Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104757
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-३ अंड

 Translated Chapter :

શ્રુતસ્કંધ-૧

અધ્યયન-૩ અંડ
Section : Translated Section :
Sutra Number : 57 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तत्थ णं चंपाए नयरीए देवदत्ता नामं गणिया परिवसइ–अड्ढा दित्ता वित्ता वित्थिण्ण-विउल-भवन-सयनासन-जाण-वाहणा बहुधन-जायरूव-रयया आओग-पओग-संपउत्ता विच्छिड्डिय-पउर-भत्तपाणा चउसट्ठिकलापंडिया चउसट्ठिगणियागुणोववेया अउणत्तीसं विसेसे रममाणी एक्कवीस-रइगुणप्पहाणा बत्तीसपुरिसोवयारकुसला नवंगसुत्तपडिबोहिया अट्ठारसदेसीभासाविसारया सिंगारागारचारुवेसा संगय-गय- हसिय-भणिय- चेट्ठिय-विलाससंलावुल्लाव- निउण-जुत्तोवयार-कुसला ऊसियज्झया सहस्सलंभा विदिण्णछत्त-चामर-बालवीयणिया कण्णीरहप्पयाया वि होत्था। बहूणं गणियासहस्साणं आहेवच्चं पोरेवच्चं सामित्तं भट्टित्तं महत्तरगतं आणा-ईसर-सेनावच्चं कारेमाणी पालेमाणी महयाऽहय-नट्ट-गीय-वाइय-तंती-तल-ताल-तुडिय-धन-मुइंग-पडुप्पवाइयरवेणं विउलाइं भोगभोगाइं भुंजमाणी विहरइ। तए णं तेसिं सत्थवाहदारगाणं अन्नया कयाइ पुव्वावरण्हकालसमयंसि जिमियभुत्तुत्तरागयाणं समाणाणं आयंताणं चोक्खाणं परमसुइभूयाणं सुहासणवरगयाणं इमेयारूवे मिहोकहासमुल्लावे समुप्पज्जित्था–सेयं खलु अम्हं देवानुप्पिया! कल्लं पाउप्पभायाए रयणीए जाव उट्ठियम्मि सूरे सहस्सरस्सिम्मि दिनयरे तेयसा जलंते विपुलं असनं पानं खाइमं साइमं उवक्खडावेत्ता तं विपुलं असनं पानं खाइमं साइमं धूव-पुप्फ-गंध-वत्थ-मल्लालंकारं गहाय देवदत्ताए गणियाए सद्धिं सुभूमिभागस्स उज्जाणस्स उज्जाणसिरिं पच्चणुब्भवमाणाणं विहरित्तए त्ति कट्टु अन्नमन्नस्स एयमट्ठं पडिसुणेंति, पडिसुणेत्ता कल्लं पाउप्पभायाए रयणीए जाव उट्ठियम्मि सूरे सहस्सरस्सिम्मि दिनयरे तेयसा जलंते कोडुंबियपुरिसे सद्दावेंति, सद्दावेत्ता एवं वयासी–गच्छह णं देवानुप्पिया! विपुलं असन-पान-खाइम-साइमं उवक्खडेह, उवक्खडेत्ता तं विपुलं असन-पान-खाइम-साइम धूव-पुप्फ-गंध-वत्थ-मल्लालंकारं गहाय जेणेव सुभूमिभागे उज्जाणे जेणेव नंदा पुक्खरिणी तेणेव उवागच्छइ, उवागच्छित्ता नंदाए पोक्खरिणीए अदूरसामंते थूणामंडवं आहणह–आसियसम्मज्जिओवलित्तं पंचवण्ण-सरससुरभि-मुक्कपुप्फपुंजोवयारकलियं कालागरु-पवरकुंदुरुक्क-तुरुक्क-धूव-डज्झंत-सुरभि-मघमघेंत-गंधुद्धुयाभिरामं सुगंधवर-गंधगंधिय गंधवट्टिभूयं करेह, करेत्ता अम्हे पडिवालेमाणा-पडिवालेमाणा चिट्ठह जाव चिट्ठंति। तए णं ते सत्थवाहदारगा दोच्चंपि कोडुंबियपुरिसे सद्दावेंति, सद्दावेत्ता एवं वयासी–खिप्पामेव भो देवानुप्पिया! लहुकरण-जुत्त-जोइयं समखुर-वालिहाण- समलिहिय-तिक्खग्गसिंगएहिं रयया-मय-घंट-सुत्तरज्जु-पवरकंचण-खचिय-नत्थपग्गहोग्ग-हियएहिं नीलुप्पलकयामेलएहिं पवर-गोण-जुवाणएहिं नाना-मणि-रयण-कंचण-घंटियाजालपरिक्खित्तं पवरलक्खणोववेयं जुत्तामेव पवहणं उवणेह। ते वि तहेव उवणेंति। तए णं ते सत्थवाहदारगा ण्हाया कयबलिकम्मा कय-कोउय-मंगल-पायच्छित्ता अप्पमहग्घा-भरणालंकिय सरीरा पवहणं दुरुहंति, दुरुहित्ता जेणेव देवदत्ताए गणियाए गिहे तेणेव उवागच्छंति, उवागच्छित्ता पवहणाओ पच्चोरुहंति, पच्चोरुहित्ता देवदत्ताए गणियाए गिहं अनुप्पविसंति। तए णं सा देवदत्ता गणिया ते सत्थवाहदारए एज्जमाणे पासइ, पासित्ता हट्ठतुट्ठा आसनाओ अब्भुट्ठेइ, अब्भुट्ठेत्ता