Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1104152
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-१५ गोशालक

 Translated Chapter :

શતક-૧૫ ગોશાલક
Section : Translated Section :
Sutra Number : 652 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] अज्जोति! समणे भगवं महावीरे समणे निग्गंथे आमंतेत्ता एवं वयासी–अज्जो! से जहानामए तणरासी इ वा कट्ठरासी इ वा पत्तरासी इ वा तयारासी इ वा तुसरासी इ वा भुसरासी इ वा गोमयरासी इ वा अवकररासी इ वा अगनिज्झामिए अगनिज्झूसिए अगनिपरिणामिए हयतेए गयतेए नट्ठतेए भट्ठतेए लुत्ततेए विणट्ठतेए जाए, एवामेव गोसाले मंखलिपुत्ते ममं वहाए सरीरगंसि तेयं निसिरित्ता हयतेए गयतेए नट्ठतेए भट्ठतेए लुत्ततेए विणट्ठतेए जाए, तं छंदेणं अज्जो! तुब्भे गोसालं मंखलिपुत्तं धम्मियाए पडिचोयणाए पडिचोएह, धम्मियाए पडिसारणाए पडिसारेह, धम्मिएणं पडोयारेणं पडोयारेह, अट्ठेहि य हेऊहि य पसिणेहि य वागरणेहि य कारणेहि य निप्पट्ठपसिणवागरणं करेह। तए णं ते समणा निग्गंथा समणेणं भगवया महावीरेणं एवं वुत्ता समाणा समणं भगवं महावीरं वंदंति नमंसंति, वंदित्ता नमंसित्ता जेणेव गोसाले मंखलिपुत्ते तेणेव उवागच्छंति, उवागच्छित्ता गोसालं मंखलिपुत्तं धम्मियाए पडिचोयणाए पडिचोएंति, धम्मियाए पडिसारणाए पडिसारेंति, धम्मिएणं पडोयारेणं पडोयारेंति, अट्ठेहि य हेऊहि य कारणेहि य निप्पट्ठपसिणवागरणं करेंति। तए णं से गोसाले मंखलिपुत्ते समणेहि निग्गंथेहिं धम्मियाए पडिचोयणाए पडिचोइज्जमाणे, धम्मियाए पडिसार-णाए पडिसारिज्जमाणे, धम्मिएणं पडोयारेण य पडोयारेज्जमाणे, अट्ठेहि य हेऊहि य पसिणेहि य वागरणेहि य कारणेहि य निप्पट्ठपसिणवागरणे कीरमाणे आसुरुत्ते रुट्ठे कुविए चंडिक्किए मिसिमिसेमाणे नो संचाएति समणाणं निग्गंथाणं सरीरगस्स किंचि आबाहं वा वाबाहं वा उप्पाएत्तए, छविच्छेदं वा करेत्तए। तए णं से आजीविया थेरा गोसालं मंखलिपुत्तं समणेहिं निग्गंथेहिं धम्मियाए पडिचोयणाए पडिचोएज्जमाणं, धम्मियाए पडिसारणाए पडिसारिज्जमाणं, धम्मिएणं पडोयारेण य पडोयारेज्जमाणं, अट्ठेहि य हेऊहि य पसिणेहि य वागरणेहि य कारणेहि य निप्पट्ठपसिणवागरणं कीरमाणं, आसुरुत्तं रुट्ठं कुवियं चंडिक्कियं मिसिमिसेमाणं समणाणं निग्गंथाणं सरीरगस्स किंचि आबाहं वा वाबाहं वा छविच्छेदं वा अकरेमाणं पासंति, पासित्ता गोसालस्स मंखलिपुत्तस्स अंतियाओ आयाए अवक्कमंति, अवक्कमित्ता जेणेव समणे भगवं महावीरे तेणेव उवागच्छंति, उवागच्छित्ता समणं भगवं महावीरं तिक्खुत्तो आयाहिण-पयाहिणं करेंति, करेत्ता वंदंति नमंसंति, वंदित्ता नमंसित्ता समणं भगवं महावीरं उवसंपज्जित्ताणं विहरंति। अत्थेगतिया आजीविया थेरा गोसालं चेव मंखलिपुत्तं उवसंपज्जित्ताणं विहरंति। तए णं से गोसाले मंखलिपुत्ते जस्सट्ठाए हव्वमागए तमट्ठं असाहेमाणे, रुंदाइं पलोएमाणे, दीहुण्हाइं नीससमाणे, दाढियाए लोमाइं लुंचमाणे, अवडुं कंडूयमाणे, पुयलिं पप्फोडेमाणे, हत्थे विणिद्धणमाणे, दोहि वि पाएहिं भूमिं कोट्टेमाणे हा हा अहो! हओहमस्सि त्ति कट्टु समणस्स भगवओ महावीरस्स अंतियाओ कोट्ठयाओ चेइयाओ पडिनिक्खमति, पडिनिक्खमित्ता जेणेव सावत्थी नगरी, जेणेव हालाहलाए कुंभकारीए कुंभकारावने तेणेव