Sutra Navigation: Upasakdashang ( ઉપાસક દશાંગ સૂત્ર )

Search Details

Mool File Details

Anuvad File Details

Sr No : 1105118
Scripture Name( English ): Upasakdashang Translated Scripture Name : ઉપાસક દશાંગ સૂત્ર
Mool Language : Ardha-Magadhi Translated Language : Gujarati
Chapter :

अध्ययन-१ आनंद

 Translated Chapter :

અધ્યયન-૧ આનંદ
Section : Translated Section :
Sutra Number : 18 Category : Ang-07
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं से आनंदे समणोवासए भगवओ गोयमस्स तिक्खुत्तो मुद्धाणेणं पादेसु वंदइ नमंसइ, वंदित्ता नमंसित्ता एवं वयासी–अत्थि णं भंते! गिहिणो गिहमज्झावसंतस्स ओहिनाणे समुप्पज्जइ? हंता अत्थि। जइ णं भंते! गिहिणो गिहमज्झावसंतस्स ओहिनाणे समुप्पज्जइ, एवं खलु भंते! मम वि गिहिणो गिहमज्झावसंतस्स ओहि नाणे समुप्पण्णे–पुरत्थिमे णं लवणसमुद्दे पंचजोयणसयाइं खेत्तं जाणामि पासामि। दक्खिणे णं लवणसमुद्दे पंच जोयणसयाइं खेत्तं जाणामि पासामि। पच्चत्थिमे णं लवणसमुद्दे पंच जोयणसयाइं खेत्तं जाणामि पासामि। उत्तरे णं जाव चुल्लहिमवंतं वासधरपव्वयं जाणामि पासामि। उड्ढं जाव सोहम्मं कप्पं जाणामि पासामि। अहे जाव इमीसे रयणप्पभाए पुढवीए लोलुयच्चुतं नरयं जाणामि पासामि। तए णं से भगवं गोयमे आनंदं समणोवासयं एवं वयासी–अत्थि णं आनंदा! गिहिणो गिहमज्झावसंतस्स ओहिनाणे समुप्पज्जइ। नो चेव णं एमहालए। तं णं तुमं आनंदा! एयस्स ठाणस्स आलोएहि पडिक्कमाहि निंदाहि गरिहाहि विउट्टाहि विसोहेहि अकरणाए अब्भुट्ठाहि अहारिहं पायच्छित्तं तवोकम्मं पडिवज्जाहि। तए णं से आनंदे समणोवासए भगवं गोयमं एवं वयासी–अत्थि णं भंते! जिनवयणे संताणं तच्चाणं तहियाणं सब्भूयाणं भावाणं आलोइज्जइ निंदिज्जइ गरिहिज्जइ विउट्टिज्जइ विसोहिज्जइ अकरणयाए अब्भुट्ठिज्जइ पडिक्कमिज्जइ अहारिहं पायच्छित्तं तवोकम्मं पडिवज्जिज्जइ? नो इणट्ठे समट्ठे। जइ णं भंते! जिनवयणे संताणं तच्चाणं तहियाणं सब्भूयाणं भावाणं नो आलोइज्जइ नो पडिक्कमिज्जइ नो निंदिज्जइ नो गरिहिज्जइ नो विउट्टिज्जइ नो विसोहिज्जइ अकरणयाए नो अब्भुट्ठिज्जइ अहारिहं पायच्छित्तं तवोकम्मं नो पडिवज्जिज्जइ, तं णं भंते! तुब्भे चेव एयस्स ठाणस्स आलोएह पडिक्कमेह निंदेह गरिहेह विउट्टेह विसोहेह अकरणाए अब्भुट्ठेह अहारिहं पायच्छित्तं तवोकम्मं पडिवज्जेह। तए णं से भगवं गोयमे आनंदेणं समणोवासएणं एवं वुत्ते समाणे संकिए कंखिए वितिगिच्छसमावण्णे आनंदस्स समणोवासगस्स अंतियाओ पडिनिक्खमइ, पडिनिक्खमित्ता जेणेव दूइपलासे चेइए, जेणेव समणे भगवं महावीरे, तेणेव उवागच्छइ, उवागच्छित्ता समणस्स भगवओ महावीरस्स अदूरसामंते गमणागमणाए पडिक्कमइ, पडिक्कमित्ता एसणमनेसणं आलोएइ, आलोएत्ता भत्तपाणं पडिदंसेइ, पडिदंसित्ता समणं भगवं महावीरं वंदइ नमंसइ, वंदित्ता नमंसित्ता एवं वयासी– एवं खलु भंते! अहं तुब्भेहिं अब्भणुण्णाए