Sutra Navigation: Rajprashniya ( રાજપ્રશ્નીય ઉપાંગ સૂત્ર )

Search Details

Mool File Details

Anuvad File Details

Sr No : 1105761
Scripture Name( English ): Rajprashniya Translated Scripture Name : રાજપ્રશ્નીય ઉપાંગ સૂત્ર
Mool Language : Ardha-Magadhi Translated Language : Gujarati
Chapter :

प्रदेशीराजान प्रकरण

 Translated Chapter :

પ્રદેશીરાજાન પ્રકરણ
Section : Translated Section :
Sutra Number : 61 Category : Upang-02
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं केसी कुमारसमणे चित्तं सारहिं एवं वयासी–एवं खलु चउहिं ठाणेहिं चित्ता! जीवे केवलिपन्नत्तं धम्मं नो लभेज्ज सवणयाए, तं जहा– आरामगयं वा उज्जानगयं वा समणं वा माहणं वा नो अभिगच्छइ नो वंदइ नो नमंसइ नो सक्कारेइ नो सम्माणेइ नो कल्लाणं मंगलं देवयं चेइयं पज्जुवासेइ, नो अट्ठाइं हेऊइं पसिणाइं कारणाइं वागरणाइं पुच्छइ। एएण वि ठाणेणं चित्ता! जीवे केवलिपन्नत्तं धम्मं नो लभइ सवणयाए। उवस्सयगयं समणं वा माहणं वा नो अभिगच्छइ नो वंदइ नो नमंसइ नो सक्कारेइ नो सम्माणेइ नो कल्लाणं मंगलं देवयं चेइयं पज्जुवासेइ, नो अट्ठाइं हेऊइं पसिणाइं कारणाइं वागरणाइं पुच्छइ। एएण वि ठाणेणं चित्ता! जीवे केवलिपन्नत्तं धम्मं नो लभइ सवणयाए। गोयरग्गगयं समणं वा माहणं वा नो अभिगच्छइ नो वंदइ नो नमंसइ नो सक्कारेइ नो सम्माणेइ नो कल्लाणं मंगलं देवयं चेइयं पज्जुवासेइ नो विउलेणं असनपानखाइमसाइमेणं पडिलाभेइ, नो अट्ठाइं हेऊइं पसिणाइं कारणाइं वागरणाइं पुच्छइ। एएण वि ठाणेणं चित्ता! जीवे केवलिपन्नत्तं धम्मं नो लभइ सवणयाए। जत्थ वि य णं समणेण वा माहणेण वा सद्धिं अभिसमागच्छइ तत्थ वि य णं हत्थेण वा वत्थेण वा छत्तेण वा अप्पाणं आवरित्ता चिट्ठइ, नो अट्ठाइं हेऊइं पसिणाइं कारणाइं वागरणाइं पुच्छइ। एएण वि ठाणेणं चित्ता! जीवे केवलिपन्नत्तं धम्मं नो लभइ सवणयाए। एएहिं च णं चित्ता! चउहिं ठाणेहिं जीवे केवलिपन्नत्तं धम्मं लभइ सवणयाए, तं जहा–आरामगयं वा उज्जानगयं वा समणं वा माहणं वा अभिगच्छइ वंदइ नमंसइ सक्कारेइ सम्माणेइ कल्लाणं मंगलं देवयं चेइयं पज्जुवासेइ, अट्ठाइं हेऊइं पसिणाइं कारणाइं वागरणाइं पुच्छइ। एएण वि ठाणेणं चित्ता! जीवे केवलिपन्नत्तं धम्मं लभइ सवणयाए। उवस्सयगयं समणं वा माहणं वा अभिगच्छइ वंदइ नमंसइ सक्कारेइ सम्माणेइ कल्लाणं मंगलं देवयं चेइयं पज्जुवासेइ, अट्ठाइं हेऊइं पसिणाइं कारणाइं वागरणाइं पुच्छइ। एएण वि ठाणेणं चित्ता! जीवे केवलिपन्नत्तं धम्मं लभइ सवणयाए। गोयरग्गगयं समणं वा माहणं वा अभिगच्छइ वंदइ नमंसइ सक्कारेइ सम्माणेइ कल्लाणं मंगलं देवयं चेइयं पज्जुवासेइ, विउलेणं असणपाणखाइमसाइमेणं पडिलाभेइ, अट्ठाइं हेऊइं पसिणाइं कारणाइं वागरणाइं पुच्छइ। एएण वि ठाणेणं चित्ता! जीवे केवलिपन्नत्तं धम्मं लभइ सवणयाए। जत्थ वि य णं समणेण वा माहणेण वा सद्धिं अभिसमागच्छइ तत्थ वि य णं नो हत्थेण वा वत्थेण वा छत्तेण वा अप्पाणं आवरेत्ताणं चिट्ठइ। एएण वि ठाणेणं चित्ता! जीवे केवलिपन्नत्तं धम्मं लभइ सवणयाए। तुज्झं च णं चित्ता! पएसी राया–आरामगयं वा उज्जानगयं वा समणं वा माहणं वा नो अभिगच्छइ नो वंदइ नो नमंसइ नो सक्कारेइ नो सम्माणेइ नो कल्लाणं मंगलं देवयं चेइयं पज्जुवासेइ, नो अट्ठाइं हेऊइं पसिणाइं कारणाइं वागरणाइं पुच्छइ। तं कहं णं चित्ता! पएसिस्स रन्नो धम्ममाइक्खिस्सामो? उवस्सयगयं समणं वा माहणं वा नो अभिगच्छइ नो