उवागच्छइ, उवागच्छित्ता हालाहलाए कुंभकारीए कुंभकारावणंसि अंबकूणगहत्थगए, मज्जपाणगं पियमाणे, अभिक्खणं गायमाणे, अभिक्खणं नच्चमाणे, अभिक्खणं हालाहलाए कुंभकारीए अंजलिकम्मं करेमाणे, सीयलएणं मट्टियापाणएणं आयंचिण-उदएणं गायाइं परिसिंचमाणे विहरइ। अज्जोति! समणे भगवं महावीरे समणे निग्गंथे आमंतेत्ता एवं वयासी–जावतिए णं अज्जो! गोसालेणं मंखलिपु-त्तेणं ममं वहाए सरीरगंसि तेये निसट्ठे से णं अलाहि पज्जत्ते सोलसण्हं जणवयाणं, तं जहा–१. अंगाणं २. वंगाणं ३. मगहाणं ४. मलयाणं ५. मालवगाणं ६. अच्छाणं ७. वच्छाणं ८. कीच्छाणं ९. पाढाणं १. लाढाणं ११. वज्जीणं १२. मोलीणं १३. कासीणं १४. कोसलाणं १५. अबाहाणं १६. सुंभुत्तराणं घाताए वहाए उच्छादणयाए भासीकरणयाए। जं पि य अज्जो! गोसाले मंखलिपुत्ते हालाहलाए कुंभकारीए कुंभकारावणंसि अंबकूणगहत्थगए, मज्जपाणं पियमाणे, अभि-क्खणं गायमाणे, अभिक्खणं नच्चमाणे, अभिक्खणं हालाहलाए कुंभकारीए अंजलिकम्मं करेमाणे विहरइ, तस्स वि य णं वज्ज-स्स पच्छादणट्ठयाए इमाइं अट्ठ चरिमाइं पन्नवेइ, तं जहा–१. चरिमे पाणे २. चरिमे गेये ३. चरिमे नट्टे ४. चरिमे अंजलिकम्मे ५. चरिमे पोक्खलसंवट्टए महामेहे ६. चरिमे सेयणए गंधहत्थो ७. चरिमे महासिलाकंटए संगामे ८. अहं च णं इमीसे ओसप्पिणिसमाए चउवीसाए तित्थगराणं चरिमे तित्थगरे सिज्झिस्सं जाव अंतं करेस्सं। जं पि य अज्जो! गोसाले मंखलिपुत्ते सीयलएणं मट्टियापाणएणं आयंचिणउदएणं गायाइं परिसिंचमाणे विहरइ, तस्स वि णं वज्जस्स पच्छादणट्ठयाए इमाइं चत्तारि पाणगाइं चत्तारि अपाणगाइं पन्नवेति। से किं तं पाणए? पाणए चउव्विहे पन्नत्ते, तं जहा–१. गोपुट्ठए २. हत्थमद्दियए ३. आतवतत्तए ४. सिलापब्भट्ठए। सेत्तं पाणए। से किं तं अपाणए? अपाणए चउव्विहे पन्नत्ते, तं जहा–१. थालपाणए २. तयापाणए ३. सिंबलिपाणए ४. सुद्धपाणए। से किं तं थालपाणए? थालपाणए–जे णं दाथालगं वा दावारगं वा दाकुंभगं वा दाकलसं वा सीतलगं उल्लगं हत्थेहिं परामुसइ, न य पाणियं पियइ। सेत्तं थालपाणए। से किं तं तयापाणए? तयापाणए–जे णं अंबं वा अंबाडगं वा जहा पओगपदे जाव वोरं वा तेंबरुयं वा तरुणगं आमगं आसगंसि आवीलेति वा पवी-लेति वा, न य पाणियं पियइ। सेत्तं तयापाणए। से किं तं सिंबलिपाणए? सिंबलिपाणए–जे णं कलसंगलियं वा मुग्गसंगलियं वा माससंगलियं वा सिंबलिसंगलियं वा तरुणियं आमियं आसगंसि आवीलेति वा पवीलेति वा, न य पाणियं पियति। सेत्तं सिंबलिपाणए। से किं तं सुद्धपाणए? सुद्धपाणए–जे णं छम्मासे सुद्धखाइमं खाइ, दो मासे पुढविसंथारोवगए, दो मासे कट्ठसंथारोवगए, दो मासे दब्भसंथारोवगए, तस्स णं बहुपडिपुण्णाणं छण्हं मासाणं अंतिमराईए इमे दो देवा महिड्ढिया जाव महेसक्खा अंतियं पाउब्भवंति, तं जहा–पुण्णभद्दे य माणिभद्दे य। तए णं ते देवा सीयलएहिं उल्लएहिं हत्थेहिं गायाइं परामुसंति, जे णं ते देवे साइज्जंति, से णं आसीविसत्ताए कम्मं पकरेति, जे णं ते देवे नो साइज्जति तस्स णं संसि सरीरगंसि अगनिकाए संभवति, से णं सएणं तेएणं सरीरगं ज्झामेति, ज्झामेत्ता तओ पच्छा सिज्झति जाव अंतं करेति। सेत्तं सुद्धपाणए। तत्थ णं सावत्थीए नयरीए अयंपुले नामं आजीविओवासए परिवसइ–अड्ढे, जहा हालाहला जाव आजीवियसम-एणं अप्पाणं भावेमाणे विहरइ। तए