Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1104151
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-१५ गोशालक

 Translated Chapter :

શતક-૧૫ ગોશાલક
Section : Translated Section :
Sutra Number : 651 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] तेणं कालेणं तेणं समएणं समणस्स भगवओ महावीरस्स अंतेवासी पाईणजाणवए सव्वानुभूती नामं अनगारे पगइभद्दए पगइउवसंते पगइपयणुकोहमाणमायालोभे मिउमद्दवसंपन्ने अल्लीणे विनीए धम्मायरियाणुरागेणं एयमट्ठं असद्दहमाणे उट्ठाए उट्ठेइ, उट्ठेत्ता जेणेव गोसाले मंखलिपुत्ते तेणेव उवागच्छइ, उवागच्छित्ता गोसाले मंखलिपुत्ते एवं वयासी– जे वि ताव गोसाला! तहारूवस्स समणस्स वा माहणस्स वा अंतियं एगमवि आरियं धम्मियं सुवयणं निसामेति, से वि ताव वंदति नमंसति सक्कारेति सम्माणेति कल्लाणं मंगलं देवयं चेइयं पज्जुवासति, किमंग पुण तुमं गोसाला! भगवया चेव पव्वाविए, भगवया चेव मुंडाविए, भगवया चेव सेहाविए, भगवया चेव सिक्खाविए, भगवया चेव बहुस्सुतीकए, भगवओ चेव मिच्छं विप्पडिवन्ने? तं मा एवं गोसाला! नारिहसि गोसाला! सच्चेव ते सा छाया नो अन्ना। तए णं से गोसाले मंखलिपुत्ते सव्वाणुभूतिणा अनगारेणं एवं वुत्ते समाणे आसुरुत्ते रुट्ठे कुविए चंडिक्किए मिसि-मिसेमाणे सव्वाणुभूतिं अनगारं तवेणं तेएणं एगाहच्चं कूडाहच्चं भासरासिं करेति। तए णं से गोसाले मंखलिपुत्ते सव्वाणुभूतिं अनगारं तवेणं तेएणं एगाहच्चं कूडाहच्चं भासरासिं करेत्ता दोच्चं पि समणं भगवं महावीरं उच्चावयाहिं आओसणाहिं आओसइ, उच्चावयाहिं उद्धंसणाहिं उद्धंसेति, उच्चावयाहिं निब्भंछणाहिं निब्भंछेति, उच्चावयाहिं निच्छोडणाहिं निच्छोडेति, निच्छोडेत्ता एवं वयासी– नट्ठे सि कदाइ, विणट्ठे सि कदाइ, भट्ठे सि कदाइ, नट्ठ-विनट्ठ-भट्ठे सि कदाइ, अज्ज न भवसि, नाहि ते ममाहिंतो सुहमत्थि। तेणं कालेणं तेणं समएणं समणस्स भगवओ महावीरस्स अंतेवासी कोसलजाणवए सुनक्खत्ते नामं अनगारे पगइभद्दए जाव विनीए धम्मायरियाणुरागेणं एयमट्ठं असद्दहमाणे उठाए उट्ठेइ, उट्ठेत्ता जेणेव गोसाले मंखलिपुत्ते तेणेव उवागच्छइ, उवागच्छित्ता गोसालं मंखलिपुत्तं एवं वयासी– जे वि ताव गोसाला! तहारूवस्स समणस्स वा माहणस्स वा अंतियं एगमवि आरियं धम्मियं सुवयणं निसामेति, से वि ताव वंदति नमंसति सक्कारेति सम्माणेति कल्लाणं मंगलं देवयं चेइयं पज्जुवासति, किमंग पुण तुमं गोसाला! भगवया चेव पव्वाविए, भगवया चेव मुंडाविए, भगवया चेव सेहाविए, भगवया चेव सिक्खाविए, भगवया चेव बहुस्सुतीकए, भगवओ चेव मिच्छं विप्पडिवन्ने? तं मा एवं गोसाला! नारिहसि गोसाला! सच्चेव ते सा छाया नो अन्ना। तए णं से गोसाले मंखलिपुत्ते सुनक्खत्तेणं अनगारेणं एवं वुत्ते समाणे आसुरुत्ते रुट्ठे कुविए चंडिक्किए मिसिमिसेमाणे सुनक्खत्तं अनगारं तवेणं तेएणं परितावेइ। तए णं से सुनक्खत्ते अनगारे गोसालेणं मंखलिपुत्तेणं तवेणं तेएणं परिताविए समाणे जेणेव समणे भगवं महा-वीरे तेणेव उवागच्छइ, उवागच्छित्ता समणं भगवं महावीरं तिक्खुत्तो वंदइ नमंसइ, वंदित्ता नमंसित्ता सयमेव पंच महव्वयाइं आरु-भेति, आरुभेत्ता समणा य समणीओ य खामेइ, खामेत्ता आलोइय-पडिक्कंते समाहिपत्ते आनुपुव्वीए कालगए। तए णं से गोसाले मंखलिपुत्ते सुनक्खत्तं अनगारं तवेणं तेएणं परितावेत्ता तच्चं पि समणं भगवं महावीरं