Sutra Navigation: Rajprashniya ( રાજપ્રશ્નીય ઉપાંગ સૂત્ર )

Search Details

Mool File Details

Anuvad File Details

Sr No : 1105742
Scripture Name( English ): Rajprashniya Translated Scripture Name : રાજપ્રશ્નીય ઉપાંગ સૂત્ર
Mool Language : Ardha-Magadhi Translated Language : Gujarati
Chapter :

सूर्याभदेव प्रकरण

 Translated Chapter :

સૂર્યાભદેવ પ્રકરણ
Section : Translated Section :
Sutra Number : 42 Category : Upang-02
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से सूरियाभे देवे तेसिं सामानियपरिसोववण्णगाणं देवाणं अंतिए एयमट्ठं सोच्चा निसम्म हट्ठतुट्ठचित्तमानंदिए पीइमने परमसोमनस्सिए हरिसवसविसप्पमाणहियए सयणिज्जाओ अब्भुट्ठेति, अब्भुट्ठेत्ता उववायसभाओ पुरत्थिमिल्लेणं दारेणं निग्गच्छइ, जेणेव हरए तेणेव उवागच्छति, उवागच्छित्ता हरयं अनुपयाहिणीकरेमाणे-अनुपयाहिणीकरेमाणे पुरत्थिमिल्लेणं तोरणेणं अनुप-विसइ, अनुपविसित्ता पुरत्थिमिल्लेणं तिसोवानपडिरूवएणं पच्चोरुहइ, पच्चोरुहित्ता जलावगाहं करेइ, करेत्ता जल-मज्जणं करेइ, करेत्ता जलकिड्डं करेइ, करेत्ता जलाभिसेयं करेइ, करेत्ता आयंते चोक्खे परमसूईभूए हरयाओ पच्चोत्तरइ, पच्चोत्तरित्ता जेणेव अभिसेयसभा तेणेव उवागच्छति, उवागच्छित्ता अभिसेयसभं अनुपयाहिणीकरेमाणे-अनुपयाहिणीकरेमाणे पुरत्थिमिल्लेणं दारेणं अनुपविसइ, अनुपविसित्ता जेणेव सीहासणे तेणेव उवागच्छइ, उवागच्छित्ता सीहासनवरगए पुरत्थाभिमुहे सन्निसण्णे। तए णं सूरियाभस्स देवस्स सामानियपरिसोववण्णगा देवा आभिओगिए देवे सद्दावेंति, सद्दावेत्ता एवं वयासी–खिप्पामेव भो! देवानुप्पिया! सूरियाभस्स देवस्स महत्थं महग्घं महरिहं विउलं इंदाभिसेयं उवट्ठवेह। तए णं ते आभिओगिआ देवा सामानियपरिसोववण्णेहिं देवेहिं एवं वुत्ता समाणा हट्ठतुट्ठ-चित्तमानंदिया पीइमणा परमसोमनस्सिया हरिसवस विसप्पमाणहियया करयलपरिग्गहियं दसनहं सिरसावत्तं मत्थए अंजलिं कट्टु एवं देवा! तहत्ति आणाए विनएणं वयणं पडिसुणंति, पडिसुणित्ता उत्तरपुरत्थिमं दिसीभागं अवक्कमंति, अवक्कमित्ता वेउव्वियसमुग्घाएणं समोहण्णंति समोहणित्ता संखेज्जाइं जोयणाइं दंडं निसिरंति, तं जहा– रयनाणं वइराणं वेरुलियाणं लोहियक्खाणं मसारगल्लाणं हंसगब्भाणं पुलगाणं सोगंधियाणं जोईरसाणं अंजनाणं अंजनंपुलगाणं रययाणं जायरूवाणं अंकाणं फलिहाणं रिट्ठाणं अहाबायरे पोग्गले परिसाडेंति, परिसाडेत्ता अहासुहुमे पोग्गले परियायंति, परियाइत्ता दोच्चं पि वेउव्वियसमुग्घाएणं समोहण्णंति, ... ...समोहणित्ता अट्ठसहस्सं सोवण्णियाणं कलसाणं, अट्ठसहस्सं रुप्पमयाणं कलसाणं, अट्ठ-सहस्सं मणिमयाणं कलसाणं, अट्ठसहस्सं सुवण्णरुप्पामयाणं कलसाणं, अट्ठसहस्सं सुवण्णमणि-मयाणं कलसाणं, अट्ठसहस्सं रुप्पमणिमयाणं कलसाणं, अट्ठसहस्सं सुवण्णरुप्पमणिमयाणं कलसाणं, अट्ठसहस्सं भोमिज्जाणं कलसाणं, एवं– भिंगाराणं आयंसाणं थालाणं पाईणं सुपतिट्ठाणं मणोगुलियाणं वायकरगाणं चित्ताणं रयणकरंडगाणं, पुप्फचंगेरीणं मल्लचंगेरीणं चुण्णचंगेरीणं गंधचंगेरीणं वत्थचंगेरीणं आभरणचंगेरीणं सिद्धत्थचंगेरीणं लोमहत्थचंगेरीणं, पुप्फपडलगाणं मल्लपडलगाणं चुण्णपडलगाणं गंधपडलगाणं वत्थपडलगाणं आभरणपडलगाणं सिद्धत्थ-पडलगाणं लोमहत्थपडलगाणं सीहासनाणं छत्ताणं चामराणं, तेल्लसमुग्गाणं कोट्ठसमुग्गाणं पत्तसमुग्गाणं चोयगसमुग्गाणं तगरसमुग्गाणं एलासमुग्गाणं हरियालसमुग्गाणं हिंगुलयसमुग्गाणं मनोसिलासमुग्गाणं अंजनंसमुग्गाणं अट्ठसहस्सं झयाणं, अट्ठसहस्सं धूवकडुच्छुयाणं विउव्वंति, ... ...विउव्वित्ता ते साभाविए य वेउव्विए य कलसे य जाव कडुच्छुए य गिण्हंति, गिण्हित्ता सूरियाभाओ विमाणाओ पडिनिक्खमंति, पडिनिक्खमित्ता ताए उक्किट्ठाए तुरियाए चवलाए चंडाए जवणाए सिग्घाए उद्धुयाए दिव्वाए देवगईए तिरियमसंखेज्जाणं दीवसमुद्दाणं मज्झंमज्झेणं वीतिवयमाणा-वीतिवयमाणा जेणेव खीरोदयसमुद्दे तेणेव उवागच्छंति, उवागच्छित्ता खीरोयगं गिण्हंति, गिण्हित्ता जाइं तत्थुप्पलाइं पउमाइं कुमुयाइं नलिणाइं सुभगाइं सोगंधियाइं पोंडरीयाइं महापोंडरीयाइं सयवत्ताइं सहस्सपत्ताइं ताइं गिण्हंति, गिण्हित्ता जेणेव पुक्खरोदए समुद्दे तेणेव उवागच्छंति, उवागच्छित्ता पुक्खरोदयं गेण्हंति, गेण्हित्ता जाइं तत्थुप्पलाइं जाव सहस्सपत्ताइं ताइं गिण्हंति, गिण्हित्ता जेणेव समयखेत्ते जेणेव भरहेरवयाइं वासाइं जेणेव मागहवरदामपभासाइं तित्थाइं तेणेव उवागच्छंति, उवागच्छित्ता तित्थोदगं गेण्हंति, गेण्हित्ता तित्थमट्टियं गेण्हंति, ... ...