णं तस्स अयंपुलस्स आजीविओवासगस्स अन्नया कदायि पुव्वरत्तावरत्तकालसमयंसि कुडुंब-जागरियं जागरमाणस्स अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था–किंसंठिया णं हल्ला पन्नत्ता? तए णं तस्स अयंपुलस्स आजीविओवासगस्स दोच्चं पि अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था–एवं खलु ममं धम्मायरिए धम्मोवदेसए गोसाले मंखलिपुत्ते उप्पन्ननाणदंसणधरे जिने अरहा केवली सव्वण्णू सव्व-दरिसी इहेव सावत्थीए नगरीए हालाहलाए कुंभकारीए कुंभकारावणंसि आजीवियसंघसंपरिवुडे आजीवियसमएणं अप्पाणं भावेमाणे विहरइ, तं सेयं खलु मे कल्लं पाउप्पभाए रयणीए जाव उट्ठियम्मि सूरे सहस्सरस्सिम्मि दिनयरे तेयसा जलंते गोसालं मंखलिपुत्तं वंदित्ता जाव पज्जुवासित्ता इमं एयारूवं वागरणं वागरित्तए त्ति कट्टु एवं संपेहेति, संपेहेत्ता कल्लं पाउप्पभाए रयणीए जाव उट्ठियम्मि सूरे सहस्सरस्सिम्मि दिनयरे तेयसा जलंते ण्हाए कयबलिकम्मे जाव अप्पमहग्घाभरणालंकियसरीरे साओ गिहाओ पडिनिक्खमति, पडिनिक्खमित्ता पायविहारचारेणं सावत्थिं नगरिं मज्झंमज्झेणं जेणेव हालाहलाए कुंभकारीए कुंभकारावने तेणेव उवागच्छइ, उवागच्छित्ता गोसालं मंखलिपुत्तं हालाहलाए कुंभकारीए कुंभकारावणंसि अंबकूणगहत्थगयं मज्जपाणगं पीयमाणं अभिक्खणं नच्चमाणं, अभिक्खणं हालाहलाए कुंभकारीए अंजलिकम्मं करेमाणं सीयलएणं मट्टिया पाणएणं आयंचिण-उदएणं गायाइं परिसिंचमाणं पासइ, पासित्ता लज्जिए विलिए विड्डे सणियं-सणियं पच्चोसक्कइ। तए णं ते आजीविया थेरा अयंपुलं आजीवियोवासगं लज्जियं जाव पच्चोसक्कमाणं पासइ, पासित्ता एवं वयासी–एहि ताव अयंपुला! इतो। तए णं से अयंपुले आजीवियोवासए आजीवियथेरेहिं एवं वुत्ते समाणे जेणेव आजीविया थेरा तेणेव उवागच्छइ, उवागच्छित्ता आजीविए थेरे वंदइ नमंसइ, वंदित्ता नमंसित्ता नच्चासन्ने जाव पज्जुवासइ। अयंपुलाति! आजीविया थेरा अयंपुलं आजीवियोवासगं एवं वयासी–से नूनं ते अयंपुला! पुव्वरत्तावरत्तकालसमयंसि कुडुंबजागरियं जागरमाणस्स अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था–किंसंठिया णं हल्ला पन्नत्ता? तए णं तव अयंपुला! दोच्चं पि अयमेयारूवे तं चेव सव्वं भाणियव्वं जाव सावत्थिं नगरिं मज्झंमज्झेणं जेणेव हालाहलाए कुंभकारीए कुंभकारावणे, जेणेव इहं तेणेव हव्वमागए। से नूनं ते अयंपुला! अट्ठे समट्ठे? हंता अत्थि। जं पि य अयंपुला! तव धम्मायरिए धम्मोवदेसए गोसाले मंखलिपुत्ते हालाहलाए कुंभकारीए कुंभकारावणंसि अंबकूणगहत्थ-गए जाव अंजलिं करेमाणे विहरइ, तत्थ वि णं भगवं इमाइं अट्ठ चरिमाइं पन्नवेति, तं जहा–चरिमे पाणे जाव अंतं करेस्सति। जं पि य अयंपुला! तव धम्मायरिए धम्मोवदेसए गोसाले मंखलिपुत्ते सीयलएणं मट्टिया पाणएणं आयंचिण-उदएणं गायाइं परिसिंचमाणे विहरइ, तत्थ वि णं भगवं इमाइं चत्तारि पाणगाइं, चत्तारि अपाणगाइं पन्नवेति। से किं तं पाणए? पाणए जाव तओ पच्छा सिज्झति जाव अंतं करेति। तं गच्छ णं तुमं अयंपुला! एस चेव तव धम्मायरिए धम्मोवदेसए गोसाले मंखलिपुत्ते इमं एयारूवं वागरणं वागरेहिति। तए णं से अयंपुले आजीविओवासए आजीविएहिं थेरेहिं एवं वुत्ते समाणे हट्ठतुट्ठे उट्ठाए उट्ठेइ, उट्ठेत्ता जेणेव गोसाले मंखलिपुत्ते तेणेव पहारेत्थ गमणाए। तए