Sutra Navigation: Upasakdashang ( ઉપાસક દશાંગ સૂત્ર )

Search Details

Mool File Details

Anuvad File Details

Sr No : 1105138
Scripture Name( English ): Upasakdashang Translated Scripture Name : ઉપાસક દશાંગ સૂત્ર
Mool Language : Ardha-Magadhi Translated Language : Gujarati
Chapter :

अध्ययन-६ कुंडकोलिक

 Translated Chapter :

અધ્યયન-૬ કુંડકોલિક
Section : Translated Section :
Sutra Number : 38 Category : Ang-07
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से कुंडकोलिए समणोवासए अन्नदा कदाइ पच्चावरण्हकालसमयंसि जेणेव असोगवणिया, जेणेव पुढविसिलापट्टए, तेणेव उवागच्छइ, उवागच्छित्ता नाममुद्दगं च उत्तरिज्जगं च पुढविसिलापट्टए ठवेइ, ठवेत्ता समणस्स भगवओ महावीरस्स अंतियं धम्मपन्नत्ति उवसंपज्जित्ता णं विहरइ। तए णं तस्स कुंडकोलियस्स समणोवासयस्स एगे देवे अंतियं पाउब्भवित्था। तए णं से देवे नाममुद्दगं च उत्तरिज्जगं च पुढविसिलापट्टयाओ गेण्हइ, गेण्हित्ता अंतलिक्खपडिवण्णे सखिंखिणियाइं पंचवण्णाइं वत्थाइं पवर परिहिए कुंडकोलियं समणोवासयं एवं वयासी–हंभो! कुंडकोलिया! समणोवासया! सुंदरी णं देवानुप्पिया! गोसालस्स मंखलिपुत्तस्स धम्मपन्नत्ती–नत्थि उट्ठाणे इ वा कम्मे इ वा बले इ वा वीरिए इ वा पुरिसक्कार-परक्कमे इ वा नियता सव्वभावा, मंगुली णं समणस्स भगवओ महावीरस्स धम्मपन्नत्ती–अत्थि उट्ठाणे इ वा, कम्मे इ वा बले इ वा वीरिए इ वा पुरिसक्कार-परक्कमे इ वा अणियता सव्वभावा। तए णं से कुंडकोलिए समणोवासए तं देवं एवं वयासी–जइ णं देवानुप्पिया! सुंदरी णं गोसालस्स मंखलिपुत्तस्स धम्मपन्नत्ती–नत्थि उट्ठाणे इ वा कम्मे इ वा बले इ वा वीरिए इ वा पुरिसक्कार-परक्कमे इ वा नियता सव्वभावा, मंगुली णं सम-णस्स भगवओ महावीरस्स धम्म-पन्नत्ती–अत्थि उट्ठाणे इ वा कम्मे इ वा बले इ वा वीरिए इ वा पुरिसक्कार-परक्कमे इ वा अनियता सव्वभावा, तुमे णं देवानुप्पिया! इमा एयारूवा दिव्वा देविड्ढी दिव्वा देवज्जुई दिव्वे देवाणुभावे किण्णा लद्धे? किण्णा पत्ते? किण्णा अभिसमण्णागए? किं उट्ठाणेणं कम्मेणं बलेणं वीरिएणं पुरिसक्कार-परक्कमेणं? उदाहु अणुट्ठाणेणं अकम्मेणं अबलेणं अवीरिएणं अपुरिसक्कार-परक्कमेणं? तए णं से देवे कुंडकोलियं समणोवासयं एवं वयासी–एवं खलु देवानुप्पिया! मए इमा एयारूवा दिव्वा देविड्ढी दिव्वा देवज्जुई दिव्वे देवाणुभावे अणुट्ठाणेणं अकम्मेणं अबलेणं अवीरिएणं अपुरिसक्कारपरक्कमेणं लद्धे पत्ते अभिसमण्णागए। तए णं से कुंडकोलिए समणोवासए तं देवं एवं वयासी–जइ णं देवानुप्पिया! तुमे इमा एयारूवा दिव्वा देविड्ढी दिव्वा देवज्जुई दिव्वे देवाणुभावे अणुट्ठाणेणं अकम्मेणं अबलेणं अवीरिएणं० अपुरिसक्कारपरक्कमेणं लद्धे पत्ते अभिसमण्णागए, जेसि णं जीवाणं नत्थि उट्ठाणे इ वा कम्मे इ वा बले इ वा वीरिए इ वा पुरिसक्कार०-परक्कमे इ वा, ते किं न देवा? अह तुब्भे इमा एयारूवा दिव्वा देविड्ढी दिव्वा देवज्जुई दिव्वे देवाणुभावे उट्ठाणेणं कम्मेणं बलेणं वीरिएणं पुरिसक्कार-परक्कमेणं लद्धे पत्ते अभिसमण्णागए, तो जं वदसि सुंदरी णं गोसालस्स मंखलिपुत्तस्स धम्मपन्नत्ती–नत्थि उट्ठाणे इ वा कम्मे इ वा बले इ वा वीरिए इ वा पुरिसक्कार-परक्कमे इ वा नियता सव्वभावा, मंगुली णं समणस्स भगवओ महावीरस्स