Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1103998
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-११

 Translated Chapter :

શતક-૧૧
Section : उद्देशक-१ उत्पल Translated Section : ઉદ્દેશક-૧ ઉત્પલ
Sutra Number : 498 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तेणं कालेणं तेणं समएणं रायगिहे जाव पज्जुवासमाणे एवं वयासी–उप्पले णं भंते! एगपत्तए किं एगजीवे? अनेगजीवे? गोयमा! एगजीवे, नो अनेगजीवे। तेण परं जे अन्ने जीवा उववज्जंति ते णं नो एगजीवा अनेगजीवा। ते णं भंते! जीवा कतोहिंतो उववज्जंति–किं नेरइएहिंतो उववज्जंति? तिरिक्खजोणिएहिंतो उववज्जंति? मनुस्सेहिंतो उववज्जंति? देवेहिंतो उववज्जंति? गोयमा! नो नेरइएहिंतो उववज्जंति, तिरिक्खजोणिएहिंतो उववज्जंति, मनुस्सेहिंतो उववज्जंति देवेहिंतो वि उववज्जंति। एवं उववाओ भाणियव्वो जहा वक्कंतीए वणस्सइकाइयाणं जाव ईसानेति। ते णं भंते! जीवा एगसमए णं केवइया उववज्जंति? गोयमा! जहन्नेणं एक्को वा दो वा तिन्नि वा, उक्कोसेणं संखेज्जा वा असंखेज्जा वा उववज्जंति। ते णं भंते! जीवा समए-समए अवहीरमाणा-अवहीरमाणा केवतिकालेणं अवहीरंति? गोयमा! ते णं असंखेज्जा समए-समए अवहीरमाणा-अवहीरमाणा असंखेज्जाहिं ओसप्पिणि-उस्सप्पिणीहिं अवहीरंति, नो चेव णं अवहिया सिया। तेसि णं भंते! जीवाणं केमहालिया सरीरोगाहणा पन्नत्ता? गोयमा! जहन्नेणं अंगुलस्स असंखेज्जइभागं, उक्कोसेणं सातिरेगं जोयणसहस्सं। ते णं भंते! जीवा नाणावरणिज्जस्स कम्मस्स किं बंधगा? अबंधगा? गोयमा! नो अबंधगा, बंधए वा, बंधगा वा। एवं जाव अंतराइयस्स, नवरं–आउयस्स–पुच्छा। गोयमा! १. बंधए वा २. अबंधए वा ३. बंधगा वा ४. अबंधगा वा ५. अहवा बंधए य अबंधए य ६. अहवा बंधए य अबंधगा य ७. अहवा बंधगा य अबंधए य ८. अहवा बंधगा य अबंधगा य–एते अट्ठ भंगा। ते णं भंते! जीवा नाणावरणिज्जस्स कम्मस्स किं वेदगा? अवेदगा? गोयमा! नो अवेदगा, वेदए वा, वेदगा वा। एवं जाव अंतराइयस्स। ते णं भंते! जीवा किं सायावेदगा? असायावेदगा? गोयमा! सायावेदए वा, असायावेदए वा–अट्ठ भंगा। ते णं भंते! जीवा नाणावरणिज्जस्स कम्मस्स किं उदई? अणुदई? गोयमा! नो अनुदई, उदई वा, उदइणो वा। एवं जाव अंतराइयस्स। ते णं भंते! जीवा नाणावरणिज्जस्स कम्मस्स किं उदीरगा? अनुदीरगा? गोयमा! नो अनुदीरगा, उदीरए वा, उदीरगा वा। एवं जाव अंतराइयस्स, नवरं–वेदणिज्जाउएसु अट्ठ भंगा। ते णं भंते! जीवा किं कण्हलेसा? नीललेसा? काउलेसा? तेउलेसा? गोयमा! कण्हलेसे वा नीललेसे वा काउलेसे वा तेउलेसे वा, कण्हलेस्सा वा नीललेस्सा वा काउलेस्सा वा तेउलेस्सा वा, अहवा कण्हलेसे य नीललेसे य। एवं एए दुयासंजोग-तियासंजोग-चउक्कसंजोगेणं असीति भंगा भवंति। ते णं भंते! जीवा किं सम्मदिट्ठी? मिच्छादिट्ठी? सम्मामिच्छादिट्ठी? गोयमा! नो सम्मद्दिट्ठी, नो सम्मामिच्छादिट्ठी, मिच्छादिट्ठी वा मिच्छादिट्ठिणो