Sutra Navigation: Rajprashniya ( રાજપ્રશ્નીય ઉપાંગ સૂત્ર )

Search Details

Mool File Details

Anuvad File Details

Sr No : 1105744
Scripture Name( English ): Rajprashniya Translated Scripture Name : રાજપ્રશ્નીય ઉપાંગ સૂત્ર
Mool Language : Ardha-Magadhi Translated Language : Gujarati
Chapter :

सूर्याभदेव प्रकरण

 Translated Chapter :

સૂર્યાભદેવ પ્રકરણ
Section : Translated Section :
Sutra Number : 44 Category : Upang-02
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं तस्स सूरियाभस्स देवस्स चत्तारि सामानियसाहस्सीओ जाव सोलस आयरक्खदेवसाहस्सीओ अन्ने य बहवे सूरियाभविमानवासिणो वेमाणिया देवा य देवीओ य अप्पेगतिया उप्पलहत्थगया जाव सहस्सपत्तहत्थगया सूरियाभं देवं पिट्ठतो-पिट्ठतो समनुगच्छंति। तए णं तस्स सूरियाभस्स देवस्स आभिओगिया देवा य देवीओ य अप्पेगतिया वंदनकलस-हत्थगया जाव अप्पेगतिया धूवकडुच्छुयहत्थगया हट्ठतुट्ठचित्तमानंदिया पीइमणा परमसोमनस्सिया हरिसवसविसप्पमाणहियया सूरियाभं देवं पिट्ठतो-पिट्ठतो समनुगच्छंति। तए णं से सूरियाभे देवे चउहिं सामानियसाहस्सीहिं जाव आयरक्खदेवसाहस्सीहिं अन्नेहिं बहूहि य सूरियाभविमानवासीहिं वेमाणिएहिं देवेहि य देवीहि य सद्धिं संपरिवुडे सव्विड्ढीए जाव णातियरवेणं जेणेव सिद्धायतने तेणेव उवागच्छति, उवागच्छित्ता सिद्धायतणं पुरत्थिमिल्लेणं दारेणं अनुपविसति, अनुपविसित्ता जेणेव देवच्छंदए जेणेव जिनपडिमाओ तेणेव उवागच्छति, उवा-गच्छित्ता जिनपडिमाणं आलोए पणामं करेति, करेत्ता लोमहत्थगं गिण्हति, गिण्हित्ता जिनपडिमाणं लोमहत्थएणं पमज्जइ, पमज्जित्ता जिनपडिमाओ सुरभिणा गंधोदएणं ण्हाएइ, ण्हाइत्ता सरसेणं गोसीसचंदणेणं गायाइं अनुलिंपइ, अनुलिंपइत्ता, जिनपडिमाणं अहयाइं देवदूसजुयलाइं नियंसेइ, नियंसेत्ता अग्गेहिं वरेहिं गंधेहिं मल्लेहि य अच्चेइ, ... ...अच्चेत्ता पुप्फारुहणं मल्लारुहणं वण्णारुहणं चुण्णारुहणं गंधारुहणं आभरणारुहणं करेइ, करेत्ता आसत्तोसत्तविउलवट्टवग्घारियमल्लदामकलावं करेइ, करेत्ता कयग्गहगहियकरयलपब्भट्ठ-विप्पमुक्केणं दसद्धवण्णेणं कुसुमेणं पुप्फपुंजोवयारकलियं करेइ, करेत्ता जिनपडिमाणं पुरतो अच्छेहिं सण्हेहिं रययामएहिं अच्छरसा-तंदुलेहिं अट्ठट्ठ मंगले आलिहइ, तं जहा–सोत्थियं सिरिवच्छं नंदियावत्तं वद्धमाणगं भद्दासणं कलसं मच्छं दप्पणं। तयानंतरं च णं चंदप्पभ-वइरवेरुलिय-विमलदंडं कंचनमणिरयणभत्तिचित्तं कालागरु पवर-कुंदुरुक्क तुरुक्क धूव मघमघेंत गंधुत्तमाणुविद्धं च धूववट्टिं विणिम्मुयंतं वेरुलियमयं कडुच्छुयं पग्गहिय पयत्तेणं धूवं दाऊण जिनवराणं सत्तट्ठ पदाणि ओसरति, ओसरित्ता दसंगुलिं अंजलिं करियमत्थयम्मि य पयत्तेणं, अट्ठसयविसुद्धगंथजुत्तेहिं अत्थजुत्तेहिं अपुनरुत्तेहिं महावित्तेहिं संथुणइ, संथुणित्ता वामं जाणुं अंचेइ, अंचित्ता दाहिणं जाणुं धरणितलंसि निहट्टु तिक्खुत्तो मुद्धाणं धरणितलंसि निवाडेइ, निवाडित्ता ईसिं पच्चुन्नमइ, पच्चुन्नमित्ता करयलपरिग्गहियं सिरसावत्तं मत्थए अंजलिं कट्टु एवं वयासी– नमोत्थुणं अरहंताणं भगवंताणं आदिगराणं तित्थगराणं सयंसंबुद्धाणं पुरिसोत्तमाणं पुरिससीहाणं पुरिसवरपुंडरीयाणं पुरिसवरगंधहत्थीणं लोगुत्तमाणं लोगणाहाणं लोगहिआणं लोगपईवाणं लोगपज्जोयगराणं अभयदयाणं चक्खुदयाणं मग्गदयाणं सरणदयाणं बोहिंदयाणं धम्म-दयाणं धम्मदेसयाणं धम्मणायगाणं धम्मसारहीणं धम्मवरचाउरंतचक्कवट्टीणं अप्पडिहयवरनाण-दंसणधराणं विअट्टच्छउमाणं जिनाणं जावयाणं तिन्नाणं तारयाणं बुद्धाणं बोहयाणं मुत्ताणं मोयगाणं सव्वन्नूणं सव्वदरिसीणं सिवं अयलं अरुअं अणंतं अक्खयं अव्वाबाहं अपुनरावित्तिसिद्धिगइनामधेयं ठाणं संपत्ताणं वंदइ नमंसइ, वंदित्ता नमंसित्ता– जेणेव सिद्धायतनस्स बहुमज्झदेसभाए तेणेव उवागच्छइ, उवागच्छित्ता दिव्वाए दगधाराए अब्भुक्खेइ, अब्भुक्खेत्ता सरसेणं गोसीसचंदनेणं पंचंगुलितलं दलयइ, दलइत्ता कयग्गहगहियं करयलपब्भट्ठविप्पमुक्केणं दसद्धवण्णेणं कुसुमेणं पुप्फपुंजोवयारकलियं करेइ, करेत्ता धूवं दलयइ, दलयित्ता– जेणेव सिद्धायतनस्स दाहिणिल्ले दारे तेणेव उवागच्छति, उवागच्छित्ता लोमहत्थगं परामुसइ, परामुसित्ता दारचेडाओ य सालभंजियाओ य वालरूवए य लोमहत्थएणं पमज्जइ, पमज्जित्ता दिव्वाए दगधाराए अब्भुक्खेइ, अब्भुक्खेत्ता सरसेणं गोसीसचंदनेणं चच्चए दलयइ, दलइत्ता पुप्फारुहणं जाव आभरणारुहणं करेइ, करेत्ता आसत्तोसत्त विउलवट्टवग्घारियमल्लदामकलावं करेइ, करेत्ता कयग्गहगहियकरयलपब्भट्ठविप्पमुक्केणं दसद्धवण्णेणं कुसुमेणं पुप्फपुंजोवयारकलियं करेइ, करेत्ता धूवं दलयइ, दलयित्ता– जेणेव दाहिणिल्ले दारे मुहमंडवे जेणेव दाहिणिल्लस्स मुहमंडवस्स बहुमज्झदेसभाए तेणेव उवागच्छइ, उवागच्छित्ता लोमहत्थगं परामुसइ, परामुसित्ता बहुमज्झदेसभागं लोमहत्थेणं पमज्जइ, पमज्जित्ता दिव्वाए दगधाराए अब्भुक्खेइ, अब्भुक्खेत्ता सरसेणं गोसीसचंदणेणं पंचंगुलितलं मंडलगं आलिहइ, आलिहित्ता कयग्गहगहियं करयलपब्भट्ठविप्पमुक्केणं दसद्धवण्णेणं कुसुमेणं पुप्फपुंजोवयारकलियं करेइ, करेत्ता धूवं दलयइ, दलयित्ता– जेणेव दाहिणिल्लस्स मुहमंडवस्स पच्चत्थिमिल्ले दारे तेणेव उवागच्छइ, उवागच्छित्ता लोमहत्थगं परामुसइ, परा मुसित्ता दारचेडाओ य सालभंजियाओ य बालरूवए य लोमहत्थेणं पमज्जइ, पमज्जित्ता दिव्वाए दगधाराए अब्भुक्खेइ, अब्भुक्खेत्ता सरसेणं गोसीसचंदणेणं चच्चए दलयइ, दलयित्ता पुप्फारुहणं जाव आभरणारुहणं करेइ, करेत्ता आसत्तोसत्त विउलवट्टवग्घारियम-ल्लदामकलावं करेइ, करेत्ता कयग्गहगहियकरयलपब्भट्ठविप्पमुक्केणं दसद्धवण्णेणं कुसुमेणं पुप्फपुंजोवयारकलियं करेइ, करेत्ता धूवं दलयइ, दलयित्ता– जेणेव दाहिणिल्लस्स मुहमंडवस्स उत्तरिल्ला खंभपंती तेणेव उवागच्छइ, उवागच्छित्ता लोमहत्थं परामुसइ, परा मुसित्ता खंभे य सालभंजियाओ य बालरूवए य लोमहत्थएणं पमज्जइ, पमज्जित्ता जहा चेव पच्चत्थिमिल्लस्स दारस्स जाव धूवं दलयइ, दलयित्ता– जेणेव