Sutra Navigation: Mahanishith ( महानिशीय श्रुतस्कंध सूत्र )

Search Details

Mool File Details

Anuvad File Details

Sr No : 1018084
Scripture Name( English ): Mahanishith Translated Scripture Name : महानिशीय श्रुतस्कंध सूत्र
Mool Language : Ardha-Magadhi Translated Language : Hindi
Chapter :

अध्ययन-७ प्रायश्चित् सूत्रं

चूलिका-१ एकांत निर्जरा

 Translated Chapter :

अध्ययन-७ प्रायश्चित् सूत्रं

चूलिका-१ एकांत निर्जरा
Section : Translated Section :
Sutra Number : 1384 Category : Chheda-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] संकट्ठाणं विवज्जंतो। पंच समिय तिगुत्तो गोयर चरियाए पाहुडियं न पडियरिया, तस्स णं चउत्थं पायच्छित्तं उवइसेज्जा। जइ णं नो अभत्तट्ठी ठवणाकुलेसु पविसे खवणं। सहसा पडिवुत्थं पडिगाहियं, तक्खणा न परिट्ठवे निरुवद्दवे थंडिले, खवणं। अकप्पं पडिगाहेज्जा, चउत्थाइ। जहा जोगं कप्पं वा पडिसेहेइ, उवट्ठावणं। गोयर-पविट्ठो कहं, वा विकहं वा, उभयकहं, वा पत्थावेज्ज, वा उदीरेज्ज, वा कहेज्ज, वा निसामेज्ज, वा छट्ठं। गोयर-मागओ य भत्तं, वा पाणं, वा भेसज्जं, वा जं जेण चित्तियं, जं जहा य चित्तियं, जहा य पडिगाहियं तं तहा सव्वं णालोएज्जा, पुरिवड्ढं। इरियाए अपडिक्कंताए भत्त-पाणाइयं आलोएज्जा, पुरिवड्ढं, ससरक्खेहिं पाएहिं अपमज्जि-एहिं इरियं पडिकमेज्जा पुरिमड्ढं। इरियं पडिक्कमिउकामो तिण्णि वाराओ चलणगाणं हिट्ठिम भूमि भागं न पमज्जेज्जा, निव्विइयं। कन्नोट्ठियाए, वा मुहनंतगेण, वा विना इरियं पडिक्कमे, मिच्छदुक्कडं पुरिमड्ढं वा। पाहुडियं आलोइत्ता सज्झायं पट्ठावित्तु तिसराइं धम्मोमंगलाइं न कड्ढेज्जा, चउत्थं। धम्मो मंगलगेहिं च णं अपयट्टिएहिं चेइय-साहूहिं च अवंदिएहिं पारावेज्जा, पुरिवड्ढं। अपाराविएणं भत्तं, वा पाणं, वा भेसज्जं, वा परिभुंजे चउत्थं। गुरुणो अंतियं न पारावेज्जा, नो उवओगं करेज्जा, नो णं पाहुडियं आलोएज्जा, न सज्झायं पट्ठावेज्जा, एतेसुं पत्तेयं उवट्ठा-वणं। गुरु वि य जेणं नो उवउत्ते हवेज्जा, से णं पारंचियं। साहम्मियाणं संविभागेणं अविइन्नेणं जं किंचि भेसज्जाइ परिभुंजे, छट्ठं। भुंजंते, इ वा परिसेवंते, इ वा पारिसाडिं करेज्जा, छट्ठं। तित्त-कडुय-कसायंबिल-महुर-लवणाइं रसाइं आसायंते इ वा पलि-सायंते इ वा परिभुंजे, चउत्थं। तेसुं चेव रसेसुं रागं गच्छे, खमणं अट्ठमं वा अकएणं काउसग्गेणं विगइं परिभुंजे, पंचेवायंबिलाणि। दोण्हं विगईणं उड्ढं परिभुंजे, पंच निव्विगइयाणि। अकारणिगो विगइ-परिभोगं कुज्जा, अट्ठमं। असनं, वा पानं, वा भेसज्जं, वा गिलाणस्स अइण्णाणुच्चरियं परिभुंजे, पारंचियं। गिलाणेणं अपडिजागरिएणं भुंजे, उवट्ठावणं। सव्वमवि निय-कत्तव्वं परिचेच्चाणं गिलाण कत्तव्वं न करेज्जा, अवंदे। गिलाण-कत्तव्वमालंबिऊणं नियय कत्तव्वं पमाएज्जा, अवंदे। गिलाण कप्पं न उत्तारेज्जा, अट्ठमं। गिलाणेण सद्दिरे एग-सद्देणागंतुं जमाइसे तं न कुज्जा, पारंचिए। नवरं जइ णं से गिलाणे सत्थचित्ते, अहा णं सन्निवायादीहिं उब्भामिय माणसे हवेज्जा, तओ जमेव गिलाणेणमाइट्ठं तं न कायव्वं तस्स जहाजोगं कायव्वं न करेज्जा, संघबज्झो। आहाकम्मं, वा उद्देसियं, वा