गेण्हित्ता जेणेव गंग सिंधू रत्ता रत्तवईओ महानईओ तेणेव उवागच्छंति, उवागच्छित्ता सलिलोदगं गेण्हंति, गेण्हित्ता उभओकूलमट्टियं गेण्हंति, गेण्हित्ता जेणेव चुल्लहिमवंतसिहरि-वासहरपव्वया तेणेव उवागच्छंति, उवागच्छित्ता सव्वतूयरे सव्वपुप्फे सव्वगंधे सव्वमल्ले सव्वोसहि-सिद्धत्थए गिण्हंति, गिण्हित्ता जेणेव पउमपुंडरीयदहा तेणेव उवागच्छंति, उवागच्छित्ता दहोदगं गेण्हंति, गेण्हित्ता जाइं तत्थ उप्पलाइं जाव सहस्सपत्ताइं ताइं गेण्हंति, गेण्हित्ता जेणेव हेमवयएरण्णवयाइं वासाइं जेणेव रोहिय रोहियंस सुवण्णकूल रुप्पकूलाओ महानईओ तेणेव उवागच्छंति उवागच्छित्ता सलिलोदगं गेण्हंति, गेण्हित्ता उभओकूलमट्टियं गिण्हंति, गिण्हित्ता जेणेव सद्दावाति-वियडावाति वट्टवेयड्ढपव्वया तेणेव उवागच्छंति, उवागच्छित्ता सव्वतूयरे सव्वपुप्फे सव्वगंधे सव्वमल्ले सव्वोसहि सिद्धत्थए गिण्हंति, ... ...गिण्हित्ता जेणेव महा-हिमवंत रुप्पिवासहरपव्वया तेणेव उवागच्छंति, उवागच्छित्ता सव्वतूयरे सव्वपुप्फे सव्वगंधे सव्वमल्ले सव्वोसहिसिद्धत्थए गिण्हंति गिण्हित्ता जेणेव महापउम-महापुंडरीयद्दहा तेणेव उवागच्छंति, उवागच्छित्ता दहोदगं गिण्हंति, गिण्हित्ता जाइं तत्थ उप्पलाइं जाव सहस्सपत्ताइं ताइं गेण्हंति, गेण्हित्ता जेणेव हरिवासरम्मगवासाइं जेणेव हरि हरिकंत नरनारिकंताओ महानईओ तेणेव उवागच्छंति, उवागच्छित्ता सलिलोदगं गेण्हंति, गेण्हित्ता उभओकूलमट्टियं गेण्हंति गेण्हित्ता जेणेव गंधावातिमालवंतपरियागा वट्टवेयड्ढपव्वया तेणेव उवागच्छंति, उवागच्छित्ता सव्वतूयरे सव्वपुप्फे सव्वगंधे सव्वमल्ले सव्वोसहिसिद्धत्थए गिण्हंति, गिण्हित्ता जेणेव णिसढ नीलवंत वासधरपव्वया तेणेव उवागच्छंति, उव्वागच्छित्ता सव्वतूयरे सव्वपुप्फे सव्वगंधे सव्वमल्ले सव्वोसहिसिद्धत्थए गिण्हंति, ... ...गिण्हित्ता जेणेव तिगिच्छि केसरिद्दहाओ तेणेव उवागच्छंति, उवागच्छित्ता दहोदगं गेण्हंति, गेण्हित्ता जाइं तत्थ उप्पलाइं जाव सहस्सपत्ताइं ताइं गेण्हंति, गेण्हित्ता जेणेव पुव्वविदेहा-वरविदेहवासाइं जेणेव सीता-सीतोदाओ महानदीओ तेणेव उवागच्छंति, उवागच्छित्ता सलिलोदगं गेण्हंति, गेण्हित्ता उभओकूलमट्टियं गेण्हंति, गेण्हित्ता जेणेव सव्वचक्कवट्टिविजया जेणेव सव्वमागहवरदामपभासाइं तित्थाइं तेणेव उवागच्छंति, उवागच्छित्ता तित्थोदगं गेण्हंति, गेण्हित्ता तित्थमट्टियं गेण्हंति, गेण्हित्ता जेणेव सव्वंतरनईओ तेणेव उवागच्छंति, उवागच्छित्ता सलिलोदगं गेण्हंति, गेण्हित्ता उभओकूलमट्टियं गेण्हंति,... ...गेण्हित्ता जेणेव सव्ववक्खारपव्वया तेणेव उवागच्छंति, उवागच्छित्ता सव्वतूयरे सव्वपुप्फे सव्वगंधे सव्वमल्ले सव्वोसहिसिद्धत्थए य गेण्हंति, गेण्हित्ता जेणेव मंदरे पव्वते जेणेव भद्दसालवने तेणेव उवागच्छंति, उवागच्छित्ता सव्वतूयरे सव्वपुप्फे सव्वगंधे सव्वमल्ले सव्वोसहिसिद्धत्थए य गेण्हंति, गेण्हित्ता जेणेव णंदणवणे तेणेव उवागच्छंति, उवागच्छित्ता सव्वतूयरे जाव सव्वोसहि-सिद्धत्थए य सरसं च गोसीसचंदणं गिण्हंति, गिण्हित्ता जेणेव सोमनसवने तेणेव उवागच्छंति, उवागच्छित्ता सव्वतूयरे जाव सव्वोसहिसिद्धत्थए य सरसं च गोसीसचंदणं च दिव्वं च सुमनदामं गिण्हंति, गिण्हित्ता जेणेव पंडगवने तेणेव उवागच्छंति, उवागच्छित्ता सव्वतूयरे जाव सव्वोसहिसिद्धत्थए च सरसं च गोसीसचंदणं च दिव्वं च सुमणदामं दद्दरमलयसुगंधियगंधे गिण्हंति, ...गिण्हित्ता एगतो मिलायंति, मिलाइत्ता ताए उक्किट्ठाए तुरियाए चवलाए चंडाए जवणाए सिग्घाए उद्धूयाए दिव्वाए देवगईए तिरियमसंखेज्जाणं दीवसमुद्दाणं मज्झंमज्झेणं वीईवयमाणा-वीईवयमाणा जेणेव सोहम्मे कप्पे जेणेव सूरियाभे विमाने जेणेव अभिसेयसभा जेणेव सूरियाभे देवे तेणेव उवागच्छंति, उवागच्छित्ता सूरियाभं देवं करयलपरिग्गहियं सिरसावत्तं मत्थए अंजलिं कट्टु जएणं विजएणं बद्धावेंति, बद्धावेत्ता तं महत्थं महग्घं महरिहं विउलं इंदाभिसेयं उवट्ठवेंति। तए णं तं सूरियाभं देवं चत्तारि सामानियसाहस्सीओ, चत्तारि अग्गमहिसीओ सपरिवारातो, तिन्नि परिसाओ, सत्त अनियाओ, सत्त अनियाहिवइणो, सोलस