Sutra Navigation: Bhagavati ( ભગવતી સૂત્ર )

Search Details

Mool File Details

Anuvad File Details

Sr No : 1104020
Scripture Name( English ): Bhagavati Translated Scripture Name : ભગવતી સૂત્ર
Mool Language : Ardha-Magadhi Translated Language : Gujarati
Chapter :

शतक-११

 Translated Chapter :

શતક-૧૧
Section : उद्देशक-११ काल Translated Section : ઉદ્દેશક-૧૧ કાલ
Sutra Number : 520 Category : Ang-05
Gatha or Sutra : Sutra Sutra Anuyog :
Author : Deepratnasagar Original Author : Gandhar
 
Century : Sect : Svetambara1
Source :
 
Mool Sutra : [सूत्र] वासुदेवमायरो वासुदेवंसि गब्भं वक्कममाणंसि एएसिं चोद्दसण्हं महासुविणाणं अन्नयरेसु सत्त महा- सुविणे पासित्ता णं पडिबु-ज्झंति। बलदेवमायरो बलदेवंसि गब्भं वक्कममाणंसि एएसिं चोद्दसण्हं महासुविणाणं अन्नयरेसु चत्तारि महासुविणे पासित्ता णं पडिबुज्झंति। मंडलियमायरो मंडलियंसि गब्भं वक्कममाणंसि एएसि णं चोद्दसण्हं महासुविणाणं अन्नयरं एगं महासुविणं पासित्ता णं पडिबुज्झंति। इमे य णं देवानुप्पिया! पभावतीए देवीए एगे महासुविणे दिट्ठे, तं ओराले णं देवानुप्पिया! पभावतीए देवीए सुविणे दिट्ठे जाव आरोग्ग-तुट्ठिदीहाउ कल्लाण-मंगल्लकारए णं देवानुप्पिया! पभावतीए देवीए सुविणे दिट्ठे, अत्थलाभो देवानुप्पिया! भोगलाभो देवानुप्पिया! पुत्तलाभो देवानुप्पिया! रज्जलाभो देवानुप्पिया! एवं खलु देवानुप्पिया! पभावती देवी नव-ण्हं मासाणं बहुपडिपुण्णाणं अद्धट्ठमाण य राइंदियाणं वीइक्कंताणं तुम्हं कुलकेउं जाव देवकुमार-समप्पभं दारगं पयाहिति। से वि य णं दारए उम्मुक्कबालभावे विण्णय-परिणयमेत्ते जोव्वणगमणुप्पत्ते सुरे वीरे विक्कंते वित्थिण्ण-विउलबल-वाहणे रज्जवई राया भविस्सइ, अनगारे वा भावियप्पा। तं ओराले णं देवानुप्पिया! पभावतीए देवीए सुविणे दिट्ठे जाव आरोग्ग-तुट्ठि-दीहाउ-कल्लाण-मंगल्लकारए पभावतीए देवीए सुविणे दिट्ठे। तए णं से बले राया सुविणलक्खणपाढगाणं अंतिए एयमट्ठं सोच्चा निसम्म हट्ठतुट्ठे करयल परिग्गहियं दसनहं सिरसावत्तं मत्थए अंजलिं कट्टु ते सुविणलक्खणपाढगे एवं वयासी–एवमेयं देवानुप्पिया! तहमेयं देवानुप्पिया! अवितहमेयं देवानुप्पिया! असंदिद्धमेयं देवानुप्पिया! इच्छियमेयं देवानुप्पिया! पडिच्छियमेयं देवानुप्पिया! इच्छिय-पडिच्छियमेयं देवानुप्पिया! से जहेयं तुब्भे वदह त्ति कट्टु तं सुविणं सम्मं पडिच्छइ, पडिच्छित्ता सुविणलक्खणपाढए विउलेणं असन-पान-खाइम-साइम-पुप्फ-वत्थ-गंध-मल्लालंकारेणं सक्कारेइ सम्माणेइ, सक्कारेत्ता सम्माणेत्ता विउलं जीवियारिहं पीइदाणं दलयइ, दलयित्ता पडिविसज्जेइ, पडिविसज्जेत्ता सीहासणाओ अब्भुट्ठेइ, अब्भुट्ठेत्ता जेणेव पभावती देवी तेणेव उवागच्छइ, उवागच्छित्ता पभावतिं देवीं ताहिं इट्ठाहिं जाव मिय-महुर-सस्सिरीयाहिं वग्गूहिं संलवमाणे-संलवमाणे एवं वयासी– एवं खलु देवानुप्पिए! सुविणसत्थंसि बायालीसं सुविणा, तीसं महासुविणा–बावत्तरिं सव्वसुविणा दिट्ठा। तत्थ णं देवानुप्पिए! तित्थगरमायरो वा चक्कवट्टिमायरो वा तित्थगरंसि वा चक्कवट्टिंसि वा गब्भं