पूइकम्मं, वा मीसजायं, वा ठवणं, वा पाहुडियं, वा पाओयरं, वा कीयं, वा पामिच्चं वा पारियट्टियं, वा अभिहडं, वा उब्भिन्नं, वा मालोहडं, वा अच्छेज्जं, वा अनिसट्ठं, वा अज्झोयरं, वा धाई दूई णिमित्तेणं आजीव वणिमग तिगिच्छा कोह मान माया लोभेणं पुव्विं संथव पच्छा संथव विज्जा मंत चुन्न जोगे संकिय मक्खिय पिहिय साहरिय दाय गुम्मीस अपरिणय लित्त छड्डिय एयाए बायालाए दोसेहिं अन्नयर दोस दूसियं आहारं, वा पाणं, वा भेसज्जं, वा परिभुंजेज्जा, सव्वत्थ पत्तेगं जहा-जोगं कमेणं खमनायंबिलादी उवइसेज्जा। छण्हं दोसेहिं कारण जायाणमसई भुंजे अट्ठमं। सधूम सइंगालं भुंजे उवट्ठावणं। संजोइय संजोइय जीहा लेहडत्ताए भुंजे, आयंबिल खवणं। संते बल वीरिय पुरिसयार परक्कमे अट्ठमि चाउद्दसी नाण पंचमी पज्जोसवणा चाउम्मासिए चउत्थट्ठम छट्ठे न करेज्जा, खमणं। कप्पं णावियइ, चउत्थं। कप्पं परिट्ठवेज्जा, दुवालसं। पत्तग मत्तग कमढगं वा अन्नयरं वा भंडोवगरण जायं अतिप्पिऊणं ससिणिद्धं वा अससिणिद्धं अणुल्लेहियं ठवेज्जा चउत्थं। पत्ता बंधस्स णं गंठिओ न छोडेज्जा न सोहेज्जा चउत्थं पच्छित्तं। समुद्देस मंडलीओ संघट्टेज्जा, आयामं, संघट्टं वा समुद्देस मंडलिं च्छिविऊणं दंडा पुंछणगं न देज्जा, निव्विइयं समुद्देस मंडलीं छिविऊणं दंडा पुंछणगं च दाऊणं इरियं न पडिक्कमेज्जा, निव्वीइयं। एवं इरियं पडिक्कमित्तु दिवसावसेसियं न संवरेज्जा, आयामं गुरु-पुरओ न संवरेज्जा, पुरिमड्ढं। अविहीए संवरेज्जा, आयंबिलं। संवरेत्ता णं चेइय साहूणं वंदणं न करेज्जा, पुरिमड्ढं। कुसीलस्स वंदनगं करेज्जा, अवंदे। एयावसरम्ही उ बहिर-भूमीए पाणिय-कज्जेणं गंतूणं जावागमे ताव णं समोगाढेज्जा किंचूणाहियं तइय-पोरिसी। तमवि जाव णं इरियं पडिक्कमित्ता णं विहिए गमनागमनं च आलोइऊणं पत्तगमत्तग-कमढगाइयं भंडोवगरणं निक्खिवइ, ताव णं अणूणाहिया तइय-पोरिसी, हवेज्जा। एवं अइक्कंताए तइय पोरिसीए गोयमा जे णं भिक्खू उवहिं थंडिलाणि विहिणा गुरु पुरओ संदिसावेत्ता णं पाणगस्स य संव-रेऊण काल वेलं जाव सज्झायं न करेज्जा, तस्स णं छट्ठं पायच्छित्तं उवइसेज्जा। एवं च आगयाए कालवेलाए गुरुसंतिए उवहिं थंडिले वंदन पडिक्कमण सज्झाय मंडलीओ वसहिं च पच्चुप्पेहित्ताणं समाही खइरोल्लगे य संजमिऊणं अत्तणगे उवहिं थंडिल्ले पच्चुप्पेहित्तु गोयर चरियं पडिक्कमिऊणं कालो गोयर चरिया घोसणं काऊणं तओ देवसियाइयार विसोहि निमित्तं काउस्सग्गं करेज्जा, एएसु पत्तेगं उवट्ठावणं पुरिवड्ढेगासणगोवट्ठावणं जहा संखेणं नेयं। एयं काऊणं काउस्सग्गं मुहनंतगं पच्चुप्पेहेउं विहीए गुरुणो कितिकम्मं काऊणं जं किंचि कत्थइ सूरुग्गम पभितीए चिट्ठंतेण, वा गच्छंतेण, वा चलंतेण, वा भमंते ण, वा संभरंते ण, वा पुढवि दग अगणि मारुय वणस्सइ हरिय तण बीय पुप्फ फल किसलय पवाल कंदल बि ति चउ पंचिंदियाणं संघट्टण परियावण किलावण उद्दवणं वा कयं हवेज्जा। तहा तिण्हं गुत्तादीणं चउण्हं कसायादीणं पंचण्हं महव्वयादीणं छण्हं जीव निकायादीणं सत्तण्हं पाण पिंडेसणाणं अट्ठण्हं पवयण मायादीणं णवण्हं बंभचेरादीणं दस विहस्स णं समण धम्मस्स नाण दंसण चरित्ताणं च जं खंडियं जं विराहियं तं निंदिऊणं गरहिऊणं आलो-इऊणं पायच्छित्तं च पडिवज्जिऊणं