Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104885
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-१७ अश्व

 Translated Chapter :

શ્રુતસ્કંધ-૧

અધ્યયન-૧૭ અશ્વ
Section : Translated Section :
Sutra Number : 185 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] ते संजत्ता-नावावाणियगे एवं वयासी–तुब्भे णं देवानुप्पिया! गामागर-नगर-खेड-कब्बड-दोणमुह-मडंब-पट्टण-आसम-निगम-संबाह-सण्णिवेसाइं० आहिंडह, लवणसमुद्दं च अभिक्खणं-अभिक्खणं पोयवहणेणं ओगाहेह। तं अत्थियाइं च केइ भे कहिंचि अच्छेरए दिट्ठपुव्वे? तए णं ते संजत्ता-नावावाणियगा कनगकेऊ एवं वयासी–एवं खलु अम्हे देवानुप्पिया! इहेव हत्थिसीसे नयरे परिवसामो तं चेव जाव कालियदीवंतेणं संछूढा। तत्थ णं बहवे हिरन्नागरे य सुवण्णागरे य रयणागरे य वइरागरे य, बहवे तत्थ आसे पासामो। किं ते? हरिरेणु जाव अम्हं गंधं आघायंति, आघाइत्ता भीया तत्था उव्विग्गा उव्विग्गमणा तओ अनेगाइं जोयणाइं उब्भमंति। तए णं सामी! अम्हेहिं कालियदीवे ते आसा अच्छेरए दिट्ठपुव्वे। तए णं से कनगकेऊ तेसिं संजत्ता-नावावाणियगाणं अंतिए एयमट्ठं सोच्चा निसम्म ते संजत्ता-नावावाणियए एवं वयासी–गच्छह णं तुब्भे देवानुप्पिया! मम कोडुंबियपुरिसेहिं सद्धिं कालियदीवाओ ते आसे आणेह। तए णं ते संजत्ता-नावावाणियगा एवं सामि! त्ति आणाए विनएणं वयणं पडिसुणेंति। तए णं से कनगकेऊ कोडुंबियपुरिसे सद्दावेइ, सद्दावेत्ता एवं वयासी–गच्छह णं तुब्भे देवानुप्पिया! संजत्ता-नावा-वाणियएहिं सद्धिं कालियदीवाओ मम आसे आणेह। तेवि पडिसुणेंति। तए णं ते कोडुंबियपुरिसा सगडी-सागडं सज्जेंति, सज्जेत्ता तत्थ णं बहूणं वीणाण य वल्लकीण य भामरीण य कच्छभीण य भंभाण य छब्भामरीण य चित्तवीणाण य अन्नेसिं च बहूणं सोइंदिय-पाउग्गाणं दव्वाणं सगडी-सागडं भरेंति। बहूणं किण्हाण य नीलाण य लोहियाण य हालिद्दाण य सुक्किलाण य कट्ठकम्माण य चित्तकम्माण य पोत्थकम्माण य लेप्पकम्माण य गंथिमाण य वेढिमाण य पूरिमाण य संधाइमाण य अन्नेसिं च बहूणं चक्खिंदिय-पाउग्गाणं दव्वाणं सगडी-सागडं भरेंति। बहूणं कोट्ठपुडाण य पत्तपुडाण य चोयपुडाण य तगरपुडाण य एलापुडाण य हिरिवेरपुडाण य उसीरपुडाण य चंपगपुडाण य मरुयगपुडाण य दमगपुडाण य जातिपुडाण य जुहियापुडाण य मल्लियापुडाण य वासंतियापुडाण य केयइपुडाण य कप्पूरपुडाण य पाडलपुडाण य अन्नेसिं च बहूणं घाणिंदिय-पाउग्गाणं दव्वाणं सगडी-सागडं भरेंति। बहुस्स खंडस्स य गुलस्स य सक्कराए य मच्छं डियाए य पुप्फुत्तर-पउमुत्तराए च जिब्भिंदिय-पाउग्गाणं दव्वाणं सगडी-सागडं भरेंति। बहूणं कोयवाण य कंबलाण य पावाराण य नवतयाण य मलयाण य मसूराण य सिलावट्टाण य जाव हंसगब्भाण य अन्नेसिं च फासिंदिय-पाउग्गाणं दव्वाणं सगडी-सागडं भरेंति, भरेत्ता सगडी-सागडं जोयंति, जोइत्ता जेणेव गंभीरए पोयट्ठाणे तेणेव उवागच्छंति, सगडी-सागडं मोएंति, मोएत्ता पोयवहणं सज्जेंति, सज्जेत्ता तेसिं उक्किट्ठाणं सद्द-फरिस-रस-रूव-गंधाणं कट्ठस्स य तणस्स य पाणियस्स य तंदुलाण य समियस्स य गोरसस्स य जाव अन्नेसिं च बहूणं पोयवहणपाउग्गाणं पोयवहणं भरेंति, भरेत्ता दक्खिणाणुकूलेणं वाएणं जेणेव कालियदीवे तेणेव उवागच्छंति, उवागच्छित्ता