दाहिणिल्लस्स मुहमंडवस्स पुरत्थिमिल्ले दारे तेणेव उवागच्छइ, उवागच्छित्ता लोमहत्थगं परामुसति, परामुसित्ता दारचेडाओ य सालभंजियाओ य बालरूवए य लोमहत्थेणं पमज्जइ, पमज्जित्ता तं चेव सव्वं। जेणेव दाहिणिल्लस्स मुहमंडवस्स दाहिणिल्ले दारे तेणेव उवागच्छइ, उवागच्छित्ता दारचेडाओ य सालभंजि-याओ य बालरूवए य लोमहत्थेणं पमज्जइ, पमज्जित्ता तं चेव सव्वं। जेणेव दाहिणिल्ले पेच्छाघरमंडवे जेणेव दाहिणिल्लस्स पेच्छाघरमंडवस्स बहुमज्झदेसभागे जेणेव वइरामए अक्खाडए जेणेव मणिपेढिया जेणेव सीहासणे तेणेव उवागच्छइ, उवागच्छित्ता लोमहत्थगं परामुसइ, परामुसित्ता अक्खाडगं च मणिपेढियं च सीहासनं च लोमहत्थएणं पमज्जइ, पमज्जित्ता दिव्वाए दगधाराए अब्भुक्खेइ, अब्भुक्खेत्ता सरसेणं गोसीसचंदनेणं चच्चए दलयइ, दलयित्ता पुप्फारुहणं जाव आभरणारुहणं करेइ, करेत्ता आसत्तोसत्तविउलवट्टवग्घारियमल्ल-दामकलावं करेइ, करेत्ता कयग्गहगहियकरयलपब्भट्ठविप्पमुक्केणं दसद्धवण्णेणं कुसुमेणं पुप्फ-पुंजोवयारकलियं करेइ, करेत्ता धूवं दलयइ, दलइत्ता– जेणेव दाहिणिल्लस्स पेच्छाघरमंडवस्स पच्चत्थिमिल्ले दारे तेणेव उवागच्छइ, उवागच्छित्ता तं चेव। जेणेव दाहिणिल्लस्स पेच्छाघरमंडवस्स उत्तरिल्ले दारे उत्तरिल्ला खंभपंती तेणेव उवागच्छइ, उवागच्छित्ता तं चेव। जेणेव दाहिणिल्लस्स पेच्छाघरमंडवस्स पुरत्थिमिल्ले दारे तेणेव उवागच्छइ, उवागच्छित्ता तं चेव। जेणेव दाहिणिल्लस्स पेच्छाघरमंडवस्स दाहिणिल्ले दारे तेणेव उवागच्छइ, उवागच्छित्ता तं चेव। जेणेव दाहिणिल्ले चेयइथूभे तेणेव उवागच्छइ, उवागच्छित्ता लोमहत्थगं परामुसइ, परामुसित्ता चेइय थूभं च मणिपेढियं च लोमहत्थएणं पमज्जइ, पमज्जित्ता दिव्वाए दगधाराए अब्भुक्खेइ, अब्भुक्खेत्ता सरसेणं गोसीसचंदणेणं चच्चए दलयइ, दलयित्ता पुप्फारुहणं जाव आभरणारुहणं करेइ, करेत्ता आसत्तोसत्तविउलवट्टवग्घारियमल्लदामकलावं करेइ, करेत्ता कयग्गह-गहियकरयलपब्भट्ठविप्पमुक्केणं दसद्धवण्णेणं कुसुमेणं पुप्फपुंजोवयारकलियं करेइ, करेत्ता धूवं दलयइ, दलयित्ता– जेणेव पच्चत्थिमिल्ला मणिपेढिया जेणेव पच्चत्थिमिल्ला जिनपडिमा तेणेव उवागच्छइ, उवागच्छित्ता जिनपडिमाए आलोए पणामं करेइ, करेत्ता तं चेव। जेणेव उत्तरिल्ला मणिपेढिया जेणेव उत्तरिल्ला जिनपडिमा तेणेव उवागच्छइ, उवागच्छित्ता तं चेव सव्वं। जेणेव पुरत्थिमिल्ला मणिपेढिया जेणेव पुरत्थिमिल्ला जिनपडिमा तेणेव उवागच्छइ, उवागच्छित्ता तं चेव। जेणेव दाहिणिल्ला मणिपेढिया जेणेव दाहिणिल्ला जिनपडिमा तेणेव उवागच्छइ, उवागच्छित्ता तं चेव सव्वं। जेणेव दाहिणिल्ले चेइयरुक्खे तेणेव उवागच्छइ, उवागच्छित्ता लोमहत्थगं परामुसइ, परामुसित्ता चेइयरुक्खं च मणिपेढियं च लोमहत्थएणं पमज्जइ, पमज्जित्ता तं चेव। जेणेव दाहिणिल्ले महिंदज्झए तेणेव उवागच्छइ, उवागच्छित्ता लोमहत्थगं परामुसइ, परामुसित्ता महिंदज्झयं च मणिपेढियं च लोमहत्थएणं पमज्जइ, पमज्जित्ता तं चेव सव्वं। जेणेव दाहिणिल्ला नंदापुक्खरिणी तेणेव उवागच्छइ, उवागच्छित्ता लोमहत्थगं परामुसति, परामुसित्ता तोरणे य तिसोवानपडिरूवए य सालभंजियाओ य बालरूवए य लोमहत्थएणं पमज्जइ, पमज्जित्ता दिव्वाए दगधाराए अब्भुक्खेइ, अब्भुक्खेत्ता सरसेणं गोसीसचंदनेणं चच्चए दलयइ, दलयित्ता पुप्फारुहणं जाव आभरणारुहणं करेइ, करेत्ता आसत्तोसत्तविउलवट्टवग्घारियमल्ल-दामकलावं करेइ, करेत्ता कयग्गहगहियकरयलपब्भट्ठविप्पमुक्केणं दसद्धवण्णेणं कुसुमेणं पुप्फ-पुंजोवयारकलियं करेइ, करेत्ता धूवं दलयति, दलइत्ता– सिद्धायतनं अनुपयाहिणीकरेमाणे जेणेव उत्तरिल्ला नंदापुक्खरिणी तेणेव उवागच्छति, उवागच्छित्ता तं चेव। जेणेव उत्तरिल्ले महिंदज्झए तेणेव उवागच्छइ, उवागच्छित्ता। जेणेव उत्तरिल्ले चेइयरुक्खे तेणेव उवागच्छइ, उवागच्छित्ता। जेणेव उत्तरिल्ले चेइयथूभे तेणेव उवागच्छइ, उवागच्छित्ता। जेणेव पच्चत्थिमिल्ला मणिपेढिया जेणेव पच्चत्थिमिल्ला जिनपडिमा तेणेव उवागच्छइ, उवागच्छित्ता तं चेव। जेणेव उत्तरिल्ला मणिपेढिया जेणेव उत्तरिल्ला जिनपडिमा तेणेव उवागच्छइ, उवागच्छित्ता तं चेव। जेणेव पुरत्थिमिल्ला मणिपेढिया जेणेव पुरत्थिमिल्ला जिनपडिमा तेणेव उवागच्छइ, उवागच्छित्ता तं चेव। जेणेव दाहिणिल्ला मणिपेढिया जेणेव दाहिणिल्ला जिनपडिमा तेणेव उवागच्छइ, उवागच्छित्ता तं चेव। जेणेव उत्तरिल्ले पेच्छाघरमंडवे जेणेव उत्तरिल्लस्स पेच्छाघरमंडवस्स बहुमज्झदेसभागे जेणेव वइरामए अक्खाडए जेणेव मणिपेढिया जेणेव सीहासणे तेणेव उवागच्छइ, उवागच्छित्ता जा चेव दाहिणिल्ले वत्तव्वया सा चेव सव्वा। जेणेव उत्तरिल्लस्स पेच्छाघरमंडवस्स पच्चत्थिमिल्ले दारे तेणेव उवागच्छइ, उवागच्छित्ता। जेणेव उत्तरिल्लस्स पेच्छाघरमंडवस्स उत्तरिल्ले दारे तेणेव उवागच्छइ, उवागच्छित्ता। जेणेव उत्तरिल्लस्स पेच्छाघरमंडवस्स पुरत्थिमिल्ले दारे तेणेव उवागच्छइ, उवागच्छित्ता। जेणेव उत्तरिल्लस्स पेच्छाघरमंडवस्स दाहिणिल्ला खंभपंती तेणेव उवागच्छइ, उवागच्छित्ता। जेणेव उत्तरिल्लस्स दारे मुहमंडवे जेणेव उत्तरिल्लस्स मुहमंडवस्स बहुमज्झदेसभाए तेणेव उवागच्छइ, उवागच्छित्ता। जेणेव उत्तरिल्ले मुहमंडवस्स पच्चत्थिमिल्ले दारे तेणेव उवागच्छइ, उवागच्छित्ता। जेणेव उत्तरिल्लस्स मुहमंडवस्स उत्तरिल्ले दारे तेणेव उवागच्छइ, उवागच्छित्ता। जेणेव उत्तरिल्लस्स मुहमंडवस्स पुरत्थिमिल्ले दारे तेणेव उवागच्छइ, उवागच्छित्ता। जेणेव उत्तरिल्लस्स मुहमंडवस्स दाहिणिल्ला खंभपंती तेणेव उवागच्छइ, उवागच्छित्ता। जेणेव सिद्धायतनस्स उत्तरिल्ले दारे तेणेव उवागच्छइ, उवागच्छित्ता तं चेव। जेणेव सिद्धायतनस्स पुरित्थिमिल्ले दारे तेणेव उवागच्छइ, उवागच्छित्ता। जेणेव पुरत्थिमिल्ले दारे मुहमंडवे जेणेव पुरत्थिमिल्लस्स मुहमंडवस्स बहुमज्झदेसभागे तेणेव उवागच्छइ, उवागच्छित्ता। जेणेव पुरत्थिमिल्लस्स मुहमंडवस्स दाहिणिल्ले दारे तेणेव उवागच्छइ, उवागच्छित्ता। जेणेव पुरत्थिमिल्लस्स मुहमंडवस्स पच्चत्थिमिल्ला खंभपंती तेणेव