Sutra Navigation: Rajprashniya ( રાજપ્રશ્નીય ઉપાંગ સૂત્ર )

Search Details

Mool File Details

Anuvad File Details

Sr No : 1105766
Scripture Name( English ): Rajprashniya Translated Scripture Name : રાજપ્રશ્નીય ઉપાંગ સૂત્ર
Mool Language : Ardha-Magadhi Translated Language : Gujarati
Chapter :

प्रदेशीराजान प्रकरण

 Translated Chapter :

પ્રદેશીરાજાન પ્રકરણ
Section : Translated Section :
Sutra Number : 66 Category : Upang-02
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से पएसी राया केसिं कुमारसमणं एवं वयासी–अत्थि णं भंते! एस पण्णओ उवमा, इमेण पुण कारणेणं नो उवागच्छइ–एवं खलु भंते! मम अज्जिया होत्था, इहेव सेयवियाए नगरीए धम्मिया धम्मिट्ठा धम्मक्खाई धम्माणुया धम्मपलोई धम्मपलज्जणी धम्मसीलसमुयाचारा धम्मेण चेव वित्तिं कप्पेमाणी समणोवासिया अभिगयजीवा जीवा उवलद्धपुण्णपावा आसव संवर निज्जर किरिया-हिगरण बंधप्पमोक्खकुसला असहिज्जा देवासुर णाग सुवण्ण जक्ख रक्खस किन्नर किंपुरिस गरुल गंधव्व महोरगाइएहिं देवगणेहिं निग्गंथाओ पावयणाओ अणइक्कमणिज्जा, निग्गंथे पावयणे निस्संकिया निक्कंखिया निव्वितिगिच्छा लद्धट्ठा गहियट्ठा अभिगयट्ठा पुच्छियट्ठा विणिच्छियट्ठा अट्ठिमिंजपेमाणुरागरत्ता अयमाउसो! निग्गंथे पावयणे अट्ठे परमट्ठे सेसे अणट्ठे ऊसियफलिहा अवंगुयदुवारा चियतंतेउरघरप्पवेसा चाउद्दसट्ठमुद्दिट्ठपुण्णमासिणीसु पडिपुण्णं पोसहं सम्मं अनु-पालेमाणी, समणे णिग्गंथे फासुएसणिज्जेणं असनपानखाइमसाइमेणं पीढ फलग सेज्जा संथारेणं वत्थ पडिग्गह कंबल पायपुंछणेणं ओसह-भेसज्जेण य पडिलाभेमाणी-पडिलाभेमाणी, बहूहिं सीलव्वय गुण वेरमण पच्चक्खाण पोसहोववासेहिं अप्पाणं भावेमाणी विहरइ। सा णं तुज्झं वत्तव्वयाए सुबहुं पुण्णोवचयं समज्जिणित्ता कालमासे कालं किच्चा अन्नयरेसु देवलोएसु देवत्ताए उववन्ना। तीसे णं अज्जि याए अहं नत्तुए होत्था–इट्ठे कंते पिए मणुन्ने मणामे थेज्जे वेसासिए सम्मए बहुमए अनुमए रयणकरंडगसमाणे जीविउस्सविए हिययनंदिजणणे उंबरपुप्फं पिव दुल्लभे सवणयाए, किमंग पुण पासणयाए, तं जइ णं सा अज्जिया आगंतुं एवं वएज्जा–एवं खलु नत्तुया! अहं तव अज्जिया होत्था, इहेव सेयवियाए नयरीए धम्मिया धम्मिट्ठा धम्मक्खाई धम्माणुया धम्मपलोई धम्मपलज्जणी धम्मसीलसमुयाचारा धम्मेण चेव वित्तिं कप्पेमाणी समणोवासिया जाव अप्पाणं भावेमाणी विहरामि। तए णं अहं सुबहुं पुण्णोवचयं समज्जिणित्ता कालमासे कालं किच्चा अन्नयरेसु देवलोएसु देवत्ताए उववण्णा, तं तुमं पि णत्तुया! भवाहि धम्मिए धम्मिट्ठे धम्मक्खाई धम्माणुए धम्मपलोई धम्मपलज्जणे धम्मसीलसमुयाचारे धम्मेण चेव वित्तिं कप्पेमाणे समणोवासए जाव अप्पाणं भावेमाणे विहराहि। तए णं तुमं पि एयं चेव सुबहुं पुण्णोवचयं समज्जिणित्ता कालमासे कालं किच्चा अन्नयरेसु देवलोएसु देवत्ताए उववज्जिहिसि। तं जइ णं अज्जिया मम आगंतुं एवं वएज्जा तो णं अहं सद्दहेज्जा पत्तिएज्जा रोएज्जा जहा–अन्नो