वक्कममाणंसि एएसिं तीसाए महासुविणाणं इमे चोद्दस महासुविणे पासित्ता णं पडिबुज्झंति तं चेव जाव मंडलियमायरो मंडलियंसि गब्भं वक्कममाणंसि एएसि णं चोद्दसण्हं महासुविणाणं अन्नयरं एगं महासुविणं पासित्ता णं पडिबुज्झंति। इमे य णं तुमे देवानुप्पिए! एगे महासुविणे दिट्ठे, तं ओराले णं तुमे देवी! सुविणे दिट्ठे जाव रज्जवई राया भविस्सइ, अनगारे वा भावियप्पा, तं ओराले णं तुमे देवी! सुविणे दिट्ठे जाव आरोग्ग-तुट्ठि-कल्लाण-मंगल्लकारए णं तुमे देवी! सुविणे दिट्ठे त्ति कट्टु पभावतिं देविं ताहिं इट्ठाहिं जाव मिय-महुर-सस्सिरीयाहिं वग्गूहिं दोच्चं पि तच्चं पि अणुबूहइ। तए णं सा पभावती देवी बलस्स रन्नो अंतियं एयमट्ठं सोच्चा निसम्म हट्ठतुट्ठा करयल परिग्गहियं दसनहं सिर-सावत्तं मत्थए अंजलिं कट्टु एवं वयासी– एयमेयं देवानुप्पिया! जाव तं सुविणं सम्मं पडिच्छइ, पडिच्छित्ता बलेणं रण्णा अब्भणुण्णाया समाणो नानामणिरयणभत्ति चित्ताओ भद्दासणाओ अब्भुट्ठेइ, अतुरियमचवलमसंभंताए अविलंबियाए रायहंसरिसीए गईए जेणेव सए भवने तेणेव उवागच्छइ, उवागच्छित्ता सयं भवनमणुपविट्ठा। तए णं सा पभावती देवो ण्हाया कयबलिकम्मा जाव सव्वालंकारविभूसिया तं गब्भं नातिसोतेहि नातिउण्हेहिं नातितित्तेहिं नातिकडुएहिं नातिकसाएहिं नातिअंबिलेहिं नातिमहुरेहिं उउभयमाणसुहेहिं भोयण-च्छायण-गंध-मल्लेहिं जं तस्स गब्भस्स हियं मितं पत्थं गब्भपोसणं तं देसे य काले य आहारमाहारेमाणी विवित्तमउएहिं सयणासणेहिं पइरिक्कसुहाए मणाणुकूलाए विहारभूमीए पसत्थदोहला संपुण्णदोहला सम्माणियदोहला अविमाणियदोहला वोच्छिन्नदोहला विणीयदोहला ववगयरोग-सोग-मोह-भय-परित्तासा तं गब्भं सुहंसुहेणं परिवहति। तए णं सा पभावती देवी नवण्हं मासाणं बहुपडिपुण्णाणं अद्धट्ठमाण य राइंदियाणं वीइ-क्कंताणं सुकुमालपाणिपायं अहीणपडिपुण्णपंचिंदियसरीरं लक्खण-वंजण-गुणोववेयं माणुम्माण -प्पमाण-पडिपुण्ण-सुजाय-सव्वंगसुंदरंगं ससिसोमाकारं कंतं पियदंसणं सुरूवं दारयं पयाया। तए णं तीसे पभावतीए देवीए अंगपडियारियाओ पभावतिं देविं पसूयं जाणेत्ता जेणेव बले राया तेणेव उवाग-च्छंति, उवागच्छित्ता करयल परिग्गहियं दसनहं सिरसावत्तं मत्थए अंजलिं कट्टु बलं रायं जएणं विजएणं बद्धावेंति, बद्धावेत्ता एवं वयासी–एवं खलु देवानुप्पिया! पभावती देवी नवण्हं मासाणं बहुपडिपुण्णाणं जाव सुरूवं दारगं पयाया। तं एयण्णं देवानुप्पियाणं पियट्ठयाए पियं निवेदेमो। पियं भे भवतु। तए णं से बले राया अंगपडियारियाणं अंतियं एयमट्ठं सोच्चा निसम्म हट्ठतुट्ठ-चित्तमानंदिए नंदिए पीइमणे परम-सोमणस्सिए हरिसवसविसप्पमाणहियए धाराहयनीवसुरभिकुसुम-चंचुमाल-इयतणुए ऊसवियरोमकूवे तासिं अंगपडियारियाणं मउडवज्जं जहामालियं ओमोयं दलयइ, दलयित्ता सेतं रययामयं विमलसलिलपुण्णं भिंगारं पगिण्हइ, पगिण्हित्ता मत्थए धोवइ, धोवित्ता विउलं जीवियारिहं पीइदाणं दलयइ, दलयित्ता सक्कारेइ सम्माणेइ, सक्कारेत्ता सम्मानेत्ता पडि-विसज्जेइ।
Sutra Meaning : જુઓ સૂત્ર ૫૧૮