एगग्ग माणसे सुत्तत्थोभयं धणियं भावेमाणे पडिक्कमणं न करेज्जा, उवट्ठावणं। एवं तु अदंसणं गओ सूरिओ। चेइएहिं अवंदिएहिं पडिक्कमेज्जा, चउत्थं। एत्थं च अवसरं विन्नेयं। पडिक्कमिऊणं विहीए रयणीए पढम जामं अणूणगं सज्झायं न करेज्जा, दुवालसं। पढम पोरिसीए अणइक्कंताए संथारगं संदिसावेज्जा, छट्ठं। असंदिसाविएणं संथारगेणं संथारेज्जा, चउत्थं। अपच्चुप्पेहिए थंडिल्ले संथारेइ, दुवालसं। अविहीए संथारेज्जा, चउत्थं। उत्तरपट्टगेणं विना संथारेइ, चउत्थं। दोउडं संथारेज्जा, चउत्थं। कुसिरणप्पयादी संथारेज्जा, सयं आयंबिलाणि। सव्वस्स समण संघस्स साहम्मियाणमसाहम्मियाणं च सव्वस्सेव जीव रासिस्स सव्व भाव-भावंतरेहि णं तिविहं तिविहेणं खामण मरिसावणं अकाऊणं चेइएहिं तु अवंदिएहिं गुरुपायमूलं च उवही देहस्सासणादीणं च सागारेणं पच्चक्खाणेणं अकएणं कन्न विवरेसुं च कप्पास रूवेणं अट्ठइएहिं संथारगम्ही ठाएज्जा, एएसुं पत्तेगं उवट्ठावणं। संथारगम्ही उ ठाऊणमिमस्स णं धम्म सरीरस्स गुरु पारंपरिएणं समुवलद्धेहिं तु इमेहिं परममंतक्खरेहिं दससु वि दिसासुं अहि करि हरि दुट्ठ पंत वाणमंतर पिसायादीणं रक्खं न करेज्जा, उवट्ठाणं। दससु वि दिसासु रक्खं काऊण दुवालसहिं भावनाहिं अभावियाहिं सोवेज्जा, पणुवीसं आयंबिलाणि। एक्कं निद्दं सोऊणं पडिबुद्धे इरियं पडिक्कमेत्ताणं पडिक्कमणकालं जाव सज्झायं न करेज्जा, दुवालसं। पसुत्ते दुसुमिणं वा कुसुमिणं वा ओगाहेज्जा, सएणं उसासेणं काउस्सग्गं। रयणीए छीएज्ज, वा खासेज्ज, वा फलहग पीढग दंडगेण वा खडुक्कगं पउरिया, खमणं। दीया, वा राओ, वा हास खेड्ड कंदप्प णाहवायं करेज्जा, उवट्ठावणं। एवं जे णं भिक्खू सुत्ताइक्कमेणं कालाइक्कमेणं आवासगं कुव्वीया, तस्स णं कारणिगस्स मिच्छुक्कडं गोयमा पायच्छित्तं उवइ-सेज्जा। जे य णं अकारणिगे, तेसिं तु णं जहा-जोगं चउत्थाइए उवएसे य। जे णं भिक्खू सद्दे करेज्जा, सद्दे उवइसेज्जा, सद्दे गाढा-गाढसद्दे य, सव्वत्थ पइपयं पत्तेयं सव्वपएसुं संबज्झावेयव्वे। एवं जे णं भिक्खू आउकायं, वा तेउ कायं, वा इत्थी सरीरावयवं, वा संघट्टेज्जा नो णं परिभुंजेज्जा, से णं तस्स पणुवीसं आयंबिलाणि उवइसेज्जा। जे उ न परिभुंजेज्जा, से णं दुरंत पंत लक्खणे अदट्ठव्वे महापावकम्मे पारंचिए। अहा णं महातवस्सी हवेज्जा, तओ सयरिं मासखवणाणं सयरिं अद्ध मास खवणाणं सयरिं दुवालासाणं सयरिं दस-माणं सयरिं अट्ठमाणं सयरिं छट्ठाणं सयरिं चउत्थाणं सयरिं आयंबिलाणं सयरिं एगट्ठाणाणं सयरिं सुद्धायामेगासणाणं सयरिं निव्वि-गइयाणं जाव णं अणुलोम-पडिलोमेणं निद्दिसेज्जा। एयं च पच्छित्तं जे णं भिक्खू अविसंते समनुट्ठेज्जा, से णं आसन्न पुरेक्खडे नेए।
Sutra Meaning : देखो सूत्र १३८३
Mool Sutra Transliteration : [sutra] samkatthanam vivajjamto. Pamcha samiya tigutto goyara chariyae pahudiyam na padiyariya, tassa nam chauttham payachchhittam uvaisejja. Jai nam no abhattatthi thavanakulesu pavise khavanam. Sahasa padivuttham padigahiyam, takkhana na paritthave niruvaddave thamdile, khavanam. Akappam padigahejja, chautthai. Jaha jogam kappam va padisehei, uvatthavanam. Goyara-pavittho kaham, va