं अग्गमहिसीणं सपरिवाराणं तिण्हं परिसाणं सत्तण्हं अनियाणं सत्तण्हं अनियाधिवत्तीणं चउण्ह य सट्ठीणं आयरक्खदेवसाहस्सीणं अन्नेसिं च बहूणं उत्तरिल्लाणं असुरकुमाराणं देवाण य देवीण य आहेवच्चं पोरेवच्चं कुव्वमाणे विहरति। कहि णं भंते! नागकुमाराणं देवाणं पज्जत्तापज्जत्ताणं ठाणा पन्नत्ता? कहि णं भंते! नागकुमारा देवा परिवसंति? गोयमा! इमीसे रयणप्पभाए पुढवीए असीउत्तरजोयणसयसहस्स-बाहल्लाए उवरिं एगं जोयणसहस्सं ओगाहित्ता हेट्ठा वेगं जोयणसहस्सं वज्जित्ता मज्झे अट्ठहत्तरे जोयणसयसहस्से, एत्थ णं नागकुमाराणं देवाणं पज्जत्तापज्जत्ताणं चुलसीइं भवनावाससयसहस्सा हवंतीति मक्खातं। ते णं भवना बाहिं वट्टा अंतो चउरंसा जाव पडिरूवा। तत्थ णं नागकुमाराणं देवाणं पज्जत्तापज्जत्ताणं ठाणा पन्नत्ता। तिसु वि लोगस्स असंखेज्जइ भागे। तत्थ णं बहवे नागकुमारा देवा परिवसंति–महिड्ढीया महाजुत्तीया, सेसं जहा ओहियाणं जाव विहरंति। धरणभूयानंदा एत्थ दुवे नागकुमारिंदा नागकुमाररायाणो परिवसंति–महिड्ढीया, सेसं जहा ओहियाणं जाव विहरंति। कहि णं भंते! दाहिणिल्लाणं नागकुमाराणं देवाणं पज्जत्तापज्जत्ताणं ठाणा पन्नत्ता? कहि णं भंते! दाहिणिल्ला नागकुमारा देवा परिवसंति? गोयमा! जंबुद्दीवे दीवे मंदरस्स पव्वयस्स दाहिणेणं इमीसे रयणप्पभाए पुढवीए असीउत्तरजोयणसयसहस्सबाहल्लाए उवरिं एवं जोयणसहस्सं ओगाहेत्ता हेट्ठा वेगं जोयणसहस्सं वज्जेत्ता मज्झे अट्ठहत्तरे जोयणसयसहस्से, एत्थ णं दाहिणिल्लाणं नागकुमाराणं देवाणं चोयालीसं भवनावाससयसहस्सा भवंतीति मक्खातं। ते णं भवना बाहिं वट्टा अंतो चउरंसा जाव पडिरूवा। एत्थ णं दाहिणिल्लाणं नागकुमाराणं देवाणं पज्जत्तापज्जत्ताणं ठाणा पन्नत्ता। तिसु वि लोगस्स असंखेज्जइभागे। एत्थ णं बहवे दाहिणिल्ला नागकुमारा देवा परिवसंति–महिड्ढीया जाव विहरंति। धरणे यत्थ नागकुमारिंदे नागकुमारराया परिवसति–महिड्ढीए जाव पभासेमाणे। से णं तत्थ चोयालीसाए भवनावाससयसहस्साणं छण्हं सामानियसाहस्सीणं तायत्तीसाए तावत्तीसगाणं चउण्हं लोगपालाणं पंचण्हं अग्गमहिसीणं सपरिवाराणं तिण्हं परिसाणं सत्तण्हं अनियाणं सत्तण्हं अनियाधिवतीणं चउव्वीसाए आयरक्खदेवसाहस्सीणं अन्नेसिं च बहूणं दाहिणिल्लाणं नागकुमाराणं देवाण य देवीण य आहेवच्चं पोरेवच्चं कुव्वमाणे विहरति। कहि णं भंते! उत्तरिल्लाणं नागकुमाराणं देवाणं पज्जत्तापज्जत्ताणं ठाणा पन्नत्ता? कहि णं भंते! उत्तरिल्ला नागकुमारा देवा परिवसंति? गोयमा! जंबुद्दीवे दीवे मंदरस्स पव्वतस्स उत्तरेणं इमीसे रयणप्पभाए पुढवीए असीउत्तरजोयणसतसहस्सबाहल्लाए उवरिं एगं जोयणसहस्सं ओगाहेत्ता हेट्ठा वेगं जोयणसहस्सं वज्जेत्ता मज्झे अट्ठहत्तरे जोयणसतसहस्से, एत्थ णं उत्तरिल्लाणं नागकुमाराणं देवाणं चत्तालीसं भवनावाससतसहस्सा भवंतीति मक्खातं। ते णं भवना बाहिं वट्टा सेसं जहा दाहिणिल्लाणं जाव विहरंति। भूयानंदे यत्थ नागकुमारिंदे नागकुमारराया परिवसति–महिड्ढीए जाव पभासेमाणे। से णं तत्थ चत्तालीसाए भवनावाससतसहस्साणं आहेवच्चं जाव विहरति। कहि णं भंते! सुवण्णकुमाराणं देवाणं पज्जत्तापज्जत्ताणं ठाणा पन्नत्ता? कहि णं भंते! सुवण्णकुमारा देवा परिवसंति? गोयमा! इमीसे रयणप्पभाए पुढवीए जाव एत्थ णं सुवण्णकुमाराणं देवाणं बावत्तरि भवनावाससतसहस्सा भवंतीति मक्खातं। ते णं भवना बाहिं वट्टा जाव पडिरूवा। तत्थ णं सुवण्णकुमाराणं देवाणं पज्जत्तापज्जत्ताणं ठाणा पन्नत्ता। तिसु वि लोगस्स असंखेज्जइ भागे। तत्थ णं बहवे सुवण्णकुमारा देवा