Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104870
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-१६ अवरकंका

 Translated Chapter :

શ્રુતસ્કંધ-૧

અધ્યયન-૧૬ અવરકંકા
Section : Translated Section :
Sutra Number : 170 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से दुवए राया दोच्चं पि दूयं सद्दावेइ, सद्दावेत्ता एवं वयासी–गच्छह णं तुमं देवानुप्पिया! हत्थिणाउरं नयरं। तत्थ णं तुमं पंडुरायं सपुत्तयं–जुहिट्ठिलं भीमसेणं अज्जुणं नउलं सहदेवं, दुज्जोहणं भाइसय-समग्गं, गंगेयं विदुरं दोणं जय-द्दहं सउणिं कीवं आसत्थामं करयल परिग्गहियं दसनहं सिरसावत्तं मत्थए अंजलिं कट्टु जएणं विजएणं वद्धावेहि, वद्धावेत्ता एवं वयाहि– एवं खलु देवानुप्पिया! कंपिल्लपुरे नयरे दुवयस्स रन्नो धूयाए, चुलणीए अत्तयाए धट्ठज्जुण-कुमारस्स भइणीए, दोवईए रायवरकन्नाए सयंवरे भविस्सइ। तं णं तुब्भे दुवयं रायं अनुगिण्हेमाणा अकालपरिहीणं चेव कंपिल्लपुरे नयरे समोसरह। तए णं से दूए जेणेव हत्थिणाउरे नयरे जेणेव पंडुराया तेणेव उवागच्छइ, उवागच्छित्ता पंडुरायं सपुत्तयं–जुहिट्ठिलं भीमसेनं अज्जुणं नउलं सहदेवं, दुज्जोहणं भाइसय-समग्गं, गंगेयं विदुरं दोणं जयद्दहं सउणिं कीवं आसत्थामं एवं वयइ–एवं खलु देवानुप्पिया! कंपिल्लपुरे नयरे दुवयस्स रन्नो धूयाए, चुलणीए अत्तयाए, धट्ठज्जुणकुमारस्स भइणीए दोवईए रायवरकन्नाए सयंवरे अत्थि। तं णं तुब्भे दुवयं रायं अनुगिण्हेमाणा अकालपरिहीणं चेव कंपिल्लपुरे नयरे समोसरह। तए णं से पंडुराया जहा वासुदेवे नवरं–भेरी नत्थि जाव जेणेव कंपिल्लपुरे नयरे तेणेव पहारेत्थ गमणाए। एएणेव कमेणं– तच्चं दूयं एवं वयासी–गच्छह णं तुमं देवानुप्पिया! चंपं नयरिं। तत्थ णं तुमं कण्णं अंगरायं, सल्लं नंदिरायं एवं वयाहि–कंपिल्लपुरे नयरे समोसरह। चउत्थं दूयं एवं वयासी–गच्छह णं तुमं देवानुप्पिया! सोत्तिमइं नयरिं। तत्थ णं तुमं सिसुपालं दमघोससुयं पंचभाइसय-संपरिवुडं एवं वयाहि–कंपिल्लपुरे नयरे समोसरह। पंचमं दूयं एवं वयासी–गच्छह णं तुमं देवानुप्पिया! हत्थिसीसं नयरिं। तत्थ णं तुमं दमदंतं रायं एवं वयाहि–कंपिल्लपुरे नगरे समोसरह। छट्ठं दूयं एवं वयासी–गच्छह णं तुमं देवानुप्पिया! महुरं नयरिं। तत्थ णं तुमं घरं रायं एवं वयाहि–कंपिल्लपुरे नयरे समोसरह। सत्तमं दूयं एवं वयासी–गच्छह णं तुमं देवानुप्पिया! रायगिहं नयरिं। तत्थ णं तुमं सहदेवं जरासंधसुयं एवं वयाहि–कंपिल्ल-पुरे नयरे समोसरह। अट्ठमं दूयं एवं वयासी–गच्छह णं तुमं देवानुप्पिया! कोडिण्णं नयरं। तत्थ णं तुमं रुप्पिं भेसगसुयं एवं वयाहि–कंपिल्लपुरे नयरे समोसरह। नवमं दूयं एवं वयासी–गच्छह णं तुमं देवानुप्पिया! विराटं नयरं। तत्थ णं कीयगं भाउसय-समग्गं एवं वयाहि–कंपिल्लपुरे नयरे समोसरह। दसमं दूयं एवं वयासी–गच्छह णं तुमं देवानुप्पिया! अवसेसेसु गामागर-नगरेसु। तत्थ णं तुमं अनेगाइं रायसहस्साइं एवं वयाहि–कंपिल्लपुरे नयरे समोसरह। तए णं ते बहवे रायसहस्सा पत्तेयं-पत्तेयं ण्हाया सन्नद्ध-बद्ध-वम्मिय-कवया हत्थि-खंधवरगया हय-गय-रह-पवर-जोहकलियाए चाउरंगिणीए सेनाए सद्धिं संपरिवुडा महयाभड-चडगर-रह-पहकर-विंदपरिक्खित्ता सएहिं-सएहिं नगरेहिंतो