Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1104028
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-११

 Translated Chapter :

શતક-૧૧
Section : उद्देशक-१२ आलभिका Translated Section : ઉદ્દેશક-૧૨ આલભિકા
Sutra Number : 528 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं समणे भगवं महावीरे अन्नया कयाइ आलभियाओ नगरीओ संखवणाओ चेइयाओ पडिनिक्खमइ, पडिनिक्खमित्ता बहिया जनवयविहारं विहरइ। तेणं कालेणं तेणं समएणं आलभिया नामं नगरी होत्था–वण्णओ। तत्थ णं संखवने नामं चेइए होत्था–वण्णओ। तस्स णं संखवणस्स चेइयस्स अदूरसामंते पोग्गले नामं परिव्वायए–रिउव्वेद-जजुव्वेद जाव बंभण्णएसु परिव्वायएसु य नएसु सुपरिनिट्ठिए छट्ठंछट्ठेणं अनिक्खित्तेणं तवोकम्मेणं उड्ढं बाहाओ पगिज्झिय-पगिज्झिय सूराभिमुहे आयावणभूमीए आयावेमाणे विहरइ तए णं तस्स पोग्गलस्स परिव्वायगस्स छट्ठंछट्ठेणं अनिक्खित्तेणं तवोकम्मेणं उड्ढं बाहाओ पगिज्झिय-पगिज्झिय सूराभिमुहे आयावणभूमीए आयावेमाणस्स पगइभद्दयाए पगइउवसंतयाए पगइपयणुकोहमाणमायालोभाए मिउमद्दवसंपन्नयाए अल्लीणयाए विणीययाए अन्नया कयाइ तयावरणिज्जाणं कम्माणं खओवसमेणं ईहापूह-मग्गण-गवेसणं करेमाणस्स विब्भंगे नामं नाणे समुप्पन्ने। से णं तेणं विब्भंगेणं नाणेणं समुप्पन्नेणं बंभलोए कप्पे देवाणं ठितिं जाणइ-पासइ। तए णं तस्स पोग्गलस्स परिव्वायगस्स अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था–अत्थि णं ममं अतिसेसे नाणदंसणे समुप्पन्ने, देवलोएसु णं देवाणं जहन्नेणं दस वाससहस्साइं ठिती पन्नत्ता, तेण परं समयाहिया, दुसमयाहिया जाव असंखेज्जसमयाहिया, उक्कोसेणं दससागरोवमाइं ठिती पन्नत्ता। तेण परं वोच्छिन्ना देवा य देवलोगा य–एवं संपेहेइ, संपेहेत्ता आयावणभूमीओ पच्चोरुहइ, पच्चोरुहित्ता तिदंडं च कुंडियं च जाव धाउरत्ताओ य गेण्हइ, गेण्हित्ता जेणेव आलभिया नगरी, जेणेव परिव्वायगावसहे, तेणेव उवागच्छइ, उवागच्छित्ता भंडनिक्खेवं करेइ, करेत्ता आलभियाए नगरीए सिंघा-डग-तिग-चउक्क-चच्चर-चउम्मुह-महापह-पहेसु अन्नमन्नस्स एवमाइक्खइ जाव परूवेइ–अत्थि णं देवानुप्पिया! ममं अतिसेसे नाणदंसणे समुप्पन्ने, देवलोएसु णं देवाणं जहन्नेणं दसवाससहस्साइं ठिती पन्नत्ता, तेण परं समयाहिया, दुसमयाहिया, जाव असंखेज्ज समयाहिया, उक्कोसेणं दससागरोवमाइं ठिती पन्नत्ता। तेण परं वोच्छिन्ना देवा य देवलोगा य। तए णं पोग्गलस्स परिव्वायगस्स अंतियं एयमट्ठं सोच्चा निसम्म आलभियाए नगरीए सिंघाडग-तिग-चउक्क-चच्चर -चउम्मुह-महापह-पहेसुबहुजनो अन्नमन्नस्स एवमाइक्खइ जाव परूवेइ–एवं खलु देवानुप्पिया! पोग्गले परिव्वायए एवमाइ-क्खइ जाव परूवेइ–अत्थि णं देवानुप्पिया! ममं अतिसेसे नाणदंसणे समुप्पन्ने, एवं खलु देवलोएसु णं देवाणं जहन्नेणं दसवास-सहस्साइं ठिती पन्नत्ता, तेण परं समयाहिया, दुसमयाहिया जाव असंखेज्जसमयाहिया, उक्कोसेणं दससागरोवमाइं ठिती पन्नत्ता। तेण परं वोच्छिन्ना देवा य देवलोगा य। से कहमेयं मन्ने एवं? सामी समोसढे, परिसा निग्गया। धम्मो कहिओ, परिसा पडिगया। भगवं गोयमे तहेव भिक्खायरियाए तहेव बहुजणसद्दं निसामेइ, निसामेत्ता तहेव सव्वं भाणियव्वं जाव अहं पुण गोयमा! एवमाइक्खामि, एवं