समाणे वाणियगामे नयरे भिक्खायरियाए अडमाणे अहापज्जत्तं भत्तपाणं पडिग्गाहेमि, पडिग्गाहेत्ता वाणियगामाओ नयराओ पडिनिग्ग-च्छामि, पडिनिग्गच्छित्ता कोल्लायस्स सन्निवेसस्स अदूरसामंतेणं वीईवयमाणे बहुजनसद्दं निसामेमि। बहुजणो अन्नमन्नस्स एवमाइक्खइ, एवं भासइ, एवं पन्नवेइ, एवं परूवेइ– एवं खलु देवानुप्पिया! समणस्स भगवओ महावीरस्स अंतेवासी आनंदे नामं समणोवासए पोसहसालाए अपच्छिम-मारणंतिय-संलेहणा-ज्झूसणा-ज्झूसिए भत्तपान-पडियाइक्खिए कालं अनवकंखमाणे विहरइ। तए णं मम बहुजनस्स अंतिए एयमट्ठं सोच्चा निसम्म अयमेयारूवे अज्झत्थिए चिंतिए पत्थिए मनोगए संकप्पे समुप्पज्जित्था तं गच्छामि णं आनंदं समणोवासयं पासामि– एवं संपेहेमि, संपेहेत्ता जेणेव कोल्लाए सन्निवेसे, जेणेव पोसहसाला, जेणेव आनंदे समणोवासए तेणेव उवागच्छामि। तए णं से आनंदे समणोवासए ममं एज्जमाणं पासइ, पासित्ता हट्ठतुट्ठ-चित्तमाणंदिए पीइमणे परमसोमणस्सिए हरिसवसविसप्पमाणहियए ममं वंदइ नमंसइ, वंदित्ता नमंसित्ता एवं वयासी–एवं खलु भंते! अहं इमेणं ओरालेणं विउलेणं पयत्तेणं पग्गहिएणं तवोकम्मेणं सुक्के लुक्खे निम्मंसे अट्ठिचम्मावणद्धे किडिकिडियाभूए किसे धमणिसंतए जाए, नो संचाएमि देवानुप्पियस्स अंतियं पाउब्भवित्ता णं तिक्खुत्तो मुद्धाणेणं पादेसु अभिवंदित्तए। तुब्भे णं भंते! इच्छक्कारेणं अनभिओगेणं इओ चेव एह, जेणं देवानुप्पियाणं तिक्खुत्तो मुद्धाणेणं पादेसु वंदामि नमंसामि। तए णं अहं जेणेव आनंदे समणोवासए, तेणेव उवागच्छामि। तए णं से आनंदे समणोवासए ममं तिक्खुत्तो मुद्धाणेणं पादेसु वंदइ नमंसइ, वंदित्ता नमंसित्ता एवं वयासी– अत्थि णं भंते! गिहिणो गिहमज्झावसंतस्स ओहिनाणे समुप्पज्जइ? हंता अत्थि। जइ णं भंते! गिहिणो गिहमज्झावसंतस्स ओहिनाणे समुप्पज्जइ, एवं खलु भंते! मम वि गिहिणो गिहमज्झावसंतस्स ओहिनाणे समुप्पन्ने–पुरत्थिमे णं लवणसमुद्दे पंचजोयणसयाइं खेत्तं जाणामि पासामि। दक्खिणे णं लवणसमुद्दे पंचजोयणसयाइं खेत्तं जाणामि पासामि। पच्चत्थिमे णं लवणसमुद्दे पंचजोयणसयाइं खेत्तं जाणामि पासामि। उत्तरे णं जाव चुल्लहिमवंतं वासधरपव्वयं जाणामि पासामि। उड्ढं जाव सोहम्मं कप्पं जाणामि पासामि। अहे जाव इमीसे रयणप्पभाए पुढवीए लोलुयच्चुयं नरयं चउरासीति-वाससहस्सट्ठितियं जाणामि पासामि। तए णं अहं आनंदं समणोवासयं एवं वइत्था–अत्थि णं आनंदा! गिहिणो गिहमज्झावसंतस्स ओहिनाणे समुप्पज्जइ। नो चेव णं एमहालए। तं णं तुमं आनंदा! एयस्स ठाणस्स आलोएहि जाव अहारिहं पायच्छित्तं तवोकम्मं पडिवज्जाहि। तए णं से आनंदे ममं एवं वयासी–अत्थि णं भंते! जिनवयणे संताणं तच्चाणं तहियाणं सब्भूयाणं भावाणं आलोइज्जइ जाव अहारिहं पायच्छित्तं तवोकम्मं पडिवज्जिज्जइ? नो इणट्ठे समट्ठे। जइ णं भंते! जिनवयणे संताणं तच्चाणं तहियाणं सब्भूयाणं भावाणं नो आलोइज्जइ जाव अहारिहं पायच्छित्तं तवोकम्मं नो पडिवज्जिज्जइ, तं णं भंते! तुब्भे चेव