Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1104175
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-१६

 Translated Chapter :

શતક-૧૬
Section : उद्देशक-५ गंगदत्त Translated Section : ઉદ્દેશક-૫ ગંગદત્ત
Sutra Number : 675 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] जावं च णं समणे भगवं महावीरे भगवओ गोयमस्स एयमट्ठं परिकहेति तावं च णं से देवे तं देसं हव्वमागए। तए णं से देवे समणं भगवं महावीरं तिक्खुत्तो आयाहिण-पयाहिणं करेइ, करेत्ता वंदइ नमंसइ, वंदित्ता नमंसित्ता एवं वयासी–एवं खलु भंते! महासुक्के कप्पे महासामाणे विमाने एगे मायिमिच्छदिट्ठि-उववन्नए देवे ममं एवं वयासी–परिणममाणा पोग्गला नो परिणया, अपरिणया; परिणमंतीति पोग्गला नो परिणया, अपरिणया। तए णं अहं तं मायिमिच्छदिट्ठिउववन्नगं देवं एवं वयासी–परिणममाणा पोग्गला परिणया, नो अपरिणया; परिणमंतीति पोग्गला परिणया, नो अपरिणया, से कहमेयं भंते! एवं? गंगदत्तादि! समणे भगवं महावीरे गंगदत्तं देवं एवं वयासी–अहं पि णं गंगदत्ता! एवमाइक्खामि भासेमि पन्नवेमि परूवेमि–परिणममाणा पोग्गला परिणया, नो अपरिणया; परिणमंतीति पोग्गला परिणया, नो अपरिणया, सच्चमेसे अट्ठे। तए णं से गंगदत्ते देवे समणस्स भगवओ महावीरस्स अंतियं एयमट्ठं सोच्चा निसम्म हट्ठतुट्ठे समणं भगवं महावीरं वंदइ नमंसइ, वंदित्ता नमंसित्ता नच्चासन्ने जाव पज्जुवासति। तए णं समणे भगवं महावीरे गंगदत्तस्स देवस्स तीसे य महतिमहालियाए परिसाए धम्मं परिकहेइ जाव आराहए भवति। तए णं से गंगदत्ते देवे समणस्स भगवओ महावीरस्स अंतिए धम्मं सोच्चा निसम्म हट्ठतुट्ठे उट्ठाए उट्ठेइ, उट्ठेत्ता समणं भगवं महावीरं वंदइ नमंसइ, वंदित्ता नमंसित्ता एवं वयासी–अहण्णं भंते! गंगदत्ते देवे किं भवसिद्धिए? अभवसिद्धिए? सम्मदिट्ठी? मिच्छदिट्ठी? परित्तसंसारिए? अनंतसंसारिए? सुलभबोहिए? दुल्लभबोहिए? आराहए? विराहए? चरिमे? अचरिमे? गंगदत्ताइ! समणे भगवं महावीरे गंगदत्तं देवं एवं वयासी–गंगदत्ता! तुमण्णं भवसिद्धिए, नो अभवसिद्धिए। सम्मदिट्ठी, नो मिच्छदिट्ठी। परित्तसंसारिए, नो अनंतसंसारिए। सुलभबोहिए, नो दुल्लभबोहिए। आराहए, नो विराहए। चरिमे, नो अचरिमे। तए णं से गंगदत्ते देवे समणेणं भगवया महावीरेणं एवं वुत्ते समाणे हट्ठतुट्ठचित्तमानंदिए पीइमणे परमसोमणस्सिए हरिसवसविसप्पमाणहियए समणं भगवं महावीरं वंदइ नमंसइ, वंदित्ता नमंसित्ता एवं वयासी–तुब्भे णं भंते! सव्वं जाणह सव्वं पासह, सव्वओ जाणह सव्वओ पासह, सव्वं कालं जाणह सव्वं कालं पासह, सव्वे भावे जाणह सव्वे भावे पासह। जाणंति णं देवानुप्पिया! मम पुव्विं वा पच्छा वा ममेयरूवं दिव्वं देविड्ढिं दिव्वं देवजुइं दिव्वं देवाणुभावं लद्धं पत्तं अभिसम-ण्णागयं ति, तं इच्छामि णं देवानुप्पियाणं भत्तिपुव्वगं गोयमातियाणं समणाणं निग्गंथाणं दिव्वं देविड्ढिं दिव्वं देवजुइं दिव्वं देवाणु-भावं दिव्वं बत्तीसतिबद्धं नट्टविहिं उवदंसित्तए। तए णं समणे भगवं महावीरे गंगदत्तेणं देवेणं एवं वुत्ते समाणे गंगदत्तस्स देवस्स एयमट्ठं नो आढाइ, नो परियाणइ तुसिणीए संचिट्ठति। तए णं से गंगदत्ते देवे समणं भगवं महावीरं दोच्चं पि तच्चं पि एवं वयासी–तुब्भे णं भंते! सव्वं जाणह सव्वं पासह, सव्वओ जाणह सव्वओ पासह, सव्वं कालं जाणह सव्वं कालं पासह, सव्वे भावे जाणह सव्वे भावे पासह। जाणंति णं देवानुप्पिया! मम पुव्विं वा पच्छा वा ममेयरूवं दिव्वं देविड्ढिं दिव्वं देवजुइं दिव्वं देवाणुभावं लद्धं पत्तं अभिसमन्नागयं ति, तं इच्छामि णं देवानुप्पियाणं भत्तिपुव्वगं गोयमातियाणं समणाणं निग्गंथाणं दव्वं देविड्ढिं दिव्वं देवजुइं दिव्वं देवानुभावं दिव्वं बत्तीसतिबद्धं नट्टविहिं उवदंसित्तए त्ति कट्टु जाव बत्तीसतिबद्धं नट्टविहिं उवदंसेति, उवदंसेत्ता जाव तामेव दिसं पडिगए
Sutra Meaning : જુઓ સૂત્ર ૬૭૩