आयरक्खदेवसाहस्सीओ, अन्नेवि बहवे सूरियाभविमानवासिणो देवा य देवीओ य तेहिं साभाविएहिं य वेउव्विएहि य वरकमल-पइट्ठाणेहिं सुरभिवरवारिपडिपुण्णेहिं चंदनकयचच्चाएहिं आविद्धकंठगुणेहिं पउमुप्पलपिहाणेहिं सुकुमालकरयलपरिग्गहिएहिं अट्ठसहस्सेणं सोवण्णियाणं कलसाणं, अट्ठसहस्सेणं रुप्पमयाणं कलसाणं, अट्ठसहस्सेणं मणिमयाणं कलसाणं, अट्ठसहस्सेणं सुवण्णरुप्पामयाणं कलसाणं, अट्ठसहस्सेणं सुवण्णमणिमयाणं कलसाणं, अट्ठसहस्सेणं रुप्पमणिमयाणं कलसाणं,अट्ठसहस्सेणं सुवण्णरुप्पमणिमयाणं कलसाणं अट्ठसहस्सेणं भोमिज्जाणं कलसाणं सव्वोदएहिं सव्वमट्टियाहिं सव्वतूयरेहिं सव्वपुप्फेहिं सव्वगंधेहिं सव्वमल्लेहिं सव्वोसहिसिद्धत्थएहिं य सव्विड्ढीए जाव नाइयरवेणं महया-महया इंदाभिसेएणं अभिसिंचंति। तए णं तस्स सूरियाभस्स देवस्स महया-महया इंदाभिसेए वट्टमाणे–अप्पेगतिया देवा सूरियाभं विमानं नच्चोयगं नातिमट्टियं पविरलफुसियरयरेणुविणासणं दिव्वं सुरभिगंधोदगवासं वासंति, अप्पेगतिया देवा सूरियाभं विमानं हयरयं नट्ठरयं भट्ठ-रयं उवसंतरयं पसंतरयं करेंति, अप्पेगतिया देवा सूरियाभं विमानं आसियसंमज्जिओवलित्तं सुइ संमट्ठरत्थंतरावणवीहियं करेंति, अप्पेगतिया देवा सूरियाभं विमानं मंचाइमंचकलियं करेंति, अप्पेगइया देवा सूरियाभं विमानं नानाविह-रागोसियझयपडागाइपडागमंडियं करेंति, अप्पेगतिया देवा सूरियाभं विमानं लाउल्लोइयमहियं गोसीससरसरत्तचंदनदद्दरदिण्णपंचंगुलितलं करेंति, अप्पेगतिया देवा सूरियाभं विमानं उवचिय-वंदनकलसं वंदनघडसुकयतोरणपडिदुवारदेसभागं करेंति, अप्पेगतिया देवा सूरियाभं विमानं आसत्तोसत्तविउलवट्टवग्घारियमल्लदामकलावं करेंति, ... ...अप्पेगतिया देवा सूरियाभं विमानं पंचवण्ण-सुरभि मुक्कपुप्फपुंजोवयारकलियं करेंति, अप्पेगतिया देवा सूरियाभं विमानं कालागरु पवरकुंदुरुक्क तुरुक्क धूव मघमघेंतगंधुद्धुयाभिरामं करेंति, अप्पेगइया देवा सूरियाभं विमानं सुगंधगंधियं गंधवट्टिभूतं करेंति, अप्पेगतिया देवा हिरण्णवासं वासंति, सुवण्णवासं वासंति, रयणवासं वासंति, वइर-वासं वासंति, पुप्फवासं वासंति, फलवासं वासंति, मल्लवासं वासंति, गंधवासं वासंति, चुण्णवासं वासंति, आभरणवासं वासंति, अप्पेगतिया देवा हिरण्णविहिं भाएंति, एवं–सुवण्णविहिं रयणविहिं पुप्फविहिं फलविहिं मल्लविहिं गंधविहिं चुण्णविहिं आभरणविहिं भाएंति, ...अप्पेगतिया देवा चउव्विहं वाइत्तं वाएंति– ततं विततं घणं सुसिरं, अप्पेगइया देवा चउव्विहं गेयं गायंति, तं जहा–उक्खित्तायं पायंतायं मंदायं रोइयावसाणं, अप्पेगतिया देवा दुयं नट्टविहिं उवदंसेंति, अप्पेगतिया देवा विलंबियं नट्टविहिं उवदंसेंति, अप्पेगतिया देवा अंचियं नट्टविहिं उवदंसेंति, अप्पेगतिया देवा रिभियं नट्टविहिं उवदंसेंति, अप्पेगइया देवा अंचियरिभियं नट्टविहिं उवदंसेंति, अप्पेगइया देवा आरभडं नट्टविहिं उवदंसेंति, अप्पेगइया देवा भसोलं नट्टविहिं उवदंसेंति, अप्पेगइया देवा आरभड-भसोलं नट्टविहिं उवदंसेंति, अप्पेगइया देवा उप्पायनिवायपसत्तं संकुचियपसारियुं रियारियं भंत संभंतं नामं दिव्वं नट्टविहिं उवदंसेंति, ... ...अप्पेगतिया देवा चउव्विहं अभिणयं अभिणयंति, तं जहा–दिट्ठंतियं पाडंतियं सामन्नओविणिवाइयं लोगमज्झावसाणियं, अप्पेगतिया देवा बुक्कारेंति, अप्पेगतिया देवा पीणेंति, अप्पेगतिया लासेंति, अप्पेगतिया तंडवेंति, अप्पेगतिया बुक्कारेंति पीणेंति, लासेंति, तंडवेंति, अप्पेगतिया अप्फोडेंति, अप्पेगतिया वग्गंति, अप्पेगतिया तिवइं छिंदंति, अप्पेगतिया अप्फोडेंति, वग्गंति, तिवइं छिंदंति, अप्पेगतिया हयहेसियं करेंति, अप्पेगतिया हत्थिगुलगुलाइयं करेंति, अप्पेगतिया रहघणघणाइयं करेंति, अप्पेगतिया हयहेसियं करेंति, हत्थिगुलगुलाइयं करेंति, रहघणघणाइयं करेंति, अप्पेगतिया उच्छलेंति, अप्पेगतिया पोच्छलेंति, अप्पेगतिया उक्किट्ठियं करेंति, अप्पेगतिया उच्छलेंति, पोच्छलेंति, उक्किट्ठियं करेंति, ...