Sutra Navigation: Auppatik ( ઔપપાતિક ઉપાંગ સૂત્ર )

Search Details

Mool File Details

Anuvad File Details

Sr No : 1105648
Scripture Name( English ): Auppatik Translated Scripture Name : ઔપપાતિક ઉપાંગ સૂત્ર
Mool Language : Ardha-Magadhi Translated Language : Gujarati
Chapter :

उपपात वर्णन

 Translated Chapter :

ઉપપાત વર્ણન
Section : Translated Section :
Sutra Number : 48 Category : Upang-01
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] ते णं परिव्वाया रिउवेद यजुव्वेद सामवेद अहव्वणवेद इतिहासपंचमाणं निघंटु छट्ठाणं संगोवंगाणं सरहस्साणं चउण्हं वेदाणं सारगा पारगा धारगा सडंगवी सट्ठितंतविसारया संखाणे सिक्खाकप्पे वागरणे छंदे निरुत्ते जोइसामयणे अन्नेसु य बहूसु बंभण्णएसु य सत्थेसु सुपरिणिट्ठया यावि होत्था। ते णं परिव्वाया दाणधम्मं च सोयधम्मं च तित्थाभिसेयं च आघवेमाणा पन्नवेमाणा परूवेमाणा विहरंति। जं णं अम्हं किं चि असुई भवइ तं णं उदएण य मट्टियाए य पक्खालियं समाणं सुई भवइ। एवं खलु अम्हे चोक्खा चोक्खायारा सुई सुइसमायारा भवित्ता अभिसेयजलपूयप्पाणो अविग्घेणं सग्गं गमिस्सामो। तेसि णं परिव्वायाणं नो कप्पइ अगडं वा तलायं वा नइं वा वाविं वा पुक्खरिणिं वा दीहियं वा गुंजालियं वा सरं वा सागरं वा ओगाहित्तए, नन्नत्थ अद्धाणगमणेणं। तेसि णं परिव्वायाणं नो कप्पइ सगडं वा रहं वा जाणं वा जुग्गं वा गिल्लिं वा थिल्लिं वा पवहणं वा सीयं वा संदमाणियं वा दुरुहित्ता णं गच्छित्तए। तेसिं णं परिव्वायगाणं नो कप्पइ आसं वा हत्थिं वा उट्टं वा गोणं वा महिसं वा खरं वा दुरुहित्ता णं गमित्तए, नन्नत्थ बलाभिओगेणं। तेसिं णं परिव्वायगाणं नो कप्पइ नडपेच्छा इ वा नट्टपेच्छा इ वा जल्लपेच्छा इ वा मल्लपेच्छा इ वा मुट्ठियपेच्छा इ वा वेलंबगपेच्छा इ वा पवगपेच्छा इ वा कहगपेच्छा इ वा लासगपेच्छा इ वा आइक्खगपेच्छा इ वा लंखपेच्छा इ वा मंखपेच्छा इ वा तुणइल्लपेच्छा इ वा तुंबवीणिपेच्छा इ वा भुयगपेच्छा इ वा मागहपेच्छा इ वा पेच्छित्तए। तेसिं परिव्वायगाणं नो कप्पइ हरियाणं लेसणया वा घट्टणया वा थंभणया वा लूसणया वा उप्पाडणया वा करित्तए। तेसिं परिव्वायगाणं नो कप्पइ इत्थिकहा इ वा भत्तकहा इ वा रायकहा इ वा देसकहा इ वा चोरकहा इ वा अणवयकहा इ वा अणत्थदंडं करित्तए। तेसिं णं परिव्वायगाणं नो कप्पइ अयपायाणि वा तंबपायाणि वा तउयपायाणि वा सीसगपायाणि वा रययजायरूव काय बेडंतिय वट्टलोह कंसलोह हारपुडय रीतिया मणि संख दंत चम्म चेल सेल पायाणि वा अण्णयराइं वा तहप्पगाराइं महद्धणमोल्लाइं धारित्तए, नन्नत्थ अलाउपाएण वा दारुपाएण वा मट्टियापाएण वा। तेसिं णं परिव्वायगाणं नो कप्पइ अयबंधणाणि वा तंब बंधणाणि वा तउय बंधणाणि वा सीसगबंधणाणि वा रयय जायरूव काय वेडंतिय वट्टलोह कंसलोह हारपुडय रीतिया मणि संख दंत चम्म चेल सेल बंधणाणि वा अण्णयराइं वा तहप्पगाराइं महद्धणमोल्लाइं धारित्तए। तेसिं णं परिव्वायगाणं नो कप्पइ नानाविहवण्णरागरत्ताइं वत्थाइं धारित्तए, नन्नत्थ एगाए धाउरत्ताए। तेसिं णं परिव्वायगाणं नो कप्पइ हारं वा अद्धहारं वा एगावलिं वा मुत्तावलिं वा कनगावलिं वा रयणावलिं वा मुरविं वा कंठमुरविं वा पालंबं वा तिसरयं वा कडिसुत्तं वा दसमुद्दिआणंतगं वा कडयाणि वा तुडियाणि वा अंगयाणि वा केऊराणि वा कुंडलाणि वा मउडं वा चूलामणिं वा पिनिद्धत्तए, नन्नत्थ एगेणं तंबिएणं पवित्तएणं। तेसि णं परिव्वायगाणं नो कप्पइ गंथिम वेढिम पूरिम संघाइमे चउव्विहे मल्ले धारित्तए, नन्नत्थ एगेणं कण्णपूरेणं। तेसि णं परिव्वायगाणं नो कप्पइ अगलुएण वा चंदणेण वा कुंकुमेण वा गायं अणुलिंपित्तए, नन्नत्थ एक्काए गंगामट्टियाए। तेसि णं परिव्वायगाणं कप्पइ मागहए पत्थए