उवागच्छइ, उवागच्छित्ता। जेणेव पुरत्थिमिल्लस्स मुहमंडवस्स उत्तरिल्ले दारे तेणेव उवागच्छइ, उवागच्छित्ता। जेणेव पुरत्थिमिल्लस्स मुहमंडवस्स पुरत्थिमिल्ले दारे तेणेव उवागच्छइ, उवागच्छित्ता। जेणेव पुरत्थिमिल्ले पेच्छाघरमंडवे जेणेव पुरत्थिमिल्लस्स पेच्छाघरमंडवस्स बहुमज्झदेसभाए जेणेव वइरामए अक्खाडए जेणेव मणिपेढिया जेणेव सीहासणे तेणेव उवागच्छइ, उवागच्छित्ता। जेणेव पुरत्थिमिल्लस्स पेच्छाघरमंडवस्स दाहिणिल्ले दारे तेणेव उवागच्छइ, उवागच्छित्ता। जेणेव पुरत्थिमिल्लस्स पेच्छाघरमंडवस्स पच्चत्थिमिल्ला खंभपंती तेणेव उवागच्छइ, उवागच्छित्ता। जेणेव पुरत्थिमिल्लस्स पेच्छाघरमंडवस्स उत्तरिल्ले दारे तेणेव उवागच्छइ, उवागच्छित्ता। जेणेव पुरत्थिमिल्लस्स पेच्छाघरमंडवस्स पुरत्थिमिल्ले दारे तेणेव उवागच्छइ, उवागच्छित्ता। जेणेव पुरत्थिमिल्ले चेइयथूभे तेणेव उवागच्छति, उवागच्छित्ता। जेणेव दाहिणिल्ला मणिपेढिया जेणेव दाहिणिल्ला जिनपडिमा तेणेव उवागच्छइ, उवागच्छित्ता। जेणेव पच्चत्थिमिल्ला मणिपेढिया जेणेव पच्चत्थिमिल्ला जिनपडिमा तेणेव उवागच्छइ, उवागच्छित्ता। जेणेव उत्तरिल्ला मणिपेढिया जेणेव उत्तरिल्ला जिनपडिमा तेणेव उवागच्छइ, उवागच्छित्ता। जेणेव पुरत्थिमिल्ला मणिपेढिया जेणेव पुरत्थिमिल्ला जिनपडिमा जेणेव उवागच्छइ, उवागच्छित्ता। जेणेव पुरत्थिमिल्ले चेइयरुक्खे तेणेव उवागच्छइ, उवागच्छित्ता। जेणेव पुरत्थिमिल्ले महिंदज्झए तेणेव उवागच्छइ, उवागच्छित्ता। जेणेव पुरत्थिमिल्ला नंदापुक्खरिणी तेणेव उवागच्छइ, उवागच्छित्ता। जेणेव सभा सुहम्मा तेणेव उवागच्छति, उवागच्छित्ता सभं सुहम्मं पुरत्थिमिल्लेणं दारेणं अनुपविसइ, अनुपविसित्ता जेणेव माणवए चेइयखंभे जेणेव वइरामया गोलवट्टसमुग्गा तेणेव उवागच्छइ, उवागच्छित्ता लोमहत्थगं परामुसइ, परामुसित्ता वइरामए गोलवट्टसमुग्गए लोमहत्थेणं पमज्जइ, पमज्जित्ता वइरामए गोलवट्टसमुग्गए विहाडेइ, विहाडेत्ता जिनसकहाओ लोमहत्थेणं पमज्जइ, पमज्जित्ता सुरभिणा गंधोदएणं पक्खालेइ, पक्खालेत्ता अग्गेहिं वरेहिं गंधेहिं य मल्लेहि य अच्चेइ, अच्चेत्ता धूवं दलयइ, दलयित्ता जिनसकहाओ वइरामएसु गोलवट्टसमुग्गएसु पडिनिक्खमइ, पडिनिक्खमित्ता माणवगं चेइयखंभं लोमहत्थएणं पमज्जइ, पमज्जित्ता दिव्वाए दगधाराए अब्भुक्खेइ, अब्भुक्खेत्ता सरसेणं गोसीसचंदनेणं चच्चए दलयइ, दलयित्ता पुप्फारुहणं जाव धूवं दलयइ, दलयित्ता– जेणेव मणिपेढिया जेणेव सीहासने तेणेव उवागच्छइ, उवागच्छित्ता लोमहत्थगं परामुसइ, परामुसित्ता मणिपेढियं च सीहासनं च लोमहत्थएणं पमज्जइ, पमज्जित्ता तं चेव। जेणेव मणिपेढिया जेणेव देवसयणिज्जे तेणेव उवागच्छइ, उवागच्छित्ता लोमहत्थगं परामुसइ, परामुसित्ता मणिपेढियं च देवसयणिज्जं च लोमहत्थएणं पमज्जइ, पमज्जित्ता तं चेव। जेणेव मणिपेढिया जेणेव खुड्डागमहिंदज्झए तेणेव उवागच्छइ, उवागच्छित्ता लोमहत्थगं परामुसइ, परामुसित्ता मणिपेढियं च खुड्डागमहिंदज्झयं च लोमहत्थएणं पमज्जइ, पमज्जित्ता तं चेव। जेणेव पहरणकोसे चोप्पालए तेणेव उवागच्छइ, उवागच्छित्ता लोमहत्थगं परामुसइ, परामुसित्ता फलिहरयणपामोक्खाइं पहरणरयणाइं लोमहत्थएणं पमज्जइ, पमज्जित्ता दिव्वाए दगधाराए अब्भुक्खेइ, अब्भुक्खेत्ता सरसेणं गोसीसचंदनेणं चच्चए दलयइ, दलयित्ता पुप्फारुहणं जाव आभरणारुहणं आसत्तोसत्तविउलवट्टवग्घारियमल्लदामकलावं करेइ, करेत्ता कयग्गहग-हियकरयलपब्भट्ठविप्पमुक्केणं दसद्धवण्णेणं कुसुमेणं पुप्फपुंजोवयारकलियं करेइ, करेत्ता धूवं दलयइ, दलयित्ता– जेणेव सभाए सुहम्माए बहुमज्झदेसभाए तेणेव उवागच्छइ, उवागच्छित्ता जाव धूवं दलयइ, दलयित्ता– जेणेव सभाए सुहम्माए दाहिणिल्ले दारे तेणेव उवागच्छइ, उवागच्छित्ता–सभं सुहम्मं अनुपयाहिणी-करेमाणे जेणेव उत्तरिल्ला णंदा पुक्खरिणी तेणेव उवागच्छइ, उवागच्छित्ता। जेणेव सभाए सुहम्माए उत्तरिल्ले दारे तेणेव उवागच्छइ, उवागच्छित्ता। जेणेव सभाए सुहम्माए पुरत्थिमिल्ले दारे तेणेव उवागच्छइ, उवागच्छित्ता– जेणेव उववायसभा तेणेव उवागच्छइ, उवागच्छित्ता उववायसभं पुरत्थिमिल्लेणं दारेणं अनुपविसइ, अनुपविसित्ता जेणेव मणिपेढिया जेणेव देवसयणिज्जे तेणेव उवागच्छइ, उवागच्छित्ता लोमहत्थगं परामुसइ, परामुसित्ता मणिपेढियं च देवसयणिज्जं च लोमहत्थएणं पमज्जइ, पमज्जित्ता। जेणेव उववायसभाए बहुमज्झदेसभाए तेणेव उवागच्छइ, उवागच्छित्ता। जेणेव उववायसभाए दाहिणिल्ले दारे तेणेव उवागच्छइ, उवागच्छित्ता–उववायसभं अनुपयाहिणी-करेमाणे जेणेव उत्तरिल्ला नंदा पुक्खरिणी तेणेव उवागच्छइ, उवागच्छित्ता जेणेव उववायसभाए उत्तरिल्ले दारे तेणेव उवागच्छइ, उवागच्छित्ता। जेणेव उववायसभाए पुरत्थिमिल्ले दारे तेणेव उवागच्छइ, उवागच्छित्ता– जेणेव हरए तेणेव उवागच्छइ, उवागच्छित्ता लोमहत्थगं परामुसइ, परामुसित्ता तोरणे य तिसोवानपडिरूवए य सालभंजियाओ य बालरूवए य लोमहत्थएणं पमज्जइ, पमज्जित्ता। जेणेव अभिसेयसभा तेणेव उवागच्छइ, उवागच्छित्ता अभिसेयसभं पुरत्थिमिल्लेणं दारेणं अनुपविसइ, अनुपविसित्ता जेणेव मणिपेढिया जेणेव सीहासने तेणेव उवागच्छइ, उवागच्छित्ता लोमहत्थगं परामुसइ, परामुसित्ता मणिपेढियं च सीहासनं च लोमहत्थएणं पमज्जइ, पमज्जित्ता। जेणेव अभिसेयभंडे तेणेव उवागच्छइ, उवागच्छित्ता लोमहत्थगं परामुसइ, परामुसित्ता अभिसेयभंडं लोमहत्थएणं पमज्जइ, पमज्जित्ता। जेणेव अभिसेयसभाए बहुमज्झदेसभाए तेणेव उवागच्छइ, उवागच्छित्ता। जेणेव अभिसेयसभाए दाहिणिल्ले दारे तेणेव उवागच्छइ, उवागच्छित्ता–अभिसेयसभं अनुपयाहिणी-करेमाणे जेणेव उत्तरिल्ला णंदा पुक्खरिणी तेणेव उवागच्छइ, उवागच्छित्ता जेणेव अभिसेयसभाए उत्तरिल्ले दारे तेणेव उवागच्छइ, उवागच्छित्ता। जेणेव अभिसेयसभाए पुरत्थिमिल्ले दारे तेणेव उवागच्छइ, उवागच्छित्ता– जेणेव अलंकारियसभा तेणेव उवागच्छइ, उवागच्छित्ता अलंकारियसभं पुरत्थिमिल्लेणं दारेणं अनुपविसइ, अनुपविसित्ता जेणेव मणिपेढिया जेणेव सीहासने तेणेव उवागच्छइ, उवाग-च्छित्ता लोमहत्थगं