Sutra Navigation: Pushpachulika ( પુષ્પચૂલા )

Search Details

Mool File Details

Anuvad File Details

Sr No : 1108303
Scripture Name( English ): Pushpachulika Translated Scripture Name : પુષ્પચૂલા
Mool Language : Ardha-Magadhi Translated Language : Gujarati
Chapter :

अध्ययन-१ थी १०

 Translated Chapter :

અધ્યયન-૧ થી ૧૦
Section : Translated Section :
Sutra Number : 3 Category : Upang-11
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] जइ णं भंते! समणेणं भगवया महावीरेणं जाव संपत्तेणं उवंगाणं चउत्थस्स वग्गस्स पुप्फचूलियाणं दस अज्झयणा पण्णत्ता, पढमस्स णं भंते! अज्झयणस्स पुप्फचूलियाणं समणेणं भगवया महावीरेणं जाव संपत्तेणं के अट्ठे पन्नत्ते? एवं खलु जंबू! तेणं कालेणं तेणं समएणं रायगिहे नयरे। गुणसिलए चेइए। सेणिए राया। सामी समोसढे। परिसा निग्गया। तेणं कालेणं तेणं समएणं सिरिदेवी सोहम्मे कप्पे सिरिवडिंसए विमाणे सभाए सुहम्माए सिरिवडिंसयंसि सीहासनंसि चउहिं सामानियसाहस्सीहिं चउहिं महत्तरियाहिं सपरिवाराहिं जहा बहुपुत्तिया जाव नट्टविहिं उवदंसित्ता पडिगया, नवरं–दारियाओ नत्थि। पुव्वभवपुच्छा। एवं खलु गोयमा! तेणं कालेणं तेणं समएणं रायगिहे नयरे। गुणसिलए चेइए। जियसत्तू राया। तत्थ णं रायगिहे नयरे सुदंसणे नामं गाहावई परिवसई–अड्ढे। तस्स णं सुदंसणस्स गाहावइस्स पिया नामं भारिया होत्था–सूमालपाणिपाया। तस्स णं सुदंसणस्स गाहावइस्स धूया, पियाए गाहावइणीए अत्तया भूया नामं दारिया होत्था–‘वुड्ढा वुड्ढकुमारी’ जुण्णा जुण्णकुमारी पडियपुतत्थणी वरगपरिवज्जिया यावि होत्था। तेणं कालेणं तेणं समएणं पासे अरहा पुरिसादाणीए जाव नवरयणिए वण्णओ सो चेव समोसरणं। परिसा निग्गया। तए णं सा भूया दारिया इमीसे कहाए लद्धट्ठा समाणी हट्ठतुट्ठा जेणेव अम्मापियरो तेणेव उवागच्छइ, उवागच्छित्ता एवं वयासी– एवं खलु अम्मताओ! पासे अरहा पुरिसादानीए पुव्वानुपुव्विं चरमाणे जाव गणपरिवुडे विहरइ, तं इच्छामि णं अम्मताओ! तुब्भेहिं अब्भणुन्नाया समाणी पासस्स अरहओ पुरिसादानीयस्स पायवंदिया गमित्तए। अहासुहं देवानुप्पिए! मा पडिबंधं। तए णं सा भूया दारिया ण्हाया अप्पमहग्घाभरणालंकियसरीरा चेडीचक्कवालपरिकिण्णा साओ गिहाओ पडिनिक्खमइ, पडिनिक्खमित्ता जेणेव बाहिरिया उवट्ठाणसाला तेणेव उवागच्छइ, उवागच्छित्ता धम्मियं जानप्पवरं दुरूढा। तए णं सा भूया दारिया नियगपरिवारपरिवुडा रायगिहं नयरं मज्झंमज्झेणं निग्गच्छइ, निग्गच्छित्ता जेणेव गुणसिलए चेइए तेणेव उवागच्छइ, उवागच्छित्ता छत्ताईए तित्थयराइसए पासइ, पासित्ता धम्मियाओ जानप्पवराओ पच्चोरुभित्ता चेडीचक्कवालपरिकिन्ना जेणेव पासे अरहा पुरिसादानीए तेणेव उवागच्छइ, उवागच्छित्ता तिक्खुत्तो अयाहिण-पयाहिणं करेइ, करेत्ता वंदइ नमंसइ जाव पज्जुवासइ। तए णं पासे अरहा पुरिसादाणीए भूयाए दारियाए तीसे य महइमहालियाए परिसाए धम्मं परिकहेइ, धम्मं सोच्चा निसम्म हट्ठतुट्ठा वंदइ नमंसइ, वंदित्ता नमंसित्ता एवं वयासी– सद्दहामि णं भंते! निग्गंथं पावयणं जाव अब्भुट्ठेमि णं