Mool Sutra Transliteration : [sutra] javam cha nam samane bhagavam mahavire bhagavao goyamassa eyamattham parikaheti tavam cha nam se deve tam desam havvamagae. Tae nam se deve samanam bhagavam mahaviram tikkhutto ayahina-payahinam karei, karetta vamdai namamsai, vamditta namamsitta evam vayasi–evam khalu bhamte! Mahasukke kappe mahasamane vimane ege mayimichchhaditthi-uvavannae deve mamam evam vayasi–parinamamana poggala no parinaya, aparinaya; parinamamtiti poggala no parinaya, aparinaya. Tae nam aham tam mayimichchhaditthiuvavannagam devam evam vayasi–parinamamana poggala parinaya, no aparinaya; parinamamtiti poggala parinaya, no aparinaya, se kahameyam bhamte! Evam? Gamgadattadi! Samane bhagavam mahavire gamgadattam devam evam vayasi–aham pi nam gamgadatta! Evamaikkhami bhasemi pannavemi paruvemi–parinamamana poggala parinaya, no aparinaya; parinamamtiti poggala parinaya, no aparinaya, sachchamese atthe. Tae nam se gamgadatte deve samanassa bhagavao mahavirassa amtiyam eyamattham sochcha nisamma hatthatutthe samanam bhagavam mahaviram vamdai namamsai, vamditta namamsitta nachchasanne java pajjuvasati. Tae nam samane bhagavam mahavire gamgadattassa devassa tise ya mahatimahaliyae parisae dhammam parikahei java arahae bhavati. Tae nam se gamgadatte deve samanassa bhagavao mahavirassa amtie dhammam sochcha nisamma hatthatutthe utthae utthei, utthetta samanam bhagavam mahaviram vamdai namamsai, vamditta namamsitta evam vayasi–ahannam bhamte! Gamgadatte deve kim bhavasiddhie? Abhavasiddhie? Sammaditthi? Michchhaditthi? Parittasamsarie? Anamtasamsarie? Sulabhabohie? Dullabhabohie? Arahae? Virahae? Charime? Acharime? Gamgadattai! Samane bhagavam mahavire gamgadattam devam evam vayasi–gamgadatta! Tumannam bhavasiddhie, no abhavasiddhie. Sammaditthi, no michchhaditthi. Parittasamsarie, no anamtasamsarie. Sulabhabohie, no dullabhabohie. Arahae, no virahae. Charime, no acharime. Tae nam se gamgadatte deve samanenam bhagavaya mahavirenam evam vutte samane hatthatutthachittamanamdie piimane paramasomanassie harisavasavisappamanahiyae samanam bhagavam mahaviram vamdai namamsai, vamditta namamsitta evam vayasi–tubbhe nam bhamte! Savvam janaha savvam pasaha, savvao janaha savvao pasaha, savvam kalam janaha savvam kalam pasaha, savve bhave janaha savve bhave pasaha. Janamti nam devanuppiya! Mama puvvim va pachchha va mameyaruvam divvam deviddhim divvam devajuim divvam devanubhavam laddham pattam abhisama-nnagayam ti, tam ichchhami nam devanuppiyanam bhattipuvvagam goyamatiyanam samananam niggamthanam divvam deviddhim divvam devajuim divvam devanu-bhavam divvam battisatibaddham nattavihim uvadamsittae. Tae nam samane bhagavam mahavire gamgadattenam devenam evam vutte samane gamgadattassa devassa eyamattham no adhai, no pariyanai tusinie samchitthati. Tae nam se gamgadatte deve samanam bhagavam mahaviram dochcham pi tachcham pi evam vayasi–tubbhe nam bhamte! Savvam janaha savvam pasaha, savvao janaha savvao pasaha, savvam kalam janaha savvam kalam pasaha, savve bhave janaha savve bhave pasaha. Janamti nam devanuppiya! Mama puvvim va pachchha va mameyaruvam divvam deviddhim divvam devajuim divvam devanubhavam laddham pattam abhisamannagayam ti, tam ichchhami nam devanuppiyanam bhattipuvvagam goyamatiyanam samananam niggamthanam davvam deviddhim divvam devajuim divvam devanubhavam divvam battisatibaddham nattavihim uvadamsittae tti kattu java battisatibaddham nattavihim uvadamseti, uvadamsetta java tameva disam padigae
Sutra Meaning Transliteration : Juo sutra 673