वंदइ नो नमंसइ नो सक्कारेइ नो सम्माणेइ नो कल्लाणं मंगलं देवयं चेइयं पज्जुवासेइ, नो अट्ठाइं हेऊइं पसिणाइं कारणाइं वागरणाइं पुच्छइ। तं कहं णं चित्ता! पएसिस्स रन्नो धम्ममाइक्खिस्सामो? गोयरग्गगयं समणं वा माहणं वा नो अभिगच्छइ नो वंदइ नो नमंसइ नो सक्कारेइ नो सम्मानेइ नो कल्लाणं मंगलं देवयं चेइयं पज्जुवासेइ, नो विउलेणं असनपानखाइमसाइमेणं पडिलाभेइ, नो अट्ठाइं हेऊइं पसिणाइं कारणाइं वागरणाइं पुच्छइ। तं कहं णं चित्ता! पएसिस्स रन्नो धम्ममा-इक्खिस्सामो? जत्थ वि य णं समणेण वा माहणेण वा सद्धिं अभिसमागच्छइ तत्थ वि य णं हत्थेण वा वत्थेण वा छत्तेण वा अप्पाणं आवरेत्ता चिट्ठइ। तं कहं णं चित्ता! पएसिस्स रन्नो धम्ममाइक्खिस्सामो? तए णं से चित्ते सारही केसिं कुमार-समणं एवं वयासी–एवं खलु भंते! अन्नया कयाइ कंबोएहिं चत्तारि आसा उवायणं उवनीया, ते मए पएसिस्स रन्नो अन्नया चेव उवणेया। तं एएणं खलु भंते! कारणेणं अहं पएसिं रायं देवानुप्पियाणं अंतिए हव्वमाणेस्सामि। तं मा णं देवानुप्पिया! तुब्भे पएसिस्स रन्नो धम्ममाइक्खमाणा गिलाएज्जाह। अगिलाए णं भंते! तुब्भे पएसिस्स रन्नो धम्ममाइक्खेज्जाह। छंदेणं भंते! तुब्भे पएसिस्स रन्नो धम्ममाइक्खेज्जाह। तए णं से केसी कुमार-समणे चित्तं सारहिं एवं वयासी–अवियाइं चित्ता! जाणिस्सामो। तए णं से चित्ते सारही केसिं कुमारसमणं वंदइ नमंसइ, जेणेव चाउग्घंटे आसरहे तेणेव उवागच्छइ, चाउग्घंटं आसरहं दुरुहइ, जामेव दिसिं पाउब्भूए तामेव दिसिं पडिगए।
Sutra Meaning : જુઓ સૂત્ર ૫૬
Mool Sutra Transliteration : [sutra] tae nam kesi kumarasamane chittam sarahim evam vayasi–evam khalu chauhim thanehim chitta! Jive kevalipannattam dhammam no labhejja savanayae, tam jaha– Aramagayam va ujjanagayam va samanam va mahanam va no abhigachchhai no vamdai no namamsai no sakkarei no sammanei no kallanam mamgalam devayam cheiyam pajjuvasei, no atthaim heuim pasinaim karanaim vagaranaim puchchhai. Eena vi thanenam chitta! Jive kevalipannattam dhammam no labhai savanayae. Uvassayagayam samanam va mahanam va no abhigachchhai no vamdai no namamsai no sakkarei no sammanei no kallanam mamgalam devayam cheiyam pajjuvasei, no atthaim heuim pasinaim karanaim vagaranaim puchchhai. Eena vi thanenam chitta! Jive kevalipannattam dhammam no labhai savanayae. Goyaraggagayam samanam va mahanam va no abhigachchhai no vamdai no namamsai no sakkarei no sammanei no kallanam mamgalam devayam cheiyam pajjuvasei no viulenam asanapanakhaimasaimenam padilabhei, no atthaim heuim pasinaim karanaim vagaranaim puchchhai. Eena vi thanenam chitta! Jive kevalipannattam dhammam no labhai savanayae. Jattha vi ya nam samanena va mahanena va saddhim abhisamagachchhai tattha vi ya nam hatthena va vatthena va chhattena va appanam avaritta chitthai, no atthaim heuim pasinaim karanaim vagaranaim puchchhai. Eena vi thanenam chitta! Jive kevalipannattam dhammam no labhai savanayae. Eehim cha nam chitta! Chauhim thanehim jive kevalipannattam dhammam labhai savanayae, tam jaha–aramagayam va ujjanagayam va samanam va mahanam va abhigachchhai vamdai namamsai sakkarei