Sutra Navigation: Nirayavalika ( નિરયાવલિકાદિ સૂત્ર )

Search Details

Mool File Details

Anuvad File Details

Sr No : 1108017
Scripture Name( English ): Nirayavalika Translated Scripture Name : નિરયાવલિકાદિ સૂત્ર
Mool Language : Ardha-Magadhi Translated Language : Gujarati
Chapter :

अध्ययन-१ काल

 Translated Chapter :

અધ્યયન-૧ કાલ
Section : Translated Section :
Sutra Number : 17 Category : Upang-08
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तत्थ णं चंपाए नयरीए सेणियस्स रन्नो पुत्ते चेल्लणाए देवीए अत्तए कूणियस्स रन्नो सहोयरे कनीयसे भाया वेहल्ले नामं कुमारे होत्था– सूमाले जाव सुरूवे। तए णं तस्स वेहल्लस्स कुमारस्स सेणिएणं रन्ना जीवंतएणं चेव सेयनए गंधहत्थी अट्ठारसवंके हारे य पुव्वदिन्ने। तए णं से वेहल्ले कुमारे सेयनएणं गंधहत्थिणा अंतेउरपरियालसंपरिवुडे चंपं नयरिं मज्झंमज्झेणं निग्गच्छइ, निग्गच्छित्ता अभिक्खणं-अभिक्खणं गंगं महानइं मज्जणयं ओयरइ। तए णं सेयनए गंधहत्थी देवीओ सोंडाए गिण्हइ, गिण्हित्ता अप्पेगयाओ पट्ठे ठवेइ, अप्पेगइयाओ खंधे ठवेइ, अप्पेगइयाओ कुंभे ठवेइ, अप्पेगइयाओ सीसे ठवेइ, अप्पेगइयाओ दंतमूसले ठवेइ, अप्पे-गइयाओ सोंडाए गहाय उड्ढं वेहासं उव्विहइ, अप्पेगइयाओ सोंडागयाओ अंदोलावेइ, अप्पेगइयाओ दंतंतरेसु नीणेइ, अप्पेगइयाओ सीभरेणं ण्हाणेइ, अप्पेगइयाओ अनेगेहिं कीलावणेहिं कीलावेइ। तए णं चंपाए नयरीए सिंघाडग-तिग-चउक्क-चच्चर-चउम्मुह महापहपहेसु बहुजनो अन्न-मन्नस्स एवमाइक्खइ एवं भासइ एवं पन्नवेइ एवं परूवेइ–एवं खलु देवानुप्पिया! वेहल्ले कुमारे सेयनएणं गंधहत्थिणा अंतेउरपरियालसंपरिवुडे जाव अनेगेहिं कीलावणएहिं कीलावेइ, तं एस णं वेहल्ले कुमारे रज्जसिरिफलं पच्चनुभवमाणे विहरइ, नो कुणिए राया। तए णं तीसे पउमावईए देवीए इमीसे कहाए लद्धट्ठाए समाणीए अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था–एवं खलु वेहल्ले कुमारे सेयनएणं गंधहत्थिणा जाव अनेगेहिं कीलावणएहिं कीलावेइ, तं एस णं वेहल्ले कुमारे रज्जसिरिफलं पच्चनुभवमाणे विहरइ, नो कुणिए राया, तं किण्णं अम्हं रज्जेण वा रट्ठेण वा बलेण वा वाहनेन वा कोसेण वा कोट्ठागारेण वा जनवएण वा, जइ णं अम्हं सेयनगे गंधहत्थी नत्थि? तं सेयं खलु ममं कूणियं रायं एयमट्ठं विन्नवित्तएत्तिकट्टु एवं संपेहेइ, संपेहेत्ता जेणेव कूणिए राया तेणेव उवागच्छइ, उवागच्छित्ता करयल परिग्गहियं दसनहं सिरसावत्तं मत्थए अंजलिं कट्टु कूणियं रायं एवं वयासी– एवं खलु सामी! वेहल्ले कुमारे सेयनएणं गंधहत्थिणा जाव अनेगेहिं कीलावणएहिं कीलावेइ, तं किन्नं सामी अम्हं रज्जेण वा जाव जणवएण वा, जइ णं अम्हं सेयनए गंधहत्थी नत्थि? तए णं से कूणिए राया पउमावईए देवीए एयमट्ठं नो आढाइ नो परिजाणाइ तुसिणीए संचिट्ठइ। तए णं सा पउमावई देवी अभिक्खणं-अभिक्खणं कूणियं रायं एयमट्ठं विन्नवेइ। तए णं से कूणिए राया पउमावईए देवीए अभिक्खणं-अभिक्खणं एयमट्ठं विन्नविज्जमाणे अन्नया कयाइ वेहल्लं कुमारं सद्दावेइ, सद्दावेत्ता सेयनगं गंधहत्थिं अट्ठारसवंकं च हारं जायइ। तए णं से वेहल्ले कुमारे कूणियं रायं एवं वयासी–एवं खलु सामी! सेणिएणं रन्ना जीवंतएणं चेव सेयनए गंधहत्थी अट्ठारसवंके य हारे दिन्ने, तं जइ णं सामी! तुब्भे ममं रज्जस्स य जाव जणवयस्स य अद्धं दलयह तो णं अहं तुब्भं सेयनगं गंधहत्थिं अट्ठारसवंकं च हारं दलयामि। तए णं से कूणिए राया वेहल्लस्स कुमारस्स एयमट्ठं नो आढाइ नो परिजाणइ अभिक्खणं-अभिक्खणं सेयनगं गंधहत्थिं अट्ठारसवंकं च हारं जायइ। तए णं तस्स वेहल्लस्स कुमारस्स कूणिएणं रन्ना अभिक्खणं-अभिक्खणं सेयनगं गंधहत्थिं अट्ठारसवंकं च हारं जाइज्जमाणस्स अयमेयारूवे अज्झत्थिए चिंतिए पत्थिए मनोगए संकप्पे सम्मुप्पज्जित्था–? एवं अक्खिविउकामे णं गिण्हिउकामे णं उद्दालेउकामे णं ममं कूणिए राया सेयनगं गंधहत्थिं अट्ठारसवंकं च हारं तं जाव न अक्खिवइ न गिण्हइ न उद्दालेइ ममं कूणिए राया ताव सेयनगं गंधहत्थिं अट्ठारसवंकं च हारं गहाय अंतेउरपरियालसंपरिवुडस्स सभंडमत्तोवगरणमायाए चंपाओ नयरीओ पडिनिक्खमित्ता वेसालीए नयरीए अज्जगं चेडयं रायं उवसंपज्जित्ताणं विहरित्तए– एवं संपेहेइ, संपेहेत्ता कूणियस्स रन्नो अंतराणि य छिद्दाणि य विरहाणि य पडिजागरमाणे-पडिजागरमाणे विहरइ। तए णं से वेहल्ले कुमारे अन्नया कयाइ कूणियस्स रन्नो अंतरं जाणइ, सेयनगं गंधहत्थिं अट्ठारसवंकं च हारं गहाय अंतेउरपरियालसंपरिवुडे सभंडमत्तोवगरणमायाए चंपाओ नयरीओ पडिनिक्खमइ, पडिनिक्खमित्ता जेणेव वेसाली नयरी तेणेव उवागच्छइ, उवागच्छित्ता वेसालीए नयरीए अज्जगं चेडयं रायं उवसंपज्जित्ता णं विहरइ। तए णं से कूणिए राया इमीसे कहाए लद्धट्ठे समाणे–एवं खलु वेहल्ले कुमारे ममं असंविदिते णं सेयनगं गंधहत्थिं अट्ठारसवंकं च हारं गहाय अंतेउरपरियालसंपरिवुडे जाव अज्जगं चेडयं रायं उवसंपज्जित्ता णं विहरइ, तं सेयं खलु ममं सेयनगं गंधहत्थिं अट्ठारसवंकं च हारं आणेउं दूयं पेसित्तए–एवं संपेहेइ, संपेहेत्ता दूयं सद्दावेइ, सद्दावेत्ता एवं वयासी– गच्छ णं तुमं देवानुप्पिया! वेसालिं नयरिं। तत्थ णं तुमं ममं अज्जगं चेडगं रायं करयल परिग्गहियं सिरसावत्तं मत्थए अंजलिं कट्टु जएणं विजएणं वद्धावेहि, वद्धावेत्ता एवं वयाहि–एवं खलु सामी! कूणिए राया विण्णवेइ–एस णं वेहल्ले कुमारे कूणियस्स रन्नो असंविदितेणं सेयनगं गंधहत्थिं अट्ठारसवंकं च हारं गहाय इहं हव्वमागए, तं णं तुब्भे सामी! कूणियं रायं अनुगिण्हमाणा सेयनगं गंधहत्थिं अट्ठारसवंकं च हारं कूणियस्स रन्नो पच्चप्पिणह, वेहल्लं कुमारं च पेसेह। तए णं से दूए कूणिएणं रन्ना एवं वुत्ते समाणे हट्ठतुट्ठे करयलपरिग्गहियं सिरसावत्तं मत्थए अंजलिं कट्टु एवं सामि! त्ति आणाए विनएणं वयणं पडिसुणेइ, पडिसुणेत्ता जेणेव सए गिहे तेणेव उवागच्छइ, उवागच्छित्ता जहा चित्तो जाव वद्धावेत्ता एवं वयासी– एवं खलु सामी! कूणिए राया विन्नवेइ– एस णं वेहल्ले कुमारे कूणियस्स रन्नो असंविदिते णं सेयनगं गंधहत्थिं अट्ठारसवंकं च हारं गहाय इहं हव्वमागए, तं णं तुब्भे सामी! कूणियं रायं अनुगिण्हमाणा सेयनगं गंधहत्थिं अट्ठारसवंकं च हारं कूणियस्स रन्नो पच्चप्पिणह, वेहल्लं कुमारं च पेसेह। तए णं से चेडए राया तं दूयं एवं वयासी–जह चेव णं देवानुप्पिया! कूणिए राया सेणियस्स रन्नो पुत्ते चेल्लणाए देवीए अत्तए ममं नत्तुए, तहेव णं वेहल्लेवि कुमारे सेणियस्स रन्नो पुत्ते चेल्लणाए देवीए अत्तए ममं नत्तुए, सेणिएणं रन्ना जीवंतेणं चेव वेहल्लस्स कुमारस्स सेयनगे गंधहत्थी अट्ठारसवंके य हारे पुव्वदिन्ने तं जइ णं कूणिए राया वेहल्लस्स रज्जस्स य जनवयस्स य अद्धं दलयइ तो णं अहं सेयनगं गंधहत्थिं अट्ठारसवंकं च हारं कूणियस्स रन्नो पच्चप्पिणामि, वेहल्लं च कुमारं पेसेमि, न अन्नहा–तं दूयं सक्कारेइ सम्माणेइ पडिविसज्जेइ। तए णं से दूए चेडएणं रन्ना पडिविसज्जिए समाणे जेणेव चाउघंटे आसरहे तेणेव उवागच्छइ, उवागच्छित्ता चाउघंटं आसरहं दुरुहइ, दुरुहित्ता वेसालिं नयरिं मज्झंमज्झेणं निग्गच्छइ, निग्गच्छित्ता सुहेहिं वसही–पायरासेहिं नाइविकिट्ठेहिं अंतरावासेहिं वसमाणे-वसमाणे जेणेव चंपा नगरी तेणेव उवागच्छइ, उवागच्छित्ता जाव कूणियं रायं जएणं विजएणं वद्धावेइ, वद्धावेत्ता एवं वयासी– एवं खलु सामी! चेडए राया आणवेइ–जह चेव णं कूणिए राया सेणियस्स रन्नो पुत्ते चेल्लणाए देवीए अत्तए ममं नत्तुए तहेव णं वेहल्लेवि कुमारे सेणियस्स रन्नो पुत्ते चेल्लणाए देवीए अत्तए ममं नत्तुए, सेणिएणं रन्ना जीवंतेणं चेव वेहल्लस्स कुमारस्स सेयनगे गंधहत्थी अट्ठारसवंके य हारे पुव्वदिन्ने, तं जइ णं कूणिए राया वेहल्लस्स रज्जस्स य जणवयस्स य अद्धं दलयइ तो णं अहं सेयनगं गंधहत्थिं अट्ठारसवंकं च हारं कूणियस्स रन्नो पच्चप्पिणामि, वेहल्लं च कुमारं पेसेमि। तं न देइ णं सामी! चेडए राया सेयनगं गंधहत्थिं अट्ठारसवंकं च हारं, वेहल्लं च नो पेसेइ। तए णं से कूणिए राया दोच्चंपि दूयं सद्दावेइ, सद्दावेत्ता एवं वयासी–गच्छ णं तुमं देवानुप्पिया! वेसालिं नयरिं। तत्थ णं तुमं मम अज्जगं चेडगं रायं जाव एवं वयाहि– एवं खलु सामी! कूणिए राया विन्नवेइ– जाणि काणि वि रयणाणि समुप्प-ज्जंति सव्वाणि ताणि रायकुलगामीणि। सेणियस्स रन्नो रज्जसिरिं करेमाणस्स पालेमाणस्स दुवे रयणा समुप्पन्ना, तं जहा–सेयनए गंधहत्थी अट्ठारसवंके हारे। तं णं तुब्भे सामी! रायकुलपरंपरागयं पीतिं अलोवेमाणा सेयनगं गंधहत्थिं अट्ठारसवंकं च हारं कूणियस्स रन्नो पच्चप्पिणह, वेहल्लं कुमारं च पेसेह। तए णं से दूए तहेव जाव वद्धावेत्ता एवं वयासी–एवं खलु सामी! कूणिए राया विन्नवेइ–जाणि काणि य रयणाणि समुप्पज्जंति सव्वाणि ताणि रायकुलगामीणि। सेणियस्स रन्नो रज्जसिरिं करेमाणस्स पालेमाणस्स दुवे रयणा समुप्पन्ना, तं जहा–सेयनए गंधहत्थी अट्ठारसवंके हारे। तं णं तुब्भे सामी! रायकुलपरंपरागयं पीतिं अलोवेमाणा सेयनगं गंधहत्थिं अट्ठारसवंकं च हारं कूणियस्स रन्नो पच्चप्पिणह, वेहल्लं कुमारं च पेसेह। तए णं से चेडए राया तं दूयं एवं वयासी– जह चेव णं देवानुप्पिया! कूणिए राया सेणियस्स रन्नो पुत्ते चेल्लणाए देवीए अत्तए ममं नत्तुए, तहेव णं वेहल्लेवि कुमारे सेणियस्स रन्नो पुत्ते चेल्लणाए देवीए अत्तए ममं नत्तुए, सेणिएणं रन्ना जीवंतएणं चेव वेहल्लस्स कुमारस्स सेयनगे गंधहत्थी अट्ठारसवंके य हारे पुव्वदिन्ने, तं जइ णं कूणिए राया वेहल्लस्स रज्जस्स य जणवयस्स य अद्धं दलयइ तो णं अहं सेयनगं गंधहत्थिं अट्ठारसवंकं च हारं कूणियस्स रन्नो पच्चप्पिणामि, वेहल्लं च कुमारं पेसेमि, न अन्नहा–तं दूयं सक्कारेइ सम्मानेइ पडिविसज्जेइ। तए णं से दूए जाव कूणियस्स रन्नो वद्धावेत्ता एवं वयासी– चेडए राया आणवेइ–जह चेव णं देवानुप्पिया! कूणिए राया सेणियस्स रन्नो पुत्ते चेल्लणाए देवीए अत्तए ममं नत्तुए, तहेव णं वेहल्लेवि कुमारे सेणियस्स रन्नो पुत्ते चेल्लणाए