Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1104036
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-१२

 Translated Chapter :

શતક-૧૨
Section : उद्देशक-२ जयंति Translated Section : ઉદ્દેશક-૨ જયંતિ
Sutra Number : 536 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं सा जयंती समणोवासिया समणस्स भगवओ महावीरस्स अंतियं धम्मं सोच्चा निसम्म हट्ठतुट्ठा समणं भगवं महावीरं वंदइ नमंसइ, वंदित्ता नमंसित्ता एवं वयासी– कहन्नं भंते! जीवा गरुयत्तं हव्वमागच्छंति? जयंती! पाणाइवाएणं मुसावाएणं अदिन्नादानेणं मेहुणेणं परिग्गहेणं कोह-मान-माया-लोभ-पेज्ज-दोस-कलह-अब्भक्खाण-पेसुन्न-परपरिवाय-अरतिरति-मायामोस-मिच्छादंसणसल्लेणं–एवं खलु जयंती! जीवा गरुयत्तं हव्वमागच्छंति। कहन्नं भंते! जीवा लहुयत्तं हव्वमागच्छंति? जयंती! पाणाइवायवेरमणेणं मुसावायवेरमणेणं अदिन्नादानवेरमणेणं मेहुणवेरमणेणं परिग्गह-वेरमणेणं कोह-मान-माया-लोभ- पेज्ज-दोस- कलह-अब्भक्खाण- पेसुन्न-परपरिवाय- अरतिरति-मायामोस-मिच्छादंसणसल्लवेरमणेणं– एवं खलु जयंती! जीवा लहुयत्तं हव्वमागच्छंति। कहन्नं भंते! जीवा संसारं आउलीकरेंति? जयंती! पाणाइवाएणं जाव मिच्छादंसणसल्लेणं–एवं खलु जयंती! जीवा संसारं आउली-करेंति। कहन्नं भंते! जीवा संसारं परित्तीकरेंति? जयंती! पाणाइवायवेरमणेणं जाव मिच्छादंसणसल्लवेरमणेणं–एवं खलु जयंती! जीवा संसारं परित्तीकरेंति। कहन्नं भंते! जीवा संसारं दीहीकरेंति? जयंती! पाणाइवाएणं जाव मिच्छादंसणसल्लेणं–एवं खलु जयंती! जीवा संसारं दीहीकरेंति। कहन्नं भंते! जीवा संसारं ह्रस्सीकरेंति? जयंती! पाणाइवायवेरमणेणं जाव मिच्छादंसणसल्लवेरमणेणं–एवं खलु जयंती! जीवा संसारं ह्रस्सीकरेंति। कहन्नं भंते! जीवा संसारं अनुपरियट्टंति? जयंती! पाणाइवाएणं जाव मिच्छादंसणसल्लेणं–एवं खलु जयंती! जीवा संसारं अनुपरियट्टंति। कहन्नं भंते! जीवा संसारं वीतिवयंति? जयंती! पाणाइवायवेरमणेणं जाव मिच्छादंसणसल्लवेरमणेणं– एवं खलु जयंती! जीवा संसारं वीतिवयंति। भवसिद्धियत्तणं भंते! जीवाणं किं सभावओ? परिणामओ? जयंती! सभावओ, नो परिणामओ। सव्वेवि णं भंते! भवसिद्धिया जीवा सिज्झिस्संति? हंता जयंती! सव्वेवि णं भवसिद्धिया जीवा सिज्झिस्संति। जइ णं भंते! सव्वे भवसिद्धिया जीवा सिज्झिस्संति, तम्हा णं भवसिद्धियविरहिए लोए भविस्सइ? नो इणट्ठे समट्ठे। से केणं खाइणं अट्ठेणं भंते! एवं वुच्चइ–सव्वेवि णं भवसिद्धिया जीवा सिज्झिस्संति, नो चेव णं भवसिद्धियविरहिए लोए भविस्सइ? जयंती! से जहानामए सव्वागाससेढी सिया– अनादीया अनवदग्गा परित्ता परिवुडा, सा णं परमाणुपोग्गलमेत्तेहिं खंडेहिं समए-समए अवहीरमाणी-अवहीरमाणी अनंताहिं ओसप्पिणी-उस्सप्पिणीहिं अवहीरंति, नो चेव णं अवहिया सिया। से तेणट्ठेणं जयंती! एवं वुच्चइ–सव्वेवि णं भवसिद्धिया जीवा सिज्झिस्संति, नो चेव णं भवसिद्धिअविरहिए लोए भविस्सइ। सुत्तत्तं भंते! साहू? जागरियत्तं साहू? जयंती! अत्थेगतियाणं जीवाणं सुत्तत्तं साहू, अत्थेगतियाणं जीवाणं जागरियत्तं साहू। से केणट्ठेणं भंते! एवं वुच्चइ–अत्थेगतियाणं जीवाणं सुत्तत्तं साहू, अत्थेगतियाणं जीवाणं जागरियत्तं साहू? जयंती! जे इमे जीवा अहम्मिया अहम्माणुया अहम्मिट्ठा अहम्मक्खाई अहम्मपलोई अहम्मपलज्जणा अहम्मसमुदायारा अहम्मेणं चेव बित्तिं कप्पेमाणा विहरंति, एएसि णं जीवाणं सुत्तत्तं साहू। एए णं जीवा सुत्ता समाणा नो बहूणं पाणाणं भूयानं जीवाणं सत्ताणं दुक्खणयाए सोयणयाए जूरणयाए तिप्पणयाए पिट्टणयाए परियावणयाए वट्टंति। एए णं जीवा सुत्ता समाणा अप्पाणं वा परं वा तदुभयं वा नो बहूहिं अहम्मियाहिं संजोयणाहिं संजोएत्तारो भवंति एएसि णं जीवाणं सुत्तत्तं साहू। जयंती! जे इमे जीवा धम्मिया धम्माणुया धम्मिट्ठा धम्मक्खाई धम्मपलोई धम्मपलज्जणा धम्मसमुदायारा धम्मेणं चेव वित्तिं कप्पेमाणा विहरंति, एएसि णं जीवाणं जागरियत्तं साहू। एए णं जीवा जागरा समाणा बहूणं पाणाणं भूयानं जीवाणं सत्ताणं अदुक्खणयाए असोयणयाए अजूरणयाए अतिप्पणयाए अपिट्टणयाए अपरियाबणयाए वट्टंति। एए णं जीवा जागरा समाणा अप्पाणं वा परं वा तदुभयं वा बहूहिं धम्मियाहिं संजोयणाहिं संजोएत्तारो भवंति। एए णं जीवा जागरा समाणा धम्मजागरियाए अप्पाणं जागरइत्तारो भवंति। एएसि णं जीवाणं जागरियत्तं साहू। से तेणट्ठेणं जयंती! एवं वुच्चइ–अत्थेगतियाणं जीवाणं सुत्तत्तं साहू, अत्थेगतियाणं जीवाणं जागरियत्तं साहू। बलियत्तं भंते! साहू? दुब्बलियत्तं साहू? जयंती! अत्थेगतियाणं जीवाणं बलियत्तं साहू, अत्थेगतियाणं जीवाणं दुब्बलियत्तं साहू। से केणट्ठेणं भंते! एवं वुच्चइ–अत्थेगतियाणं जीवाणं बलियत्तं साहू, अत्थेगतियाणं जीवाणं दुब्बलियत्तंसाहू? जयंती! जे इमे जीवा अहम्मिया जाव अहम्मेणं चेव वित्तिं कप्पेमाणा विहरंति, एएसि णं जीवाणं दुब्बलियत्तं साहू। एए णं जीवा दुब्बलिया समाणा नो बहूणं पाणाणं भूयानं जीवाणं सत्ताणं दुक्खणयाए जाव परियावणयाए वट्टंति। एए णं जीवा दुब्बलिया समाणा अप्पाणं वा परं वा तदुभयं वा नो बहूहिं अहम्मियाहिं संजोयणाहिं संजोएत्तारो भवंति। एएसि णं जीवाणं दुब्बलियत्तं साहू। जयंती! जे इमे जीवा धम्मिया जाव धम्मेणं चेव वित्तिं कप्पेमाणा विहरंति, एएसि णं जीवाणं बलियत्तं साहू। एए णं जीवा बलिया समाणा बहूणं पाणाणं भूयानं जीवाणं सत्ताणं अदुक्खणयाए जाव अपरियावणयाए वट्टंति। एए णं जीवा बलिया समाणा अप्पाणं वा परं वा तदुभयं वा बहूहिं धम्मियाहिं संजोयणाहिं संजोएत्तारो भवंति। एएसि णं जीवाणं बलियत्तं साहू। से तेणट्ठेणं जयंती! एवं वुच्चइ–अत्थेगतियाणं जीवाणं बलियत्तं साहू, अत्थेगतियाणं जीवाणं दुब्बलियत्तं साहू। दक्खुत्तं भंते! साहू? आलसियत्तं साहू? जयंती! अत्थेगतियाणं जीवाणं दक्खुत्तं साहू, अत्थेगतियाणं जीवाणं आलसियत्तं साहू। से केणट्ठेणं भंते! एवं वुच्चइ–अत्थेगतियाणं जीवाणं दक्खत्तं साहू, अत्थेगतियाणं जीवाणं आलसियत्तं साहू? जयंती! जे इमे जीवा अहम्मिया जाव