धम्मपन्नत्ती–अत्थि उट्ठाणे इ वा कम्मे इ वा बले इ वा वीरिए इ वा पुरिसक्कार-परक्कमे इ वा अनियत्ता सव्वभावा, तं ते मिच्छा। तए णं से देवे कुंडकोलिएणं समणोवासएणं एवं वुत्ते समाणे संकिए कंखिए वितिगिच्छा-समावण्णे कलुससमावण्णे नो संचाएइ कुंडकोलियस्स समणोवासयस्स किंचि पमोक्खमा-इक्खित्तए, नाममुद्दगं च उत्तरिज्जयं च पुढविसिलापट्टए ठवेइ, ठवेत्ता जामेव दिसं पाउब्भूए, तामेव दिसं पडिगए। तेणं कालेणं तेणं समएणं सामी समोसढे। तए णं से कुंडकोलिए समणोवासए इमीसे कहाए लद्धट्ठे समाणे–एवं खलु समणे भगवं महावीरे पुव्वाणुपुव्विं चरमाणे गामाणुगामं दूइज्जमाणे इहमागए इह संपत्ते इह समोसढे इहेव कंपिल्लपुरस्स नयरस्स बहिया सहस्संबवणे उज्जाणे अहा-पडिरूवं ओग्गहं ओगिण्हित्ता संजमेणं तवसा अप्पाणं भावेमाणे विहरइ। तं सेयं खलु मम समणं भगवं महावीरं वंदित्ता नमंसित्ता ततो पडिणियत्तस्स पोसहं पारेत्तए त्ति कट्टु एवं संपेहेइ, संपेहेत्ता पोसहसालाओ पडिनिक्खमइ, पडिनिक्खमित्ता सुद्धप्पावेसाइं मंगल्लाइं वत्थाइं पवर परिहिए मनुस्सवग्गुरापरिक्खित्ते सयाओ गिहाओ पडिनिक्खमइ, पडिनिक्खमित्ता कंपिल्लपुरं नयरं मज्झंमज्झेणं निग्गच्छइ, निग्गच्छित्ता जेणेव सहस्संबवणं उज्जाणे, जेणेव समणे भगवं महावीरे, तेणेव उवागच्छइ, उवागच्छित्ता तिक्खुत्तो आयाहिण-पयाहिणं करेइ, करेत्ता वंदइ नमंसइ, वंदित्ता नमंसित्ता तिविहाए पज्जुवासणाए पज्जुवासइ। तए णं समणे भगवं महावीरे कुंडकोलियस्स समणोवासयस्स तीसे य महइमहालियाए परिसाए जाव धम्मं परिकहेइ।
Sutra Meaning : જુઓ સૂત્ર ૩૭
Mool Sutra Transliteration : [sutra] tae nam se kumdakolie samanovasae annada kadai pachchavaranhakalasamayamsi jeneva asogavaniya, jeneva pudhavisilapattae, teneva uvagachchhai, uvagachchhitta namamuddagam cha uttarijjagam cha pudhavisilapattae thavei, thavetta samanassa bhagavao mahavirassa amtiyam dhammapannatti uvasampajjitta nam viharai. Tae nam tassa kumdakoliyassa samanovasayassa ege deve amtiyam paubbhavittha. Tae nam se deve namamuddagam cha uttarijjagam cha pudhavisilapattayao genhai, genhitta amtalikkhapadivanne sakhimkhiniyaim pamchavannaim vatthaim pavara parihie kumdakoliyam samanovasayam evam vayasi–hambho! Kumdakoliya! Samanovasaya! Sumdari nam devanuppiya! Gosalassa mamkhaliputtassa dhammapannatti–natthi utthane i va kamme i va bale i va virie i va purisakkara-parakkame i va niyata savvabhava, mamguli nam samanassa bhagavao mahavirassa dhammapannatti–atthi utthane i va, kamme i va bale i va virie i va purisakkara-parakkame i va aniyata savvabhava. Tae nam se kumdakolie samanovasae tam devam evam vayasi–jai nam devanuppiya! Sumdari nam gosalassa mamkhaliputtassa dhammapannatti–natthi utthane i va kamme i va bale i va virie i va purisakkara-parakkame i va niyata savvabhava, mamguli nam sama-nassa bhagavao mahavirassa dhamma-pannatti–atthi utthane i va kamme i va bale i va virie i va purisakkara-parakkame i va aniyata savvabhava, tume nam devanuppiya! Ima eyaruva divva deviddhi divva