vikaham va, ubhayakaham, va patthavejja, va udirejja, va kahejja, va nisamejja, va chhattham. Goyara-magao ya bhattam, va panam, va bhesajjam, va jam jena chittiyam, jam jaha ya chittiyam, jaha ya padigahiyam tam taha savvam naloejja, purivaddham. Iriyae apadikkamtae bhatta-panaiyam aloejja, purivaddham, sasarakkhehim paehim apamajji-ehim iriyam padikamejja purimaddham. Iriyam padikkamiukamo tinni varao chalanaganam hitthima bhumi bhagam na pamajjejja, nivviiyam. Kannotthiyae, va muhanamtagena, va vina iriyam padikkame, michchhadukkadam purimaddham va. Pahudiyam aloitta sajjhayam patthavittu tisaraim dhammomamgalaim na kaddhejja, chauttham. Dhammo mamgalagehim cha nam apayattiehim cheiya-sahuhim cha avamdiehim paravejja, purivaddham. Aparavienam bhattam, va panam, va bhesajjam, va paribhumje chauttham. Guruno amtiyam na paravejja, no uvaogam karejja, no nam pahudiyam aloejja, na sajjhayam patthavejja, etesum patteyam uvattha-vanam. Guru vi ya jenam no uvautte havejja, se nam paramchiyam. Sahammiyanam samvibhagenam aviinnenam jam kimchi bhesajjai paribhumje, chhattham. Bhumjamte, i va parisevamte, i va parisadim karejja, chhattham. Titta-kaduya-kasayambila-mahura-lavanaim rasaim asayamte i va pali-sayamte i va paribhumje, chauttham. Tesum cheva rasesum ragam gachchhe, khamanam atthamam va akaenam kausaggenam vigaim paribhumje, pamchevayambilani. Donham vigainam uddham paribhumje, pamcha nivvigaiyani. Akaranigo vigai-paribhogam kujja, atthamam. Asanam, va panam, va bhesajjam, va gilanassa ainnanuchchariyam paribhumje, paramchiyam. Gilanenam apadijagarienam bhumje, uvatthavanam. Savvamavi niya-kattavvam parichechchanam gilana kattavvam na karejja, avamde. Gilana-kattavvamalambiunam niyaya kattavvam pamaejja, avamde. Gilana kappam na uttarejja, atthamam. Gilanena saddire ega-saddenagamtum jamaise tam na kujja, paramchie. Navaram jai nam se gilane satthachitte, aha nam sannivayadihim ubbhamiya manase havejja, tao jameva gilanenamaittham tam na kayavvam tassa jahajogam kayavvam na karejja, samghabajjho. Ahakammam, va uddesiyam, va puikammam, va misajayam, va thavanam, va pahudiyam, va paoyaram, va kiyam, va pamichcham va pariyattiyam, va abhihadam, va ubbhinnam, va malohadam, va achchhejjam, va anisattham, va ajjhoyaram, va dhai dui nimittenam ajiva vanimaga tigichchha koha mana maya lobhenam puvvim samthava pachchha samthava vijja mamta chunna joge samkiya makkhiya pihiya sahariya daya gummisa aparinaya litta chhaddiya eyae bayalae dosehim annayara dosa dusiyam aharam, va panam, va bhesajjam, va paribhumjejja, savvattha pattegam jaha-jogam kamenam khamanayambiladi uvaisejja. Chhanham