Mool Sutra Transliteration : [sutra] vasudevamayaro vasudevamsi gabbham vakkamamanamsi eesim choddasanham mahasuvinanam annayaresu satta maha- Suvine pasitta nam padibu-jjhamti. Baladevamayaro baladevamsi gabbham vakkamamanamsi eesim choddasanham mahasuvinanam annayaresu chattari mahasuvine pasitta nam padibujjhamti. Mamdaliyamayaro mamdaliyamsi gabbham vakkamamanamsi eesi nam choddasanham mahasuvinanam annayaram egam mahasuvinam pasitta nam padibujjhamti. Ime ya nam devanuppiya! Pabhavatie devie ege mahasuvine ditthe, tam orale nam devanuppiya! Pabhavatie devie suvine ditthe java arogga-tutthidihau kallana-mamgallakarae nam devanuppiya! Pabhavatie devie suvine ditthe, atthalabho devanuppiya! Bhogalabho devanuppiya! Puttalabho devanuppiya! Rajjalabho devanuppiya! Evam khalu devanuppiya! Pabhavati devi nava-nham masanam bahupadipunnanam addhatthamana ya raimdiyanam viikkamtanam tumham kulakeum java devakumara-samappabham daragam payahiti. Se vi ya nam darae ummukkabalabhave vinnaya-parinayamette jovvanagamanuppatte sure vire vikkamte vitthinna-viulabala-vahane rajjavai raya bhavissai, anagare va bhaviyappa. Tam orale nam devanuppiya! Pabhavatie devie suvine ditthe java arogga-tutthi-dihau-kallana-mamgallakarae pabhavatie devie suvine ditthe. Tae nam se bale raya suvinalakkhanapadhaganam amtie eyamattham sochcha nisamma hatthatutthe karayala pariggahiyam dasanaham sirasavattam matthae amjalim kattu te suvinalakkhanapadhage evam vayasi–evameyam devanuppiya! Tahameyam devanuppiya! Avitahameyam devanuppiya! Asamdiddhameyam devanuppiya! Ichchhiyameyam devanuppiya! Padichchhiyameyam devanuppiya! Ichchhiya-padichchhiyameyam devanuppiya! Se jaheyam tubbhe vadaha tti kattu tam suvinam sammam padichchhai, padichchhitta suvinalakkhanapadhae viulenam asana-pana-khaima-saima-puppha-vattha-gamdha-mallalamkarenam sakkarei sammanei, sakkaretta sammanetta viulam jiviyariham piidanam dalayai, dalayitta padivisajjei, padivisajjetta sihasanao abbhutthei, abbhutthetta jeneva pabhavati devi teneva uvagachchhai, uvagachchhitta pabhavatim devim tahim itthahim java miya-mahura-sassiriyahim vagguhim samlavamane-samlavamane evam vayasi– Evam khalu devanuppie! Suvinasatthamsi bayalisam suvina, tisam mahasuvina–bavattarim savvasuvina dittha. Tattha nam devanuppie! Titthagaramayaro va chakkavattimayaro va titthagaramsi va chakkavattimsi va gabbham vakkamamanamsi eesim tisae mahasuvinanam ime choddasa mahasuvine pasitta nam padibujjhamti tam cheva java mamdaliyamayaro mamdaliyamsi gabbham vakkamamanamsi eesi nam choddasanham mahasuvinanam annayaram egam mahasuvinam pasitta nam padibujjhamti. Ime ya nam tume devanuppie! Ege mahasuvine ditthe, tam orale nam tume devi! Suvine ditthe java