णं ते आजीविया थेरा गोसालस्स मंखलिपुत्तस्स अंबकूणग-एडावणट्ठयाए एगंतमंते संगारं कुव्वंति। तए णं से गोसाले मंखलिपुत्ते आजीवियाणं थेरागं संगारं पडिच्छइ, पडिच्छित्ता अंबकूणगं एगंतमंते एडेइ। तए णं से अयंपुले आजीवियोवासए जेणेव गोसाले मंखलिपुत्ते तेणेव उवागच्छइ, उवागच्छित्ता गोसालं मंखलि-पुत्तं तिक्खुत्तो जाव पज्जुवासति। अयंपुलादि! गोसाले मंखलिपुत्ते अयंपुलं आजीवियोवासगं एवं वयासी–से नूनं अयंपुला! पव्वरत्तावरत्तकाल-समयंसि जाव जेणेव ममं अंतियं तेणेव हव्वमागए। से नूनं अयंपुला! अट्ठे समट्ठे? हंता अत्थि। तं नो खलु एस अंबकूणए, अंबचोयए णं एसे किंसंठिया हल्ला पन्नत्ता? वंसीमूलसंठिया हल्ला पन्नत्ता। वीणं वाएहि रे वीरगा! वीणं वाएहि रे वीरगा! तए णं से अयंपुले आजीवियोवासए गोसालेणं मंखलिपुत्तेणं इमं एयारूवं वागरणं वागरिए समाणे हट्ठतुट्ठ चित्त-मानंदिए नंदिए पीइमणे परमसोमणस्सिए हरिसवसविसप्पमाणहियए गोसालं मंखलिपुत्तं वंदइ नमंसइ, वंदित्ता नमंसित्ता पसिणाइं पुच्छइ, पुच्छित्ता अट्ठाइं परियादियइ, परियादिइत्ता उट्ठाए उट्ठेइ, उट्ठेत्ता गोसालं मंखलिपुत्तं वंदइ नमंसइ, वंदित्ता नमंसित्ता जामेव दिसं पाउब्भूए तामेव दिसं पडिगए। तए णं से गोसाले मंखलिपुत्ते अप्पणो मरणं आभोएइ, आभोएत्ता आजीविए थेरे सद्दावेइ, सद्दावेत्ता एवं वयासी –तुब्भे णं देवानुप्पिया! ममं कालगयं जाणित्ता सुरभिणा गंधोदएणं ण्हाणेह, ण्हाणेत्ता पम्हलसुकुमालाए गंधकासाईए गायाइं लूहेह, लूहेत्ता सरसेनं गोसीसचंदणेणं गायाइं अणुलिंपह, अणुलिंपित्ता महरिहं हंसलक्खणं पडसाडगं नियंसेह, नियंसेत्ता सव्वालंकारविभूसियं करेह, करेत्ता पुरिससहस्सवाहिणिं सीयं दुरुहेह, दुरुहेत्ता सावत्थीए नयरीए सिंघाडग-तिग-चउक्क-चच्चर-चउम्मुह-महापह-पहेसु महया-महया सद्देणं उग्घोसेमाणा-उग्घोसेमाणा एवं वदह–एवं खलु देवानुप्पिया! गोसाले मंखलिपुत्ते जिने जिनप्पलावी, अरहा अरहप्पलावी, केवली केवलिप्पलावी, सव्वण्णू सव्वण्णुप्पलावी, जिने जिनसद्दं पगासेमाणे विहरित्ता इमीसे ओसप्पिणीए चउवीसाए तित्थगराणं चरिमे तित्थगरे, सिद्धे जाव सव्वदुक्खप्पहीने–इड्ढिसक्कारसमुदएणं मम सरीरगस्स नीहरणं करेह। तए णं ते आजीविया थेरा गोसालस्स मंखलिपुत्तस्स एयमट्ठं विनएणं पडिसुणेंति।
Sutra Meaning : જુઓ સૂત્ર ૬૪૯
Mool Sutra Transliteration : [sutra] ajjoti! Samane bhagavam mahavire samane niggamthe amamtetta evam vayasi–ajjo! Se jahanamae tanarasi i va kattharasi i va pattarasi i va tayarasi i va tusarasi i va bhusarasi i va gomayarasi i va avakararasi i va aganijjhamie aganijjhusie aganiparinamie hayatee gayatee natthatee bhatthatee luttatee vinatthatee jae, evameva gosale mamkhaliputte mamam vahae sariragamsi teyam nisiritta hayatee gayatee natthatee bhatthatee luttatee vinatthatee jae, tam chhamdenam ajjo! Tubbhe gosalam mamkhaliputtam dhammiyae padichoyanae padichoeha, dhammiyae padisaranae padisareha, dhammienam padoyarenam padoyareha, atthehi ya heuhi ya pasinehi ya vagaranehi ya karanehi ya nippatthapasinavagaranam kareha. Tae nam te samana niggamtha