देवीए अत्तए ममं नत्तुए, सेणिएणं रन्ना जीवंतेणं चेव वेहल्लस्स कुमारस्स सेयनगे गंधहत्थी अट्ठारसवंके य हारे पुव्वदिन्ने, तं जइ णं कूणिए राया वेहल्लस्स रज्जस्स य जनवयस्स य अद्धं दलयइ तो णं अहं सेयनगं गंधहत्थिं अट्ठारसवंकं च हारं कूणियस्स रन्नो पच्चप्पिणामि, वेहल्लं च कुमारं पेसेमि। तं न देइ णं सामी! चेडए राया सेयनगं गंधहत्थिं अट्ठारसवंकं च हारं, वेहल्लं च कुमारं नो पेसेइ। तए णं से कूणिए राया तस्स दूयस्स अंतिए एयमट्ठं सोच्चा निसम्म आसुरुत्ते जाव मिसिमिसेमाणे तच्चं दूयं सद्दावेइ, सद्दावेत्ता एवं वयासी–गच्छ णं तुमं देवानुप्पिया! वेसालीए नयरीए चेडगस्स रन्नो वामेणं पाएणं पादपीठं अक्कमाहि, अक्कमित्ता कुंतग्गेणं लेहं पणावेहि, पणावेत्ता आसुरुत्ते जाव मिसिमिसेमाणे तिवलियं भिउडिं निलाडे साहट्टु चेडगं रायं एवं वयाहि– हंभो चेडगराया अपत्थियपत्थगा! दुरंतपंतलक्खणा! हीनपुण्णचाउद्दसिया! सिरि-हिरि-धिइ-कित्ति-परिवज्जिया! एस णं कूणिए राया आणवेइ– पच्चप्पिणाहि णं कूणियस्स रन्नो सेयनगं गंधहत्थिं अट्ठारसवंकं च हारं, वेहल्लं च कुमारं पेसेहि अहवा जुद्धसज्जे चिट्ठाहि। एस णं कूणिए राया सबले सवाहने सखंधावारे णं जुद्धसज्जे इह हव्वमागच्छइ। तए णं से दूए करयलपरिग्गहियं दसनहं सिरसावत्तं मत्थए अंजलिं कट्टु तहेव जाव जेणेव चेडए राया तेणेव उवागच्छइ, उवागच्छित्ता करयलपरिग्गहियं सिरसावत्तं मत्थए अंजलिं कट्टु जएणं विजएणं वद्धावेइ, वद्धावेत्ता एवं वयासी– एस णं सामी! ममं विनयपडिवत्ती, इमा कूणियस्स रन्नो आणत्ती चेडगस्स रन्नो वामेणं पाएणं पायपीढं अक्कमइ, अक्कमित्ता आसुरुत्ते कुंतग्गेण लेहं पणावेइ, पणावेत्ता चेडगं रायं एवं वयासी– हंभो चेडगराया! अपत्थियपत्थगा! दुरंत-पंत-लक्खणा! हीणपुण्णचा-उद्दसिया! सिरि-हिरि-धिइ-कित्ति-परिवज्जिया! एस णं कूणिए राया आणवेइ–पच्चप्पिणाहि णं कूणियस्स रन्नो सेयनगं गंधहत्थिं अट्ठारसवंकं च हारं, वेहल्लं च कुमारं पेसेहि अहवा जुद्धसज्जे चिट्ठाहिं। एस णं कूणिए राया सबले सवाहने सखंधावारे णं इह हव्वमागच्छइ। तए णं से चेडए राया तस्स दूयस्स अंतिए एयमट्ठं सोच्चा निसम्म आसुरुत्ते जाव तिवलियं भिउडिं निलाडे साहट्टु एवं वयासी– न अप्पिणामि णं कूणियस्स रन्नो सेयनगं गंधहत्थिं अट्ठारसवंकं च हारं, वेहल्लं च कुमारं नो पेसेमि। एस णं जुद्धसज्जे चिट्ठामि। तं दूयं असक्कारिय असम्माणिय अवद्दारेणं निच्छुहावेइ।
Sutra Meaning : જુઓ સૂત્ર ૧૬
Mool Sutra Transliteration : [sutra] tattha nam champae nayarie seniyassa ranno putte chellanae devie attae kuniyassa ranno sahoyare kaniyase bhaya vehalle namam kumare hottha– sumale java suruve. Tae nam tassa vehallassa kumarassa senienam ranna jivamtaenam cheva seyanae gamdhahatthi attharasavamke hare ya puvvadinne. Tae nam se vehalle kumare seyanaenam gamdhahatthina amteurapariyalasamparivude champam nayarim majjhammajjhenam niggachchhai, niggachchhitta abhikkhanam-abhikkhanam gamgam mahanaim majjanayam oyarai. Tae nam seyanae gamdhahatthi devio somdae ginhai, ginhitta appegayao patthe thavei, appegaiyao khamdhe thavei, appegaiyao kumbhe thavei, appegaiyao sise