परिवसंति–महिड्ढिया, सेसं तहा ओहियाणं जाव विहरंति। वेणुदेव-वेणुदाली यत्थ दुवे सुवण्णकुमारिंदा सुवण्णकुमाररायाणो परिवसंति–महिड्ढीया जाव विहरंति। कहि णं भंते! दाहिणिल्लाणं सुवण्णकुमाराणं पज्जत्तापज्जत्ताणं ठाणा पन्नत्ता? कहि णं भंते! दाहिणिल्ला सुवण्णकुमारा देवा परिवसंति? गोयमा! इमीसे रयणप्पभाए जाव मज्झे अट्ठहत्तरे जोयणसतसहस्से, एत्थ णं दाहिणिल्लाणं सुवण्णकुमाराणं अट्ठतीसं भवनावाससतसहस्सा भवंतीति मक्खातं। ते णं भवना बाहिं वट्टा जाव पडिरूवा। एत्थ णं दाहिणिल्लाणं सुवण्णकुमाराणं पज्जत्ता-पज्जत्ताणं ठाणा पन्नत्ता। तिसु वि लोगस्स असंखेज्जइभागे। एत्थ णं बहवे सुवण्णकुमारा देवा परिवसंति। वेणुदेवे यत्थ सुवण्णिंदे सुवण्णकुमारराया परिवसइ। सेसं जहा नागकुमाराणं। कहि णं भंते! उत्तरिल्लाणं सुवण्णकुमाराणं देवाणं पज्जत्तापज्जत्ताणं ठाणा पन्नत्ता? कहि णं भंते! उत्तरिल्ला सुवण्णकुमारा देवा परिवसंति? गोयमा! इमीसे रयणप्पभाए जाव एत्थ णं उत्तरिल्लाणं सुवण्णकुमाराणं चोत्तीसं भवनावाससतसहस्सा भवंतीति मक्खातं। ते णं भवना बाहिं वट्टा जाव एत्थ णं बहवे उत्तरिल्ला सुवण्णकुमारा देवा परिवसंति–महिड्ढिया जाव विहरंति। वेणुदाली यत्थ सुवण्णकुमारिंदे सुवण्णकुमारराया परिवसति–महिड्ढीए, सेसं जहा नागकुमाराणं। एवं जहा सुवण्णकुमाराणं वत्तव्वया भणिता तहा सेसाण वि चोद्दसण्हं इंदाणं भाणितव्वा, नवरं–भवननाणत्तं इंदनाणत्तं वण्णनाणत्तं परिहाणनाणत्तं च इमाहिं गाहाहिं अनुगंतव्वं–
Sutra Meaning : જુઓ સૂત્ર ૨૦૩
Mool Sutra Transliteration : [sutra] chudamanimaudarayana-bhusananagaphadagarulavairam-punnakalasamkiupphesa siha-hayavara-gayaamka-magara-vaddhamana nijjuttachittachimdhagata suruva mahiddhiya mahajjutiya mahayasa mahabbala mahanubhaga mahasokkha haraviraiyavachchha kadayatudiyathambhiyabhuya amgada-kumdala-matthagamda talakannapidadhari vichittahatthabharana vichittamalamaulimauda kallanagapavaravatthaparihiya kallanagapavaramalla-nulevanadhara bhasurabomdi palambavanamaladhara divvenam vannenam divvenam gamdhenam divvenam phasenam divvenam samghayanenam divvenam samthanenam divvae iddhie divvae juttie divvae pabhae divvae chhayae divvae achchie divvenam teenam divvae lesae dasa disao ujjovemana pabhasemana. Te nam tattha sanam-sanam bhavanavasasayasahassanam sanam-sanam samaniyasahassinam sanam-sanam tavattisanam sanam-sanam logapalanam sanam-sanam aggamahisinam sanam-sanam parisanam sanam-sanam aniyanam sanam-sanam aniyahivatinam sanam-sanam ayarakkhadevasahassinam annesim cha bahunam bhavana-vasinam devana ya devina ya ahevachcham porevachcham samittam bhattittam mahattaragattam anaisarasenavachcham karemana palemana mahatahatanatta-gita-vaita-tamti-tala-tala-tudiya-ghana-muimgapaduppavaiyaravenam divvaim bhogabhogaim bhumjamana viharamti. Kahi nam bhamte! Asurakumaranam devanam pajjattapajjattanam thana pannatta? Kahi nam bhamte! Asurakumara deva parivasamti? Goyama! Imise rayanappabhae pudhavie asiuttarajoyanasatasahassa-bahallae uvarim egam joyanasahassam ogahitta hettha veyam joyanasahassam vajjetta majjhe atthahattare joyanasatasahasse, ettha nam asurakumaranam devanam