Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104863
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-१६ अवरकंका

 Translated Chapter :

શ્રુતસ્કંધ-૧

અધ્યયન-૧૬ અવરકંકા
Section : Translated Section :
Sutra Number : 163 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं सागरए सूमालियाए दारियाए इमं एयारूवं पाणिफासं पडिसंवेदेइ, से जहानामए–असिपत्ते इ वा करपत्ते इ वा खुरपत्ते इ वा कलंबचीरिगापत्ते इ वा सत्तिअग्गे इ वा कोंतग्गे इ वा तोमरग्गे इ वा भिंडिमालग्गे इ वा सूचिकलावए इ वा विच्छुयडंके इ वा कविकच्छू इ वा इंगाले इ वा मुम्मुरे इ वा अच्ची इ वा जाले इ वा अलाए इ वा सुद्धागणी इ वा भवे एयारूवे? नो इणट्ठे समट्ठे। एत्तो अनिट्ठतराए चेव अक्कंततराए चेव अप्पियतराए चेव अमणुण्णतराए चेव अमनामतराए चेव पाणिफासं संवेदेइ। तए णं से सागरए अकामए अवसवसे मुहुत्तमेत्तं संचिट्ठइ। तए णं सागरदत्ते सत्थवाहे सागरस्स अम्मापियरो मित्त-नाइ-नियग-सयण-संबंधि-परियणं विपुलेणं असन-पान-खाइम-साइमेणं पुप्फ-वत्थ-गंध-मल्लालंकारेण य सक्कारेत्ता सम्मानेत्ता पडिविसज्जेइ। तए णं सागरए सूमालियाए सद्धिं जेणेव वासधरे तेणेव उवागच्छइ, उवागच्छित्ता सूमालियाए दारियाए सद्धिं तलिमंसि निवज्जइ। तए णं से सागरए दारए सूमालियाए दारियाए इमं एयारूवं अंगफासं पडिसंवेदेइ, से जहानामए–असिपत्ते इ वा जाव एत्तो अमनामतरागं चेव अंगफासं पच्चणुब्भवमाणे विहरइ। तए णं से सागरए दारए सूमालियाए दारियाए अंगफासं असहमाणे अवसवसे मुहुत्तमेत्तं संचिट्ठइ। तए णं से सागरदारए सूमालियं दारियं सुहपसुत्तं जाणित्ता सूमालियाए दारियाए पासाओ उट्ठेइ, उट्ठेत्ता जेणेव सए सयणिज्जे तेणेव उवागच्छइ, उवागच्छित्ता सयणिज्जसि निवज्जइ। तए णं सा सूमालिया दारिया तओ मुहुत्तंतरस्स पडिबुद्धा समाणी पइव्वया पइमणुरत्ता पइं पासे अपस्समाणी तलि माओ उट्ठेइ, उट्ठेत्ता जेणेव से सयणिज्जे तेणेव उवागच्छइ, उवागच्छित्ता सागरस्स पासे णुवज्जइ। तए णं से सागरदारए सूमालियाए दारियाए दोच्चंपि इमं एयारूवं अंगफासं पडिसंवेदेइ जाव अकामए अवसवसे मुहुत्तमेत्तं संचिट्ठइ। तए णं से सागरदारए सूमालियं दारियं सुहपसुत्तं जाणित्ता सयणिज्जाओ उट्ठेइ, उट्ठेत्ता वासधरस्स दारं विहाडेइ, विहाडेत्ता मारामुक्के विव काए जामेव दिसिं पाउब्भूए तामेव दिसिं पडिगए।
Sutra Meaning : જુઓ સૂત્ર ૧૬૧
Mool Sutra Transliteration : [sutra] tae nam sagarae sumaliyae dariyae imam eyaruvam paniphasam padisamvedei, se jahanamae–asipatte i va karapatte i va khurapatte i va kalambachirigapatte i va sattiagge i va komtagge i va tomaragge i va bhimdimalagge i va suchikalavae i va vichchhuyadamke i va kavikachchhu i va imgale i va mummure i va achchi i va jale i va alae i va suddhagani i va bhave eyaruve? No inatthe samatthe. Etto anitthatarae cheva akkamtatarae cheva appiyatarae cheva amanunnatarae cheva amanamatarae cheva paniphasam samvedei. Tae nam se sagarae akamae avasavase muhuttamettam samchitthai. Tae nam sagaradatte satthavahe sagarassa ammapiyaro mitta-nai-niyaga-sayana-sambamdhi-pariyanam vipulenam asana-pana-khaima-saimenam puppha-vattha-gamdha-mallalamkarena ya sakkaretta sammanetta padivisajjei. Tae nam sagarae sumaliyae saddhim jeneva vasadhare teneva uvagachchhai, uvagachchhitta sumaliyae dariyae saddhim talimamsi nivajjai. Tae nam se sagarae darae sumaliyae dariyae imam eyaruvam amgaphasam padisamvedei, se jahanamae–asipatte i va java etto amanamataragam cheva amgaphasam pachchanubbhavamane viharai. Tae nam se sagarae darae sumaliyae dariyae amgaphasam asahamane avasavase muhuttamettam samchitthai. Tae nam se sagaradarae sumaliyam dariyam suhapasuttam janitta sumaliyae dariyae pasao utthei, utthetta jeneva sae sayanijje teneva uvagachchhai, uvagachchhitta sayanijjasi nivajjai. Tae nam sa sumaliya dariya tao muhuttamtarassa padibuddha samani paivvaya paimanuratta paim pase apassamani tali mao utthei, utthetta jeneva se sayanijje teneva uvagachchhai, uvagachchhitta sagarassa pase nuvajjai. Tae nam se sagaradarae sumaliyae dariyae dochchampi imam eyaruvam amgaphasam padisamvedei java akamae avasavase muhuttamettam samchitthai. Tae nam se sagaradarae sumaliyam dariyam suhapasuttam janitta sayanijjao utthei, utthetta vasadharassa daram vihadei, vihadetta maramukke viva kae jameva disim paubbhue tameva disim padigae.
Sutra Meaning Transliteration : Juo sutra 161