अप्पेगतिया ओवयंति, अप्पेगतिया उप्पयंति, अप्पेगतिया परिवयंति, अप्पेगइया तिन्नि वि, अप्पेगइया सीहनायं नयंति, अप्पेगतिया पाददद्दरयं करेंति, अप्पेगतिया भूमिचवेडं दलयंति, अप्पेगतिया तिन्नि वि, अप्पेगतिया गज्जंति, अप्पेगतिया विज्जुयायंति, अप्पेगइया वासं वासंति, अप्पेगतिया तिन्नि वि करेंति, अप्पेगतिया जलंति, अप्पेगताय तवंति, अप्पेगतिया पतवेंति, अप्पेगतिया तिन्नि वि, अप्पेगतिया हक्कारेंति, अप्पेगतिया थुक्कारेंति, अप्पेगतिया थक्कारेंति, अप्पेगतिया साइं साइं नामाइं साहेंति, अप्पेगतिया चत्तारि वि, अप्पेगतिया देवसन्निवायं करेंति अप्पेगतिया देवुज्जोयं करेंति, अप्पेगइया देवुक्कलियं करेंति, अप्पेगइया देवकहकहगं करेंति, अप्पेगतिया देवदुहदुहगं करेंति, अप्पेगतिया चेलुक्खेवं करेंति, अप्पेगइया देवसन्निवायं, देवुज्जोयं, देवुक्कलियं, देवकहकहगं, देवदुहदुहगं, चेलुक्खवं करेंति, अप्पेगतिया उप्पलहत्थगया जाव सहस्सपत्तहत्थगया, अप्पेगतिया वंदनकलसहत्थगया अप्पेगतिया भिंगारहत्थगया जाव धूव-कडुच्छुयहत्थगया हट्ठतुट्ठचित्तमानंदिया पीइमणा परमसोमनस्सिया हरिसवसविसप्पमाणहियया सव्वओ समंता आहावंति परिधावंति। तए णं तं सूरियाभं देवं चत्तारि सामानियसाहस्सीओ जाव सोलस आयरक्ख-देवसाहस्सीओ अन्ने य बहवे सूरियाभरायहाणिवत्थव्वा देवा य देवीओ य महया-महया इंदाभिसेगेणं अभिसिंचंति, अभिसिंचित्ता पत्तेयं-पत्तेयं करयलपरिग्गहियं सिरसावत्तं मत्थए अंजलिं कट्टु एवं वयासी– जय-जय नंदा! जय-जय भद्दा! जय-जय नंदा! भद्दं ते अजियं जिणाहि, जियं च पालेहि, जियमज्झे वसाहि–इंदो इव देवाणं, चंदो इव ताराणं, चमरो इव असुराणं, धरणो इव नागाणं, भरहो इव मनुयाणं–बहूइं पलिओवमाइं बहूइं सागरोवमाइं बहूइं पलिओवम-सागरोवमाइं चउण्हं सामानिय-साहस्सीणं जाव आयरक्ख-देवसाहस्सीणं सूरियाभस्स विमानस्स अन्नेसिं च बहूणं सूरियाभविमान-वासीणं देवाण य देवीण य आहेवच्चं पोरेवच्चं सामित्तं भट्टित्तं महत्तरगत्तं आणा ईसर सेनावच्चं कारेमाणे पालेमाणे विहराहि त्ति कट्टु महया-महया सद्देणं जय-जय सद्दं पउंजंति। तए णं से सूरियाभे देवे महया-महया इंदाभिसेगेणं अभिसित्ते समाणे अभिसेयसभाओ पुरत्थिमिल्लेणं दारेणं निग्गच्छति, निग्गच्छित्ता जेणेव अलंकारियसभा तेणेव उवागच्छति, उवागच्छित्ता अलंकारियसभं अनुपयाहिणीकरेमाणे-अनुपयाहिणीकरेमाणे अलंकारियसभं पुरत्थि-मिल्लेणं दारेणं अनुपविसति, अनुपविसित्ता जेणेव सीहासने तेणेव उवागच्छति, उवागच्छित्ता सीहासनवरगते पुरत्थाभिमुहे सन्निसण्णे। तए णं तस्स सूरियाभस्स देवस्स सामानियपरिसोववण्णगा देवा अलंकारियभंडं उवट्ठवेंति। तए णं से सूरियाभे देवे तप्पढमयाए पम्हलसूमालाए सुरभीए गंधकासाईए गायाइं लूहेति, लूहेत्ता सरसेणं गोसीसचंदणेणं गायाइं अनुलिंपति, अनुलिंपित्ता नासा नीसास वाय वोज्झं चक्खुहरं वण्णफरिसजुत्तं हयलालापेलवातिरेगं धवलं कनग खचियंत कम्मं आगासफालिय समप्पभं दिव्वं देवदूसजुयलं नियंसेति, नियंसेत्ता हारं पिणिद्धेति, पिणिद्धेत्ता अद्धहारं पिणिद्धेइ, पिणिद्धेत्ता एगावलिं पिणिद्धेति, पिणिद्धेत्ता मुत्तावलिं पिणिद्धेति, पिणिद्धेत्ता रयणावलिं पिणिद्धेइ, पिणिद्धेत्ता एवं–अंगयाइं केयूराइं कडगाइं तुडियाइं कडिसुत्तगं दसमुद्दाणंतगं विकच्छसुत्तगं मुरविं कंठमुरविं पालंबं कुंडलाइं चूडामणिं चित्तरयणसंकडं मउडं–पिणिद्धेइ, पिणिद्धेत्ता गंथिम वेढिम पूरिम संघाइमेणं चउव्विहेणं मल्लेणं कप्परुक्खगं पिव अप्पाणं अलंकियविभूसियं करेइ, करेत्ता दद्दरमलय-सुगंधगंधिएहिं गायाइं भुकुंडेति दिव्वं च सुमनदामं पिणिद्धेइ।
Sutra Meaning : જુઓ સૂત્ર ૪૧
Mool Sutra Transliteration : [sutra] tae nam se suriyabhe deve tesim samaniyaparisovavannaganam devanam amtie eyamattham sochcha nisamma hatthatutthachittamanamdie piimane paramasomanassie harisavasavisappamanahiyae sayanijjao abbhuttheti, abbhutthetta uvavayasabhao puratthimillenam darenam niggachchhai, jeneva harae teneva uvagachchhati, uvagachchhitta harayam anupayahinikaremane-anupayahinikaremane puratthimillenam toranenam anupa-visai, anupavisitta puratthimillenam tisovanapadiruvaenam pachchoruhai, pachchoruhitta jalavagaham karei, karetta jala-majjanam karei, karetta jalakiddam karei, karetta jalabhiseyam karei, karetta ayamte chokkhe paramasuibhue harayao pachchottarai, pachchottaritta jeneva abhiseyasabha teneva uvagachchhati, uvagachchhitta abhiseyasabham anupayahinikaremane-anupayahinikaremane puratthimillenam darenam anupavisai, anupavisitta jeneva sihasane teneva