वा। ते णं भंते! जीवा किं नाणी? अन्नाणी? गोयमा! नो नाणी, अन्नाणी वा, अन्नाणिणो वा। ते णं भंते! जीवा किं मणजोगी? वइजोगी? कायजोगी? गोयमा! नो मणजोगी, नो वइजोगी, कायजोगी वा, कायजोगिणो वा। ते णं भंते! जीवा किं सागरोवउत्ता? अनागारोवउत्ता? गोयमा! सागारोवउत्ते वा, अनागारोवउत्ते वा–अट्ठ भंगा। तेसि णं भंते! जीवाणं सरीरगा कतिवण्णा, कतिगंधा, कतिरसा, कतिफासा, पन्नत्ता? गोयमा! पंचवण्णा, पंचरसा, दुगंधा, अट्ठफासा पन्नत्ता। ते पुण अप्पणा अवण्णा, अगंधा, अरसा, अफासा पन्नत्ता। ते णं भंते! जीवा किं उस्सासगा? निस्सासगा? नोउस्सासनिस्सासगा? गोयमा! १. उस्सासए वा २. निस्सासए वा ३. नोउस्सासनिस्सासए वा ४. उस्सासगा वा ५. निस्सासगा वा ६. नोउस्सास-निस्सासगा वा १-४ अहवा उस्सासए य निस्सासए य १-४ अहवा उस्सासए य नो उस्सासनिस्सासए य १-४ अहवा निस्सासए य नोउस्सासनिस्सासए य १-८ अहवा उस्सासए य निस्सासए य नोउस्सासनिस्सासए य–अट्ठ भंगा। एते छव्वीसं भंगा भवंति। ते णं भंते! जीवा किं आहारगा? अनाहारगा? गोयमा! आहारए वा, अनाहारए वा–अट्ठ भंगा। ते णं भंते! जीवा किं विरया? अविरया? विरयाविरया? गोयमा! नो विरया, नो विरयाविरया, अविरए वा अविरया वा। ते णं भंते! जीवा किं सकिरिया? अकिरिया? गोयमा! नो अकिरिया, सकिरिए वा, सकिरिया वा। ते णं भंते! जीवा किं सत्तविहबंधगा? अट्ठविहबंधगा? गोयमा! सत्तविहबंधए वा, अट्ठविहबंधए वा–अट्ठ भंगा। ते णं भंते! जीवा किं आहारसण्णोवउत्ता? भयसण्णोवउत्ता? मेहुणसण्णोवउत्ता? परिग्गह-सण्णोवउत्ता? गोयमा! आहारसण्णोवउत्ता–असीती भंगा। ते णं भंते! जीवा किं कोहकसाई? माणकसाई? मायाकसाई? लोभकसाई? असीती भंगा। ते णं भंते! जीवा किं इत्थिवेदगा? पुरिसवेदगा? नपुंसगवेदगा? गोयमा! नो इत्थिवेदगा, नो पुरिसवेदगा, नपुंसगवेदए वा, नपुंसगवेदगा वा। ते णं भंते! जीवा किं इत्थिवेदबंधगा? पुरिसवेदबंधगा? नपुंसगवेदबंधगा? गोयमा! इत्थिवेदबंधए वा, पुरिसवेदबंधए वा, नपुंसगवेदबंधए वा–छव्वीसं भंगा। ते णं भंते! जीवा किं सण्णी? असण्णी? गोयमा! नो सण्णी, असण्णी वा असण्णिणो वा। से णं भंते! जीवा किं सइंदिया? अनिंदिया? गोयमा! नो अनिंदिया, सइंदिए वा, सइंदिया वा। से णं भंते! उप्पलजीवेत्ति कालओ केवच्चिरं होइ? गोयमा! जहन्नेणं अंतोमुहुत्तं, उक्कोसेणं असंखेज्जं कालं। से णं भंते! उप्पलजीवे पुढविजीवे, पुनरवि उप्पलजीवेत्ति केवतियं कालं सेवेज्जा? केवतियं कालं गतिरागति करेज्जा? गोयमा! भवादेसेणं जहन्नेणं दो भवग्गहणाइं, उक्कोसेणं असंखेज्जाइं भवग्गहणाइं। कालादेसेणं जहन्नेणं दो अंतोमुहुत्ता, उक्कोसेणं असंखेज्जं कालं, एवतियं कालं सेवेज्जा, एवतियं कालं गतिरागतिं करेज्जा। से णं भंते! उप्पलजीवे, आउजीवे, पुनरवि उप्पलजीवेत्ति केवतियं कालं सेवेज्जा? केवतियं कालं गतिरागतिं करेज्जा! एवं चेव। एवं जहा पुढविजीवे भणिए तहा जाव वाउजीवे भाणियव्वे। से णं