dosehim karana jayanamasai bhumje atthamam. Sadhuma saimgalam bhumje uvatthavanam. Samjoiya samjoiya jiha lehadattae bhumje, ayambila khavanam. Samte bala viriya purisayara parakkame atthami chauddasi nana pamchami pajjosavana chaummasie chautthatthama chhatthe na karejja, khamanam. Kappam naviyai, chauttham. Kappam paritthavejja, duvalasam. Pattaga mattaga kamadhagam va annayaram va bhamdovagarana jayam atippiunam sasiniddham va asasiniddham anullehiyam thavejja chauttham. Patta bamdhassa nam gamthio na chhodejja na sohejja chauttham pachchhittam. Samuddesa mamdalio samghattejja, ayamam, samghattam va samuddesa mamdalim chchhiviunam damda pumchhanagam na dejja, nivviiyam samuddesa mamdalim chhiviunam damda pumchhanagam cha daunam iriyam na padikkamejja, nivviiyam. Evam iriyam padikkamittu divasavasesiyam na samvarejja, ayamam Guru-purao na samvarejja, purimaddham. Avihie samvarejja, ayambilam. Samvaretta nam cheiya sahunam vamdanam na karejja, purimaddham. Kusilassa vamdanagam karejja, avamde. Eyavasaramhi u bahira-bhumie paniya-kajjenam gamtunam javagame tava nam samogadhejja kimchunahiyam taiya-porisi. Tamavi java nam iriyam padikkamitta nam vihie gamanagamanam cha aloiunam pattagamattaga-kamadhagaiyam bhamdovagaranam nikkhivai, tava nam anunahiya taiya-porisi, havejja. Evam aikkamtae taiya porisie goyama je nam bhikkhu uvahim thamdilani vihina guru purao samdisavetta nam panagassa ya samva-reuna kala velam java sajjhayam na karejja, tassa nam chhattham payachchhittam uvaisejja. Evam cha agayae kalavelae gurusamtie uvahim thamdile vamdana padikkamana sajjhaya mamdalio vasahim cha pachchuppehittanam samahi khairollage ya samjamiunam attanage uvahim thamdille pachchuppehittu goyara chariyam padikkamiunam kalo goyara chariya ghosanam kaunam tao devasiyaiyara visohi nimittam kaussaggam karejja, eesu pattegam uvatthavanam purivaddhegasanagovatthavanam jaha samkhenam neyam. Eyam kaunam kaussaggam muhanamtagam pachchuppeheum vihie guruno kitikammam kaunam jam kimchi katthai suruggama pabhitie chitthamtena, va gachchhamtena, va chalamtena, va bhamamte na, va sambharamte na, va pudhavi daga agani maruya vanassai hariya tana biya puppha phala kisalaya pavala kamdala bi ti chau pamchimdiyanam samghattana pariyavana kilavana uddavanam va kayam havejja. Taha tinham guttadinam chaunham kasayadinam pamchanham mahavvayadinam chhanham jiva nikayadinam sattanham pana pimdesananam atthanham pavayana mayadinam navanham bambhacheradinam dasa vihassa nam samana dhammassa nana damsana charittanam cha jam khamdiyam jam virahiyam tam nimdiunam garahiunam alo-iunam payachchhittam cha padivajjiunam egagga manase