thavei, appegaiyao damtamusale thavei, appe-gaiyao somdae gahaya uddham vehasam uvvihai, appegaiyao somdagayao amdolavei, appegaiyao damtamtaresu ninei, appegaiyao sibharenam nhanei, appegaiyao anegehim kilavanehim kilavei. Tae nam champae nayarie simghadaga-tiga-chaukka-chachchara-chaummuha mahapahapahesu bahujano anna-mannassa evamaikkhai evam bhasai evam pannavei evam paruvei–evam khalu devanuppiya! Vehalle kumare seyanaenam gamdhahatthina amteurapariyalasamparivude java anegehim kilavanaehim kilavei, tam esa nam vehalle kumare rajjasiriphalam pachchanubhavamane viharai, no kunie raya. Tae nam tise paumavaie devie imise kahae laddhatthae samanie ayameyaruve ajjhatthie chimtie patthie manogae samkappe samuppajjittha–evam khalu vehalle kumare seyanaenam gamdhahatthina java anegehim kilavanaehim kilavei, tam esa nam vehalle kumare rajjasiriphalam pachchanubhavamane viharai, no kunie raya, tam kinnam amham rajjena va ratthena va balena va vahanena va kosena va kotthagarena va janavaena va, jai nam amham seyanage gamdhahatthi natthi? Tam seyam khalu mamam kuniyam rayam eyamattham vinnavittaettikattu evam sampehei, sampehetta jeneva kunie raya teneva uvagachchhai, uvagachchhitta karayala pariggahiyam dasanaham sirasavattam matthae amjalim kattu kuniyam rayam evam vayasi– Evam khalu sami! Vehalle kumare seyanaenam gamdhahatthina java anegehim kilavanaehim kilavei, tam kinnam sami amham rajjena va java janavaena va, jai nam amham seyanae gamdhahatthi natthi? Tae nam se kunie raya paumavaie devie eyamattham no adhai no parijanai tusinie samchitthai. Tae nam sa paumavai devi abhikkhanam-abhikkhanam kuniyam rayam eyamattham vinnavei. Tae nam se kunie raya paumavaie devie abhikkhanam-abhikkhanam eyamattham vinnavijjamane annaya kayai vehallam kumaram saddavei, saddavetta seyanagam gamdhahatthim attharasavamkam cha haram jayai. Tae nam se vehalle kumare kuniyam rayam evam vayasi–evam khalu sami! Senienam ranna jivamtaenam cheva seyanae gamdhahatthi attharasavamke ya hare dinne, tam jai nam sami! Tubbhe mamam rajjassa ya java janavayassa ya addham dalayaha to nam aham tubbham seyanagam gamdhahatthim attharasavamkam cha haram dalayami. Tae nam se kunie raya vehallassa kumarassa eyamattham no adhai no parijanai abhikkhanam-abhikkhanam seyanagam gamdhahatthim attharasavamkam cha haram jayai. Tae nam tassa vehallassa kumarassa kunienam ranna abhikkhanam-abhikkhanam seyanagam gamdhahatthim attharasavamkam cha haram jaijjamanassa ayameyaruve ajjhatthie chimtie patthie manogae samkappe sammuppajjittha–? Evam akkhiviukame nam ginhiukame nam uddaleukame nam mamam kunie raya seyanagam gamdhahatthim attharasavamkam cha haram tam java na akkhivai na ginhai na uddalei mamam kunie raya