सत्तट्ठपयाइं अनुगच्छइ, अनुगच्छित्ता ते सत्थवाहदारए एवं वयासी–संदिसंतु णं देवानुप्पिया! किमिहागमणप्पओयणं? तए णं ते सत्थवाहदारगा देवदत्तं गणियं एवं वयासी–इच्छामो णं देवानुप्पिए! तुमे सद्धिं सुभूमिभागस्स उज्जाणस्स उज्जाणसिरिं पच्चणुब्भवमाणा विहरित्तए। तए णं सा देवदत्ता तेसिं सत्थवाहदारगाणं एयमट्ठं पडिसुणेइ, पडिसुणेत्ता ण्हाया कयबलिकम्मा जाव सिरीसमाणवेसा जेणेव सत्थवाहदारगा तेणेव उवागया। तए णं ते सत्थवाहदारगा देवत्ताए गणियाए सद्धिं जाणं दुरुहंति, दुरुहित्ता चंपाए नयरीए मज्झंमज्झेणं जेणेव सुभूमिभागे उज्जाणे जेणेव नंदा पोक्खरिणी तेणेव उवागच्छंति, उवागच्छित्ता पवहणाओ पच्चोरुहंति, पच्चोरुहित्ता नंदं पोक्खरिणिं ओगाहेंति, ओगाहेत्ता जलमज्जणं करेंति, करेत्ता जलकिड्डं करेंति, करेत्ता ण्हाया देवदत्ताए सद्धिं नंदाओ पोक्खरिणीओ पच्चुत्तरंति, जेणेव थूणामंडवे तेणेव उवागच्छंति, उवागच्छित्ता थूणामंडवं अनुप्पविसंति, अनुप्पविसित्ता सव्वालंकार-भूसिया आसत्था वीसत्था सुहासणवरगया देवदत्ताए सद्धिं तं विपुलं असन-पान-खाइम-साइमं धूव-पुप्फ-वत्थ-गंध-मल्लालंकारं आसाएमाणा विसाएमाणा परिभाएमाणा परिभुंजेमाणा एवं च णं विहरंति। जिमियभुत्तुत्तरागया वि य णं समाणा आयंता चोक्खा परमसुइभूया, देवदत्ताए सद्धिं विपुलाइं कामभोगाइं भुंजमाणा विहरंति।
Sutra Meaning : જુઓ સૂત્ર ૫૬
Mool Sutra Transliteration : [sutra] tattha nam champae nayarie devadatta namam ganiya parivasai–addha ditta vitta vitthinna-viula-bhavana-sayanasana-jana-vahana bahudhana-jayaruva-rayaya aoga-paoga-sampautta vichchhiddiya-paura-bhattapana chausatthikalapamdiya chausatthiganiyagunovaveya aunattisam visese ramamani ekkavisa-raigunappahana battisapurisovayarakusala navamgasuttapadibohiya attharasadesibhasavisaraya simgaragaracharuvesa samgaya-gaya- hasiya-bhaniya- chetthiya-vilasasamlavullava- niuna-juttovayara-kusala usiyajjhaya sahassalambha vidinnachhatta-chamara-balaviyaniya kannirahappayaya vi hottha. Bahunam ganiyasahassanam ahevachcham porevachcham samittam bhattittam mahattaragatam ana-isara-senavachcham karemani palemani mahayahaya-natta-giya-vaiya-tamti-tala-tala-tudiya-dhana-muimga-paduppavaiyaravenam viulaim bhogabhogaim bhumjamani viharai. Tae nam tesim satthavahadaraganam annaya kayai puvvavaranhakalasamayamsi jimiyabhuttuttaragayanam samananam ayamtanam chokkhanam paramasuibhuyanam suhasanavaragayanam imeyaruve mihokahasamullave samuppajjittha–seyam khalu amham devanuppiya! Kallam pauppabhayae rayanie java utthiyammi sure sahassarassimmi dinayare teyasa jalamte vipulam asanam panam khaimam saimam uvakkhadavetta tam vipulam asanam panam khaimam saimam dhuva-puppha-gamdha-vattha-mallalamkaram gahaya devadattae ganiyae saddhim subhumibhagassa ujjanassa ujjanasirim pachchanubbhavamananam viharittae tti kattu annamannassa eyamattham padisunemti, padisunetta kallam pauppabhayae rayanie java utthiyammi sure sahassarassimmi dinayare teyasa jalamte kodumbiyapurise saddavemti, saddavetta evam vayasi–gachchhaha nam