suttatthobhayam dhaniyam bhavemane padikkamanam na karejja, uvatthavanam. Evam tu adamsanam gao surio. Cheiehim avamdiehim padikkamejja, chauttham. Ettham cha avasaram vinneyam. Padikkamiunam vihie rayanie padhama jamam anunagam sajjhayam na karejja, duvalasam. Padhama porisie anaikkamtae samtharagam samdisavejja, chhattham. Asamdisavienam samtharagenam samtharejja, chauttham. Apachchuppehie thamdille samtharei, duvalasam. Avihie samtharejja, chauttham. Uttarapattagenam vina samtharei, chauttham. Doudam samtharejja, chauttham. Kusiranappayadi samtharejja, sayam ayambilani. Savvassa samana samghassa sahammiyanamasahammiyanam cha savvasseva jiva rasissa savva bhava-bhavamtarehi nam tiviham tivihenam khamana marisavanam akaunam cheiehim tu avamdiehim gurupayamulam cha uvahi dehassasanadinam cha sagarenam pachchakkhanenam akaenam kanna vivaresum cha kappasa ruvenam atthaiehim samtharagamhi thaejja, eesum pattegam uvatthavanam. Samtharagamhi u thaunamimassa nam dhamma sarirassa guru paramparienam samuvaladdhehim tu imehim paramamamtakkharehim dasasu vi disasum ahi kari hari duttha pamta vanamamtara pisayadinam rakkham na karejja, uvatthanam. Dasasu vi disasu rakkham kauna duvalasahim bhavanahim abhaviyahim sovejja, panuvisam ayambilani. Ekkam niddam sounam padibuddhe iriyam padikkamettanam padikkamanakalam java sajjhayam na karejja, duvalasam. Pasutte dusuminam va kusuminam va ogahejja, saenam usasenam kaussaggam. Rayanie chhiejja, va khasejja, va phalahaga pidhaga damdagena va khadukkagam pauriya, khamanam. Diya, va rao, va hasa khedda kamdappa nahavayam karejja, uvatthavanam. Evam je nam bhikkhu suttaikkamenam kalaikkamenam avasagam kuvviya, tassa nam karanigassa michchhukkadam goyama payachchhittam uvai-sejja. Je ya nam akaranige, tesim tu nam jaha-jogam chautthaie uvaese ya. Je nam bhikkhu sadde karejja, sadde uvaisejja, sadde gadha-gadhasadde ya, savvattha paipayam patteyam savvapaesum sambajjhaveyavve. Evam je nam bhikkhu aukayam, va teu kayam, va itthi sariravayavam, va samghattejja no nam paribhumjejja, se nam tassa panuvisam ayambilani uvaisejja. Je u na paribhumjejja, se nam duramta pamta lakkhane adatthavve mahapavakamme paramchie. Aha nam mahatavassi havejja, tao sayarim masakhavananam sayarim addha masa khavananam sayarim duvalasanam sayarim dasa-manam sayarim atthamanam sayarim chhatthanam sayarim chautthanam sayarim ayambilanam sayarim egatthananam sayarim suddhayamegasananam sayarim nivvi-gaiyanam java nam anuloma-padilomenam niddisejja. Eyam cha pachchhittam je nam bhikkhu avisamte samanutthejja, se nam asanna purekkhade nee.
Sutra Meaning Transliteration : Dekho sutra 1383