Sutra Navigation: Samavayang ( સમવયાંગ સૂત્ર )

Search Details

Mool File Details

Anuvad File Details

Sr No : 1103341
Scripture Name( English ): Samavayang Translated Scripture Name : સમવયાંગ સૂત્ર
Mool Language : Ardha-Magadhi Translated Language : Gujarati
Chapter :

समवाय प्रकीर्णक

 Translated Chapter :

સમવાય પ્રકીર્ણક
Section : Translated Section :
Sutra Number : 241 Category : Ang-04
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] केवइया णं भंते! पुढवीकाइयावासा पन्नत्ता? गोयमा! असंखेज्जा पुढवीकाइयावासा पन्नत्ता। एवं जाव मनुस्सत्ति। केवइया णं भंते! वाणमंतरावासा पन्नत्ता? गोयमा! इमीसे णं रयणप्पभाए पुढवीए रयणामयस्स कंडस्स जोयणसहस्सबाहल्लस्स उवरिं एगं जोयणसयं ओगाहेत्ता हेट्ठा चेगं जोयणसयं वज्जेत्ता मज्झे अट्ठसु जोयणसएसु, एत्थ णं वाणमंतराणं देवाणं तिरियमसंखेज्जा भोमेज्जनगरावाससयसहस्सा पन्नत्ता। ते णं भोमेज्जा नगरा बाहिं वट्टा अंतो चउरंसा, एवं जहा भवनवासीणं तहेव नेयव्वा, नवरं–पडागमालाउला सुरम्मा पासाईया दरिसणिज्जा अभिरूवा पडिरूवा। केवइया णं भंते! जोइसियाणं विमानावासा पन्नत्ता? गोयमा! इमीसे णं रयणप्पभाए पुढवीए बहुसमरमणिज्जाओ भूमिभागाओ सत्तनउयाइं जोयणसयाइ उड्ढं उप्पइत्ता, एत्थ णं दसुत्तरजोयणसयबाहल्ले तिरियं जोइसविसए जोइसियाणं देवाणं असंखेज्जा जोइसियविमनावासा पन्नत्ता। ते णं जोइसियविमानावासा अब्भुग्गयमूसिय-पहसिया विविहमणि-रयण-भत्तिचित्ता वाउद्धुय-विजय-वेजयंती-पडाग-छत्तातिछत्तकलिया तुंगा गगनतलमनुलिहंतसिहरा जालंतररयण-पंजरुम्मिलितव्व मणि-कणग-थूभियागा विगसित-सयपत्त-पुंडरीय-तिलय-रयणड्ढचंद-चित्ता अंतो बहिं च सण्हा तवणिज्ज-वालुगा-पत्थडा सुहफासा सस्सिरीयरूवा पासाईया दरिसणिज्जा अभिरूवा पडिरूवा। केवइया णं भंते! वेमानियावासा पन्नत्ता? गोयमा! इमीसे णं रयणप्पभाए पुढवीए बहुसमरमणिज्जाओ भूमिभागाओ उड्ढं चंदिम-सूरिय-गहगण-नक्खत्त-तारारूवाणं वीइवइत्ता बहूणि जोयणाणि बहूणि जोयणसयाणि बहूणि जोयणसहस्साणि बहूणि जोयणसयसहस्साणि बहूओ जोयणकोडीओ बहूओ जोयणकोडाकोडीओ असंखेज्जाओ जोयकोडाकोडीओ उड्ढं दूरं वीइवइत्ता, एत्थ णं वेमाणियाणं देवाणं सोहम्मीसाण-सणंकुमार-माहिंद-बंभ-लंतग-सुक्क-सहस्सार-आणय-पाणय-आरणच्चुएसु गेवेज्जमनुत्तरेसु य चउरासीइं विमानावाससयसहस्सा सत्ताणउइं सहस्सा तेवीसं च विमाणा भवंतीति मक्खाया। ते णं विमाणा अच्चिमालिप्पभा भासरासिवण्णाभा अरया नीरया निम्मला वितिमिरा विसुद्धा सव्व-रयणामया अच्छा सण्हा लण्हा घट्ठा मट्ठा निप्पंका निक्कंकडच्छाया सप्पभा समिरीया सउज्जोया पासाईया दरिसणिज्जा अभिरूवा पडिरूवा। सोहम्मे णं भंते! कप्पे केवइया विमनावासा पन्नत्ता? गोयमा! बत्तीसं विमानावाससयसहस्सा पन्नत्ता। एवं ईसाणाइसु–अट्ठावीसं बारस अट्ठ चत्तारि–एयाइं सयसहस्साइं, पन्नासं चत्तालीसं छ–एयाइं सहस्साइं, आणए पाणए चत्तारि, आरणच्चुए तिन्निएयाणि सयाणि। एवं गाहाहिं भाणियव्वं–
Sutra Meaning : જુઓ સૂત્ર ૨૩૪