samanenam bhagavaya mahavirenam evam vutta samana samanam bhagavam mahaviram vamdamti namamsamti, vamditta namamsitta jeneva gosale mamkhaliputte teneva uvagachchhamti, uvagachchhitta gosalam mamkhaliputtam dhammiyae padichoyanae padichoemti, dhammiyae padisaranae padisaremti, dhammienam padoyarenam padoyaremti, atthehi ya heuhi ya karanehi ya nippatthapasinavagaranam karemti. Tae nam se gosale mamkhaliputte samanehi niggamthehim dhammiyae padichoyanae padichoijjamane, dhammiyae padisara-nae padisarijjamane, dhammienam padoyarena ya padoyarejjamane, atthehi ya heuhi ya pasinehi ya vagaranehi ya karanehi ya nippatthapasinavagarane kiramane asurutte rutthe kuvie chamdikkie misimisemane no samchaeti samananam niggamthanam sariragassa kimchi abaham va vabaham va uppaettae, chhavichchhedam va karettae. Tae nam se ajiviya thera gosalam mamkhaliputtam samanehim niggamthehim dhammiyae padichoyanae padichoejjamanam, dhammiyae padisaranae padisarijjamanam, dhammienam padoyarena ya padoyarejjamanam, atthehi ya heuhi ya pasinehi ya vagaranehi ya karanehi ya nippatthapasinavagaranam kiramanam, asuruttam ruttham kuviyam chamdikkiyam misimisemanam samananam niggamthanam sariragassa kimchi abaham va vabaham va chhavichchhedam va akaremanam pasamti, pasitta gosalassa mamkhaliputtassa amtiyao ayae avakkamamti, avakkamitta jeneva samane bhagavam mahavire teneva uvagachchhamti, uvagachchhitta samanam bhagavam mahaviram tikkhutto ayahina-payahinam karemti, karetta vamdamti namamsamti, vamditta namamsitta samanam bhagavam mahaviram uvasampajjittanam viharamti. Atthegatiya ajiviya thera gosalam cheva mamkhaliputtam uvasampajjittanam viharamti. Tae nam se gosale mamkhaliputte jassatthae havvamagae tamattham asahemane, rumdaim paloemane, dihunhaim nisasamane, dadhiyae lomaim lumchamane, avadum kamduyamane, puyalim papphodemane, hatthe viniddhanamane, dohi vi paehim bhumim kottemane ha ha aho! Haohamassi tti kattu samanassa bhagavao mahavirassa amtiyao kotthayao cheiyao padinikkhamati, padinikkhamitta jeneva savatthi nagari, jeneva halahalae kumbhakarie kumbhakaravane teneva uvagachchhai, uvagachchhitta halahalae kumbhakarie kumbhakaravanamsi ambakunagahatthagae, majjapanagam piyamane, abhikkhanam gayamane, abhikkhanam nachchamane, abhikkhanam halahalae kumbhakarie amjalikammam karemane, siyalaenam mattiyapanaenam ayamchina-udaenam gayaim parisimchamane viharai. Ajjoti! Samane bhagavam mahavire samane niggamthe amamtetta evam vayasi–javatie nam ajjo! Gosalenam mamkhalipu-ttenam mamam vahae sariragamsi teye nisatthe se nam alahi pajjatte solasanham janavayanam, tam jaha–1. Amganam 2. Vamganam 3. Magahanam 4. Malayanam 5. Malavaganam 6. Achchhanam 