भंते! निग्गंथं पावयणं, से जहेयं तुब्भे वयह, जं नवरं भंते! अम्मापियरो आपुच्छामि, तए णं अहं देवाणुप्पियाणं अंतिए मुंडा भवित्ता अगाराओ अनगारियं पव्वयामि। अहासुहं देवानुप्पिए! तए णं सा भूया दारिया तमेव धम्मियं जानप्पवरं दुरूहइ, दुरूहित्ता जेणेव रायगिहे नयरे तेणेव उवागया, रायगिहं नयरं मज्झंमज्झेणं जेणेव सए गिहे तेणेव उवागया, रहाओ पच्चोरुहित्ता जेणेव अम्मापियरो तेणेव उवागया, करयलपरिग्गहियं दसनहं सिरसावत्तं मत्थए अंजलिं कट्टु जहा जमाली आपुच्छइ। अहासुहं देवाणुप्पिए! तए णं से सुदंसणे गाहावई विउलं असनं पानं खाइमं साइमं उवक्खडावेइ, मित्त नाइ नियग सयण संबंधि परियणं आमंतेइ, आमंतेत्ता जाव जिमियभुत्तुत्तरकाले सुईभूए निक्खमणमाणेत्ता कोडुंबियपुरिसे सद्दावेइ, सद्दावेत्ता एवं वयासी– खिप्पामेव भो देवानुप्पिया! भूयाए दारियाए पुरिस-सहस्सवाहिणिं सीयं उवट्ठवेह, उवट्ठवेत्ता एयमाणत्तियं पच्चप्पिणह। तए णं ते कोडुंबियपुरिसा तमाणत्तियं पच्चप्पिणंति। तए णं से सुदंसणे गाहावई भूयं दारियं ण्हायं जाव सव्वालंकारविभूसियसरीरं पुरिससहस्स-वाहिणिं सीयं दुरूहेइ, दुरूहेत्ता मित्त नाइ नियग सयण संबंधि परियणेण सद्धिं संपरिवुडे सव्विड्ढीए जाव दुंदुहि निग्घोसणानाइयरवेणं रायगिहं नयरं मज्झं-मज्झेणं जेणेव गुणसिलए चेइए तेणेव उवागए छत्तातीए तित्थयरातिसए पासइ, पासित्ता सीयं ठवेइ, ठवेत्ता भूयं दारियं सीयाओ पच्चोरुहेइ। तए णं तं भूयं दारियं अम्मापियरो पुरओ काउं जेणेव अरहा पुरिसादानीए तेणेव उवागया तिक्खुत्तो ‘वंदंति नमंसंति’, वंदित्ता नमंसित्ता एवं वयासी– एवं खलु देवानुप्पिया! भूया दारिया अम्हं धूया इट्ठा, एस णं देवानुप्पिया! संसारभउव्विग्गा भीया जम्मणमरणाणं देवाणुप्पियाणं अंतिए मुंडा भवित्ता अगाराओ अनगारियं पव्वयाइ। तं एयं णं देवानुप्पिया! सिस्सिणीभिक्खं दलयामो। पडिच्छंतु णं देवाणुनुप्पिया! सिस्सिणि-भिक्खं। अहासुहं देवानुप्पिया! तए णं सा भूया दारिया पासेणं अरहा एवं वुत्ता समाणी हट्ठतुट्ठा उत्तरपुरत्थिमं दिसीभागं अवक्कम्मइ, अवक्कमित्ता सयमेव आभरणमल्लालंकारं ओमुयइ, जहा देवानंदा, पुप्फचूलाणं अंतिए जाव गुत्तबंभयारिणी। तए णं सा भूया अज्जा अन्नया कयाइ सरीरबाओसिया जाया यावि होत्था–अभिक्खणं-अभिक्खणं हत्थे धोवइ, पाए धोवइ, सीसं धोवइ, मुहं धोवइ, थणगंतराइं धोवइ, कक्खंतराइं धोवइ, गुज्झंतराइं धोवइ, जत्थ-जत्थ वि य णं ठाणं वा सेज्जं वा निसीहंपि वा चेएइ, तत्थ-तत्थ वि य णं पुव्वामेव पाणएणं अब्भुक्खेइ, तओ पच्छा ठाणं वा सेज्जं वा निसीहियं वा चेएइ। तए णं ताओ पुप्फचूलाओ अज्जाओ भूयं अज्जं एवं वयासी– अम्हे णं देवाणुप्पिए! समणीओ निग्गंथीओ इरियासमियाओ जाव गुत्तबंभयारिणीओ। नो खलु कप्पइ अम्हं सरीरबाओसियाणं होत्तए। तुमं च णं देवाणुप्पिए! सरीरबाओसिया अभिक्खणं-अभिक्खणं हत्थे धोवसि जाव निसीहियं चेएसि। तं णं तुमं देवाणुप्पिए! एयस्स ठाणस्स आलोएहि, सेसं जहा सुभद्दाए जाव पाडिएक्कं उवस्सयं उवसंपज्जित्ताणं विहरइ। तए णं सा भूया अज्जा अणोहट्टिया अनिवारिया सच्छंदमई अभिक्खणं-अभिक्खणं हत्थे धोवइ जाव निसीहियं वा चेएइ। तए णं सा भूया अज्जा बहूहिं चउत्थ-छट्ठट्ठम-दसम-दुवालसेहिं मासद्धमासखमणेहिं विचित्तेहिं तवोकम्मेहिं अप्पाणं भावेमाणी बहूइं वासाइं सामण्णपरियागं पाउणित्ता, तस्स ठाणस्स अनालोइयपडिक्कंता कालमासे कालं किच्चा सोहम्मे कप्पे सिरिवडेंसए विमाने उववायसभाए देवसयणिज्जंसि देवदूसंतरिया अंगुलस्स असंखेज्जइभागमेत्ताए ओगाहणाए सिरिदेवित्ताए उववन्ना पंचविहाए पज्जत्तीए जाव भासमनपज्जत्तीए पज्जत्तभावं गया। एवं खलु गोयमा! सिरीए देवीए एसा दिव्वा देविड्ढी लद्धा पत्ता। ठिई एगं पलिओवमं। सिरी णं भंते! देवी ताओ देवलोगाओ आउक्खएणं भवक्खएणं ठिइक्खएणं अनंतरं चयं चइत्ता कहिं गच्छिहिइ? कहिं उववज्जिहिइ? गोयमा! महाविदेहे वासे सिज्झिहिइ। एवं खलु जंबू! समणेणं भगवया महावीरेणं जाव संपत्तेणं पुप्फचूलियाणं पढमस्स अज्झयणस्स अयमट्ठे पन्नत्ते। एवं सेसाणवि नवण्हं भाणियव्वं। सरिनामा विमाणा। सोहम्मे कप्पे। पुव्वभवे नयरचेइय-पियमाईणं अप्पणो य नामाइं जहा संगहणीए। सव्वा पासस्स अंतिए निक्खंता। पुप्फचूलाणं सिस्सिणीयाओ सरीरबाउसियाओ सव्वाओ अनंतरं चयं चइत्ता महाविदेहे वासे सिज्झिहिंति।
Sutra Meaning : જુઓ સૂત્ર ૧
Mool Sutra Transliteration : [sutra] jai nam bhamte! Samanenam bhagavaya mahavirenam java sampattenam uvamganam chautthassa vaggassa pupphachuliyanam dasa ajjhayana pannatta, padhamassa nam bhamte! Ajjhayanassa pupphachuliyanam samanenam bhagavaya mahavirenam java sampattenam ke atthe pannatte? Evam khalu jambu! Tenam kalenam tenam samaenam rayagihe nayare. Gunasilae cheie. Senie raya. Sami samosadhe. Parisa niggaya. Tenam kalenam tenam samaenam siridevi sohamme kappe sirivadimsae vimane sabhae suhammae sirivadimsayamsi sihasanamsi chauhim samaniyasahassihim chauhim mahattariyahim saparivarahim jaha bahuputtiya java nattavihim uvadamsitta padigaya, Navaram–dariyao natthi. Puvvabhavapuchchha. Evam khalu goyama! Tenam kalenam tenam samaenam rayagihe nayare. Gunasilae cheie. Jiyasattu raya. Tattha nam rayagihe nayare sudamsane namam gahavai parivasai–addhe. Tassa nam sudamsanassa gahavaissa piya namam bhariya hottha–sumalapanipaya. Tassa nam sudamsanassa gahavaissa dhuya, piyae gahavainie attaya bhuya namam dariya hottha–‘vuddha vuddhakumari’ junna junnakumari padiyaputatthani varagaparivajjiya yavi hottha. Tenam kalenam tenam samaenam pase araha purisadanie java navarayanie vannao so cheva samosaranam. Parisa niggaya. Tae nam sa bhuya dariya imise kahae laddhattha samani hatthatuttha jeneva ammapiyaro teneva uvagachchhai, uvagachchhitta evam vayasi– Evam khalu ammatao! Pase araha purisadanie puvvanupuvvim charamane java ganaparivude viharai, tam ichchhami nam ammatao! Tubbhehim abbhanunnaya samani pasassa arahao purisadaniyassa