Sutra Navigation: Pragnapana ( પ્રજ્ઞાપના ઉપાંગ સૂત્ર )

Search Details

Mool File Details

Anuvad File Details

Sr No : 1106757
Scripture Name( English ): Pragnapana Translated Scripture Name : પ્રજ્ઞાપના ઉપાંગ સૂત્ર
Mool Language : Ardha-Magadhi Translated Language : Gujarati
Chapter :

पद-१७ लेश्या

 Translated Chapter :

પદ-૧૭ લેશ્યા
Section : उद्देशक-२ Translated Section : ઉદ્દેશક-૨
Sutra Number : 457 Category : Upang-04
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] एतेसि णं भंते! देवाणं कण्हलेस्साणं जाव सुक्कलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवा देवा सुक्कलेस्सा, पम्हलेस्सा असंखेज्जगुणा, काउलेस्सा असंखेज्जगुणा, नीललेस्सा विसेसाहिया कण्हलेस्सा विसेसाहिया, तेउलेस्सा संखेज्जगुणा। एतासि णं भंते! देवीणं कण्हलेस्साणं जाव तेउलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवाओ देवीओ काउलेस्साओ, नीललेस्साओ विसेसाहियाओ, कण्हलेस्साओ विसेसाहियाओ, तेउलेस्साओ संखेज्जगुणाओ। एतेसि णं भंते! देवाणं देवीण य कण्हलेस्साणं जाव सुक्कलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवा देवा सुक्कलेस्सा, पम्हलेस्सा असंखेज्जगुणा, काउलेस्सा असंखेज्जगुणा नीललेस्सा विसेसाहिया, कण्हलेस्सा विसेसाहिया, काउलेस्साओ देवीओ संखेज्जगुणाओ, नीललेस्साओ विसेसाहियाओ, कण्हलेस्साओ विसेसा-हियाओ, तेउलेस्सा देवा संखेज्जगुणा, तेउलेस्साओ देवीओ संखेज्जगुणाओ। एतेसि णं भंते! भवनवासीणं देवाणं कण्हलेस्साणं जाव तेउलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवा भवनवासी देवा तेउलेस्सा, काउलेस्सा असंखेज्जगुणा, नीललेस्सा विसेसाहिया, कण्हलेस्सा विसेसाहिया। एतासि णं भंते! भवनवासीणीणं देवीणं कण्हलेस्साणं जाव तेउलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! एवं चेव। एतेसि णं भंते! भवनवासीणं देवाणं देवीण य कण्हलेस्साणं जाव तेउलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवा भवनवासी देवा तेउलेस्सा, भवनवासिणीओ तेउलेस्साओ संखेज्जगुणाओ, काउलेस्सा भवनवासी असंखेज्जगुणा, नीललेस्सा विसेसाहिया, कण्हलेस्सा विसेसाहिया, काउलेस्साओ भवनवासिणीओ संखेज्जगुणाओ, नीललेस्साओ विसेसाहियाओ, कण्हलेस्साओ विसेसाहियाओ। एवं वाणमंतराण वि तिण्णेव अप्पाबहुया जहेव भवनवासिणं भाणियव्वा। एतेसि णं भंते! जोइसियाणं देवाणं देवीण य तेउलेस्साणं कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवा जोइसियदेवा तेउलेस्सा, जोइसिणिदेवीओ तेउलेस्साओ संखेज्जगुणाओ। एतेसि णं भंते! वेमानियाणं देवाणं तेउलेस्साणं पम्हलेस्साणं सुक्कलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवा वेमानिया सुक्कलेस्सा, पम्हलेस्सा असंखेज्जगुणा, तेउलेस्सा असंखेज्जगुणा। एतेसि णं भंते! वेमानियाणं देवाणं देवीण य तेउलेस्साणं पम्हलेस्साणं सुक्कलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवा वेमानिया देवा सुक्कलेस्सा, पम्हलेस्सा असंखेज्जगुणा, तेउलेस्सा असं-खेज्जगुणा, तेउलेस्साओ वेमाणिणीओ देवीओ संखेज्जगुणाओ। एतेसि णं भंते! भवनवासीणं वाणमंतराणं जोइसियाणं वेमानियाण य देवाणं कण्हलेस्साणं जाव सुक्कलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवा वेमानिया देवा सुक्कलेस्सा, पम्हलेस्सा असंखेज्जगुणा, तेउलेस्सा असंखेज्जगुणा; तेउलेस्सा भवनवासी देवा असंखेज्जगुणा, काउलेस्सा असंखेज्जगुणा, नीललेस्सा विसेसाहिया, कण्हलेस्सा विसेसाहिया; तेउलेस्सा वाणमंतरा देवा