7. Vachchhanam 8. Kichchhanam 9. Padhanam 1. Ladhanam 11. Vajjinam 12. Molinam 13. Kasinam 14. Kosalanam 15. Abahanam 16. Sumbhuttaranam ghatae vahae uchchhadanayae bhasikaranayae. Jam pi ya ajjo! Gosale mamkhaliputte halahalae kumbhakarie kumbhakaravanamsi ambakunagahatthagae, majjapanam piyamane, abhi-kkhanam gayamane, abhikkhanam nachchamane, abhikkhanam halahalae kumbhakarie amjalikammam karemane viharai, tassa vi ya nam vajja-ssa pachchhadanatthayae imaim attha charimaim pannavei, tam jaha–1. Charime pane 2. Charime geye 3. Charime natte 4. Charime amjalikamme 5. Charime pokkhalasamvattae mahamehe 6. Charime seyanae gamdhahattho 7. Charime mahasilakamtae samgame 8. Aham cha nam imise osappinisamae chauvisae titthagaranam charime titthagare sijjhissam java amtam karessam. Jam pi ya ajjo! Gosale mamkhaliputte siyalaenam mattiyapanaenam ayamchinaudaenam gayaim parisimchamane viharai, tassa vi nam vajjassa pachchhadanatthayae imaim chattari panagaim chattari apanagaim pannaveti. Se kim tam panae? Panae chauvvihe pannatte, tam jaha–1. Goputthae 2. Hatthamaddiyae 3. Atavatattae 4. Silapabbhatthae. Settam panae. Se kim tam apanae? Apanae chauvvihe pannatte, tam jaha–1. Thalapanae 2. Tayapanae 3. Simbalipanae 4. Suddhapanae. Se kim tam thalapanae? Thalapanae–je nam dathalagam va davaragam va dakumbhagam va dakalasam va sitalagam ullagam hatthehim paramusai, na ya paniyam piyai. Settam thalapanae. Se kim tam tayapanae? Tayapanae–je nam ambam va ambadagam va jaha paogapade java voram va tembaruyam va tarunagam amagam asagamsi avileti va pavi-leti va, na ya paniyam piyai. Settam tayapanae. Se kim tam simbalipanae? Simbalipanae–je nam kalasamgaliyam va muggasamgaliyam va masasamgaliyam va simbalisamgaliyam va taruniyam amiyam asagamsi avileti va pavileti va, na ya paniyam piyati. Settam simbalipanae. Se kim tam suddhapanae? Suddhapanae–je nam chhammase suddhakhaimam khai, do mase pudhavisamtharovagae, do mase katthasamtharovagae, do mase dabbhasamtharovagae, tassa nam bahupadipunnanam chhanham masanam amtimaraie ime do deva mahiddhiya java mahesakkha amtiyam paubbhavamti, tam jaha–punnabhadde ya manibhadde ya. Tae nam te deva siyalaehim ullaehim hatthehim gayaim paramusamti, je nam te deve saijjamti, se nam asivisattae kammam pakareti, je nam te deve no saijjati tassa nam samsi sariragamsi aganikae sambhavati, se nam saenam teenam sariragam jjhameti, jjhametta tao pachchha sijjhati java amtam kareti. Settam suddhapanae. Tattha nam savatthie nayarie ayampule namam ajiviovasae parivasai–addhe, jaha halahala java ajiviyasama-enam appanam bhavemane viharai. Tae nam tassa ayampulassa ajiviovasagassa annaya kadayi