Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104849
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-१४ तेतलीपुत्र

 Translated Chapter :

શ્રુતસ્કંધ-૧

અધ્યયન-૧૪ તેતલીપુત્ર
Section : Translated Section :
Sutra Number : 149 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से कनगरहे राया रज्जे य रट्ठे य बले य वाहणे य कोसे य कोट्ठागारे य पुरे य अंतेउरे य मुच्छिए गढिए गिद्धे अज्झोववण्णे जाए, जाए पुत्ते वियंगेइ–अप्पेगइयाणं हत्थंगुलियाओ छिंदइ, अप्पेगइयाणं हत्थंगुट्ठए छिंदइ, अप्पेगइयाणं पायंगुलियाओ छिंदइ, अप्पेगइयाणं पायंगुट्ठए छिंदइ, अप्पेगइयाणं कण्णसक्कुलीओ छिंदइ, अप्पेगइयाणं नासापुडाइं फालेइ, अप्पेगइयाणं अंगोवंगाइं वियत्तेइ। तए णं तीसे पउमावईए देवीए अन्नया कयाइ पुव्वरत्तावरत्तकालसमयंसि अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था–एवं खलु कनगरहे राया रज्जे य रट्ठे य बले य वाहणे य कोसे य कोट्ठागारे य पुरे य अंतेउरे य मुच्छिए गढिए गिद्धे अज्झोववण्णे जाए, जाए पुत्ते वियंगेइ–अप्पेगइयाणं हत्थंगुलियाओ छिंदइ, अप्पेगइयाणं हत्थंगुट्ठए छिंदइ, अप्पेगइयाणं पायंगुलियाओ छिंदइ, अप्पेगइयाणं पायंगुट्ठए छिंदइ, अप्पेगइयाणं कण्णसक्कुलीओ छिंदइ, अप्पेगइयाणं नासापुडाइं फालेइ, अप्पेगइयाणं अंगमंगाइं वियत्तेइ। तं जइ णं अहं दारयं पयायामि, सेयं खलु मम तं दारगं कनगरहस्स रहस्सिययं चेव सारक्खमाणीए संगोवेमाणीए विहरित्तए त्ति कट्टु एवं संपेहेइ, संपेहेत्ता तेयलिपुत्तं अमच्चं सद्दावेइ, सद्दावेत्ता एवं वयासी– एवं खलु देवानुप्पिया! कनगरहे राया रज्जे य रट्ठे य बले य वाहणे य कोसे य कोट्ठागारे य पुरे य अंतेउरे य मुच्छिए गढिए गिद्धे अज्झोव-वण्णे जाए, जाए पुत्ते वियंगेइ–अप्पेगइयाणं हत्थंगुलियाओ छिंदइ, अप्पेगइयाणं हत्थंगुट्ठए छिंदइ, अप्पेगइयाणं पायंगुलियाओ छिंदइ, अप्पेगइयाणं पायंगुट्ठए छिंदइ, अप्पेगइयाणं कण्णसक्कुलीओ छिंदइ, अप्पेगइयाणं नासापुडाइं फालेइ, अप्पेगइयाणं अंगोवंगाइं वियत्तेइ। तं जइ णं अहं देवानुप्पिया! दारगं पयायामि, तए णं तुमं कनगरहस्स रहस्सिययं चेव अनुपुव्वेणं सारक्खमाणे संगोवेमाणे संवड्ढेहि। तए णं से दारए उम्मुक्कबालभावे विण्णय-परिणयमेत्ते जोव्वणगमणुप्पत्ते तव मम य भिक्खाभायणे भविस्सइ तए णं से तेयलिपुत्ते अमच्चे पउमावईए देवीए एयमट्ठं पडिसुणेइ, पडिसुणेत्ता पडिगए। तए णं पउमावई देवी पोट्टिला य अमच्चो सममेव गब्भं गेण्हंति, सममेव परिवहंति। तए णं सा पउमावई देवी नवण्हं मासाणं बहुपडिपुण्णाणं जाव पियदंसणं सुरूवं दारगं पयाया। जं रयणिं च णं पउमावई देवी दारयं पयाया तं रयणिं च णं पोट्टिला वि अमच्चो नवण्हं मासाणं विणिहायमावन्नं दारियं पयाया। तए णं सा पउमावई देवी अम्मधाइं सद्दावेइ, सद्दावेत्ता एवं वयासी–गच्छह णं तुमं अम्मो! तेयलिपुत्तं रहस्सिययं चेव सद्दावेहि। तए णं सा अम्मधाई तहत्ति पडिसुणेइ, पडिसुणेत्ता अंतेउरस्स