Sutra Navigation: Gyatadharmakatha ( ધર્મકથાંગ સૂત્ર )

Search Details

Mool File Details

Anuvad File Details

Sr No : 1104864
Scripture Name( English ): Gyatadharmakatha Translated Scripture Name : ધર્મકથાંગ સૂત્ર
Mool Language : Ardha-Magadhi Translated Language : Gujarati
Chapter :

श्रुतस्कंध-१

अध्ययन-१६ अवरकंका

 Translated Chapter :

શ્રુતસ્કંધ-૧

અધ્યયન-૧૬ અવરકંકા
Section : Translated Section :
Sutra Number : 164 Category : Ang-06
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तए णं सा सूमालिया दारिया तओ मुहुत्तंतरस्स पडिबुद्धा पतिव्वया पइमनुरत्ता पइं पासे अपासमाणी सयणिज्जाओ उट्ठेइ, सागरस्स दारगस्स सव्वओ समंता मग्गणं-गवेसणं करेमाणी-करेमाणी वासधरस्स दारं विहाडियं पासइ, पासित्ता एवं वयासी– गए णं से सागरए त्ति कट्टु ओहयमनसंकप्पा करतलपल्हत्थमुही अट्टज्झाणोवगया ज्झियायइ। तए णं सा भद्दा सत्थवाही कल्लं पाउप्पभायाए रयणीए उट्ठियम्मि सूरे सहस्सरस्सिम्मि दिनयरे तेयसा जलंते दासचेडिं सद्दावेइ, सद्दावेत्ता एवं वयासी–गच्छह णं तुमं देवानुप्पिए! बहूवरस्स मुहधोवणियं उवणेहिं। तए णं सा दासचेडी भद्दाए सत्थवाहीए एवं वुत्ता समाणी एयमट्ठं तहत्ति पडिसुणेइ, पडिसुणेत्ता मुहधोवणियं गेण्हइ, गेण्हित्ता जेणेव वासघरे तेणेव उवागच्छइ, उवागच्छित्ता सूमालियं दारियं ओहयमनसंकप्पं करतलपल्हत्थमुहिं अट्टज्झाणोवगयं ज्झियायमाणि पासइ, पासित्ता एवं वयासी–किण्णं तुमं देवानुप्पिए! ओहयमनसंकप्पा करतलपल्हत्थमुही अट्टज्झाणोवगया ज्झियाहि? तए णं सा सूमालिया दारिया तं दासचेडिं एवं वयासी–एवं खलु देवानुप्पिए! सागरए दारए ममं सुहपसुत्तं जाणित्ता मम पासाओ उट्ठेइ, उट्ठेत्ता वासघरदुवारं अवंगुणेइ, अवंगुणेत्ता मारामुक्के विव काए जामेव दिसिं पाउब्भूए तामेव दिसिं पडिगए। तए णहं तओ मुहुत्तंतरस्स पडिबुद्धा पतिव्वया पइमणुरत्ता पइं पासे अपासमाणी सयणिज्जाओ उट्ठेमि सागरस्स दारगस्स सव्वओ समंता मग्गण-गवेसणं करेमाणी-करेमाणी वासघरस्स दारं विहाडियं पासामि, पासित्ता गए णं से सागरए ति कट्टु ओह-यमणसंकप्पा करतलपल्हत्थमुहा अट्टज्झाणोवगया ज्झियायामि। तए णं सा दासचेडी सूमालियाए दारियाए एयमट्ठं सोच्चा जेणेव सागरदत्ते सत्थवाहे तेणेव उवागच्छइ, उवागच्छित्ता सागरदत्तस्स एयमट्ठं निवेदेइ। तए णं से सागरदत्ते दासचेडीए अंतिए एयमट्ठं सोच्चा निसम्म आसुरुत्ते रुट्ठे कुविए चंडिक्किए मिसिमिसेमाणे जेणेव जिनदत्तस्स सत्थवाहस्स गिहे तेणेव उवागच्छइ, उवागच्छित्ता जिनदत्तं सत्थवाहं एवं वयासी–किण्णं देवानुप्पिया! एयं जुत्तं वा पत्तं वा कुलाणुरूवं वा कुलसरिसं वा जण्णं सागरए दारए सूमालियं दारियं अदिट्ठदोसवडिय पइव्वयं विप्पजहाय इहमागए? बहूहिं खिज्जणियाहि य रुंटणियाहि य उवालभइ। तए णं जिनदत्ते सागरदत्तस्स सत्थवाहस्स एयमट्ठं सोच्चा जेणेव सागरए तेणेव उवागच्छइ, उवागच्छित्ता सागरयं दारयं एवं वयासी–दुट्ठु णं पुत्ता! तुमे कयं सागरदत्तस्स गिहाओ इहं हव्वमागच्छंतेणं। तं गच्छह णं तुमं पुत्ता! एवमवि गए सागरदत्तस्स गिहे। तए णं से सागरए दारए जिनदत्तं सत्थवाहं एवं वयासी–अवियाइं अहं ताओ! गिरिपडणं वा तरुपडणं वा मरुप्पवायं वा जलप्पवेसं वा जलणप्पवेसं वा विसभक्खणं वा सत्थोवाडणं वा वेहाणसं वा गिद्धपट्ठं वा पव्वज्जं वा विदेसगमणं वा अब्भु वगच्छेज्जा, नो खलु अहं सागरदत्तस्स गिहं