अभि-निग्गच्छंति, अभिनिग्गच्छित्ता जेणेव पंचाले जनवए तेणेव पहारेत्थ गमणाए। तए णं से दुवए राया कोडुंबियपुरिसे सद्दावेइ, सद्दावेत्ता एवं वयासी–गच्छह णं तुमं देवानुप्पिया! कंपिल्लपुरे नयरे बहिया गंगाए महानईए अदूरसामंते एगं महं सयंवरमंडवं करेह–अनेगखंभ-सयसन्निविट्ठं लीलट्ठिय-सालिभंजियागं जाव पासा ईयं दरिसणिज्जं अभिरूवं पडिरूवं–करेत्ता एयमाणत्तियं पच्चप्पिणह। ते वि तहेव पच्चप्पिणंति। तए णं से दुवए राया दोच्चंपि कोडुंबियपुरिसे सद्दावेइ, सद्दावेत्ता एवं वयासी–खिप्पामेव भो देवानुप्पिया! वासुदेवपामोक्खाणं बहूणं रायसहस्साणं आवासे करेह, करेत्ता एयमाणत्तियं पच्चप्पिणह। ते वि तहेव पच्चप्पिणंति। तए णं से दुवए राया वासुदेवपामोक्खाणं बहूणं रायसहस्साणं आगमणं जाणेत्ता पत्तेयं-पत्तेयं हत्थिखंधवरगए सकोरेंटमल्लदामेणं छत्तेणं धरिज्जमाणेणं सेयवरचामराहिं वीइज्जमाणे हय-गय-रह-पवरजोहकलियाए चाउरंगिणीए सेनाए सद्धिं संपरिवुडे महयाभड-चडगर-रह-पहकर-विंदपरिक्खित्ते अग्घं च पज्जं च गहाय सव्विड्ढीए कंपिल्लपुराओ निग्गच्छइ, निग्गच्छित्ता जेणेव ते वासुदेवपामोक्खा बहवे रायसहस्सा तेणेव उवागच्छइ, उवागच्छित्ता ताइं वासुदेवपामोक्खाइं अग्घेण य पज्जेण य सक्का-रेइ सम्मानेइ, सक्कारेत्ता सम्मानेत्ता तेसिं वासुदेवपामोक्खाणं पत्तेयं-पत्तेयं आवासे वियरइ। तए णं ते वासुदेवपामोक्खा जेणेव सया-सया आवासा तेणेव उवागच्छंति, उवागच्छित्ता हत्थिखंधेहिंतो पच्चोरु-हंति, पच्चोरुहित्ता पत्तेयं-पत्तेयं खंधावारनिवेसं करेंति, करेत्ता सएसु-सएसु आवासेसु अनुप्पविसंति, अनुप्पविसित्ता सएसु-सएसु आवासेसु आसणेसु य सयणेसु य सन्निसण्णा य संतुयट्टा य बहूहिं गंधव्वेहिं य नाडएहि य उवगिज्जमाणा य उवनच्चिज्जमाणा य विहरंति। तए णं से दुवए राया कंपिल्लपुरं नयरं अनुप्पविसइ, अनुप्पविसित्ता विपुलं असन-पान-खाइम-साइमं उवक्खडावेइ, उवक्खडावेत्ता कोडुंबियपुरिसे सद्दावेइ, सद्दावेत्ता एवं वयासी–गच्छह णं तुब्भे देवानुप्पिया! विपुलं असन-पान-खाइम-साइमं सुरं च मज्जं च मंसं च सीधुं च पसन्नं च सुबहुं पुप्फ-वत्थ-गंध-मल्लालंकारं च वासुदेवपामोक्खाणं रायसहस्साणं आवासेसु साहरह। तेवि साहरंति। तए णं ते वासुदेवपामोक्खा तं विपुलं असन-पान-खाइम-साइमं सुरं च मज्जं च मंसं च सीधुं च पसन्नं च आसाएमाणा विसादेमाणा परिभाएमाणा परिभुंजेमाणा विहरंति। जिमियभुत्तुत्तरायगा वि य णं समाणा आयंता चोक्खा परमसुइभूया सुहासणवरगया बहूहिं गंधव्वेहि य नाडएहि य उवगिज्जमाणा य उवनच्चिज्जमाणा य विहरंति। तए णं से दुवए राया पच्चावरण्ह-कालसमयंसि कोडुंबियपुरिसे सद्दावेइ, सद्दावेत्ता एवं वयासी–गच्छह णं तुब्भे देवानुप्पिया! कंपिल्लपुरे सिंघाडग-तिग-चउक्क-चच्चर-चउम्मुह-महापह-पहेसु वासुदेवपामोक्खाणं रायसहस्साणं आवासेसु हत्थि खंधवरगया महया-महया सद्देणं उग्घोसेमाणा एवं वयह–एवं खलु देवानुप्पिया! कल्लं पाउप्पभायाए रयणीए उट्ठियम्मि सूरे सह-स्सरस्सिम्मि दिनयरे तेयसा जलंते दुवयस्स रन्नो धूयाए, चुलणीए देवीए अत्तियाए, धट्ठज्जुणस्स भगिनीए, दोवईए रायवरकन्नाए सयंवरे भविस्सइ। तं तुब्भे णं देवानुप्पिया! दुवयं रायाणं अगुगिण्हेमाणा ण्हाया जाव सव्वालंकारविभूसिया