असंखेज्जगुणा, काउलेस्सा असंखेज्जगुणा, नीललेस्सा विसेसाहिया, किण्हलेस्सा विसेसाहिया; तेउलेस्सा जोइसियदेवा संखेज्जगुणा। एतासि णं भंते! भवनवासिणीणं वाणमंतरीणं जोइसिणीणं वेमाणिणीण य कण्हलेस्साणं जाव तेउलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवाओ देवीओ वेमाणिणीओ तेउलेस्साओ; भवनवासिणीओ तेउलेस्साओ असंखेज्ज-गुणाओ, काउलेस्साओ असंखेज्जगुणाओ, नीललेस्साओ विसेसाहियाओ, कण्हलेस्साओ विसेसा-हियाओ; तेउलेस्साओ वाणमंतरीओ देवीओ असंखेज्जगुणाओ, काउलेस्साओ असंखेज्जगुणाओ, नीललेस्साओ विसेसाहियाओ, कण्हलेस्साओ विसेसाहियाओ; तेउलेस्साओ जोइसिणीओ देवीओ संखेज्जगुणाओ। एतेसि णं भंते! भवनवासीणं जाव वेमानियाणं देवाण य देवीण य कण्हलेस्साणं जाव सुक्कलेस्साण य कतरे कतरेहिंतो अप्पा वा बहुया वा तुल्ला वा विसेसाहिया वा? गोयमा! सव्वत्थोवा वेमानिया देवा सुक्कलेस्सा, पम्हलेस्सा असंखेज्जगुणा, तेउलेस्सा असंखेज्जगुणा, तेउलेस्साओ वेमाणिणीओ देवीओ संखेज्जगुणाओ; तेउलेस्सा भवनवासी देवा असंखेज्जगुणा, तेउलेस्साओ भवनवासिणीओ देवीओ संखेज्जगुणाओ, काउलेस्सा भवनवासी असंखेज्जगुणा, नीललेस्सा विसेसाहिया, कण्हलेस्सा विसेसाहिया, काउलेस्साओ भवनवासिणीओ संखेज्जगुणाओ, नील-लेसाओ विसेसाहियाओ, कण्हलेस्साओ विसेसाहियाओ; तेउलेस्सा वाणमंतरा असंखेज्जगुणा, तेउलेस्साओ वाणमंतरीओ संखेज्जगुणाओ, काउलेस्सा वाणमंतरा असंखेज्जगुणा, नीललेस्सा विसेसाहिया, कण्हलेस्सा विसेसाहिया, काउलेस्साओ वाणमंतरीओ संखेज्जगुणाओ, नीललेस्साओ विसेसाहियाओ, कण्हलेस्साओ विसेसाहियाओ; तेउलेस्सा जोइसिया संखेज्जगुणा, तेउलेस्साओ जोइसिणीओ संखेज्जगुणाओ।
Sutra Meaning : જુઓ સૂત્ર ૪૫૬
Mool Sutra Transliteration : [sutra] etesi nam bhamte! Devanam kanhalessanam java sukkalessana ya katare katarehimto appa va bahuya va tulla va visesahiya va? Goyama! Savvatthova deva sukkalessa, pamhalessa asamkhejjaguna, kaulessa asamkhejjaguna, nilalessa visesahiya kanhalessa visesahiya, teulessa samkhejjaguna. Etasi nam bhamte! Devinam kanhalessanam java teulessana ya katare katarehimto appa va bahuya va tulla va visesahiya va? Goyama! Savvatthovao devio kaulessao, nilalessao visesahiyao, kanhalessao visesahiyao, teulessao samkhejjagunao. Etesi nam bhamte! Devanam devina ya kanhalessanam java sukkalessana ya katare katarehimto appa va bahuya va tulla va visesahiya va? Goyama! Savvatthova deva sukkalessa, pamhalessa asamkhejjaguna, kaulessa asamkhejjaguna nilalessa visesahiya, kanhalessa visesahiya, kaulessao devio samkhejjagunao, nilalessao visesahiyao, kanhalessao visesa-hiyao, teulessa deva samkhejjaguna, teulessao devio samkhejjagunao. Etesi nam bhamte! Bhavanavasinam devanam kanhalessanam java teulessana ya katare katarehimto appa va bahuya va tulla va visesahiya va? Goyama! Savvatthova bhavanavasi deva teulessa, kaulessa asamkhejjaguna, nilalessa visesahiya, kanhalessa visesahiya. Etasi nam bhamte! Bhavanavasininam devinam kanhalessanam java teulessana ya katare katarehimto appa va bahuya va tulla va visesahiya va? Goyama! Evam cheva. Etesi nam bhamte! Bhavanavasinam devanam devina ya kanhalessanam java teulessana ya katare katarehimto appa va bahuya va tulla va visesahiya va? Goyama! Savvatthova bhavanavasi deva teulessa, bhavanavasinio