Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104869
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-१६ अवरकंका

 Translated Chapter :

શ્રુતસ્કંધ-૧

અધ્યયન-૧૬ અવરકંકા
Section : Translated Section :
Sutra Number : 169 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से दुवए राया दूयं सद्दावेइ, सद्दावेत्ता एवं वयासी–गच्छह णं तुमं देवानुप्पिया! बारवइं नयरिं। तत्थ णं तुमं कण्हं वासुदेवं समुद्दविजयपामोक्खे दस दसारे, बलदेवपामोक्खे पंच महावीरे, उग्गसेणपामोक्खे सोलस रायसहस्से, पज्जुन्नपामोक्खाओ अद्धट्ठाओ कुमारकोडीओ, संब-पामोक्खाओ सट्ठि दुद्दंतसाहस्सीओ, वीरसेनपामोक्खाओ एक्कवीसं वीरपुरिससाहस्सीओ महासेन पामोक्खाओ छप्पन्नं बलवगसाहस्सीओ, अन्ने य बहवे राईसर-तलवर-माडंबिय-कोडुंबिय-इब्भ-सेट्ठि-सेनावइ-सत्थवाहप-भिइओ करयलपरिग्गहियं दसनहं सिरसावत्तं मत्थए अंजलिं कट्टु जएणं विजएणं वद्धावेहि, वद्धावेत्ता एवं वयाहि– एवं खलु देवानुप्पिया! कंपिल्लपुरे नयरे दुवयस्स रन्नो धूयाए, चूलणीए अत्तयाए, धट्ठज्जुण-कुमारस्स भइणीए, दोवईए रायवरकन्नाए सयंवरे भविस्सइ। तं णं तुब्भे दुवयं रायं अनुगिण्हेमाणा अकालपरिहीणं चेव कंपिल्लपुरे नयरे समोसरह। तए णं से दूए करयल परिग्गहियं दसणहं सिरसावत्तं मत्थए अंजलिं कट्टु दुवयस्स रन्नो एयमट्ठं पडिसुणेइ, पडिसुणेत्ता जेणेव सए गिहे तेणेव उवागच्छइ, उवागच्छित्ता कोडुंबियपुरिसे सद्दावेइ, सद्दावेत्ता एवं वयासी– खिप्पामेव भो देवानुप्पिया! चाउग्घंटं आसरहं जुत्तामेव उवट्ठवेह। ते वि तहेव उवट्ठवेंति। तए णं से दूए ण्हाए जाव अप्पमहग्घाभरणालंकियसरीरे चाउग्घंटं आसरहं दुरुहइ, दुरुहित्ता बहूहिं पुरिसेहिं–सन्नद्ध-बद्ध-वम्मिय-कवएहिं उप्पीलिय-सरासण-पट्टिएहिं पिणद्ध-गेविज्जेहिं आविद्ध-विमल-वरचिंध-पट्टेहिं गहियाउह-पहरणेहिं–सद्धिं संपरिवुडे कंपिल्लपुरं नयरं मज्झंमज्झेणं निग्गच्छइ, पंचालजनवयस्स मज्झंमज्झेणं जेणेव देसप्पंते तेणेव उवागच्छइ, उवागच्छित्ता सुरट्ठाजनवयस्स मज्झंमज्झेणं जेणेव बारवई नयरी तेणेव उवागच्छइ, उवागच्छित्ता बारवइं नयरिं मज्झंमज्झेणं अनुप्पविसइ, अनुप्पविसत्ता जेणेव कण्हस्स वासुदेवस्स बाहिरिया उवट्ठाणसाला तेणेव उवागच्छइ, उवागच्छित्ता चाउग्घंटं आसरहं ठावेइ, ठावेत्ता रहाओ पच्चोरुहइ, पच्चोरुहित्ता मणुस्सवग्गुरापरिक्खित्ते पायचारविहारेणं जेणेव कण्हे वासुदेवे तेणेव उवागच्छइ, उवाग-च्छित्ता कण्हं वासुदेवं, समुद्दविजयपामोक्खे य दस दसारे जाव छप्पन्नं बलवगसाहस्सीओ करयल परिग्गहियं दसनहं सिरसावत्तं मत्थए अंजलिं कट्टु जएणं विजएणं वद्धावेइ, वद्धावेत्ता एवं वयइ– एवं खलु देवानुप्पिया! कंपिल्लपुरे नयरे दुवयस्स रन्नो धयाए, चुलणीए अत्तयाए, धट्ठज्जुणकुमारस्स भइणीए, दोवईए रायवरकन्नाए सयंवरे अत्थि! तं णं तुब्भे दुवयं रायं अनुगिण्हेमाणा अकालपरिहीणं चेव कंपिल्लपुरे नयरे समोसरह। तए णं से कण्हे वासुदेवे तस्स दूयस्स अंतिए एयमट्ठं सोच्चा निसम्म हट्ठतुट्ठ-चित्तमानंदिए पीइमणे परमसोमणस्सिए हरिसवसविसप्पमाण०-हियए तं दूयं सक्कारेइ सम्मानेइ, सक्कारेत्ता सम्मानेत्ता पडिविसज्जेइ। तए णं से कण्हे वासुदेवे कोडुंबियपुरिसे सद्दावेइ, सद्दावेत्ता एवं वयासी–गच्छह णं तुमं देवानुप्पिया! सभाए सुहम्माए सामुदाइयं भेरिं तालेहि। तए णं से कोडुंबियपुरिसे करयल परिग्गहियं दसणहं सिरसावत्तं मत्थए अंजलिं कट्टु कण्हस्स वासुदेवस्स एयमट्ठं पडिसुणेइ, पडिसुणेत्ता जेणेव सभाए सुहम्माए सामुदाइया भेरी तेणेव उवागच्छइ, उवागच्छित्ता सामुदाइयं भेरिं महया-महया सद्देणं तालेइ। तए णं ताए सामुदाइयाए भेरीए तालियाए समाणीए समुद्दविजयपामोक्खा दस दसारा