Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104793
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-८ मल्ली

 Translated Chapter :

શ્રુતસ્કંધ-૧

અધ્યયન-૮ મલ્લી
Section : Translated Section :
Sutra Number : 93 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं तेसिं जियसत्तुपामोक्खाणं छण्हं राईणं दूया जेणेव मिहिला तेणेव पहारेत्थ गमणाए। तए णं छप्पि दूयगा जेणेव मिहिला तेणेव उवागच्छंति, उवागच्छित्ता मिहिलाए अग्गुज्जाणंसि पत्तेयं-पत्तेयं खंधावारनिवेसं करेंति, करेत्ता मिहिलं रायहाणिं अनुप्पविसंति, अनुप्पविसित्ता जेणेव कुंभए तेणेव उवागच्छंति, उवागच्छित्ता पत्तेयं करयल परिग्गहियं सिरसावत्तं मत्थए अंजलिं कट्टु साणं-साणं राईणं वयणाइं निवेदेंति। तए णं से कुंभए तेसिं दूयाणं अंतियं एयमट्ठं सोच्चा आसुरुत्ते रुट्ठे कुविए चंडिक्किए मिसिमिसेमाणे तिवलियं भिउडिं निडाले साहट्टु एवं वयासी–न देमि णं अहं तुब्भं मल्लिं विदेह-रायवरकन्नं ति कट्टु ते छप्पि दूए असक्कारिय असम्मानिय अवद्दारेणं निच्छुभावेइ। तए णं ते जियसत्तुपामोक्खाणं छण्हं राईणं दूया कुंभएणं रन्ना असक्कारिय असम्मानिय अवद्दारेणं निच्छुभाविया समाणा जेणेव सया-सया जनवया जेणेव सयाइं-सयाइं नगराइं जेणेव सया-सया रायाणो तेणेव उवागच्छंति, उवागच्छित्ता करयल परिग्गहियं सिरसावत्तं मत्थए अंजलिं कट्टु एवं वयासी–एवं खलु सामी! अम्हे जियसत्तुपामोक्खाणं छण्हं राईणं दूया जमगसमगं चेव जेणेव मिहिला तेणेव उवागया जाव अवद्दारेणं निच्छुभावेइ। तं न देइ णं सामी! कुंभए मल्लिं विदेहरायवरकन्नं साणं-साणं राईणं एयमट्ठं निवेदेंति। तए णं ते जियसत्तुपामोक्खा छप्पि रायाणो तेसिं दूयाणं अंतिए एयमट्ठं सोच्चा निसम्म आसुरुत्ता रुट्ठा कुविया चंडिक्किया मिसिमिसेमाणा अन्नमन्नस्स दूयसंपेसणं करेंति, करेत्ता एवं वयासी–एवं खलु देवानुप्पिया! अम्हं छण्हं राईणं दूया जमगसमगं चेव मिहिला तेणेव उवागया जाव अवद्दारेणं निच्छूढा। तं सेयं खलु देवानुप्पिया! कुंभगस्स जत्तं गेण्हित्तए त्ति कट्टु अन्नमन्नस्स एयमट्ठं पडिसुणेंति, पडिसुणेत्ता ण्हाया सण्णद्धा हत्थिखंधवरगया सकोरेंटमल्लदामेणं छत्तेणं धरिज्ज-माणेणं सेयवर-चामराहिं वीइज्जमाणा महया हय-गय-रह-पवरजोहकलियाए चाउरंगिणीए सेनाए सद्धिं संपरिवुडा सव्विड्ढीए जाव दुंदुभि-नाइय-रवेणं सएहिंतो-सएहिंतो नगरेहिंतो निग्गच्छंति, निग्गच्छित्ता एगयओ मिलायंति, जेणेव महिला तेणेव पहारेत्थ गमणाए। तए णं कुंभए राया इमीसे कहाए लद्धट्ठे समाणे बलवाउयं सद्दावेइ, सद्दावेत्ता एवं वयासी–खिप्पामेव हय-गय-रह-पवरजोहकलियं चाउरंगिणिं सेनं सन्नाहेहि, सन्नाहेत्ता एयमाणत्तियं पच्चप्पिणाहि सेवि जाव पच्चप्पिणति। तए णं कुंभए राया ण्हाए सन्नद्धे हत्थिखंधवरगए सकोरेंटमल्लदामेणं छत्तेणं धरिज्जमाणेणं सेयवरचामराहिं वीइज्जमाणे महया हय-गय-रह-पवर-जोहकलियाए चाउरंगिणीए सेनाए सद्धिं संपरिवुडे सव्विड्ढीए जाव दुंदुभिनाइयरवेणं मिहिलं मज्झंमज्झेणं निज्जाइ, निज्जावेत्ता विदेह-जनवयं मज्झंमज्झेणं जेणेव देसग्गं तेणेव खंधावारनिवेसं करेइ, करेत्ता जियसत्तुपामोक्खा छप्पि य रायाणो पडिवालेमाणे जुज्झसज्जे पडिचिट्ठइ। तए णं ते जियसत्तुपामोक्खा छप्पिं रायाणो जेणेव कुंभए राया तेणेव उवागच्छंति, उवागच्छित्ता