Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1104394
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-२५

 Translated Chapter :

શતક-૨૫
Section : उद्देशक-५ पर्यव Translated Section : ઉદ્દેશક-૫ પર્યવ
Sutra Number : 894 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] आवलिया णं भंते! किं संखेज्जा समया? असंखेज्जा समया? अनंता समया? गोयमा! नो संखेज्जा समया, असंखेज्जा समया, नो अनंता समया। आणापाणू णं भंते! किं संखेज्जा? एवं चेव। थोवे णं भंते! किं संखेज्जा? एवं चेव। एवं लवे वि, मुहुत्ते वि, एवं अहोरत्ते, एवं पक्खे, मासे, उऊ, अयणे, संवच्छरे, जुगे, वाससए, वाससहस्से, वाससयसहस्से, पुव्वंगे, पुव्वे, तुडियंगे, तुडिए, अडडंगे, अडडे, अववंगे, अववे, हूहूयंगे, हूहूए, उप्पलंगे, उप्पले, पउमंगे, पउमे, नलिणंगे, नलिणे, अत्थनिपूरंगे, अत्थनिपूरे, अउयंगे, अउए, नउयंगे, नउए, पउयंगे, पउए, चूलियंगे, चूलिए, सीसपहेलियंगे, सीसपहेलिया, पलिओवमे, सागरोवमे, ओसप्पिणी। एवं उस्सप्पिणी वि। पोग्गलपरियट्टे णं भंते! किं संखेज्जा समया–पुच्छा। गोयमा! नो संखेज्जा समया, नो असंखेज्जा समया, अनंता समया। एवं तीयद्धा, अनागयद्धा, सव्वद्धा। आवलियाओ णं भंते! किं संखेज्जा समया–पुच्छा। गोयमा! नो संखेज्जा समया, सिय असंखेज्जा समया, सिय अनंता समया। आणापाणू णं भंते! किं संखेज्जा समया? एवं चेव। थोवा णं भंते! किं संखेज्जा समया? एवं चेव। एवं जाव ओसप्पिणीओ त्ति। पोग्गलपरियट्टा णं भंते! किं संखेज्जा समया–पुच्छा। गोयमा! नो संखेज्जा समया, नो असंखेज्जा समया, अनंता समया। आणापाणू णं भंते! किं संखेज्जाओ आवलियाओ–पुच्छा। गोयमा! संखेज्जाओ आवलियाओ, नो असंखेज्जाओ आवलियाओ, नो अनंताओ आवलियाओ। एवं थोवे वि। एवं जाव सीसपहेलिय त्ति। पलिओवमे णं भंते! किं संखेज्जाओ आवलियाओ–पुच्छा। गोयमा! नो संखेज्जाओ आवलियाओ, असंखेज्जाओ आवलियाओ, नो अनंताओ आवलियाओ। एवं सागरोवमे वि। एवं ओसप्पिणी वि, उस्सप्पिणी वि। पोग्गलपरियट्टे–पुच्छा। गोयमा! नो संखेज्जाओ आवलियाओ, नो असंखेज्जाओ आवलियाओ, अनंताओ आवलियाओ। एवं जाव सव्वद्धा। आणापाणू णं भंते! किं संखेज्जाओ आवलियाओ–पुच्छा। गोयमा! सिय संखेज्जाओ आवलियाओ, सिय असंखेज्जाओ, सिय अनंताओ। एवं जाव सीसपहेलियाओ। पलिओवमा णं–पुच्छा। गोयमा! नो संखेज्जाओ आवलियाओ, सिय असंखेज्जाओ आवलियाओ, सिय अनंताओ आवलियाओ। एवं जाव उस्सप्पिणीओ। पोग्गलपरियट्टा णं–पुच्छा। गोयमा! नो संखेज्जाओ आवलियाओ, नो असंखेज्जाओ आवलियाओ, अनंताओ आवलियाओ। थोवे णं भंते! किं संखेज्जाओ आणापाणूओ? असंखेज्जाओ? जहा आवलियाए वत्तव्वया एवं आणापाणूओ वि निरवसेसा। एवं एतेणं गमएणं जाव सीसपहेलिया भाणियव्वा। सागरोवमे णं भंते! किं संखेज्जा पलिओवमा? – पुच्छा। गोयमा! संखेज्जा पलिओवमा, नो असंखेज्जा पलिओवमा, नो अनंता पलिओवमा। एवं ओसप्पिणी वि, उस्सप्पिणी वि। पोग्गलपरियट्टे णं–पुच्छा। गोयमा! नो संखेज्जा पलिओवमा, नो असंखेज्जा पलिओवमा, अनंता पलिओवमा। एवं जाव सव्वद्धा। सागरोवमा णं भंते! किं संखेज्जा पलिओवमा–पुच्छा। गोयमा! सिय संखेज्जा पलिओवमा, सिय असंखेज्जा पलिओवमा, सिय अनंता पलिओवमा। एवं जाव ओसप्पिणी वि, उस्सप्पिणी वि। पोग्गलपरियट्टा णं–पुच्छा। गोयमा! नो संखेज्जा पलिओवमा, नो असंखेज्जा पलिओवमा, अनंता पलिओवमा। ओसप्पिणी णं भंते! किं संखेज्जा सागरोवमा? जहा पलिओवमस्स वत्तव्वया तहा सागरोवमस्स वि। पोग्गलपरियट्टे णं भंते! किं संखेज्जाओ ओसप्पिणी-उस्सप्पिणीओ–पुच्छा। गोयमा! नो संखेज्जाओ ओसप्पिणि-उस्सप्पिणीओ, नो संखेज्जाओ ओसप्पिणि-उस्सप्पिणीओ, अनंताओ ओसप्पिणि-उस्सप्पिणीओ। एवं जाव सव्वद्धा। पोग्गलपरियट्टा णं भंते! किं संखेज्जाओ ओसप्पिणि-उस्सप्पिणीओ–पुच्छा। गोयमा! नो संखेज्जाओ ओसप्पिणि-उस्सप्पिणीओ, नो असंखेज्जाओ ओसप्पिणि-उस्सप्पिणीओ, अनंताओ ओसप्पिणि-उस्सप्पिणीओ। तीतद्धा णं भंते! किं संखेज्जा पोग्गलपरियट्टा–पुच्छा। गोयमा! नो संखेज्जा पोग्गलपरियट्टा, नो असंखेज्जा पोग्गलपरियट्टा, अनंता पोग्गल-परियट्टा। एवं अनागयद्धा वि। एवं सव्वद्धा वि।
Sutra Meaning : જુઓ સૂત્ર ૮૯૩