uvagachchhai, uvagachchhitta sihasanavaragae puratthabhimuhe sannisanne. Tae nam suriyabhassa devassa samaniyaparisovavannaga deva abhiogie deve saddavemti, saddavetta evam vayasi–khippameva bho! Devanuppiya! Suriyabhassa devassa mahattham mahaggham mahariham viulam imdabhiseyam uvatthaveha. Tae nam te abhiogia deva samaniyaparisovavannehim devehim evam vutta samana hatthatuttha-chittamanamdiya piimana paramasomanassiya harisavasa visappamanahiyaya karayalapariggahiyam dasanaham sirasavattam matthae amjalim kattu evam deva! Tahatti anae vinaenam vayanam padisunamti, padisunitta uttarapuratthimam disibhagam avakkamamti, avakkamitta veuvviyasamugghaenam samohannamti samohanitta samkhejjaim joyanaim damdam nisiramti, tam jaha– rayananam vairanam veruliyanam lohiyakkhanam masaragallanam hamsagabbhanam pulaganam sogamdhiyanam joirasanam amjananam amjanampulaganam rayayanam jayaruvanam amkanam phalihanam ritthanam ahabayare poggale parisademti, parisadetta ahasuhume poggale pariyayamti, pariyaitta dochcham pi veuvviyasamugghaenam samohannamti,.. ..Samohanitta atthasahassam sovanniyanam kalasanam, atthasahassam ruppamayanam kalasanam, attha-sahassam manimayanam kalasanam, atthasahassam suvannaruppamayanam kalasanam, atthasahassam suvannamani-mayanam kalasanam, atthasahassam ruppamanimayanam kalasanam, atthasahassam suvannaruppamanimayanam kalasanam, atthasahassam bhomijjanam kalasanam, evam– bhimgaranam ayamsanam thalanam painam supatitthanam manoguliyanam vayakaraganam chittanam rayanakaramdaganam, pupphachamgerinam mallachamgerinam chunnachamgerinam gamdhachamgerinam vatthachamgerinam abharanachamgerinam siddhatthachamgerinam lomahatthachamgerinam, pupphapadalaganam mallapadalaganam chunnapadalaganam gamdhapadalaganam vatthapadalaganam abharanapadalaganam siddhattha-padalaganam lomahatthapadalaganam sihasananam chhattanam chamaranam, tellasamugganam kotthasamugganam pattasamugganam choyagasamugganam tagarasamugganam elasamugganam hariyalasamugganam himgulayasamugganam manosilasamugganam amjanamsamugganam atthasahassam jhayanam, atthasahassam dhuvakaduchchhuyanam viuvvamti,.. ..Viuvvitta te sabhavie ya veuvvie ya kalase ya java kaduchchhue ya ginhamti, ginhitta suriyabhao vimanao padinikkhamamti, padinikkhamitta tae ukkitthae turiyae chavalae chamdae javanae sigghae uddhuyae divvae devagaie tiriyamasamkhejjanam divasamuddanam majjhammajjhenam vitivayamana-vitivayamana jeneva khirodayasamudde teneva uvagachchhamti, uvagachchhitta khiroyagam ginhamti, ginhitta jaim tatthuppalaim paumaim kumuyaim nalinaim subhagaim sogamdhiyaim pomdariyaim mahapomdariyaim sayavattaim sahassapattaim taim ginhamti, ginhitta jeneva pukkharodae samudde teneva uvagachchhamti, uvagachchhitta pukkharodayam genhamti, genhitta jaim tatthuppalaim java sahassapattaim taim ginhamti, ginhitta jeneva samayakhette jeneva bharaheravayaim vasaim jeneva magahavaradamapabhasaim titthaim teneva uvagachchhamti, uvagachchhitta titthodagam genhamti, genhitta titthamattiyam genhamti,.. ..Genhitta jeneva gamga simdhu ratta rattavaio mahanaio teneva uvagachchhamti, uvagachchhitta salilodagam genhamti, genhitta ubhaokulamattiyam genhamti, genhitta jeneva chullahimavamtasihari-vasaharapavvaya teneva uvagachchhamti, uvagachchhitta savvatuyare savvapupphe savvagamdhe savvamalle savvosahi-siddhatthae ginhamti, ginhitta jeneva paumapumdariyadaha teneva uvagachchhamti, uvagachchhitta dahodagam genhamti, genhitta jaim tattha uppalaim java sahassapattaim taim genhamti, genhitta jeneva hemavayaerannavayaim vasaim jeneva rohiya