हत्थिखंधवरगया सकोरेंट मल्लदामेणं छत्तेणं धरिज्जमाणेणं सेयवरचामराहिं वीइज्जमाणा हय-गय-रह-पवर जोहकलियाए चाउरंगिणीए सेनाए सद्धिं संपरिवुडा महयाभड-चडगर-रह-पहकर-विंद परिक्खित्ता जेणेव सयंवरामंडवे तेणेव उवागच्छह, उवागच्छित्ता पत्तेयं-पत्तेयं नामं-किएसु आसणेसु निसीयह, निसीइत्ता दोवइं रायवरकण्णं पडिवालेमाणा-पडिवालेमाणा चिट्ठह त्ति घोसणं घोसेह, घोसेत्ता मम एयमाणत्तियं पच्चप्पिणह। तए णं ते कोडुंबियपुरिसा तहेव जाव पच्चप्पिणंति। तए णं से दुवए राया कोडुंबियपुरिसे सद्दावेइ, सद्दावेत्ता एवं वयासी–गच्छह णं तुब्भे देवानुप्पिया! सयंवरमंडवं आसिय-संमज्जिओवलित्तं पंचवण्ण-पुप्फोवयारकलियं कालागरु-पवर-कुंदुरुक्क-तुरुक्क-धूव-डज्झंत-सुरभि-मघमघेंत-गंधुद्धुयाभिरामं सुगंधवरगंधगंधियं गंधवट्टिभूयं मंचाइमंचकलियं करेह कारवेह, करेत्ता कारवेत्ता वासुदेवपामोक्खाणं बहूणं रायसहस्साणं पत्तेयं-पत्तेयं नामंकियाइं आसणाइं अत्थुयपच्चत्थुयाइं रएह, रएत्ता एयमाणत्तियं पच्चप्पिणह। तेवि जाव पच्चप्पिणंति। तए णं ते वासुदेवपामोक्खा बहवे रायसहस्सा कल्लं पाउप्पभायाए रयणीए उट्ठियम्मि सूरे सहस्सरस्सिम्मि दिनयरे तेयसा जलंते ण्हाया जाव सव्वालंकारविभूसिया हत्थिखंधवरगया सकोरेंटमल्लदामेणं छत्तेणं धरिज्जमाणेणं सेयवरचामराहिं वीइज्जमाणा हय-गय-रह-पवरजोह-कलियाए चाउरंगिणीए सेनाए सद्धिं संपरिवुडा महयाभड-चडगर-रह-पहकर-विंदपरिक्खित्ता० सव्विड्ढीए जाव दुंदुहि-निग्घोस-नाइयरवेणं जेणेव सयंवरामंडवे तेणेव उवागच्छंति, उवागच्छित्ता अनुप्पविसंति, अनुप्पविसित्ता पत्तेयं-पत्तेयं नामंकिएसु आसणेसु निसीयंति दोवइं रायवरकण्णं पडिवालेमाणा-पडिवालेमाणा चिट्ठंति। तए णं से दुवए राया कल्लं पाउप्पभायाए रयणीए उट्ठियम्मि सूरे सहस्सरस्सिम्मि दिनयरे तेयसा जलंते ण्हाए जाव सव्वालंकारविभूसिए हत्थिखंधवरगए सकोरेंट मल्लदामेणं छत्तेणं धरिज्जमाणेणं सेयवरचामराहिं वीइज्जमाणे हय-गय-रह-पवरजोहकलियाए चाउरंगिणीए सेनाए सद्धिं संपरिवुडे महयाभड-चडगर-रह-पहकर-विंदपरिक्खित्ते कंपिल्लपुरं नगरं मज्झंम-ज्झेणं निग्गच्छइ, जेणेव सयंवरामंडवे जेणेव वासुदेवपामोक्खा बहवे रायसहस्सा तेणेव उवागच्छइ, उवागच्छित्ता तेसिं वासुदेवपामोक्खाणं करयल-परिग्गहियं दसणहं सिरसावत्तं मत्थए अंजलिं कट्टु जएणं विजएणं वद्धावेइ, वद्धावेत्ता कण्हस्स वासुदेवस्स सेयवरचामरं गहाय उववीयमाणे चिट्ठइ।
Sutra Meaning : જુઓ સૂત્ર ૧૬૮
Mool Sutra Transliteration : [sutra] tae nam se duvae raya dochcham pi duyam saddavei, saddavetta evam vayasi–gachchhaha nam tumam devanuppiya! Hatthinauram nayaram. Tattha nam tumam pamdurayam saputtayam–juhitthilam bhimasenam ajjunam naulam sahadevam, dujjohanam bhaisaya-samaggam, gamgeyam viduram donam jaya-ddaham saunim kivam asatthamam karayala pariggahiyam dasanaham sirasavattam matthae amjalim kattu jaenam vijaenam vaddhavehi, vaddhavetta evam vayahi– Evam khalu devanuppiya! Kampillapure nayare duvayassa ranno dhuyae, chulanie attayae dhatthajjuna-kumarassa bhainie, dovaie rayavarakannae sayamvare bhavissai. Tam nam tubbhe duvayam