Sutra Navigation: Sthanang ( સ્થાનાંગ સૂત્ર )

Search Details

Mool File Details

Anuvad File Details

Sr No : 1102961
Scripture Name( English ): Sthanang Translated Scripture Name : સ્થાનાંગ સૂત્ર
Mool Language : Ardha-Magadhi Translated Language : Gujarati
Chapter :

स्थान-१०

 Translated Chapter :

સ્થાન-૧૦
Section : Translated Section :
Sutra Number : 961 Category : Ang-03
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] समणे भगवं महावीरे छउमत्थकालियाए अंतिमराइयंसी इमे दस महासुमिणे पासित्ता णं पडिबुद्धे, तं जहा– १. एगं च णं ‘महं घोररूवदित्तधरं’ तालपिसायं सुमिणे पराजितं पासित्ता णं पडिबुद्धे। २. एगं च णं महं सुक्किलपक्खगं पुंसकोइलगं सुमिणे पासित्ता णं पडिबुद्धे। ३. एगं च णं महं चित्तविचित्तपक्खगं पुंसकोइलं सुविणे पासित्ता णं पडिबुद्धे। ४. एगं च णं महं दामदुगं सव्वरयनामयं सुमिणे पासित्ता णं पडिबुद्धे। ५. एगं च णं महं सेतं गोवग्गं सुमिणे पासित्ता णं पडिबुद्धे। ६. एगं च णं महं पउमसरं सव्वओ समंता कुसुमितं सुमिणे पासित्ता णं पडिबुद्धे। ७. एगं च णं महं सागरं उम्मी-वीची-सहस्सकलितं भुयाहिं तिण्णं सुमिणे पासित्ता णं पडिबुद्धे। ८. एगं च णं महं दिणयरं तेयसा जलंतं सुमिणे पासित्ता णं पडिबुद्धे। ९. एगं च णं महं हरिवेरुलियवण्णाभेणं नियएणमंतेणं माणुसुत्तरं पव्वतं सव्वतो समंता आवेढियं परिवेढियं सुमिणे पासित्ता णं पडिबुद्धे। १०. एगं च णं महं मंदरे पव्वते मंदरचूलियाए उवरिं सीहासणवरगयमत्ताणं सुमिणे पासित्ता णं पडिबुद्धे। १. जण्णं समणे भगवं महावीरे एगं च णं महं घोररूवदित्तधरं तालपिसायं सुमिणे पराजितं पासित्ता णं पडिबुद्धे, तण्णं समणेणं भगवता महावीरेणं मोहणिज्जे कम्मे मूलओ उग्घाइते। २. जण्णं समणे भगवं महावीरे एगं च णं महं सुक्किलपक्खगं पुंसकोइलगं सुमिणे पासित्ता णं पडिबुद्धे, तण्णं समणे भगवं महावीरे सुक्कज्झाणोवगए विहरइ। ३. जण्णं समणे भगवं महावीरे एगं च णं महं चित्तविचित्तपक्खगं पुंसकोइलं सुविणे पासित्ता णं पडिबुद्धे, तण्णं समणे भगवं महावीरे ससमय-परसमयियं चित्तविचित्तं दुवालसंगं गणिपिडगं आघवेति पन्नवेति परूवेति दंसेति णिदंसेति उवदंसेति, तं जहा– आयारं, सूयगडं, ठाणं, समवायं, विवाहपण्णत्तिं, नायाधम्मकहाओ, उवासगदसाओ, अंतगडदसाओ, अनुत्तरोववाइयदसाओ, पण्हा-वागरणाइं, विवागसुयं दिट्ठिवायं। ४. जण्णं समणे भगवं महावीरे एगं च णं महं दामदुगं सव्वरयणा मयं सुमिणे पासित्ता णं पडिबुद्धे, तण्णं समणे भगवं महावीरे दुविहं धम्मं पन्नवेति, तं जहा–अगारधम्मं च, अनगारधम्मं च। ५. जण्णं समणे भगवं महावीरे एगं च णं महं सेतं गोवग्गं सुमिणे पासित्ता णं पडिबुद्धे, तण्णं समणस्स भगवओ महावीरस्स चाउव्वण्णाइण्णे संघे, तं जहा– समणा, समणीओ, सावगा, सावियाओ। ६. जण्णं समणे भगवं महावीरे एगं च णं महं पउमसरं सव्वओ समंता कुसुमितं सुमिणे पासित्ता णं पडिबुद्धे, तण्णं समणे भगवं महावीरे चउव्विहे देवे पन्नवेति, तं जहा– भवनवासी, वाणमंतरे, जोइसिए, वेमाणिए। ७. जण्णं समणे भगवं महावीरे एगं च णं महं सागरं उम्मी-वीची-सहस्स-कलितं भुयाहिं तिण्णं सुमिणे पासित्ता ण पडिबुद्धे, तं णं समणेणं भगवता महावीरेणं अणादिए अणवदग्गे दीहमद्धे चाउरंते संसारकंतारे तिण्णे। ८. जण्णं समणे भगवं महावीरे एगं च णं महं दिणयरं तेयसा जलंतं सुमिणे पासित्ता णं पडिबुद्धे, तण्णं समणस्स भगवओ महावीरस्स अनंते अनुत्तरे निव्वाघाए निरावरणे कसिणे पडिपुण्णे केवलवरनाणदंसणे समुप्पन्ने। ९. जण्णं समणे भगवं महावीरे एगं च णं महं हरि-वेरुलिय वण्णाभेणं णियएणमंतेणं माणुसुत्तरं पव्वतं सव्वतो समंता आवेढियं परिवेढियं सुमिणे पासित्ता णं पडिबुद्धे, तण्णं समणस्स भगवतो महावीरस्स सदेवमनुयासुर लोगे उराला कित्ति-वण्ण-सद्द-सिलोगा परिगुव्वंति– इति खलु समणे भगवं महावीरे, इति खलु समणे भगवं महावीरे। १०. जण्णं समणे भगवं महावीरे एगं च णं महं मंदरे पव्वते मंदरचूलियाए उवरिं सीहासन-वरगयमत्ताणं सुमिणे पासित्ता णं पडिबुद्धे, तण्णं समणे भगवं महावीरे सदेवमनुयासुराए परिसाए मज्झगते केवलिपन्नत्तं धम्मं आघवेति पन्नवेति परूवेति दंसेति णिदंसेति उवदंसेति।
Sutra Meaning : જુઓ સૂત્ર ૯૫૯
