Sutra Navigation: Jambudwippragnapati ( જંબુદ્વીપ પ્રજ્ઞપ્તિ સૂત્ર )

Search Details

Mool File Details

Anuvad File Details

Sr No : 1107649
Scripture Name( English ): Jambudwippragnapati Translated Scripture Name : જંબુદ્વીપ પ્રજ્ઞપ્તિ સૂત્ર
Mool Language : Ardha-Magadhi Translated Language : Gujarati
Chapter :

वक्षस्कार २ काळ

 Translated Chapter :

વક્ષસ્કાર ૨ કાળ
Section : Translated Section :
Sutra Number : 49 Category : Upang-07
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तीसे णं समाए एक्कवीसाए वाससहस्सेहिं काले विइक्कंते अनंतेहिं वण्णपज्जवेहिं, अनंतेहिं गंधपज्जवेहिं अनंतेहिं रसपज्जवेहिं अनंतेहिं फासपज्जवेहिं अनंतेहिं संघयणपज्जवेहिं अनंतेहिं संठाणपज्जवेहिं अनंतेहिं उच्चत्तपज्जवेहिं अनंतेहिं आउपज्जवेहिं अनंतेहिं गरुयलहुयपज्जवेहिं अनंतेहिं अगरुयलहुयपज्जवेहिं अनंतेहिं उट्ठाण-कम्म-बल-वीरिय-पुरिसक्कार-परक्कमपज्जवेहिं अनंतगुणपरिहाणीए परिहायमाणे-परिहायमाणे, एत्थ णं दूसमदूसमणामं समा काले पडिवज्जिस्सइ समणाउसो! । तीसे णं भंते! समाए उत्तमकट्ठपत्ताए भरहस्स वासस्स केरिसए आगारभावपडोयारे भविस्सइ? गोयमा! काले भविस्सई हाहाभूए भंभाभूए कोलाहलभूए समानुभावेण य णं खरफरुस-धूलिमइला दुव्विसहा वाउला भयंकरा य वाया संवट्टगा य वाहिंति। इह अभिक्खं धूमाहिंति य दिसा समंता रउस्सला रेणुकलुस तमपडल निरालोया। समयलुक्खयाए य णं अहियं चंदा सीयं मोच्छिहिंति, अहियं सूरिया तविस्संति। अदुत्तरं च णं गोयमा! अभिक्खणं अरसमेहा विरसमेहा खारमेहा खत्तमेहा अग्गिमेहा विज्जुमेहा विसमेहा असनिमेहा अजवणिज्जोदगा बाहिरोगवेदणोदीरण-परिणामसलिला अमणुन्न-पाणियगा चंडानिलपहत तिक्ख धारा निवातपउरं वासं वासिहिंति, जेणं भरहे वासे गामागर नगर खेड कब्बड मडंब दोणमुह पट्टणासमगयं जनवयं, चउप्पयगवेलए, खहयरे पक्खिसंघे गामारण्णप्प-यारणिरए तसे य पाने बहुप्पयारे रुक्ख गुच्छ गुम्म लय वल्लि पवालंकुरमादीए तणवणस्सइकाइए ओसहीओ य विद्धंसेहिंति, पव्वय गिरि डोंगरुत्थलभट्ठिमादीए य वेयड्ढगिरिवज्जे विरावेहिंति, सलिल बिल विसम-गड्ड-निन्नुन्नयाणि य गंगासिंधुवज्जाइं समीकरेहिंति। तीसे णं भंते! समाए भरहस्स वासस्स भूमीए केरिसए आगारभावपडोयारे भविस्सइ? गोयमा! भूमी भविस्सइ इंगालभूया मुम्मूरभूया छारियभूया तत्तकवेल्लुयभूया तत्तसमजोइभूया धूलिबहुला रेणुबहुला पंकबहुला पणयबहुला चलणिबहुला बहूणं धरणिगोयराणं सत्ताणं दुन्निकम्मा यावि भविस्सई। तीसे णं भंते! समाए भरहे वासे मनुयाणं केरिसए आगारभावपडोयारे भविस्सइ? गोयमा! मनुया भविस्संति दुरूवा दुवण्णा दुग्गंधा दुरसा दुफासा अनिट्ठा अकंता अप्पिया असुभा अमणुन्ना अमणामा हीनस्सरा दीनस्सरा अनिट्ठस्सरा अकंतस्सरा अपियस्सरा अमणुन्नस्सरा अमणामस्सरा अनादेज्जवयणपच्चायाता निल्लज्जा कूड कवड कलह वह बंध वेरनिरया मज्जायातिक्क- मप्पहाणा अकज्जणिच्चुज्जया गुरुनिओग विनयरहिया य विकलरूवा परूढनह केस मंसु रोमा काला खर फरुस सामवण्णा फुट्टसिरा कविलपलियकेसा बहुण्हारुणिसंपिणद्ध दुद्दंसणिज्जरूवा संकुडियवलीतरंग परिवेढिअंगमंगा जरापरिणयव्व थेरग नरा पविरल परिसडिय दंतसेढी उब्भड-घडामुहा विसमनयनवंकणासा वंक वलीविगय भेसणमुहा दद्दु किटिभ सिब्भ फुडियफरुसच्छवी चित्तलंगमंगा कच्छूखसराभिभूया खरतिक्खणक्ख कंडूइय विक्खयतणू टोलाकिति विसम-संधिबंधण उक्कुडुयट्ठियविभत्त दुब्बल कुसंघयण कुप्पमाणकुसंठिया कुरूवा कुट्ठाणासन कुसेज्ज कुभोइणो असुइणो अनेगवाहिपरिपीलिअंगमंगा खलंत विब्भलगई निरुच्छाहा सत्तपरिवज्जिता विगयचेट्ठा नट्ठतेया अभिक्खणं सीउण्ह खरफरुसवायविज्झडिय मलिणपंसुरओगुंडिअंगमंगा बहुकोहमानमायालोभा