Mool Sutra Transliteration : [sutra] avaliya nam bhamte! Kim samkhejja samaya? Asamkhejja samaya? Anamta samaya? Goyama! No samkhejja samaya, asamkhejja samaya, no anamta samaya. Anapanu nam bhamte! Kim samkhejja? Evam cheva. Thove nam bhamte! Kim samkhejja? Evam cheva. Evam lave vi, muhutte vi, evam ahoratte, evam pakkhe, mase, uu, ayane, samvachchhare, juge, vasasae, vasasahasse, vasasayasahasse, puvvamge, puvve, tudiyamge, tudie, adadamge, adade, avavamge, avave, huhuyamge, huhue, uppalamge, uppale, paumamge, paume, nalinamge, naline, atthanipuramge, atthanipure, auyamge, aue, nauyamge, naue, pauyamge, paue, chuliyamge, chulie, sisapaheliyamge, sisapaheliya, paliovame, sagarovame, osappini. Evam ussappini vi. Poggalapariyatte nam bhamte! Kim samkhejja samaya–puchchha. Goyama! No samkhejja samaya, no asamkhejja samaya, anamta samaya. Evam tiyaddha, anagayaddha, savvaddha. Avaliyao nam bhamte! Kim samkhejja samaya–puchchha. Goyama! No samkhejja samaya, siya asamkhejja samaya, siya anamta samaya. Anapanu nam bhamte! Kim samkhejja samaya? Evam cheva. Thova nam bhamte! Kim samkhejja samaya? Evam cheva. Evam java osappinio tti. Poggalapariyatta nam bhamte! Kim samkhejja samaya–puchchha. Goyama! No samkhejja samaya, no asamkhejja samaya, anamta samaya. Anapanu nam bhamte! Kim samkhejjao avaliyao–puchchha. Goyama! Samkhejjao avaliyao, no asamkhejjao avaliyao, no anamtao avaliyao. Evam thove vi. Evam java sisapaheliya tti. Paliovame nam bhamte! Kim samkhejjao avaliyao–puchchha. Goyama! No samkhejjao avaliyao, asamkhejjao avaliyao, no anamtao avaliyao. Evam sagarovame vi. Evam osappini vi, ussappini vi. Poggalapariyatte–puchchha. Goyama! No samkhejjao avaliyao, no asamkhejjao avaliyao, anamtao avaliyao. Evam java savvaddha. Anapanu nam bhamte! Kim samkhejjao avaliyao–puchchha. Goyama! Siya samkhejjao avaliyao, siya asamkhejjao, siya anamtao. Evam java sisapaheliyao. Paliovama nam–puchchha. Goyama! No samkhejjao avaliyao, siya asamkhejjao avaliyao, siya anamtao avaliyao. Evam java ussappinio. Poggalapariyatta nam–puchchha. Goyama! No samkhejjao avaliyao, no asamkhejjao avaliyao, anamtao avaliyao. Thove nam bhamte! Kim samkhejjao anapanuo? Asamkhejjao? Jaha avaliyae vattavvaya evam anapanuo vi niravasesa. Evam etenam gamaenam java sisapaheliya bhaniyavva. Sagarovame nam bhamte! Kim samkhejja paliovama? – puchchha. Goyama! Samkhejja paliovama, no asamkhejja paliovama, no anamta paliovama. Evam osappini vi, ussappini vi. Poggalapariyatte nam–puchchha. Goyama! No samkhejja paliovama, no asamkhejja paliovama, anamta paliovama. Evam java savvaddha. Sagarovama nam bhamte! Kim samkhejja paliovama–puchchha. Goyama! Siya samkhejja paliovama, siya asamkhejja paliovama, siya anamta paliovama. Evam java osappini vi, ussappini vi. Poggalapariyatta nam–puchchha. Goyama! No samkhejja paliovama, no asamkhejja paliovama, anamta paliovama. Osappini nam bhamte! Kim samkhejja sagarovama? Jaha paliovamassa vattavvaya taha sagarovamassa vi. Poggalapariyatte nam bhamte! Kim samkhejjao osappini-ussappinio–puchchha. Goyama! No samkhejjao osappini-ussappinio, no samkhejjao osappini-ussappinio, anamtao osappini-ussappinio. Evam java savvaddha. Poggalapariyatta nam bhamte! Kim samkhejjao osappini-ussappinio–puchchha. Goyama! No samkhejjao osappini-ussappinio, no asamkhejjao osappini-ussappinio, anamtao osappini-ussappinio. Titaddha nam bhamte! Kim samkhejja poggalapariyatta–puchchha. Goyama! No samkhejja poggalapariyatta, no asamkhejja poggalapariyatta, anamta poggala-pariyatta. Evam anagayaddha vi. Evam savvaddha vi.
Sutra Meaning Transliteration : Juo sutra 893