भासामि जाव परूवेमि–देवलोएसु णं देवाणं जहन्नेणं दस वाससहस्साइं ठिती पन्नत्ता, तेण परं समयाहिया, दुसमयाहिया जाव असंखेज्जसमयाहिया, उक्कोसेणं तेत्तीसं सागरोवमाइं ठिती पन्नत्ता। तेण परं वोच्छिन्ना देवा य देवलोगा य। अत्थि णं भंते! सोहम्मे कप्पे दव्वाइं–सवण्णाइं पि अवण्णाइं पि, सगंधाइं पि अगंधाइं पि, सरसाइं पि अरसाइं पि, सफासाइं पि अफासाइं पि अन्नमन्नबद्धाइं अन्नमन्नपुट्ठाइं अन्नमन्नबद्धपुट्ठाइं अन्नमन्नघडत्ताए चिट्ठंति? हंता अत्थि। एवं ईसाने वि, एवं जाव अच्चुए, एवं गेवेज्जविमानेसु, अनुत्तरविमानेसु वि, ईसिपब्भाराए वि जाव? हंता अत्थि। तए णं सा महतिमहालिया परिसा जाव जामेव दिसिं पाउब्भूया तामेव दिसं पडिगया। तए णं आलभियाए नगरीए सिंघाडग-तिग-चउक्क-चच्चर-चउम्मुह-महापह-पहेसु बहुजनो अन्नमन्नस्स एवमाइक्खइ जाव परूवेइ जण्णं देवानुप्पिया! पोग्गले परिव्वायए एवमाइक्खइ जाव परूवेइ–अत्थि णं देवानुप्पिया! ममं अतिसेसे नाणदंसणे समुप्पन्ने, एवं खलु देवलोएसु णं देवाणं जहन्नेणं दस वाससहस्साइं ठिती पन्नत्ता, तेण परं समयाहिया, दुसमयाहिया जाव असंखेज्ज-समयाहिया, उक्कोसेणं दससागरोवमाइं ठिती पन्नत्ता। तेण परं वोच्छिन्ना देवा य देवलोगा य। तं नो इणट्ठे समट्ठे। समणे भगवं महावीरे एवमाइक्खइ जाव देवलोएसु णं देवाणं जहन्नेणं दस वाससहस्साइं ठिती पन्नत्ता, तेण परं समयाहिया, दुसमयाहिया जाव असंखेज्जसमयाहिया, उक्कोसेणं तेत्तीसं सागरोवमाइं ठिती पन्नत्ता। तेण परं वोच्छिन्ना देवा य देवलोगा य। तए णं से पोग्गले परिव्वायए बहुजनस्स अंतियं एयमट्ठं सोच्चा निसम्म संकिए कंखिए वितिगिच्छिए भेदसमावन्ने कलुससमावन्ने जाए यावि होत्था। तए णं तस्स पोग्गलस्स परिव्वायगस्स संकियस्स कंखियस्स वितिगिच्छियस्स भेदसमावन्नस्स कलुससमावन्नस्स से विभंगे नाणे खिप्पामेव पडिवडिए। तए णं तस्स पोग्गलस्स परिव्वायगस्स अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था–एवं खलु समणे भगवं महावीरे आदिगरे तित्थगरे जाव सव्वण्णू सव्वदरिसी आगासगएणं चक्केणं जाव संखवने चेइए अहापडिरूवं ओग्गहं ओगिण्हित्ता संजमेणं तवसा अप्पाणं भावेमाणे विहरइ, तं महप्फलं खलु तहारूवाणं अरहंताणं भगवंताणं नामगोयस्स वि सवणयाए, किमंग पुण अभिगमन-वंदन-नमंसण-पडिपुच्छण-पज्जुवासणयाए? एगस्स वि आरियस्स धम्मियस्स सुवयणस्स सव-णयाए, किमंग पुण विउलस्स अट्ठस्स गहणयाए? तं गच्छामि णं समणं भगवं महावीरं वंदामि जाव पज्जुवासामि, एयं णे इहभवे य परभवे य हियाए सुहाए खमाए निस्सेयसाए आनुगामियत्ताए भविस्सइ त्ति कट्टु एवं संपेहेइ, संपेहेत्ता जेणेव परिव्वायगावसहे तेणेव उवागच्छइ, उवागच्छित्ता परिव्वायगावसहं अनुप्पविसइ, अनुप्पविसित्ता तिदंडं च कुंडियं च जाव धाउरत्ताओ य गेण्हइ, गेण्हित्ता परिव्वायगावसहाओ पडिनिक्खमइ, पडिनिक्खमित्ता पडिवडियविब्भंगे आलभियं नगरिं मज्झंमज्झेणं निग्गच्छइ, निग्ग-च्छित्ता जेणेव संखवने चेइए, जेणेव समणे भगवं महावीरे तेणेव उवागच्छइ, उवागच्छित्ता समणं भगवं महावीरं तिक्खुत्तो वंदइ नमंसइ, वंदित्ता नमंसित्ता नच्चासन्ने नातिदूरे सुस्सूसमाणे नमंसमाणे अभिमुहे विनएणं पंजलिकडे पज्जुवासइ। तए णं समणे भगवं महावीरे