जाव महासेनपामोक्खाओ छप्पन्नं बलवगसाहस्सीओ ण्हाया जाव सव्वालंकारविभूसिया जहाविभव-इड्ढिसक्कारसमुदएणं अप्पेगइया हयगया एवं गयगया रह-सीया-संदमाणीगया अप्पेगइया पायवि-हारचारेणं जेणेव कण्हे वासुदेवे तेणेव उवागच्छंति, उवागच्छित्ता करयल परिग्गहियं दसणहं सिरसावत्तं मत्थए अंजलिं कट्टु कण्हं वासुदेवं जएणं विजएणं बद्धावेंति। तए णं से कण्हे वासुदेवे कोडुंबियपुरिसे सद्दावेइ, सद्दावेत्ता एवं वयासी–खिप्पामेव भो देवानुप्पिया! आभिसेक्कं हत्थिरयणं पडिकप्पेह हय-गय-रह-पवरजोहकलियं चाउरंगिणिं सेनं सण्णाहेह, सण्णाहेत्ता एयमाणत्तियं पच्चप्पिणह। ते वि तहेव पच्चप्पिणंति। तए णं से कण्हे वासुदेवे जेणेव मज्जणघरे तेणेव उवागच्छइ, उवागच्छित्ता समत्तजाला-कुलाभिरामे विचित्तमणि-रयणकुट्टिमतले रमणिज्जे ण्हाणमंडवंसि नानामणि-रयण-भत्ति-चित्तंसि ण्हाणपीढंसि सुहणिसण्णे सुहोदएहिं गंधोदएहिं पुप्फोदएहिं सुद्धोदएहिं पुणो-पुणो कल्लाणग-पवर मज्जणविहीए मज्जिए जाव अंजनगिरिकूडसन्निभं गयवइं नरवई दुरूढे। तए णं से कण्हे वासुदेवे समुद्दविजयपामोक्खेहिं दसहिं दसारेहिं जाव अनंगसेणापामोक्खाहिं अनेगाहिं गणिया-साहस्सीहिं सद्धिं संपरिवुडे सव्विड्ढीए जाव दुंदुहि-निग्घोसनाइयरवेणं बारवइं नयरिं मज्झंमज्झेणं निग्गच्छइ, निग्गच्छित्ता सुरट्ठाण-जनवयस्स मज्झंमज्झेणं जेणेव देसप्पंते तेणेव उवागच्छइ, उवागच्छित्ता पंचालजनवयस्स मज्झंमज्झेणं जेणेव कंपिल्लपुरे नयरे तेणेव पहारेत्थ गमणाए।
Sutra Meaning : જુઓ સૂત્ર ૧૬૮
Mool Sutra Transliteration : [sutra] tae nam se duvae raya duyam saddavei, saddavetta evam vayasi–gachchhaha nam tumam devanuppiya! Baravaim nayarim. Tattha nam tumam kanham vasudevam samuddavijayapamokkhe dasa dasare, baladevapamokkhe pamcha mahavire, uggasenapamokkhe solasa rayasahasse, pajjunnapamokkhao addhatthao kumarakodio, samba-pamokkhao satthi duddamtasahassio, virasenapamokkhao ekkavisam virapurisasahassio mahasena pamokkhao chhappannam balavagasahassio, anne ya bahave raisara-talavara-madambiya-kodumbiya-ibbha-setthi-senavai-satthavahapa-bhiio karayalapariggahiyam dasanaham sirasavattam matthae amjalim kattu jaenam vijaenam vaddhavehi, vaddhavetta evam vayahi– Evam khalu devanuppiya! Kampillapure nayare duvayassa ranno dhuyae, chulanie attayae, dhatthajjuna-kumarassa bhainie, dovaie rayavarakannae sayamvare bhavissai. Tam nam tubbhe duvayam rayam anuginhemana akalaparihinam cheva kampillapure nayare samosaraha. Tae nam se due karayala pariggahiyam dasanaham sirasavattam matthae amjalim kattu duvayassa ranno eyamattham padisunei, padisunetta jeneva sae gihe teneva uvagachchhai, uvagachchhitta kodumbiyapurise saddavei, saddavetta evam vayasi– khippameva bho devanuppiya! Chaugghamtam asaraham juttameva uvatthaveha. Te vi taheva uvatthavemti. Tae nam se due nhae java appamahagghabharanalamkiyasarire chaugghamtam asaraham duruhai, duruhitta bahuhim purisehim–sannaddha-baddha-vammiya-kavaehim uppiliya-sarasana-pattiehim pinaddha-gevijjehim aviddha-vimala-varachimdha-pattehim gahiyauha-paharanehim–saddhim samparivude kampillapuram nayaram majjhammajjhenam niggachchhai, pamchalajanavayassa majjhammajjhenam jeneva desappamte teneva uvagachchhai, uvagachchhitta suratthajanavayassa majjhammajjhenam jeneva baravai nayari teneva uvagachchhai, uvagachchhitta