अहम्मेणं चेव वित्तिं कप्पेमाणा विहरंति, एएसि णं जीवाणं आलसियत्तं साहू। एए णं जीवा आलसा समाणा नो बहूणं पाणाणं भूयानं जीवाणं सत्ताणं दुक्खणयाए जाव परियावणयाए वट्टंति। एए णं जीवा आलसा समाणा अप्पाणं वा परं वा तदुभयं वा नो बहूहिं अहम्मियाहिं संजोयणाहिं संजोएत्तारो भवंति। एएसि णं जीवाणं आलसियत्तं साहू जयंती! जे इमे जीवा धम्मिया जाव धम्मेणं चेव वित्तिं कप्पेमाणा विहरंति, एएसि णं जीवाणं दक्खत्तं साहू। एए णं जीवा दक्खा समाणा बहूणं पाणाणं भूयानं जीवाणं सत्ताणं अदुक्खणयाए जाव अपरियावणयाए वट्टंति। एए णं जीवा दक्खा समाणा अप्पाणं वा परं वा तदुभयं वा बहूहिं धम्मियाहिं संजोयणाहिं संजोएत्तारो भवंति। एए णं जीवा दक्खा समाणा बहूहिं आयरिय-वेयावच्चेहिं उवज्झाय-वेयावच्चेहिं थेर-वेयावच्चेहिं तवस्सिवेयावच्चेहिं गिलाणवेयावच्चेहिं सेहवेयावच्चेहिं कुलवेयावच्चेहिं गणवेयावच्चेहिं संघवेयावच्चेहिं साहम्मियवेयावच्चेहिं अत्ताणं संजोएत्तारो भवंति, एएसि णं जीवाणं दक्खत्तं साहू। से तेणट्ठेणं जयंती! एवं वुच्चइ– अत्थेगतियाणं जीवाणं दक्खत्तं साहू, अत्थेगतियाणं जीवाणं आलसियत्तं साहू। सोइंदियवसट्टे णं भंते! जीवे किं बंधइ? किं पकरेइ? किं चिणाइ? किं उवचिणाइ? जयंती! सोइंदियवसट्टे णं जीवे आउयवज्जाओ सत्त कम्मपगडीओ सिढिलबंधनबद्धाओ धनियबंधनबद्धाओ पकरेइ, हस्सकालठिइयाओ दीहकालठिइयाओ पकरेइ, मंदानुभावाओ तिव्वा-नुभावाओ पकरेइ, अप्पपएसग्गाओ बहुप्पएसग्गाओ पकरेइ, आउयं च णं कम्मं सिय बंधइ, सिय नो बंधइ, अस्सायावेयणिज्जं च णं कम्मं भुज्जो-भुज्जो उवचिणाइ, अनाइयं च णं अनवदग्गं दीहमद्धं चाउरंतं संसारकंतारं अनुपरियट्टइ। चक्खिंदियवसट्टे णं भंते! जीवे किं बंधइ? किं पकरेइ? किं चिणाइ? किं उवचिणाइ? एवं चेव जाव अनुपरियट्टइ। घाणिंदियवसट्टे णं भंते! जीवे किं बंधइ? किं पकरेइ? किं चिणाइ? किं उवचिणाइ? एवं चेव जाव अनुपरियट्टइ। रसिंदियवसट्टे णं भंते! जीवे किं बंधइ? किं पकरेइ? किं चिणाइ? किं उवचिणाइ? एवं चेव जाव अनुपरियट्टइ। फासिंदियवसट्टे णं भंते! जीवे किं बंधइ? किं पकरेइ? किं चिणाइ? किं उवचिणाइ? एवं चेव जाव अनुपरियट्टइ। तए णं सा जयंती समणोवासिया समणस्स भगवओ महावीरस्स अंतियं एयमट्ठं सोच्चा निसम्म हट्ठतुट्ठा सेसं जहा देवानंदा तहेव पव्वइया जाव सव्वदुक्खप्पहीणा। सेवं भंते! सेवं भंते! त्ति।
Sutra Meaning : જુઓ સૂત્ર ૫૩૪
Mool Sutra Transliteration : [sutra] tae nam sa jayamti samanovasiya samanassa bhagavao mahavirassa amtiyam dhammam sochcha nisamma hatthatuttha samanam bhagavam mahaviram vamdai namamsai, vamditta namamsitta evam vayasi– Kahannam bhamte! Jiva garuyattam havvamagachchhamti? Jayamti! Panaivaenam musavaenam adinnadanenam mehunenam pariggahenam koha-mana-maya-lobha-pejja-dosa-kalaha-abbhakkhana-pesunna-paraparivaya-aratirati-mayamosa-michchhadamsanasallenam–evam khalu