Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104882
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-१६ अवरकंका

 Translated Chapter :

શ્રુતસ્કંધ-૧

અધ્યયન-૧૬ અવરકંકા
Section : Translated Section :
Sutra Number : 182 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं ते थेरा भगवंतो अन्नया कयाइ पंडुमहुराओ नयरीओ सहस्संबवणाओ उज्जाणाओ पडिनिक्खमंति, पडिनिक्खमित्ता बहिया जनवयविहारं विहरंति। तेणं कालेणं तेणं समएणं अरहा अरिट्ठनेमी जेणेव सुरट्ठाजनवए तेणेव उवागच्छइ, उवागच्छित्ता सुरट्ठाजनवयंसि संजमेणं तवसा अप्पाणं भावेमाणे विहरइ। तए णं बहुजनो अन्नमन्नस्स एवमाइक्खइ, भासइ पन्नवेइ परूवेइ–एवं खलु देवानुप्पिया! अरहा अरिट्ठनेमी सुरट्ठाजनवए संजमेणं तवसा अप्पाणं भावेमाणे विहरइ। तए णं ते जुहिट्ठिलपामोक्खा पंच अनगारा बहुजनस्स अंतिए एयमट्ठं सोच्चा अन्नमन्नं सद्दावेंति, सद्दावेत्ता एवं वयासी–एवं खलु देवानुप्पिया! अरहा अरिट्ठनेमी पुव्वाणुपुव्विं चरमाणे गामाणुगामं दूइज्जमाणे सुहंसुहेणं विहरमाणे सुरट्ठाजनवए संजमेणं तवसा अप्पाणं भावेमाणे विहरइ। तं सेयं खलु अम्हं थेरे भगवंते आपुच्छित्ता अरहं अरिट्ठनेमिं वंदणाए गमित्तए, अन्नमन्नस्स एयमट्ठं पडिसुणेंति, पडिसुणेत्ता जेणेव थेरा भगवंतो तेणेव उवागच्छंति, उवागच्छित्ता थेरे भगवंते वंदंति नमंसंति, वंदित्ता नमंसित्ता एवं वयासी–इच्छामो णं तुब्भेहिं अब्भणुण्णाया समाणा अरहं अरिट्ठनेमिं वंदणाए गमित्तए। अहासुहं देवानुप्पिया! तए णं ते जुहिट्ठिलपामोक्खा पंच अनगारा थेरेहिं अब्भणुण्णाया समाणा थेरे भगवंते वंदंति नमंसंति, वंदित्ता नमंसित्ता थेराणं अंतियाओ पडिनिक्खमंति, पडिनिक्खमित्ता मासंमासेणं अनिक्खित्तेणं तवोकम्मेणं गामाणुगामं दूइज्जमाणा सुहंसुहेणं विहरमाणा जेणेव हत्थकप्पे नयरे तेणेव उवागच्छंति, उवागच्छित्ता हत्थकप्पस्स बहिया सहस्संबवणे उज्जाणे संजमेणं तवसा अप्पाणं भावेमाणा विहरंति। तए णं ते जुहिट्ठिलवज्जा चत्तारि अनगारा मासक्खमणपारणए पढमाए पोरिसीए सज्झायं करेंति, बीयाए ज्झाणं ज्झायंति एवं जहा गोयमसामी, नवरं–जुहिट्ठिलं आपुच्छंति जाव अडमाणा बहुजनसद्दं निसामेंति–एवं खलु देवानुप्पिया! अरहा अरिट्ठनेमी उज्जंतसेलसिहरे मासिएणं भत्तेणं अपाणएणं पंचहिं छत्तीसेहिं अनगारसएहिं सद्धिं कालगए सिद्धे बुद्धे मुत्ते अंतगडे परिनिव्वुडे सव्वदुक्खप्पहीणे। तए णं ते जुहिट्ठिलवज्जा चत्तारि अनगारा बहुजनस्स अंतिए एयमट्ठं सोच्चा निसम्म हत्थकप्पाओ नयराओ पडिनिक्खमंति, पडिनिक्खमित्ता जेणेव सहस्संबवने उज्जाणे जेणेव जुहिट्ठिले अनगारे तेणेव उवागच्छंति, उवागच्छित्ता भत्तपानं पच्चु वेक्खंति, पच्चुवेक्खित्ता गमनागमनस्स पडिक्कमंति, पडिक्कमित्ता एसणमणेसणं आलोएंति, आलोएत्ता भत्तपानं पडि-दंसेंति, पडिदंसेत्ता एवं वयासी–एवं खलु देवानुप्पिया! अरहा अरिट्ठनेमी उज्जंतसेलसिहरे मासिएणं भत्तेणं अपाणएणं पंचहिं छत्तीसेहिं अनगारसएहिं सद्धिं कालगए। तं सेयं खलु अम्हं देवानुप्पिया! इमं पुव्वगहियं भत्तपानं परिट्ठवेत्ता सेत्तुज्जं पव्वयं सणियं-सणियं दुरुहित्तए, संलेहणा-ज्झूसणा-ज्झोसियाणं कालं अनवेक्खमाणाणं विहरित्तए त्ति कट्टु अन्नमन्नस्स एयमट्ठं पडिसुणेंति, पडिसुणेत्ता तं पुव्वगहियं भत्तपानं एगंते परिट्ठवेंति, परिट्ठवेत्ता जेणेव सेत्तुज्जे पव्वए तेणेव उवागच्छंति, उवागच्छित्ता सेत्तुज्जं पव्वयं सणियं-सणियं दुरुहंति, दुरुहित्ता संलेहणा-ज्झूसणा-ज्झोसिया कालं अणवकंखमाणा विहरंति। तए णं ते जुहिट्ठिलपामोक्खा पंच अनगारा सामाइयमाइयाइं चोद्दसपुव्वाइं अहिज्जित्ता, बहूणि वासाणि सामण्ण परियागं पाउणित्ता, दोमासियाए संलेहणाए अत्ताणं ज्झोसेत्ता जस्सट्ठाए कीरइ नग्गभावे जाव तमट्ठमाराहेंति, आराहेत्ता अनंत केवलवरनाणदंसणं समुप्पाडेत्ता तओ पच्छा सिद्धा बुद्धा मुत्ता अंतगडा परिनिव्वुडा सव्वदुक्खप्पहीणा।
Sutra Meaning : જુઓ સૂત્ર ૧૭૭
