Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1104157
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-१५ गोशालक

 Translated Chapter :

શતક-૧૫ ગોશાલક
Section : Translated Section :
Sutra Number : 657 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] एवं खलु देवानुप्पियाणं अंतेवासी कुसिस्से गोसाले नामं मंखलिपुत्ते से णं भंते! गोसाले मंखलिपुत्ते कालमासे कालं किच्चा कहिं गए? कहिं उववन्ने? एवं खलु गोयमा! ममं अंतेवासी कुसिस्से गोसाले नामं मंखलिपुत्ते समणघायए जाव छउमत्थे चेव कालमासे कालं किच्चा उड्ढं चंदिम-सूरिय जाव अच्चुए कप्पे देवत्ताए उववन्ने। तत्थ णं अत्थेगतियाणं देवाणं बावीसं सागरोवमाइं ठिती पन्नत्ता। तत्थ णं गोसालस्स वि देवस्स बावीसं सागरोवमाइं ठिती पन्नत्ता। से णं भंते! गोसाले देवे ताओ देवलोगाओ आउक्खएणं भवक्खएणं ठिइक्खएणं अनंतरं चयं चइत्ता कहिं गच्छिहिति? कहिं उववज्जिहिति? गोयमा! इहेव जंबुद्दीवे दीवे भारहे वासे विंज्झगिरिपायमूले पुंडेसु जणवएसु सयदुवारे नगरे संमुतिस्स रन्नो भद्दाए भारियाए कुच्छिंसि पुत्तत्ताए पच्चायाहिति। से णं तत्थ नवण्हं मासाणं बहुपडिपुण्णाणं अद्धट्ठमाण य राइंदियाणं वीइक्कंताणं जाव सुरूवे दारए पयाहिति। जं रयणिं च णं से दारए जाइहिति, तं रयणिं च णं सयदुवारे नगरे सब्भिंतर-बाहिरिए भारग्गसो य कुंभग्गसो य पउमवासे य रयणवासे य वासे वासिहिति। तए णं तस्स दारगस्स अम्मापियरो एक्कारसमे दिवसे वीइक्कंते निव्वत्ते असुइजायकम्म-करणे संपत्ते बारसमे दिवसे अयमेयारूवं गोण्णं गुणनिप्फन्नं नामधेज्जं काहिंति–जम्हा णं अम्हं इमंसि दारगंसि जायंसि समाणंसि सयदुवारे नगरे सब्भिंतरबाहिरिए भारग्गसो य कुंभग्गसो य पउमवासे य रयणवासे वुट्ठे, तं होउ णं अम्हं इमस्स दारगस्स नामधेज्जं महापउमे-महापउमे। तए णं तस्स दारगस्स अम्मापियरो नामधेज्जं करेहिंति महापउमे त्ति। तए णं तं महापउमं दारगं अम्मापियरो सातिरेगट्ठवासजायगं जाणित्ता सोभणंसि तिहि-करण-दिवस-नक्खत्त-मुहुत्तंसि महया-महया रायाभिसेगेणं अभिसिंचेहिंति। से णं तत्थ राया भविस्सति महया हिमवंत-महंत-मलय-मंदर-महिंदसारे वण्णओ जाव विहरिस्सइ। तए णं तस्स महापउमस्स रन्नो अन्नदा कदायि दो देवा महिड्ढिया जाव महेसक्खा सेणाकम्मं काहिंति, तं जहा –पुण्णभद्दे य माणिभद्दे य। तए णं सयदुवारे नगरे बहवे राईसर-तलवर-माडंबिय-कोडुंबिय-इब्भ-सेट्ठि-सेनावइ-सत्थबाहप्पभितओ अन्नमन्नं सद्दावेहिंति, सद्दावेत्ता एवं वदेहिंति– जम्हा णं देवानुप्पिया! महापउमस्स रन्नो दो देवा महिड्ढिया जाव महेसक्खा सेणाकम्मं करेंति, तं जहा–पुण्णभद्दे य माणिभद्दे य, तं होउ णं देवानुप्पिया! अम्हं महापउमस्स रन्नो दोच्चे वि, नामधेज्जे देवसेणे-देवसेणे। तए णं तस्स महापउमस्स रन्नो दोच्चे वि नामधेज्जे भविस्सति देवसेणे त्ति। तए णं तस्स देवसेनस्स रन्नो अन्नया कयाइ सेते संखतल-विमल-सन्निगासे चउद्दंते हत्थिरयणे समुप्पज्जिस्सइ। तए णं से देवसेणे राया तं सेयं संखतल-विमल-सन्निगासं चउद्दंतं हत्थिरयणं द्रढे समाणे सयदुवारं नगरं मज्झंमज्झेणं अभिक्खणं-अभिक्खणं अतिजाहिति य निज्जाहिति य। तए णं सयदुवारे नगरे बहवे राईसर-तलवर-माडंबिय-कोडुंबिय-इब्भ-सेट्ठि-सेनावइ-सत्थवाहप्पभितओ अन्नमन्नं सद्दावेहिंति, सद्दावेत्ता वदेहिंति–जम्हा णं देवानुप्पिया! अम्हं देवसेणस्स रन्नो सेते संखतल-विमल -सन्निगासे