परामुसइ, परामुसित्ता मणिपेढियं च सीहासनं च लोमहत्थएणं पमज्जइ, पमज्जित्ता। जेणेव अलंकारियभंडे तेणेव उवागच्छइ, उवागच्छित्ता लोमहत्थगं परामुसइ, परामुसित्ता अलंकारियभंडं लोमहत्थएणं पमज्जइ, पमज्जित्ता। जेणेव अलंकारियसभाए बहुमज्झदेसभाए तेणेव उवागच्छइ, उवागच्छित्ता। जेणेव अलंकारियसभाए दाहिणिल्ले दारे तेणेव उवागच्छइ, उवागच्छित्ता–अलंकारियसभं अनुपयाहिणीकरेमाणे जेणेव उत्तरिल्ला नंदा पुक्खरिणी तेणेव उवागच्छइ, उवागच्छित्ता– जेणेव अलंकारियसभाए उत्तरिल्ले दारे तेणेव उवागच्छइ, उवागच्छित्ता। जेणेव अलंकारियसभाए पुरत्थिमिल्ले दारे तेणेव उवागच्छइ, उवागच्छित्ता– जेणेव ववसायसभा तेणेव उवागच्छइ, उवागच्छित्ता ववसायसभं पुरत्थिमिल्लेणं दारेणं अनुपविसइ, अनुपविसित्ता जेणेव पोत्थयरयणे तेणेव उवागच्छइ, उवागच्छित्ता लोमहत्थगं परामु-सइ, परामुसित्ता पोत्थयरयणं लोमहत्थएणं पमज्जइ, पमज्जित्ता दिव्वाए दगधाराए अब्भुक्खेइ, अब्भुक्खेत्ता सरसेणं गोसीसचंदनेणं चच्चए दलयइ, दलइत्ता अग्गेहिं वरेहि य गंधेहिं मल्लेहि य अच्चेइ, अच्चेत्ता पुप्फारुहणं। जेणेव मणिपेढिया जेणेव सीहासणे तेणेव उवागच्छइ, उवागच्छित्ता लोमहत्थगं परामुसइ, परामुसित्ता मणिपेढियं च सीहासनं च लोमहत्थएणं पमज्जइ, पमज्जित्ता। जेणेव ववसायसभाए बहुमज्झदेसभाए तेणेव उवागच्छइ, उवागच्छित्ता। जेणेव ववसायसभाए दाहिणिल्ले दारे तेणेव उवागच्छइ, उवागच्छित्ता–ववसायसभं अनु-पयाहिणीकरेमाणे जेणेव उत्तरिल्ला नंदा पुक्खरिणी तेणेव उवागच्छइ, उवागच्छित्ता जेणेव ववसायसभाए उत्तरिल्ले दारे तेणेव उवागच्छइ, उवागच्छित्ता। जेणेव ववसायसभाए पुरत्थिमिल्ले दारे तेणेव उवागच्छइ, उवागच्छित्ता– जेणेव बलिपीढे तेणेव उवागच्छइ, उवागच्छित्ता बलिविसज्जणं करेइ, करेत्ता आभिओगिए देवे सद्दावेइ, सद्दावेत्ता एवं वयासी– खिप्पामेव भो देवानुप्पिया! सूरियाभे विमाने सिंघाडएसु तिएसु चउक्केसु चच्चरेसु चउम्मुहेसु महापहपहेसु पागारेसु अट्टालएसु चरियासु दारेसु गोपुरेसु तोरणेसु आरामेसु उज्जानेसु काणनेसु वनेसु वनसंडेसु वनराईसु अच्चणियं करेइ, करेत्ता एयमाणत्तियं खिप्पामेव पच्चप्पिणह। तए णं ते आभिओगिया देवा सूरियाभेणं देवेणं एवं वुत्ता समाणा हट्ठतुट्ठचित्तमानंदिया पीइमणा परमसोमनस्सिया हरिसवसविसप्पमाणहियया करयलपरिग्गहियं दसनहं सिरसावत्तं मत्थए अंजलिं कट्टु एवं देवो! तहत्ति आणाए विनएणं वयणं पडिसुणंति, पडिसुणेत्ता सूरियाभे विमाने सिंघाडएसु तिएसु चउक्केसु चच्चरेसु चउम्मुहेसु महापहपहेसु पागारेसु अट्ठालएसु चरियासु दारेसु गोपुरेसु तोरणेसु आरामेसु उज्जानेसु काननेसु वनेसु वनसंडेसु वनराईसु अच्चणियं करेंति, करेत्ता जेणेव सूरियाभे देवे तेणेव उवागच्छंति, उवागच्छित्ता सूरियाभं देवं करयलपरिग्गहियं सिरसावत्तं मत्थए अंजलिं कट्टु जएणं विजएणं बद्धावेंति, बद्धावेत्ता तमाणत्तियं पच्चप्पिणंति। तए णं से सूरियाभे देवे जेणेव णंदा पुक्खरिणी तेणेव उवागच्छइ, उवागच्छित्ता नंदं पुक्खरिणिं पुरत्थिमिल्लेणं तिसोमाणपडिरूवएणं पच्चोरुहति, पच्चोरुहित्ता हत्थपाए पक्खालेइ, पक्खालेत्ता नंदाओ पुक्खरिणीओ पच्चुत्तरेइ, पच्चुत्तरेत्ता जेणेव सभा सुधम्मा तेणेव पहारेत्थ गमणाए। तए णं से सूरियाभे देवे चउहिं सामानियसाहस्सीहिं जाव सोलसहिं आयरक्खदेवसाहस्सीहिं अन्नेहि य बहूहिं सूरियाभविमानवासीहिं वेमाणिएहिं देवेहि य देवीहि य सद्धिं संपरिवुडे सव्विड्ढीए सव्वजुतीए सव्वबलेणं सव्वसमुदएणं सव्वादरेणं सव्वविभूईए सव्वविभूसाए सव्वसंभमेणं सव्वपुप्फगंधमल्लालंकारेणं सव्वतुडियसद्दसन्निनाएणं महया इड्ढीए महया जुईए महया बलेणं महया समुदएणं महया वरतुडिय जमगसमग पडुप्पवाइयरवेणं संख पणव पडह भेरि झल्लरि खरमुहि हुडुक्क मुरय मुइंग दुंदुहिनिग्घोस नायइरवेणं जेणेव सभा सुहम्मा तेणेव उवागच्छइ, उवागच्छित्ता सभं सुहम्मं पुरत्थिमिल्लेणं दारेणं अनुपविसति, अनुपविसित्ता जेणेव सीहासने तेणेव उवागच्छइ, उवागच्छित्ता सीहासनवरगए पुरत्थाभिमुहे सन्निसन्ने।
Sutra Meaning : જુઓ સૂત્ર ૪૩
Mool Sutra Transliteration : [sutra] tae nam tassa suriyabhassa devassa chattari samaniyasahassio java solasa ayarakkhadevasahassio anne ya bahave suriyabhavimanavasino vemaniya deva ya devio ya appegatiya uppalahatthagaya java sahassapattahatthagaya suriyabham devam pitthato-pitthato samanugachchhamti. Tae nam tassa suriyabhassa devassa abhiogiya deva ya devio ya appegatiya vamdanakalasa-hatthagaya java appegatiya dhuvakaduchchhuyahatthagaya hatthatutthachittamanamdiya piimana paramasomanassiya harisavasavisappamanahiyaya suriyabham devam pitthato-pitthato samanugachchhamti. Tae nam se suriyabhe deve chauhim samaniyasahassihim java ayarakkhadevasahassihim annehim bahuhi ya suriyabhavimanavasihim vemaniehim devehi ya devihi ya saddhim samparivude savviddhie java natiyaravenam jeneva siddhayatane teneva uvagachchhati, uvagachchhitta siddhayatanam puratthimillenam darenam anupavisati, anupavisitta jeneva devachchhamdae jeneva jinapadimao teneva uvagachchhati, uva-gachchhitta jinapadimanam aloe panamam kareti, karetta lomahatthagam ginhati, ginhitta jinapadimanam lomahatthaenam pamajjai, pamajjitta jinapadimao surabhina gamdhodaenam nhaei, nhaitta sarasenam gosisachamdanenam gayaim anulimpai, anulimpaitta, jinapadimanam ahayaim devadusajuyalaim niyamsei, niyamsetta aggehim varehim gamdhehim mallehi ya achchei,.. ..Achchetta puppharuhanam mallaruhanam vannaruhanam chunnaruhanam gamdharuhanam abharanaruhanam karei, karetta asattosattaviulavattavagghariyamalladamakalavam karei, karetta kayaggahagahiyakarayalapabbhattha-vippamukkenam dasaddhavannenam