बहुमोहा असुभदुक्खभागी ओसन्नं धम्मसण्ण सम्मत्तपरिभट्ठा उक्कोसेणं रयणिप्पमाणमेत्ता सोलस वीसइवास परमाउसो बहुपुत्तणत्तुपरियाल पणयबहुला गंगासिंधूओ महानईओ वेयड्ढं च पव्वयं नीसाए बावत्तरिं निगोया बीयं बीयमेत्ता बिलवासिणो मनुया भविस्संति। ते णं भंते! मनुया किमाहारिस्संति? गोयमा! तेणं कालेणं तेणं समएणं गंगासिंधूओ महानईओ रहपहमित्तवित्थराओ अक्खसोयप्पमाणमेत्तं जलं वोज्झिहिंति, सेवि य णं जले बहुमच्छ-कच्छभाइण्णे, नो चेव णं आउबहुले भविस्सइ। तए णं ते मनुया सुरुग्गमणमुहुत्तंसि य सूरत्थमणमुहुत्तंसि य बिलेहिंतो निद्धाइस्संति, निद्धाइत्ता मच्छकच्छभे थलाइं गाहेहिंति, गाहेत्ता सीयातवतत्तेहिं मच्छकच्छभेहिं इक्कवीसं वाससहस्साइं बित्तिं कप्पेमाणा विहरिस्संति। ते णं भंते! मनुया निस्सीला निव्वया निग्गुणा निम्मेरा निप्पच्चक्खाणपोसहोववासा ओसन्नं मंसाहारा मच्छाहारा खोद्दाहारा कुणिमाहारा कालमासे कालं किच्चा कहिं गच्छिहिंति? कहिं उववज्जिहिंति? गोयमा! ओसन्नं नरगतिरिक्खजोणिएसु उववज्जिहिंति। ते णं भंते! सीहा वग्घा वगा दीविया अच्छा तरच्छा परस्सरा सियाल विराल सुनगा कोलसुनगा ससगा चित्तलगा चिल्ललगा ओसन्नं मंसाहारा मच्छाहारा खोद्दाहारा कुणिमाहारा काल-मासे कालं किच्चा कहिं गच्छिहिंति? कहिं उववज्जिहिंति? गोयमा! ओसन्नं नरगतिरिक्खजोणिएसु उववज्जिहिंति। ते णं भंते! ढंका कंका पिलगा मद्दुगा सिही ओसन्नं मंसाहारा मच्छाहारा खोद्दाहारा कुणिमाहारा कालमासे कालं किच्चा कहिं गच्छिहिंति? कहिं उववज्जिहिंति? गोयमा! ओसन्नं नरगतिरिक्खजोणिएसु उववज्जिहिंति।
Sutra Meaning : જુઓ સૂત્ર ૪૭
Mool Sutra Transliteration : [sutra] tise nam samae ekkavisae vasasahassehim kale viikkamte anamtehim vannapajjavehim, anamtehim gamdhapajjavehim anamtehim rasapajjavehim anamtehim phasapajjavehim anamtehim samghayanapajjavehim anamtehim samthanapajjavehim anamtehim uchchattapajjavehim anamtehim aupajjavehim anamtehim garuyalahuyapajjavehim anamtehim agaruyalahuyapajjavehim anamtehim utthana-kamma-bala-viriya-purisakkara-parakkamapajjavehim anamtagunaparihanie parihayamane-parihayamane, ettha nam dusamadusamanamam sama kale padivajjissai samanauso!. Tise nam bhamte! Samae uttamakatthapattae bharahassa vasassa kerisae agarabhavapadoyare bhavissai? Goyama! Kale bhavissai hahabhue bhambhabhue kolahalabhue samanubhavena ya nam kharapharusa-dhulimaila duvvisaha vaula bhayamkara ya vaya samvattaga ya vahimti. Iha abhikkham dhumahimti ya disa samamta raussala renukalusa tamapadala niraloya. Samayalukkhayae ya nam ahiyam chamda siyam mochchhihimti, ahiyam suriya tavissamti. Aduttaram cha nam goyama! Abhikkhanam arasameha virasameha kharameha khattameha aggimeha vijjumeha visameha asanimeha ajavanijjodaga bahirogavedanodirana-parinamasalila amanunna-paniyaga chamdanilapahata tikkha dhara nivatapauram vasam vasihimti, jenam bharahe vase gamagara nagara kheda kabbada madamba donamuha pattanasamagayam janavayam, chauppayagavelae, khahayare pakkhisamghe gamarannappa-yaranirae tase ya pane bahuppayare rukkha guchchha gumma laya valli pavalamkuramadie tanavanassaikaie osahio ya viddhamsehimti, pavvaya giri domgarutthalabhatthimadie ya veyaddhagirivajje viravehimti, salila bila visama-gadda-ninnunnayani ya gamgasimdhuvajjaim samikarehimti. Tise nam bhamte! Samae bharahassa vasassa