भंते! उप्पलजीवे सेसवणस्सइजीवे, से पुनरवि उप्पलजीवेत्ति केवतियं कालं संखेज्जा? केवतियं कालं गतिरागतिं करेज्जा? गोयमा! भवादेसेणं जहन्नेणं दो भवग्गहणाइं, उक्कोसेणं अनंताइं भवग्गहणाइं, कालादेसेणं जहन्नेणं दो अंतोमुहुत्ता, उक्को सेनं अनंतं कालं तरुकालं, एवतियं कालं सेवेज्जा, एवतियं कालं गतिरागतिं करेज्जा। से णं भंते! उप्पलजीवे बेइंदियजीवे, पुनरवि उप्पलजीवेत्ति केवतियं कालं सेवेज्जा? केवतियं कालं गतिरागतिं करेज्जा? गोयमा! भवादेसेणं जहन्नेणं दो भवग्गहणाइं, उक्कोसेणं संखेज्जाइं भवग्गहणाइं, कालादेसेणं जहन्नेणं दो अंतोमुहुत्ता, उक्कोसेणं संखेज्जं कालं, एवतियं कालं सेवेज्जा, एवतियं कालं गतिरागतिं करेज्जा। एवं तेइंदियजीवे, एवं चउरिंदियजीवे वि। से णं भंते! उप्पलजीवे पंचिंदियतिरिक्खजोणियजीवे, पुनरवि उप्पलजीवेत्ति–पुच्छा। गोयमा! भवादेसेणं जहन्नेणं दो भवग्गहणाइं, उक्कोसेणं अट्ठ भवग्गहणाइं, कालादेसेणं जहन्नेणं दो अंतोमुहुत्ता, उक्कोसेणं पुव्वकोडिपुहत्तं, एवतियं कालं सेवेज्जा, एवतियं कालं गतिरागतिं करेज्जा। एवं मनुस्सेण वि समं जाव एवतियं कालं गतिरागतिं करेज्जा। ते णं भंते! जीवा किमाहारमाहारेंति? गोयमा! दव्वओ अनंतपदेसियाइं दव्वाइं, खेत्तओ असंखेज्जपदेसोगाढाइं, कालओ अन्नयर काल- ट्ठिइयाइं, भावओ वण्णमंताइं गंधमंताइं रसमंताइं फासमंताइं एवं जहा आहारुद्देसए वणस्सइ-काइयाणं आहारो तहेव जाव सव्वप्पणयाए आहारमाहारेति, नवरं–नियमा छद्दिसिं, सेसं तं चेव। तेसि णं भंते! जीवाणं केवतियं कालं ठिई पन्नत्ता? गोयमा! जहन्नेणं अंतोमुहुत्तं, उक्कोसेणं दस वाससहस्साइं। तेसि णं भंते! जीवाणं कति समुग्घाया पन्नत्ता? गोयमा! तओ समुग्घाया पन्नत्ता, तं० वेदनासमुग्घाए, कसायसमुग्घाए, मारणंतियसमुग्घाए। ते णं भंते! जीवा मारणंतियसमुग्घाएणं किं समोहता मरंति? असमोहता मरंति? गोयमा! समोहता वि मरंति, असमोहता वि मरंति। ते णं भंते! जीवा अनंतरं उव्वट्टित्ता कहिं गच्छंति? कहिं उववज्जंति–किं नेरइएसु उववज्जंति? तिरिक्खजोणिएसु उववज्जंति? एवं जहा वक्कंतीए उव्वट्टाणाए वणस्सइकाइयाणं तहा भाणियव्वं। अह भंते! सव्वपाणा, सव्वभूता, सव्वजीवा, सव्वसत्ता उप्पलमूलत्ताए, उप्पलकंदत्ताए, उप्पल-नालत्ताए, उप्पलपत्तत्ताए, उप्पलकेसरत्ताए, उप्पलकण्णियत्ताए, उप्पलथिभगत्ताए उववन्नपुव्वा? हंता गोयमा! असतिं अदुवा अनंतखुत्तो। सेवं भंते! सेवं भंते! त्ति।
Sutra Meaning : જુઓ સૂત્ર ૪૯૫
Mool Sutra Transliteration : [sutra] tenam kalenam tenam samaenam rayagihe java pajjuvasamane evam vayasi–uppale nam bhamte! Egapattae kim egajive? Anegajive? Goyama! Egajive, no anegajive. Tena param je anne jiva uvavajjamti te nam no egajiva anegajiva. Te nam bhamte! Jiva katohimto uvavajjamti–kim neraiehimto uvavajjamti? Tirikkhajoniehimto uvavajjamti? Manussehimto