jayamti! Jiva garuyattam havvamagachchhamti. Kahannam bhamte! Jiva lahuyattam havvamagachchhamti? Jayamti! Panaivayaveramanenam musavayaveramanenam adinnadanaveramanenam mehunaveramanenam pariggaha-veramanenam koha-mana-maya-lobha- pejja-dosa- kalaha-abbhakkhana- pesunna-paraparivaya- aratirati-mayamosa-michchhadamsanasallaveramanenam– evam khalu jayamti! Jiva lahuyattam havvamagachchhamti. Kahannam bhamte! Jiva samsaram aulikaremti? Jayamti! Panaivaenam java michchhadamsanasallenam–evam khalu jayamti! Jiva samsaram auli-karemti. Kahannam bhamte! Jiva samsaram parittikaremti? Jayamti! Panaivayaveramanenam java michchhadamsanasallaveramanenam–evam khalu jayamti! Jiva samsaram Parittikaremti. Kahannam bhamte! Jiva samsaram dihikaremti? Jayamti! Panaivaenam java michchhadamsanasallenam–evam khalu jayamti! Jiva samsaram dihikaremti. Kahannam bhamte! Jiva samsaram hrassikaremti? Jayamti! Panaivayaveramanenam java michchhadamsanasallaveramanenam–evam khalu jayamti! Jiva samsaram Hrassikaremti. Kahannam bhamte! Jiva samsaram anupariyattamti? Jayamti! Panaivaenam java michchhadamsanasallenam–evam khalu jayamti! Jiva samsaram anupariyattamti. Kahannam bhamte! Jiva samsaram vitivayamti? Jayamti! Panaivayaveramanenam java michchhadamsanasallaveramanenam– evam khalu jayamti! Jiva samsaram vitivayamti. Bhavasiddhiyattanam bhamte! Jivanam kim sabhavao? Parinamao? Jayamti! Sabhavao, no parinamao. Savvevi nam bhamte! Bhavasiddhiya jiva sijjhissamti? Hamta jayamti! Savvevi nam bhavasiddhiya jiva sijjhissamti. Jai nam bhamte! Savve bhavasiddhiya jiva sijjhissamti, tamha nam bhavasiddhiyavirahie loe bhavissai? No inatthe samatthe. Se kenam khainam atthenam bhamte! Evam vuchchai–savvevi nam bhavasiddhiya jiva sijjhissamti, no cheva nam bhavasiddhiyavirahie loe bhavissai? Jayamti! Se jahanamae savvagasasedhi siya– anadiya anavadagga paritta parivuda, sa nam paramanupoggalamettehim khamdehim samae-samae avahiramani-avahiramani anamtahim osappini-ussappinihim avahiramti, no cheva nam avahiya siya. Se tenatthenam jayamti! Evam vuchchai–savvevi nam bhavasiddhiya jiva sijjhissamti, no cheva nam bhavasiddhiavirahie loe bhavissai. Suttattam bhamte! Sahu? Jagariyattam sahu? Jayamti! Atthegatiyanam jivanam suttattam sahu, atthegatiyanam jivanam jagariyattam sahu. Se kenatthenam bhamte! Evam vuchchai–atthegatiyanam jivanam suttattam sahu, atthegatiyanam jivanam jagariyattam sahu? Jayamti! Je ime jiva ahammiya ahammanuya ahammittha