अवदारेणं निग्गच्छइ, निग्गच्छित्ता जेणेव तेयलिस्स गिहे जेणेव तेयलिपुत्ते तेणेव उवागच्छइ, उवागच्छित्ता करयल-परिग्गहियं सिरसावत्तं मत्थए अंजलिं कट्टु एवं वयासी–एवं खलु देवानुप्पिया! पउमावई देवी सद्दावेइ। तए णं तेयलिपुत्ते अम्मधाईए अंतिए एगमट्ठं सोच्चा हट्ठतुट्ठे अम्मधाईए सद्धिं साओ गिहाओ निग्गच्छइ, निग्गच्छित्ता अंतेउरस्स अवदारेणं रहस्सिययं चेव अनुप्पविसइ, अनुप्पविसित्ता जेणेव पउमावई देवी तेणेव उवागच्छइ, उवागच्छित्ता करयल परिग्गहियं सिरसावत्तं मत्थए अंजलिं कट्टु एवं वयासी–संदिसतु णं देवानुप्पिया! जं मए कायव्वं। तए णं पउमावई देवी तेयलिपुत्तं एवं वयासी–एव खलु कनगरहे राया जाव पुत्ते वियंगेइ। अहं च णं देवानुप्पिया दारगं पयाया। तं तुमं णं देवानुप्पिया! एवं दारगं गेण्हाहि जाव तव मम य भिक्खाभायणे भविस्सइ त्ति कट्टु तेयलिपुत्तस्स हत्थे दलयइ। तए णं तेयलिपुत्ते पउमावईए हत्थाओ दारगं गेण्हइ, उत्तरिज्जेणं पिहेइ, अंतेउरस्स रहस्सिययं अवदारेणं निग्गच्छइ निग्गच्छित्ता जेणेव सए गिहे जेणेव पोट्टिला भारिया तेणेव उवागच्छइ, उवागच्छित्ता पोट्टिलं एवं वयासी– एवं खलु देवानुप्पिए! कनगरहे राया जाव पुत्ते वियंगेइ। अयं च णं दारए कनगरहस्स पुत्ते पउमावईए अत्तए। तन्नं तुमं देवानुप्पिए! इमं दारगं कनगरहस्स रहस्सिययं चेव अनुपुव्वेणं सारक्खाहि य संगोवेहि य संवड्ढेहि य। तए णं एस दारए उम्मुक्कबालभावे तव य मम य पउमावईए य आहारे भविस्सइ त्ति कट्टु पोट्टिलाए पासे निक्खिवइ, निक्खिवित्ता पोट्टिलाए पासाओ तं विणिहायमावण्णियं दारियं गेण्हइ गेण्हित्ता उत्तरिज्जेणं पिहेइ, पिहेत्ता अंतेउरस्स अवदारेणं अनुप्पविसइ, अनुप्पविसित्ता जेणेव पउमावई देवी तेणेव उवागच्छइ, उवागच्छित्ता पउमावईए देवीए पासे ठावेइ जाव पडिनिग्गए। तए णं तीसे पउमावईए देवीए अंगपडियारियाओ पउमावइं देविं विणिहायमावण्णियं च दारियं पयायं पासंति, पासित्ता जेणेव कनगरहे राया तेणेव उवागच्छंति, उवागच्छित्ता करयल परिग्गहियं सिरसावत्तं मत्थए अंजलिं कट्टु एवं वयासी–एवं खलु सामी! पउमावई देवी मएल्लियं दारियं पयाया। तए णं कनगरहे राया तीसे मएल्लियाए दारियाए नीहरणं करेइ, बहूइं लोगियाइं मयकिच्चाइं करेइ, करेत्ता कालेणं विगयसोए जाए। तए णं से तेयलिपुत्ते कल्लं कोडुंबियपुरिसे सद्दावेइ, सद्दावेत्ता एवं वयासी–खिप्पामेव भो देवानुप्पिया! चारगसोहणं करेह जाव ठिइपडियं दसदेवसियं करेह, कारवेह य, एयमाणत्तियं पच्चप्पिणह। तेवि तहेव करेंति, तहेव पच्चप्पिणंति। जम्हा णं अम्हं एस दारए कनगरहस्स रज्जे जाए तं होउ णं दारए नामेणं कनगज्झए जाव अलंभोगसमत्थे जाए।
Sutra Meaning : જુઓ સૂત્ર ૧૪૮