puvvarattavarattakalasamayamsi kudumba-jagariyam jagaramanassa ayameyaruve ajjhatthie chimtie patthie manogae samkappe samuppajjittha–kimsamthiya nam halla pannatta? Tae nam tassa ayampulassa ajiviovasagassa dochcham pi ayameyaruve ajjhatthie chimtie patthie manogae samkappe samuppajjittha–evam khalu mamam dhammayarie dhammovadesae gosale mamkhaliputte uppannananadamsanadhare jine araha kevali savvannu savva-darisi iheva savatthie nagarie halahalae kumbhakarie kumbhakaravanamsi ajiviyasamghasamparivude ajiviyasamaenam appanam bhavemane viharai, tam seyam khalu me kallam pauppabhae rayanie java utthiyammi sure sahassarassimmi dinayare teyasa jalamte gosalam mamkhaliputtam vamditta java pajjuvasitta imam eyaruvam vagaranam vagarittae tti kattu evam sampeheti, sampehetta kallam pauppabhae rayanie java utthiyammi sure sahassarassimmi dinayare teyasa jalamte nhae kayabalikamme java appamahagghabharanalamkiyasarire sao gihao padinikkhamati, padinikkhamitta payaviharacharenam savatthim nagarim majjhammajjhenam jeneva halahalae kumbhakarie kumbhakaravane teneva uvagachchhai, uvagachchhitta gosalam mamkhaliputtam halahalae kumbhakarie kumbhakaravanamsi ambakunagahatthagayam majjapanagam piyamanam abhikkhanam nachchamanam, abhikkhanam halahalae kumbhakarie amjalikammam karemanam siyalaenam mattiya panaenam ayamchina-udaenam gayaim parisimchamanam pasai, pasitta lajjie vilie vidde saniyam-saniyam pachchosakkai. Tae nam te ajiviya thera ayampulam ajiviyovasagam lajjiyam java pachchosakkamanam pasai, pasitta evam vayasi–ehi tava ayampula! Ito. Tae nam se ayampule ajiviyovasae ajiviyatherehim evam vutte samane jeneva ajiviya thera teneva uvagachchhai, uvagachchhitta ajivie there vamdai namamsai, vamditta namamsitta nachchasanne java pajjuvasai. Ayampulati! Ajiviya thera ayampulam ajiviyovasagam evam vayasi–se nunam te ayampula! Puvvarattavarattakalasamayamsi kudumbajagariyam jagaramanassa ayameyaruve ajjhatthie chimtie patthie manogae samkappe samuppajjittha–kimsamthiya nam halla pannatta? Tae nam tava ayampula! Dochcham pi ayameyaruve tam cheva savvam bhaniyavvam java savatthim nagarim majjhammajjhenam jeneva halahalae kumbhakarie kumbhakaravane, jeneva iham teneva havvamagae. Se nunam te ayampula! Atthe samatthe? Hamta atthi. Jam pi ya ayampula! Tava dhammayarie dhammovadesae gosale mamkhaliputte halahalae kumbhakarie kumbhakaravanamsi ambakunagahattha-gae java amjalim karemane viharai, tattha vi nam bhagavam imaim attha charimaim pannaveti, tam jaha–charime pane java amtam karessati. Jam pi ya ayampula! Tava dhammayarie dhammovadesae gosale mamkhaliputte siyalaenam mattiya panaenam ayamchina-udaenam gayaim parisimchamane viharai, tattha