Sutra Navigation: Jivajivabhigam ( જીવાભિગમ ઉપાંગ સૂત્ર )

Search Details

Mool File Details

Anuvad File Details

Sr No : 1106130
Scripture Name( English ): Jivajivabhigam Translated Scripture Name : જીવાભિગમ ઉપાંગ સૂત્ર
Mool Language : Ardha-Magadhi Translated Language : Gujarati
Chapter :

चतुर्विध जीव प्रतिपत्ति

 Translated Chapter :

ચતુર્વિધ જીવ પ્રતિપત્તિ
Section : वैमानिक उद्देशक-२ Translated Section : વૈમાનિક ઉદ્દેશક-૨
Sutra Number : 330 Category : Upang-03
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] सोहम्मीसानेसु णं भंते! कप्पेसु विमाना केवतियं आयामविक्खंभेणं? केवतियं परिक्खेवेणं पन्नत्ता? गोयमा! दुविहा पन्नत्ता, तं जहा–संखेज्जवित्थडा य असंखेज्जवित्थडा य। तत्थ णं जेते संखेज्जवित्थडा ते णं संखेज्जाइं जोयणसहस्साइं आयामविक्खंभेणं, संखेज्जाइं जोयणसहस्साइं परिक्खेवेणं। तत्थ णं जेते असंखेज्जवित्थडा ते णं असंखेज्जाइं जोयणसहस्साइं आयाम-विक्खंभेणं, असंखेज्जाइं जोयणसहस्साइं परिक्खेवेणं। एवं जाव गेवेज्जविमाना। अनुत्तरविमाना पुच्छा। गोयमा! दुविहा पन्नत्ता, तं जहा–संखेज्जवित्थडे य असंखेज्ज-वित्थडा य। तत्थ णं जेसे संखेज्जवित्थडे से एगं जोयणसयसहस्सं जंबुद्दीवप्पमाणे जाव अद्धंगुलगं च। तत्थ णं जेते असंखेज्जवित्थडा ते णं असंखेज्जाइं जोयणसहस्साइं आयामविक्खंभेणं, असंखेज्जाइं जोयणसहस्साइं परिक्खेवेणं पन्नत्ता। सोहम्मीसानेसु णं भंते! विमाना कतिवण्णा पन्नत्ता? गोयमा! पंचवण्णा पन्नत्ता, तं जहा–किण्हा नीला लोहिया हालिद्दा सुक्किला। सणंकुमारमाहिंदेसु चउवण्णा–नीला जाव सुक्किला, बंभलोगलंतएसु तिवण्णा–लोहिया हालिद्दा सुक्किला, महासुक्कसहस्सारेसु दुवण्णा–हालिद्दा य सुक्किला य, आनयपाणतारणच्चुएसु सुक्किला, गेवेज्जविमाना सुक्किला, अनुत्तरोववातियविमाना परमसुक्किला वण्णेणं पन्नत्ता। सोहम्मीसानेसु णं भंते! कप्पेसु विमाना केरिसया पभाए पन्नत्ता? गोयमा! निच्चालोया निच्चुज्जोया सयंपभाए पन्नत्ता जाव अनुत्तरविमाना। सोहम्मीसानेसु णं भंते! कप्पेसु विमाना केरिसया गंधेणं पन्नत्ता? गोयमा! से जहानामए–कोट्ठपुडाण वा जाव एत्तो इट्ठतरा चेव जाव अनुत्तरविमाना। सोहम्मीसानेसु णं भंते! कप्पेसु विमाना केरिसया फासेणं पन्नत्ता? गोयमा! से जहानामए–आईणेति वा जाव एतो इट्ठतरा चेव जाव अनुत्तरविमाना। सोहम्मीसानेसु णं भंते! कप्पेसु विमाना केमहालया पन्नत्ता? गोयमा! अयण्णं जंबुद्दीवे दीवे जहा निरयुद्देसे जाव छम्मासेणं वीतिवएज्जा–अत्थेगतिए वीतिवएज्जा अत्थेगतिए नो वीतिवएज्जा एमहालया णं गोयमा! एवं जाव अनुत्तरविमाना। सोहम्मीसानेसु णं भंते! कप्पेसु विमाना किंमया पन्नत्ता? गोयमा! सव्वरयणामया अच्छा जाव पडिरूवा तत्थ णं बहवे जीवा य पोग्गला य वक्कमंति विउक्कमंति चयंति उववज्जंति। सासया णं ते विमाना दव्वट्ठयाए, वण्णपज्जवेहिं गंधपज्जवेहिं रसपज्जवेहिं फासपज्जवेहिं य असासया। एवं जाव अनुत्तरविमाना। सोहम्मीसानेसु णं भंते! कप्पेसु देवा कओहिंतो उववज्जंति? उववातो जहा वक्कंतीए जाव अनुत्तरविमाना। सोहम्मीसानेसु णं भंते! कप्पेसु देवा एगसमएणं केवतिया उववज्जंति? गोयमा! जहन्नेणं