tava seyanagam gamdhahatthim attharasavamkam cha haram gahaya amteurapariyalasamparivudassa sabhamdamattovagaranamayae champao nayario padinikkhamitta vesalie nayarie ajjagam chedayam rayam uvasampajjittanam viharittae– evam sampehei, sampehetta kuniyassa ranno amtarani ya chhiddani ya virahani ya padijagaramane-padijagaramane viharai. Tae nam se vehalle kumare annaya kayai kuniyassa ranno amtaram janai, seyanagam gamdhahatthim attharasavamkam cha haram gahaya amteurapariyalasamparivude sabhamdamattovagaranamayae champao nayario padinikkhamai, padinikkhamitta jeneva vesali nayari teneva uvagachchhai, uvagachchhitta vesalie nayarie ajjagam chedayam rayam uvasampajjitta nam viharai. Tae nam se kunie raya imise kahae laddhatthe samane–evam khalu vehalle kumare mamam asamvidite nam seyanagam gamdhahatthim attharasavamkam cha haram gahaya amteurapariyalasamparivude java ajjagam chedayam rayam uvasampajjitta nam viharai, tam seyam khalu mamam seyanagam gamdhahatthim attharasavamkam cha haram aneum duyam pesittae–evam sampehei, sampehetta duyam saddavei, saddavetta evam vayasi– Gachchha nam tumam devanuppiya! Vesalim nayarim. Tattha nam tumam mamam ajjagam chedagam rayam karayala pariggahiyam sirasavattam matthae amjalim kattu jaenam vijaenam vaddhavehi, vaddhavetta evam vayahi–evam khalu sami! Kunie raya vinnavei–esa nam vehalle kumare kuniyassa ranno asamviditenam seyanagam gamdhahatthim attharasavamkam cha haram gahaya iham havvamagae, tam nam tubbhe sami! Kuniyam rayam anuginhamana seyanagam gamdhahatthim attharasavamkam cha haram kuniyassa ranno pachchappinaha, vehallam kumaram cha peseha. Tae nam se due kunienam ranna evam vutte samane hatthatutthe karayalapariggahiyam sirasavattam matthae amjalim kattu evam sami! Tti anae vinaenam vayanam padisunei, padisunetta jeneva sae gihe teneva uvagachchhai, uvagachchhitta jaha chitto java vaddhavetta evam vayasi– evam khalu sami! Kunie raya vinnavei– esa nam vehalle kumare kuniyassa ranno asamvidite nam seyanagam gamdhahatthim attharasavamkam cha haram gahaya iham havvamagae, tam nam tubbhe sami! Kuniyam rayam anuginhamana seyanagam gamdhahatthim attharasavamkam cha haram kuniyassa ranno pachchappinaha, vehallam kumaram cha peseha. Tae nam se chedae raya tam duyam evam vayasi–jaha cheva nam devanuppiya! Kunie raya seniyassa ranno putte chellanae devie attae mamam nattue, taheva nam vehallevi kumare seniyassa ranno putte chellanae devie attae mamam nattue, senienam ranna jivamtenam cheva vehallassa kumarassa seyanage gamdhahatthi attharasavamke ya hare puvvadinne tam jai nam kunie raya vehallassa rajjassa ya janavayassa ya addham dalayai to nam aham seyanagam gamdhahatthim attharasavamkam cha haram kuniyassa ranno