rohiyamsa suvannakula ruppakulao mahanaio teneva uvagachchhamti uvagachchhitta salilodagam genhamti, genhitta ubhaokulamattiyam ginhamti, ginhitta jeneva saddavati-viyadavati vattaveyaddhapavvaya teneva uvagachchhamti, uvagachchhitta savvatuyare savvapupphe savvagamdhe savvamalle savvosahi siddhatthae ginhamti,.. ..Ginhitta jeneva maha-himavamta ruppivasaharapavvaya teneva uvagachchhamti, uvagachchhitta savvatuyare savvapupphe savvagamdhe savvamalle savvosahisiddhatthae ginhamti ginhitta jeneva mahapauma-mahapumdariyaddaha teneva uvagachchhamti, uvagachchhitta dahodagam ginhamti, ginhitta jaim tattha uppalaim java sahassapattaim taim genhamti, genhitta jeneva harivasarammagavasaim jeneva hari harikamta naranarikamtao mahanaio teneva uvagachchhamti, uvagachchhitta salilodagam genhamti, genhitta ubhaokulamattiyam genhamti genhitta jeneva gamdhavatimalavamtapariyaga vattaveyaddhapavvaya teneva uvagachchhamti, uvagachchhitta savvatuyare savvapupphe savvagamdhe savvamalle savvosahisiddhatthae ginhamti, ginhitta jeneva nisadha nilavamta vasadharapavvaya teneva uvagachchhamti, uvvagachchhitta savvatuyare savvapupphe savvagamdhe savvamalle savvosahisiddhatthae ginhamti,.. ..Ginhitta jeneva tigichchhi kesariddahao teneva uvagachchhamti, uvagachchhitta dahodagam genhamti, genhitta jaim tattha uppalaim java sahassapattaim taim genhamti, genhitta jeneva puvvavideha-varavidehavasaim jeneva sita-sitodao mahanadio teneva uvagachchhamti, uvagachchhitta salilodagam genhamti, genhitta ubhaokulamattiyam genhamti, genhitta jeneva savvachakkavattivijaya jeneva savvamagahavaradamapabhasaim titthaim teneva uvagachchhamti, uvagachchhitta titthodagam genhamti, genhitta titthamattiyam genhamti, genhitta jeneva savvamtaranaio teneva uvagachchhamti, uvagachchhitta salilodagam genhamti, genhitta ubhaokulamattiyam genhamti,.. ..Genhitta jeneva savvavakkharapavvaya teneva uvagachchhamti, uvagachchhitta savvatuyare savvapupphe savvagamdhe savvamalle savvosahisiddhatthae ya genhamti, genhitta jeneva mamdare pavvate jeneva bhaddasalavane teneva uvagachchhamti, uvagachchhitta savvatuyare savvapupphe savvagamdhe savvamalle savvosahisiddhatthae ya genhamti, genhitta jeneva namdanavane teneva uvagachchhamti, uvagachchhitta savvatuyare java savvosahi-siddhatthae ya sarasam cha gosisachamdanam ginhamti, ginhitta jeneva somanasavane teneva uvagachchhamti, uvagachchhitta savvatuyare java savvosahisiddhatthae ya sarasam cha gosisachamdanam cha divvam cha sumanadamam ginhamti, ginhitta jeneva pamdagavane teneva uvagachchhamti, uvagachchhitta savvatuyare java savvosahisiddhatthae cha sarasam cha gosisachamdanam cha divvam cha sumanadamam daddaramalayasugamdhiyagamdhe ginhamti, ..Ginhitta egato milayamti, milaitta tae ukkitthae turiyae chavalae chamdae javanae sigghae uddhuyae divvae devagaie tiriyamasamkhejjanam divasamuddanam majjhammajjhenam viivayamana-viivayamana jeneva sohamme kappe jeneva suriyabhe vimane jeneva abhiseyasabha jeneva suriyabhe deve teneva uvagachchhamti, uvagachchhitta suriyabham devam karayalapariggahiyam sirasavattam matthae amjalim kattu jaenam vijaenam baddhavemti, baddhavetta tam mahattham mahaggham mahariham viulam imdabhiseyam uvatthavemti. Tae nam tam suriyabham devam chattari samaniyasahassio, chattari aggamahisio saparivarato, tinni parisao, satta aniyao, satta aniyahivaino, solasa ayarakkhadevasahassio, annevi bahave suriyabhavimanavasino deva ya devio ya tehim sabhaviehim ya veuvviehi ya varakamala-paitthanehim surabhivaravaripadipunnehim chamdanakayachachchaehim aviddhakamthagunehim