Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104851
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-१४ तेतलीपुत्र

 Translated Chapter :

શ્રુતસ્કંધ-૧

અધ્યયન-૧૪ તેતલીપુત્ર
Section : Translated Section :
Sutra Number : 151 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तेणं कालेणं तेणं समएणं सुव्वयाओ नामं अज्जाओ इरियासमियाओ भासासमियाओ एसणासमियाओ आयाण-भंड-मत्त-णिक्खेवणासमियाओ उच्चार-पासवण-खेल-सिंधाण-जल्ल-पारिट्ठावणियासमियाओ मणसमियाओ वइसमियाओ काय-समियाओ मणगुत्ताओ वइगुत्ताओ कायगुत्ताओ गुत्ताओ गुत्तिंदियाओ गुत्तबंभचारिणीओ बहुस्सुयाओ बहुपरिवाराओ पुव्वाणुपुव्विं चरमाणीओ जेणामेव तेयलिपुरे नयरे तेणेव उवागच्छंति, उवागच्छित्ता अहापडिरूवं ओग्गहं ओगिण्हंति, ओगिण्हित्ता संजमेणं तवसा अप्पाणं भावेमाणीओ विहरंति। तए णं तासिं सुव्वयाणं अज्जाणं एगे संघाडए पढमाए पोरिसीए सज्झायं करेइ, बीयाए पोरिसीए ज्झाणं ज्झियाइ, तइयाए पोरिसीए अतुरियमचवलमसंभंते मुहपोत्तियं पडिलेहेइ, भायणवत्थाणि पडिलेहेइ, भायणाणि पमज्जेइ, भायणाणि ओग्ग-हेइ, जेणेव सुव्वयाओ अज्जाओ तेणेव उवागच्छइ, सुव्वयाओ अज्जाओ वंदइ नमंसइ, वंदित्ता नमंसित्ता एवं वयासी–इच्छामो णं तुब्भेहिं अब्भणुण्णाए तेयलीपुरे नयरे उच्च-नीय-मज्झिमाइं कुलाइं घरसमुदाणस्स भिक्खायरियाए अडित्तए। अहासुहं देवानुप्पिया! मा पडिबंधं करेहि। तए णं ताओ अज्जाओ सुव्वयाहिं अज्जाहिं अब्भणुण्णाया समाणीओ सुव्वयाणं अज्जाणं अंतियाओ पडिस्सयाओ पडिनिक्खमंति, पडिनिक्खमित्ता अतुरियमचवलमसंभंताए गतीए जुगंतर-पलोयणाए दिट्ठीए पुरओ रिय सोहेमाणीओ तेयलीपुरे नयरे उच्च-नीय-मज्झिमाइं कुलाइं घरसमुदाणस्स भिक्खायरियं अडमाणीओ तेयलिस्स गिहं अनुपविट्ठाओ। तए णं सा पोट्टिला ताओ अज्जाओ एज्जमाणीओ पासइ, पासित्ता हट्ठतुट्ठा आसनाओ अब्भुट्ठेइ, वंदइ नमंसइ, वंदित्ता नमंसित्ता विपुलेणं असन-पान-खाइम-साइमेणं पडिलाभेइ, पडिलाभेत्ता एवं वयासी–एवं खलु अहं अज्जाओ! तेयलिपुत्तस्स अमच्चस्स पुव्विं इट्ठा कंता पिया मणुण्णा मणामा आसि, इयाणिं अनिट्ठा अकंता अप्पिया अमणुण्णा अमणामा जाया। नेच्छइ णं तेयलीपुत्ते मम नामगोयमवि सवणयाए, किं पुण दंसणं वा परिभोगं वा? तं तुब्भे णं अज्जाओ बहुनायाओ बहुसिक्खियाओ बहुपढियाओ बहूणि गामागर-णगर-खेड-कब्बड-दोणमुह-मडंब-पट्टण-आसम-निगम-संबाह-सन्निवेसाइं आहिंडइ, बहूणं राईसर-तलवर-माडंबिय-कोडुंबिय-इब्भ-सेट्ठि-सेनावइ-सत्थवाहपभिईणं गिहाइं अनुपविसह। तं अत्थियाइं भे अज्जाओ! केइ कहिंचि चुण्णजोए वा मंतजोगे वा कम्मणजोए वा कम्मजोए वा हियउड्डावणे वा काउड्डावणे वा आभिओगिए वा वसीकरणे वा कोउयकम्मे वा भूइकम्मे वा मूले वा कंदे वा छल्ली वल्ली सिलिया वा गुलिया वा ओसहे वा भेसज्जे वा उवलद्धपुव्वे, जेणाहं तेयलिपुत्तस्स पुनरवि इट्ठा कंता पिया मणुण्णा