गच्छेज्जा। तए णं से सागरदत्ते सत्थवाहे कुडुंतरियाए सागरस्स एयमट्ठं निसामेइ, निसामेत्ता लज्जिए विलीए विड्डे जिनदत्तस्स सत्थवाहस्स गिहाओ पडिनिक्खमइ, पडिनिक्खमित्ता जेणेव सए गिहे तेणेव उवागच्छइ, उवागच्छित्ता सुकुमालियं दारियं सद्दावेइ, सद्दावेत्ता अंके निवेसेइ, निवेसेत्ता एवं वयासी–किण्णं तव पुत्ता! सागरएणं दारएणं? अहं णं तुमं तस्स दाहामि, जस्स णं तुमं इट्ठा कंता पिया मणुण्णा मणामा भविस्ससि त्ति सूमालियं दारियं ताहिं इट्ठाहिं कंताहिं पियाहिं मणुण्णाहिं मणामाहिं वग्गूहिं समा- सासेइ, समासासेत्ता पडिविसज्जेइ। तए णं से सागरदत्ते सत्थवाहे अन्नया उप्पिं आगासतलगंसि सुहनिसण्णे रायमग्गं आलोएमाणे-आलोएमाणे चिट्ठइ। तए णं से सागरदत्ते एगं महं दमगपुरिसं पासइ–दंडिखंड-निवसणं खंडमल्लग-खंडधडग-हत्थगयं फुट्ट-हडाहड-सीसं मच्छियासहस्सेहिं अन्निज्जमाणमग्गं। तए णं से सागरदत्ते सत्थवाहे कोडुंबियपुरिसे सद्दावेइ, सद्दावेत्ता एवं वयासी–तुब्भे णं देवानुप्पिया! एयं दमगपुरिसं विपुलेणं असन-पान-खाइम-साइमेणं पलोभेह, गिहं अनुप्पवेसेह, अनुप्पवेसेत्ता खंडमल्लगं खंडघडगं च से एगंते एडेह, एडेत्ता अलंकारियकम्मं करेह, ण्हायं कयबलिकम्मं कय-कोउय-मंगल-पायच्छित्तं सव्वालंकारविभूसियं करेह, करेत्ता मणुण्णं असन-पान-खाइम-साइमं भोयावेह, मम अंतियं उवणेह। तए णं ते कोडुंबियपुरिसा जाव पडिसुणेंति, पडिसुणेत्ता जेणेव से दमगपुरिसे तेणेव उवागच्छंति, उवागच्छित्ता तं दमगं असन-पान-खाइम-साइमेणं उवप्पलोभेंति, उवप्पलोभेत्ता सयं गिहं अनुप्पवेसंति, अनुप्पवेसेत्ता तं खंडमल्लगं खंडघडगं च तस्स दमगपुरिसस्स एगंते एडेंति। तए णं से दमगे तंसि खंडमल्लगंसि खंडघडगंसि य एडिज्जमाणंसि महया-महया सद्देणं आरसइ। तए णं से सागरदत्ते सत्थवाहे तस्स दमगपुरिसस्स तं महया-महया आरसियसद्दं सोच्चा निसम्म कोडुंबियपुरिसे एवं वयासी–किन्नं देवानुप्पिया! एस दमगपुरिसे महया-महया सद्देणं आरसइ? तए णं ते कोडुंबियपुरिसा एवं वयंति–एस णं सामी! तंसि खंडमल्लगंसि खंडघडगंसि य एडिज्जमाणंसि महया-महया सद्देणं आरसइ। तए णं से सागरदत्ते सत्थवाहे ते कोडुंबियपुरिसे एवं वयासी–मा णं तुब्भे देवानुप्पिया! एयस्स दमगस्स तं खंडं मल्लगं खंडघडगं च एगंते एडेह, पासे से ठवेह जहा अपत्तियं न भवइ। ते वि तहेव ठवेंति, ठवेत्ता तस्स दमगस्स अलंकारिय-कम्मं करेंति, करेत्ता सयपागसहस्सपागेहिं तेल्लेहिं अब्भंगेंति, अब्भंगिए समाणे सुरभिणा गंधट्टएणं गायं उव्वटेंति, उव्वट्टेत्ता उसिणोदग-गंधोदएणं ण्हाणेंति, सीओदगेणं ण्हाणेंति, पम्हल-सुकुमालाए गंधकासाईए गायाइं लूहेंति, लूहेत्ता हंसलक्खणं पडगसाडगं परिहेंति, सव्वालंकारविभूसियं करेंति, विपुलं असन-पान-खाइम-साइमं भोयावेंति, भोयावेत्ता सागरदत्तस्स उवणेंति। तए णं से सागरदत्ते सत्थवाहे सूमालियं दारियं ण्हायं जाव सव्वालंकारविभूसियं करेत्ता तं दमगपुरिसं एवं वयासी–एस णं देवानुप्पिया! मम धूया इट्ठा कंता पिया मणुण्णा मणामा। एवं णं अहं तव भारियत्ताए दलयामि, भद्दियाए भद्दओ भवेज्जासि। तए णं से दमगपुरिसे सागरदत्तस्स एयमट्ठं पडिसुणेइ, पडिसुणेत्ता सूमालियाए दारियाए सद्धिं वासघरं अनुपविसइ सूमालियाए दारियाए सद्धिं तलिमंसि निवज्जइ। तए णं से दमगपुरिसे सूमालियाए इमेयारूवं अंगफासं पडिसंवेदेइ, से जहानामए–असिपत्ते इ वा जाव एत्तो अमनामतरागं चेव अंगफासं पच्चणुब्भवमाणे विहरइ। तए णं से दमगपुरिसे