पोग्गलस्स परिव्वायगस्स तीसे य महतिमहालियाए परिसाए धम्मं परिकहेइ जाव आणाए आराहए भवइ। तए णं से पोग्गले परिव्वायए समणस्स भगवओ महावीरस्स अंतियं धम्मं सोच्चा निसम्म जहा खंदओ जाव उत्तरपुरत्थिमं दिसीभागं अवक्कमइ, अवक्कमित्ता तिदंडं च कुंडियं च जाव धाउरत्ताओ य एगंते एडेइ, एडेत्ता सयमेव पंचमुट्ठियं लोयं करेइ, करेत्ता समणं भगवं महावीरं तिक्खुत्तो आयाहिण-पयाहिणं करेइ, करेत्ता वंदइ नमंसइ, वंदित्ता नमंसित्ता एवं जहेव उसभदत्तो तहेव पव्वइओ, तहेव एक्कारस अंगाइं अहिज्जइ, तहेव सव्वं जाव सव्वदुक्खप्पहीने। भंतेति! भगवं गोयमे समणं भगवं महावीरं वंदइ नमंसइ, वंदित्ता नमंसित्ता एवं वयासी–जीवा णं भंते! सिज्झ माणस्स कयरम्मि संघयणे सिज्झंति? गोयमा! वइरोसभणारायसंघयणे सिज्झंति, एवं जहेव ओववाइए तहेव। संघयणं संठाणं, उच्चत्तं आउयं च परिवसणा। एवं सिद्धिगंडिया निरवसेसा भाणियव्वा जाव– अव्वाबाहं सोक्खं, अणुभवंति सासयं सिद्धा। सेवं भंते! सेवं भंते! त्ति।
Sutra Meaning : જુઓ સૂત્ર ૫૨૫
Mool Sutra Transliteration : [sutra] tae nam samane bhagavam mahavire annaya kayai alabhiyao nagario samkhavanao cheiyao padinikkhamai, padinikkhamitta bahiya janavayaviharam viharai. Tenam kalenam tenam samaenam alabhiya namam nagari hottha–vannao. Tattha nam samkhavane namam cheie hottha–vannao. Tassa nam samkhavanassa cheiyassa adurasamamte poggale namam parivvayae–riuvveda-jajuvveda java bambhannaesu parivvayaesu ya naesu suparinitthie chhatthamchhatthenam anikkhittenam tavokammenam uddham bahao pagijjhiya-pagijjhiya surabhimuhe ayavanabhumie ayavemane viharai Tae nam tassa poggalassa parivvayagassa chhatthamchhatthenam anikkhittenam tavokammenam uddham bahao pagijjhiya-pagijjhiya surabhimuhe ayavanabhumie ayavemanassa pagaibhaddayae pagaiuvasamtayae pagaipayanukohamanamayalobhae miumaddavasampannayae allinayae viniyayae annaya kayai tayavaranijjanam kammanam khaovasamenam ihapuha-maggana-gavesanam karemanassa vibbhamge namam nane samuppanne. Se nam tenam vibbhamgenam nanenam samuppannenam bambhaloe kappe devanam thitim janai-pasai. Tae nam tassa poggalassa parivvayagassa ayameyaruve ajjhatthie chimtie patthie manogae samkappe samuppajjittha–atthi nam mamam atisese nanadamsane samuppanne, devaloesu nam devanam jahannenam dasa vasasahassaim thiti pannatta, tena param samayahiya, dusamayahiya java asamkhejjasamayahiya, ukkosenam dasasagarovamaim thiti pannatta. Tena param vochchhinna deva ya devaloga ya–evam sampehei, sampehetta ayavanabhumio pachchoruhai, pachchoruhitta tidamdam cha kumdiyam cha java dhaurattao ya genhai, genhitta jeneva alabhiya nagari, jeneva parivvayagavasahe, teneva uvagachchhai, uvagachchhitta bhamdanikkhevam karei, karetta alabhiyae nagarie simgha-daga-tiga-chaukka-chachchara-chaummuha-mahapaha-pahesu annamannassa evamaikkhai