Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1104174
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-१६

 Translated Chapter :

શતક-૧૬
Section : उद्देशक-५ गंगदत्त Translated Section : ઉદ્દેશક-૫ ગંગદત્ત
Sutra Number : 674 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] भंतेति! भगवं गोयमे समणं भगवं महावीरं वंदइ नमंसइ, वंदित्ता नमंसित्ता एवं वयासी–अन्नदा णं भंते! सक्के देविंदे देवराया देवाणुप्पियं वंदति नमंसति सक्कारेति जाव पज्जुवासति, किण्णं भंते! अज्ज सक्के देविंदे देवराया देवाणुप्पियं अट्ठ उक्खित्तपसिणवागरणाइं पुच्छइ, पुच्छित्ता संभंतियवंदनएणं वंदइ नमंसइ जाव पडिगए? गोयमादि! समणे भगवं महावीरे भगवं गोयमं एवं वयासी–एवं खलु गोयमा! तेणं कालेणं तेणं समएणं महासुक्के कप्पे महासामाणे विमाने दो देवा महिड्ढिया जाव महेसक्खा एगविमाणंसि देवत्ताए उववन्ना, तं जहा–मायिमिच्छदिट्ठिउववन्नए य, अमायिसम्मदिट्ठिउववन्नए य। तए णं से मायिमिच्छदिट्ठिउववन्नए देवे तं अमायिसम्मदिट्ठिउववन्नगं देवं एवं वयासी–परिणममाणा पोग्गला नो परिणया, अपरिणया; परिणमंतीति पोग्गला नो परिणया, अपरिणया। तए णं से अमायिसम्मदिट्ठिउववन्नए देवे तं मायिमिच्छदिट्ठिउववन्नगं देव एवं वयासी–परिणममाणा पोग्गला परिणया, नो अपरिणया; परिणमंतीति पोग्गला परिणया, नो अपरिणया। तं मायिमिच्छदिट्ठिउववन्नगं एवं पडिहणइ, पडिहणित्ता ओहिं पउंजइ पउंजित्ता ममं ओहिणा आभोएइ, आभोएत्ता अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था– एवं खलु समणे भगवं महावीरे जंबुद्दीवे दीवे भारहे वासे उल्लुयतीरस्स नगरस्स बहिया एगजंबुए चेइए अहापडिरूवं ओग्गहं ओगिण्हित्ता संजमेणं तवसा अप्पाणं भावेमाणे विहरइ, तं सेयं खलु मे समणं भगवं महावीरं वंदित्ता जाव पज्जुवासित्ता इमं एयारूवं वागरणं पुच्छित्तए त्ति कट्टु एवं संपेहेइ, संपेहेत्ता चउहिं सामानियसाहस्सीहिं तिहिं परिसाहिं, सत्तहिं अणिएहिं, सत्तहिं अनिया-हिवईहिं, सोलसहिं आयरक्खदेवसाहस्सीहिं अन्नेहिं बहूहिं महासामाणविमानवासीहिं वेमाणिएहिं देवेहिं देवीहिं य सद्धिं संपरिवुडे जाव दुंदुहि-निग्घोस-नाइयरवेणं जेणेव जंबुद्दीवे दीवे, जेणेव भारहे वासे, जेणेव उल्लुयतीरे नगरे, जेणेव एगजंबुए चेइए, जेणेव ममं अंतियं तेणेव पहारेत्थ गमणाए। तए णं से सक्के देविंदे देवराया तस्स देवस्स तं दिव्वं देविड्ढिं दिव्वं देवजुतिं दिव्वं देवानुभागं दिव्वं तेयलेस्सं असहमाणे ममं अट्ठ उक्खित्तपसिणवागरणाइं पुच्छित्ता संभंतियवंदनएणं वंदित्ता जाव पडिगए।
Sutra Meaning : જુઓ સૂત્ર ૬૭૩
Mool Sutra Transliteration : [sutra] bhamteti! Bhagavam goyame samanam bhagavam mahaviram vamdai namamsai, vamditta namamsitta evam vayasi–annada nam bhamte! Sakke devimde devaraya devanuppiyam vamdati namamsati sakkareti java pajjuvasati, kinnam bhamte! Ajja sakke devimde devaraya devanuppiyam attha ukkhittapasinavagaranaim puchchhai, puchchhitta sambhamtiyavamdanaenam vamdai namamsai java padigae? Goyamadi! Samane bhagavam mahavire bhagavam goyamam evam vayasi–evam khalu goyama! Tenam kalenam tenam samaenam mahasukke kappe mahasamane vimane do deva mahiddhiya java mahesakkha egavimanamsi devattae uvavanna, tam jaha–mayimichchhaditthiuvavannae ya, amayisammaditthiuvavannae ya. Tae nam se mayimichchhaditthiuvavannae deve tam amayisammaditthiuvavannagam devam evam vayasi–parinamamana poggala no parinaya, aparinaya; parinamamtiti poggala no parinaya, aparinaya. Tae nam se amayisammaditthiuvavannae deve tam mayimichchhaditthiuvavannagam deva evam vayasi–parinamamana poggala parinaya, no aparinaya; parinamamtiti poggala parinaya, no aparinaya. Tam mayimichchhaditthiuvavannagam evam padihanai, padihanitta ohim paumjai paumjitta mamam ohina abhoei, abhoetta ayameyaruve ajjhatthie chimtie patthie manogae samkappe samuppajjittha– Evam khalu samane bhagavam mahavire jambuddive dive bharahe vase ulluyatirassa nagarassa bahiya egajambue cheie ahapadiruvam oggaham oginhitta samjamenam tavasa appanam bhavemane viharai, tam seyam khalu me samanam bhagavam mahaviram vamditta java pajjuvasitta imam eyaruvam vagaranam puchchhittae tti kattu evam sampehei, sampehetta chauhim samaniyasahassihim tihim parisahim, sattahim aniehim, sattahim aniya-hivaihim, solasahim ayarakkhadevasahassihim annehim bahuhim mahasamanavimanavasihim vemaniehim devehim devihim ya saddhim samparivude java dumduhi-nigghosa-naiyaravenam jeneva jambuddive dive, jeneva bharahe vase, jeneva ulluyatire nagare, jeneva egajambue cheie, jeneva mamam amtiyam teneva paharettha gamanae. Tae nam se sakke devimde devaraya tassa devassa tam divvam deviddhim divvam devajutim divvam devanubhagam divvam teyalessam asahamane mamam attha ukkhittapasinavagaranaim puchchhitta sambhamtiyavamdanaenam vamditta java padigae.
Sutra Meaning Transliteration : Juo sutra 673