teulessao samkhejjagunao, kaulessa bhavanavasi asamkhejjaguna, nilalessa visesahiya, kanhalessa visesahiya, kaulessao bhavanavasinio samkhejjagunao, nilalessao visesahiyao, kanhalessao visesahiyao. Evam vanamamtarana vi tinneva appabahuya jaheva bhavanavasinam bhaniyavva. Etesi nam bhamte! Joisiyanam devanam devina ya teulessanam katare katarehimto appa va bahuya va tulla va visesahiya va? Goyama! Savvatthova joisiyadeva teulessa, joisinidevio teulessao samkhejjagunao. Etesi nam bhamte! Vemaniyanam devanam teulessanam pamhalessanam sukkalessana ya katare katarehimto appa va bahuya va tulla va visesahiya va? Goyama! Savvatthova vemaniya sukkalessa, pamhalessa asamkhejjaguna, teulessa asamkhejjaguna. Etesi nam bhamte! Vemaniyanam devanam devina ya teulessanam pamhalessanam sukkalessana ya katare katarehimto appa va bahuya va tulla va visesahiya va? Goyama! Savvatthova vemaniya deva sukkalessa, pamhalessa asamkhejjaguna, teulessa asam-khejjaguna, teulessao vemaninio devio samkhejjagunao. Etesi nam bhamte! Bhavanavasinam vanamamtaranam joisiyanam vemaniyana ya devanam kanhalessanam java sukkalessana ya katare katarehimto appa va bahuya va tulla va visesahiya va? Goyama! Savvatthova vemaniya deva sukkalessa, pamhalessa asamkhejjaguna, teulessa asamkhejjaguna; teulessa bhavanavasi deva asamkhejjaguna, kaulessa asamkhejjaguna, nilalessa visesahiya, kanhalessa visesahiya; teulessa vanamamtara deva asamkhejjaguna, kaulessa asamkhejjaguna, nilalessa visesahiya, kinhalessa visesahiya; teulessa joisiyadeva samkhejjaguna. Etasi nam bhamte! Bhavanavasininam vanamamtarinam joisininam vemaninina ya kanhalessanam java teulessana ya katare katarehimto appa va bahuya va tulla va visesahiya va? Goyama! Savvatthovao devio vemaninio teulessao; bhavanavasinio teulessao asamkhejja-gunao, kaulessao asamkhejjagunao, nilalessao visesahiyao, kanhalessao visesa-hiyao; teulessao vanamamtario devio asamkhejjagunao, kaulessao asamkhejjagunao, nilalessao visesahiyao, kanhalessao visesahiyao; teulessao joisinio devio samkhejjagunao. Etesi nam bhamte! Bhavanavasinam java vemaniyanam devana ya devina ya kanhalessanam java sukkalessana ya katare katarehimto appa va bahuya va tulla va visesahiya va? Goyama! Savvatthova vemaniya deva sukkalessa, pamhalessa asamkhejjaguna, teulessa asamkhejjaguna, teulessao vemaninio devio samkhejjagunao; teulessa bhavanavasi deva asamkhejjaguna, teulessao bhavanavasinio devio samkhejjagunao, kaulessa bhavanavasi asamkhejjaguna, nilalessa visesahiya, kanhalessa visesahiya, kaulessao bhavanavasinio samkhejjagunao, nila-lesao visesahiyao, kanhalessao visesahiyao; teulessa vanamamtara asamkhejjaguna, teulessao vanamamtario samkhejjagunao, kaulessa vanamamtara asamkhejjaguna, nilalessa visesahiya, kanhalessa visesahiya, kaulessao vanamamtario samkhejjagunao, nilalessao visesahiyao, kanhalessao visesahiyao; teulessa joisiya samkhejjaguna, teulessao joisinio samkhejjagunao.
Sutra Meaning Transliteration : Juo sutra 456