जीवो अन्नं सरीरं, नो तज्जीवो तं सरीरं। जम्हा सा अज्जिया ममं आगंतुं नो एवं वयासी, तम्हा सुपइट्ठिया मे पइण्णा जहा–तज्जीवो तं सरीरं, नो अन्नो जीवो अन्नं सरीरं। तए णं केसी कुमारसमणे पएसिं रायं एवं वयासी–जति णं तुमं पएसी! ण्हायं कयबलिकम्मं कयकोउयमंगल-पायच्छित्तं उल्लापडगं भिंगार कडच्छुयहत्थगयं देवकुलमनुपविसमाणं केइ पुरिसे वच्चघरंसि ठिच्चा एवं वदेज्जा–एह ताव सामी! इह मुहुत्तागं आसयह वा चिट्ठह वा निसीयह वा तुयट्टह वा। तस्स णं तुमं पएसी! पुरिसस्स खणमवि एयमट्ठं पडिसुणिज्जासि? नो तिणट्ठे समट्ठे। कम्हा णं? जम्हाणं भंते! असुई असुइ-सामंतो। एवामेव पएसी! तव वि अज्जिया होत्था, इहेव सेयवियाए नयरीए धम्मिया जाव अप्पाणं भावेमाणी विहरति। सा णं अम्हं वत्तव्वयाए सुबहुं पुण्णोवचयं समज्जिणित्ता कालमासे कालं किच्चा अन्नयरेसु देवलोएसु देवत्ताए उववण्णा। तीसे णं अज्जियाए तुमं णत्तुए होत्था–इट्ठे कंते पिए मणुन्ने मणामे थेज्जे वेसा-सिए सम्मए बहुमए अणुमए रयणकरंडगसमाणे जीविउस्सविए हिययणंदिजणणे उंबरपुप्फं पिव दुल्लभे सवणयाए, किमंग पुण पासणयाए? सा णं इच्छइ माणुसं लोगं हव्वमागच्छित्तए, नो चेव णं संचाएइ हव्वमागच्छित्तए। चउहिं ठाणेहिं पएसी! अहुणोववण्णए देवे देवलोएसु इच्छेज्जा माणुसं लोगं हव्वमागच्छित्तए, नो चेव णं संचाएइ हव्वमागच्छित्तए– अहुणोववन्ने देवे देवलोएसु दिव्वेहिं कामभोगेहिं मुच्छिए गिद्धे गढिए अज्झोववन्ने, से णं माणुसे भोगे नो आढाति नो परि जाणाति। से णं इच्छेज्ज माणुसं लोगं हव्वमागच्छित्तए, नो चेव णं संचाएति हव्वमागच्छित्तए। अहुणोववन्ने देवे देवलोएसु दिव्वेहिं कामभोगेहिं मुच्छिए गिद्धे गढिए अज्झोववन्ने, तस्स णं मानुस्से पेम्मे वोच्छिन्नए भवति, दिव्वे पेम्मे संकंते भवति। से णं इच्छेज्जा माणुसं लोगं हव्वमागच्छित्तए, नो चेव णं संचाएइ हव्वमागच्छित्तए। अहुणोववन्ने देवे देवलोएसु दिव्वेहिं कामभोगेहिं मुच्छिए गिद्धे गढिए अज्झोववन्ने, तस्स णं एवं भवइ–इयाणिं गच्छं मुहुत्ते गच्छं जाव इह अप्पाउया नरा कालधम्मुणा संजुत्ता भवंति, से णं इच्छेज्जा माणुस्सं लोगं हव्वमागच्छित्तए, नो चेव णं संचाएइ हव्वमागच्छित्तए। अहुणोववन्ने देवे देवलोएसु दिव्वेहिं कामभोगेहिं मुच्छिए गिद्धे गढिए अज्झोववन्ने, तस्स मानुस्सए उराले दुग्गंधे पडिकूले पडिलोमे भवइ, उड्ढं पि य णं चत्तारि पंचजोअणसए असुभे मानुस्सए गंधे अभिसमागच्छति। से णं इच्छेज्जा माणुस्सं लोगं हव्वमागच्छित्तए, नो चेव णं संचाएइ हव्वमागच्छित्तए। इच्चेएहिं चउहिं ठाणेहिं पएसी! अहुणोववन्ने देवे देवलोएसु इच्छेज्ज माणुसं लोगं हव्वमागच्छित्तए, नो चेव णं संचाएइ हव्वमागच्छित्तए। तं सद्दहाहि णं तुमं पएसी! जहा–अन्नो जीवो अन्नं सरीरं, नो तज्जीवो तं सरीरं।
Sutra Meaning : જુઓ સૂત્ર ૬૫
