Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1104031
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-१२

 Translated Chapter :

શતક-૧૨
Section : उद्देशक-१ शंख Translated Section : ઉદ્દેશક-૧ શંખ
Sutra Number : 531 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से संखे समणोवासए ते समणोवासए एवं वयासी–तुब्भे णं देवानुप्पिया! विपुलं असनं पाणं खाइमं साइमं उवक्खडावेह। तए णं अम्हे तं विपुलं असनं पाणं खाइमं साइमं अस्साएमाणा विस्साएमाणा परिभाएमाणा परिभुंजेमाणा पक्खियं पोसहं पडिजागरमाणा विहरिस्सामो। तए णं ते समणोवासगा संखस्स समणोवासगस्स एयमट्ठं विनएणं पडिसुणेंति। तए णं तस्स संखस्स समणोवासगस्स अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था–नो खलु मे सेयं तं विपुलं असनं पाणं खाइमं साइमं अस्साएमाणस्स विस्साएमाणस्स परिभाएमाणस्स परिभुंजेमाणस्स पक्खियं पोसहं पडिजागरमाणस्स विहरित्तए, सेयं खलु मे पोसहसालाए पोसहियस्स बंभचारिस्स ओमुक्कमणि-सुवण्णस्स ववगयमाला-वण्णग-विलेवणस्स निक्खित्तसत्थमुसलस्स एगस्स अबिइयस्स दब्भसंथारोवगयस्स पक्खियं पोसहं पडिजागरमाणस्स विहरित्तए त्ति कट्टु एवं संपेहेइ, संपेहेत्ता जेणेव सावत्थी नगरी, जेणेव सए गिहे, जेणेव उप्पला समणोवासिया, तेणेव उवागच्छइ, उवागच्छित्ता उप्पलं समणोवासियं आपुच्छइ, आपुच्छित्ता जेणेव पोसहसाला तेणेव उवागच्छइ, उवागच्छित्ता पोसहसालं अनुपविस्सइ, अनुप-विस्सित्ता पोसहसालं पमज्जइ, पमज्जित्ता उच्चारपासवणभूमिं पडिलेहेइ, पडिलेहेत्ता दब्भसथारगं संथरइ, संथरित्ता दब्भसंथारगं दुरुहइ, दुरुहित्ता पोसहसालाए पोसहिए बंभचारी ओमुक्कमणि-सुवण्णे ववगयमाला-वण्णगविलेवने निक्खित्तसत्थ-मुसले एगे अबिइए दब्भसथारोवगए पक्खियं पोसहं पडिजागरमाणे विहरइ। तए णं ते समणोवासगा जेणेव सावत्थी नगरी जेणेव साइं-साइं गिहाइं, तेणेव उवागच्छंति, उवागच्छित्ता विपुलं असनं पाणं खाइमं साइमं उवक्खडावेंति, उवक्खडावेत्ता अन्नमन्नं सद्दावेंति, सद्दावेत्ता एवं वयासी–एवं खलु देवानुप्पिया! अम्हेहिं से विउले असन-पान-खाइम-साइमे उवक्खडाविए, संखे य णं समणोवासए नो हव्वमागच्छइ, तं सेयं खलु देवानुप्पिया! अम्हं संखं समणोवासगं सद्दावेत्तए। तए णं से पोक्खली समणोवासए ते समणोवासए एवं वयासी–अच्छह णं तुब्भे देवानुप्पिया! सुनिव्वुय-वीसत्था, अहण्णं संखं समणोवासगं सद्दावेमि त्ति कट्टु तेसिं समणोवासगाणं अंतियाओ पडिनिक्खमइ, पडिनिक्खमित्ता सावत्थीए नगरीए मज्झंमज्झेणं जेणेव संखस्स समणोवासगस्स गिहे, तेणेव उवागच्छइ, उवागच्छित्ता संखस्स समणोवासगस्स गिहं अनुपविट्ठे। तए णं सा उप्पला समणोवासिया पोक्खलिं समणोवासयं एज्जमाणं पासइ, पासित्ता हट्ठतुट्ठा आसणाओ अब्भुट्ठेइ, अब्भुट्ठेत्ता सत्तट्ठ पयाइं अनुगच्छइ, अनुगच्छित्ता पोक्खलिं समणोवासगं वंदंति नमंसति, वंदित्ता नमंसित्ता आसणेणं उवनिमंतेइ, उवनिमंतेत्ता एवं वयासी– संदिसत्तु णं देवानुप्पिया! किमागमणप्पयोयणं? तए णं से पोक्खली समणोवासए उप्पलं समणोवासियं एवं वयासी–कहिण्णं देवानुप्पिया! संखे समणोवासए? तए णं सा उप्पला समणोवासिया पोक्खलिं समणोवासयं एवं वयासी–एवं खलु देवानुप्पिया! संखे समणोवासए पोसहसालाए पोसहिए बंभचारी ओमुक्कमणि-सुवण्णे ववगयमाला-वण्णग-विलेवने निक्खत्तसत्थ-मुसले एगे अबिइए दब्भसंथारोवगए पक्खियं