paumuppalapihanehim sukumalakarayalapariggahiehim atthasahassenam sovanniyanam kalasanam, atthasahassenam ruppamayanam kalasanam, atthasahassenam manimayanam kalasanam, atthasahassenam suvannaruppamayanam kalasanam, atthasahassenam suvannamanimayanam kalasanam, atthasahassenam ruppamanimayanam kalasanam,atthasahassenam suvannaruppamanimayanam kalasanam atthasahassenam bhomijjanam kalasanam savvodaehim savvamattiyahim savvatuyarehim savvapupphehim savvagamdhehim savvamallehim savvosahisiddhatthaehim ya savviddhie java naiyaravenam mahaya-mahaya imdabhiseenam abhisimchamti. Tae nam tassa suriyabhassa devassa mahaya-mahaya imdabhisee vattamane–appegatiya deva suriyabham vimanam nachchoyagam natimattiyam paviralaphusiyarayarenuvinasanam divvam surabhigamdhodagavasam vasamti, appegatiya deva suriyabham vimanam hayarayam nattharayam bhattha-rayam uvasamtarayam pasamtarayam karemti, appegatiya deva suriyabham vimanam asiyasammajjiovalittam sui sammattharatthamtaravanavihiyam karemti, appegatiya deva suriyabham vimanam mamchaimamchakaliyam karemti, appegaiya deva suriyabham vimanam nanaviha-ragosiyajhayapadagaipadagamamdiyam karemti, appegatiya deva suriyabham vimanam laulloiyamahiyam gosisasarasarattachamdanadaddaradinnapamchamgulitalam karemti, appegatiya deva suriyabham vimanam uvachiya-vamdanakalasam vamdanaghadasukayatoranapadiduvaradesabhagam karemti, appegatiya deva suriyabham vimanam asattosattaviulavattavagghariyamalladamakalavam karemti,.. ..Appegatiya deva suriyabham vimanam pamchavanna-surabhi mukkapupphapumjovayarakaliyam karemti, appegatiya deva suriyabham vimanam kalagaru pavarakumdurukka turukka dhuva maghamaghemtagamdhuddhuyabhiramam karemti, appegaiya deva suriyabham vimanam sugamdhagamdhiyam gamdhavattibhutam karemti, appegatiya deva hirannavasam vasamti, suvannavasam vasamti, rayanavasam vasamti, vaira-vasam vasamti, pupphavasam vasamti, phalavasam vasamti, mallavasam vasamti, gamdhavasam vasamti, chunnavasam vasamti, abharanavasam vasamti, appegatiya deva hirannavihim bhaemti, evam–suvannavihim rayanavihim pupphavihim phalavihim mallavihim gamdhavihim chunnavihim abharanavihim bhaemti, ..Appegatiya deva chauvviham vaittam vaemti– tatam vitatam ghanam susiram, appegaiya deva chauvviham geyam gayamti, tam jaha–ukkhittayam payamtayam mamdayam roiyavasanam, appegatiya deva duyam nattavihim uvadamsemti, appegatiya deva vilambiyam nattavihim uvadamsemti, appegatiya deva amchiyam nattavihim uvadamsemti, appegatiya deva ribhiyam nattavihim uvadamsemti, appegaiya deva amchiyaribhiyam nattavihim uvadamsemti, appegaiya deva arabhadam nattavihim uvadamsemti, appegaiya deva bhasolam nattavihim uvadamsemti, appegaiya deva arabhada-bhasolam nattavihim uvadamsemti, appegaiya deva uppayanivayapasattam samkuchiyapasariyum riyariyam bhamta sambhamtam namam divvam nattavihim uvadamsemti,.. ..Appegatiya deva chauvviham abhinayam abhinayamti, tam jaha–ditthamtiyam padamtiyam samannaovinivaiyam logamajjhavasaniyam, appegatiya deva bukkaremti, appegatiya deva pinemti, appegatiya lasemti, appegatiya tamdavemti, appegatiya bukkaremti pinemti, lasemti, tamdavemti, appegatiya apphodemti, appegatiya vaggamti, appegatiya tivaim chhimdamti, appegatiya apphodemti, vaggamti, tivaim chhimdamti, appegatiya hayahesiyam karemti, appegatiya hatthigulagulaiyam karemti, appegatiya rahaghanaghanaiyam karemti, appegatiya hayahesiyam karemti, hatthigulagulaiyam karemti, rahaghanaghanaiyam karemti, appegatiya uchchhalemti, appegatiya pochchhalemti, appegatiya ukkitthiyam karemti, appegatiya