rayam anuginhemana akalaparihinam cheva kampillapure nayare samosaraha. Tae nam se due jeneva hatthinaure nayare jeneva pamduraya teneva uvagachchhai, uvagachchhitta pamdurayam saputtayam–juhitthilam bhimasenam ajjunam naulam sahadevam, dujjohanam bhaisaya-samaggam, gamgeyam viduram donam jayaddaham saunim kivam asatthamam evam vayai–evam khalu devanuppiya! Kampillapure nayare duvayassa ranno dhuyae, chulanie attayae, dhatthajjunakumarassa bhainie dovaie rayavarakannae sayamvare atthi. Tam nam tubbhe duvayam rayam anuginhemana akalaparihinam cheva kampillapure nayare samosaraha. Tae nam se pamduraya jaha vasudeve navaram–bheri natthi java jeneva kampillapure nayare teneva paharettha gamanae. Eeneva kamenam– Tachcham duyam evam vayasi–gachchhaha nam tumam devanuppiya! Champam nayarim. Tattha nam tumam kannam amgarayam, sallam namdirayam evam vayahi–kampillapure nayare samosaraha. Chauttham duyam evam vayasi–gachchhaha nam tumam devanuppiya! Sottimaim nayarim. Tattha nam tumam sisupalam damaghosasuyam pamchabhaisaya-samparivudam evam vayahi–kampillapure nayare samosaraha. Pamchamam duyam evam vayasi–gachchhaha nam tumam devanuppiya! Hatthisisam nayarim. Tattha nam tumam damadamtam rayam evam vayahi–kampillapure nagare samosaraha. Chhattham duyam evam vayasi–gachchhaha nam tumam devanuppiya! Mahuram nayarim. Tattha nam tumam gharam rayam evam vayahi–kampillapure nayare samosaraha. Sattamam duyam evam vayasi–gachchhaha nam tumam devanuppiya! Rayagiham nayarim. Tattha nam tumam sahadevam jarasamdhasuyam evam vayahi–kampilla-pure nayare samosaraha. Atthamam duyam evam vayasi–gachchhaha nam tumam devanuppiya! Kodinnam nayaram. Tattha nam tumam ruppim bhesagasuyam evam vayahi–kampillapure nayare samosaraha. Navamam duyam evam vayasi–gachchhaha nam tumam devanuppiya! Viratam nayaram. Tattha nam kiyagam bhausaya-samaggam evam vayahi–kampillapure nayare samosaraha. Dasamam duyam evam vayasi–gachchhaha nam tumam devanuppiya! Avasesesu gamagara-nagaresu. Tattha nam tumam anegaim rayasahassaim evam vayahi–kampillapure nayare samosaraha. Tae nam te bahave rayasahassa patteyam-patteyam nhaya sannaddha-baddha-vammiya-kavaya hatthi-khamdhavaragaya haya-gaya-raha-pavara-johakaliyae chauramginie senae saddhim samparivuda mahayabhada-chadagara-raha-pahakara-vimdaparikkhitta saehim-saehim nagarehimto abhi-niggachchhamti, abhiniggachchhitta jeneva pamchale janavae teneva paharettha gamanae. Tae nam se duvae raya kodumbiyapurise saddavei, saddavetta evam vayasi–gachchhaha nam tumam devanuppiya! Kampillapure nayare bahiya gamgae mahanaie adurasamamte egam maham sayamvaramamdavam kareha–anegakhambha-sayasannivittham