चउद्दंते हत्थिरयणे समुप्पन्ने, तं होउ णं देवानुप्पिया! अम्हं देवसेणस्स रन्नो तच्चे वि नामधेज्जे विमलवाहने-विमलवाहने। तए णं तस्स देवसेणस्स रन्नो तच्चे वि नामधेज्जे भविस्सति विमलवाहने त्ति। तए णं से विमलवाहने राया अन्नया कदायि समणेहिं निग्गंथेहिं मिच्छं विप्पडिवज्जिहिति–अप्पेगतिए आओसेहिति, अप्पेगतिए अवहसिहिति, अप्पेगतिए निच्छोडेहिति, अप्पेगतिए निब्भंछेहिति, अप्पेगतिए बंधेहिति, अप्पेगतिए निरुंभेहिति, अप्पेगतियाणं छविच्छेदं करेहिति, अप्पेगतिए पमारेहिति, अप्पेगतिए उद्दवेहिति, अप्पेगतियाणं वत्थं पडिग्गहं कंबलं पायपुंछणं आच्छिंदिहिति विच्छिंदिहिति भिंदिहिति अवहरिहिति, अप्पेगतियाणं भत्तपाणं वोच्छिंदिहिति, अप्पेगतिए निन्नगरे करेहिति, अप्पेगतिए निव्विसए करेहिति। तए णं सयदुवारे नगरे बहवे राईसर-तलवर-माडंबिय-कोडुंबिय-इब्भ-सेट्ठि-सेनावइ-सत्थवाहप्पभितओ अन्नमन्नं सद्दावेहिंति, सद्दावेत्ता एवं वदिहिंति–एवं खलु देवानुप्पिया! विमलवाहने राया समणेहिं निग्गंथेहिं मिच्छं विप्पडिवन्ने–अप्पेगतिए आओसति जाव निव्विसए करेति, तं नो खलु देवानुप्पिया! एयं अम्हं सेयं, नो खलु एयं विमलवाहणस्स रन्नो सेयं, नो खलु एयं रज्जस्स वा रट्ठस्स वा बलस्स वा वाहणस्स वा पुरस्स वा अंतेउरस्स वा जनवयस्स वा सेयं, जण्णं विमलवाहने राया समणेहिं निग्गंथेहिं मिच्छं विप्पडिवन्ने। तं सेयं खलु देवानुप्पिया! अम्हं विमलवाहणं रायं एयमट्ठं विण्णवेत्तए अन्नमन्नस्स अंतियं एयमट्ठं पडिसुणेहिंति, पडिसुणेत्ता जेणेव विमलवाहने राया तेणेव उवागच्छिहिंति, उवागच्छित्ता करयलपरिग्गहियं दसनहं सिरसावत्तं मत्थए अंजलिं कट्टु विमलवाहणं रायं जएणं विजएणं वद्धावेहिंति, वद्धावेत्ता एवं वदिहिंति– एवं खलु देवानुप्पिया! समणेहिं निग्गंथेहिं मिच्छं विप्पडिवन्ना अप्पेगतिए आओसंति जाव अप्पेगतिए निव्विसए करेंति, तं नो खलु एयं देवानुप्पियाणं सेयं, नो खलु एयं अम्हं सेयं, नो खलु एयं रज्जस्स वा जाव जनवयस्स वा सेयं, जण्णं देवानुप्पिया! समणेहिं निग्गंथेहिं मिच्छं विप्पडिवन्ना, तं विरमंतु णं देवानुप्पिया! एयस्स अट्ठस्स अकरणयाए। तए णं से विमलवाहने राया तेहिं बहूहिं राईसर-तलवर-माडंबिय-कोडुंबिय-इब्भ-सेट्ठि-सेनावइ-सत्थवाहप्पभि-ईहिं एयमट्ठं विण्णत्ते समाणे नो धम्मो त्ति नो तवो त्ति मिच्छा-विनएणं एयमट्ठं पडिसुणेहिति। तस्स णं सयदुवारस्स नगरस्स बहिया उत्तरपुरत्थिमे दिसीभागे, एत्थ णं सुभूमिभागे नामं उज्जाणे भविस्सइ–सव्वोउय-पुप्फ-फलसमिद्धे वण्णओ। तेणं कालेणं तेणं समएणं विमलस्स अरहओ पओप्पए सुमंगले नामं अनगारे जाइसंपन्ने, जहा धम्मघोसस्स वण्णओ जाव संखित्तविउलतेयलेस्से तिन्नाणोवगए सुभूमिभागस्स उज्जाणस्स अदूरसामंते छट्ठंछट्ठेणं अनिक्खित्तेणं तवोकम्मेणं उड्ढं वाहाओ पगिज्झिय-पगिज्झिय सूराभिमुहे आयावणभूमीए आयावेमाणे विहरिस्सति। तए णं से विमलवाहने राया अन्नदा कदायि रहचरियं काउं निज्जाहिति। तए णं से विमलवाहने राया सुभूमिभागस्स उज्जाणस्स अदूरसामंते रहचरियं करेमाणे सुमंगलं अनगारं छट्ठंछट्ठेणं अनिक्खित्तेणं तवोकम्मेणं उड्ढं बाहाओ पगिज्झिय-पगिज्झिय सूराभिमुहं आयावणभूमीए आयावेमाणं पासिहिति, पासित्ता आसुरुत्ते रुट्ठे कुविए चंडिक्किए मिसिमिसेमाणे सुमंगलं अनगारं रहसिरेणं नोल्लावेहिति। तए णं से सुमंगले अनगारे विमलवाहनेणं रण्णा रहसिरेणं नोल्लाविए समाणे सणियं-सणियं उट्ठेहेति, उट्ठेत्ता