uvavajjamti? Devehimto uvavajjamti? Goyama! No neraiehimto uvavajjamti, tirikkhajoniehimto uvavajjamti, manussehimto uvavajjamti devehimto vi uvavajjamti. Evam uvavao bhaniyavvo jaha vakkamtie vanassaikaiyanam java isaneti. Te nam bhamte! Jiva egasamae nam kevaiya uvavajjamti? Goyama! Jahannenam ekko va do va tinni va, ukkosenam samkhejja va asamkhejja va uvavajjamti. Te nam bhamte! Jiva samae-samae avahiramana-avahiramana kevatikalenam avahiramti? Goyama! Te nam asamkhejja samae-samae avahiramana-avahiramana asamkhejjahim osappini-ussappinihim avahiramti, no cheva nam avahiya siya. Tesi nam bhamte! Jivanam kemahaliya sarirogahana pannatta? Goyama! Jahannenam amgulassa asamkhejjaibhagam, ukkosenam satiregam joyanasahassam. Te nam bhamte! Jiva nanavaranijjassa kammassa kim bamdhaga? Abamdhaga? Goyama! No abamdhaga, bamdhae va, bamdhaga va. Evam java amtaraiyassa, navaram–auyassa–puchchha. Goyama! 1. Bamdhae va 2. Abamdhae va 3. Bamdhaga va 4. Abamdhaga va 5. Ahava bamdhae ya abamdhae ya 6. Ahava bamdhae ya abamdhaga ya 7. Ahava bamdhaga ya abamdhae ya 8. Ahava bamdhaga ya abamdhaga ya–ete attha bhamga. Te nam bhamte! Jiva nanavaranijjassa kammassa kim vedaga? Avedaga? Goyama! No avedaga, vedae va, vedaga va. Evam java amtaraiyassa. Te nam bhamte! Jiva kim sayavedaga? Asayavedaga? Goyama! Sayavedae va, asayavedae va–attha bhamga. Te nam bhamte! Jiva nanavaranijjassa kammassa kim udai? Anudai? Goyama! No anudai, udai va, udaino va. Evam java amtaraiyassa. Te nam bhamte! Jiva nanavaranijjassa kammassa kim udiraga? Anudiraga? Goyama! No anudiraga, udirae va, udiraga va. Evam java amtaraiyassa, navaram–vedanijjauesu attha bhamga. Te nam bhamte! Jiva kim kanhalesa? Nilalesa? Kaulesa? Teulesa? Goyama! Kanhalese va nilalese va kaulese va teulese va, kanhalessa va nilalessa va kaulessa va teulessa va, ahava kanhalese ya nilalese ya. Evam ee duyasamjoga-tiyasamjoga-chaukkasamjogenam asiti bhamga bhavamti. Te nam bhamte! Jiva kim sammaditthi? Michchhaditthi? Sammamichchhaditthi? Goyama! No sammadditthi, no sammamichchhaditthi, michchhaditthi va michchhaditthino va. Te nam bhamte! Jiva kim nani? Annani? Goyama! No nani, annani va, annanino va. Te nam bhamte! Jiva kim manajogi? Vaijogi? Kayajogi? Goyama! No manajogi, no vaijogi, kayajogi va, kayajogino va. Te nam bhamte! Jiva kim sagarovautta? Anagarovautta? Goyama! Sagarovautte va, anagarovautte va–attha bhamga. Tesi nam bhamte! Jivanam sariraga kativanna, katigamdha, katirasa, katiphasa, pannatta? Goyama! Pamchavanna, pamcharasa, dugamdha, atthaphasa pannatta. Te puna appana avanna, agamdha, arasa, aphasa pannatta. Te nam bhamte! Jiva kim ussasaga? Nissasaga? Noussasanissasaga? Goyama! 