lilatthiya-salibhamjiyagam java pasa iyam darisanijjam abhiruvam padiruvam–karetta eyamanattiyam pachchappinaha. Te vi taheva pachchappinamti. Tae nam se duvae raya dochchampi kodumbiyapurise saddavei, saddavetta evam vayasi–khippameva bho devanuppiya! Vasudevapamokkhanam bahunam rayasahassanam avase kareha, karetta eyamanattiyam pachchappinaha. Te vi taheva pachchappinamti. Tae nam se duvae raya vasudevapamokkhanam bahunam rayasahassanam agamanam janetta patteyam-patteyam hatthikhamdhavaragae sakoremtamalladamenam chhattenam dharijjamanenam seyavarachamarahim viijjamane haya-gaya-raha-pavarajohakaliyae chauramginie senae saddhim samparivude mahayabhada-chadagara-raha-pahakara-vimdaparikkhitte aggham cha pajjam cha gahaya savviddhie kampillapurao niggachchhai, niggachchhitta jeneva te vasudevapamokkha bahave rayasahassa teneva uvagachchhai, uvagachchhitta taim vasudevapamokkhaim agghena ya pajjena ya sakka-rei sammanei, sakkaretta sammanetta tesim vasudevapamokkhanam patteyam-patteyam avase viyarai. Tae nam te vasudevapamokkha jeneva saya-saya avasa teneva uvagachchhamti, uvagachchhitta hatthikhamdhehimto pachchoru-hamti, pachchoruhitta patteyam-patteyam khamdhavaranivesam karemti, karetta saesu-saesu avasesu anuppavisamti, anuppavisitta saesu-saesu avasesu asanesu ya sayanesu ya sannisanna ya samtuyatta ya bahuhim gamdhavvehim ya nadaehi ya uvagijjamana ya uvanachchijjamana ya viharamti. Tae nam se duvae raya kampillapuram nayaram anuppavisai, anuppavisitta vipulam asana-pana-khaima-saimam uvakkhadavei, uvakkhadavetta kodumbiyapurise saddavei, saddavetta evam vayasi–gachchhaha nam tubbhe devanuppiya! Vipulam asana-pana-khaima-saimam suram cha majjam cha mamsam cha sidhum cha pasannam cha subahum puppha-vattha-gamdha-mallalamkaram cha vasudevapamokkhanam rayasahassanam avasesu saharaha. Tevi saharamti. Tae nam te vasudevapamokkha tam vipulam asana-pana-khaima-saimam suram cha majjam cha mamsam cha sidhum cha pasannam cha asaemana visademana paribhaemana paribhumjemana viharamti. Jimiyabhuttuttarayaga vi ya nam samana ayamta chokkha paramasuibhuya suhasanavaragaya bahuhim gamdhavvehi ya nadaehi ya uvagijjamana ya uvanachchijjamana ya viharamti. Tae nam se duvae raya pachchavaranha-kalasamayamsi kodumbiyapurise saddavei, saddavetta evam vayasi–gachchhaha nam tubbhe devanuppiya! Kampillapure simghadaga-tiga-chaukka-chachchara-chaummuha-mahapaha-pahesu vasudevapamokkhanam rayasahassanam avasesu hatthi khamdhavaragaya mahaya-mahaya saddenam ugghosemana evam vayaha–evam khalu devanuppiya! Kallam pauppabhayae rayanie utthiyammi sure saha-ssarassimmi dinayare teyasa jalamte duvayassa ranno dhuyae, chulanie devie