एयस्स ठाणस्स आलोएह जाव अहारिहं पायच्छित्तं तवोकम्मं पडिवज्जेह। तए णं अहं आनंदेणं समणोवासएणं एवं वुत्ते समाणे संकिए कंखिए वितिगिच्छसमावण्णे आनंदस्स समणोवासगस्स अंतियाओ पडिनिक्खमामि, पडिनिक्खमित्ता जेणेव इह तेणेव हव्वमागए। तं णं भंते! किं आनंदेणं समणोवासएणं तस्स ठाणस्स आलोएयव्वं पडिक्कमेयव्वं निंदेयव्वं गरिहेयव्वं विउट्टेयव्वं विसोहेयव्वं अकरणयाए अब्भुट्ठेयव्वं अहारिहं पायच्छित्तं तवोकम्मं पडिवज्जेयव्वं? उदाहु मए? गोयमाइ! समणे भगवं महावीरे भगवं गोयमं एवं वयासी–गोयमा! तुमं चेव णं तस्स ठाणस्स आलोएहि जाव अहारिहं पायच्छित्तं तवोकम्मं पडिवज्जाहि, आनंदं च समणोवासयं एयमट्ठं खामेहि। तए णं से भगवं गोयमे समणस्स भगवओ महावीरस्स तह त्ति एयमट्ठं विनएणं पडिसुणेइ, पडिसुणेत्ता तस्स ठाणस्स ओलाएइ पडिक्कमइ निंदइ गरिहइ विउट्टइ विसोहइ अकरणयाए अब्भुट्ठइ अहारिहं पायच्छित्तं तवोकम्मं पडिवज्जइ, आनंदं च समणोवासयं एयमट्ठं खामेइ। तए णं समणे भगवं महावीरे अन्नदा कदाइ बहिया जनवयविहारं विहरइ।
Sutra Meaning : જુઓ સૂત્ર ૧૬
Mool Sutra Transliteration : [sutra] tae nam se anamde samanovasae bhagavao goyamassa tikkhutto muddhanenam padesu vamdai namamsai, vamditta namamsitta evam vayasi–atthi nam bhamte! Gihino gihamajjhavasamtassa ohinane samuppajjai? Hamta atthi. Jai nam bhamte! Gihino gihamajjhavasamtassa ohinane samuppajjai, evam khalu bhamte! Mama vi gihino gihamajjhavasamtassa ohi nane samuppanne–puratthime nam lavanasamudde pamchajoyanasayaim khettam janami pasami. Dakkhine nam lavanasamudde pamcha joyanasayaim khettam janami pasami. Pachchatthime nam lavanasamudde pamcha joyanasayaim khettam janami pasami. Uttare nam java chullahimavamtam vasadharapavvayam janami pasami. Uddham java sohammam kappam janami pasami. Ahe java imise rayanappabhae pudhavie loluyachchutam narayam janami pasami. Tae nam se bhagavam goyame anamdam samanovasayam evam vayasi–atthi nam anamda! Gihino gihamajjhavasamtassa ohinane samuppajjai. No cheva nam emahalae. Tam nam tumam anamda! Eyassa thanassa aloehi padikkamahi nimdahi garihahi viuttahi visohehi akaranae abbhutthahi ahariham payachchhittam tavokammam padivajjahi. Tae nam se anamde samanovasae bhagavam goyamam evam vayasi–atthi nam bhamte! Jinavayane samtanam tachchanam tahiyanam sabbhuyanam bhavanam aloijjai nimdijjai garihijjai viuttijjai visohijjai akaranayae abbhutthijjai padikkamijjai ahariham payachchhittam tavokammam padivajjijjai? No inatthe samatthe. Jai nam bhamte! Jinavayane samtanam tachchanam tahiyanam sabbhuyanam bhavanam no aloijjai no padikkamijjai