कुंभएण रन्ना सद्धिं संपलग्गा यावि होत्था। तए णं ते जियसत्तुपामोक्खा छप्पि रायाणो कुंभयं रायं हय-महिय-पवरवीर-घाइय-विवडियचिंध-धय-पडागं किच्छोवगयपानं दिसोदिसिं पडिसेहेति। तए णं से कुंभए जियसत्तुपामोक्खेहिं छहिं राईहिं हय-महिय-पवरवीर-घाइय-विवडियचिंध-धय-पडागे किच्छो-वगयपाणे दिसोदिसिं पडिसेहिए समाणे अत्थामे अबले अवीरिए अपुरिसक्कार-परक्कमे अधारणिज्जमिति कट्टु सिग्घं तुरियं चवलं चंडं जइणं वेइयं जेणेव मिहिला तेणेव उवागच्छइ, उवागच्छित्ता मिहिलं अनुपविसइ, अनुपविसित्ता मिहिलाए दुवाराइं पिहेइ, पिहेत्ता रोहसज्जे चिट्ठइ। तए णं ते जियसत्तुपामोक्खा छप्पि रायाणो जेणेव मिहिला तेणेव उवागच्छंति, उवागच्छित्ता मिहिलं रायहाणिं निस्संचारं निरुच्चारं सव्वओ समंता ओरुंभित्ता णं चिट्ठंति। तए णं से कुंभए राया मिहिलं रायहाणिं ओरुद्धं जाणित्ता अब्भिंतरियाए उवट्ठाणसालाए सीहासनवरगए तेसिं जियसत्तुपामोक्खाणं छण्हं राईणं अंतराणि य छिद्दाणि य विवराणि य मम्माणि य अलभमाणे बहूहिं आएहिं य उवाएहिं य, उप्पत्तियाहि य वेणइयाहि य कम्मयाहि य पारिणामियाहि य– बुद्धोहिं परिणामेमाणे-परिणामेमाणे किंचि आयं वा उवायं वा अलभमाणे ओहयमनसंकप्पे करतलपल्हत्थमुहे अट्टज्झाणोवगए ज्झियायइ। इमं च णं मल्ली विदेहरायवरकन्ना ण्हाया कयवलिकम्मा कयकोउयमंगलपायच्छित्ता सव्वालंकार-विभूसिया बहूहिं खुज्जाहिं संपरिवुडा जेणेव कुंभए तेणेव उवागच्छइ, उवागच्छित्ता कुंभगस्स पायग्गहणं करेइ। तए णं कुंभए मल्लिं विदेहरायवरकन्नं नो आढाइ नो परियाणाइ तुसिणीए संचिट्ठइ। तए णं मल्ली विदेहरायवरकन्ना कुंभगं एवं वयासी–तुब्भे णं ताओ! अन्नया ममं एज्जमाणिं पासित्ता आढाह परियाणाह अंके निवेसेह। इयाणिं ताओ! तुब्भे ममं नो आढाह नो परियाणाह नो अंके निवेसेह। किण्णं तुब्भं अज्ज ओहय मनसंकप्पा करतलपल्हत्थमुहा अट्टज्झाणोवगया ज्झियायह? तए णं कुंभए मल्लिं विदेहरायवरकन्नं एवं वयासी–एवं खलु पुत्ता! तव कज्जे जियसत्तुपामोक्खेहिं छहिं राईहिं दूया संपेसिया। ते णं मए असक्कारिय असम्मानिय अवद्दारेणं निच्छूढा। तए णं जियसत्तुपामोक्खा छप्पि रायाणो तेसिं दूयाणं अंतिए एयमट्ठं सोच्चा परिकुविया समाणा मिहिलं रायहाणिं निस्संचारं निरुच्चारं सव्वओ समंता ओरुंभित्ता णं चिट्ठंति। तए णं अहं पुत्ता तेसिं जियसत्तुपामोक्खाणं छण्हं राईणं अंतराणि [य छिद्दाणि य विवराणि य मम्माणि य?] अलभमाणे जाव अट्टज्झा-णोवगए ज्झियामि। तए णं सा मल्ली विदेहरायवरकन्ना कुंभगं रायं एवं वयासी–माणं तुब्भे ताओ! ओहयमन-संकप्पा करतलपल्हत्थमुहा अट्टज्झाणोवगया ज्झियायह। तुब्भे णं ताओ! तेसिं जियसत्तु-पामोक्खाणं छण्हं राईणं पत्तेयं-पत्तेयं रहस्सिए दूयसंपेसे करेह, एगमेगं एवं वयह–तव देमि मल्लिं विदेहरायवरकन्नं ति कट्टु संज्झकालसमयंसि पविरल-मणूसंसि निसंत-पडिनिसंतंसि पत्तेयं-पत्तेयं मिहिलं रायहाणिं अनुप्पवेसेह, अनुप्पवेसेत्ता गब्भधरएसु अनुप्पवेसेह, अनुप्पवेसेत्ता मिहिलाए रायहाणीए दुवाराइं पिहेह, पिहेत्ता रोहासज्जा चिट्ठह। तए णं कुंभए तेसिं जियसत्तुपामोक्खाणं छण्हं राईणं पत्तेयं-पत्तेयं रहस्सिए दूयसंपेसे करेइ जाव रोहासज्जे चिट्ठइ। तए णं ते जियसत्तुपामोक्खा छप्पि रायाणो कल्लं पाउप्पभायाए रयणीए जाव उट्ठियम्मि सूरे सहस्सरस्सिम्मि दिनयरे तेयसा जलंते जालंतरेहिं