devanuppiya! Vipulam asana-pana-khaima-saimam uvakkhadeha, uvakkhadetta tam vipulam asana-pana-khaima-saima dhuva-puppha-gamdha-vattha-mallalamkaram gahaya jeneva subhumibhage ujjane jeneva namda pukkharini teneva uvagachchhai, uvagachchhitta namdae pokkharinie adurasamamte thunamamdavam ahanaha–asiyasammajjiovalittam pamchavanna-sarasasurabhi-mukkapupphapumjovayarakaliyam kalagaru-pavarakumdurukka-turukka-dhuva-dajjhamta-surabhi-maghamaghemta-gamdhuddhuyabhiramam sugamdhavara-gamdhagamdhiya gamdhavattibhuyam kareha, karetta amhe padivalemana-padivalemana chitthaha java chitthamti. Tae nam te satthavahadaraga dochchampi kodumbiyapurise saddavemti, saddavetta evam vayasi–khippameva bho devanuppiya! Lahukarana-jutta-joiyam samakhura-valihana- samalihiya-tikkhaggasimgaehim rayaya-maya-ghamta-suttarajju-pavarakamchana-khachiya-natthapaggahogga-hiyaehim niluppalakayamelaehim pavara-gona-juvanaehim nana-mani-rayana-kamchana-ghamtiyajalaparikkhittam pavaralakkhanovaveyam juttameva pavahanam uvaneha. Te vi taheva uvanemti. Tae nam te satthavahadaraga nhaya kayabalikamma kaya-kouya-mamgala-payachchhitta appamahaggha-bharanalamkiya sarira pavahanam duruhamti, duruhitta jeneva devadattae ganiyae gihe teneva uvagachchhamti, uvagachchhitta pavahanao pachchoruhamti, pachchoruhitta devadattae ganiyae giham anuppavisamti. Tae nam sa devadatta ganiya te satthavahadarae ejjamane pasai, pasitta hatthatuttha asanao abbhutthei, abbhutthetta sattatthapayaim anugachchhai, anugachchhitta te satthavahadarae evam vayasi–samdisamtu nam devanuppiya! Kimihagamanappaoyanam? Tae nam te satthavahadaraga devadattam ganiyam evam vayasi–ichchhamo nam devanuppie! Tume saddhim subhumibhagassa ujjanassa ujjanasirim pachchanubbhavamana viharittae. Tae nam sa devadatta tesim satthavahadaraganam eyamattham padisunei, padisunetta nhaya kayabalikamma java sirisamanavesa jeneva satthavahadaraga teneva uvagaya. Tae nam te satthavahadaraga devattae ganiyae saddhim janam duruhamti, duruhitta champae nayarie majjhammajjhenam jeneva subhumibhage ujjane jeneva namda pokkharini teneva uvagachchhamti, uvagachchhitta pavahanao pachchoruhamti, pachchoruhitta namdam pokkharinim ogahemti, ogahetta jalamajjanam karemti, karetta jalakiddam karemti, karetta nhaya devadattae saddhim namdao pokkharinio pachchuttaramti, jeneva thunamamdave teneva uvagachchhamti, uvagachchhitta thunamamdavam anuppavisamti, anuppavisitta savvalamkara-bhusiya asattha visattha suhasanavaragaya devadattae saddhim tam vipulam asana-pana-khaima-saimam dhuva-puppha-vattha-gamdha-mallalamkaram asaemana visaemana paribhaemana paribhumjemana evam cha nam viharamti. Jimiyabhuttuttaragaya vi ya nam samana ayamta chokkha paramasuibhuya, devadattae saddhim vipulaim kamabhogaim bhumjamana viharamti.
Sutra Meaning Transliteration : Juo sutra 56