Mool Sutra Transliteration : [sutra] tae nam se kanagarahe raya rajje ya ratthe ya bale ya vahane ya kose ya kotthagare ya pure ya amteure ya muchchhie gadhie giddhe ajjhovavanne jae, jae putte viyamgei–appegaiyanam hatthamguliyao chhimdai, appegaiyanam hatthamgutthae chhimdai, appegaiyanam payamguliyao chhimdai, appegaiyanam payamgutthae chhimdai, appegaiyanam kannasakkulio chhimdai, appegaiyanam nasapudaim phalei, appegaiyanam amgovamgaim viyattei. Tae nam tise paumavaie devie annaya kayai puvvarattavarattakalasamayamsi ayameyaruve ajjhatthie chimtie patthie manogae samkappe samuppajjittha–evam khalu kanagarahe raya rajje ya ratthe ya bale ya vahane ya kose ya kotthagare ya pure ya amteure ya muchchhie gadhie giddhe ajjhovavanne jae, jae putte viyamgei–appegaiyanam hatthamguliyao chhimdai, appegaiyanam hatthamgutthae chhimdai, appegaiyanam payamguliyao chhimdai, appegaiyanam payamgutthae chhimdai, appegaiyanam kannasakkulio chhimdai, appegaiyanam nasapudaim phalei, appegaiyanam amgamamgaim viyattei. Tam jai nam aham darayam payayami, seyam khalu mama tam daragam kanagarahassa rahassiyayam cheva sarakkhamanie samgovemanie viharittae tti kattu evam sampehei, sampehetta teyaliputtam amachcham saddavei, saddavetta evam vayasi– Evam khalu devanuppiya! Kanagarahe raya rajje ya ratthe ya bale ya vahane ya kose ya kotthagare ya pure ya amteure ya muchchhie gadhie giddhe ajjhova-vanne jae, jae putte viyamgei–appegaiyanam hatthamguliyao chhimdai, appegaiyanam hatthamgutthae chhimdai, appegaiyanam payamguliyao chhimdai, appegaiyanam payamgutthae chhimdai, appegaiyanam kannasakkulio chhimdai, appegaiyanam nasapudaim phalei, appegaiyanam amgovamgaim viyattei. Tam jai nam aham devanuppiya! Daragam payayami, tae nam tumam kanagarahassa rahassiyayam cheva anupuvvenam sarakkhamane samgovemane samvaddhehi. Tae nam se darae ummukkabalabhave vinnaya-parinayamette jovvanagamanuppatte tava mama ya bhikkhabhayane bhavissai Tae nam se teyaliputte amachche paumavaie devie eyamattham padisunei, padisunetta padigae. Tae nam paumavai devi pottila ya amachcho samameva gabbham genhamti, samameva parivahamti. Tae nam sa paumavai devi navanham masanam bahupadipunnanam java piyadamsanam suruvam daragam payaya. Jam rayanim cha nam paumavai devi darayam payaya tam rayanim cha nam pottila vi amachcho navanham masanam vinihayamavannam dariyam payaya. Tae nam sa paumavai devi ammadhaim saddavei, saddavetta evam vayasi–gachchhaha nam tumam ammo! Teyaliputtam rahassiyayam cheva saddavehi. Tae nam sa ammadhai tahatti padisunei, padisunetta amteurassa avadarenam niggachchhai, niggachchhitta jeneva teyalissa gihe jeneva teyaliputte teneva uvagachchhai, uvagachchhitta