पोसहं पडिजागरमाणे विहरइ। तए णं से पोक्खली समणोवासए जेणेव पोसहसाला, जेणेव संखे समणोवासए, तेणेव उवागच्छइ, उवागच्छित्ता गमणागमणाए पडिक्कमइ, पडिक्कमित्ता संखं समणोवासगं वंदइ नमंसइ, वंदित्ता नमंसित्ता एवं वयासी–एवं खलु देवानुप्पिया! अम्हेहिं से विउले असन-पान-खाइम-साइमे उवक्खडाविए, तं गच्छामो णं देवानुप्पिया! तं विउलं असनं पाणं खाइमं साइमं अस्साएमाणा विस्साएमाणा परिभाएमाणा परिभुंजेमाणा पक्खियं पोसहं पडिजागरमाणा विहरामो। तए णं से संखे समणोवासए पोक्खलिं समणोवासगं एवं वयासी–नो खलु कप्पइ देवानुप्पिया! तं विउलं असनं पाणं खाइमं साइमं अस्साएमाणसस विस्साएमाणस्स परिभाएमाणस्स परिभुंजेमाणस्स पक्खियं पोसहं पडिजागरमाणस्स विहरित्तए, कप्पइ मे पोसहसालाए पोसहियस्स बंभचारिस्स ओमुक्कमणि-सुवण्णस्स ववगयमाला-वण्णग-विलेवणस्स निक्खत्तसत्थ-मुसलस्स एगस्स अबिइयस्स दब्भसंथारोवगयस्स पक्खियं पोसहं पडिजागरमाणस्स विहरित्तए, तं छंदेणं देवानुप्पिया! तुब्भे तं विउलं असनं पाणं खाइमं साइमं अस्साएमाणा विस्साएमाणा परिभाएमाणा परिभुंजेमाणा पक्खियं पोसहं पडिजागरमाणा विहरह। तए णं से पोक्खली समणोवासए संखस्स समणोवासगस्स अंतियाओ पोसहसालाओ पडिनिक्खमइ, पडिनिक्ख-मित्ता सावत्थिं नगरिं मज्झंमज्झेणं जेणेव ते समणोवासगा तेणेव उवागच्छइ, उवागच्छित्ता ते समणोवासए एवं वयासी–एवं खलु देवानुप्पिया! संखे समणोवासए पोसहसालाए पोसहिए जाव विहरइ, तं छंदेणं देवानुप्पिया! तुब्भे विउलं असनं पाणं खाइमं साइमं अस्साएमाणा विस्साएमाणा परिभाएमाणा परिभुंजेमाणा पक्खियं पोसहं पडिजागरमाणा विहरह, संखे णं समणोवासए नो हव्वमागच्छइ। तए णं ते समणोवासगा तं विउलं असनं पाणं खाइमं साइमं अस्साएमाणा जाव विहरंति। तए णं तस्स संखस्स समणोवासगस्स पुव्वरत्तावरत्तकालसमयंसि धम्मजागरियं जागरमाणस्स अयमेयारूवे अज्झ-त्थिए चिंतिए पत्थिए मनोगए संकप्पे समुप्पज्जित्था–सेयं खलु मे कल्लं पाउप्पभायाए रयणीए जाव उट्ठियम्मि सूरे सहस्सरस्सिम्मि दिनयरे तेयसा जलंते समणं भगवं महावीरं वंदित्ता नमंसित्ता जाव पज्जुवासित्ता तओ पडिनियत्तस्स पक्खियं पोसहं पारित्तए त्ति कट्टु एवं संपेहेइ, संपेहेत्ता कल्लं पाउप्पभायाए रयणीए जाव उट्ठियम्मि सूरे सहस्सरस्सिम्मि दिनयरे तेयसा जलंते पोसहसा-लाओ पडिनिक्खमइ, पडिनिक्खमित्ता सुद्धप्पावेसाइं मंगल्लाइं वत्थाइं पवर परिहिए साओ गिहाओ पडिनिक्खमइ, पडिनिक्ख-मित्ता पायविहारचारेणं सावत्थिं नगरिं मज्झंमज्झेणं निग्गच्छइ, निग्गच्छित्ता जेणेव कोट्ठए चेइए, जेणेव समणे भगवं महावीरे, तेणेव उवागच्छइ, उवागच्छित्ता तिक्खुत्तो आयाहिण-पयाहिणं करेइ, करेत्ता वंदइ नमंसइ, वंदित्ता नमंसित्ता तिविहाए पज्जुवास-णाए पज्जुवासति। तए णं ते समणोवासगा कल्लं पाउप्पभायाए रयणीए जाव उट्ठियम्मि सूरे सहस्सरस्सिम्मि दिनयरे तेयसा जलंते ण्हाया कयवलिकम्मा जाव अप्पमहग्घाभरणालंकियसरीरा सएहिं-सएहिं गिहे-हिंतो पडिनिक्खमंति, पडिनिक्खमित्ता एगयओ मेलायंति, मेलायित्ता पायविहारचारेणं सावत्थीए नगरीए मज्झंमज्झेणं निग्गच्छंति, निग्गच्छित्ता जेणेव कोट्ठए चेइए, जेणेव समणे भगवं महावीरे, तेणेव उवागच्छंति, उवागच्छित्ता समणं भगवं महावीरं जाव तिविहाए पज्जुवासणाए पज्जुवासंति। तए णं समणे भगवं महावीरे तेसिं समणोवासगाणं तीसे य महतिमहालियाए परिसाए धम्मं परिकहेइ जाव आणाए आराहए