Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104722
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-१ उत्क्षिप्तज्ञान

 Translated Chapter :

શ્રુતસ્કંધ-૧

અધ્યયન-૧ ઉત્ક્ષિપ્તજ્ઞાન
Section : Translated Section :
Sutra Number : 22 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से देवे अंतलिक्खपडिवण्णे दसद्धवण्णाइं सखिंखिणियाइं पवर वत्थाइं परिहिए अभयं कुमारं एवं वयासी–अहं णं देवानुप्पिया! पुव्वसंगइए सोहम्मकप्पवासी महिड्ढीए जं णं तुमं पोसहसालाए अट्ठमभत्तं पगिण्हित्ता णं ममं मनसीकरेमाणे-मनसीकरेमाणे चिट्ठसि, तं एस णं देवानुप्पिया! अहं इहं हव्वमागए। संदिसाहि णं देवानुप्पिया! किं करेमि? किं दल-यामि? किं पयच्छामि? किं वा ते हियइच्छियं? तए णं से अभए कुमारे तं पुव्वसंगइयं देवं अंतलिक्खपडिवण्णं पासित्ता हट्ठतुट्ठे पोसहं पारेइ, पारेत्ता करयल परि-ग्गहियं सिरसावत्तं मत्थए अंजलिं कट्टु एवं वयासी–एवं खलु देवानुप्पिया! मम चुल्ल-माउयाए धारिणीए देवीए अयमेयारूवे अकालदोहले पाउब्भूए–धन्नाओ णं ताओ अम्मयाओ तहेव पुव्वगमेणं जाव वेभारगिरिकडग-पायमूलं सव्वओ समंता आहिंडमाणीओ आहिंडमाणीओ दोहलं विणिंति। तं जइ णं अहमवि मेहेसु अब्भुग्गएसु जाव दोहलं विणेज्जामि–तं णं तुमं देवानुप्पिया! मम चुल्लमाउयाए धारिणीए देवीए अयमेयारूवं अकालदोहलं विणेहिं। तए णं से देवे अभएणं कुमारेणं एवं वुत्ते समाणे हट्ठतुट्ठे अभयं कुमारं एवं वयासी– तुमं णं देवानुप्पिया! सुनिव्वुयवीसत्थे अच्छाहि। अहं णं तव चुल्लमाउयाए धारिणीए देवीए अयमेयारूवं अकालदोहलं विनेमि त्ति कट्टु अभयस्स कुमारस्स अंतियाओ पडिनिक्खमइ, पडिनिक्खमित्ता उत्तरपुरत्थिमे णं वेभारपव्वए वेउव्वियसमुग्घाएणं समोहण्णइ, समोहणित्ता संखेज्जाइं जोयणाइं दंडं निसिरइ जाव दोच्चंपि वेउव्वियसमुग्घाएणं समोहण्णइ, समोहणित्ता खिप्पामेव समज्जियं सविज्जुयं सफुसियं पंचवण्णमेहनिणाओवसोहियं दिव्वं पाउससिरिं विउव्वइ, विउव्वित्ता जेणामेव अभए कुमारे तेणामेव उवागच्छइ, उवागच्छित्ता अभयं कुमारं एवं वयासी–एवं खलु देवानुप्पिया! मए तव पियट्ठयाए सगज्जिया सफुसिया सविज्जुया दिव्वा पाउससिरी विउव्विया, तं विणेऊ णं देवानुप्पिया! तव चुल्लमाउया धारिणी देवी अयमेयारूवं अकालदोहलं। तए णं से अभए कुमारे तस्स पुव्वसंगइयस्स सोहम्मकप्पवासिस्स देवस्स अंतिए एयमट्ठं सोच्चा निसम्म हट्ठतुट्ठे सयाओ भवणाओ पडिनिक्खमइ, पडिनिक्खमित्ता जेणामेव सेणिए राया तेणामेव उवागच्छइ, उवागच्छित्ता करयल परिग्गहियं सिरसावत्तं मत्थए अंजलिं कट्टु एवं वयासी–एवं खलु ताओ! मम पुव्वसंगइएणं सोहम्मकप्पवासिणा देवेणं खिप्पामेव सगज्जिया सविज्जुया सफुसिया? पंचवण्णेमेहनिणाओवसोभिया दिव्वा पाउससिरी विउव्विया। तं विणेऊ णं मम चुल्लमाउया धारिणी देवी अकालदोहलं। तए णं से सेणिए राया अभयस्स कुमारस्स अंतिए एयमट्ठं सोच्चा निसम्म हट्ठतुट्ठे कोडुंबियपुरिसे सद्दावेइ, सद्दावेत्ता एवं वयासी–खिप्पामेव भो! देवानुप्पिया! रायगिहं नगरं सिंघाडग-तिग-चउक्क-चच्चर-चउम्मुह-महापह-पहेसु आसित्तसित्त-सुइय-संमज्जिओवलित्तं जाव सुगंधवर गंधियं गंधवट्टिभूयं करेह य कारवेह य, एयमाणत्तियं पच्चप्पिणह। तए णं ते कोडुंबियपुरिसा सेणिएणं रन्ना एवं वुत्ता समाणा हट्ठतुट्ठचित्तमाणंदिया पीइमणा परमसोमणस्सिया