जलस्स पडिगाहित्तए, से वि य वहमाणए नो चेव णं अवहमाणए, से वि य थिमिओदए नो चेव णं कद्दमोदए, से वि य बहुप्पसण्णे नो चेव णं अबहुप्पसण्णे, से वि य परिपूए नो चेव णं अपरिपूए से वि य दिन्ने नो चेव णं अदिन्ने, से वि य पिबित्तए नो चेव णं हत्थ पाय चरु चमस पक्खालणट्ठाए सिणाइत्तए वा। तेसिं णं परिव्वायगाणं कप्पइ मागहए अद्धाढए जलस्स पडिग्गाहित्तए, से वि य वहमाणए नो चेव णं अवहमाणए, से वि य थिमिओदए नो चेव णं कद्दमोदए, से वि य बहुप्पसण्णे नो चेव णं अबहुप्पसण्णे, से वि य परिपूए नो चेव णं अपरिपूए, से वि य दिन्ने नो चेव णं अदिन्ने, से वि य हत्थ पाय चरु चमस पक्खालणट्ठाए नो चेव णं पिबित्तए सिणाइत्तए वा। तेसि णं परिव्वायगाणं कप्पइ मागहए आढए जलस्स पडिग्गाहित्तए, से वि य वहमाणए नो चेव णं अवहमाणए से वि य थिमिओदए नो चेव णं कद्दमोदए, से वि य बहुप्पसण्णे नो चेव णं अबहुप्पसण्णे, से वि य परिपूए नो चेव णं अपरिभूए, से वि य दिन्ने नो चेव णं अदिन्ने, से वि य सिणाइत्तए नो चेव णं हत्थ पाय चरु चमस पक्खालणट्ठाए पिबित्तए वा। ते णं परिव्वायगा एयारूवेणं विहारेणं विहरमाणा बहूइं वासाइं परियायं पाउणंति, पाउणित्ता कालमासे कालं किच्चा उक्कोसेणं बंभलोए कप्पे देवत्ताए उववत्तारो भवंति। तहिं तेसिं गई, तहिं तेसिं ठिई, तहिं तेसिं उववाए पन्नत्ते। तेसि णं भंते! देवाणं केवइयं कालं ठिई पन्नत्ता? गोयमा! दससागरोवमाइं ठिई पन्नत्ता। अत्थि णं भंते! तेसिं देवाणं इड्ढीइ वा जुईइ वा जसेइ वा बलेइ वा वीरिएइ वा पुरिसक्कार परक्कमेइ वा? हंता अत्थि। ते णं भंते! देवा परलोगस्स आराहगा? नो इणट्ठे समट्ठे।
Sutra Meaning : જુઓ સૂત્ર ૪૫
Mool Sutra Transliteration : [sutra] te nam parivvaya riuveda yajuvveda samaveda ahavvanaveda itihasapamchamanam nighamtu chhatthanam samgovamganam sarahassanam chaunham vedanam saraga paraga dharaga sadamgavi satthitamtavisaraya samkhane sikkhakappe vagarane chhamde nirutte joisamayane annesu ya bahusu bambhannaesu ya satthesu suparinitthaya yavi hottha. Te nam parivvaya danadhammam cha soyadhammam cha titthabhiseyam cha aghavemana pannavemana paruvemana viharamti. Jam nam amham kim chi asui bhavai tam nam udaena ya mattiyae ya pakkhaliyam samanam sui bhavai. Evam khalu amhe chokkha chokkhayara sui suisamayara bhavitta abhiseyajalapuyappano avigghenam saggam gamissamo. Tesi nam parivvayanam no kappai agadam va talayam va naim va vavim va pukkharinim va dihiyam va gumjaliyam va saram va sagaram va ogahittae, nannattha addhanagamanenam. Tesi nam parivvayanam no kappai sagadam va raham va janam va juggam va gillim va thillim va pavahanam va siyam va samdamaniyam va duruhitta nam gachchhittae. Tesim nam parivvayaganam no kappai asam va hatthim va uttam va gonam va mahisam va kharam va duruhitta nam gamittae, nannattha balabhiogenam. Tesim nam parivvayaganam no kappai nadapechchha i va nattapechchha i va jallapechchha i va mallapechchha i va mutthiyapechchha i va velambagapechchha i va pavagapechchha i va kahagapechchha i va lasagapechchha i va aikkhagapechchha i va lamkhapechchha i va mamkhapechchha i va tunaillapechchha i va tumbavinipechchha i va bhuyagapechchha i va magahapechchha i va pechchhittae. Tesim parivvayaganam no kappai hariyanam lesanaya va ghattanaya va thambhanaya va lusanaya va uppadanaya va karittae. Tesim parivvayaganam no kappai itthikaha i va