sammanei kallanam mamgalam devayam cheiyam pajjuvasei, atthaim heuim pasinaim karanaim vagaranaim puchchhai. Eena vi thanenam chitta! Jive kevalipannattam dhammam labhai savanayae. Uvassayagayam samanam va mahanam va abhigachchhai vamdai namamsai sakkarei sammanei kallanam mamgalam devayam cheiyam pajjuvasei, atthaim heuim pasinaim karanaim vagaranaim puchchhai. Eena vi thanenam chitta! Jive kevalipannattam dhammam labhai savanayae. Goyaraggagayam samanam va mahanam va abhigachchhai vamdai namamsai sakkarei sammanei kallanam mamgalam devayam cheiyam pajjuvasei, viulenam asanapanakhaimasaimenam padilabhei, atthaim heuim pasinaim karanaim vagaranaim puchchhai. Eena vi thanenam chitta! Jive kevalipannattam dhammam labhai savanayae. Jattha vi ya nam samanena va mahanena va saddhim abhisamagachchhai tattha vi ya nam no hatthena va vatthena va chhattena va appanam avarettanam chitthai. Eena vi thanenam chitta! Jive kevalipannattam dhammam labhai savanayae. Tujjham cha nam chitta! Paesi raya–aramagayam va ujjanagayam va samanam va mahanam va no abhigachchhai no vamdai no namamsai no sakkarei no sammanei no kallanam mamgalam devayam cheiyam pajjuvasei, no atthaim heuim pasinaim karanaim vagaranaim puchchhai. Tam kaham nam chitta! Paesissa ranno dhammamaikkhissamo? Uvassayagayam samanam va mahanam va no abhigachchhai no vamdai no namamsai no sakkarei no sammanei no kallanam mamgalam devayam cheiyam pajjuvasei, no atthaim heuim pasinaim karanaim vagaranaim puchchhai. Tam kaham nam chitta! Paesissa ranno dhammamaikkhissamo? Goyaraggagayam samanam va mahanam va no abhigachchhai no vamdai no namamsai no sakkarei no sammanei no kallanam mamgalam devayam cheiyam pajjuvasei, no viulenam asanapanakhaimasaimenam padilabhei, no atthaim heuim pasinaim karanaim vagaranaim puchchhai. Tam kaham nam chitta! Paesissa ranno dhammama-ikkhissamo? Jattha vi ya nam samanena va mahanena va saddhim abhisamagachchhai tattha vi ya nam hatthena va vatthena va chhattena va appanam avaretta chitthai. Tam kaham nam chitta! Paesissa ranno dhammamaikkhissamo? Tae nam se chitte sarahi kesim kumara-samanam evam vayasi–evam khalu bhamte! Annaya kayai kamboehim chattari asa uvayanam uvaniya, te mae paesissa ranno annaya cheva uvaneya. Tam eenam khalu bhamte! Karanenam aham paesim rayam devanuppiyanam amtie havvamanessami. Tam ma nam devanuppiya! Tubbhe paesissa ranno dhammamaikkhamana gilaejjaha. Agilae nam bhamte! Tubbhe paesissa ranno dhammamaikkhejjaha. Chhamdenam bhamte! Tubbhe paesissa ranno dhammamaikkhejjaha. Tae nam se kesi kumara-samane chittam sarahim evam vayasi–aviyaim chitta! Janissamo. Tae nam se chitte sarahi kesim kumarasamanam vamdai namamsai, jeneva chaugghamte asarahe teneva uvagachchhai, chaugghamtam asaraham duruhai, jameva disim paubbhue tameva disim padigae.
Sutra Meaning Transliteration : Juo sutra 56