हरिसवस-विसप्पमाणहियया तमाणत्तियं पच्चप्पिणंति। तए णं से सेणिए राया दोच्चंपि कोडुंबियपुरिसे सद्दावेइ, सद्दावेत्ता एवं वयासी–खिप्पामेव भो देवानुप्पिया! हय-गय-रह-पवरजोह-कलियं चाउरंगिणि सेणं सन्नाहेह, सेयणयं च गंधहत्थिं परिकप्पेह। तेवि तहेव करेंति जाव पच्चप्पिणंति। तए णं से सेणिए राया जेणेव धारिणी देवी तेणेव उवागच्छइ, उवागच्छित्ता धारिणिं देविं एवं वयासी–एवं खलु देवानुप्पिए! सगज्जिया सविज्जुया सफुसिया दिव्वा पाउससिरी पाउब्भूया। तं णं तुमं देवानुप्पिए! एयं अकालदोहलं विनेहि। तए णं सा धारिणी देवी सेणिएणं रन्ना एवं वुत्ता समाणी हट्ठतुट्ठा जेणामेव मज्जणघरे तेणेव उवागच्छइ, उवाग-च्छित्ता मज्जणघरं अनुप्पविसइ, अनुप्पविसित्ता अंतो अंतेउरंसि ण्हाया कयबलिकम्मा कय-कोउय-मंगल-पायच्छित्ता किं ते वर-पायपत्तनेउर-मणिमेहल-हार-रइय-ओविय-कडग-खुड्डय-विचित्त वरवलयथंभियभुया जाव आगास-फालिय-समप्पभं अंसुयं निय-त्था, सेयणयं गंधहत्थिं दुरूढा समाणी अमय-महिय-फेणपुंज-सन्निगासाहिं सेयचामरवालबीयणीहिं बीइज्जमाणी-बीइज्जमाणी संपत्थिया। तए णं से सेणिए राया ण्हाए कयबलिकम्मे कय-कोउय-मंगल-पायच्छित्ते अप्पमहग्घाभरणालंकिय सरीरे हत्थिखं-धवरगए सकोरेंटमल्लदामेणं छत्तेणं धरिज्जमाणेणं चउचामराहिं वीइज्जमाणे धारिणिं देविं पिट्ठओ अनुगच्छइ। तए णं सा धारिणी देवी सेणिएणं रन्ना हत्थिखंधवरगएणं पिट्ठओ-पिट्ठओ समणुगम्ममाण-मग्गा हय-गय-रह-पवरजोहकलियाए चाउरंगिणीए सेनाए सद्धिं संपरिवुडा महया भड-चडगर-वंदपरिक्खित्ता सव्विड्ढीए सव्वज्जुईए जाव दुंदुभिनिग्घो-सनाइयरवेणं रायगिहे नयरे सिंघाडग-तिग-चउक्क-चच्चर-चउम्मुह महापहपहेसु नागरजणेणं अभिनंदिज्जमाणी-अभिनंदिज्जमाणी जेणामेव वेभारगिरि-पव्वए तेणामेव उवागच्छइ, उवागच्छित्ता वेभारगिरि-कडग-तडपायमूले आरामेसु य उज्जानेसु य काननेसु य वनेसु य वनसंडेसु य रुक्खेसु य गुच्छेसु य गुम्मेसु य लयासु य वल्लीसु य कंदरासु य दरीसु य चुंढीसु य जूहेसु य कच्छेसु य नदीसु य संगमेसु य विवरएसु य अच्छमाणी य पेच्छमाणी य मज्जमाणी य पत्ताणि य पुप्फाणि य फलाणि य पल्ल-वाणि य गिण्हमाणी य माणेमाणी य अग्घायमाणी य परिभुंजेमाणी य परिभाएमाणी य वेभारगिरिपायमूले दोहलं विणेमाणी सव्वओ समंता आहिंडइ। तए णं सा धारिणी देवी सम्मानियदोहला विणीयदोहला संपुण्णदोहला संपत्तदोहला जाया यावि होत्था। तए णं सा धारिणी देवी सेयणयगंधहत्थिं दुरूढा समाणी सेणिएणं हत्थिखंधवरगएणं पिट्ठओ-पिट्ठओ समणुगम्ममाण-मग्गा हय-गय-रह-पवरजोहकलियाए चाउरंगिणीए सेनाए सद्धिं संपरिवुडा महया भड-चडगर-वंदपरिक्खित्ता सव्विड्ढीए सव्वज्जुईए जाव दुंदुभिनिग्घोसनाइयरवेणं जेणेव रायगिहे नयरे तेणेव उवागच्छइ, उवागच्छित्ता रायगिहं नयरं मज्झंमज्झेणं जेणामेव सए भवणे तेणामेव उवागच्छइ, उवागच्छित्ता विउलाइं मानुस्सगाइं भोगभोगाइं पच्चणुभवमाणी विहरइ।
Sutra Meaning : જુઓ સૂત્ર ૧૯