devajjui divve devanubhave kinna laddhe? Kinna patte? Kinna abhisamannagae? Kim utthanenam kammenam balenam virienam purisakkara-parakkamenam? Udahu anutthanenam akammenam abalenam avirienam apurisakkara-parakkamenam? Tae nam se deve kumdakoliyam samanovasayam evam vayasi–evam khalu devanuppiya! Mae ima eyaruva divva deviddhi divva devajjui divve devanubhave anutthanenam akammenam abalenam avirienam apurisakkaraparakkamenam laddhe patte abhisamannagae. Tae nam se kumdakolie samanovasae tam devam evam vayasi–jai nam devanuppiya! Tume ima eyaruva divva deviddhi divva devajjui divve devanubhave anutthanenam akammenam abalenam avirienam0 apurisakkaraparakkamenam laddhe patte abhisamannagae, jesi nam jivanam natthi utthane i va kamme i va bale i va virie i va purisakkara0-parakkame i va, te kim na deva? Aha tubbhe ima eyaruva divva deviddhi divva devajjui divve devanubhave utthanenam kammenam balenam virienam purisakkara-parakkamenam laddhe patte abhisamannagae, to jam vadasi sumdari nam gosalassa mamkhaliputtassa dhammapannatti–natthi utthane i va kamme i va bale i va virie i va purisakkara-parakkame i va niyata savvabhava, mamguli nam samanassa bhagavao mahavirassa dhammapannatti–atthi utthane i va kamme i va bale i va virie i va purisakkara-parakkame i va aniyatta savvabhava, tam te michchha. Tae nam se deve kumdakolienam samanovasaenam evam vutte samane samkie kamkhie vitigichchha-samavanne kalusasamavanne no samchaei kumdakoliyassa samanovasayassa kimchi pamokkhama-ikkhittae, namamuddagam cha uttarijjayam cha pudhavisilapattae thavei, thavetta jameva disam paubbhue, tameva disam padigae. Tenam kalenam tenam samaenam sami samosadhe. Tae nam se kumdakolie samanovasae imise kahae laddhatthe samane–evam khalu samane bhagavam mahavire puvvanupuvvim charamane gamanugamam duijjamane ihamagae iha sampatte iha samosadhe iheva kampillapurassa nayarassa bahiya sahassambavane ujjane aha-padiruvam oggaham oginhitta samjamenam tavasa appanam bhavemane viharai. Tam seyam khalu mama samanam bhagavam mahaviram vamditta namamsitta tato padiniyattassa posaham parettae tti kattu evam sampehei, sampehetta posahasalao padinikkhamai, padinikkhamitta suddhappavesaim mamgallaim vatthaim pavara parihie manussavagguraparikkhitte sayao gihao padinikkhamai, padinikkhamitta kampillapuram nayaram majjhammajjhenam niggachchhai, niggachchhitta jeneva sahassambavanam ujjane, jeneva samane bhagavam mahavire, teneva uvagachchhai, uvagachchhitta tikkhutto ayahina-payahinam karei, karetta vamdai namamsai, vamditta namamsitta tivihae pajjuvasanae pajjuvasai. Tae nam samane bhagavam mahavire kumdakoliyassa samanovasayassa tise ya mahaimahaliyae parisae java dhammam parikahei.
Sutra Meaning Transliteration : Juo sutra 37