chovatthim bhavanavasasatasahassa havamtiti makkhayam. Te nam bhavana bahim vatta amto chauramsa ahe pukkharakanniyasamthanasamthita ukkinnamtara-viulagambhirakhayapariha payaratta-laya-kabada-torana-padiduvaradesabhaga jamtasayagdhi-musala-musumdhi parivariya aojjha sadajaya sadayutta adayalakotthagaraiya adayalakayavanamala khema siva kimkaramaradamdovarakkhiya laulloiyamahiya gosisa-sarasarattachamdanadaddaradinnapamchamgulitala uvachita-vamdamakalasa vamdanaghadasukaya toranapadiduvaradesabhaga asattosattaviulavattavagghariyamalladama-kalava pamchavannasarasasurabhimukkapuppha-pumjovayarakaliya kalagarupavarakumdurukka-turukkadhuva-maghamaghemtagamdhuddhuyabhirama sugamdhavaragamdhigamdhiya gamdhavattibhuta achchharaganasamghasamviginna divvatudita-saddasampanadiya savvarayanamaya achchha sanha lanha ghattha mattha niraya nimmala nippamka nikkamkada-chchhaya sappabha sassiriya samiriya saujjoya pasaiya darisanijja abhiruva padiruva, Ettha nam asurakumaranam devanam pajjattapajjattanam thana pannatta. Uvavaenam loyassa asamkhejjaibhage, samugghaenam loyassa asamkhejjaibhage, satthanenam loyassa asamkhejjaibhage. Tattha nam bahave asurakumara deva parivasamti– kala lohiyakkhabibottha dhavalapupphadamta asiyakesa vameyakumdaladhara addachamdananulittagata, isosilidhapupphapagasaim asamkilitthaim suhumaim vatthaim pavara parihiya, vayam cha padhamam samaikkamta, biiyam cha asampatta, bhadde jovanne vattamana, talabhamgaya-tudita-pavarabhusana-nimmalamani-rayanamamditabhuya dasamuddamamdiyaggahattha chudamanichitta-chimdhagata suruva mahiddhiya mahajjuiya mahayasa mahabbala mahanubhaga mahasokkha haraviraiyavachchha kadaya-tudiyathambhiyabhuya amgaya-kumdala-matthagamda-yalakannapidhadhari vichittahatthabharana vichitta-mala-mauli kallanagapavaravatthaparihiya kallanagapavaramallanulevanadhara bhasurabomdi palambavana-masadhara divvenam vannenam divvenam gamdhenam divvenam phasenam divvenam samghayanenam divvenam samthanenam divvae iddhie divvae juie divvae pabhae divvae chhayae divvae achchie divvenam teenam divvae lesae dasa disao ujjovemana pabhasemana. Te nam tattha sanam-sanam bhavanavasasatasahassanam sanam-sanam samaniyasahassinam sanam-sanam tavattisanam sanam-sanam logapalanam sanam-sanam aggamahisinam sanam-sanam parisanam sanam-sanam aniyanam sanam-sanam aniyadhivattinam sanam-sanam ayarakkhadevasaha-ssinam annesim cha bahunam bhavanavasinam devana ya devina ya ahevachcham porevachcham samittam bhattittam mahattaragattam anaiyarasenavachcham karemana palemana mahatahatanatta-gita-vaiya-tamti-tala-tudiya-dhana-muimga-paduppavaiyaravenam divvanam bhogabhogaim bhumjamana viharamti. Chamarabalino ittha duve asurakumarimda asurakumararayano parivasamti–kala mahanilasarisa nilaguliya-gavala-ayasikusumappagasa viyasiyasayavattanimmarisisita ratta tambanayana garulayaya-ujjuttuganasa oyaviyasilappavala bimbaphalasannibhaharottha