kusumenam pupphapumjovayarakaliyam karei, karetta jinapadimanam purato achchhehim sanhehim rayayamaehim achchharasa-tamdulehim atthattha mamgale alihai, tam jaha–sotthiyam sirivachchham namdiyavattam vaddhamanagam bhaddasanam kalasam machchham dappanam. Tayanamtaram cha nam chamdappabha-vairaveruliya-vimaladamdam kamchanamanirayanabhattichittam kalagaru pavara-kumdurukka turukka dhuva maghamaghemta gamdhuttamanuviddham cha dhuvavattim vinimmuyamtam veruliyamayam kaduchchhuyam paggahiya payattenam dhuvam dauna jinavaranam sattattha padani osarati, osaritta dasamgulim amjalim kariyamatthayammi ya payattenam, atthasayavisuddhagamthajuttehim atthajuttehim apunaruttehim mahavittehim samthunai, samthunitta vamam janum amchei, amchitta dahinam janum dharanitalamsi nihattu tikkhutto muddhanam dharanitalamsi nivadei, nivaditta isim pachchunnamai, pachchunnamitta karayalapariggahiyam sirasavattam matthae amjalim kattu evam vayasi– Namotthunam arahamtanam bhagavamtanam adigaranam titthagaranam sayamsambuddhanam purisottamanam purisasihanam purisavarapumdariyanam purisavaragamdhahatthinam loguttamanam loganahanam logahianam logapaivanam logapajjoyagaranam abhayadayanam chakkhudayanam maggadayanam saranadayanam bohimdayanam dhamma-dayanam dhammadesayanam dhammanayaganam dhammasarahinam dhammavarachauramtachakkavattinam appadihayavaranana-damsanadharanam viattachchhaumanam jinanam javayanam tinnanam tarayanam buddhanam bohayanam muttanam moyaganam savvannunam savvadarisinam sivam ayalam aruam anamtam akkhayam avvabaham apunaravittisiddhigainamadheyam thanam sampattanam vamdai namamsai, vamditta namamsitta– Jeneva siddhayatanassa bahumajjhadesabhae teneva uvagachchhai, uvagachchhitta divvae dagadharae abbhukkhei, abbhukkhetta sarasenam gosisachamdanenam pamchamgulitalam dalayai, dalaitta kayaggahagahiyam karayalapabbhatthavippamukkenam dasaddhavannenam kusumenam pupphapumjovayarakaliyam karei, karetta dhuvam dalayai, dalayitta– Jeneva siddhayatanassa dahinille dare teneva uvagachchhati, uvagachchhitta lomahatthagam paramusai, paramusitta darachedao ya salabhamjiyao ya valaruvae ya lomahatthaenam pamajjai, pamajjitta divvae dagadharae abbhukkhei, abbhukkhetta sarasenam gosisachamdanenam chachchae dalayai, dalaitta puppharuhanam java abharanaruhanam karei, karetta asattosatta viulavattavagghariyamalladamakalavam karei, karetta kayaggahagahiyakarayalapabbhatthavippamukkenam dasaddhavannenam kusumenam pupphapumjovayarakaliyam karei, karetta dhuvam dalayai, dalayitta– Jeneva dahinille dare muhamamdave jeneva dahinillassa muhamamdavassa bahumajjhadesabhae teneva uvagachchhai, uvagachchhitta lomahatthagam paramusai, paramusitta bahumajjhadesabhagam lomahatthenam pamajjai, pamajjitta divvae dagadharae abbhukkhei, abbhukkhetta sarasenam gosisachamdanenam pamchamgulitalam mamdalagam alihai, alihitta kayaggahagahiyam karayalapabbhatthavippamukkenam dasaddhavannenam kusumenam pupphapumjovayarakaliyam karei, karetta dhuvam dalayai, dalayitta– Jeneva dahinillassa muhamamdavassa pachchatthimille dare teneva uvagachchhai, uvagachchhitta lomahatthagam paramusai, para musitta darachedao ya salabhamjiyao ya balaruvae ya lomahatthenam pamajjai, pamajjitta divvae dagadharae abbhukkhei, abbhukkhetta sarasenam gosisachamdanenam chachchae dalayai, dalayitta puppharuhanam java abharanaruhanam karei, karetta asattosatta viulavattavagghariyama-lladamakalavam karei, karetta kayaggahagahiyakarayalapabbhatthavippamukkenam dasaddhavannenam kusumenam pupphapumjovayarakaliyam karei, karetta dhuvam dalayai, dalayitta– Jeneva dahinillassa muhamamdavassa uttarilla khambhapamti teneva uvagachchhai, uvagachchhitta lomahattham paramusai, para musitta khambhe ya salabhamjiyao ya balaruvae ya lomahatthaenam pamajjai, pamajjitta jaha cheva pachchatthimillassa darassa java dhuvam dalayai, dalayitta– Jeneva dahinillassa muhamamdavassa puratthimille dare teneva uvagachchhai, uvagachchhitta lomahatthagam paramusati, paramusitta darachedao ya salabhamjiyao ya balaruvae ya lomahatthenam pamajjai, pamajjitta tam cheva savvam. Jeneva dahinillassa muhamamdavassa dahinille dare teneva uvagachchhai, uvagachchhitta darachedao ya salabhamji-yao ya balaruvae ya lomahatthenam pamajjai, pamajjitta tam cheva savvam. Jeneva dahinille pechchhagharamamdave jeneva dahinillassa pechchhagharamamdavassa bahumajjhadesabhage jeneva vairamae akkhadae jeneva manipedhiya jeneva sihasane teneva uvagachchhai, uvagachchhitta lomahatthagam paramusai, paramusitta akkhadagam cha manipedhiyam cha sihasanam cha lomahatthaenam pamajjai, pamajjitta divvae dagadharae abbhukkhei, abbhukkhetta sarasenam gosisachamdanenam chachchae dalayai, dalayitta puppharuhanam java abharanaruhanam karei, karetta asattosattaviulavattavagghariyamalla-damakalavam karei, karetta kayaggahagahiyakarayalapabbhatthavippamukkenam dasaddhavannenam kusumenam puppha-pumjovayarakaliyam karei, karetta dhuvam