उच्चावयाहिं आओसणाहिं आओसइ, उच्चावयाहिं उद्धंसणाहिं उद्धंसेति, उच्चावयाहिं निब्भंछणाहिं निब्भंछेति, उच्चावयाहिं निच्छोडणाहिं निच्छोडेति, निच्छोडेत्ता एवं वयासी–नट्ठे सि कदाइ, विनट्ठे सि कदाइ, भट्ठे सि कदाइ, नट्ठ-विणट्ठ-भट्ठे सि कदाइ, अज्ज न भवसि, नाहि ते ममाहिंतो सुहमत्थि। तए णं समणे भगवं महावीरे गोसालं मंखलिपुत्तं एवं वयासी–जे वि ताव गोसाला! तहारूवस्स समणस्स वा माहणस्स वा अंतियं एगमवि आरियं धम्मियं सुवयणं निसामेति, से वि ताव वंदति नमंसति सक्कारेति सम्माणेति कल्लाणं मंगलं देवयं चेइयं पज्जुवासति, किमंग पुण गोसाला! तुमं मए चेव पव्वाविए, मए चेव मुंडाविए, मए चेव सेहाविए, मए चेव सिक्खा विए, मए चेव बहुस्सुतीकए, ममं चेव मिच्छं विप्पडिवन्ने? तं मा एवं गोसाला! नारिहसि गोसाला! सच्चेव ते सा छाया नो अन्ना। तए णं से गोसाले मंखलिपुत्ते समणेणं भगवया महावीरेणं एवं वुत्ते समाणे आसुरुत्ते रुट्ठे कुविए चंडिक्किए मिसिमिसेमाणे तेयासमुग्घाएणं समोहण्णइ, समोहणित्ता सत्तट्ठ पयाइं पच्चोसक्कइ; पच्चोसक्कित्ता समणस्स भगवओ महावीरस्स वहाए सरीरगंसि तेयं निसिरति–से जहानामए वाउक्कलिया इ वा वायमंडलिया इ वा सेलंसि वा कुड्डंसि वा थंभंसि वा थूभंसि वा आवारि-ज्जमाणी वा निवारिज्जमाणी वा सा णं तत्थ नो कमति नो पक्कमति एवामेव गोसालस्स वि मंखलिपुत्तस्स तवे तेए समणस्स भगवओ महावीरस्स वहाए सरीरगंसि निसिट्ठे समाणे से णं तत्थ नो कमति नो पक्कमति अंचियंचिं करेति, करेत्ता आयाहिण-पयाहिणं करेति, करेत्ता उड्ढं वेहासं उप्पइए, से णं तओ पडिहए पडिनियत्तमाणे तमेव गोसालस्स मंखलिपुत्तस्स सरीरगं अनुडहमाणे-अनुडहमाणे अंतो-अंतो अनुप्पविट्ठे। तए णं से गोसाले मंखलिपुत्ते सएणं तेएणं अन्नाइट्ठे समाणे समणं भगवं महावीरं एवं वयासी–तुमं णं आउसो कासवा! ममं तवेणं तेएणं अन्नाइट्ठे समाणे अंतो छण्हं मासाणं पित्तज्जरपरिगयसरीरे दाहवक्कंतीए छउमत्थे चेव कालं करेस्ससि। तए णं समणे भगवं महावीरे गोसालं मंखलिपुत्तं एवं वयासी–नो खलु अहं गोसाला! तव तवेणं तेएणं अन्नाइट्ठे समाणे अंतो छण्हं मासाणं पित्तज्जरपरिगयसरीरे दाहवक्कंतीए छउमत्थे चेव कालं करेस्सामि, अहण्णं अन्नाइं सोलस वासाइं जिने सुहत्थी विहरिस्सामि। तुमं णं गोसाला! अप्पणा चेव सएणं तेएणं अन्नाइट्ठे समाणे अंतो सत्तरत्तस्स पित्तज्जरपरिगयसरीरे दाहवक्कंतीए छउमत्थे चेव कालं करेस्ससि। तए णं सावत्थीए नगरीए सिंघाडग-तिग-चउक्क-चच्चर-चउम्मुह-महापह-पहेसु बहुजनो अन्नमन्नस्स एवमाइक्खइ जाव एवं परूवेइ–एवं खलु देवानुप्पिया! सावत्थीए नगरीए बहिया कोट्ठए चेइए दुवे जिणा संलवंति–एगे वदंति तुमं पुव्विं कालं करेस्ससि, एगे वदंति तुमं पुव्विं कालं करेस्ससि। तत्थ णं के पुण सम्मावादी? के मिच्छावादी? तत्थ णं जे से अहप्पहाणे जणे से वदति–समणे भगवं महावीरे सम्मावादी, गोसाले मंखलिपुत्ते मिच्छावादी।
Sutra Meaning : જુઓ સૂત્ર ૬૪૯