payavamdiya gamittae. Ahasuham devanuppie! Ma padibamdham. Tae nam sa bhuya dariya nhaya appamahagghabharanalamkiyasarira chedichakkavalaparikinna sao gihao padinikkhamai, padinikkhamitta jeneva bahiriya uvatthanasala teneva uvagachchhai, uvagachchhitta dhammiyam janappavaram durudha. Tae nam sa bhuya dariya niyagaparivaraparivuda rayagiham nayaram majjhammajjhenam niggachchhai, niggachchhitta jeneva gunasilae cheie teneva uvagachchhai, uvagachchhitta chhattaie titthayaraisae pasai, pasitta dhammiyao janappavarao pachchorubhitta chedichakkavalaparikinna jeneva pase araha purisadanie teneva uvagachchhai, uvagachchhitta tikkhutto ayahina-payahinam karei, karetta vamdai namamsai java pajjuvasai. Tae nam pase araha purisadanie bhuyae dariyae tise ya mahaimahaliyae parisae dhammam parikahei, dhammam sochcha nisamma hatthatuttha vamdai namamsai, vamditta namamsitta evam vayasi– Saddahami nam bhamte! Niggamtham pavayanam java abbhutthemi nam bhamte! Niggamtham pavayanam, se jaheyam tubbhe vayaha, jam navaram bhamte! Ammapiyaro apuchchhami, tae nam aham devanuppiyanam amtie mumda bhavitta agarao anagariyam pavvayami. Ahasuham devanuppie! Tae nam sa bhuya dariya tameva dhammiyam janappavaram duruhai, duruhitta jeneva rayagihe nayare teneva uvagaya, rayagiham nayaram majjhammajjhenam jeneva sae gihe teneva uvagaya, rahao pachchoruhitta jeneva ammapiyaro teneva uvagaya, karayalapariggahiyam dasanaham sirasavattam matthae amjalim kattu jaha jamali apuchchhai. Ahasuham devanuppie! Tae nam se sudamsane gahavai viulam asanam panam khaimam saimam uvakkhadavei, mitta nai niyaga sayana sambamdhi pariyanam amamtei, amamtetta java jimiyabhuttuttarakale suibhue nikkhamanamanetta kodumbiyapurise saddavei, saddavetta evam vayasi– khippameva bho devanuppiya! Bhuyae dariyae purisa-sahassavahinim siyam uvatthaveha, uvatthavetta eyamanattiyam pachchappinaha. Tae nam te kodumbiyapurisa tamanattiyam pachchappinamti. Tae nam se sudamsane gahavai bhuyam dariyam nhayam java savvalamkaravibhusiyasariram purisasahassa-vahinim siyam duruhei, duruhetta mitta nai niyaga sayana sambamdhi pariyanena saddhim samparivude savviddhie java dumduhi nigghosananaiyaravenam rayagiham nayaram majjham-majjhenam jeneva gunasilae cheie teneva uvagae chhattatie titthayaratisae pasai, pasitta siyam thavei, thavetta bhuyam dariyam siyao pachchoruhei. Tae nam tam bhuyam dariyam ammapiyaro purao kaum jeneva araha purisadanie teneva uvagaya tikkhutto ‘vamdamti namamsamti’, vamditta namamsitta evam vayasi– Evam khalu devanuppiya! Bhuya dariya amham dhuya