bhumie kerisae agarabhavapadoyare bhavissai? Goyama! Bhumi bhavissai imgalabhuya mummurabhuya chhariyabhuya tattakavelluyabhuya tattasamajoibhuya dhulibahula renubahula pamkabahula panayabahula chalanibahula bahunam dharanigoyaranam sattanam dunnikamma yavi bhavissai. Tise nam bhamte! Samae bharahe vase manuyanam kerisae agarabhavapadoyare bhavissai? Goyama! Manuya bhavissamti duruva duvanna duggamdha durasa duphasa anittha akamta appiya asubha amanunna amanama hinassara dinassara anitthassara akamtassara apiyassara amanunnassara amanamassara anadejjavayanapachchayata nillajja kuda kavada kalaha vaha bamdha veraniraya majjayatikka- mappahana akajjanichchujjaya gurunioga vinayarahiya ya vikalaruva parudhanaha kesa mamsu roma kala khara pharusa samavanna phuttasira kavilapaliyakesa bahunharunisampinaddha duddamsanijjaruva samkudiyavalitaramga parivedhiamgamamga jaraparinayavva theraga nara pavirala parisadiya damtasedhi ubbhada-ghadamuha visamanayanavamkanasa vamka valivigaya bhesanamuha daddu kitibha sibbha phudiyapharusachchhavi chittalamgamamga kachchhukhasarabhibhuya kharatikkhanakkha kamduiya vikkhayatanu tolakiti visama-samdhibamdhana ukkuduyatthiyavibhatta dubbala kusamghayana kuppamanakusamthiya kuruva kutthanasana kusejja kubhoino asuino anegavahiparipiliamgamamga khalamta vibbhalagai niruchchhaha sattaparivajjita vigayachettha natthateya abhikkhanam siunha kharapharusavayavijjhadiya malinapamsuraogumdiamgamamga bahukohamanamayalobha bahumoha asubhadukkhabhagi osannam dhammasanna sammattaparibhattha ukkosenam rayanippamanametta solasa visaivasa paramauso bahuputtanattupariyala panayabahula gamgasimdhuo mahanaio veyaddham cha pavvayam nisae bavattarim nigoya biyam biyametta bilavasino manuya bhavissamti. Te nam bhamte! Manuya kimaharissamti? Goyama! Tenam kalenam tenam samaenam gamgasimdhuo mahanaio rahapahamittavittharao akkhasoyappamanamettam jalam vojjhihimti, sevi ya nam jale bahumachchha-kachchhabhainne, no cheva nam aubahule bhavissai. Tae nam te manuya suruggamanamuhuttamsi ya suratthamanamuhuttamsi ya bilehimto niddhaissamti, niddhaitta machchhakachchhabhe thalaim gahehimti, gahetta siyatavatattehim machchhakachchhabhehim ikkavisam vasasahassaim bittim kappemana viharissamti. Te nam bhamte! Manuya nissila nivvaya nigguna nimmera nippachchakkhanaposahovavasa osannam mamsahara machchhahara khoddahara kunimahara kalamase kalam kichcha kahim gachchhihimti? Kahim uvavajjihimti? Goyama! Osannam naragatirikkhajoniesu uvavajjihimti. Te nam bhamte! Siha vaggha vaga diviya achchha tarachchha parassara siyala virala sunaga kolasunaga sasaga chittalaga chillalaga osannam mamsahara machchhahara khoddahara kunimahara kala-mase kalam kichcha kahim gachchhihimti? Kahim uvavajjihimti? Goyama! Osannam naragatirikkhajoniesu uvavajjihimti. Te nam bhamte! Dhamka kamka pilaga madduga sihi osannam mamsahara machchhahara khoddahara kunimahara kalamase kalam kichcha kahim gachchhihimti? Kahim uvavajjihimti? Goyama! Osannam naragatirikkhajoniesu uvavajjihimti.
Sutra Meaning Transliteration : Juo sutra 47