सूमालियाए दारियाए अंगफासं असहमाणे अवसवसे मुहुत्तमेत्तं संचिट्ठइ। तए णं से दमगपुरिसे सूमालियं दारियं सुहपसुत्तं जाणित्ता सूमालियाए दारियाए पासाओ उट्ठेइ, उट्ठेत्ता जेणेव सए सयणिज्जे तेणेव उवागच्छइ, उवागच्छित्ता सयणिज्जंसि निवज्जइ। तए णं सा सूमालिया दारिया तओ मुहुत्तंतरस्स पडिबुद्धा समाणी पइव्वया पइमणुरत्ता पइं पासे अपस्समाणी तलिमाओ उट्ठेइ, उट्ठेत्ता जेणेव से सयणिज्जे तेणेव उवागच्छइ, उवागच्छित्ता दमगपुरिसस्स पासे णुवज्जइ। तए णं से दमगपुरिसे सूमालियाए दारियाए दोच्चंपि इमं एयारूवं अंगफासं पडिसंवेदेइ जाव अकामए अवसवसे मुहुत्तमेत्तं संचिट्ठइ। तए णं से दमगपुरिसे सूमालियं दारियं सुहपसुत्तं जाणित्ता० सयणिज्जाओ अब्भुट्ठेइ, अब्भुट्ठेत्ता वासघराओ निग्गच्छइ, निग्गच्छित्ता खंडमल्लगं खंडघडगं च गहाय मारामुक्के विव काए जामेव दिसिं पाउब्भूए तामेव दिसिं पडिगए। तए णं सा सूमालिया दारिया तओ मुहुत्तंतरस्स पडिबुद्धा पतिव्वया पइमणुरत्ता पइं पासे अपासमाणी सयणिज्जाओ उट्ठेइ, दमगपुरिसस्स सव्वओ समंता मग्गण-गवेसणं करेमाणी-करेमाणी वासधरस्स दारं विहाडियं पासइ, पासित्ता एवं वयासी–गए णं से दमगपुरिसे त्ति कट्टु ओहयमनसंकप्पा करतलपल्हत्थमुही अट्टज्झाणोवगया ज्झियायइ।
Sutra Meaning : જુઓ સૂત્ર ૧૬૧
Mool Sutra Transliteration : [sutra] tae nam sa sumaliya dariya tao muhuttamtarassa padibuddha pativvaya paimanuratta paim pase apasamani sayanijjao utthei, sagarassa daragassa savvao samamta magganam-gavesanam karemani-karemani vasadharassa daram vihadiyam pasai, pasitta evam vayasi– gae nam se sagarae tti kattu ohayamanasamkappa karatalapalhatthamuhi attajjhanovagaya jjhiyayai. Tae nam sa bhadda satthavahi kallam pauppabhayae rayanie utthiyammi sure sahassarassimmi dinayare teyasa jalamte dasachedim saddavei, saddavetta evam vayasi–gachchhaha nam tumam devanuppie! Bahuvarassa muhadhovaniyam uvanehim. Tae nam sa dasachedi bhaddae satthavahie evam vutta samani eyamattham tahatti padisunei, padisunetta muhadhovaniyam genhai, genhitta jeneva vasaghare teneva uvagachchhai, uvagachchhitta sumaliyam dariyam ohayamanasamkappam karatalapalhatthamuhim attajjhanovagayam jjhiyayamani pasai, pasitta evam vayasi–kinnam tumam devanuppie! Ohayamanasamkappa karatalapalhatthamuhi attajjhanovagaya jjhiyahi? Tae nam sa sumaliya dariya tam dasachedim evam vayasi–evam khalu devanuppie! Sagarae darae mamam suhapasuttam janitta mama pasao utthei, utthetta vasagharaduvaram avamgunei, avamgunetta maramukke viva kae jameva disim paubbhue tameva disim padigae. Tae naham tao muhuttamtarassa padibuddha pativvaya paimanuratta paim pase apasamani sayanijjao utthemi sagarassa daragassa savvao samamta maggana-gavesanam karemani-karemani vasagharassa daram vihadiyam pasami, pasitta gae nam se sagarae ti kattu oha-yamanasamkappa karatalapalhatthamuha attajjhanovagaya jjhiyayami. Tae nam sa dasachedi sumaliyae dariyae eyamattham sochcha jeneva sagaradatte satthavahe teneva uvagachchhai, uvagachchhitta sagaradattassa eyamattham nivedei. Tae nam