पोयवहणं लंबेंति, लंबेत्ता ताइं उक्किट्ठाइं सद्द-फरिस-रस-रूव-गंधाइं, एगट्ठियाहिं कालियदीवं उत्तरेंति। जहिं-जहिं च णं ते आसा आसयंति वा सयंति वा चिट्ठंति वा तुयट्टंति वा तहिं-तहिं च णं ते कोडुंबियपुरिसा ताओ वीणाओ य जाव चित्तवीणाओ य अण्णाणि य बहूणि सोइंदिय पाउग्गाणि य दव्वाणि समुदीरेमाणा-समुदीरेमाणा ठवेंति, तेसिं च परिपेरंतेणं पासए ठवेंति, ठवेत्ता निच्चला निप्फंदा तुसिणीया चिट्ठंति। जत्थ-जत्थ ते आसा आसयंति वा सयंति वा चिट्ठंति वा तुयट्टंति वा तत्थ-तत्थ णं ते कोडुंबियपुरिसा बहूणि किण्हाणि य नीलाणि य लोहियाणि य हालिद्दाणि य सुक्किलाणि य कट्ठकम्माणि य जाव संधाइमाणि य अण्णाणि य बहूणि चक्खिंदिय-पाउग्गाणि य दव्वाणि ठवेंति, तेसिं परिपेरंतेणं पासए ठवेंति, ठवेत्ता निच्चला निप्फंदा तुसिणीया चिट्ठंति। जत्थ-जत्थ ते आसा आसयंति वा सयंति वा चिट्ठंति वा तुयट्टंति वा तत्थ-तत्थ णं ते कोडुंबियपुरिसा तेसिं बहूणं कोट्ठपुडाण य जाव पाडलपुडाण य अन्नेसिं च बहूणं घाणिंदिय-पाउग्गाणं दव्वाणं पुंजे य नियरे य करेंति, करेत्ता तेसिं परिपेरंतेणं पासए ठवेंति, ठवेत्ता निच्चला निप्फंदा तुसिणीया चिट्ठंति। जत्थ-जत्थ ते आसा आसयंति वा सयंति वा चिट्ठंति वा तुयट्टंति वा तत्थ-तत्थ णं ते कोडुंबियपुरिसा गुलस्स जाव पुप्फुत्तर-पउमुत्तराए अन्नेसिं च बहूणं जिब्भिंदिय-पाउग्गाणं दव्वाणं पुंजे य नियरे य करेंति, करेत्ता वियरए खणंति, खणित्ता गुलपाणगस्स खंडपाणगस्स बोरपाणगस्स अन्नेसिं च बहूणं पाणगाणं वियरए भरेंति, भरेत्ता तेसिं परिपेरंतेणं पासए ठवेंति, ठवेत्ता निच्चला निप्फंदा तुसिणीया चिट्ठंति। जहिं-जहिं च णं ते आसा आसयंति वा सयंति वा चिट्ठंति वा तुयट्टंति वा तहिं-तहिं च णं ते कोडुंबियपुरिसा बहवे कोयवया जाव सिलावट्टया अण्णाणि य फासिंदिय-पाउग्गाइं अत्थुय-पच्चत्थुयाइं ठवेंति, ठवेत्ता तेसिं परिपेरंतेणं पासए ठवेंति, ठवेत्ता निच्चला निप्फंदा तुसिणीया चिट्ठंति। तए णं ते आसा जेणेव ते उक्किट्ठा सद्द-फरिस-रस-रूव-गंधा तेणेव उवागच्छंति। तत्थ णं अत्थेगइया आसा अपुव्वा णं इमे सद्द-फरिस-रस-रूव-गंधत्ति कट्टु तेसु उक्किट्ठेसु सद्द-फरिस-रस-रूव-गंधेसु अमुच्छिया अगढिया अगिद्धा अणज्झोववण्णा तेसिं उक्किट्ठाणं सद्द-फरिस-रस-रूव-गंधाणं दूरंदूरेणं अवक्कमंति। ते णं तत्थ पउर-गोयरा पउर-तणपाणिया निब्भया निरुव्विग्गा सुहंसुहेणं विहरंति। एवामेव समणाउसो! जो अम्हं निग्गंथो वा निग्गंथी वा आयरिय-उवज्झायाणं अंतिए मुंडे भवित्ता अगाराओ अण गारियं पव्वइए समाणे सद्द-फरिस-रस-रूव-गंधेसु नो सज्जइ नो रज्जइ नो गिज्झइ नो मुज्झइ नो अज्झोववज्झइ, से णं इहलोए चेव बहूणं समणाणं बहूणं समणीणं बहूणं सावयाणं बहूणं सावियाण य अच्चणिज्जे जाव चाउरंतं संसारकंतारं वीईवइस्सइ।
Sutra Meaning : જુઓ સૂત્ર ૧૮૪