मणामा भवेज्जामि? तए णं ताओ अज्जाओ पोट्टिलाए एवं वुत्ताओ समाणीओ दोवि कण्णे ठएंति, ठवेत्ता पोट्टिलं एवं वयासी–अम्हे णं देवानुप्पिए! समणीओ निग्गंथीओ जाव गुत्तबंभचारिणीओ। नो खलु कप्पइ अम्हं एयप्पगारं कण्णेहिं वि निसामित्तए, किमंग पुण उवदंसित्तए वा आयरित्तए वा? अम्हे णं तव देवानुप्पिए! विचित्तं केवलिपन्नत्तं धम्मं परिकहिज्जामो। तए णं सा पोट्टिला ताओ अज्जाओ एवं वयासी–इच्छामि णं अज्जाओ! तुब्भं अंतिए केवलिपन्नत्तं धम्मं निसामित्तए। तए णं ताओ अज्जाओ पोट्टिलाए विचित्तं केवलिपन्नत्तं धम्मं परिकहेंति। तए णं सा पोट्टिला धम्मं सोच्चा निसम्म हट्ठा एवं वयासी–सद्दहामि णं अज्जाओ! निग्गंथं पावयणं जाव से जहेयं तुब्भे वयह। इच्छामि णं अहं तुब्भं अंतिए पंचाणुव्वइयं सत्तसिक्खावइयं–दुवालसविहं गिहिधम्मं पडिवज्जित्तए। अहासुहं देवानुप्पिए! तए णं सा पोट्टिला तासिं अज्जाणं अंतिए पंचाणुव्वइयं जाव गिहिधम्मं पडिवज्जइ, ताओ अज्जाओ वंदइ नमंसइ, वंदित्ता नमंसित्ता पडिविसज्जेइ। तए णं सा पोट्टिला समणोवासिया जाया जाव समणे निग्गंथे फासुएणं एसणिज्जेणं असन-पान-खाइम-साइमेणं वत्थ-पडिग्गह-कंबल-पायपुंछणेणं ओसहभेसज्जेणं पाडिहारिएण य पीढ-फलग-सेज्जा-संथारएणं पडिलाभेमाणी विहरइ।
Sutra Meaning : જુઓ સૂત્ર ૧૪૮
Mool Sutra Transliteration : [sutra] tenam kalenam tenam samaenam suvvayao namam ajjao iriyasamiyao bhasasamiyao esanasamiyao ayana-bhamda-matta-nikkhevanasamiyao uchchara-pasavana-khela-simdhana-jalla-paritthavaniyasamiyao manasamiyao vaisamiyao kaya-samiyao managuttao vaiguttao kayaguttao guttao guttimdiyao guttabambhacharinio bahussuyao bahuparivarao puvvanupuvvim charamanio jenameva teyalipure nayare teneva uvagachchhamti, uvagachchhitta ahapadiruvam oggaham oginhamti, oginhitta samjamenam tavasa appanam bhavemanio viharamti. Tae nam tasim suvvayanam ajjanam ege samghadae padhamae porisie sajjhayam karei, biyae porisie jjhanam jjhiyai, taiyae porisie aturiyamachavalamasambhamte muhapottiyam padilehei, bhayanavatthani padilehei, bhayanani pamajjei, bhayanani ogga-hei, jeneva suvvayao ajjao teneva uvagachchhai, suvvayao ajjao vamdai namamsai, vamditta namamsitta evam vayasi–ichchhamo nam tubbhehim abbhanunnae teyalipure nayare uchcha-niya-majjhimaim kulaim gharasamudanassa bhikkhayariyae adittae. Ahasuham devanuppiya! Ma padibamdham karehi. Tae nam tao ajjao suvvayahim ajjahim abbhanunnaya samanio suvvayanam ajjanam amtiyao padissayao padinikkhamamti, padinikkhamitta aturiyamachavalamasambhamtae gatie jugamtara-paloyanae ditthie purao riya sohemanio teyalipure nayare