Mool Sutra Transliteration : [sutra] tae nam se deve amtalikkhapadivanne dasaddhavannaim sakhimkhiniyaim pavara vatthaim parihie abhayam kumaram evam vayasi–aham nam devanuppiya! Puvvasamgaie sohammakappavasi mahiddhie jam nam tumam posahasalae atthamabhattam paginhitta nam mamam manasikaremane-manasikaremane chitthasi, tam esa nam devanuppiya! Aham iham havvamagae. Samdisahi nam devanuppiya! Kim karemi? Kim dala-yami? Kim payachchhami? Kim va te hiyaichchhiyam? Tae nam se abhae kumare tam puvvasamgaiyam devam amtalikkhapadivannam pasitta hatthatutthe posaham parei, paretta karayala pari-ggahiyam sirasavattam matthae amjalim kattu evam vayasi–evam khalu devanuppiya! Mama chulla-mauyae dharinie devie ayameyaruve akaladohale paubbhue–dhannao nam tao ammayao taheva puvvagamenam java vebharagirikadaga-payamulam savvao samamta ahimdamanio ahimdamanio dohalam vinimti. Tam jai nam ahamavi mehesu abbhuggaesu java dohalam vinejjami–tam nam tumam devanuppiya! Mama chullamauyae dharinie devie ayameyaruvam akaladohalam vinehim. Tae nam se deve abhaenam kumarenam evam vutte samane hatthatutthe abhayam kumaram evam vayasi– tumam nam devanuppiya! Sunivvuyavisatthe achchhahi. Aham nam tava chullamauyae dharinie devie ayameyaruvam akaladohalam vinemi tti kattu abhayassa kumarassa amtiyao padinikkhamai, padinikkhamitta uttarapuratthime nam vebharapavvae veuvviyasamugghaenam samohannai, samohanitta samkhejjaim joyanaim damdam nisirai java dochchampi veuvviyasamugghaenam samohannai, samohanitta khippameva samajjiyam savijjuyam saphusiyam pamchavannamehaninaovasohiyam divvam pausasirim viuvvai, viuvvitta jenameva abhae kumare tenameva uvagachchhai, uvagachchhitta abhayam kumaram evam vayasi–evam khalu devanuppiya! Mae tava piyatthayae sagajjiya saphusiya savijjuya divva pausasiri viuvviya, tam vineu nam devanuppiya! Tava chullamauya dharini devi ayameyaruvam akaladohalam. Tae nam se abhae kumare tassa puvvasamgaiyassa sohammakappavasissa devassa amtie eyamattham sochcha nisamma hatthatutthe sayao bhavanao padinikkhamai, padinikkhamitta jenameva senie raya tenameva uvagachchhai, uvagachchhitta karayala pariggahiyam sirasavattam matthae amjalim kattu evam vayasi–evam khalu tao! Mama puvvasamgaienam sohammakappavasina devenam khippameva sagajjiya savijjuya saphusiya? Pamchavannemehaninaovasobhiya divva pausasiri viuvviya. Tam vineu nam mama chullamauya dharini devi akaladohalam. Tae nam se senie raya abhayassa kumarassa amtie eyamattham sochcha nisamma hatthatutthe kodumbiyapurise saddavei, saddavetta evam vayasi–khippameva bho! Devanuppiya! Rayagiham nagaram simghadaga-tiga-chaukka-chachchara-chaummuha-mahapaha-pahesu asittasitta-suiya-sammajjiovalittam java sugamdhavara gamdhiyam gamdhavattibhuyam kareha ya karaveha ya, eyamanattiyam pachchappinaha. Tae nam te kodumbiyapurisa senienam ranna evam vutta samana hatthatutthachittamanamdiya piimana paramasomanassiya harisavasa-visappamanahiyaya tamanattiyam pachchappinamti. Tae nam se senie raya dochchampi kodumbiyapurise saddavei, saddavetta evam vayasi–khippameva bho devanuppiya! Haya-gaya-raha-pavarajoha-kaliyam