pamdara-sasisagalavimala nimmaladahidhana samkha gokhira kumda dagaraya munaliyadhavaladamtasedhi huyavahaniddhamtadhoyatattavanijjarattatala talu jiha amjana dhanakasinaruyagaramanijjaniddhakesa vameyakumdaladhara addachamdananulittagata, isisilimdha-pupphapagasaim asamkilitthaim suhumaim vatthaim pavara parihiya, vayam cha padhamam samaikkamta, Biiyam tu asampatta, bhadde jovvane vattamana, talabhamgaya tudita pavarabhusana nimmala-mani rayanamamditabhuya dasamuddamamditaggahattha chudamanichittachimdhagata suruva mahiddhiya mahajjuiya mahayasa mahabala mahanubhaya mahasokkha haraviraiyavachchha kadaya tuditathambhiyabhuya amgada kumdala matthagamdatalakannapidadhari vichittahatthabharana vichittamala mauli kallanagapavaravatthaparihiya kallanagapavaramallanulevana bhasurabomdi palambavanamaladhara divvenam vannenam divvenam gamdhenam divvenam phasenam divvenam samghayanena divvenam samthanenam divvae iddhie divvae jutie divvae bhasae divvae chhayae divvae pahae divvae achchie divvenam teenam divvae lesae dasa disao ujjovemana pabhasemana. Te nam tattha sanam-sanam bhavanavasa-satasahassanam sanam-sanam samaniyasahassinam sanam-sanam tavattisanam sanam-sanam logapalanam sanam-sanam aggamahisinam sanam-sanam parisanam sanam-sanam aniyanam sanam-sanam aniyadhivatinam sanam-sanam atarakkhadevasahassinam annesim cha bahunam bhavanavasinam devana ya devina ya ahevachcham porevachcham samittam bhattittam mahattaragattam anaisarasenavachcham karemana palemana mahatahata-natta-gita-vaita-tamti-tala-tala-tudita-dhana-muimgapaduppavaitaravenam divvaim bhogabhogaim bhumjamana viharamti. Kahi nam bhamte! Dahinillanam asurakumaranam devanam pajjattapajjattanam thana pannatta? Kahi nam bhamte! Dahinilla asurakumara deva parivasamti? Goyama! Jambuddive dive mamdarassa pavvatassa dahinenam imise rayanappabhae pudhavie asiuttarajoyanasatasahassabahallae uvarim egam joyanasahassam ogahitta hettha vegam joyanasahassam vajjitta majjhe atthahattare joyanasatasahasse, ettha nam dahinillanam asurakumaranam devanam chottisam bhavanavasasatasahassa bhavamtiti makkhataM.Te nam bhavana bahim vatta amto chauramsa, so chcheva vannao java padiruva. Ettha nam dahinillanam asurakumaranam devanam pajjattapajjattanam thana pannatta. Tisu vi loyassa asamkhejjaibhage. Tattha nam bahave dahinilla asurakumara deva ya devio ya parivasamti–kala lohiyakkhabimbottha taheva java bhumjamana viharamti. Etesi nam taheva tavattisagalogapala bhavamti. Evam savvattha bhanitavvam bhavanavasinam. Chamare attha asurakumarimde asurakumararaya parivasati–kale mahanilasarise java pabhasemane. Se nam tattha chottisae bhavanavasasatasahassanam chausatthie samaniyasahassinam tavattisae tavattisanam chaunham logapalanam pamchanham aggamahisinam saparivaranam tinham parisanam sattanham aniyanam sattanham aniyadhivatinam chaunha ya chausatthinam ayarakkhadevasahassinam