Mool Sutra Transliteration : [sutra] te samjatta-navavaniyage evam vayasi–tubbhe nam devanuppiya! Gamagara-nagara-kheda-kabbada-donamuha-madamba-pattana-asama-nigama-sambaha-sannivesaim0 ahimdaha, lavanasamuddam cha abhikkhanam-abhikkhanam poyavahanenam ogaheha. Tam atthiyaim cha kei bhe kahimchi achchherae ditthapuvve? Tae nam te samjatta-navavaniyaga kanagakeu evam vayasi–evam khalu amhe devanuppiya! Iheva hatthisise nayare parivasamo tam cheva java kaliyadivamtenam samchhudha. Tattha nam bahave hirannagare ya suvannagare ya rayanagare ya vairagare ya, bahave tattha ase pasamo. Kim te? Harirenu java amham gamdham aghayamti, aghaitta bhiya tattha uvvigga uvviggamana tao anegaim joyanaim ubbhamamti. Tae nam sami! Amhehim kaliyadive te asa achchherae ditthapuvve. Tae nam se kanagakeu tesim samjatta-navavaniyaganam amtie eyamattham sochcha nisamma te samjatta-navavaniyae evam vayasi–gachchhaha nam tubbhe devanuppiya! Mama kodumbiyapurisehim saddhim kaliyadivao te ase aneha. Tae nam te samjatta-navavaniyaga evam sami! Tti anae vinaenam vayanam padisunemti. Tae nam se kanagakeu kodumbiyapurise saddavei, saddavetta evam vayasi–gachchhaha nam tubbhe devanuppiya! Samjatta-nava-vaniyaehim saddhim kaliyadivao mama ase aneha. Tevi padisunemti. Tae nam te kodumbiyapurisa sagadi-sagadam sajjemti, sajjetta tattha nam bahunam vinana ya vallakina ya bhamarina ya kachchhabhina ya bhambhana ya chhabbhamarina ya chittavinana ya annesim cha bahunam soimdiya-paugganam davvanam sagadi-sagadam bharemti. Bahunam kinhana ya nilana ya lohiyana ya haliddana ya sukkilana ya katthakammana ya chittakammana ya potthakammana ya leppakammana ya gamthimana ya vedhimana ya purimana ya samdhaimana ya annesim cha bahunam chakkhimdiya-paugganam davvanam sagadi-sagadam bharemti. Bahunam kotthapudana ya pattapudana ya choyapudana ya tagarapudana ya elapudana ya hiriverapudana ya usirapudana ya champagapudana ya maruyagapudana ya damagapudana ya jatipudana ya juhiyapudana ya malliyapudana ya vasamtiyapudana ya keyaipudana ya kappurapudana ya padalapudana ya annesim cha bahunam ghanimdiya-paugganam davvanam sagadi-sagadam bharemti. Bahussa khamdassa ya gulassa ya sakkarae ya machchham diyae ya pupphuttara-paumuttarae cha jibbhimdiya-paugganam davvanam sagadi-sagadam bharemti. Bahunam koyavana ya kambalana ya pavarana ya navatayana ya malayana ya masurana ya silavattana ya java hamsagabbhana ya annesim cha phasimdiya-paugganam davvanam sagadi-sagadam bharemti, bharetta sagadi-sagadam joyamti, joitta jeneva gambhirae poyatthane teneva uvagachchhamti, sagadi-sagadam moemti, moetta poyavahanam sajjemti, sajjetta tesim ukkitthanam sadda-pharisa-rasa-ruva-gamdhanam katthassa ya tanassa ya paniyassa ya tamdulana ya samiyassa ya gorasassa ya java annesim cha bahunam poyavahanapaugganam poyavahanam bharemti, bharetta dakkhinanukulenam vaenam jeneva kaliyadive teneva uvagachchhamti, uvagachchhitta poyavahanam lambemti, lambetta taim ukkitthaim sadda-pharisa-rasa-ruva-gamdhaim, egatthiyahim