Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104798
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-८ मल्ली

 Translated Chapter :

શ્રુતસ્કંધ-૧

અધ્યયન-૮ મલ્લી
Section : Translated Section :
Sutra Number : 98 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] एवं संपेहेइ, संपेहेत्ता वेसमणं देवं सद्दावेइ, सद्दावेत्ता एवं वयासी–एवं खलु देवानुप्पिया! जंबुद्दीवे दीवे भारहे वासे मिहि-लाए रायहाणीए कुंभगस्स रयणी धूया पभावईए देवीए अत्तया मल्ली अरहा निक्खमिस्सामित्ति मणं पहारेइ जाव इंदा दलयंति अरहाणं। तं गच्छह णं देवानुप्पिया! जंबुद्दीवं दीवं भारहं वासं मिहिलं रायहाणिं कुंभगस्स रन्नो भवणंसि इमेयारूवं अत्थसंपयाणं साहराहि, साहरित्ता खिप्पामेव मम एयमाणत्तियं पच्चप्पिणाहि। तए णं से वेसमणे देवे सक्केणं देविंदेणं देवरन्ना एवं वुत्ते समाणे हट्ठतुट्ठे करयल परिग्गहियं दसणहं सिरसावत्तं मत्थए अंजलिं कट्टु एवं देवो! तहत्ति आणाए विनएणं वयणं पडिसुणेइ, पडिसुणेत्ता बंभए देवे सद्दावेइ, सद्दावेत्ता एवं वयासी–गच्छह णं तुब्भे देवानुप्पिया! जंबुद्दीवं दीवं भारहं वासं मिहिलं रायहाणिं कुंभगस्स रन्नो भवणंति तिन्नि कोडिसया अट्ठासीइं च कोडीओ असीइं सयसहस्साइं–इमेयारूवं अत्थसंपयाणं साहरह, साहरित्ता मम एयमाणत्तियं पच्चप्पिणह। तए णं ते जंभगा देवा वेसमणेणं देवेणं एवं वुत्ता समाणा जाव पडिसुणेत्ता उत्तरपुरत्थिमं दिसीभागं अवक्कमंति अवक्कमित्ता वेउव्वियसमुग्घाएणं समोहण्णंति, समोहणित्ता संखेज्जाइं जोयणाइं दंडं निसिरंति, जाव उत्तरवेउव्वियाइं रूवाइं विउव्वंति, विउव्वित्ता ताए उक्किट्ठाए जाव देवगईए वीईवयमाणा-वीईवयमाणा जेणेव जंबुद्दीवे दीवे भारहे वासे जेणेव मिहिला रायहाणी जेणेव कुंभगस्स रन्नो भवणे तेणेव उवागच्छंति, उवागच्छित्ता कुंभगस्स रन्नो भवणंसि तिन्नि कोडिसया जाव साहरंति, साहरित्ता जेणेव वेसमणे देवे तेणेव उवागच्छंति, उवागच्छित्ता करयलपरिग्गहियं दसणहं सिरसावत्तं मत्थए अंजलिं कट्टु तमाणत्तियं पच्चप्पिणंति। तए णं से वेसमणे देवे जेणेव सक्के देविंदे देवराया तेणेव उवागच्छइ, उवागच्छित्ता करयलपरिग्गहियं जाव तमाणत्तियं पच्चप्पिणइ। तए णं मल्ली अरहा कल्लाकल्लिं जाव मागहओ पायरासी त्ति बहूणं सणाहाण य अणाहाण य पंथियाण य पहियाण य करीडियाण य कप्पडियाण य एगमेगं हिरण्णकोडिं अट्ठ य अणूणाइं सयसहस्साइं–इमेयारूवं अत्थसंपयाणं दलयइ। तए णं कुंभए राया मिहिलाए रायहाणीए तत्थ-तत्थ तहिं-तहिं देसे-देसे बहूओ महाणससालाओ करेइ। तत्थ णं बहवे मणुया दिन्नभइ-भत्त-वेयणा विउलं असन-पान-खाइम-साइमं उवक्खडेंति। जे जहा आगच्छंति, तं जहा–पंथिया वा पहिया वा करोडिया वा कप्पडिया वा पासंडत्था वा गिहत्था वा, तस्स य तहा आसत्थस्स वीसत्थस्स सुहासणवरगयस्स तं विउलं असन-पान-खाइम-साइमं परिभाएमाणा परिवेसेमाणा विहरंति। तए णं मिहिलाए नयरीए सिंघाडग-तिग-चउक्क-चच्चर-चउम्मुह-महापह-पहेसु बहुजणो अन्नमन्नस्स एवमाइक्खइ–एवं खलु देवानुप्पिया! कुंभगस्स रन्नो भवणंसि सव्वकामगुणियं किमिच्छियं विपुलं असन-पान-खाइम-साइमं बहूणं समणाण य माहणाण य सणाहाण य अणाहाण य पंथियाण य एहियाण य करोडियाण य कप्पडियाणं य परिभाइज्जइ परिवेसिज्जइ।
Sutra Meaning : જુઓ સૂત્ર ૯૬