भवइ। तए णं ते समणोवासगा समणस्स भगवओ महावीरस्स अंतियं धम्मं सोच्चा निसम्म हट्ठतुट्ठा उट्ठाए उट्ठेंति, उट्ठेत्ता समणं भगवं महावीरं वंदंति नमंसंति, वंदित्ता नमंसित्ता जेणेव संखे समणोवासए, तेणेव उवागच्छंति, उवागच्छित्ता संखं समणो-वासयं एवं वयासी–तुमं णं देवानुप्पिया! हिज्जो अम्हे अप्पणा चेव एवं वयासी–तुम्हे णं देवानुप्पिया! विउलं असनं पाणं खाइमं साइमं उवक्खडावेह। तए णं अम्हे तं विपुलं असनं पाणं खाइमं साइमं अस्साएमाणा विस्साएमाणा परिभाएमाणा परिभुंजेमाणा पक्खियं पोसहं पडिजागरमाणा विहरिस्सामो। तए णं तुमं पोसहसालाए पोसहिए बंभचारी ओमुक्कमणिसुवण्णे ववगयमाला-वण्णग-विलेवने निक्खत्तसत्थ-मुसले एगे अबिइए दब्भसंथारोवगए पक्खियं पोसहं पडिजागरमाणे विहरिए, तं सुट्ठु णं तुमं देवा-णुप्पिया! अम्हे हीलसि। अज्जोति! समणे भगवं महावीरे ते समणोवासए एवं वयासी–मा णं अज्जो! तुब्भे संखं समणोवासगं हीलह निंदह खिंसह गरहह अवमण्णह। संखे णं समणोवासए पियधम्मे चेव, दढधम्मे चेव, सुदक्खुजागरियं जागरिए।
Sutra Meaning : જુઓ સૂત્ર ૫૩૦
Mool Sutra Transliteration : [sutra] tae nam se samkhe samanovasae te samanovasae evam vayasi–tubbhe nam devanuppiya! Vipulam asanam panam khaimam saimam uvakkhadaveha. Tae nam amhe tam vipulam asanam panam khaimam saimam assaemana vissaemana paribhaemana paribhumjemana pakkhiyam posaham padijagaramana viharissamo. Tae nam te samanovasaga samkhassa samanovasagassa eyamattham vinaenam padisunemti. Tae nam tassa samkhassa samanovasagassa ayameyaruve ajjhatthie chimtie patthie manogae samkappe samuppajjittha–no khalu me seyam tam vipulam asanam panam khaimam saimam assaemanassa vissaemanassa paribhaemanassa paribhumjemanassa pakkhiyam posaham padijagaramanassa viharittae, seyam khalu me posahasalae posahiyassa bambhacharissa omukkamani-suvannassa vavagayamala-vannaga-vilevanassa nikkhittasatthamusalassa egassa abiiyassa dabbhasamtharovagayassa pakkhiyam posaham padijagaramanassa viharittae tti kattu evam sampehei, sampehetta jeneva savatthi nagari, jeneva sae gihe, jeneva uppala samanovasiya, teneva uvagachchhai, uvagachchhitta uppalam samanovasiyam apuchchhai, apuchchhitta jeneva posahasala teneva uvagachchhai, uvagachchhitta posahasalam anupavissai, anupa-vissitta posahasalam pamajjai, pamajjitta uchcharapasavanabhumim padilehei, padilehetta dabbhasatharagam samtharai, samtharitta dabbhasamtharagam duruhai, duruhitta posahasalae posahie bambhachari omukkamani-suvanne vavagayamala-vannagavilevane nikkhittasattha-musale ege abiie dabbhasatharovagae pakkhiyam posaham padijagaramane viharai. Tae nam te samanovasaga jeneva savatthi nagari jeneva saim-saim gihaim, teneva uvagachchhamti, uvagachchhitta vipulam asanam panam khaimam saimam uvakkhadavemti, uvakkhadavetta annamannam saddavemti, saddavetta evam vayasi–evam khalu devanuppiya! Amhehim se viule asana-pana-khaima-saime uvakkhadavie, samkhe ya nam samanovasae no havvamagachchhai, tam