दोच्चं पि उड्ढं बाहाओ पगिज्झिय-पगिज्झिय सूराभिमुहे आयावणभूमीए आयावेमाणे विहरिस्सति। तए णं से विमलवाहने राया सुमंगलं अनगारं दोच्चं पि रहसिरेणं नोल्लावेहिति। तए णं से सुमंगले अनगारे विमलवाहनेणं रण्णा दोच्चं पि रहसिरेणं नोल्लाविए समाणे सणियं-सणियं उट्ठेहिति, उट्ठेत्ता ओहिं पउंजेहिति, पउंजित्ता विमलवाहणस्स रन्नो तीतद्धं आभोएहिति, आभोएत्ता विमलवाहणं रायं एवं वइहिति–नो खलु तुमं विमलवाहने राया, नो खलु तुमं देवसेणे राया, नो खलु तुमं महापउमे राया, तुमण्णं इओ तच्चे भवग्गहणे गोसाले नामं मंखलिपुत्ते होत्था–समणघायए जाव छउमत्थे चेव कालगए, तं जइ ते तदा सव्वाणुभूतिणा अनगारेणं पभुणा वि होऊणं सम्मं सहियं खमियं तितिक्खियं अहियासियं, जइ ते तदा सुनक्खत्तेणं अनगारेणं पभुणा वि होऊणं सम्मं सहियं खमियं तितिक्खियं अहियासियं, जइ ते तदा समणेणं भगवया महावीरेणं पभुणा वि होऊणं सम्मं सहियं खमियं तितिक्खियं अहियासियं, तं नो खलु ते अहं तहा सम्मं सहिस्सं खमिस्सं तितिक्खिस्सं अहियासिस्सं, अहं ते नवरं–सहयं सरहं ससारहियं तवेणं तेएणं एगाहच्चं कूडाहच्चं भासरासिं करेज्जामि। तए णं से विमलवाहने राया सुमंगलेणं अनगारेणं एवं वुत्ते समाणे आसुरुत्ते रुट्ठे कुविए चंडिक्किए मिसिमिसे-माणे सुमंगलं अनगारं तच्चं पि रहसिरेणं नोल्लाविहिति। तए णं से सुमंगले अनगारे विमलवाहनेणं रण्णा तच्चं पि रहसिरेणं नोल्लाविए समाणे आसुरुत्ते जाव मिसिमिसेमाणे आयावणभूमीओ पच्चोरुभइ, पच्चोरुभित्ता तेयासमुग्घाएणं समोहण्णिहिति, समोहणित्ता सत्तट्ठ पयाइं पच्चोसक्किहिति, पच्चोसक्कित्ता विमलवाहणं रायं सहयं सरहं ससारहियं तवेणं तेएणं एगाहच्चं कूडाहच्चं भासरासिं करेहिति। सुमंगले णं भंते! अनगारे विमलवाहणं रायं सहयं जाव भासरासिं करेत्ता कहिं गच्छिहिति? कहिं उववज्जि-हिति? गोयमा! सुमंगले अनगारे विमलवाहणं रायं सहयं जाव भासरासिं करेत्ता बहूहिं छट्ठट्ठम-दसम-दुवालसेहिं मासद्धमासखमणेहिं विचित्तेहिं तवोकम्मेहिं अप्पाणं भावेमाणे बहूइं वासाइं सामण्णपरियागं पाउणेहिति, पाउणित्ता मासियाए संलेहणाए अत्ताणं ज्झूसित्ता, सट्ठिं भत्ताइं अनसनाए छेदेत्ता आलोइय-पडिक्कंते समाहिपत्ते उड्ढं चंदिम जाव गेविज्जविमानावाससयं वीइवइत्ता सव्वट्ठ सिद्धे महाविमाने देवत्ताए उववज्जिहिति। तत्थ णं देवाणं अजहन्नमणुक्कोसेनं तेत्तीसं सागरोवमाइं ठिती पन्नत्ता। तत्थ णं सुमंग-लस्स वि देवस्स अजहन्नमणुक्कोसेनं तेत्तीसं सागरोवमाइं ठिती पन्नत्ता। से णं भंते! सुमंगले देवे ताओ देवलोगाओ आउक्खएणं भवक्खएणं ठिइक्खएणं अनंतरं चयं चइत्ता कहिं गच्छिहिति? कहिं उववज्जिहिति? गोयमा! महाविदेहे वासे सिज्झिहिति जाव सव्वदुक्खाणं अंतं करेंति।
Sutra Meaning : જુઓ સૂત્ર ૬૫૫
Mool Sutra Transliteration : [sutra] evam khalu devanuppiyanam amtevasi kusisse gosale namam mamkhaliputte se nam bhamte! Gosale mamkhaliputte kalamase kalam kichcha kahim gae? Kahim uvavanne? Evam khalu goyama! Mamam amtevasi kusisse gosale namam mamkhaliputte samanaghayae java chhaumatthe cheva kalamase kalam kichcha uddham chamdima-suriya java achchue kappe devattae uvavanne. Tattha nam atthegatiyanam devanam bavisam sagarovamaim thiti pannatta. Tattha nam gosalassa vi devassa bavisam sagarovamaim thiti pannatta. Se nam bhamte! Gosale