java paruvei–atthi nam devanuppiya! Mamam atisese nanadamsane samuppanne, devaloesu nam devanam jahannenam dasavasasahassaim thiti pannatta, tena param samayahiya, dusamayahiya, java asamkhejja samayahiya, ukkosenam dasasagarovamaim thiti pannatta. Tena param vochchhinna deva ya devaloga ya. Tae nam poggalassa parivvayagassa amtiyam eyamattham sochcha nisamma alabhiyae nagarie simghadaga-tiga-chaukka-chachchara -chaummuha-mahapaha-pahesubahujano annamannassa evamaikkhai java paruvei–evam khalu devanuppiya! Poggale parivvayae evamai-kkhai java paruvei–atthi nam devanuppiya! Mamam atisese nanadamsane samuppanne, evam khalu devaloesu nam devanam jahannenam dasavasa-sahassaim thiti pannatta, tena param samayahiya, dusamayahiya java asamkhejjasamayahiya, ukkosenam dasasagarovamaim thiti pannatta. Tena param vochchhinna deva ya devaloga ya. Se kahameyam manne evam? Sami samosadhe, parisa niggaya. Dhammo kahio, parisa padigaya. Bhagavam goyame taheva bhikkhayariyae taheva bahujanasaddam nisamei, nisametta taheva savvam bhaniyavvam java aham puna goyama! Evamaikkhami, evam bhasami java paruvemi–devaloesu nam devanam jahannenam dasa vasasahassaim thiti pannatta, tena param samayahiya, dusamayahiya java asamkhejjasamayahiya, ukkosenam tettisam sagarovamaim thiti pannatta. Tena param vochchhinna deva ya devaloga ya. Atthi nam bhamte! Sohamme kappe davvaim–savannaim pi avannaim pi, sagamdhaim pi agamdhaim pi, sarasaim pi arasaim pi, saphasaim pi aphasaim pi annamannabaddhaim annamannaputthaim annamannabaddhaputthaim annamannaghadattae chitthamti? Hamta atthi. Evam isane vi, evam java achchue, evam gevejjavimanesu, anuttaravimanesu vi, isipabbharae vi java? Hamta atthi. Tae nam sa mahatimahaliya parisa java jameva disim paubbhuya tameva disam padigaya. Tae nam alabhiyae nagarie simghadaga-tiga-chaukka-chachchara-chaummuha-mahapaha-pahesu bahujano annamannassa evamaikkhai java paruvei jannam devanuppiya! Poggale parivvayae evamaikkhai java paruvei–atthi nam devanuppiya! Mamam atisese nanadamsane samuppanne, evam khalu devaloesu nam devanam jahannenam dasa vasasahassaim thiti pannatta, tena param samayahiya, dusamayahiya java asamkhejja-samayahiya, ukkosenam dasasagarovamaim thiti pannatta. Tena param vochchhinna deva ya devaloga ya. Tam no inatthe samatthe. Samane bhagavam mahavire evamaikkhai java devaloesu nam devanam jahannenam dasa vasasahassaim thiti pannatta, tena param samayahiya, dusamayahiya java asamkhejjasamayahiya, ukkosenam tettisam sagarovamaim thiti pannatta. Tena param vochchhinna deva ya devaloga ya. Tae nam se poggale parivvayae bahujanassa amtiyam eyamattham sochcha nisamma samkie kamkhie