baravaim nayarim majjhammajjhenam anuppavisai, anuppavisatta jeneva kanhassa vasudevassa bahiriya uvatthanasala teneva uvagachchhai, uvagachchhitta chaugghamtam asaraham thavei, thavetta rahao pachchoruhai, pachchoruhitta manussavagguraparikkhitte payacharaviharenam jeneva kanhe vasudeve teneva uvagachchhai, uvaga-chchhitta kanham vasudevam, samuddavijayapamokkhe ya dasa dasare java chhappannam balavagasahassio karayala pariggahiyam dasanaham sirasavattam matthae amjalim kattu jaenam vijaenam vaddhavei, vaddhavetta evam vayai– Evam khalu devanuppiya! Kampillapure nayare duvayassa ranno dhayae, chulanie attayae, dhatthajjunakumarassa bhainie, dovaie rayavarakannae sayamvare atthi! Tam nam tubbhe duvayam rayam anuginhemana akalaparihinam cheva kampillapure nayare samosaraha. Tae nam se kanhe vasudeve tassa duyassa amtie eyamattham sochcha nisamma hatthatuttha-chittamanamdie piimane paramasomanassie harisavasavisappamana0-hiyae tam duyam sakkarei sammanei, sakkaretta sammanetta padivisajjei. Tae nam se kanhe vasudeve kodumbiyapurise saddavei, saddavetta evam vayasi–gachchhaha nam tumam devanuppiya! Sabhae suhammae samudaiyam bherim talehi. Tae nam se kodumbiyapurise karayala pariggahiyam dasanaham sirasavattam matthae amjalim kattu kanhassa vasudevassa eyamattham padisunei, padisunetta jeneva sabhae suhammae samudaiya bheri teneva uvagachchhai, uvagachchhitta samudaiyam bherim mahaya-mahaya saddenam talei. Tae nam tae samudaiyae bherie taliyae samanie samuddavijayapamokkha dasa dasara java mahasenapamokkhao chhappannam balavagasahassio nhaya java savvalamkaravibhusiya jahavibhava-iddhisakkarasamudaenam appegaiya hayagaya evam gayagaya raha-siya-samdamanigaya appegaiya payavi-haracharenam jeneva kanhe vasudeve teneva uvagachchhamti, uvagachchhitta karayala pariggahiyam dasanaham sirasavattam matthae amjalim kattu kanham vasudevam jaenam vijaenam baddhavemti. Tae nam se kanhe vasudeve kodumbiyapurise saddavei, saddavetta evam vayasi–khippameva bho devanuppiya! Abhisekkam hatthirayanam padikappeha haya-gaya-raha-pavarajohakaliyam chauramginim senam sannaheha, sannahetta eyamanattiyam pachchappinaha. Te vi taheva pachchappinamti. Tae nam se kanhe vasudeve jeneva majjanaghare teneva uvagachchhai, uvagachchhitta samattajala-kulabhirame vichittamani-rayanakuttimatale ramanijje nhanamamdavamsi nanamani-rayana-bhatti-chittamsi nhanapidhamsi suhanisanne suhodaehim gamdhodaehim pupphodaehim suddhodaehim puno-puno kallanaga-pavara majjanavihie majjie java amjanagirikudasannibham gayavaim naravai durudhe. Tae nam se kanhe vasudeve samuddavijayapamokkhehim dasahim dasarehim java anamgasenapamokkhahim anegahim ganiya-sahassihim saddhim samparivude savviddhie java dumduhi-nigghosanaiyaravenam baravaim nayarim majjhammajjhenam niggachchhai, niggachchhitta suratthana-janavayassa majjhammajjhenam jeneva desappamte teneva uvagachchhai, uvagachchhitta pamchalajanavayassa majjhammajjhenam jeneva kampillapure nayare teneva paharettha gamanae.
Sutra Meaning Transliteration : Juo sutra 168