kaliyadivam uttaremti. Jahim-jahim cha nam te asa asayamti va sayamti va chitthamti va tuyattamti va tahim-tahim cha nam te kodumbiyapurisa tao vinao ya java chittavinao ya annani ya bahuni soimdiya pauggani ya davvani samudiremana-samudiremana thavemti, tesim cha pariperamtenam pasae thavemti, thavetta nichchala nipphamda tusiniya chitthamti. Jattha-jattha te asa asayamti va sayamti va chitthamti va tuyattamti va tattha-tattha nam te kodumbiyapurisa bahuni kinhani ya nilani ya lohiyani ya haliddani ya sukkilani ya katthakammani ya java samdhaimani ya annani ya bahuni chakkhimdiya-pauggani ya davvani thavemti, tesim pariperamtenam pasae thavemti, thavetta nichchala nipphamda tusiniya chitthamti. Jattha-jattha te asa asayamti va sayamti va chitthamti va tuyattamti va tattha-tattha nam te kodumbiyapurisa tesim bahunam kotthapudana ya java padalapudana ya annesim cha bahunam ghanimdiya-paugganam davvanam pumje ya niyare ya karemti, karetta tesim pariperamtenam pasae thavemti, thavetta nichchala nipphamda tusiniya chitthamti. Jattha-jattha te asa asayamti va sayamti va chitthamti va tuyattamti va tattha-tattha nam te kodumbiyapurisa gulassa java pupphuttara-paumuttarae annesim cha bahunam jibbhimdiya-paugganam davvanam pumje ya niyare ya karemti, karetta viyarae khanamti, khanitta gulapanagassa khamdapanagassa borapanagassa annesim cha bahunam panaganam viyarae bharemti, bharetta tesim pariperamtenam pasae thavemti, thavetta nichchala nipphamda tusiniya chitthamti. Jahim-jahim cha nam te asa asayamti va sayamti va chitthamti va tuyattamti va tahim-tahim cha nam te kodumbiyapurisa bahave koyavaya java silavattaya annani ya phasimdiya-pauggaim atthuya-pachchatthuyaim thavemti, thavetta tesim pariperamtenam pasae thavemti, thavetta nichchala nipphamda tusiniya chitthamti. Tae nam te asa jeneva te ukkittha sadda-pharisa-rasa-ruva-gamdha teneva uvagachchhamti. Tattha nam atthegaiya asa apuvva nam ime sadda-pharisa-rasa-ruva-gamdhatti kattu tesu ukkitthesu sadda-pharisa-rasa-ruva-gamdhesu amuchchhiya agadhiya agiddha anajjhovavanna tesim ukkitthanam sadda-pharisa-rasa-ruva-gamdhanam duramdurenam avakkamamti. Te nam tattha paura-goyara paura-tanapaniya nibbhaya niruvvigga suhamsuhenam viharamti. Evameva samanauso! Jo amham niggamtho va niggamthi va ayariya-uvajjhayanam amtie mumde bhavitta agarao ana gariyam pavvaie samane sadda-pharisa-rasa-ruva-gamdhesu no sajjai no rajjai no gijjhai no mujjhai no ajjhovavajjhai, se nam ihaloe cheva bahunam samananam bahunam samaninam bahunam savayanam bahunam saviyana ya achchanijje java chauramtam samsarakamtaram viivaissai.
Sutra Meaning Transliteration : Juo sutra 184