seyam khalu devanuppiya! Amham samkham samanovasagam saddavettae. Tae nam se pokkhali samanovasae te samanovasae evam vayasi–achchhaha nam tubbhe devanuppiya! Sunivvuya-visattha, ahannam samkham samanovasagam saddavemi tti kattu tesim samanovasaganam amtiyao padinikkhamai, padinikkhamitta savatthie nagarie majjhammajjhenam jeneva samkhassa samanovasagassa gihe, teneva uvagachchhai, uvagachchhitta samkhassa samanovasagassa giham anupavitthe. Tae nam sa uppala samanovasiya pokkhalim samanovasayam ejjamanam pasai, pasitta hatthatuttha asanao abbhutthei, abbhutthetta sattattha payaim anugachchhai, anugachchhitta pokkhalim samanovasagam vamdamti namamsati, vamditta namamsitta asanenam uvanimamtei, uvanimamtetta evam vayasi– samdisattu nam devanuppiya! Kimagamanappayoyanam? Tae nam se pokkhali samanovasae uppalam samanovasiyam evam vayasi–kahinnam devanuppiya! Samkhe samanovasae? Tae nam sa uppala samanovasiya pokkhalim samanovasayam evam vayasi–evam khalu devanuppiya! Samkhe samanovasae posahasalae posahie bambhachari omukkamani-suvanne vavagayamala-vannaga-vilevane nikkhattasattha-musale ege abiie dabbhasamtharovagae pakkhiyam posaham padijagaramane viharai. Tae nam se pokkhali samanovasae jeneva posahasala, jeneva samkhe samanovasae, teneva uvagachchhai, uvagachchhitta gamanagamanae padikkamai, padikkamitta samkham samanovasagam vamdai namamsai, vamditta namamsitta evam vayasi–evam khalu devanuppiya! Amhehim se viule asana-pana-khaima-saime uvakkhadavie, tam gachchhamo nam devanuppiya! Tam viulam asanam panam khaimam saimam assaemana vissaemana paribhaemana paribhumjemana pakkhiyam posaham padijagaramana viharamo. Tae nam se samkhe samanovasae pokkhalim samanovasagam evam vayasi–no khalu kappai devanuppiya! Tam viulam asanam panam khaimam saimam assaemanasasa vissaemanassa paribhaemanassa paribhumjemanassa pakkhiyam posaham padijagaramanassa viharittae, kappai me posahasalae posahiyassa bambhacharissa omukkamani-suvannassa vavagayamala-vannaga-vilevanassa nikkhattasattha-musalassa egassa abiiyassa dabbhasamtharovagayassa pakkhiyam posaham padijagaramanassa viharittae, tam chhamdenam devanuppiya! Tubbhe tam viulam asanam panam khaimam saimam assaemana vissaemana paribhaemana paribhumjemana pakkhiyam posaham padijagaramana viharaha. Tae nam se pokkhali samanovasae samkhassa samanovasagassa amtiyao posahasalao padinikkhamai, padinikkha-mitta savatthim nagarim majjhammajjhenam jeneva te samanovasaga teneva uvagachchhai, uvagachchhitta te samanovasae evam vayasi–evam khalu devanuppiya! Samkhe samanovasae posahasalae posahie java viharai, tam chhamdenam devanuppiya! Tubbhe viulam asanam panam khaimam saimam assaemana vissaemana paribhaemana paribhumjemana pakkhiyam posaham padijagaramana viharaha, samkhe nam samanovasae no