Mool Sutra Transliteration : [sutra] kevaiya nam bhamte! Pudhavikaiyavasa pannatta? Goyama! Asamkhejja pudhavikaiyavasa pannatta. Evam java manussatti. Kevaiya nam bhamte! Vanamamtaravasa pannatta? Goyama! Imise nam rayanappabhae pudhavie rayanamayassa kamdassa joyanasahassabahallassa uvarim egam joyanasayam ogahetta hettha chegam joyanasayam vajjetta majjhe atthasu joyanasaesu, ettha nam vanamamtaranam devanam tiriyamasamkhejja bhomejjanagaravasasayasahassa pannatta. Te nam bhomejja nagara bahim vatta amto chauramsa, evam jaha bhavanavasinam taheva neyavva, navaram–padagamalaula suramma pasaiya darisanijja abhiruva padiruva. Kevaiya nam bhamte! Joisiyanam vimanavasa pannatta? Goyama! Imise nam rayanappabhae pudhavie bahusamaramanijjao bhumibhagao sattanauyaim joyanasayai uddham uppaitta, ettha nam dasuttarajoyanasayabahalle tiriyam joisavisae joisiyanam devanam asamkhejja joisiyavimanavasa pannatta. Te nam joisiyavimanavasa abbhuggayamusiya-pahasiya vivihamani-rayana-bhattichitta vauddhuya-vijaya-vejayamti-padaga-chhattatichhattakaliya tumga gaganatalamanulihamtasihara jalamtararayana-pamjarummilitavva mani-kanaga-thubhiyaga vigasita-sayapatta-pumdariya-tilaya-rayanaddhachamda-chitta amto bahim cha sanha tavanijja-valuga-patthada suhaphasa sassiriyaruva pasaiya darisanijja abhiruva padiruva. Kevaiya nam bhamte! Vemaniyavasa pannatta? Goyama! Imise nam rayanappabhae pudhavie bahusamaramanijjao bhumibhagao uddham chamdima-suriya-gahagana-nakkhatta-tararuvanam viivaitta bahuni joyanani bahuni joyanasayani bahuni joyanasahassani bahuni joyanasayasahassani bahuo joyanakodio bahuo joyanakodakodio asamkhejjao joyakodakodio uddham duram viivaitta, ettha nam vemaniyanam devanam sohammisana-sanamkumara-mahimda-bambha-lamtaga-sukka-sahassara-anaya-panaya-aranachchuesu gevejjamanuttaresu ya chaurasiim vimanavasasayasahassa sattanauim sahassa tevisam cha vimana bhavamtiti makkhaya. Te nam vimana achchimalippabha bhasarasivannabha araya niraya nimmala vitimira visuddha savva-rayanamaya achchha sanha lanha ghattha mattha nippamka nikkamkadachchhaya sappabha samiriya saujjoya pasaiya darisanijja abhiruva padiruva. Sohamme nam bhamte! Kappe kevaiya vimanavasa pannatta? Goyama! Battisam vimanavasasayasahassa pannatta. Evam isanaisu–atthavisam barasa attha chattari–eyaim sayasahassaim, pannasam chattalisam chha–eyaim sahassaim, anae panae chattari, aranachchue tinnieyani sayani. Evam gahahim bhaniyavvam–
Sutra Meaning Transliteration : Juo sutra 234