dalayai, dalaitta– Jeneva dahinillassa pechchhagharamamdavassa pachchatthimille dare teneva uvagachchhai, uvagachchhitta tam cheva. Jeneva dahinillassa pechchhagharamamdavassa uttarille dare uttarilla khambhapamti teneva uvagachchhai, uvagachchhitta tam cheva. Jeneva dahinillassa pechchhagharamamdavassa puratthimille dare teneva uvagachchhai, uvagachchhitta tam cheva. Jeneva dahinillassa pechchhagharamamdavassa dahinille dare teneva uvagachchhai, uvagachchhitta tam cheva. Jeneva dahinille cheyaithubhe teneva uvagachchhai, uvagachchhitta lomahatthagam paramusai, paramusitta cheiya thubham cha manipedhiyam cha lomahatthaenam pamajjai, pamajjitta divvae dagadharae abbhukkhei, abbhukkhetta sarasenam gosisachamdanenam chachchae dalayai, dalayitta puppharuhanam java abharanaruhanam karei, karetta asattosattaviulavattavagghariyamalladamakalavam karei, karetta kayaggaha-gahiyakarayalapabbhatthavippamukkenam dasaddhavannenam kusumenam pupphapumjovayarakaliyam karei, karetta dhuvam dalayai, dalayitta– Jeneva pachchatthimilla manipedhiya jeneva pachchatthimilla jinapadima teneva uvagachchhai, uvagachchhitta jinapadimae aloe panamam karei, karetta tam cheva. Jeneva uttarilla manipedhiya jeneva uttarilla jinapadima teneva uvagachchhai, uvagachchhitta tam cheva savvam. Jeneva puratthimilla manipedhiya jeneva puratthimilla jinapadima teneva uvagachchhai, uvagachchhitta tam cheva. Jeneva dahinilla manipedhiya jeneva dahinilla jinapadima teneva uvagachchhai, uvagachchhitta tam cheva savvam. Jeneva dahinille cheiyarukkhe teneva uvagachchhai, uvagachchhitta lomahatthagam paramusai, paramusitta cheiyarukkham cha manipedhiyam cha lomahatthaenam pamajjai, pamajjitta tam cheva. Jeneva dahinille mahimdajjhae teneva uvagachchhai, uvagachchhitta lomahatthagam paramusai, paramusitta mahimdajjhayam cha manipedhiyam cha lomahatthaenam pamajjai, pamajjitta tam cheva savvam. Jeneva dahinilla namdapukkharini teneva uvagachchhai, uvagachchhitta lomahatthagam paramusati, paramusitta torane ya tisovanapadiruvae ya salabhamjiyao ya balaruvae ya lomahatthaenam pamajjai, pamajjitta divvae dagadharae abbhukkhei, abbhukkhetta sarasenam gosisachamdanenam chachchae dalayai, dalayitta puppharuhanam java abharanaruhanam karei, karetta asattosattaviulavattavagghariyamalla-damakalavam karei, karetta kayaggahagahiyakarayalapabbhatthavippamukkenam dasaddhavannenam kusumenam puppha-pumjovayarakaliyam karei, karetta dhuvam dalayati, dalaitta– Siddhayatanam anupayahinikaremane jeneva uttarilla namdapukkharini teneva uvagachchhati, uvagachchhitta tam cheva. Jeneva uttarille mahimdajjhae teneva uvagachchhai, uvagachchhitta. Jeneva uttarille cheiyarukkhe teneva uvagachchhai, uvagachchhitta. Jeneva uttarille cheiyathubhe teneva uvagachchhai, uvagachchhitta. Jeneva pachchatthimilla manipedhiya jeneva pachchatthimilla jinapadima teneva uvagachchhai, uvagachchhitta tam cheva. Jeneva uttarilla manipedhiya jeneva uttarilla jinapadima teneva uvagachchhai, uvagachchhitta tam cheva. Jeneva puratthimilla manipedhiya jeneva puratthimilla jinapadima teneva uvagachchhai, uvagachchhitta tam cheva. Jeneva dahinilla manipedhiya jeneva dahinilla jinapadima teneva uvagachchhai, uvagachchhitta tam cheva. Jeneva uttarille pechchhagharamamdave jeneva uttarillassa pechchhagharamamdavassa bahumajjhadesabhage Jeneva vairamae akkhadae jeneva manipedhiya jeneva sihasane teneva uvagachchhai, uvagachchhitta ja cheva dahinille vattavvaya sa cheva savva. Jeneva uttarillassa pechchhagharamamdavassa pachchatthimille dare teneva uvagachchhai, uvagachchhitta. Jeneva uttarillassa pechchhagharamamdavassa uttarille dare teneva uvagachchhai, uvagachchhitta. Jeneva uttarillassa pechchhagharamamdavassa puratthimille dare teneva uvagachchhai, uvagachchhitta. Jeneva uttarillassa pechchhagharamamdavassa dahinilla khambhapamti teneva uvagachchhai, uvagachchhitta. Jeneva uttarillassa dare muhamamdave jeneva uttarillassa muhamamdavassa bahumajjhadesabhae teneva uvagachchhai, uvagachchhitta. Jeneva uttarille muhamamdavassa pachchatthimille dare teneva uvagachchhai, uvagachchhitta. Jeneva uttarillassa muhamamdavassa uttarille dare teneva uvagachchhai, uvagachchhitta. Jeneva uttarillassa muhamamdavassa puratthimille dare teneva uvagachchhai, uvagachchhitta. Jeneva uttarillassa muhamamdavassa dahinilla khambhapamti teneva uvagachchhai, uvagachchhitta. Jeneva siddhayatanassa uttarille dare teneva uvagachchhai, uvagachchhitta tam cheva. Jeneva siddhayatanassa puritthimille dare teneva uvagachchhai, uvagachchhitta. Jeneva puratthimille dare muhamamdave jeneva puratthimillassa muhamamdavassa bahumajjhadesabhage teneva uvagachchhai, uvagachchhitta. Jeneva puratthimillassa muhamamdavassa dahinille dare teneva uvagachchhai, uvagachchhitta. Jeneva puratthimillassa muhamamdavassa pachchatthimilla khambhapamti teneva uvagachchhai, uvagachchhitta. Jeneva puratthimillassa muhamamdavassa uttarille