ahammakkhai ahammapaloi ahammapalajjana ahammasamudayara ahammenam cheva bittim kappemana viharamti, eesi nam jivanam suttattam sahu. Ee nam jiva sutta samana no bahunam pananam bhuyanam jivanam sattanam dukkhanayae soyanayae juranayae tippanayae pittanayae pariyavanayae vattamti. Ee nam jiva sutta samana appanam va param va tadubhayam va no bahuhim ahammiyahim samjoyanahim samjoettaro bhavamti eesi nam jivanam suttattam sahu. Jayamti! Je ime jiva dhammiya dhammanuya dhammittha dhammakkhai dhammapaloi dhammapalajjana dhammasamudayara dhammenam cheva vittim kappemana viharamti, eesi nam jivanam jagariyattam sahu. Ee nam jiva jagara samana bahunam pananam bhuyanam jivanam sattanam adukkhanayae asoyanayae ajuranayae atippanayae apittanayae apariyabanayae vattamti. Ee nam jiva jagara samana appanam va param va tadubhayam va bahuhim dhammiyahim samjoyanahim samjoettaro bhavamti. Ee nam jiva jagara samana dhammajagariyae appanam jagaraittaro bhavamti. Eesi nam jivanam jagariyattam sahu. Se tenatthenam jayamti! Evam vuchchai–atthegatiyanam jivanam suttattam sahu, atthegatiyanam jivanam jagariyattam sahu. Baliyattam bhamte! Sahu? Dubbaliyattam sahu? Jayamti! Atthegatiyanam jivanam baliyattam sahu, atthegatiyanam jivanam dubbaliyattam sahu. Se kenatthenam bhamte! Evam vuchchai–atthegatiyanam jivanam baliyattam sahu, atthegatiyanam jivanam dubbaliyattamsahu? Jayamti! Je ime jiva ahammiya java ahammenam cheva vittim kappemana viharamti, eesi nam jivanam dubbaliyattam sahu. Ee nam jiva dubbaliya samana no bahunam pananam bhuyanam jivanam sattanam dukkhanayae java pariyavanayae vattamti. Ee nam jiva dubbaliya samana appanam va param va tadubhayam va no bahuhim ahammiyahim samjoyanahim samjoettaro bhavamti. Eesi nam jivanam dubbaliyattam sahu. Jayamti! Je ime jiva dhammiya java dhammenam cheva vittim kappemana viharamti, eesi nam jivanam baliyattam sahu. Ee nam jiva baliya samana bahunam pananam bhuyanam jivanam sattanam adukkhanayae java apariyavanayae vattamti. Ee nam jiva baliya samana appanam va param va tadubhayam va bahuhim dhammiyahim samjoyanahim samjoettaro bhavamti. Eesi nam jivanam baliyattam sahu. Se tenatthenam jayamti! Evam vuchchai–atthegatiyanam jivanam baliyattam sahu, atthegatiyanam jivanam dubbaliyattam sahu. Dakkhuttam bhamte! Sahu? Alasiyattam sahu? Jayamti! Atthegatiyanam jivanam dakkhuttam sahu, atthegatiyanam jivanam alasiyattam sahu. Se kenatthenam bhamte! Evam vuchchai–atthegatiyanam jivanam