कनगमइं मत्थयछिड्डं पउमुप्पल-पिहाणं पडिमं पासंति–एस णं मल्ली विदेहरायवरकन्नत्ति कट्टु मल्लीए रायवरकन्नाए रूवे य जोव्वणे य लावण्णे य मुच्छिया गिद्धा गडिया अज्झोववण्णा अणिमिसाए दिट्ठीए पेहमाणा-पेहमाणा चिट्ठंति। तए णं सा मल्ली विदेहरायवरकन्ना ण्हाया कयवलिकम्मा कयकोउय-मंगल-पायच्छित्ता सव्वालंकारविभूसिया बहूहिं खुज्जाहिं जाव परिक्खित्ता जेणेव जालधरए जेणेव कनगमई मत्थय-छिड्डा पउमुप्पल-पिहाणा पडिमा तेणेव उवागच्छइ, उवा गच्छित्ता तीसे कनगमईए मत्थयछिड्डाए पउमुप्पल-पीहाणाए पडिमाए मत्थयाओ तं पउमुप्पल-पिहाणं अवणेइ। तओ णं गंधे निद्धावेइ, से जहानामए–अहिमडे इ वा जाव एत्तो असुभतराए चेव। तए णं ते जियसत्तुपामोक्खा छप्पि रायाणो तेणं असुभेणं गंधेणं अभिभूया समाणा सएहिं-सएहिं उत्तरिज्जेहिं आसाइं पिहेंति, पिहेत्ता परम्मुहा चिट्ठंति। तए णं सा मल्ली विदेहरायवरकन्ना ते जियसत्तुपामोक्खे एवं वयासी–किण्णं तुब्भे देवानुप्पिया! सएहिं-सएहिं उत्तरिज्जेहिं आसाइं पिहेत्ता परम्मुहा चिट्ठह? तए णं ते जियसत्तुपामोक्खा मल्लिं विदेहरायवरकन्नं एवं वयंति–एवं खलु देवानुप्पिए! अम्हे इमेणं असुभेणं गंधेणं अभिभूया समाणा सएहिं-सएहिं उत्तरिज्जेहिं आसाइं पिहेत्ता चिट्ठामो। तए णं मल्ली विदेहरायवरकन्ना ते जियसत्तुपामोक्खे एवं वयासी–जइ ताव देवानुप्पिया! इमीसे कनगमईए मत्थयछिड्डाए पउमुप्पल-पिहाणाए पडिमाए कल्लाकल्लिं ताओ मणुण्णाओ असन-पान-खाइम-साइमाओ एगमेगे पिंडे पक्खिप्पमाणे-पक्खिप्पमाणे इमेयारूवे असुभे पोग्गल-परिणामे, इमस्स पुण ओरालियसरीरस्स खेलासवस्स वंतासवस्स पित्तासवस्स सुक्का सवस्स सोणिय-पूयासवस्स दुरुय-ऊसास-नीसासस्स दुरुय-मुत्त-पूइय-पुरीस-पुण्णस्स सडण-पडण-छेयण-विद्धंसण-धम्मस्स केरिसए य परिणामे भविस्सइ? तं मानं तुब्भे देवानुप्पिया! मानुस्सएसु कामभोगेसु सज्जह रज्जह गिज्झह मुज्झह अज्झोववज्जह एवं खलु देवानुप्पिया! अम्हे इमाओ तच्चे भवग्गहणे अवरविदेहवासे सलिलावतिंसि विजए वीयसोगाए रायहाणीए महब्बलपामोक्खा सत्तवि य बालवयंसया रायाणो होत्था–सहजाया जाव पव्वइया। तए णं अहं देवानुप्पिया! इमेणं कारणेणं इत्थीनामगोयं कम्मं निव्वत्तेमि– जइ णं तुब्भे चउत्थं उवसंपज्जित्ता णं विहरइ, तए णं अहं छट्ठं उवसंपज्जित्ता णं विहरामि सेसं तहेव सव्वं। तए णं तुब्भे देवानुप्पिया! कालमासे कालं किच्चा जयंते विमाणे उववन्ना। तत्थ णं तुब्भं देसूणाइं बत्तीसं सागरोवमाइं ठिई। तए णं तुब्भे ताओ देवलोगाओ अनंतरं चयं चइत्ता इहेव जंबुद्दीवे दीवे जाव साइं-साइं रज्जाइं उवसंपज्जित्ता णं विहरइ। तए णं अहं ताओ देवलोगाओ आउक्खएणं जाव दारियत्ताए पच्चायाया।
Sutra Meaning : જુઓ સૂત્ર ૯૨
Mool Sutra Transliteration : [sutra] tae nam tesim jiyasattupamokkhanam chhanham rainam duya jeneva mihila teneva paharettha gamanae. Tae nam chhappi duyaga jeneva mihila teneva uvagachchhamti, uvagachchhitta mihilae aggujjanamsi patteyam-patteyam khamdhavaranivesam karemti, karetta mihilam rayahanim anuppavisamti, anuppavisitta jeneva kumbhae teneva uvagachchhamti, uvagachchhitta patteyam karayala pariggahiyam sirasavattam matthae amjalim kattu sanam-sanam rainam vayanaim nivedemti. Tae nam se kumbhae tesim duyanam