pachchappinami, vehallam cha kumaram pesemi, na annaha–tam duyam sakkarei sammanei padivisajjei. Tae nam se due chedaenam ranna padivisajjie samane jeneva chaughamte asarahe teneva uvagachchhai, uvagachchhitta chaughamtam asaraham duruhai, duruhitta vesalim nayarim majjhammajjhenam niggachchhai, niggachchhitta suhehim vasahi–payarasehim naivikitthehim amtaravasehim vasamane-vasamane jeneva champa nagari teneva uvagachchhai, uvagachchhitta java kuniyam rayam jaenam vijaenam vaddhavei, vaddhavetta evam vayasi– Evam khalu sami! Chedae raya anavei–jaha cheva nam kunie raya seniyassa ranno putte chellanae devie attae mamam nattue taheva nam vehallevi kumare seniyassa ranno putte chellanae devie attae mamam nattue, senienam ranna jivamtenam cheva vehallassa kumarassa seyanage gamdhahatthi attharasavamke ya hare puvvadinne, tam jai nam kunie raya vehallassa rajjassa ya janavayassa ya addham dalayai to nam aham seyanagam gamdhahatthim attharasavamkam cha haram kuniyassa ranno pachchappinami, vehallam cha kumaram pesemi. Tam na dei nam sami! Chedae raya seyanagam gamdhahatthim attharasavamkam cha haram, vehallam cha no pesei. Tae nam se kunie raya dochchampi duyam saddavei, saddavetta evam vayasi–gachchha nam tumam devanuppiya! Vesalim nayarim. Tattha nam tumam mama ajjagam chedagam rayam java evam vayahi– evam khalu sami! Kunie raya vinnavei– jani kani vi rayanani samuppa-jjamti savvani tani rayakulagamini. Seniyassa ranno rajjasirim karemanassa palemanassa duve rayana samuppanna, tam jaha–seyanae gamdhahatthi attharasavamke hare. Tam nam tubbhe sami! Rayakulaparamparagayam pitim alovemana seyanagam gamdhahatthim attharasavamkam cha haram kuniyassa ranno pachchappinaha, vehallam kumaram cha peseha. Tae nam se due taheva java vaddhavetta evam vayasi–evam khalu sami! Kunie raya vinnavei–jani kani ya rayanani samuppajjamti savvani tani rayakulagamini. Seniyassa ranno rajjasirim karemanassa palemanassa duve rayana samuppanna, tam jaha–seyanae gamdhahatthi attharasavamke hare. Tam nam tubbhe sami! Rayakulaparamparagayam pitim alovemana seyanagam gamdhahatthim attharasavamkam cha haram kuniyassa ranno pachchappinaha, vehallam kumaram cha peseha. Tae nam se chedae raya tam duyam evam vayasi– jaha cheva nam devanuppiya! Kunie raya seniyassa ranno putte chellanae devie attae mamam nattue, taheva nam vehallevi kumare seniyassa ranno putte chellanae devie attae mamam nattue, senienam ranna jivamtaenam cheva vehallassa kumarassa seyanage gamdhahatthi attharasavamke ya hare puvvadinne, tam jai nam kunie raya vehallassa rajjassa ya janavayassa ya addham dalayai to nam aham seyanagam gamdhahatthim attharasavamkam cha haram kuniyassa ranno pachchappinami, vehallam cha kumaram