dakkhattam sahu, atthegatiyanam jivanam alasiyattam sahu? Jayamti! Je ime jiva ahammiya java ahammenam cheva vittim kappemana viharamti, eesi nam jivanam alasiyattam sahu. Ee nam jiva alasa samana no bahunam pananam bhuyanam jivanam sattanam dukkhanayae java pariyavanayae vattamti. Ee nam jiva alasa samana appanam va param va tadubhayam va no bahuhim ahammiyahim samjoyanahim samjoettaro bhavamti. Eesi nam jivanam alasiyattam sahu Jayamti! Je ime jiva dhammiya java dhammenam cheva vittim kappemana viharamti, eesi nam jivanam dakkhattam sahu. Ee nam jiva dakkha samana bahunam pananam bhuyanam jivanam sattanam adukkhanayae java apariyavanayae vattamti. Ee nam jiva dakkha samana appanam va param va tadubhayam va bahuhim dhammiyahim samjoyanahim samjoettaro bhavamti. Ee nam jiva dakkha samana bahuhim ayariya-veyavachchehim uvajjhaya-veyavachchehim thera-veyavachchehim tavassiveyavachchehim gilanaveyavachchehim sehaveyavachchehim kulaveyavachchehim ganaveyavachchehim samghaveyavachchehim sahammiyaveyavachchehim attanam samjoettaro bhavamti, eesi nam jivanam dakkhattam sahu. Se tenatthenam jayamti! Evam vuchchai– atthegatiyanam jivanam dakkhattam sahu, atthegatiyanam jivanam alasiyattam sahu. Soimdiyavasatte nam bhamte! Jive kim bamdhai? Kim pakarei? Kim chinai? Kim uvachinai? Jayamti! Soimdiyavasatte nam jive auyavajjao satta kammapagadio sidhilabamdhanabaddhao dhaniyabamdhanabaddhao pakarei, hassakalathiiyao dihakalathiiyao pakarei, mamdanubhavao tivva-nubhavao pakarei, appapaesaggao bahuppaesaggao pakarei, auyam cha nam kammam siya bamdhai, siya no bamdhai, assayaveyanijjam cha nam kammam bhujjo-bhujjo uvachinai, anaiyam cha nam anavadaggam dihamaddham chauramtam samsarakamtaram anupariyattai. Chakkhimdiyavasatte nam bhamte! Jive kim bamdhai? Kim pakarei? Kim chinai? Kim uvachinai? Evam cheva java anupariyattai. Ghanimdiyavasatte nam bhamte! Jive kim bamdhai? Kim pakarei? Kim chinai? Kim uvachinai? Evam cheva java anupariyattai. Rasimdiyavasatte nam bhamte! Jive kim bamdhai? Kim pakarei? Kim chinai? Kim uvachinai? Evam cheva java anupariyattai. Phasimdiyavasatte nam bhamte! Jive kim bamdhai? Kim pakarei? Kim chinai? Kim uvachinai? Evam cheva java anupariyattai. Tae nam sa jayamti samanovasiya samanassa bhagavao mahavirassa amtiyam eyamattham sochcha nisamma hatthatuttha sesam jaha devanamda taheva pavvaiya java savvadukkhappahina. Sevam bhamte! Sevam bhamte! Tti.
Sutra Meaning Transliteration : Juo sutra 534