amtiyam eyamattham sochcha asurutte rutthe kuvie chamdikkie misimisemane tivaliyam bhiudim nidale sahattu evam vayasi–na demi nam aham tubbham mallim videha-rayavarakannam ti kattu te chhappi due asakkariya asammaniya avaddarenam nichchhubhavei. Tae nam te jiyasattupamokkhanam chhanham rainam duya kumbhaenam ranna asakkariya asammaniya avaddarenam nichchhubhaviya samana jeneva saya-saya janavaya jeneva sayaim-sayaim nagaraim jeneva saya-saya rayano teneva uvagachchhamti, uvagachchhitta karayala pariggahiyam sirasavattam matthae amjalim kattu evam vayasi–evam khalu sami! Amhe jiyasattupamokkhanam chhanham rainam duya jamagasamagam cheva jeneva mihila teneva uvagaya java avaddarenam nichchhubhavei. Tam na dei nam sami! Kumbhae mallim videharayavarakannam sanam-sanam rainam eyamattham nivedemti. Tae nam te jiyasattupamokkha chhappi rayano tesim duyanam amtie eyamattham sochcha nisamma asurutta ruttha kuviya chamdikkiya misimisemana annamannassa duyasampesanam karemti, karetta evam vayasi–evam khalu devanuppiya! Amham chhanham rainam duya jamagasamagam cheva mihila teneva uvagaya java avaddarenam nichchhudha. Tam seyam khalu devanuppiya! Kumbhagassa jattam genhittae tti kattu annamannassa eyamattham padisunemti, padisunetta nhaya sannaddha hatthikhamdhavaragaya sakoremtamalladamenam chhattenam dharijja-manenam seyavara-chamarahim viijjamana mahaya haya-gaya-raha-pavarajohakaliyae chauramginie senae saddhim samparivuda savviddhie java dumdubhi-naiya-ravenam saehimto-saehimto nagarehimto niggachchhamti, niggachchhitta egayao milayamti, jeneva mahila teneva paharettha gamanae. Tae nam kumbhae raya imise kahae laddhatthe samane balavauyam saddavei, saddavetta evam vayasi–khippameva haya-gaya-raha-pavarajohakaliyam chauramginim senam sannahehi, sannahetta eyamanattiyam pachchappinahi sevi java pachchappinati. Tae nam kumbhae raya nhae sannaddhe hatthikhamdhavaragae sakoremtamalladamenam chhattenam dharijjamanenam seyavarachamarahim viijjamane mahaya haya-gaya-raha-pavara-johakaliyae chauramginie senae saddhim samparivude savviddhie java dumdubhinaiyaravenam mihilam majjhammajjhenam nijjai, nijjavetta videha-janavayam majjhammajjhenam jeneva desaggam teneva khamdhavaranivesam karei, karetta jiyasattupamokkha chhappi ya rayano padivalemane jujjhasajje padichitthai. Tae nam te jiyasattupamokkha chhappim rayano jeneva kumbhae raya teneva uvagachchhamti, uvagachchhitta kumbhaena ranna saddhim sampalagga yavi hottha. Tae nam te jiyasattupamokkha chhappi rayano kumbhayam rayam haya-mahiya-pavaravira-ghaiya-vivadiyachimdha-dhaya-padagam kichchhovagayapanam disodisim padiseheti. Tae nam se kumbhae jiyasattupamokkhehim chhahim raihim haya-mahiya-pavaravira-ghaiya-vivadiyachimdha-dhaya-padage