chauramgini senam sannaheha, seyanayam cha gamdhahatthim parikappeha. Tevi taheva karemti java pachchappinamti. Tae nam se senie raya jeneva dharini devi teneva uvagachchhai, uvagachchhitta dharinim devim evam vayasi–evam khalu devanuppie! Sagajjiya savijjuya saphusiya divva pausasiri paubbhuya. Tam nam tumam devanuppie! Eyam akaladohalam vinehi. Tae nam sa dharini devi senienam ranna evam vutta samani hatthatuttha jenameva majjanaghare teneva uvagachchhai, uvaga-chchhitta majjanagharam anuppavisai, anuppavisitta amto amteuramsi nhaya kayabalikamma kaya-kouya-mamgala-payachchhitta kim te vara-payapattaneura-manimehala-hara-raiya-oviya-kadaga-khuddaya-vichitta varavalayathambhiyabhuya java agasa-phaliya-samappabham amsuyam niya-ttha, seyanayam gamdhahatthim durudha samani amaya-mahiya-phenapumja-sannigasahim seyachamaravalabiyanihim biijjamani-biijjamani sampatthiya. Tae nam se senie raya nhae kayabalikamme kaya-kouya-mamgala-payachchhitte appamahagghabharanalamkiya sarire hatthikham-dhavaragae sakoremtamalladamenam chhattenam dharijjamanenam chauchamarahim viijjamane dharinim devim pitthao anugachchhai. Tae nam sa dharini devi senienam ranna hatthikhamdhavaragaenam pitthao-pitthao samanugammamana-magga haya-gaya-raha-pavarajohakaliyae chauramginie senae saddhim samparivuda mahaya bhada-chadagara-vamdaparikkhitta savviddhie savvajjuie java dumdubhiniggho-sanaiyaravenam rayagihe nayare simghadaga-tiga-chaukka-chachchara-chaummuha mahapahapahesu nagarajanenam abhinamdijjamani-abhinamdijjamani jenameva vebharagiri-pavvae tenameva uvagachchhai, uvagachchhitta vebharagiri-kadaga-tadapayamule aramesu ya ujjanesu ya kananesu ya vanesu ya vanasamdesu ya rukkhesu ya guchchhesu ya gummesu ya layasu ya vallisu ya kamdarasu ya darisu ya chumdhisu ya juhesu ya kachchhesu ya nadisu ya samgamesu ya vivaraesu ya achchhamani ya pechchhamani ya majjamani ya pattani ya pupphani ya phalani ya palla-vani ya ginhamani ya manemani ya agghayamani ya paribhumjemani ya paribhaemani ya vebharagiripayamule dohalam vinemani savvao samamta ahimdai. Tae nam sa dharini devi sammaniyadohala viniyadohala sampunnadohala sampattadohala jaya yavi hottha. Tae nam sa dharini devi seyanayagamdhahatthim durudha samani senienam hatthikhamdhavaragaenam pitthao-pitthao samanugammamana-magga haya-gaya-raha-pavarajohakaliyae chauramginie senae saddhim samparivuda mahaya bhada-chadagara-vamdaparikkhitta savviddhie savvajjuie java dumdubhinigghosanaiyaravenam jeneva rayagihe nayare teneva uvagachchhai, uvagachchhitta rayagiham nayaram majjhammajjhenam jenameva sae bhavane tenameva uvagachchhai, uvagachchhitta viulaim manussagaim bhogabhogaim pachchanubhavamani viharai.
Sutra Meaning Transliteration : Juo sutra 19