uchchhalemti, pochchhalemti, ukkitthiyam karemti, ..Appegatiya ovayamti, appegatiya uppayamti, appegatiya parivayamti, appegaiya tinni vi, appegaiya sihanayam nayamti, appegatiya padadaddarayam karemti, appegatiya bhumichavedam dalayamti, appegatiya tinni vi, appegatiya gajjamti, appegatiya vijjuyayamti, appegaiya vasam vasamti, appegatiya tinni vi karemti, appegatiya jalamti, appegataya tavamti, appegatiya patavemti, appegatiya tinni vi, appegatiya hakkaremti, appegatiya thukkaremti, appegatiya thakkaremti, appegatiya saim saim namaim sahemti, appegatiya chattari vi, appegatiya devasannivayam karemti appegatiya devujjoyam karemti, appegaiya devukkaliyam karemti, appegaiya devakahakahagam karemti, appegatiya devaduhaduhagam karemti, appegatiya chelukkhevam karemti, appegaiya devasannivayam, devujjoyam, devukkaliyam, devakahakahagam, devaduhaduhagam, chelukkhavam karemti, appegatiya uppalahatthagaya java sahassapattahatthagaya, appegatiya vamdanakalasahatthagaya appegatiya bhimgarahatthagaya java dhuva-kaduchchhuyahatthagaya hatthatutthachittamanamdiya piimana paramasomanassiya harisavasavisappamanahiyaya savvao samamta ahavamti paridhavamti. Tae nam tam suriyabham devam chattari samaniyasahassio java solasa ayarakkha-devasahassio anne ya bahave suriyabharayahanivatthavva deva ya devio ya mahaya-mahaya imdabhisegenam abhisimchamti, abhisimchitta patteyam-patteyam karayalapariggahiyam sirasavattam matthae amjalim kattu evam vayasi– Jaya-jaya namda! Jaya-jaya bhadda! Jaya-jaya namda! Bhaddam te ajiyam jinahi, jiyam cha palehi, jiyamajjhe vasahi–imdo iva devanam, chamdo iva taranam, chamaro iva asuranam, dharano iva naganam, bharaho iva manuyanam–bahuim paliovamaim bahuim sagarovamaim bahuim paliovama-sagarovamaim chaunham samaniya-sahassinam java ayarakkha-devasahassinam suriyabhassa vimanassa annesim cha bahunam suriyabhavimana-vasinam devana ya devina ya ahevachcham porevachcham samittam bhattittam mahattaragattam ana isara senavachcham karemane palemane viharahi tti kattu mahaya-mahaya saddenam jaya-jaya saddam paumjamti. Tae nam se suriyabhe deve mahaya-mahaya imdabhisegenam abhisitte samane abhiseyasabhao puratthimillenam darenam niggachchhati, niggachchhitta jeneva alamkariyasabha teneva uvagachchhati, uvagachchhitta alamkariyasabham anupayahinikaremane-anupayahinikaremane alamkariyasabham puratthi-millenam darenam anupavisati, anupavisitta jeneva sihasane teneva uvagachchhati, uvagachchhitta sihasanavaragate puratthabhimuhe sannisanne. Tae nam tassa suriyabhassa devassa samaniyaparisovavannaga deva alamkariyabhamdam uvatthavemti. Tae nam se suriyabhe deve tappadhamayae pamhalasumalae surabhie gamdhakasaie gayaim luheti, luhetta sarasenam gosisachamdanenam gayaim anulimpati, anulimpitta nasa nisasa vaya vojjham chakkhuharam vannapharisajuttam hayalalapelavatiregam dhavalam kanaga khachiyamta kammam agasaphaliya samappabham divvam devadusajuyalam niyamseti, niyamsetta haram piniddheti, piniddhetta addhaharam piniddhei, piniddhetta egavalim piniddheti, piniddhetta muttavalim piniddheti, piniddhetta rayanavalim piniddhei, piniddhetta evam–amgayaim keyuraim kadagaim tudiyaim kadisuttagam dasamuddanamtagam vikachchhasuttagam muravim kamthamuravim palambam kumdalaim chudamanim chittarayanasamkadam maudam–piniddhei, piniddhetta gamthima vedhima purima samghaimenam chauvvihenam mallenam kapparukkhagam piva appanam alamkiyavibhusiyam karei, karetta daddaramalaya-sugamdhagamdhiehim gayaim bhukumdeti divvam cha sumanadamam piniddhei.
Sutra Meaning Transliteration : Juo sutra 41