Mool Sutra Transliteration : [sutra] tenam kalenam tenam samaenam samanassa bhagavao mahavirassa amtevasi painajanavae savvanubhuti namam anagare pagaibhaddae pagaiuvasamte pagaipayanukohamanamayalobhe miumaddavasampanne alline vinie dhammayariyanuragenam eyamattham asaddahamane utthae utthei, utthetta jeneva gosale mamkhaliputte teneva uvagachchhai, uvagachchhitta gosale mamkhaliputte evam vayasi– Je vi tava gosala! Taharuvassa samanassa va mahanassa va amtiyam egamavi ariyam dhammiyam suvayanam nisameti, se vi tava vamdati namamsati sakkareti sammaneti kallanam mamgalam devayam cheiyam pajjuvasati, kimamga puna tumam gosala! Bhagavaya cheva pavvavie, bhagavaya cheva mumdavie, bhagavaya cheva sehavie, bhagavaya cheva sikkhavie, bhagavaya cheva bahussutikae, bhagavao cheva michchham vippadivanne? Tam ma evam gosala! Narihasi gosala! Sachcheva te sa chhaya no anna. Tae nam se gosale mamkhaliputte savvanubhutina anagarenam evam vutte samane asurutte rutthe kuvie chamdikkie misi-misemane savvanubhutim anagaram tavenam teenam egahachcham kudahachcham bhasarasim kareti. Tae nam se gosale mamkhaliputte savvanubhutim anagaram tavenam teenam egahachcham kudahachcham bhasarasim karetta dochcham pi samanam bhagavam mahaviram uchchavayahim aosanahim aosai, uchchavayahim uddhamsanahim uddhamseti, uchchavayahim nibbhamchhanahim nibbhamchheti, uchchavayahim nichchhodanahim nichchhodeti, nichchhodetta evam vayasi– natthe si kadai, vinatthe si kadai, bhatthe si kadai, nattha-vinattha-bhatthe si kadai, ajja na bhavasi, nahi te mamahimto suhamatthi. Tenam kalenam tenam samaenam samanassa bhagavao mahavirassa amtevasi kosalajanavae sunakkhatte namam anagare pagaibhaddae java vinie dhammayariyanuragenam eyamattham asaddahamane uthae utthei, utthetta jeneva gosale mamkhaliputte teneva uvagachchhai, uvagachchhitta gosalam mamkhaliputtam evam vayasi– Je vi tava gosala! Taharuvassa samanassa va mahanassa va amtiyam egamavi ariyam dhammiyam suvayanam nisameti, se vi tava vamdati namamsati sakkareti sammaneti kallanam mamgalam devayam cheiyam pajjuvasati, kimamga puna tumam gosala! Bhagavaya cheva pavvavie, bhagavaya cheva mumdavie, bhagavaya cheva sehavie, bhagavaya cheva sikkhavie, bhagavaya cheva bahussutikae, bhagavao cheva michchham vippadivanne? Tam ma evam gosala! Narihasi gosala! Sachcheva te sa chhaya no anna. Tae nam se gosale mamkhaliputte sunakkhattenam anagarenam evam vutte samane asurutte rutthe kuvie chamdikkie misimisemane sunakkhattam anagaram tavenam teenam paritavei. Tae nam se sunakkhatte anagare gosalenam mamkhaliputtenam tavenam teenam paritavie samane jeneva samane bhagavam maha-vire teneva uvagachchhai, uvagachchhitta samanam bhagavam mahaviram tikkhutto vamdai namamsai, vamditta namamsitta sayameva pamcha mahavvayaim aru-bheti, arubhetta samana ya samanio ya khamei, khametta aloiya-padikkamte samahipatte anupuvvie kalagae. Tae nam se gosale mamkhaliputte sunakkhattam anagaram tavenam teenam paritavetta tachcham pi samanam bhagavam mahaviram uchchavayahim aosanahim aosai, uchchavayahim uddhamsanahim uddhamseti, uchchavayahim nibbhamchhanahim