ittha, esa nam devanuppiya! Samsarabhauvvigga bhiya jammanamarananam devanuppiyanam amtie mumda bhavitta agarao anagariyam pavvayai. Tam eyam nam devanuppiya! Sissinibhikkham dalayamo. Padichchhamtu nam devanunuppiya! Sissini-bhikkham. Ahasuham devanuppiya! Tae nam sa bhuya dariya pasenam araha evam vutta samani hatthatuttha uttarapuratthimam disibhagam avakkammai, avakkamitta sayameva abharanamallalamkaram omuyai, jaha devanamda, pupphachulanam amtie java guttabambhayarini. Tae nam sa bhuya ajja annaya kayai sarirabaosiya jaya yavi hottha–abhikkhanam-abhikkhanam hatthe dhovai, pae dhovai, sisam dhovai, muham dhovai, thanagamtaraim dhovai, kakkhamtaraim dhovai, gujjhamtaraim dhovai, jattha-jattha vi ya nam thanam va sejjam va nisihampi va cheei, tattha-tattha vi ya nam puvvameva panaenam abbhukkhei, tao pachchha thanam va sejjam va nisihiyam va cheei. Tae nam tao pupphachulao ajjao bhuyam ajjam evam vayasi– Amhe nam devanuppie! Samanio niggamthio iriyasamiyao java guttabambhayarinio. No khalu kappai amham sarirabaosiyanam hottae. Tumam cha nam devanuppie! Sarirabaosiya abhikkhanam-abhikkhanam hatthe dhovasi java nisihiyam cheesi. Tam nam tumam devanuppie! Eyassa thanassa aloehi, sesam jaha subhaddae java padiekkam uvassayam uvasampajjittanam viharai. Tae nam sa bhuya ajja anohattiya anivariya sachchhamdamai abhikkhanam-abhikkhanam hatthe dhovai java nisihiyam va cheei. Tae nam sa bhuya ajja bahuhim chauttha-chhatthatthama-dasama-duvalasehim masaddhamasakhamanehim vichittehim tavokammehim appanam bhavemani bahuim vasaim samannapariyagam paunitta, tassa thanassa analoiyapadikkamta kalamase kalam kichcha sohamme kappe sirivademsae vimane uvavayasabhae devasayanijjamsi devadusamtariya amgulassa asamkhejjaibhagamettae ogahanae siridevittae uvavanna pamchavihae pajjattie java bhasamanapajjattie pajjattabhavam gaya. Evam khalu goyama! Sirie devie esa divva deviddhi laddha patta. Thii egam paliovamam. Siri nam bhamte! Devi tao devalogao aukkhaenam bhavakkhaenam thiikkhaenam anamtaram chayam chaitta kahim gachchhihii? Kahim uvavajjihii? Goyama! Mahavidehe vase sijjhihii. Evam khalu jambu! Samanenam bhagavaya mahavirenam java sampattenam pupphachuliyanam padhamassa ajjhayanassa ayamatthe pannatte. Evam sesanavi navanham bhaniyavvam. Sarinama vimana. Sohamme kappe. Puvvabhave nayaracheiya-piyamainam appano ya namaim jaha samgahanie. Savva pasassa amtie nikkhamta. Pupphachulanam sissiniyao sarirabausiyao savvao anamtaram chayam chaitta mahavidehe vase sijjhihimti.
Sutra Meaning Transliteration : Juo sutra 1