annesim cha bahunam dahinillanam devanam devina ya ahevachcham porevachcham java viharati. Kahi nam bhamte! Uttarillanam asurakumaranam devanam pajjattapajjattanam thana pannatta? Kahi nam bhamte! Uttarilla asurakumara deva parivasamti? Goyama! Jambuddive dive mamdarassa pavvayassa uttarenam imise rayanappabhae pudhavie asiuttarajoyanasayasahassabahallae uvarim egam joyanasahassam ogahetta hettha vegam joyanasahassam vajjetta majjhe athahattare joyana-satasahasse, ettha nam uttarillanam asurakumaranam devanam tisam bhavanavasasatasahassa bhavamtiti makkhatam. Te nam bhavana bahi vatta amto chauramsa, sesam jaha dahinillanam java viharamti. Bali yattha vairoyanimde vairoyanaraya parivasati–kale mahanilasarise java pabhasemane. Se nam tattha tisae bhavanavasasayasahassanam satthie samaniyasahassinam tavattisae tavattisaganam chaunham logapalanam pamchanham aggamahisinam saparivaranam tinham parisanam sattanham aniyanam sattanham aniyadhivattinam chaunha ya satthinam ayarakkhadevasahassinam annesim cha bahunam uttarillanam asurakumaranam devana ya devina ya ahevachcham porevachcham kuvvamane viharati. Kahi nam bhamte! Nagakumaranam devanam pajjattapajjattanam thana pannatta? Kahi nam bhamte! Nagakumara deva parivasamti? Goyama! Imise rayanappabhae pudhavie asiuttarajoyanasayasahassa-bahallae uvarim egam joyanasahassam ogahitta hettha vegam joyanasahassam vajjitta majjhe atthahattare joyanasayasahasse, ettha nam nagakumaranam devanam pajjattapajjattanam chulasiim bhavanavasasayasahassa havamtiti makkhatam. Te nam bhavana bahim vatta amto chauramsa java padiruva. Tattha nam nagakumaranam devanam pajjattapajjattanam thana pannatta. Tisu vi logassa asamkhejjai bhage. Tattha nam bahave nagakumara deva parivasamti–mahiddhiya mahajuttiya, sesam jaha ohiyanam java viharamti. Dharanabhuyanamda ettha duve nagakumarimda nagakumararayano parivasamti–mahiddhiya, sesam jaha ohiyanam java viharamti. Kahi nam bhamte! Dahinillanam nagakumaranam devanam pajjattapajjattanam thana pannatta? Kahi nam bhamte! Dahinilla nagakumara deva parivasamti? Goyama! Jambuddive dive mamdarassa pavvayassa dahinenam imise rayanappabhae pudhavie asiuttarajoyanasayasahassabahallae uvarim evam joyanasahassam ogahetta hettha vegam joyanasahassam vajjetta majjhe atthahattare joyanasayasahasse, ettha nam dahinillanam nagakumaranam devanam choyalisam bhavanavasasayasahassa bhavamtiti makkhatam. Te nam bhavana bahim vatta amto chauramsa java padiruva. Ettha nam dahinillanam nagakumaranam devanam pajjattapajjattanam thana pannatta. Tisu vi logassa asamkhejjaibhage. Ettha nam bahave dahinilla nagakumara deva parivasamti–mahiddhiya java viharamti. Dharane yattha nagakumarimde nagakumararaya parivasati–mahiddhie java pabhasemane. Se nam tattha choyalisae bhavanavasasayasahassanam chhanham samaniyasahassinam tayattisae tavattisaganam chaunham logapalanam pamchanham aggamahisinam