uchcha-niya-majjhimaim kulaim gharasamudanassa bhikkhayariyam adamanio teyalissa giham anupavitthao. Tae nam sa pottila tao ajjao ejjamanio pasai, pasitta hatthatuttha asanao abbhutthei, vamdai namamsai, vamditta namamsitta vipulenam asana-pana-khaima-saimenam padilabhei, padilabhetta evam vayasi–evam khalu aham ajjao! Teyaliputtassa amachchassa puvvim ittha kamta piya manunna manama asi, iyanim anittha akamta appiya amanunna amanama jaya. Nechchhai nam teyaliputte mama namagoyamavi savanayae, kim puna damsanam va paribhogam va? Tam tubbhe nam ajjao bahunayao bahusikkhiyao bahupadhiyao bahuni gamagara-nagara-kheda-kabbada-donamuha-madamba-pattana-asama-nigama-sambaha-sannivesaim ahimdai, bahunam raisara-talavara-madambiya-kodumbiya-ibbha-setthi-senavai-satthavahapabhiinam gihaim anupavisaha. Tam atthiyaim bhe ajjao! Kei kahimchi chunnajoe va mamtajoge va kammanajoe va kammajoe va hiyauddavane va kauddavane va abhiogie va vasikarane va kouyakamme va bhuikamme va mule va kamde va chhalli valli siliya va guliya va osahe va bhesajje va uvaladdhapuvve, jenaham teyaliputtassa punaravi ittha kamta piya manunna manama bhavejjami? Tae nam tao ajjao pottilae evam vuttao samanio dovi kanne thaemti, thavetta pottilam evam vayasi–amhe nam devanuppie! Samanio niggamthio java guttabambhacharinio. No khalu kappai amham eyappagaram kannehim vi nisamittae, kimamga puna uvadamsittae va ayarittae va? Amhe nam tava devanuppie! Vichittam kevalipannattam dhammam parikahijjamo. Tae nam sa pottila tao ajjao evam vayasi–ichchhami nam ajjao! Tubbham amtie kevalipannattam dhammam nisamittae. Tae nam tao ajjao pottilae vichittam kevalipannattam dhammam parikahemti. Tae nam sa pottila dhammam sochcha nisamma hattha evam vayasi–saddahami nam ajjao! Niggamtham pavayanam java se jaheyam tubbhe vayaha. Ichchhami nam aham tubbham amtie pamchanuvvaiyam sattasikkhavaiyam–duvalasaviham gihidhammam padivajjittae. Ahasuham devanuppie! Tae nam sa pottila tasim ajjanam amtie pamchanuvvaiyam java gihidhammam padivajjai, tao ajjao vamdai namamsai, vamditta namamsitta padivisajjei. Tae nam sa pottila samanovasiya jaya java samane niggamthe phasuenam esanijjenam asana-pana-khaima-saimenam vattha-padiggaha-kambala-payapumchhanenam osahabhesajjenam padihariena ya pidha-phalaga-sejja-samtharaenam padilabhemani viharai.
Sutra Meaning Transliteration : Juo sutra 148