attiyae, dhatthajjunassa bhaginie, dovaie rayavarakannae sayamvare bhavissai. Tam tubbhe nam devanuppiya! Duvayam rayanam aguginhemana nhaya java savvalamkaravibhusiya hatthikhamdhavaragaya sakoremta malladamenam chhattenam dharijjamanenam seyavarachamarahim viijjamana haya-gaya-raha-pavara johakaliyae chauramginie senae saddhim samparivuda mahayabhada-chadagara-raha-pahakara-vimda parikkhitta jeneva sayamvaramamdave teneva uvagachchhaha, uvagachchhitta patteyam-patteyam namam-kiesu asanesu nisiyaha, nisiitta dovaim rayavarakannam padivalemana-padivalemana chitthaha tti ghosanam ghoseha, ghosetta mama eyamanattiyam pachchappinaha. Tae nam te kodumbiyapurisa taheva java pachchappinamti. Tae nam se duvae raya kodumbiyapurise saddavei, saddavetta evam vayasi–gachchhaha nam tubbhe devanuppiya! Sayamvaramamdavam asiya-sammajjiovalittam pamchavanna-pupphovayarakaliyam kalagaru-pavara-kumdurukka-turukka-dhuva-dajjhamta-surabhi-maghamaghemta-gamdhuddhuyabhiramam sugamdhavaragamdhagamdhiyam gamdhavattibhuyam mamchaimamchakaliyam kareha karaveha, karetta karavetta vasudevapamokkhanam bahunam rayasahassanam patteyam-patteyam namamkiyaim asanaim atthuyapachchatthuyaim raeha, raetta eyamanattiyam pachchappinaha. Tevi java pachchappinamti. Tae nam te vasudevapamokkha bahave rayasahassa kallam pauppabhayae rayanie utthiyammi sure sahassarassimmi dinayare teyasa jalamte nhaya java savvalamkaravibhusiya hatthikhamdhavaragaya sakoremtamalladamenam chhattenam dharijjamanenam seyavarachamarahim viijjamana haya-gaya-raha-pavarajoha-kaliyae chauramginie senae saddhim samparivuda mahayabhada-chadagara-raha-pahakara-vimdaparikkhitta0 savviddhie java dumduhi-nigghosa-naiyaravenam jeneva sayamvaramamdave teneva uvagachchhamti, uvagachchhitta anuppavisamti, anuppavisitta patteyam-patteyam namamkiesu asanesu nisiyamti dovaim rayavarakannam padivalemana-padivalemana chitthamti. Tae nam se duvae raya kallam pauppabhayae rayanie utthiyammi sure sahassarassimmi dinayare teyasa jalamte nhae java savvalamkaravibhusie hatthikhamdhavaragae sakoremta malladamenam chhattenam dharijjamanenam seyavarachamarahim viijjamane haya-gaya-raha-pavarajohakaliyae chauramginie senae saddhim samparivude mahayabhada-chadagara-raha-pahakara-vimdaparikkhitte kampillapuram nagaram majjhamma-jjhenam niggachchhai, jeneva sayamvaramamdave jeneva vasudevapamokkha bahave rayasahassa teneva uvagachchhai, uvagachchhitta tesim vasudevapamokkhanam karayala-pariggahiyam dasanaham sirasavattam matthae amjalim kattu jaenam vijaenam vaddhavei, vaddhavetta kanhassa vasudevassa seyavarachamaram gahaya uvaviyamane chitthai.
Sutra Meaning Transliteration : Juo sutra 168