1. Ussasae va 2. Nissasae va 3. Noussasanissasae va 4. Ussasaga va 5. Nissasaga va 6. Noussasa-nissasaga va 1-4 ahava ussasae ya nissasae ya 1-4 ahava ussasae ya no ussasanissasae ya 1-4 ahava nissasae ya noussasanissasae ya 1-8 ahava ussasae ya nissasae ya noussasanissasae ya–attha bhamga. Ete chhavvisam bhamga bhavamti. Te nam bhamte! Jiva kim aharaga? Anaharaga? Goyama! Aharae va, anaharae va–attha bhamga. Te nam bhamte! Jiva kim viraya? Aviraya? Virayaviraya? Goyama! No viraya, no virayaviraya, avirae va aviraya va. Te nam bhamte! Jiva kim sakiriya? Akiriya? Goyama! No akiriya, sakirie va, sakiriya va. Te nam bhamte! Jiva kim sattavihabamdhaga? Atthavihabamdhaga? Goyama! Sattavihabamdhae va, atthavihabamdhae va–attha bhamga. Te nam bhamte! Jiva kim aharasannovautta? Bhayasannovautta? Mehunasannovautta? Pariggaha-sannovautta? Goyama! Aharasannovautta–asiti bhamga. Te nam bhamte! Jiva kim kohakasai? Manakasai? Mayakasai? Lobhakasai? Asiti bhamga. Te nam bhamte! Jiva kim itthivedaga? Purisavedaga? Napumsagavedaga? Goyama! No itthivedaga, no purisavedaga, napumsagavedae va, napumsagavedaga va. Te nam bhamte! Jiva kim itthivedabamdhaga? Purisavedabamdhaga? Napumsagavedabamdhaga? Goyama! Itthivedabamdhae va, purisavedabamdhae va, napumsagavedabamdhae va–chhavvisam bhamga. Te nam bhamte! Jiva kim sanni? Asanni? Goyama! No sanni, asanni va asannino va. Se nam bhamte! Jiva kim saimdiya? Animdiya? Goyama! No animdiya, saimdie va, saimdiya va. Se nam bhamte! Uppalajivetti kalao kevachchiram hoi? Goyama! Jahannenam amtomuhuttam, ukkosenam asamkhejjam kalam. Se nam bhamte! Uppalajive pudhavijive, punaravi uppalajivetti kevatiyam kalam sevejja? Kevatiyam kalam gatiragati karejja? Goyama! Bhavadesenam jahannenam do bhavaggahanaim, ukkosenam asamkhejjaim bhavaggahanaim. Kaladesenam jahannenam do amtomuhutta, ukkosenam asamkhejjam kalam, evatiyam kalam sevejja, evatiyam kalam gatiragatim karejja. Se nam bhamte! Uppalajive, aujive, punaravi uppalajivetti kevatiyam kalam sevejja? Kevatiyam kalam gatiragatim karejja! Evam cheva. Evam jaha pudhavijive bhanie