havvamagachchhai. Tae nam te samanovasaga tam viulam asanam panam khaimam saimam assaemana java viharamti. Tae nam tassa samkhassa samanovasagassa puvvarattavarattakalasamayamsi dhammajagariyam jagaramanassa ayameyaruve ajjha-tthie chimtie patthie manogae samkappe samuppajjittha–seyam khalu me kallam pauppabhayae rayanie java utthiyammi sure sahassarassimmi dinayare teyasa jalamte samanam bhagavam mahaviram vamditta namamsitta java pajjuvasitta tao padiniyattassa pakkhiyam posaham parittae tti kattu evam sampehei, sampehetta kallam pauppabhayae rayanie java utthiyammi sure sahassarassimmi dinayare teyasa jalamte posahasa-lao padinikkhamai, padinikkhamitta suddhappavesaim mamgallaim vatthaim pavara parihie sao gihao padinikkhamai, padinikkha-mitta payaviharacharenam savatthim nagarim majjhammajjhenam niggachchhai, niggachchhitta jeneva kotthae cheie, jeneva samane bhagavam mahavire, teneva uvagachchhai, uvagachchhitta tikkhutto ayahina-payahinam karei, karetta vamdai namamsai, vamditta namamsitta tivihae pajjuvasa-nae pajjuvasati. Tae nam te samanovasaga kallam pauppabhayae rayanie java utthiyammi sure sahassarassimmi dinayare teyasa jalamte nhaya kayavalikamma java appamahagghabharanalamkiyasarira saehim-saehim gihe-himto padinikkhamamti, padinikkhamitta egayao melayamti, melayitta payaviharacharenam savatthie nagarie majjhammajjhenam niggachchhamti, niggachchhitta jeneva kotthae cheie, jeneva samane bhagavam mahavire, teneva uvagachchhamti, uvagachchhitta samanam bhagavam mahaviram java tivihae pajjuvasanae pajjuvasamti. Tae nam samane bhagavam mahavire tesim samanovasaganam tise ya mahatimahaliyae parisae dhammam parikahei java anae arahae bhavai. Tae nam te samanovasaga samanassa bhagavao mahavirassa amtiyam dhammam sochcha nisamma hatthatuttha utthae utthemti, utthetta samanam bhagavam mahaviram vamdamti namamsamti, vamditta namamsitta jeneva samkhe samanovasae, teneva uvagachchhamti, uvagachchhitta samkham samano-vasayam evam vayasi–tumam nam devanuppiya! Hijjo amhe appana cheva evam vayasi–tumhe nam devanuppiya! Viulam asanam panam khaimam saimam uvakkhadaveha. Tae nam amhe tam vipulam asanam panam khaimam saimam assaemana vissaemana paribhaemana paribhumjemana pakkhiyam posaham padijagaramana viharissamo. Tae nam tumam posahasalae posahie bambhachari omukkamanisuvanne vavagayamala-vannaga-vilevane nikkhattasattha-musale ege abiie dabbhasamtharovagae pakkhiyam posaham padijagaramane viharie, tam sutthu nam tumam deva-nuppiya! Amhe hilasi. Ajjoti! Samane bhagavam mahavire te samanovasae evam vayasi–ma nam ajjo! Tubbhe samkham samanovasagam hilaha nimdaha khimsaha garahaha avamannaha. Samkhe nam samanovasae piyadhamme cheva, dadhadhamme cheva, sudakkhujagariyam jagarie.
Sutra Meaning Transliteration : Juo sutra 530