deve tao devalogao aukkhaenam bhavakkhaenam thiikkhaenam anamtaram chayam chaitta kahim gachchhihiti? Kahim uvavajjihiti? Goyama! Iheva jambuddive dive bharahe vase vimjjhagiripayamule pumdesu janavaesu sayaduvare nagare sammutissa ranno bhaddae bhariyae kuchchhimsi puttattae pachchayahiti. Se nam tattha navanham masanam bahupadipunnanam addhatthamana ya raimdiyanam viikkamtanam java suruve darae payahiti. Jam rayanim cha nam se darae jaihiti, tam rayanim cha nam sayaduvare nagare sabbhimtara-bahirie bharaggaso ya kumbhaggaso ya paumavase ya rayanavase ya vase vasihiti. Tae nam tassa daragassa ammapiyaro ekkarasame divase viikkamte nivvatte asuijayakamma-karane sampatte barasame divase ayameyaruvam gonnam gunanipphannam namadhejjam kahimti–jamha nam amham imamsi daragamsi jayamsi samanamsi sayaduvare nagare sabbhimtarabahirie bharaggaso ya kumbhaggaso ya paumavase ya rayanavase vutthe, tam hou nam amham imassa daragassa namadhejjam mahapaume-mahapaume. Tae nam tassa daragassa ammapiyaro namadhejjam karehimti mahapaume tti. Tae nam tam mahapaumam daragam ammapiyaro satiregatthavasajayagam janitta sobhanamsi tihi-karana-divasa-nakkhatta-muhuttamsi mahaya-mahaya rayabhisegenam abhisimchehimti. Se nam tattha raya bhavissati mahaya himavamta-mahamta-malaya-mamdara-mahimdasare vannao java viharissai. Tae nam tassa mahapaumassa ranno annada kadayi do deva mahiddhiya java mahesakkha senakammam kahimti, tam jaha –punnabhadde ya manibhadde ya. Tae nam sayaduvare nagare bahave raisara-talavara-madambiya-kodumbiya-ibbha-setthi-senavai-satthabahappabhitao annamannam saddavehimti, saddavetta evam vadehimti– jamha nam devanuppiya! Mahapaumassa ranno do deva mahiddhiya java mahesakkha senakammam karemti, tam jaha–punnabhadde ya manibhadde ya, tam hou nam devanuppiya! Amham mahapaumassa ranno dochche vi, namadhejje devasene-devasene. Tae nam tassa mahapaumassa ranno dochche vi namadhejje bhavissati devasene tti. Tae nam tassa devasenassa ranno annaya kayai sete samkhatala-vimala-sannigase chauddamte hatthirayane samuppajjissai. Tae nam se devasene raya tam seyam samkhatala-vimala-sannigasam chauddamtam hatthirayanam dradhe samane sayaduvaram nagaram majjhammajjhenam abhikkhanam-abhikkhanam atijahiti ya nijjahiti ya. Tae nam sayaduvare nagare bahave raisara-talavara-madambiya-kodumbiya-ibbha-setthi-senavai-satthavahappabhitao annamannam saddavehimti, saddavetta vadehimti–jamha nam devanuppiya! Amham devasenassa ranno sete samkhatala-vimala -sannigase chauddamte hatthirayane samuppanne, tam hou nam devanuppiya! Amham devasenassa ranno tachche vi namadhejje vimalavahane-vimalavahane. Tae nam tassa devasenassa ranno tachche vi namadhejje bhavissati vimalavahane tti. Tae nam se vimalavahane raya annaya kadayi samanehim niggamthehim michchham vippadivajjihiti–appegatie