एक्को वा दो वा तिन्नि वा, उक्कोसेणं संखेज्जा वा असंखेज्जा वा उववज्जंति। एवं जाव सहस्सारे। आनतादी गेवेज्जा अनुत्तरा य जहन्नेणं एक्को वा दो वा तिन्नि वा, उक्कोसेणं संखेज्जा उववज्जंति। सोहम्मीसानेसु णं भंते! कप्पेसु देवा समएसमए अवहीरमाणाअवहीरमाणा केवतिएणं कालेणं अवहिया सिया? गोयमा! ते णं असंखेज्जा समएसमए अवहीरमाणाअवहीरमाणा असंखेज्जाहिं उस्सप्पिणीओसप्पिणीहिं अवहीरंति, नो चेव णं अवहिया सिया जाव सहस्सारो। आनतादिसु चउसु कप्पेसु देवा पुच्छा। गोयमा! ते णं असंखेज्जा समएसमए अवहीरमाणा अवहीरमाणा पलिओवमस्स असंखेज्जतिभागमेत्तेणं कालेणं अवहीरंति, नो चेव णं अवहिया सिया। एवं जाव अनुत्तरविमाना। सोहम्मीसानेसु णं भंते! कप्पेसु देवाणं केमहालिया सरीरोगाहणा पन्नत्ता? गोयमा! दुविहा पन्नत्ता, तं जहा–भवधारणिज्जा य उत्तरवेउव्विया य। तत्थ णं जासा भवधारणिज्जा सा जहन्नेणं अंगुलस्स असंखेज्जतिभागो, उक्कोसेणं सत्त रयणीओ। तत्थ णं जासा उत्तरवेउव्विया सा जहन्नेणं अंगुलस्स संखेज्जतिभागो उक्कोसेणं जोयणसतसहस्सं। सणंकुमारमाहिंदेसु भवधारणिज्जा उत्तरवेउव्विया। भवधारणिज्जा छरयणीओ, उत्तर-वेउव्विया तधेव। बंभलंतएसु पंच रयणीओ, महासुक्कसहस्सारेसु चत्तारि रयणीओ, आनतपाणता-रणच्चुएसु तिन्नि रयणीओ, उत्तरवेउव्विया तधेव जोयणसतसहस्सं सव्वेसिं। गेवेज्जादेवाणं भंते! केमहालिया सरीरोगाहणा पन्नत्ता? गोयमा! गेवेज्जादेवाणं एगे भवधारणिज्जे सरीरए पन्नत्ते–से जहन्नेणं अंगुलस्स असंखेज्जतिभागे, उक्कोसेणं दो रयणीओ। अनुत्तरदेवाणं एगा रयणी।
Sutra Meaning : જુઓ સૂત્ર ૩૨૭
Mool Sutra Transliteration : [sutra] sohammisanesu nam bhamte! Kappesu vimana kevatiyam ayamavikkhambhenam? Kevatiyam parikkhevenam pannatta? Goyama! Duviha pannatta, tam jaha–samkhejjavitthada ya asamkhejjavitthada ya. Tattha nam jete samkhejjavitthada te nam samkhejjaim joyanasahassaim ayamavikkhambhenam, samkhejjaim joyanasahassaim parikkhevenam. Tattha nam jete asamkhejjavitthada te nam asamkhejjaim joyanasahassaim ayama-vikkhambhenam, asamkhejjaim joyanasahassaim parikkhevenam. Evam java gevejjavimana. Anuttaravimana puchchha. Goyama! Duviha pannatta, tam jaha–samkhejjavitthade ya asamkhejja-vitthada ya. Tattha nam jese samkhejjavitthade se egam joyanasayasahassam jambuddivappamane java addhamgulagam cha. Tattha nam jete asamkhejjavitthada te nam asamkhejjaim joyanasahassaim ayamavikkhambhenam, asamkhejjaim joyanasahassaim parikkhevenam pannatta. Sohammisanesu nam bhamte! Vimana kativanna pannatta? Goyama! Pamchavanna pannatta, tam jaha–kinha nila lohiya halidda sukkila. Sanamkumaramahimdesu chauvanna–nila java sukkila, bambhalogalamtaesu tivanna–lohiya halidda sukkila, mahasukkasahassaresu duvanna–halidda ya sukkila ya, anayapanataranachchuesu sukkila, gevejjavimana sukkila, anuttarovavatiyavimana paramasukkila vannenam pannatta. Sohammisanesu nam bhamte! Kappesu vimana kerisaya pabhae pannatta? Goyama! Nichchaloya