kichchho-vagayapane disodisim padisehie samane atthame abale avirie apurisakkara-parakkame adharanijjamiti kattu siggham turiyam chavalam chamdam jainam veiyam jeneva mihila teneva uvagachchhai, uvagachchhitta mihilam anupavisai, anupavisitta mihilae duvaraim pihei, pihetta rohasajje chitthai. Tae nam te jiyasattupamokkha chhappi rayano jeneva mihila teneva uvagachchhamti, uvagachchhitta mihilam rayahanim nissamcharam niruchcharam savvao samamta orumbhitta nam chitthamti. Tae nam se kumbhae raya mihilam rayahanim oruddham janitta abbhimtariyae uvatthanasalae sihasanavaragae tesim jiyasattupamokkhanam chhanham rainam amtarani ya chhiddani ya vivarani ya mammani ya alabhamane bahuhim aehim ya uvaehim ya, uppattiyahi ya venaiyahi ya kammayahi ya parinamiyahi ya– buddhohim parinamemane-parinamemane kimchi ayam va uvayam va alabhamane ohayamanasamkappe karatalapalhatthamuhe attajjhanovagae jjhiyayai. Imam cha nam malli videharayavarakanna nhaya kayavalikamma kayakouyamamgalapayachchhitta savvalamkara-vibhusiya bahuhim khujjahim samparivuda jeneva kumbhae teneva uvagachchhai, uvagachchhitta kumbhagassa payaggahanam karei. Tae nam kumbhae mallim videharayavarakannam no adhai no pariyanai tusinie samchitthai. Tae nam malli videharayavarakanna kumbhagam evam vayasi–tubbhe nam tao! Annaya mamam ejjamanim pasitta adhaha pariyanaha amke niveseha. Iyanim tao! Tubbhe mamam no adhaha no pariyanaha no amke niveseha. Kinnam tubbham ajja ohaya manasamkappa karatalapalhatthamuha attajjhanovagaya jjhiyayaha? Tae nam kumbhae mallim videharayavarakannam evam vayasi–evam khalu putta! Tava kajje jiyasattupamokkhehim chhahim raihim duya sampesiya. Te nam mae asakkariya asammaniya avaddarenam nichchhudha. Tae nam jiyasattupamokkha chhappi rayano tesim duyanam amtie eyamattham sochcha parikuviya samana mihilam rayahanim nissamcharam niruchcharam savvao samamta orumbhitta nam chitthamti. Tae nam aham putta tesim jiyasattupamokkhanam chhanham rainam amtarani [ya chhiddani ya vivarani ya mammani ya?] alabhamane java attajjha-novagae jjhiyami. Tae nam sa malli videharayavarakanna kumbhagam rayam evam vayasi–manam tubbhe tao! Ohayamana-samkappa karatalapalhatthamuha attajjhanovagaya jjhiyayaha. Tubbhe nam tao! Tesim jiyasattu-pamokkhanam chhanham rainam patteyam-patteyam rahassie duyasampese kareha, egamegam evam vayaha–tava demi mallim videharayavarakannam ti kattu samjjhakalasamayamsi pavirala-manusamsi nisamta-padinisamtamsi patteyam-patteyam mihilam rayahanim anuppaveseha, anuppavesetta gabbhadharaesu anuppaveseha, anuppavesetta mihilae rayahanie duvaraim piheha, pihetta rohasajja chitthaha. Tae nam kumbhae tesim jiyasattupamokkhanam chhanham rainam patteyam-patteyam rahassie duyasampese karei java rohasajje