vitigichchhie bhedasamavanne kalusasamavanne jae yavi hottha. Tae nam tassa poggalassa parivvayagassa samkiyassa kamkhiyassa vitigichchhiyassa bhedasamavannassa kalusasamavannassa se vibhamge nane khippameva padivadie. Tae nam tassa poggalassa parivvayagassa ayameyaruve ajjhatthie chimtie patthie manogae samkappe samuppajjittha–evam khalu samane bhagavam mahavire adigare titthagare java savvannu savvadarisi agasagaenam chakkenam java samkhavane cheie ahapadiruvam oggaham oginhitta samjamenam tavasa appanam bhavemane viharai, tam mahapphalam khalu taharuvanam arahamtanam bhagavamtanam namagoyassa vi savanayae, kimamga puna abhigamana-vamdana-namamsana-padipuchchhana-pajjuvasanayae? Egassa vi ariyassa dhammiyassa suvayanassa sava-nayae, kimamga puna viulassa atthassa gahanayae? Tam gachchhami nam samanam bhagavam mahaviram vamdami java pajjuvasami, eyam ne ihabhave ya parabhave ya hiyae suhae khamae nisseyasae anugamiyattae bhavissai tti kattu evam sampehei, sampehetta jeneva parivvayagavasahe teneva uvagachchhai, uvagachchhitta parivvayagavasaham anuppavisai, anuppavisitta tidamdam cha kumdiyam cha java dhaurattao ya genhai, genhitta parivvayagavasahao padinikkhamai, padinikkhamitta padivadiyavibbhamge alabhiyam nagarim majjhammajjhenam niggachchhai, nigga-chchhitta jeneva samkhavane cheie, jeneva samane bhagavam mahavire teneva uvagachchhai, uvagachchhitta samanam bhagavam mahaviram tikkhutto vamdai namamsai, vamditta namamsitta nachchasanne natidure sussusamane namamsamane abhimuhe vinaenam pamjalikade pajjuvasai. Tae nam samane bhagavam mahavire poggalassa parivvayagassa tise ya mahatimahaliyae parisae dhammam parikahei java anae arahae bhavai. Tae nam se poggale parivvayae samanassa bhagavao mahavirassa amtiyam dhammam sochcha nisamma jaha khamdao java uttarapuratthimam disibhagam avakkamai, avakkamitta tidamdam cha kumdiyam cha java dhaurattao ya egamte edei, edetta sayameva pamchamutthiyam loyam karei, karetta samanam bhagavam mahaviram tikkhutto ayahina-payahinam karei, karetta vamdai namamsai, vamditta namamsitta evam jaheva usabhadatto taheva pavvaio, taheva ekkarasa amgaim ahijjai, taheva savvam java savvadukkhappahine. Bhamteti! Bhagavam goyame samanam bhagavam mahaviram vamdai namamsai, vamditta namamsitta evam vayasi–jiva nam bhamte! Sijjha manassa kayarammi samghayane sijjhamti? Goyama! Vairosabhanarayasamghayane sijjhamti, evam jaheva ovavaie taheva. Samghayanam samthanam, uchchattam auyam cha parivasana. Evam siddhigamdiya niravasesa bhaniyavva java– Avvabaham sokkham, anubhavamti sasayam siddha. Sevam bhamte! Sevam bhamte! Tti.
Sutra Meaning Transliteration : Juo sutra 525