Mool Sutra Transliteration : [sutra] tae nam te thera bhagavamto annaya kayai pamdumahurao nayario sahassambavanao ujjanao padinikkhamamti, padinikkhamitta bahiya janavayaviharam viharamti. Tenam kalenam tenam samaenam araha aritthanemi jeneva suratthajanavae teneva uvagachchhai, uvagachchhitta suratthajanavayamsi samjamenam tavasa appanam bhavemane viharai. Tae nam bahujano annamannassa evamaikkhai, bhasai pannavei paruvei–evam khalu devanuppiya! Araha aritthanemi suratthajanavae samjamenam tavasa appanam bhavemane viharai. Tae nam te juhitthilapamokkha pamcha anagara bahujanassa amtie eyamattham sochcha annamannam saddavemti, saddavetta evam vayasi–evam khalu devanuppiya! Araha aritthanemi puvvanupuvvim charamane gamanugamam duijjamane suhamsuhenam viharamane suratthajanavae samjamenam tavasa appanam bhavemane viharai. Tam seyam khalu amham there bhagavamte apuchchhitta araham aritthanemim vamdanae gamittae, annamannassa eyamattham padisunemti, padisunetta jeneva thera bhagavamto teneva uvagachchhamti, uvagachchhitta there bhagavamte vamdamti namamsamti, vamditta namamsitta evam vayasi–ichchhamo nam tubbhehim abbhanunnaya samana araham aritthanemim vamdanae gamittae. Ahasuham devanuppiya! Tae nam te juhitthilapamokkha pamcha anagara therehim abbhanunnaya samana there bhagavamte vamdamti namamsamti, vamditta namamsitta theranam amtiyao padinikkhamamti, padinikkhamitta masammasenam anikkhittenam tavokammenam gamanugamam duijjamana suhamsuhenam viharamana jeneva hatthakappe nayare teneva uvagachchhamti, uvagachchhitta hatthakappassa bahiya sahassambavane ujjane samjamenam tavasa appanam bhavemana viharamti. Tae nam te juhitthilavajja chattari anagara masakkhamanaparanae padhamae porisie sajjhayam karemti, biyae jjhanam jjhayamti evam jaha goyamasami, navaram–juhitthilam apuchchhamti java adamana bahujanasaddam nisamemti–evam khalu devanuppiya! Araha aritthanemi ujjamtaselasihare masienam bhattenam apanaenam pamchahim chhattisehim anagarasaehim saddhim kalagae siddhe buddhe mutte amtagade parinivvude savvadukkhappahine. Tae nam te juhitthilavajja chattari anagara bahujanassa amtie eyamattham sochcha nisamma hatthakappao nayarao padinikkhamamti, padinikkhamitta jeneva sahassambavane ujjane jeneva juhitthile anagare teneva uvagachchhamti, uvagachchhitta bhattapanam pachchu vekkhamti, pachchuvekkhitta gamanagamanassa padikkamamti, padikkamitta esanamanesanam aloemti, aloetta bhattapanam padi-damsemti, padidamsetta evam vayasi–evam khalu devanuppiya! Araha aritthanemi ujjamtaselasihare masienam bhattenam apanaenam pamchahim chhattisehim anagarasaehim saddhim kalagae. Tam seyam khalu amham devanuppiya! Imam puvvagahiyam bhattapanam paritthavetta settujjam pavvayam saniyam-saniyam duruhittae, samlehana-jjhusana-jjhosiyanam kalam anavekkhamananam viharittae tti kattu annamannassa eyamattham padisunemti, padisunetta tam puvvagahiyam bhattapanam egamte paritthavemti, paritthavetta jeneva settujje pavvae teneva uvagachchhamti, uvagachchhitta settujjam pavvayam saniyam-saniyam duruhamti, duruhitta samlehana-jjhusana-jjhosiya kalam anavakamkhamana viharamti. Tae nam te juhitthilapamokkha pamcha anagara samaiyamaiyaim choddasapuvvaim ahijjitta, bahuni vasani samanna pariyagam paunitta, domasiyae samlehanae attanam jjhosetta jassatthae kirai naggabhave java tamatthamarahemti, arahetta anamta kevalavarananadamsanam samuppadetta tao pachchha siddha buddha mutta amtagada parinivvuda savvadukkhappahina.
Sutra Meaning Transliteration : Juo sutra 177