chitthai. Tae nam te jiyasattupamokkha chhappi rayano kallam pauppabhayae rayanie java utthiyammi sure sahassarassimmi dinayare teyasa jalamte jalamtarehim kanagamaim matthayachhiddam paumuppala-pihanam padimam pasamti–esa nam malli videharayavarakannatti kattu mallie rayavarakannae ruve ya jovvane ya lavanne ya muchchhiya giddha gadiya ajjhovavanna animisae ditthie pehamana-pehamana chitthamti. Tae nam sa malli videharayavarakanna nhaya kayavalikamma kayakouya-mamgala-payachchhitta savvalamkaravibhusiya bahuhim khujjahim java parikkhitta jeneva jaladharae jeneva kanagamai matthaya-chhidda paumuppala-pihana padima teneva uvagachchhai, uva gachchhitta tise kanagamaie matthayachhiddae paumuppala-pihanae padimae matthayao tam paumuppala-pihanam avanei. Tao nam gamdhe niddhavei, se jahanamae–ahimade i va java etto asubhatarae cheva. Tae nam te jiyasattupamokkha chhappi rayano tenam asubhenam gamdhenam abhibhuya samana saehim-saehim uttarijjehim asaim pihemti, pihetta parammuha chitthamti. Tae nam sa malli videharayavarakanna te jiyasattupamokkhe evam vayasi–kinnam tubbhe devanuppiya! Saehim-saehim uttarijjehim asaim pihetta parammuha chitthaha? Tae nam te jiyasattupamokkha mallim videharayavarakannam evam vayamti–evam khalu devanuppie! Amhe imenam asubhenam gamdhenam abhibhuya samana saehim-saehim uttarijjehim asaim pihetta chitthamo. Tae nam malli videharayavarakanna te jiyasattupamokkhe evam vayasi–jai tava devanuppiya! Imise kanagamaie matthayachhiddae paumuppala-pihanae padimae kallakallim tao manunnao asana-pana-khaima-saimao egamege pimde pakkhippamane-pakkhippamane imeyaruve asubhe poggala-pariname, imassa puna oraliyasarirassa khelasavassa vamtasavassa pittasavassa sukka savassa soniya-puyasavassa duruya-usasa-nisasassa duruya-mutta-puiya-purisa-punnassa sadana-padana-chheyana-viddhamsana-dhammassa kerisae ya pariname bhavissai? Tam manam tubbhe devanuppiya! Manussaesu kamabhogesu sajjaha rajjaha gijjhaha mujjhaha ajjhovavajjaha evam khalu devanuppiya! Amhe imao tachche bhavaggahane avaravidehavase salilavatimsi vijae viyasogae rayahanie mahabbalapamokkha sattavi ya balavayamsaya rayano hottha–sahajaya java pavvaiya. Tae nam aham devanuppiya! Imenam karanenam itthinamagoyam kammam nivvattemi– jai nam tubbhe chauttham uvasampajjitta nam viharai, tae nam aham chhattham uvasampajjitta nam viharami sesam taheva savvam. Tae nam tubbhe devanuppiya! Kalamase kalam kichcha jayamte vimane uvavanna. Tattha nam tubbham desunaim battisam sagarovamaim thii. Tae nam tubbhe tao devalogao anamtaram chayam chaitta iheva jambuddive dive java saim-saim rajjaim uvasampajjitta nam viharai. Tae nam aham tao devalogao aukkhaenam java dariyattae pachchayaya.
Sutra Meaning Transliteration : Juo sutra 92