Mool Sutra Transliteration : [sutra] tae nam se paesi raya kesim kumarasamanam evam vayasi–atthi nam bhamte! Esa pannao uvama, imena puna karanenam no uvagachchhai–evam khalu bhamte! Mama ajjiya hottha, iheva seyaviyae nagarie dhammiya dhammittha dhammakkhai dhammanuya dhammapaloi dhammapalajjani dhammasilasamuyachara dhammena cheva vittim kappemani samanovasiya abhigayajiva jiva uvaladdhapunnapava asava samvara nijjara kiriya-higarana bamdhappamokkhakusala asahijja devasura naga suvanna jakkha rakkhasa kinnara kimpurisa garula gamdhavva mahoragaiehim devaganehim niggamthao pavayanao anaikkamanijja, niggamthe pavayane nissamkiya nikkamkhiya nivvitigichchha laddhattha gahiyattha abhigayattha puchchhiyattha vinichchhiyattha atthimimjapemanuragaratta ayamauso! Niggamthe pavayane atthe paramatthe sese anatthe usiyaphaliha avamguyaduvara chiyatamteuragharappavesa chauddasatthamudditthapunnamasinisu padipunnam posaham sammam anu-palemani, samane niggamthe phasuesanijjenam asanapanakhaimasaimenam pidha phalaga sejja samtharenam vattha padiggaha kambala payapumchhanenam osaha-bhesajjena ya padilabhemani-padilabhemani, bahuhim silavvaya guna veramana pachchakkhana posahovavasehim appanam bhavemani viharai. Sa nam tujjham vattavvayae subahum punnovachayam samajjinitta kalamase kalam kichcha annayaresu devaloesu devattae uvavanna. Tise nam ajji yae aham nattue hottha–itthe kamte pie manunne maname thejje vesasie sammae bahumae anumae rayanakaramdagasamane jiviussavie hiyayanamdijanane umbarapuppham piva dullabhe savanayae, kimamga puna pasanayae, tam jai nam sa ajjiya agamtum evam vaejja–evam khalu nattuya! Aham tava ajjiya hottha, iheva seyaviyae nayarie dhammiya dhammittha dhammakkhai dhammanuya dhammapaloi dhammapalajjani dhammasilasamuyachara dhammena cheva vittim kappemani samanovasiya java appanam bhavemani viharami. Tae nam aham subahum punnovachayam samajjinitta kalamase kalam kichcha annayaresu devaloesu devattae uvavanna, tam tumam pi nattuya! Bhavahi dhammie dhammitthe dhammakkhai dhammanue dhammapaloi dhammapalajjane dhammasilasamuyachare dhammena cheva vittim kappemane samanovasae java appanam bhavemane viharahi. Tae nam tumam pi eyam cheva subahum punnovachayam samajjinitta kalamase kalam kichcha annayaresu devaloesu devattae uvavajjihisi. Tam jai nam ajjiya mama agamtum evam vaejja to nam aham saddahejja pattiejja roejja jaha–anno jivo annam sariram, no tajjivo tam sariram. Jamha sa ajjiya mamam agamtum no evam vayasi, tamha supaitthiya me painna jaha–tajjivo tam sariram, no anno jivo annam sariram. Tae nam kesi kumarasamane paesim rayam evam vayasi–jati nam tumam paesi! Nhayam