Mool Sutra Transliteration : [sutra] evam sampehei, sampehetta vesamanam devam saddavei, saddavetta evam vayasi–evam khalu devanuppiya! Jambuddive dive bharahe vase mihi-lae rayahanie kumbhagassa rayani dhuya pabhavaie devie attaya malli araha nikkhamissamitti manam paharei java imda dalayamti arahanam. Tam gachchhaha nam devanuppiya! Jambuddivam divam bharaham vasam mihilam rayahanim kumbhagassa ranno bhavanamsi imeyaruvam atthasampayanam saharahi, saharitta khippameva mama eyamanattiyam pachchappinahi. Tae nam se vesamane deve sakkenam devimdenam devaranna evam vutte samane hatthatutthe karayala pariggahiyam dasanaham sirasavattam matthae amjalim kattu evam devo! Tahatti anae vinaenam vayanam padisunei, padisunetta bambhae deve saddavei, saddavetta evam vayasi–gachchhaha nam tubbhe devanuppiya! Jambuddivam divam bharaham vasam mihilam rayahanim kumbhagassa ranno bhavanamti tinni kodisaya atthasiim cha kodio asiim sayasahassaim–imeyaruvam atthasampayanam saharaha, saharitta mama eyamanattiyam pachchappinaha. Tae nam te jambhaga deva vesamanenam devenam evam vutta samana java padisunetta uttarapuratthimam disibhagam avakkamamti avakkamitta veuvviyasamugghaenam samohannamti, samohanitta samkhejjaim joyanaim damdam nisiramti, java uttaraveuvviyaim ruvaim viuvvamti, viuvvitta tae ukkitthae java devagaie viivayamana-viivayamana jeneva jambuddive dive bharahe vase jeneva mihila rayahani jeneva kumbhagassa ranno bhavane teneva uvagachchhamti, uvagachchhitta kumbhagassa ranno bhavanamsi tinni kodisaya java saharamti, saharitta jeneva vesamane deve teneva uvagachchhamti, uvagachchhitta karayalapariggahiyam dasanaham sirasavattam matthae amjalim kattu tamanattiyam pachchappinamti. Tae nam se vesamane deve jeneva sakke devimde devaraya teneva uvagachchhai, uvagachchhitta karayalapariggahiyam java tamanattiyam pachchappinai. Tae nam malli araha kallakallim java magahao payarasi tti bahunam sanahana ya anahana ya pamthiyana ya pahiyana ya karidiyana ya kappadiyana ya egamegam hirannakodim attha ya anunaim sayasahassaim–imeyaruvam atthasampayanam dalayai. Tae nam kumbhae raya mihilae rayahanie tattha-tattha tahim-tahim dese-dese bahuo mahanasasalao karei. Tattha nam bahave manuya dinnabhai-bhatta-veyana viulam asana-pana-khaima-saimam uvakkhademti. Je jaha agachchhamti, tam jaha–pamthiya va pahiya va karodiya va kappadiya va pasamdattha va gihattha va, tassa ya taha asatthassa visatthassa suhasanavaragayassa tam viulam asana-pana-khaima-saimam paribhaemana parivesemana viharamti. Tae nam mihilae nayarie simghadaga-tiga-chaukka-chachchara-chaummuha-mahapaha-pahesu bahujano annamannassa evamaikkhai–evam khalu devanuppiya! Kumbhagassa ranno bhavanamsi savvakamaguniyam kimichchhiyam vipulam asana-pana-khaima-saimam bahunam samanana ya mahanana ya sanahana ya anahana ya pamthiyana ya ehiyana ya karodiyana ya kappadiyanam ya paribhaijjai parivesijjai.
Sutra Meaning Transliteration : Juo sutra 96