dare teneva uvagachchhai, uvagachchhitta. Jeneva puratthimillassa muhamamdavassa puratthimille dare teneva uvagachchhai, uvagachchhitta. Jeneva puratthimille pechchhagharamamdave jeneva puratthimillassa pechchhagharamamdavassa bahumajjhadesabhae jeneva vairamae akkhadae jeneva manipedhiya jeneva sihasane teneva uvagachchhai, uvagachchhitta. Jeneva puratthimillassa pechchhagharamamdavassa dahinille dare teneva uvagachchhai, uvagachchhitta. Jeneva puratthimillassa pechchhagharamamdavassa pachchatthimilla khambhapamti teneva uvagachchhai, uvagachchhitta. Jeneva puratthimillassa pechchhagharamamdavassa uttarille dare teneva uvagachchhai, uvagachchhitta. Jeneva puratthimillassa pechchhagharamamdavassa puratthimille dare teneva uvagachchhai, uvagachchhitta. Jeneva puratthimille cheiyathubhe teneva uvagachchhati, uvagachchhitta. Jeneva dahinilla manipedhiya jeneva dahinilla jinapadima teneva uvagachchhai, uvagachchhitta. Jeneva pachchatthimilla manipedhiya jeneva pachchatthimilla jinapadima teneva uvagachchhai, uvagachchhitta. Jeneva uttarilla manipedhiya jeneva uttarilla jinapadima teneva uvagachchhai, uvagachchhitta. Jeneva puratthimilla manipedhiya jeneva puratthimilla jinapadima jeneva uvagachchhai, uvagachchhitta. Jeneva puratthimille cheiyarukkhe teneva uvagachchhai, uvagachchhitta. Jeneva puratthimille mahimdajjhae teneva uvagachchhai, uvagachchhitta. Jeneva puratthimilla namdapukkharini teneva uvagachchhai, uvagachchhitta. Jeneva sabha suhamma teneva uvagachchhati, uvagachchhitta sabham suhammam puratthimillenam darenam anupavisai, anupavisitta jeneva manavae cheiyakhambhe jeneva vairamaya golavattasamugga teneva uvagachchhai, uvagachchhitta lomahatthagam paramusai, paramusitta vairamae golavattasamuggae lomahatthenam pamajjai, pamajjitta vairamae golavattasamuggae vihadei, vihadetta jinasakahao lomahatthenam pamajjai, pamajjitta surabhina gamdhodaenam pakkhalei, pakkhaletta aggehim varehim gamdhehim ya mallehi ya achchei, achchetta dhuvam dalayai, dalayitta jinasakahao vairamaesu golavattasamuggaesu padinikkhamai, padinikkhamitta manavagam cheiyakhambham lomahatthaenam pamajjai, pamajjitta divvae dagadharae abbhukkhei, abbhukkhetta sarasenam gosisachamdanenam chachchae dalayai, dalayitta puppharuhanam java dhuvam dalayai, dalayitta– Jeneva manipedhiya jeneva sihasane teneva uvagachchhai, uvagachchhitta lomahatthagam paramusai, paramusitta manipedhiyam cha sihasanam cha lomahatthaenam pamajjai, pamajjitta tam cheva. Jeneva manipedhiya jeneva devasayanijje teneva uvagachchhai, uvagachchhitta lomahatthagam paramusai, paramusitta manipedhiyam cha devasayanijjam cha lomahatthaenam pamajjai, pamajjitta tam cheva. Jeneva manipedhiya jeneva khuddagamahimdajjhae teneva uvagachchhai, uvagachchhitta lomahatthagam paramusai, paramusitta manipedhiyam cha khuddagamahimdajjhayam cha lomahatthaenam pamajjai, pamajjitta tam cheva. Jeneva paharanakose choppalae teneva uvagachchhai, uvagachchhitta lomahatthagam paramusai, paramusitta phaliharayanapamokkhaim paharanarayanaim lomahatthaenam pamajjai, pamajjitta divvae dagadharae abbhukkhei, abbhukkhetta sarasenam gosisachamdanenam chachchae dalayai, dalayitta puppharuhanam java abharanaruhanam asattosattaviulavattavagghariyamalladamakalavam karei, karetta kayaggahaga-hiyakarayalapabbhatthavippamukkenam dasaddhavannenam kusumenam pupphapumjovayarakaliyam karei, karetta dhuvam dalayai, dalayitta– Jeneva sabhae suhammae bahumajjhadesabhae teneva uvagachchhai, uvagachchhitta java dhuvam dalayai, dalayitta– Jeneva sabhae suhammae dahinille dare teneva uvagachchhai, uvagachchhitta–sabham suhammam anupayahini-karemane jeneva uttarilla namda pukkharini teneva uvagachchhai, uvagachchhitta. Jeneva sabhae suhammae uttarille dare teneva uvagachchhai, uvagachchhitta. Jeneva sabhae suhammae puratthimille dare teneva uvagachchhai, uvagachchhitta– Jeneva uvavayasabha teneva uvagachchhai, uvagachchhitta uvavayasabham puratthimillenam darenam anupavisai, anupavisitta jeneva manipedhiya jeneva devasayanijje teneva uvagachchhai, uvagachchhitta lomahatthagam paramusai, paramusitta manipedhiyam cha devasayanijjam cha lomahatthaenam pamajjai, pamajjitta. Jeneva uvavayasabhae bahumajjhadesabhae teneva uvagachchhai, uvagachchhitta. Jeneva uvavayasabhae dahinille dare teneva uvagachchhai, uvagachchhitta–uvavayasabham anupayahini-karemane jeneva uttarilla namda pukkharini teneva uvagachchhai, uvagachchhitta Jeneva uvavayasabhae uttarille dare teneva uvagachchhai, uvagachchhitta. Jeneva uvavayasabhae puratthimille dare teneva uvagachchhai, uvagachchhitta– Jeneva harae teneva uvagachchhai, uvagachchhitta lomahatthagam paramusai, paramusitta torane ya tisovanapadiruvae ya salabhamjiyao ya balaruvae ya lomahatthaenam pamajjai, pamajjitta. Jeneva abhiseyasabha teneva uvagachchhai, uvagachchhitta abhiseyasabham puratthimillenam darenam anupavisai, anupavisitta jeneva manipedhiya