kayabalikammam kayakouyamamgala-payachchhittam ullapadagam bhimgara kadachchhuyahatthagayam devakulamanupavisamanam kei purise vachchagharamsi thichcha evam vadejja–eha tava sami! Iha muhuttagam asayaha va chitthaha va nisiyaha va tuyattaha va. Tassa nam tumam paesi! Purisassa khanamavi eyamattham padisunijjasi? No tinatthe samatthe. Kamha nam? Jamhanam bhamte! Asui asui-samamto. Evameva paesi! Tava vi ajjiya hottha, iheva seyaviyae nayarie dhammiya java appanam bhavemani viharati. Sa nam amham vattavvayae subahum punnovachayam samajjinitta kalamase kalam kichcha annayaresu devaloesu devattae uvavanna. Tise nam ajjiyae tumam nattue hottha–itthe kamte pie manunne maname thejje vesa-sie sammae bahumae anumae rayanakaramdagasamane jiviussavie hiyayanamdijanane umbarapuppham piva dullabhe savanayae, kimamga puna pasanayae? Sa nam ichchhai manusam logam havvamagachchhittae, no cheva nam samchaei havvamagachchhittae. Chauhim thanehim paesi! Ahunovavannae deve devaloesu ichchhejja manusam logam havvamagachchhittae, no cheva nam samchaei havvamagachchhittae– Ahunovavanne deve devaloesu divvehim kamabhogehim muchchhie giddhe gadhie ajjhovavanne, se nam manuse bhoge no adhati no pari janati. Se nam ichchhejja manusam logam havvamagachchhittae, no cheva nam samchaeti havvamagachchhittae. Ahunovavanne deve devaloesu divvehim kamabhogehim muchchhie giddhe gadhie ajjhovavanne, tassa nam manusse pemme vochchhinnae bhavati, divve pemme samkamte bhavati. Se nam ichchhejja manusam logam havvamagachchhittae, no cheva nam samchaei havvamagachchhittae. Ahunovavanne deve devaloesu divvehim kamabhogehim muchchhie giddhe gadhie ajjhovavanne, tassa nam evam bhavai–iyanim gachchham muhutte gachchham java iha appauya nara kaladhammuna samjutta bhavamti, se nam ichchhejja manussam logam havvamagachchhittae, no cheva nam samchaei havvamagachchhittae. Ahunovavanne deve devaloesu divvehim kamabhogehim muchchhie giddhe gadhie ajjhovavanne, tassa manussae urale duggamdhe padikule padilome bhavai, uddham pi ya nam chattari pamchajoanasae asubhe manussae gamdhe abhisamagachchhati. Se nam ichchhejja manussam logam havvamagachchhittae, no cheva nam samchaei havvamagachchhittae. Ichcheehim chauhim thanehim paesi! Ahunovavanne deve devaloesu ichchhejja manusam logam havvamagachchhittae, no cheva nam samchaei havvamagachchhittae. Tam saddahahi nam tumam paesi! Jaha–anno jivo annam sariram, no tajjivo tam sariram.
Sutra Meaning Transliteration : Juo sutra 65