saparivaranam tinham parisanam sattanham aniyanam sattanham aniyadhivatinam chauvvisae ayarakkhadevasahassinam annesim cha bahunam dahinillanam nagakumaranam devana ya devina ya ahevachcham porevachcham kuvvamane viharati. Kahi nam bhamte! Uttarillanam nagakumaranam devanam pajjattapajjattanam thana pannatta? Kahi nam bhamte! Uttarilla nagakumara deva parivasamti? Goyama! Jambuddive dive mamdarassa pavvatassa uttarenam imise rayanappabhae pudhavie asiuttarajoyanasatasahassabahallae uvarim egam joyanasahassam ogahetta hettha vegam joyanasahassam vajjetta majjhe atthahattare joyanasatasahasse, ettha nam uttarillanam nagakumaranam devanam chattalisam bhavanavasasatasahassa bhavamtiti makkhatam. Te nam bhavana bahim vatta sesam jaha dahinillanam java viharamti. Bhuyanamde yattha nagakumarimde nagakumararaya parivasati–mahiddhie java pabhasemane. Se nam tattha chattalisae bhavanavasasatasahassanam ahevachcham java viharati. Kahi nam bhamte! Suvannakumaranam devanam pajjattapajjattanam thana pannatta? Kahi nam bhamte! Suvannakumara deva parivasamti? Goyama! Imise rayanappabhae pudhavie java ettha nam suvannakumaranam devanam bavattari bhavanavasasatasahassa bhavamtiti makkhatam. Te nam bhavana bahim vatta java padiruva. Tattha nam suvannakumaranam devanam pajjattapajjattanam thana pannatta. Tisu vi logassa asamkhejjai bhage. Tattha nam bahave suvannakumara deva parivasamti–mahiddhiya, sesam taha ohiyanam java viharamti. Venudeva-venudali yattha duve suvannakumarimda suvannakumararayano parivasamti–mahiddhiya java viharamti. Kahi nam bhamte! Dahinillanam suvannakumaranam pajjattapajjattanam thana pannatta? Kahi nam bhamte! Dahinilla suvannakumara deva parivasamti? Goyama! Imise rayanappabhae java majjhe atthahattare joyanasatasahasse, ettha nam dahinillanam suvannakumaranam atthatisam bhavanavasasatasahassa bhavamtiti makkhatam. Te nam bhavana bahim vatta java padiruva. Ettha nam dahinillanam suvannakumaranam pajjatta-pajjattanam thana pannatta. Tisu vi logassa asamkhejjaibhage. Ettha nam bahave suvannakumara deva parivasamti. Venudeve yattha suvannimde suvannakumararaya parivasai. Sesam jaha nagakumaranam. Kahi nam bhamte! Uttarillanam suvannakumaranam devanam pajjattapajjattanam thana pannatta? Kahi nam bhamte! Uttarilla suvannakumara deva parivasamti? Goyama! Imise rayanappabhae java ettha nam uttarillanam suvannakumaranam chottisam bhavanavasasatasahassa bhavamtiti makkhatam. Te nam bhavana bahim vatta java ettha nam bahave uttarilla suvannakumara deva parivasamti–mahiddhiya java viharamti. Venudali yattha suvannakumarimde suvannakumararaya parivasati–mahiddhie, sesam jaha nagakumaranam. Evam jaha suvannakumaranam vattavvaya bhanita taha sesana vi choddasanham imdanam bhanitavva, navaram–bhavanananattam imdananattam vannananattam parihanananattam cha imahim gahahim anugamtavvam–
Sutra Meaning Transliteration : Juo sutra 203