taha java vaujive bhaniyavve. Se nam bhamte! Uppalajive sesavanassaijive, se punaravi uppalajivetti kevatiyam kalam samkhejja? Kevatiyam kalam gatiragatim karejja? Goyama! Bhavadesenam jahannenam do bhavaggahanaim, ukkosenam anamtaim bhavaggahanaim, kaladesenam jahannenam do amtomuhutta, ukko senam anamtam kalam tarukalam, evatiyam kalam sevejja, evatiyam kalam gatiragatim karejja. Se nam bhamte! Uppalajive beimdiyajive, punaravi uppalajivetti kevatiyam kalam sevejja? Kevatiyam kalam gatiragatim karejja? Goyama! Bhavadesenam jahannenam do bhavaggahanaim, ukkosenam samkhejjaim bhavaggahanaim, kaladesenam jahannenam do amtomuhutta, ukkosenam samkhejjam kalam, evatiyam kalam sevejja, evatiyam kalam gatiragatim karejja. Evam teimdiyajive, evam chaurimdiyajive vi. Se nam bhamte! Uppalajive pamchimdiyatirikkhajoniyajive, punaravi uppalajivetti–puchchha. Goyama! Bhavadesenam jahannenam do bhavaggahanaim, ukkosenam attha bhavaggahanaim, kaladesenam jahannenam do amtomuhutta, ukkosenam puvvakodipuhattam, evatiyam kalam sevejja, evatiyam kalam gatiragatim karejja. Evam manussena vi samam java evatiyam kalam gatiragatim karejja. Te nam bhamte! Jiva kimaharamaharemti? Goyama! Davvao anamtapadesiyaim davvaim, khettao asamkhejjapadesogadhaim, kalao annayara kala- tthiiyaim, bhavao vannamamtaim gamdhamamtaim rasamamtaim phasamamtaim evam jaha aharuddesae vanassai-kaiyanam aharo taheva java savvappanayae aharamahareti, navaram–niyama chhaddisim, sesam tam cheva. Tesi nam bhamte! Jivanam kevatiyam kalam thii pannatta? Goyama! Jahannenam amtomuhuttam, ukkosenam dasa vasasahassaim. Tesi nam bhamte! Jivanam kati samugghaya pannatta? Goyama! Tao samugghaya pannatta, tam0 vedanasamugghae, kasayasamugghae, maranamtiyasamugghae. Te nam bhamte! Jiva maranamtiyasamugghaenam kim samohata maramti? Asamohata maramti? Goyama! Samohata vi maramti, asamohata vi maramti. Te nam bhamte! Jiva anamtaram uvvattitta kahim gachchhamti? Kahim uvavajjamti–kim neraiesu uvavajjamti? Tirikkhajoniesu uvavajjamti? Evam jaha vakkamtie uvvattanae vanassaikaiyanam taha bhaniyavvam. Aha bhamte! Savvapana, savvabhuta, savvajiva, savvasatta uppalamulattae, uppalakamdattae, uppala-nalattae, uppalapattattae, uppalakesarattae, uppalakanniyattae, uppalathibhagattae uvavannapuvva? Hamta goyama! Asatim aduva anamtakhutto. Sevam bhamte! Sevam bhamte! Tti.
Sutra Meaning Transliteration : Juo sutra 495