bhattakaha i va rayakaha i va desakaha i va chorakaha i va anavayakaha i va anatthadamdam karittae. Tesim nam parivvayaganam no kappai ayapayani va tambapayani va tauyapayani va sisagapayani va rayayajayaruva kaya bedamtiya vattaloha kamsaloha harapudaya ritiya mani samkha damta chamma chela sela payani va annayaraim va tahappagaraim mahaddhanamollaim dharittae, nannattha alaupaena va darupaena va mattiyapaena va. Tesim nam parivvayaganam no kappai ayabamdhanani va tamba bamdhanani va tauya bamdhanani va sisagabamdhanani va rayaya jayaruva kaya vedamtiya vattaloha kamsaloha harapudaya ritiya mani samkha damta chamma chela sela bamdhanani va annayaraim va tahappagaraim mahaddhanamollaim dharittae. Tesim nam parivvayaganam no kappai nanavihavannaragarattaim vatthaim dharittae, nannattha egae dhaurattae. Tesim nam parivvayaganam no kappai haram va addhaharam va egavalim va muttavalim va kanagavalim va rayanavalim va muravim va kamthamuravim va palambam va tisarayam va kadisuttam va dasamuddianamtagam va kadayani va tudiyani va amgayani va keurani va kumdalani va maudam va chulamanim va piniddhattae, nannattha egenam tambienam pavittaenam. Tesi nam parivvayaganam no kappai gamthima vedhima purima samghaime chauvvihe malle dharittae, nannattha egenam kannapurenam. Tesi nam parivvayaganam no kappai agaluena va chamdanena va kumkumena va gayam anulimpittae, nannattha ekkae gamgamattiyae. Tesi nam parivvayaganam kappai magahae patthae jalassa padigahittae, se vi ya vahamanae no cheva nam avahamanae, se vi ya thimiodae no cheva nam kaddamodae, se vi ya bahuppasanne no cheva nam abahuppasanne, se vi ya paripue no cheva nam aparipue se vi ya dinne no cheva nam adinne, se vi ya pibittae no cheva nam hattha paya charu chamasa pakkhalanatthae sinaittae va. Tesim nam parivvayaganam kappai magahae addhadhae jalassa padiggahittae, se vi ya vahamanae no cheva nam avahamanae, se vi ya thimiodae no cheva nam kaddamodae, se vi ya bahuppasanne no cheva nam abahuppasanne, se vi ya paripue no cheva nam aparipue, se vi ya dinne no cheva nam adinne, se vi ya hattha paya charu chamasa pakkhalanatthae no cheva nam pibittae sinaittae va. Tesi nam parivvayaganam kappai magahae adhae jalassa padiggahittae, se vi ya vahamanae no cheva nam avahamanae se vi ya thimiodae no cheva nam kaddamodae, se vi ya bahuppasanne no cheva nam abahuppasanne, se vi ya paripue no cheva nam aparibhue, se vi ya dinne no cheva nam adinne, se vi ya sinaittae no cheva nam hattha paya charu chamasa pakkhalanatthae pibittae va. Te nam parivvayaga eyaruvenam viharenam viharamana bahuim vasaim pariyayam paunamti, paunitta kalamase kalam kichcha ukkosenam bambhaloe kappe devattae uvavattaro bhavamti. Tahim tesim gai, tahim tesim thii, tahim tesim uvavae pannatte. Tesi nam bhamte! Devanam kevaiyam kalam thii pannatta? Goyama! Dasasagarovamaim thii pannatta. Atthi nam bhamte! Tesim devanam iddhii va juii va jasei va balei va viriei va purisakkara parakkamei va? Hamta atthi. Te nam bhamte! Deva paralogassa arahaga? No inatthe samatthe.
Sutra Meaning Transliteration : Juo sutra 45