pesemi, na annaha–tam duyam sakkarei sammanei padivisajjei. Tae nam se due java kuniyassa ranno vaddhavetta evam vayasi– chedae raya anavei–jaha cheva nam devanuppiya! Kunie raya seniyassa ranno putte chellanae devie attae mamam nattue, taheva nam vehallevi kumare seniyassa ranno putte chellanae devie attae mamam nattue, senienam ranna jivamtenam cheva vehallassa kumarassa seyanage gamdhahatthi attharasavamke ya hare puvvadinne, tam jai nam kunie raya vehallassa rajjassa ya janavayassa ya addham dalayai to nam aham seyanagam gamdhahatthim attharasavamkam cha haram kuniyassa ranno pachchappinami, vehallam cha kumaram pesemi. Tam na dei nam sami! Chedae raya seyanagam gamdhahatthim attharasavamkam cha haram, vehallam cha kumaram no pesei. Tae nam se kunie raya tassa duyassa amtie eyamattham sochcha nisamma asurutte java misimisemane tachcham duyam saddavei, saddavetta evam vayasi–gachchha nam tumam devanuppiya! Vesalie nayarie chedagassa ranno vamenam paenam padapitham akkamahi, akkamitta kumtaggenam leham panavehi, panavetta asurutte java misimisemane tivaliyam bhiudim nilade sahattu chedagam rayam evam vayahi– hambho chedagaraya apatthiyapatthaga! Duramtapamtalakkhana! Hinapunnachauddasiya! Siri-hiri-dhii-kitti-parivajjiya! Esa nam kunie raya anavei– pachchappinahi nam kuniyassa ranno seyanagam gamdhahatthim attharasavamkam cha haram, vehallam cha kumaram pesehi ahava juddhasajje chitthahi. Esa nam kunie raya sabale savahane sakhamdhavare nam juddhasajje iha havvamagachchhai. Tae nam se due karayalapariggahiyam dasanaham sirasavattam matthae amjalim kattu taheva java jeneva chedae raya teneva uvagachchhai, uvagachchhitta karayalapariggahiyam sirasavattam matthae amjalim kattu jaenam vijaenam vaddhavei, vaddhavetta evam vayasi– Esa nam sami! Mamam vinayapadivatti, ima kuniyassa ranno anatti chedagassa ranno vamenam paenam payapidham akkamai, akkamitta asurutte kumtaggena leham panavei, panavetta chedagam rayam evam vayasi– Hambho chedagaraya! Apatthiyapatthaga! Duramta-pamta-lakkhana! Hinapunnacha-uddasiya! Siri-hiri-dhii-kitti-parivajjiya! Esa nam kunie raya anavei–pachchappinahi nam kuniyassa ranno seyanagam gamdhahatthim attharasavamkam cha haram, vehallam cha kumaram pesehi ahava juddhasajje chitthahim. Esa nam kunie raya sabale savahane sakhamdhavare nam iha havvamagachchhai. Tae nam se chedae raya tassa duyassa amtie eyamattham sochcha nisamma asurutte java tivaliyam bhiudim nilade sahattu evam vayasi– na appinami nam kuniyassa ranno seyanagam gamdhahatthim attharasavamkam cha haram, vehallam cha kumaram no pesemi. Esa nam juddhasajje chitthami. Tam duyam asakkariya asammaniya avaddarenam nichchhuhavei.
Sutra Meaning Transliteration : Juo sutra 16