se sagaradatte dasachedie amtie eyamattham sochcha nisamma asurutte rutthe kuvie chamdikkie misimisemane jeneva jinadattassa satthavahassa gihe teneva uvagachchhai, uvagachchhitta jinadattam satthavaham evam vayasi–kinnam devanuppiya! Eyam juttam va pattam va kulanuruvam va kulasarisam va jannam sagarae darae sumaliyam dariyam aditthadosavadiya paivvayam vippajahaya ihamagae? Bahuhim khijjaniyahi ya rumtaniyahi ya uvalabhai. Tae nam jinadatte sagaradattassa satthavahassa eyamattham sochcha jeneva sagarae teneva uvagachchhai, uvagachchhitta sagarayam darayam evam vayasi–dutthu nam putta! Tume kayam sagaradattassa gihao iham havvamagachchhamtenam. Tam gachchhaha nam tumam putta! Evamavi gae sagaradattassa gihe. Tae nam se sagarae darae jinadattam satthavaham evam vayasi–aviyaim aham tao! Giripadanam va tarupadanam va maruppavayam va jalappavesam va jalanappavesam va visabhakkhanam va satthovadanam va vehanasam va giddhapattham va pavvajjam va videsagamanam va abbhu vagachchhejja, no khalu aham sagaradattassa giham gachchhejja. Tae nam se sagaradatte satthavahe kudumtariyae sagarassa eyamattham nisamei, nisametta lajjie vilie vidde jinadattassa satthavahassa gihao padinikkhamai, padinikkhamitta jeneva sae gihe teneva uvagachchhai, uvagachchhitta sukumaliyam dariyam saddavei, saddavetta amke nivesei, nivesetta evam vayasi–kinnam tava putta! Sagaraenam daraenam? Aham nam tumam tassa dahami, jassa nam tumam ittha kamta piya manunna manama bhavissasi tti sumaliyam dariyam tahim itthahim kamtahim piyahim manunnahim manamahim vagguhim sama- sasei, samasasetta padivisajjei. Tae nam se sagaradatte satthavahe annaya uppim agasatalagamsi suhanisanne rayamaggam aloemane-aloemane chitthai. Tae nam se sagaradatte egam maham damagapurisam pasai–damdikhamda-nivasanam khamdamallaga-khamdadhadaga-hatthagayam phutta-hadahada-sisam machchhiyasahassehim annijjamanamaggam. Tae nam se sagaradatte satthavahe kodumbiyapurise saddavei, saddavetta evam vayasi–tubbhe nam devanuppiya! Eyam damagapurisam vipulenam asana-pana-khaima-saimenam palobheha, giham anuppaveseha, anuppavesetta khamdamallagam khamdaghadagam cha se egamte edeha, edetta alamkariyakammam kareha, nhayam kayabalikammam kaya-kouya-mamgala-payachchhittam savvalamkaravibhusiyam kareha, karetta manunnam asana-pana-khaima-saimam bhoyaveha, mama amtiyam uvaneha. Tae nam te kodumbiyapurisa java padisunemti, padisunetta jeneva se damagapurise teneva uvagachchhamti, uvagachchhitta tam damagam asana-pana-khaima-saimenam uvappalobhemti, uvappalobhetta sayam giham anuppavesamti, anuppavesetta tam khamdamallagam khamdaghadagam cha tassa damagapurisassa egamte edemti. Tae nam se damage tamsi khamdamallagamsi khamdaghadagamsi ya edijjamanamsi mahaya-mahaya saddenam arasai. Tae nam se sagaradatte satthavahe tassa damagapurisassa tam mahaya-mahaya