karayala-pariggahiyam sirasavattam matthae amjalim kattu evam vayasi–evam khalu devanuppiya! Paumavai devi saddavei. Tae nam teyaliputte ammadhaie amtie egamattham sochcha hatthatutthe ammadhaie saddhim sao gihao niggachchhai, niggachchhitta amteurassa avadarenam rahassiyayam cheva anuppavisai, anuppavisitta jeneva paumavai devi teneva uvagachchhai, uvagachchhitta karayala pariggahiyam sirasavattam matthae amjalim kattu evam vayasi–samdisatu nam devanuppiya! Jam mae kayavvam. Tae nam paumavai devi teyaliputtam evam vayasi–eva khalu kanagarahe raya java putte viyamgei. Aham cha nam devanuppiya daragam payaya. Tam tumam nam devanuppiya! Evam daragam genhahi java tava mama ya bhikkhabhayane bhavissai tti kattu teyaliputtassa hatthe dalayai. Tae nam teyaliputte paumavaie hatthao daragam genhai, uttarijjenam pihei, amteurassa rahassiyayam avadarenam niggachchhai niggachchhitta jeneva sae gihe jeneva pottila bhariya teneva uvagachchhai, uvagachchhitta pottilam evam vayasi– Evam khalu devanuppie! Kanagarahe raya java putte viyamgei. Ayam cha nam darae kanagarahassa putte paumavaie attae. Tannam tumam devanuppie! Imam daragam kanagarahassa rahassiyayam cheva anupuvvenam sarakkhahi ya samgovehi ya samvaddhehi ya. Tae nam esa darae ummukkabalabhave tava ya mama ya paumavaie ya ahare bhavissai tti kattu pottilae pase nikkhivai, nikkhivitta pottilae pasao tam vinihayamavanniyam dariyam genhai genhitta uttarijjenam pihei, pihetta amteurassa avadarenam anuppavisai, anuppavisitta jeneva paumavai devi teneva uvagachchhai, uvagachchhitta paumavaie devie pase thavei java padiniggae. Tae nam tise paumavaie devie amgapadiyariyao paumavaim devim vinihayamavanniyam cha dariyam payayam pasamti, pasitta jeneva kanagarahe raya teneva uvagachchhamti, uvagachchhitta karayala pariggahiyam sirasavattam matthae amjalim kattu evam vayasi–evam khalu sami! Paumavai devi maelliyam dariyam payaya. Tae nam kanagarahe raya tise maelliyae dariyae niharanam karei, bahuim logiyaim mayakichchaim karei, karetta kalenam vigayasoe jae. Tae nam se teyaliputte kallam kodumbiyapurise saddavei, saddavetta evam vayasi–khippameva bho devanuppiya! Charagasohanam kareha java thiipadiyam dasadevasiyam kareha, karaveha ya, eyamanattiyam pachchappinaha. Tevi taheva karemti, taheva pachchappinamti. Jamha nam amham esa darae kanagarahassa rajje jae tam hou nam darae namenam kanagajjhae java alambhogasamatthe jae.
Sutra Meaning Transliteration : Juo sutra 148