nichchujjoya sayampabhae pannatta java anuttaravimana. Sohammisanesu nam bhamte! Kappesu vimana kerisaya gamdhenam pannatta? Goyama! Se jahanamae–kotthapudana va java etto itthatara cheva java anuttaravimana. Sohammisanesu nam bhamte! Kappesu vimana kerisaya phasenam pannatta? Goyama! Se jahanamae–aineti va java eto itthatara cheva java anuttaravimana. Sohammisanesu nam bhamte! Kappesu vimana kemahalaya pannatta? Goyama! Ayannam jambuddive dive jaha nirayuddese java chhammasenam vitivaejja–atthegatie vitivaejja atthegatie no vitivaejja emahalaya nam goyama! Evam java anuttaravimana. Sohammisanesu nam bhamte! Kappesu vimana kimmaya pannatta? Goyama! Savvarayanamaya achchha java padiruva tattha nam bahave jiva ya poggala ya vakkamamti viukkamamti chayamti uvavajjamti. Sasaya nam te vimana davvatthayae, vannapajjavehim gamdhapajjavehim rasapajjavehim phasapajjavehim ya asasaya. Evam java anuttaravimana. Sohammisanesu nam bhamte! Kappesu deva kaohimto uvavajjamti? Uvavato jaha vakkamtie java anuttaravimana. Sohammisanesu nam bhamte! Kappesu deva egasamaenam kevatiya uvavajjamti? Goyama! Jahannenam ekko va do va tinni va, ukkosenam samkhejja va asamkhejja va uvavajjamti. Evam java sahassare. Anatadi gevejja anuttara ya jahannenam ekko va do va tinni va, ukkosenam samkhejja uvavajjamti. Sohammisanesu nam bhamte! Kappesu deva samaesamae avahiramanaavahiramana kevatienam kalenam avahiya siya? Goyama! Te nam asamkhejja samaesamae avahiramanaavahiramana asamkhejjahim ussappiniosappinihim avahiramti, no cheva nam avahiya siya java sahassaro. Anatadisu chausu kappesu deva puchchha. Goyama! Te nam asamkhejja samaesamae avahiramana avahiramana paliovamassa asamkhejjatibhagamettenam kalenam avahiramti, no cheva nam avahiya siya. Evam java anuttaravimana. Sohammisanesu nam bhamte! Kappesu devanam kemahaliya sarirogahana pannatta? Goyama! Duviha pannatta, tam jaha–bhavadharanijja ya uttaraveuvviya ya. Tattha nam jasa bhavadharanijja sa jahannenam amgulassa asamkhejjatibhago, ukkosenam satta rayanio. Tattha nam jasa uttaraveuvviya sa jahannenam amgulassa samkhejjatibhago ukkosenam joyanasatasahassam. Sanamkumaramahimdesu bhavadharanijja uttaraveuvviya. Bhavadharanijja chharayanio, uttara-veuvviya tadheva. Bambhalamtaesu pamcha rayanio, mahasukkasahassaresu chattari rayanio, anatapanata-ranachchuesu tinni rayanio, uttaraveuvviya tadheva joyanasatasahassam savvesim. Gevejjadevanam bhamte! Kemahaliya sarirogahana pannatta? Goyama! Gevejjadevanam ege bhavadharanijje sarirae pannatte–se jahannenam amgulassa asamkhejjatibhage, ukkosenam do rayanio. Anuttaradevanam ega rayani.
Sutra Meaning Transliteration : Juo sutra 327