nibbhamchheti, uchchavayahim nichchhodanahim nichchhodeti, nichchhodetta evam vayasi–natthe si kadai, vinatthe si kadai, bhatthe si kadai, nattha-vinattha-bhatthe si kadai, ajja na bhavasi, nahi te mamahimto suhamatthi. Tae nam samane bhagavam mahavire gosalam mamkhaliputtam evam vayasi–je vi tava gosala! Taharuvassa samanassa va mahanassa va amtiyam egamavi ariyam dhammiyam suvayanam nisameti, se vi tava vamdati namamsati sakkareti sammaneti kallanam mamgalam devayam cheiyam pajjuvasati, kimamga puna gosala! Tumam mae cheva pavvavie, mae cheva mumdavie, mae cheva sehavie, mae cheva sikkha vie, mae cheva bahussutikae, mamam cheva michchham vippadivanne? Tam ma evam gosala! Narihasi gosala! Sachcheva te sa chhaya no anna. Tae nam se gosale mamkhaliputte samanenam bhagavaya mahavirenam evam vutte samane asurutte rutthe kuvie chamdikkie misimisemane teyasamugghaenam samohannai, samohanitta sattattha payaim pachchosakkai; pachchosakkitta samanassa bhagavao mahavirassa vahae sariragamsi teyam nisirati–se jahanamae vaukkaliya i va vayamamdaliya i va selamsi va kuddamsi va thambhamsi va thubhamsi va avari-jjamani va nivarijjamani va sa nam tattha no kamati no pakkamati evameva gosalassa vi mamkhaliputtassa tave tee samanassa bhagavao mahavirassa vahae sariragamsi nisitthe samane se nam tattha no kamati no pakkamati amchiyamchim kareti, karetta ayahina-payahinam kareti, karetta uddham vehasam uppaie, se nam tao padihae padiniyattamane tameva gosalassa mamkhaliputtassa sariragam anudahamane-anudahamane amto-amto anuppavitthe. Tae nam se gosale mamkhaliputte saenam teenam annaitthe samane samanam bhagavam mahaviram evam vayasi–tumam nam auso kasava! Mamam tavenam teenam annaitthe samane amto chhanham masanam pittajjaraparigayasarire dahavakkamtie chhaumatthe cheva kalam karessasi. Tae nam samane bhagavam mahavire gosalam mamkhaliputtam evam vayasi–no khalu aham gosala! Tava tavenam teenam annaitthe samane amto chhanham masanam pittajjaraparigayasarire dahavakkamtie chhaumatthe cheva kalam karessami, ahannam annaim solasa vasaim jine suhatthi viharissami. Tumam nam gosala! Appana cheva saenam teenam annaitthe samane amto sattarattassa pittajjaraparigayasarire dahavakkamtie chhaumatthe cheva kalam karessasi. Tae nam savatthie nagarie simghadaga-tiga-chaukka-chachchara-chaummuha-mahapaha-pahesu bahujano annamannassa evamaikkhai java evam paruvei–evam khalu devanuppiya! Savatthie nagarie bahiya kotthae cheie duve jina samlavamti–ege vadamti tumam puvvim kalam karessasi, ege vadamti tumam puvvim kalam karessasi. Tattha nam ke puna sammavadi? Ke michchhavadi? Tattha nam je se ahappahane jane se vadati–samane bhagavam mahavire sammavadi, gosale mamkhaliputte michchhavadi.
Sutra Meaning Transliteration : Juo sutra 649