rajjavai raya bhavissai, anagare va bhaviyappa, tam orale nam tume devi! Suvine ditthe java arogga-tutthi-kallana-mamgallakarae nam tume devi! Suvine ditthe tti kattu pabhavatim devim tahim itthahim java miya-mahura-sassiriyahim vagguhim dochcham pi tachcham pi anubuhai. Tae nam sa pabhavati devi balassa ranno amtiyam eyamattham sochcha nisamma hatthatuttha karayala pariggahiyam dasanaham sira-savattam matthae amjalim kattu evam vayasi– eyameyam devanuppiya! Java tam suvinam sammam padichchhai, padichchhitta balenam ranna abbhanunnaya samano nanamanirayanabhatti chittao bhaddasanao abbhutthei, aturiyamachavalamasambhamtae avilambiyae rayahamsarisie gaie jeneva sae bhavane teneva uvagachchhai, uvagachchhitta sayam bhavanamanupavittha. Tae nam sa pabhavati devo nhaya kayabalikamma java savvalamkaravibhusiya tam gabbham natisotehi natiunhehim natitittehim natikaduehim natikasaehim natiambilehim natimahurehim uubhayamanasuhehim bhoyana-chchhayana-gamdha-mallehim jam tassa gabbhassa hiyam mitam pattham gabbhaposanam tam dese ya kale ya aharamaharemani vivittamauehim sayanasanehim pairikkasuhae mananukulae viharabhumie pasatthadohala sampunnadohala sammaniyadohala avimaniyadohala vochchhinnadohala viniyadohala vavagayaroga-soga-moha-bhaya-parittasa tam gabbham suhamsuhenam parivahati. Tae nam sa pabhavati devi navanham masanam bahupadipunnanam addhatthamana ya raimdiyanam vii-kkamtanam sukumalapanipayam ahinapadipunnapamchimdiyasariram lakkhana-vamjana-gunovaveyam manummana -ppamana-padipunna-sujaya-savvamgasumdaramgam sasisomakaram kamtam piyadamsanam suruvam darayam payaya. Tae nam tise pabhavatie devie amgapadiyariyao pabhavatim devim pasuyam janetta jeneva bale raya teneva uvaga-chchhamti, uvagachchhitta karayala pariggahiyam dasanaham sirasavattam matthae amjalim kattu balam rayam jaenam vijaenam baddhavemti, baddhavetta evam vayasi–evam khalu devanuppiya! Pabhavati devi navanham masanam bahupadipunnanam java suruvam daragam payaya. Tam eyannam devanuppiyanam piyatthayae piyam nivedemo. Piyam bhe bhavatu. Tae nam se bale raya amgapadiyariyanam amtiyam eyamattham sochcha nisamma hatthatuttha-chittamanamdie namdie piimane parama-somanassie harisavasavisappamanahiyae dharahayanivasurabhikusuma-chamchumala-iyatanue usaviyaromakuve tasim amgapadiyariyanam maudavajjam jahamaliyam omoyam dalayai, dalayitta setam rayayamayam vimalasalilapunnam bhimgaram paginhai, paginhitta matthae dhovai, dhovitta viulam jiviyariham piidanam dalayai, dalayitta sakkarei sammanei, sakkaretta sammanetta padi-visajjei.
Sutra Meaning Transliteration : Juo sutra 518