no nimdijjai no garihijjai no viuttijjai no visohijjai akaranayae no abbhutthijjai ahariham payachchhittam tavokammam no padivajjijjai, tam nam bhamte! Tubbhe cheva eyassa thanassa aloeha padikkameha nimdeha gariheha viutteha visoheha akaranae abbhuttheha ahariham payachchhittam tavokammam padivajjeha. Tae nam se bhagavam goyame anamdenam samanovasaenam evam vutte samane samkie kamkhie vitigichchhasamavanne anamdassa samanovasagassa amtiyao padinikkhamai, padinikkhamitta jeneva duipalase cheie, jeneva samane bhagavam mahavire, teneva uvagachchhai, uvagachchhitta samanassa bhagavao mahavirassa adurasamamte gamanagamanae padikkamai, padikkamitta esanamanesanam aloei, aloetta bhattapanam padidamsei, padidamsitta samanam bhagavam mahaviram vamdai namamsai, vamditta namamsitta evam vayasi– Evam khalu bhamte! Aham tubbhehim abbhanunnae samane vaniyagame nayare bhikkhayariyae adamane ahapajjattam bhattapanam padiggahemi, padiggahetta vaniyagamao nayarao padinigga-chchhami, padiniggachchhitta kollayassa sannivesassa adurasamamtenam viivayamane bahujanasaddam nisamemi. Bahujano annamannassa evamaikkhai, evam bhasai, evam pannavei, evam paruvei– Evam khalu devanuppiya! Samanassa bhagavao mahavirassa amtevasi anamde namam samanovasae posahasalae apachchhima-maranamtiya-samlehana-jjhusana-jjhusie bhattapana-padiyaikkhie kalam anavakamkhamane viharai. Tae nam mama bahujanassa amtie eyamattham sochcha nisamma ayameyaruve ajjhatthie chimtie patthie manogae samkappe samuppajjittha tam gachchhami nam anamdam samanovasayam pasami– evam sampehemi, sampehetta jeneva kollae sannivese, jeneva posahasala, jeneva anamde samanovasae teneva uvagachchhami. Tae nam se anamde samanovasae mamam ejjamanam pasai, pasitta hatthatuttha-chittamanamdie piimane paramasomanassie harisavasavisappamanahiyae mamam vamdai namamsai, vamditta namamsitta evam vayasi–evam khalu bhamte! Aham imenam oralenam viulenam payattenam paggahienam tavokammenam sukke lukkhe nimmamse atthichammavanaddhe kidikidiyabhue kise dhamanisamtae jae, no samchaemi devanuppiyassa amtiyam paubbhavitta nam tikkhutto muddhanenam padesu abhivamdittae. Tubbhe nam bhamte! Ichchhakkarenam anabhiogenam io cheva eha, jenam devanuppiyanam tikkhutto muddhanenam padesu vamdami namamsami. Tae nam aham jeneva anamde samanovasae, teneva uvagachchhami. Tae nam se anamde samanovasae mamam tikkhutto muddhanenam padesu vamdai namamsai, vamditta