jeneva sihasane teneva uvagachchhai, uvagachchhitta lomahatthagam paramusai, paramusitta manipedhiyam cha sihasanam cha lomahatthaenam pamajjai, pamajjitta. Jeneva abhiseyabhamde teneva uvagachchhai, uvagachchhitta lomahatthagam paramusai, paramusitta abhiseyabhamdam lomahatthaenam pamajjai, pamajjitta. Jeneva abhiseyasabhae bahumajjhadesabhae teneva uvagachchhai, uvagachchhitta. Jeneva abhiseyasabhae dahinille dare teneva uvagachchhai, uvagachchhitta–abhiseyasabham anupayahini-karemane jeneva uttarilla namda pukkharini teneva uvagachchhai, uvagachchhitta Jeneva abhiseyasabhae uttarille dare teneva uvagachchhai, uvagachchhitta. Jeneva abhiseyasabhae puratthimille dare teneva uvagachchhai, uvagachchhitta– Jeneva alamkariyasabha teneva uvagachchhai, uvagachchhitta alamkariyasabham puratthimillenam darenam anupavisai, anupavisitta jeneva manipedhiya jeneva sihasane teneva uvagachchhai, uvaga-chchhitta lomahatthagam paramusai, paramusitta manipedhiyam cha sihasanam cha lomahatthaenam pamajjai, pamajjitta. Jeneva alamkariyabhamde teneva uvagachchhai, uvagachchhitta lomahatthagam paramusai, paramusitta alamkariyabhamdam lomahatthaenam pamajjai, pamajjitta. Jeneva alamkariyasabhae bahumajjhadesabhae teneva uvagachchhai, uvagachchhitta. Jeneva alamkariyasabhae dahinille dare teneva uvagachchhai, uvagachchhitta–alamkariyasabham anupayahinikaremane jeneva uttarilla namda pukkharini teneva uvagachchhai, uvagachchhitta– Jeneva alamkariyasabhae uttarille dare teneva uvagachchhai, uvagachchhitta. Jeneva alamkariyasabhae puratthimille dare teneva uvagachchhai, uvagachchhitta– Jeneva vavasayasabha teneva uvagachchhai, uvagachchhitta vavasayasabham puratthimillenam darenam anupavisai, anupavisitta jeneva potthayarayane teneva uvagachchhai, uvagachchhitta lomahatthagam paramu-sai, paramusitta potthayarayanam lomahatthaenam pamajjai, pamajjitta divvae dagadharae abbhukkhei, abbhukkhetta sarasenam gosisachamdanenam chachchae dalayai, dalaitta aggehim varehi ya gamdhehim mallehi ya achchei, achchetta puppharuhanam. Jeneva manipedhiya jeneva sihasane teneva uvagachchhai, uvagachchhitta lomahatthagam paramusai, paramusitta manipedhiyam cha sihasanam cha lomahatthaenam pamajjai, pamajjitta. Jeneva vavasayasabhae bahumajjhadesabhae teneva uvagachchhai, uvagachchhitta. Jeneva vavasayasabhae dahinille dare teneva uvagachchhai, uvagachchhitta–vavasayasabham anu-payahinikaremane jeneva uttarilla namda pukkharini teneva uvagachchhai, uvagachchhitta Jeneva vavasayasabhae uttarille dare teneva uvagachchhai, uvagachchhitta. Jeneva vavasayasabhae puratthimille dare teneva uvagachchhai, uvagachchhitta– Jeneva balipidhe teneva uvagachchhai, uvagachchhitta balivisajjanam karei, karetta abhiogie deve saddavei, saddavetta evam vayasi– Khippameva bho devanuppiya! Suriyabhe vimane simghadaesu tiesu chaukkesu chachcharesu chaummuhesu mahapahapahesu pagaresu attalaesu chariyasu daresu gopuresu toranesu aramesu ujjanesu kananesu vanesu vanasamdesu vanaraisu achchaniyam karei, karetta eyamanattiyam khippameva pachchappinaha. Tae nam te abhiogiya deva suriyabhenam devenam evam vutta samana hatthatutthachittamanamdiya piimana paramasomanassiya harisavasavisappamanahiyaya karayalapariggahiyam dasanaham sirasavattam matthae amjalim kattu evam devo! Tahatti anae vinaenam vayanam padisunamti, padisunetta suriyabhe vimane simghadaesu tiesu chaukkesu chachcharesu chaummuhesu mahapahapahesu pagaresu atthalaesu chariyasu daresu gopuresu toranesu aramesu ujjanesu kananesu vanesu vanasamdesu vanaraisu achchaniyam karemti, karetta jeneva suriyabhe deve teneva uvagachchhamti, uvagachchhitta suriyabham devam karayalapariggahiyam sirasavattam matthae amjalim kattu jaenam vijaenam baddhavemti, baddhavetta tamanattiyam pachchappinamti. Tae nam se suriyabhe deve jeneva namda pukkharini teneva uvagachchhai, uvagachchhitta namdam pukkharinim puratthimillenam tisomanapadiruvaenam pachchoruhati, pachchoruhitta hatthapae pakkhalei, pakkhaletta namdao pukkharinio pachchuttarei, pachchuttaretta jeneva sabha sudhamma teneva paharettha gamanae. Tae nam se suriyabhe deve chauhim samaniyasahassihim java solasahim ayarakkhadevasahassihim annehi ya bahuhim suriyabhavimanavasihim vemaniehim devehi ya devihi ya saddhim samparivude savviddhie savvajutie savvabalenam savvasamudaenam savvadarenam savvavibhuie savvavibhusae savvasambhamenam savvapupphagamdhamallalamkarenam savvatudiyasaddasanninaenam mahaya iddhie mahaya juie mahaya balenam mahaya samudaenam mahaya varatudiya jamagasamaga paduppavaiyaravenam samkha panava padaha bheri jhallari kharamuhi hudukka muraya muimga dumduhinigghosa nayairavenam jeneva sabha suhamma teneva uvagachchhai, uvagachchhitta sabham suhammam puratthimillenam darenam anupavisati, anupavisitta jeneva sihasane teneva uvagachchhai, uvagachchhitta sihasanavaragae puratthabhimuhe sannisanne.
Sutra Meaning Transliteration : Juo sutra 43