aosehiti, appegatie avahasihiti, appegatie nichchhodehiti, appegatie nibbhamchhehiti, appegatie bamdhehiti, appegatie nirumbhehiti, appegatiyanam chhavichchhedam karehiti, appegatie pamarehiti, appegatie uddavehiti, appegatiyanam vattham padiggaham kambalam payapumchhanam achchhimdihiti vichchhimdihiti bhimdihiti avaharihiti, appegatiyanam bhattapanam vochchhimdihiti, appegatie ninnagare karehiti, appegatie nivvisae karehiti. Tae nam sayaduvare nagare bahave raisara-talavara-madambiya-kodumbiya-ibbha-setthi-senavai-satthavahappabhitao annamannam saddavehimti, saddavetta evam vadihimti–evam khalu devanuppiya! Vimalavahane raya samanehim niggamthehim michchham vippadivanne–appegatie aosati java nivvisae kareti, tam no khalu devanuppiya! Eyam amham seyam, no khalu eyam vimalavahanassa ranno seyam, no khalu eyam rajjassa va ratthassa va balassa va vahanassa va purassa va amteurassa va janavayassa va seyam, jannam vimalavahane raya samanehim niggamthehim michchham vippadivanne. Tam seyam khalu devanuppiya! Amham vimalavahanam rayam eyamattham vinnavettae annamannassa amtiyam eyamattham padisunehimti, padisunetta jeneva vimalavahane raya teneva uvagachchhihimti, uvagachchhitta karayalapariggahiyam dasanaham sirasavattam matthae amjalim kattu vimalavahanam rayam jaenam vijaenam vaddhavehimti, vaddhavetta evam vadihimti– Evam khalu devanuppiya! Samanehim niggamthehim michchham vippadivanna appegatie aosamti java appegatie nivvisae karemti, tam no khalu eyam devanuppiyanam seyam, no khalu eyam amham seyam, no khalu eyam rajjassa va java janavayassa va seyam, jannam devanuppiya! Samanehim niggamthehim michchham vippadivanna, tam viramamtu nam devanuppiya! Eyassa atthassa akaranayae. Tae nam se vimalavahane raya tehim bahuhim raisara-talavara-madambiya-kodumbiya-ibbha-setthi-senavai-satthavahappabhi-ihim eyamattham vinnatte samane no dhammo tti no tavo tti michchha-vinaenam eyamattham padisunehiti. Tassa nam sayaduvarassa nagarassa bahiya uttarapuratthime disibhage, ettha nam subhumibhage namam ujjane bhavissai–savvouya-puppha-phalasamiddhe vannao. Tenam kalenam tenam samaenam vimalassa arahao paoppae sumamgale namam anagare jaisampanne, jaha dhammaghosassa vannao java samkhittaviulateyalesse tinnanovagae subhumibhagassa ujjanassa adurasamamte chhatthamchhatthenam anikkhittenam tavokammenam uddham vahao pagijjhiya-pagijjhiya surabhimuhe ayavanabhumie ayavemane viharissati. Tae nam se vimalavahane raya annada kadayi rahachariyam kaum nijjahiti. Tae nam se vimalavahane raya subhumibhagassa ujjanassa adurasamamte rahachariyam karemane sumamgalam anagaram chhatthamchhatthenam anikkhittenam tavokammenam uddham bahao pagijjhiya-pagijjhiya surabhimuham ayavanabhumie ayavemanam pasihiti, pasitta asurutte rutthe kuvie chamdikkie misimisemane sumamgalam anagaram rahasirenam