namamsitta evam vayasi– atthi nam bhamte! Gihino gihamajjhavasamtassa ohinane samuppajjai? Hamta atthi. Jai nam bhamte! Gihino gihamajjhavasamtassa ohinane samuppajjai, evam khalu bhamte! Mama vi gihino gihamajjhavasamtassa ohinane samuppanne–puratthime nam lavanasamudde pamchajoyanasayaim khettam janami pasami. Dakkhine nam lavanasamudde pamchajoyanasayaim khettam janami pasami. Pachchatthime nam lavanasamudde pamchajoyanasayaim khettam janami pasami. Uttare nam java chullahimavamtam vasadharapavvayam janami pasami. Uddham java sohammam kappam janami pasami. Ahe java imise rayanappabhae pudhavie loluyachchuyam narayam chaurasiti-vasasahassatthitiyam janami pasami. Tae nam aham anamdam samanovasayam evam vaittha–atthi nam anamda! Gihino gihamajjhavasamtassa ohinane samuppajjai. No cheva nam emahalae. Tam nam tumam anamda! Eyassa thanassa aloehi java ahariham payachchhittam tavokammam padivajjahi. Tae nam se anamde mamam evam vayasi–atthi nam bhamte! Jinavayane samtanam tachchanam tahiyanam sabbhuyanam bhavanam aloijjai java ahariham payachchhittam tavokammam padivajjijjai? No inatthe samatthe. Jai nam bhamte! Jinavayane samtanam tachchanam tahiyanam sabbhuyanam bhavanam no aloijjai java ahariham payachchhittam tavokammam no padivajjijjai, tam nam bhamte! Tubbhe cheva eyassa thanassa aloeha java ahariham payachchhittam tavokammam padivajjeha. Tae nam aham anamdenam samanovasaenam evam vutte samane samkie kamkhie vitigichchhasamavanne anamdassa samanovasagassa amtiyao padinikkhamami, padinikkhamitta jeneva iha teneva havvamagae. Tam nam bhamte! Kim anamdenam samanovasaenam tassa thanassa aloeyavvam padikkameyavvam nimdeyavvam gariheyavvam viutteyavvam visoheyavvam akaranayae abbhuttheyavvam ahariham payachchhittam tavokammam padivajjeyavvam? Udahu mae? Goyamai! Samane bhagavam mahavire bhagavam goyamam evam vayasi–goyama! Tumam cheva nam tassa thanassa aloehi java ahariham payachchhittam tavokammam padivajjahi, anamdam cha samanovasayam eyamattham khamehi. Tae nam se bhagavam goyame samanassa bhagavao mahavirassa taha tti eyamattham vinaenam padisunei, padisunetta tassa thanassa olaei padikkamai nimdai garihai viuttai visohai akaranayae abbhutthai ahariham payachchhittam tavokammam padivajjai, anamdam cha samanovasayam eyamattham khamei. Tae nam samane bhagavam mahavire annada kadai bahiya janavayaviharam viharai.
Sutra Meaning Transliteration : Juo sutra 16