vi nam bhagavam imaim chattari panagaim, chattari apanagaim pannaveti. Se kim tam panae? Panae java tao pachchha sijjhati java amtam kareti. Tam gachchha nam tumam ayampula! Esa cheva tava dhammayarie dhammovadesae gosale mamkhaliputte imam eyaruvam vagaranam vagarehiti. Tae nam se ayampule ajiviovasae ajiviehim therehim evam vutte samane hatthatutthe utthae utthei, utthetta jeneva gosale mamkhaliputte teneva paharettha gamanae. Tae nam te ajiviya thera gosalassa mamkhaliputtassa ambakunaga-edavanatthayae egamtamamte samgaram kuvvamti. Tae nam se gosale mamkhaliputte ajiviyanam theragam samgaram padichchhai, padichchhitta ambakunagam egamtamamte edei. Tae nam se ayampule ajiviyovasae jeneva gosale mamkhaliputte teneva uvagachchhai, uvagachchhitta gosalam mamkhali-puttam tikkhutto java pajjuvasati. Ayampuladi! Gosale mamkhaliputte ayampulam ajiviyovasagam evam vayasi–se nunam ayampula! Pavvarattavarattakala-samayamsi java jeneva mamam amtiyam teneva havvamagae. Se nunam ayampula! Atthe samatthe? Hamta atthi. Tam no khalu esa ambakunae, ambachoyae nam ese kimsamthiya halla pannatta? Vamsimulasamthiya halla pannatta. Vinam vaehi re viraga! Vinam vaehi re viraga! Tae nam se ayampule ajiviyovasae gosalenam mamkhaliputtenam imam eyaruvam vagaranam vagarie samane hatthatuttha chitta-manamdie namdie piimane paramasomanassie harisavasavisappamanahiyae gosalam mamkhaliputtam vamdai namamsai, vamditta namamsitta pasinaim puchchhai, puchchhitta atthaim pariyadiyai, pariyadiitta utthae utthei, utthetta gosalam mamkhaliputtam vamdai namamsai, vamditta namamsitta jameva disam paubbhue tameva disam padigae. Tae nam se gosale mamkhaliputte appano maranam abhoei, abhoetta ajivie there saddavei, saddavetta evam vayasi –tubbhe nam devanuppiya! Mamam kalagayam janitta surabhina gamdhodaenam nhaneha, nhanetta pamhalasukumalae gamdhakasaie gayaim luheha, luhetta sarasenam gosisachamdanenam gayaim anulimpaha, anulimpitta mahariham hamsalakkhanam padasadagam niyamseha, niyamsetta savvalamkaravibhusiyam kareha, karetta purisasahassavahinim siyam duruheha, duruhetta savatthie nayarie simghadaga-tiga-chaukka-chachchara-chaummuha-mahapaha-pahesu mahaya-mahaya saddenam ugghosemana-ugghosemana evam vadaha–evam khalu devanuppiya! Gosale mamkhaliputte jine jinappalavi, araha arahappalavi, kevali kevalippalavi, savvannu savvannuppalavi, jine jinasaddam pagasemane viharitta imise osappinie chauvisae titthagaranam charime titthagare, siddhe java savvadukkhappahine–iddhisakkarasamudaenam mama sariragassa niharanam kareha. Tae nam te ajiviya thera gosalassa mamkhaliputtassa eyamattham vinaenam padisunemti.
Sutra Meaning Transliteration : Juo sutra 649