Mool Sutra Transliteration : [sutra] samane bhagavam mahavire chhaumatthakaliyae amtimaraiyamsi ime dasa mahasumine pasitta nam padibuddhe, tam jaha– 1. Egam cha nam ‘maham ghoraruvadittadharam’ talapisayam sumine parajitam pasitta nam padibuddhe. 2. Egam cha nam maham sukkilapakkhagam pumsakoilagam sumine pasitta nam padibuddhe. 3. Egam cha nam maham chittavichittapakkhagam pumsakoilam suvine pasitta nam padibuddhe. 4. Egam cha nam maham damadugam savvarayanamayam sumine pasitta nam padibuddhe. 5. Egam cha nam maham setam govaggam sumine pasitta nam padibuddhe. 6. Egam cha nam maham paumasaram savvao samamta kusumitam sumine pasitta nam padibuddhe. 7. Egam cha nam maham sagaram ummi-vichi-sahassakalitam bhuyahim tinnam sumine pasitta nam padibuddhe. 8. Egam cha nam maham dinayaram teyasa jalamtam sumine pasitta nam padibuddhe. 9. Egam cha nam maham hariveruliyavannabhenam niyaenamamtenam manusuttaram pavvatam savvato samamta avedhiyam Parivedhiyam sumine pasitta nam padibuddhe. 10. Egam cha nam maham mamdare pavvate mamdarachuliyae uvarim sihasanavaragayamattanam sumine pasitta nam Padibuddhe. 1. Jannam samane bhagavam mahavire egam cha nam maham ghoraruvadittadharam talapisayam sumine parajitam pasitta nam padibuddhe, tannam samanenam bhagavata mahavirenam mohanijje kamme mulao ugghaite. 2. Jannam samane bhagavam mahavire egam cha nam maham sukkilapakkhagam pumsakoilagam sumine pasitta nam padibuddhe, tannam samane bhagavam mahavire sukkajjhanovagae viharai. 3. Jannam samane bhagavam mahavire egam cha nam maham chittavichittapakkhagam pumsakoilam suvine pasitta nam padibuddhe, tannam samane bhagavam mahavire sasamaya-parasamayiyam chittavichittam duvalasamgam ganipidagam aghaveti pannaveti paruveti damseti nidamseti uvadamseti, tam jaha– ayaram, suyagadam, thanam, samavayam, vivahapannattim, nayadhammakahao, uvasagadasao, amtagadadasao, anuttarovavaiyadasao, panha-vagaranaim, vivagasuyam ditthivayam. 4. Jannam samane bhagavam mahavire egam cha nam maham damadugam savvarayana mayam sumine pasitta nam padibuddhe, tannam samane bhagavam mahavire duviham dhammam pannaveti, tam jaha–agaradhammam cha, anagaradhammam cha. 5. Jannam samane bhagavam mahavire egam cha nam maham setam govaggam sumine pasitta nam padibuddhe, tannam samanassa bhagavao mahavirassa chauvvannainne samghe, tam jaha– samana, samanio, savaga, saviyao. 6. Jannam samane bhagavam mahavire egam cha nam maham paumasaram savvao samamta kusumitam sumine pasitta nam padibuddhe, tannam samane bhagavam mahavire chauvvihe deve pannaveti, tam jaha– bhavanavasi, vanamamtare, joisie, vemanie. 7. Jannam samane bhagavam mahavire egam cha nam maham sagaram ummi-vichi-sahassa-kalitam bhuyahim tinnam sumine pasitta na padibuddhe, tam nam samanenam bhagavata mahavirenam anadie anavadagge dihamaddhe chauramte samsarakamtare tinne. 8. Jannam samane bhagavam mahavire egam cha nam maham dinayaram teyasa jalamtam sumine pasitta nam padibuddhe, tannam samanassa bhagavao mahavirassa anamte anuttare nivvaghae niravarane kasine padipunne kevalavarananadamsane samuppanne. 9. Jannam samane bhagavam mahavire egam cha nam maham hari-veruliya vannabhenam niyaenamamtenam manusuttaram pavvatam savvato samamta avedhiyam parivedhiyam sumine pasitta nam padibuddhe, tannam samanassa bhagavato mahavirassa sadevamanuyasura loge urala kitti-vanna-sadda-siloga pariguvvamti– Iti khalu samane bhagavam mahavire, iti khalu samane bhagavam mahavire. 10. Jannam samane bhagavam mahavire egam cha nam maham mamdare pavvate mamdarachuliyae uvarim sihasana-varagayamattanam sumine pasitta nam padibuddhe, tannam samane bhagavam mahavire sadevamanuyasurae parisae majjhagate kevalipannattam dhammam aghaveti pannaveti paruveti damseti nidamseti uvadamseti.
Sutra Meaning Transliteration : Juo sutra 959