arasiyasaddam sochcha nisamma kodumbiyapurise evam vayasi–kinnam devanuppiya! Esa damagapurise mahaya-mahaya saddenam arasai? Tae nam te kodumbiyapurisa evam vayamti–esa nam sami! Tamsi khamdamallagamsi khamdaghadagamsi ya edijjamanamsi mahaya-mahaya saddenam arasai. Tae nam se sagaradatte satthavahe te kodumbiyapurise evam vayasi–ma nam tubbhe devanuppiya! Eyassa damagassa tam khamdam mallagam khamdaghadagam cha egamte edeha, pase se thaveha jaha apattiyam na bhavai. Te vi taheva thavemti, thavetta tassa damagassa alamkariya-kammam karemti, karetta sayapagasahassapagehim tellehim abbhamgemti, abbhamgie samane surabhina gamdhattaenam gayam uvvatemti, uvvattetta usinodaga-gamdhodaenam nhanemti, siodagenam nhanemti, pamhala-sukumalae gamdhakasaie gayaim luhemti, luhetta hamsalakkhanam padagasadagam parihemti, savvalamkaravibhusiyam karemti, vipulam asana-pana-khaima-saimam bhoyavemti, bhoyavetta sagaradattassa uvanemti. Tae nam se sagaradatte satthavahe sumaliyam dariyam nhayam java savvalamkaravibhusiyam karetta tam damagapurisam evam vayasi–esa nam devanuppiya! Mama dhuya ittha kamta piya manunna manama. Evam nam aham tava bhariyattae dalayami, bhaddiyae bhaddao bhavejjasi. Tae nam se damagapurise sagaradattassa eyamattham padisunei, padisunetta sumaliyae dariyae saddhim vasagharam anupavisai sumaliyae dariyae saddhim talimamsi nivajjai. Tae nam se damagapurise sumaliyae imeyaruvam amgaphasam padisamvedei, se jahanamae–asipatte i va java etto amanamataragam cheva amgaphasam pachchanubbhavamane viharai. Tae nam se damagapurise sumaliyae dariyae amgaphasam asahamane avasavase muhuttamettam samchitthai. Tae nam se damagapurise sumaliyam dariyam suhapasuttam janitta sumaliyae dariyae pasao utthei, utthetta jeneva sae sayanijje teneva uvagachchhai, uvagachchhitta sayanijjamsi nivajjai. Tae nam sa sumaliya dariya tao muhuttamtarassa padibuddha samani paivvaya paimanuratta paim pase apassamani talimao utthei, utthetta jeneva se sayanijje teneva uvagachchhai, uvagachchhitta damagapurisassa pase nuvajjai. Tae nam se damagapurise sumaliyae dariyae dochchampi imam eyaruvam amgaphasam padisamvedei java akamae avasavase muhuttamettam samchitthai. Tae nam se damagapurise sumaliyam dariyam suhapasuttam janitta0 sayanijjao abbhutthei, abbhutthetta vasagharao niggachchhai, niggachchhitta khamdamallagam khamdaghadagam cha gahaya maramukke viva kae jameva disim paubbhue tameva disim padigae. Tae nam sa sumaliya dariya tao muhuttamtarassa padibuddha pativvaya paimanuratta paim pase apasamani sayanijjao utthei, damagapurisassa savvao samamta maggana-gavesanam karemani-karemani vasadharassa daram vihadiyam pasai, pasitta evam vayasi–gae nam se damagapurise tti kattu ohayamanasamkappa karatalapalhatthamuhi attajjhanovagaya jjhiyayai.
Sutra Meaning Transliteration : Juo sutra 161