nollavehiti. Tae nam se sumamgale anagare vimalavahanenam ranna rahasirenam nollavie samane saniyam-saniyam uttheheti, utthetta dochcham pi uddham bahao pagijjhiya-pagijjhiya surabhimuhe ayavanabhumie ayavemane viharissati. Tae nam se vimalavahane raya sumamgalam anagaram dochcham pi rahasirenam nollavehiti. Tae nam se sumamgale anagare vimalavahanenam ranna dochcham pi rahasirenam nollavie samane saniyam-saniyam utthehiti, utthetta ohim paumjehiti, paumjitta vimalavahanassa ranno titaddham abhoehiti, abhoetta vimalavahanam rayam evam vaihiti–no khalu tumam vimalavahane raya, no khalu tumam devasene raya, no khalu tumam mahapaume raya, tumannam io tachche bhavaggahane gosale namam mamkhaliputte hottha–samanaghayae java chhaumatthe cheva kalagae, tam jai te tada savvanubhutina anagarenam pabhuna vi hounam sammam sahiyam khamiyam titikkhiyam ahiyasiyam, jai te tada sunakkhattenam anagarenam pabhuna vi hounam sammam sahiyam khamiyam titikkhiyam ahiyasiyam, jai te tada samanenam bhagavaya mahavirenam pabhuna vi hounam sammam sahiyam khamiyam titikkhiyam ahiyasiyam, tam no khalu te aham taha sammam sahissam khamissam titikkhissam ahiyasissam, aham te navaram–sahayam saraham sasarahiyam tavenam teenam egahachcham kudahachcham bhasarasim karejjami. Tae nam se vimalavahane raya sumamgalenam anagarenam evam vutte samane asurutte rutthe kuvie chamdikkie misimise-mane sumamgalam anagaram tachcham pi rahasirenam nollavihiti. Tae nam se sumamgale anagare vimalavahanenam ranna tachcham pi rahasirenam nollavie samane asurutte java misimisemane ayavanabhumio pachchorubhai, pachchorubhitta teyasamugghaenam samohannihiti, samohanitta sattattha payaim pachchosakkihiti, pachchosakkitta vimalavahanam rayam sahayam saraham sasarahiyam tavenam teenam egahachcham kudahachcham bhasarasim karehiti. Sumamgale nam bhamte! Anagare vimalavahanam rayam sahayam java bhasarasim karetta kahim gachchhihiti? Kahim uvavajji-hiti? Goyama! Sumamgale anagare vimalavahanam rayam sahayam java bhasarasim karetta bahuhim chhatthatthama-dasama-duvalasehim masaddhamasakhamanehim vichittehim tavokammehim appanam bhavemane bahuim vasaim samannapariyagam paunehiti, paunitta masiyae samlehanae attanam jjhusitta, satthim bhattaim anasanae chhedetta aloiya-padikkamte samahipatte uddham chamdima java gevijjavimanavasasayam viivaitta savvattha siddhe mahavimane devattae uvavajjihiti. Tattha nam devanam ajahannamanukkosenam tettisam sagarovamaim thiti pannatta. Tattha nam sumamga-lassa vi devassa ajahannamanukkosenam tettisam sagarovamaim thiti pannatta. Se nam bhamte! Sumamgale deve tao devalogao aukkhaenam bhavakkhaenam thiikkhaenam anamtaram chayam chaitta kahim gachchhihiti? Kahim uvavajjihiti? Goyama! Mahavidehe vase sijjhihiti java savvadukkhanam amtam karemti.
Sutra Meaning Transliteration : Juo sutra 655